ಅಮೆರಿಕದ ಸೇನಾ ಹೆಲಿಕಾಪ್ಟರ್ ಮೆಡಿಟರೇನಿಯನ್ ಕಡಲ್ ಗ್ ಬೂರ್ದು 5 ಜನ ತೀರ್ ಪೋಯೆರ್ ಪಂದ್ ಅಮೆರಿಕದ ಅಧಿಕಾರಿಲು ತೆರಿಪಾದೆರ್.
ನ.10 ಕ್ಕ್ ಟೇಕಾಫ್ ಆಯಿನ ಹೆಲಿಕಾಪ್ಟರ್ ತಾಂತ್ರಿಕ ದೋಷರ್ದ್ ಕಡಲದ ಗ್ ಬೂರ್ದುಂಡು. ಈ ಘಟನೆದ ಬಗೆಟ್ಟ್ ಅಧ್ಯಕ್ಷೆರ್ ಬಿಡೆನ್ ಸಂತಾಪ ತೆರಿಪಾದೆರ್. ಅಂಚೆನೆ ತೀರ್ ಪೋಯಿನ ಯೋಧೆರೆನ ಸೇವೆನ್ ಮೆಚ್ಚಿದೆರ್. ಪಶ್ಚಿಮ ಏಷ್ಯಾದ ಮಿತ್ತ್ ನಿಗಾ ದೀಯೆರೆ ಅಮೆರಿಕ ಈ ಪ್ರದೇಶಡ್ ಪಡೆನ್ ನಿಯೋಜನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್ ದ ಬಾಣಸವಾಡಿದ ರಿಂಗ್ ರೋಡ್ ಡ್ ಇಪ್ಪುನ ನಾಲ್ ಮಾಳಿಗೆದ ಕಟ್ವಾನಡ್ ಕೋಡೆ ರಾತ್ರೆ ತೂ ಪೊತ್ತ್ ದ್ಂಡ್.
ಈ ಪೊರ್ತುಡು ಉಲಯಿ ಇತ್ತಿನ 2 ಜನ ಭದ್ರತಾ ಸಿಬ್ಬಂದಿನ್ ರಕ್ಷಣೆ ಮಲ್ದೆರ್. ಅಗ್ನಿಶಾಮಕ ದಳ ಸಿಬ್ಬಂದಿ ತೂ ತೆಕ್ಕಾಂಡಲ ತರಬೇತಿ ಸಂಸ್ಥೆ, ಫರ್ನೀಚರ್ ಮಾರಾಟ ಮಾಳಿಗೆಡ್ ಇತ್ತಿನ ಲಕ್ಷರ್ದ್ ಎಚ್ಚ ಸೊತ್ತುಲು ತೂಟ್ಟ್ ಪೊತ್ತ್ ದ್ಂಡ್.
ಕುಡ್ಲ: ಬಿಜೆಪಿ ಯುವ ಮೋರ್ಚಾ ಕುಡ್ಲ ನಗರ ಉತ್ತರ ಮಂಡಲದ ಲೆಕ್ಕಡ್ ತುಡರ್ ಪರ್ಬ ನ.12 ದಾನಿ ಸುರತ್ಕಲ್ ಜಂಕ್ಷನ್ ಡ್ ನಡಪರೆ ಉಂಡು.
ಕಾಂಡೆ ಜಿಲ್ಲಾ ಮಟ್ಟದ ಕುಣಿತ ಭಜನೆ, ಗೂಡುದೀಪ ಪಂತೊ, ಭಜನೆದ ಸಾಧಕೆರ್ ದೀನ್ ರಾಜ್ ಕಳವಾರು ತಂಡದ 1000 ಜೋಕ್ಲೆರ್ದ್ ಕುಣಿತ ಭಜನೆ, ಗೋಪೂಜೆ, ಪಟಾಕಿದ ಪ್ರದರ್ಶನ ನಡಪರೆ ಉಂಡು.
ರಾತ್ರೆ 8 ಗಂಟೆರ್ದ್ ಶಿರಡಿ ಸಾಯಿಬಾಬಾ ಮಂದಿರದ ಆಶ್ರಿತ ಸಾಯಿಶಕ್ತಿ ಬಳಗ ಉರ್ವ ಚಿಲಿಂಬಿ ಮೊಕ್ಲೆರ್ದ್ ಪೌರಣಿಕ ನಾಟಕ ಬೊಳ್ಳಿಮಲೆತ ಶಿವಶಕ್ತಿಲು ನಾಟಕ ನಡಪರೆ ಉಂಡು.
ಈ ಲೇಸ್ ಮಾತೆರ್ಲ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ದೀಪಾವಳಿತ ದುಂಬುನಾನಿ, ಅಯೋಧ್ಯೆ ಪೊಸ ಗಿನ್ನಿಸ್ ದಾಖಲೆ ಮಲ್ಪರೆ ಪಿದಡ್ದ್ಂಡ್. ದೀಪೋತ್ಸವ ಲೇಸ್ ಡ್ 51 ಘಾಟ್‌ಲೆಡ್ 24 ಲಕ್ಷ ದೀಪ ಪೊತ್ತಾವರೆ ಉತ್ತರ ಪ್ರದೇಶ ಸರಕಾರ ದುಂಬು ಬೈದ್ಂಡ್.
25000 ಜನ ಸ್ವಯಂ ಸೇವಕೆರ್ 24 ಲಕ್ಷ ದೀಪ ಪೊತ್ತಾವರೆ ಉಲ್ಲೆರ್. ಗಿನ್ನಿಸ್ ಬುಕ್ ಆಫ್ ವರ್ಲ್ಡ್ ದಕಲೆನ ಟೀಮ್ ಉಪ್ಪುಂಡು. ಡ್ರೋನ್ ಕ್ಯಾಮರಾ ಪೂರಾ ಗಲಸ್‌ದ್ ದೀಪೊನು ಲೆಕ್ಕ ಮಲ್ಪುವೆರ್ಗೆ. ಈ ಲೇಸ್‌ನ್ ಮದ್ಯಾಹ್ನ 3 ಗಂಟೆಗ್ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥೆರ್ ಉದಿಪನ ಮಲ್ಪರೆ ಉಲ್ಲೆರ್.
ಇತಿಹಾಸ ಪ್ರಸಿದ್ಧ ಕೇರಳದ ಅನಂತಪುರ ದೇವಸ್ಥಾನಡ್ ದೇವೆರ್ನ ಪ್ರತಿಬಿಂಬ ಪಂದೇ ಲೆಪ್ಪುನ ಬಬಿಯಾ ಪುದರ್ ದ ಮುದಲೆ ದೇವೆರೆ ಪಾದ ಸೇರಿನ ಬೊಕ್ಕ ಭಕ್ತರೆಗ್‌ ಬೇಜಾರ್‌ ಆದಿತ್ತ್‌ಂಡ್. ಆಂಡ ಇತ್ತೆ ಅನಂತಪುರ ಕ್ಷೇತ್ರದ ಕಿರೆಟ್ಟ್ ಕುಡ ಒಂಜಿ ಮುದಲೆ ತೋಜಿದ್ ಬೈದ್ಂಡ್.
ಒಂಜಿ ವಾರದ ಪಿರವ್ ಭಕ್ತೆ ಒರಿ ಮುದಲೆನ್‌ ತೂಯಿಲಕ ಆಂಡ್‌ ಪಂದ್ ಪಂದಿತ್ತೆರ್. ಸಾಕ್ಷ್ಯಾಧಾರ ಇಜ್ಜಂದಿನೆರ್ದಾತ್ರ ನಂಬೆರೆ ಸಾಧ್ಯ ಆಯಿಜಿ. ಇತ್ತೆ ಕ್ಷೇತ್ರದ ಆಡಳಿತ ಮಂಡಳಿ ಮುದಲೆ ಇಪ್ಪುನೆನ್ ಖಚಿತಪಡಿಸಾದ್ಂಡ್. ಉಂದು ದೇವೆರ್ನ ಪವಾಡನ, ಕಾರಣಿಕ ಶಕ್ತಿ ಪನ್ಪುನಂಚ ಕ್ಷೇತ್ರದ ಕಿರೆಟ್ಟ್ ಮುದಲೆ ಪತ್ತೆಯಾತ್‌ಂಡ್.
ವಿಡಿಯೋಗಾದ್ ಈ ಲಿಂಕ್ ಓಪನ್ ಮಲ್ಪುಲೆ
ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಡ್ ಶನಿವಾರ ಮಧ್ಯಾಹ್ನ ಪಿರ ಭೂಕಂಪದ ಅನುಭವ ಆತ್‌ಂಡ್. ಮಧ್ಯಾಹ್ನ 3.36ಕ್ಕ್ 2.6 ತೀವ್ರತೆದ ಭೂಕಂಪ ಸಂಭವ ಆತ್‌ಂಡ್. ಕೇಂದ್ರಬಿಂದು ಉತ್ತರ ಜಿಲ್ಲೆಡ್ ಭೂಮಿದ ಮಿತ್ತ್‌ರ್ದ್ 10 ಕಿ.ಮೀ ತಿರ್ತ್‌ ಇತ್ತ್‌ಂಡ್‌ ಪಂದ್ ರಾಷ್ಟ್ರೀಯ ಭೂಕಂಪಶಾಸ್ತ್ರ ಕೇಂದ್ರ ತೆರಿಪಾದ್‌ಂಡ್.
ಉಜಿರೆ: ಮಾಜಿ ಸಚಿವೆರ್‌ ಬೊಕ್ಕ ರಾಜಾಜಿನಗರದ ಶಾಸಕೆರ್ ಸುರೇಶ ಕುಮಾರ್ ಬೆಂಗಳೂರ್ದ್ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಸೈಕಲ್ ಯಾತ್ರೆಡ್ ಬತ್ತ್ ದ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆಯೆರ್. ನ.8 ದಾನಿ ಕಾಂಡೆ ಬೆಂಗಳೂರುರ್ದ್‌ ಪಿದಡ್ದ್ ನ.10 ದಾನಿ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಬತ್ತ್‌ದ್ ತನ್ನ ಸೈಕಲ್ ಯಾತ್ರೆನ್ ಸಮಾಪ್ತಿ ಮಲ್ತೆರ್.
ನಿರಂತರವಾದ್ ಜಿ-ಮೇಲ್ ಖಾತೆ ಯೂಸ್‌ ಮಲ್ತಿಜಿಂಡ ಡಿಸೆಂಬರ್‌ಡ್ ರದ್ದಾಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್. ರಡ್ಡ್ ವರ್ಷರ್ದ್ ಗಲಸೊಂದು ಇಜ್ಜಂದಿನ ಜಿ-ಮೇಲ್ ಖಾತೆಲೆನ್ ರದ್ದು ಮಲ್ಪುನ ಹಿನ್ನಲೆ ಲಕ್ಷಾಂತರ ಜಿ-ಮೇಲ್ ಖಾತೆಲು ರದ್ದಾಪುನ ಸಾಧ್ಯತೆ ಉಂಡು ಪಂದ್ ವರದಿಯೊಂಜಿ ತೆರಿಪಾದ್‌ಂಡ್. ಒಂಜಿ ವೇಳೆ ಗೂಗಲ್ ಖಾತೆನ್ ಕನಿಷ್ಠ ರಡ್ಡ್ ವರ್ಷರ್ದ್ ಗಲಸೊಂದು ಇಜ್ಜಿಂಡ ಅತ್ತ್‌ಂಡ ಸೈನ್ ಇನ್ ಆಯಿಜಿಂಡ ನಮ ಖಾತೆ ಬೊಕ್ಕ ಅವೆತ ಕಂಟೆಂಟ್‌ನ್ ಡಿಲೀಟ್ ಮಲ್ಪುವೆರ್.
ಅವೆಟ್ಟ್ ಜಿ-ಮೇಲ್, ಡಾಕ್ಯುಮೆಂಟ್, ಡ್ರೈವ್, ಮೀಟ್, ಕ್ಯಾಲೆಂಡರ್ ಬೊಕ್ಕ ಗೂಗಲ್ ಫೋಟೊಸ್ ಕೂಡಾ ಸೇರುಂಡು ಪಂದ್ ತೆರಿಪಾದೆರ್. ಆಂಡ ಉಂದು ಸಂಘ, ಸಂಸ್ಥೆ, ಉದ್ಯಮ, ಶಾಲೆಗ್ ಸಂಬಂದಪಟ್ಟ ಜಿ-ಮೇಲ್ ಖಾತೆ ಮಿತ್ತ್ ಒವ್ವೇ ಪರಿಣಾಮ ಬೂರುಜಿ ಪಂದ್ ವರದಿಯಾತ್‌ಂಡ್. ಒಟ್ಟು ಸುಮಾರು 10 ಲಕ್ಷ ರ್ದ್‌ ಎಚ್ಚ ನಿಷ್ಕ್ರಿಯ ಖಾತೆಲು ಉಂಡು ಪಂದ್ ತೆರಿದ್ ಬೈದ್ಂಡ್.
ಸುಬ್ರಹ್ಮಣ್ಯ : ದೀನ ದಲಿತರ ಬೊಕ್ಕ ಬಡವೆರ್ನ ಮೋನೆಡ್ ತೆಲಿಕೆನ್ ಕನಪುನ ನಮ್ಮ ಅಂತರಾಷ್ಟ್ರೀಯ ಲಯನ್ಸ್ ದ ಉದ್ದೇಶದೊಟ್ಟಿಗೆ ಬಡವೆರ್ನ ಸೇವೆನ್ ನಿರಂತರವಾದ್ ದುಂಬುಕೊನೊಕ, ಅಂಚೆನೆ ಪಾತೆರ ಬರಂದಿನ ಪ್ರಾಣಿ ಪಕ್ಷಿಲೆದ ಮನಸ್ಸ್ ಅರ್ಥ ಮಲ್ತೊಂದು ಐಕ್ಲೆಗ್ ಬೋಡಾಯಿನ ತಿನಸ್ ಲೆನ್ ಸುಲಭಡ್ ತಿಕ್ಕುನಂಚಿನ ಬೀಜ ಬಿತ್ತನೆ ಬೊಕ್ಕ ಪರ್ದ್ ದ ಗಿಡಲೆನ್ ಎಚ್ಚ ನಡ್ಪುನ ಕಾರ್ಯಕ್ರಮನ್ ದಿಯೊನುಗ ಪಂದ್ ಅಂತರಾಷ್ಟ್ರೀಯ ಲಯನ್ಸ್ ಜಿಲ್ಲೆದ 317 ಡಿ ಪ್ರಾಂತೀಯ ಗುರ್ಕಾರ್ಲು ಲಯನ್ ರೇಣುಕಾ ಸದಾನಂದ ಜಾಕೆ ಪಂಡೆರ್.
ಮೇರ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಗ್ ಸುಕ್ರವಾರ ಅಧಿಕೃತ ಭೇಟಿ ಕೊರ್ನ ಸಂದರ್ಭಡ್ ಐನೇಕಿಡ್ ನಡತ್ತಿನ ಲೇಸ್ ಡ್ ಪಾತೆರಿಯೆರ್. ಲೇಸ್ ದ ಗುರ್ಕಾರ್ಮೆನ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ರಾಮಚಂದ್ರ ಪಳಂಗಾಯ ವಹಿಸ್ ದ್ ಇತ್ತೆರ್.
ವೇದಿಕೆಡ್ ಲಯನ್ಸ್ ಪ್ರಾಂತೀಯದ ಸುರುತ ಸದಸ್ಯೆರ್ ಸದಾನಂದ ಜಾಕೆ, ಲಯನ್ಸ್ ಪ್ರಾಂತೀಯ ಅಂಬ್ಯಾಸಿಡರ್ ಪ್ರೊ. ಬಾಲಚಂದ್ರಗೌಡ, ಪ್ರಾಂತೀಯ ಕೋ-ಆರ್ಡಿನೇಟರ್ ಪ್ರಕಾಶ್ ಡಿಸೋಜ, ವಲಯ ಗುರ್ಕಾರ್ಲು ಲಿಜೊ ಜೋಸ್, ವಲಯ ಕೊಆರ್ಡಿನೇಟರ್ ಬೊಕ್ಕ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಸ್ಥಾಪಕ ಗುರ್ಕಾರ್ಲು ಪ್ರೊ. ರಂಗಯ್ಯ ಶೆಟ್ಟಿಗಾರ್, ಅಂಚನೆ ಸಂಪಾಜೆ, ಸುಳ್ಯ, ಪಂಜ ,ಕಡಬ ,ಬೆಳ್ಳಾರೆ, ಬೊಕ್ಕ ಗುತ್ತಿಗಾರು ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ಇತ್ತೆರ್.
ಉಂದುವೆ ಪೊರ್ತುಡು ಗುತ್ತಿಗಾರು ಸೈಂಟ್ ಮೇರಿ ಬ್ರೆಜೆಂಟ್ಸ್ ಶಾಲೆ ಮುಟ್ಟ 30,000 ರೂಪಾಯಿ ಬಿಲೆತ್ತ ಸೀರೆನ್ ಉಚಿತವಾದ್ ಕೊರಿಯೆರ್. ಪ್ರಾಂತೀಯ ಕ್ರೀಡಾ ಕೂಟಗ್ ಲಯನ್ಸ್ ಸದಸ್ಯೆರ್‌ಗ್ ಟೀ ಶರ್ಟ್ ನ್ ಉಚಿತವಾದ್ ಉಂದುವೆ ಪೊರ್ತುಡು ಕೊರಿಯೆರ್.
ಇಂಚಿಪಗ್ ಕುಡ್ಲಡ್ ನಡತ್ತಿನ ಸಾಂಸ್ಕೃತಿಕ ಕಾರ್ಯಕ್ರಮಡ್ ಪಾಲ್ ಪಡೆದ್ ಪದ್ಯದ ಪಂತೊಡ್ ಸುರುತ ಇನಾಮು ಪಡೆನ ಸತೀಶ ಕೂಜುಗೋಡು, ಪವನ್ ದಂಪತಿಲೆನ್ ಮಾನಾದಿಗೆ ಮಲ್ತೆರ್. ಲಯನ್ಸ್ ಕ್ಲಬ್ ಗುರ್ಕಾರ್ಲು ರಾಮಚಂದ್ರ ಪಾಳಂಗಾಯ ಎದ್ಕೊಂಡೆರ್. ಪ್ರಾಂತೀಯ ಗುರ್ಕಾರ್ಲೆನ ಪರಿಚಯನ್ ಅಶೋಕ್ ಕುಮಾರ್ ಮೂಲೆ ಮಜಲು ವಾಚನ ಮಲ್ತೆರ್. ಕಾರ್ಯದರ್ಶಿ ಸತೀಶ ಕೂಜುಗೋಡು ವರದಿ ಮಂಡನೆ ಮಲ್ತೆರ್. ವಿಮಲ ರಂಗಯ್ಯ ಸೊಲ್ಮೆ ಸಂದಾಯ ಮಲ್ತೆರ್.
ಪುತ್ತೂರು : ಮುಕ್ರಂಪಾಡಿಡ್ ತಲ್ವಾರ್ ತೋಜಾಯಿನ ನಡಕೆದ ರಡ್ಡ್ ಜನ ಅಪ್ರಾಪ್ತೆರ್ ಸೇರ್ದ್ 9 ಜನತ್ತ ಮಿತ್ತ್ ಕೇಸ್ ದಾಖಲಾತ್‌ಂಡ್.
ಆರೋಪಿಲಾಯಿನ ಪುತ್ತೂರು ಶಾಂತಿಗೋಡು ಗ್ರಾಮದ ದಿನೇಶ ಪಂಜಿಗ (38), ನರಿಮೊಗರು ಗ್ರಾಮದ ಭವಿತ್ (19), ಪುತ್ತೂರು ಬೊಳ್ವಾರು ನಿವಾಸಿ ಮನ್ವಿತ್ (19), ಆರ್ಯಾಪು ಗ್ರಾಮದ ಜಯಪ್ರಕಾಶ (18), ಚಿಕ್ಕಮುಡ್ನೂರು ಗ್ರಾಮದ ಚರಣ್ (23), ಬನ್ನೂರು ಗ್ರಾಮದ ಮನೀಶ (23), ವಿನೀತ್ (19) ಬೊಕ್ಕ ರಡ್ಡ್ ಜನ ಅಪ್ರಾಪ್ತೆರೆನ್ ಪೊಲೀಸೆರ್ ವಶಕ್ಕ್ ಪಡೆಯೊಂದೆರ್. ಈ ಬಗೆಟ್ಟ್ ಪುತ್ತೂರು ನಗರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.
