ತುಳು ಸುದ್ದಿ

ವಿಶ್ವಕಪ್ ಗೆಂದಿನ ಆಸ್ಟ್ರೇಲಿಯಾದ ಮ್ಯಾನೇಜರ್ ಕಿನ್ನಿಗೋಳಿ ಮೂಲದಾರ್!

ಆಸ್ಟ್ರೇಲಿಯಾ ಕ್ರಿಕೆಟ್ ತಂಡಡ್ ಕೋಚ್ ಆದ್ 34 ವರ್ಷದ ಕಿನ್ನಿಗೋಳಿ ಮೂಲದ ಊರ್ಮಿಳಾ ರೊಸಾರಿಯೋ ಕಾರ್ಯ ನಿರ್ವಹಣೆ ಮಲ್ತೊಂದು ಉಲ್ಲೆರ್. ಊರ್ಮಿಳಾ ರೊಸಾರಿಯೋ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮ್ಯಾನೇಜರ್ ಬೊಕ್ಕ ಆಟಗಾರೆರ್ನ ಕೇರ್ ಟೇಕರ್ ಆತೆರ್.‌

ಮೂಲತಃ ಕಿನ್ನಿಗೋಳಿದಾರ್‌ ಆಯಿನ ಊರ್ಮಿಳಾನ ಪೊಪ್ಪ ಅಮ್ಮ ಐವಿ ಬೊಕ್ಕ ವಾಲೆಂಟೈನ್ ಉದ್ಯೋಗದ ನಿಮಿತ್ತ ಕತಾರ್ ದೋಹಾಡ್‌ ಮಸ್ತ್ ವರ್ಷರ್ದ್ ಅವ್ಲು ಉಲ್ಲೆರ್. ಊರ್ಮಿಳಾ ಕತಾರ್‌ಡ್‌ ಪುಟ್ಟುದು ಬುಲೆತ್ತಿನಾರ್. ಎಲ್ಯೆರ್ದೆ ಕ್ರಿಕೆಟ್‌ಡ್‌ ಆಸಕ್ತಿ ಇತ್ತ್‌ದ್ ಕತಾರ್ ಟೆನ್ನಿಸ್ ಫೆಡೆರೇಶನ್‌ಡ್‌ ಬೇಲೆ ಮಲ್ತೊಂದು ಇತ್ತೆರ್.‌ ಬೊಕ್ಕ ಆಸ್ಟ್ರೇಲಿಯಾಡ್ ಅಡಿಟೇಲ್ ಕ್ರಿಕೆಟ್ ಟೀಂಡ್ ಮೂಜಿ ವರ್ಷದ ಕಾಲ ಮ್ಯಾನೇಜರ್ ಆದ್‌ ಬೇಲೆ ಮಲ್ತ್‌ದೆರ್. ಊರ್ಮಿಳಾ ರೊಸಾರಿಯೋ ಮೇರ್‌ನ ಪೊಪ್ಪ ಅಮ್ಮ ಕರಿನ ಏಳ್ ವರ್ಷರ್ದ್ ಸಕಲೇಶಪುರಡ್ ಎಸ್ಟೇಟ್ ದೆತ್ತ್‌ದ್‌ ಅವ್ಲು ವಾಸ್ತವ್ಯ ಉಲ್ಲೆರ್.

ದುಬೈ ಕರ್ನಾಟಕ ರಾಜ್ಯೊತ್ಸವ -2023 ಪ್ರಶಸ್ತಿ” ಗ್ ಬಾಲಕೃಷ್ಣ ಸಾಲಿಯಾನ್ ಆಯ್ಕೆ

ದುಬೈ :1985ಟ್ ಸ್ಥಾಪನೆ ಆಯಿನ ಕರ್ನಾಟಕ ಸಂಘ ದುಬೈ, ಅನಿವಾಸಿ ಕನ್ನಡಿಗರ ಕ್ಷೇಮಾಭಿವೃದ್ಧಿಗಾದ್ ಸೇವೆ ಮಲ್ತೊಂದು ಬರೊಂದು ಇತ್ತ್ ದ್, ಕಲೆ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ದುಬೈದ ಕನ್ನಡಿಗೆರೆನ್ ಒಟ್ಟುಗೂಡಿಸಾದ್ ಪ್ರತಿ ವರ್ಷಲ ವಿಜೃಂಭಣೆಡ್ ಆಚರಣೆ ಮಲ್ಪುನ ” ಕರ್ನಾಟಕ ರಾಜ್ಯೋತ್ಸವ” ದ ಅಂಗವಾದ್ ಕೊರ್ಪುನ “ದುಬೈ ಕರ್ನಾಟಕ ರಾಜ್ಯೊತ್ಸವ -2023 ಪ್ರಶಸ್ತಿ” ಗ್ ಈ ಸರ್ತಿ ಬಾಲಕೃಷ್ಣ ಸಾಲಿಯಾನ್ ಆಯ್ಕೆಯಾತೆರ್.

ನ.26 ದಾನಿ ನಡಪುನ 68ನೇ ಕರ್ನಾಟಕ ರಾಜ್ಯೊತ್ಸವ ಕಾರ್ಯಕ್ರಮಡ್ ಬಾಲಕೃಷ್ಣ ಸಾಲಿಯಾನ್ ಮೇರೆಗ್ ಮಾನಾದಿಗೆ ಮಲ್ಪೆರೆ ಉಲ್ಲೆರ್ ಪಂದ್ ದುಬೈ ಕರ್ನಾಟಕ ಸಂಘದ ಗುರ್ಕಾರ್ಲು ಶಶಿಧರ್ ನಾಗರಾಜಪ್ಪ ಬೊಕ್ಕ ಕಾರ್ಯಕಾರಿ ಸಮಿತಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

World Cupಡ್ ಭಾರತ ಸೋತುಂಡು ಪಂದ್ ಜೂವ ದೆತ್ತೊನ್ನ ಜವನೆ!

ವಿಶ್ವಕಪ್‌ಡ್ ಭಾರತ ಸೋತಿನೆಕ್ಕ್‌ ಬೇಜಾರ್‌ ಆದ್ ಅಭಿಮಾನಿ ಒರಿ ಆತ್ಮಹತ್ಯೆ ಮಲ್ತೊನ್ನ ಘಟನೆ ವರದಿ ಆತ್‌ಂಡ್. ಪಶ್ಚಿಮ ಬಂಗಾಳದ ಬಂಕುರಾ ಜಿಲ್ಲೆದ ರಾಹುಲ್ ಲೋಹರ್‌ 23 ವರ್ಷದ ಜವನೆ ತೀರ್‌ಪೋಯಿನಾಯೆ.

ಫೈನಲ್ ಪಂದ್ಯದ ಬೊಕ್ಕ ಐತಾರ ರಾತ್ರೆ ಬಂಕುರಾದ ಬೆಲಿಯತೋರ್ ಥಿಯೇಟರ್‌ದ ಕೈತಲ್ ಈ ಘಟನೆ ನಡತ್‌ಂಡ್. ಕಟ್ಟಾ ಕ್ರಿಕೆಟ್ ಅಭಿಮಾನಿಯಾಯಿನ ರಾಹುಲ್ ಫೈನಲ್ ಪಂದ್ಯ ತೂವೆರೆ ಬೇಲೆಗ್‌ ರಜೆ ಪಾರ್ದ್‌ ಇತ್ತೆ. ಫೈನಲ್‌ಡ್‌ ಸೋತಿನ ಬೊಕ್ಕ ರಾಹುಲ್ ತನ್ನ ಕೋಣೆಗ್‌ ಪೋದು ಬಲ್ಲ ಪಾಡೊಂನ ಸ್ಥಿತಿಟ್‌ ಇತ್ತೆ. ಪೊಲೀಸೆರ್‌ ಕೇಸ್‌ ದಾಖಲ್‌ ಮಲ್ತೊಂದು ತನಿಖೆ ಮಲ್ತೊಂದು ಉಲ್ಲೆರ್.

ನ.24 : ಎಣ್ಣೆಹೊಳೆ ಹಂಚಿಕಟ್ಟೆ ಶ್ರೀ ಮಹಾಮ್ಮಾಯಿ ದೇವಲ್ಯದ ಜೀರ್ಣೋದ್ಧಾರಗ್ ಪುಂಡಿ ಪನವುದ ಸೇವೆ

ಬಾರಿ ಪಿರಾಕ್ದ ಪಂಡ ಸುಮಾರ್ 800 ವರ್ಷ ಪಿರಾಕ್ ದ ಪುರಾಪು ಪಡೆಯಿನ ದೇವಸ್ಥಾನ ಪಂಡ ಹಂಚಿಕಟ್ಟೆ ಮಹಮ್ಮಾಯಿ ದೇವಸ್ಥಾನ. ಈ ದೇವಸ್ಥಾನ ಕಾರಣಿಕ ದಿಂಜಿದ್ ಊರ ಪರವೂರ ಭಕ್ತೆರೆನ ಕಷ್ಟ ಪರಿಹಾರ ಮಲ್ಪುನ ಶಕ್ತಿ ಕೇಂದ್ರ ಪಂಡ ತಪ್ಪಾವಂದ್.

ಇಂಚಿತ್ತಿ ಕಾರ್ಣಿಕದ ಅಪ್ಪೆನ ದೇವಸ್ಥಾನ 1989 ಇಸವಿಡ್ ಜೀರ್ಣೋದ್ಧಾರ ಆದ್ ದೇವಿಗ್ ಬಾರಿ ಪೊರ್ಲುಡೆ ಬ್ರಹ್ಮಕಲಶ ನಡತ್ ದ್ ಅಪ್ಪೆನ ಅನುಗ್ರಹ ಊರ ಪರವೂರ ಭಕ್ತೆರೆನ ಭಕ್ತಿಗ್ ತಿಕ್ಕೊಂದು ಉಂಡು. ಅವೇ ಪ್ರಕಾರ ದೇವೆರೆನ ಅನುಗ್ರಹ ದ ಪ್ರಕಾರ ದೇವಸ್ಥಾನೊಡು ಕೆಲವೊಂಜಿ ದುರಸ್ಥಿ ಕೆಲಸ ಬಾಕಿ ಉಂಡು. ಆಯಿತ ಒಟ್ಟುಗು ದೇವೆರ್ ಗ್ ಬ್ರಹ್ಮಕಲಶ ನೆರವೇರೊಡು ಪನ್ಪಿನ ದೈವ ಸಂಕಲ್ಪದ ಲೆಕ್ಕನೆ ಆಯಿತ ಕೆಲಸ ಕಾರ್ಯೊಗು ಊರ ಪರವೂರ ಭಕ್ತರೆನ ಆಶ್ರಯ ದಂಚ ಜತ್ತ್ ದ. ಈ ಕೆಲಸ ಕಾರ್ಯೊಗು ಮಾತೆರ್ಲ ಕೈ ತಾಂಗೊಡು ಪಂದ್ ಬಿನ್ನಯ ಮಲ್ಪುವ.

ಅಂಚನೆ ನ.24 ಶುಕ್ರವಾರ ಕಾಂಡೆ 9.30 ಗಂಟೆಗ್ ಸರಿಯಾದ್, ವೇದಮೂರ್ತಿ ವಿದ್ವಾನ್ ಶ್ರೀ ಅರುಣ್ ಜೆ ಭಟ್ ಮೆರೆನ ಮುತಾಲಿಕೆಡ್ ಬೊಕ್ಕ ಮುಂಬಯಿ ದ ಪೊಲೀಸ್ ಅಧಿಕಾರಿ ದಯಾ ನಾಯಕ್ ,ವಿಠ್ಠಲ್ ಶೆಟ್ಟಿ ಅಂಬರ್ ಹೋಟೆಲ್ ವಾಶಿ, ಸಾಧು ಟಿ ಶೆಟ್ಟಿ, ರಾಜೇಂದ್ರ ಎಸ್ ಶೆಟ್ಟಿ , ಗಿರೀಶ್ ಶೆಟ್ಟಿ ನೆರೂಲ್, ಜಯಶೀಲ ಶೆಟ್ಟಿ ಎಣ್ಣೆಹೊಳೆ, ವಿಶ್ವನಾಥ್ ಶೆಟ್ಟಿ ಪೂನಾ, ಜಗನ್ನಾಥ್ ಕೆ ಶೆಟ್ಟಿ ಎಣ್ಣೆಹೊಳೆ, ಸತೀಶ್ ಶೆಟ್ಟಿ ಮುಂಬಯಿ, ಸುರೇಂದ್ರ ಶೆಟ್ಟಿ ಕೆಂಜಿಲ ಮುಂಬಯಿ, ದಿವಾಕರ ಶೆಟ್ಟಿ ಕೆಂಜಿಲ ಎಣ್ಣೆಹೊಳೆ, ಜಯರಾಮ ಶೆಟ್ಟಿ ಕೇದಿಗೆ ಬೈಲು ವಾಶಿ , ಕರುಣಾಕರ ಶೆಟ್ಟಿ ಕೇದಿಗೆ ಬೈಲು, ಜಗದೀಶ್ ಶೆಟ್ಟಿ ಎಣ್ಣೆಹೊಳೆ , ಉಮೇಶ್ ಶೆಟ್ಟಿ ಎಣ್ಣೆಹೊಳೆ, ರತ್ನಾಕರ್ ಶೆಟ್ಟಿ ಎಣ್ಣೆಹೊಳೆ , ನಾಗೇಶ್ ಶೆಟ್ಟಿ ಪೂನಾ ಮೊಕ್ಲೆನ ಮಾರ್ಗದರ್ಶನ ಅಂಚೆನೆ, ಸಮಸ್ತ ಗ್ರಾಮಸ್ಥೆರ್ ಸೇರ್ದ್ ದೇವಸ್ಥಾನ ಜೀರ್ಣೋದ್ದಾರ, ಅಂಚೆನೇ ಬ್ರಹ್ಮಕಲಶ ನಿಮಿತ್ತ ಕ್ಷೇತ್ರಡ್ ಪುಂಡಿ ಪನವು ಕಟ್ಟುನ ಕಾರ್ಯ ನಡಪರೆ ಉಂಡು. ಈ ಮಾತಾ ಕೆಲಸ ಕಾರ್ಯೊಗು ತಂಕುಲು ಸಕಾಯ ಸಹಕಾರ ಮಲ್ತ್ ದೇವಿನ ಆಶೀರ್ವಾದ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.