ಬೊಲ್ತೆರ್ ಸುದ್ದಿ | Belthangady News

ಪಟ್ಲ ಫೌಂಡೇಶನ್ ಟ್ರಸ್ಟ್ ಗ್ 1 ಕೋಟಿ ರೂ. ಘೋಷಣೆ ಮಲ್ತಿನ ಉದ್ಯಮಿ ಶಶಿಧರ್ ಶೆಟ್ಟಿ ಬರೋಡಾ

ಬೊಲ್ತೇರ್: ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್, ಬೊಲ್ತೇರ್ ಘಟಕದ ಲೇಸ್ ಕೋಡೆ ಉಜಿರೆ ಜನಾರ್ದನ ಸ್ವಾಮಿ ದೇವಲ್ಯಡ್ ನಡತ್ಂಡ್.

ಈ ಪೊರ್ತುಡು ಉದ್ಯಮಿ ಬೊಕ್ಕ ಪಟ್ಲ ಫೌಂಡೇಶನ್ ದ ಕೇಂದ್ರೀಯ ಸಮಿತಿ ಸಂಚಾಲಕೆರ್ ಶಶಿಧರ್ ಶೆಟ್ಟಿ ಬರೋಡಾ ಟ್ರಸ್ಟ್ ಗ್ 1 ಕೋಟಿ ದೇಣಿಗೆನ್ ಘೋಷಣೆ ಮಲ್ತೆರ್. ಬೊಕ್ಕ ಶಾಸಕೆರ್ ಹರೀಶ್ ಪೂಂಜ ಪಾತೆರ್ದ್ ಪಟ್ಲ ಸತೀಶ್ ಶೆಟ್ರ್ ನ ಕಾರ್ಯ ದೇವೆರ್ ಮೆಚ್ಚುನವು ಪಂದ್ ಪಂಡೆರ್. ಈ ಲೇಸ್ ಡ್ ಶಾಸಕೆರ್ ಪ್ರತಾಪ್ ಸಿಂಹ‌ ನಾಯಕ್ ಪಾಲ್ ಪಡೆದಿತ್ತೆರ್. ಬೊಕ್ಕ ಪಾವಂಜೆ ಮೇಳದಕ್ಲೆನೆರ್ದ್ ಶ್ರೀದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ನಡತ್ಂಡ್.

Patla foundation trust- Rupees one crore donation announced by Baroda entrepreneur Sashidar Shetty

Bheltangady: A program by the Bheltangady unit of Yaksha Druvha Patla foundation trust was held at Ujjire Janardhan Swami temple yesterday.

Entrepreneur from Baroda Sashidar Shetty who is Correspondent of the Central Samithi of Patla foundation has announced a donation of rupees one crore to the Baroda unit of the trust.

Speaking on the occasion MLA Harish Punja applauded the gesture and the work of Patla Satish Shetty. MLA Pratap Simha Nayak also participated in the program.Later Yakshagana Bayalatha Sri Devi Mahatmay was played by Pavanjay Mela.

ಉಜಿರೆದ “ಸಿರಿ” ಕಚೇರಿಗ್ ಪುಗರ್ತೆದ ಚಲನಚಿತ್ರ ನಟಿ ಶ್ರುತಿ ಭೇಟಿ

ಬೊಲ್ತೇರ್: ನಾಲ್ ಬಾಸೆದ ಚಲನಚಿತ್ರ ನಟಿ ಶ್ರುತಿ ಮೇರ್ ಶ್ರೀ ಧರ್ಮಸ್ಥಳ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ಪ್ರಧಾನ ಕಛೇರಿ ಉಜಿರೆಗ್ ನ.15 ಕ್ ಭೇಟಿ ಕೊರಿಯೆರ್.

ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಕೆ.ಎನ್‌ ಜನಾರ್ಧನ ಮೇರ್ ನಟಿ ಶ್ರುತಿ ಮೆರೆನ್ ಎದ್ಕೊಂದು, ಸಿರಿಸಂಸ್ಥೆದ ಎಲ್ಯ ಪರಿಚಯನ್ ಮಲ್ತ್ ದ್, ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಶ್ರುತಿ ಮೇರ್ ಪಾತೆರ್ದ್, ಪೂಜ್ಯ ಖಾವಂದೆರೆನ ಬೊಕ್ಕ ಮಾತೃಶ್ರೀ ಹೇಮಾವತಿ ಅಮ್ಮನ ಕನತ್ತ ಕೂಸಾದ್ ಇಪ್ಪುನ ಈ ಸಿರಿ ಸಂಸ್ಥೆ ಮುಲ್ಪ ಬೆನೊಂದು ಇಪ್ಪುನ ಪ್ರತಿ ಒಂಜಿ ಪೊಂಜೋವ್ ಗ್ ಸ್ವಾವಲಂಬನೆದ ಬದ್ ಕ್ ಕೊರ್ದು, ಸುಖೀ ಜೀವನನ್ ನಡಪಾಯೆರೆ ಸ್ಪೂರ್ತಿ ಆತ್ಂಡ್. ಪ್ರತೀ ಯಶಸ್ವೀ ಆನನ ಪಿರವುಡ್ ಒಂಜಿ ಪೊಣ್ಣು ಉಲ್ಲಲ್ ಪನ್ಪುನ ಗಾದೆ ಮುಲ್ಪ ಸುಳ್ಳಾತ್ಂಡ್. ದಾಯೆ ಪಂಡ ಸಿರಿ ಸಂಸ್ಥೆಡ್ ಬೆಂದೊಂದು, ಸ್ವಾವಲಂಬನೆದ ಬದ್ ಕ್ ನ್ ಬದುಕುನ ಮುಲ್ಪದ ಮಾತ ಪೊಂಜೋವ್ ಲೆನ ಪಿರವು ಪೂಜ್ಯ ಡಾ.ಡಿ ವೀರೇಂದ್ರ ಹೆಗ್ಗಡೆರ್ ಉಲ್ಲೆರ್. ಸಿರಿ ಸಂಸ್ಥೆ ನನಾತ್ ಎತ್ತರಗ್ ಬುಲೆವಡ್, ಪೂಜ್ಯ ದಂಪತಿಲೆನ ಆಸರೆಡ್ ಸಾರ ಸಾರ ಪೊಂಜೋವ್ ಲೆನ ಬದ್ ಕ್ ಬೊಲ್ಪು ಆವಡ್ ಪಂದ್ ಪಂಡೆರ್.

ಈ ಪೊರ್ತುಡು ಸಿರಿ ಸಂಸ್ಥೆದ ಆಡಳಿತ ಮಂಡಳಿದ ನಿರ್ದೇಶಕೆರ್ ರಾಜೇಶ್ ಪೈ, ‘ಕೊರಗಜ್ಜ’ ಪಿಕ್ಚರ್ ದ ನಿರ್ಮಾಪಕೆರ್ ವಿದ್ಯಾಧರ್, ಸಿರಿ ಸಂಸ್ಥೆದ ಆಡಳಿತ ಬೊಕ್ಕ ಲೆಕ್ಕಪತ್ರ ವಿಭಾಗದ ನಿರ್ದೇಶಕೆರ್ ಪ್ರಸನ್ನ, ಎಸ್.ಕೆ.ಡಿ.ಆರ್.ಡಿ.ಪಿ ಬೊಲ್ತೇರ್ ತಾಲೂಕ್ ಯೋಜನಾಧಿಕಾರಿ ಸುರೇಂದ್ರ ಬೊಕ್ಕ ಸಿರಿ ಸಂಸ್ಥೆದ ಮತ ಸಿಬ್ಬಂದಿ ವರ್ಗದಕುಲು ಇತ್ತೆರ್. ಸಿರಿ ಸಿಬ್ಬಂದಿಲು ಶ್ರುತಿ ಮೆರೆನ ಭೇಟಿರ್ದ್ ಖುಷಿ ಆಯೆರ್‌. ಜೀವನ್‌ಕುಮಾರ್‌ ಲೇಸ್ ದ ನಿರೂಪಣೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.

ನ.12 : ಉಜಿರೆ ಕಾಲೇಜ್ ಡ್ ಜಿಲ್ಲಾ ಮಟ್ಟದ ಸಾಹಿತ್ಯ, ಸಾಂಸ್ಕೃತಿಕ ಪಂತೊ

ಬೊಲ್ತೇರ್: ದಕ್ಷಿಣ ಕನ್ನಡ ಜಿಲ್ಲಾ ಮಟ್ಟದ ಪದವಿ ಪೂರ್ವ ವಿದ್ಯಾರ್ಥಿಲೆನ 2022-23 ನೇ ಸಾಲ್ ದ ಸಾಹಿತ್ಯ ಬೊಕ್ಕ ಸಾಂಸ್ಕೃತಿಕ ಪಂತೊ ನ.12 ದಾನಿ ಉಜಿರೆ ಎಸ್. ಡಿ.ಎಂ. ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.

ಈ ಲೇಸ್ ನ್ ವಿಧಾನ ಪರಿಷತ್ ಸದಸ್ಯೆರ್ ಪ್ರತಾಪ ಸಿಂಹ ನಾಯಕ್ ಉದಿಪನ ಮಲ್ಪೆರೆ ಉಲ್ಲೆರ್. ಅಧ್ಯಕ್ಷತೆನ್ ದಕ್ಷಿಣ ಕನ್ನಡ ಪದವಿ ಪೂರ್ವ ಶಿಕ್ಷಣ ಇಲಾಖೆದ ನಿರ್ದೇಶಕೆರ್ ಜಯಣ್ಣ ಸಿ.ಡಿ. ಒಯಿಸೊನ್ವೆರ್. ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆದ ವಿದ್ಯಾರ್ಥಿ ಕ್ಷೇಮಪಾಲನಾ ಅಧಿಕಾರಿ ಬಿ. ಸೋಮಶೇಖರ ಶೆಟ್ಟಿ ಬಿನ್ನೆರಾದ್ ಪಾಲ್ ಪಡೆ ವೆರ್ ಪಂದ್ ಕಾಲೇಜ್ ಪ್ರಕಟಣೆಡ್ ತೆರಿಪಾದ್ಂಡ್.

ಬೊಲ್ತೇರ್: ಫ್ಲೆಕ್ಸ್ ಪಾಡ್ನಗ ಕರೆಂಟ್ ಶಾಕ್ ಆದ್ ತೀರ್ ಪೋಯಿನ ಜವನೆ

ಬೊಲ್ತೇರ್: ಸಂಘಟನೆ ಒಂಜೆತ್ತ ಪ್ರಚಾರ ಮಲ್ಪುನ ಫ್ಲೆಕ್ಸ್‌ ಪಾಡೊಂದು ಇತ್ತಿನ ಪೊರ್ತುಡು ಕರೆಂಟ್ ಶಾಕ್‌ ಆಕ್ ದ್ ಒರಿ ತೀರ್ ಪೋಯಿನ ಘಟನೆ ಬೊಲ್ತೇರ್ ಬಸ್ ಸ್ಯಾಂಡ್ ದ ಕೈತಲ್ ನ.8 ದಾನಿ ನಡತ್ಂಡ್. ಕುಡೊರಿಯಗ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದುಲ್ಲೆರ್.

ಕಾರ್ಮಿಕ ಸಂಘವೊಂಜೇತ ಸಮಾವೇಶನ್ ಕುಡ್ಲಡ್ ಅಟ್ಟಣೆ ಮಲ್ಪುನ ನೆತ್ತ ಲೆಕ್ಕೊಡು ರಾಜ ಮಾರ್ಗದ ಕೈತಲ್ ಇಪ್ಪುನ ಶ್ರೀ ಗೋಕರ್ಣನಾಥ ಕೋ ಆಪರೇಟೀವ್ ಬ್ಯಾಂಕ್ ದ ಎದುರು ಭಾರತೀಯ ಮಜ್ದೂರ್ ಸಂಘದಕುಲು ಸೇರ್ದ್ ಕುಟುಂಬ ಮಿಲನ -2022 ಲೇಸ್ ದ ಪ್ಲೆಕ್ಸ್‌ ಪಾಡ್ನಗ ಈ ಘಟನೆ ನಡತ್ಂಡ್. ಕರೆಂಟ್ ಶಾಕ್ ಆಕಿನ ಬೊಲ್ತೇರ್ ಕೋರ್ಟ್ ನಿವಾಸಿ ವ್ಯಾಸರಾಯ ಆಚಾರ್ಯ ಮೆರೆನ ಮಗೆ ಪ್ರಶಾಂತ್ ಆಚಾರ್ಯ (32) ಬೊಕ್ಕ ಬೊಲ್ತೇರ್ ತಾಲೂಕ್ ದ ಕೊಯ್ಯೂರ್ ಗ್ರಾಮದ ಮಲೆಬೆಟ್ಟು ನಿವಾಸಿ ಸಂಜೀವ ಆಚಾರ್ಯ ಮೆರೆನ ಮಗೆ ಸತೀಶ್ (25) ನ್ ಆಸ್ಪತ್ರೆಗ್ ದಾಖಲ್ ಮಲ್ದಿತ್ತೆರ್. ಆಂಡ ಪ್ರಶಾಂತ್ ಗ್ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಆಸ್ಪತ್ರೆಗ್ ಬೊಲ್ತೇರ್ ಮಾಜಿ ಶಾಸಕೆರ್ ಕೆ.ವಸಂತ ಬಂಗೇರ, ರಕ್ಷಿತ್‌ ಶಿವರಾಮ್‌ ಬೊಕ್ಕ ಕಾಂಗ್ರೆಸ್‌ ಮುಖಂಡೆರ್ ಭೇಟಿ ಕೊರ್ತೆರ್. ಆಸ್ಪತ್ರೆ ಎದುರುಡ್ ನೂದೆರ್ದ್ ಲ ಎಚ್ಚ ಜನ ಸೇರ್ದಿತ್ತೆರ್.