ಬೊಲ್ತೆರ್ ಸುದ್ದಿ | Belthangady News

ಬ್ಲಾಕ್ ಫಂಗಸ್ ಮೂಲ ಪತ್ತೆಗ್ ಸೂಚನೆ

ಬೆಂಗ್ಳೂರು, ಮೇ 25: ರಾಜ್ಯಡ್ ಕೊರೊನಾರ್ದ್ ಹುಷಾರ್ ಆಯಿನಕ್ಲೆನೆಟ್ಟ್ ತೋಜೋoದು ಉಪ್ಪುನ ಅಪಾಯಕಾರಿ ಬ್ಲ್ಯಾಕ್‌ ಫಂಗಸ್‌ ಮೂಲ ಪತ್ತೆ ನಾಡೆರೆ ವೈದ್ಯೆರ್ ಅಂಚನೆ ಸೂಕ್ಷಾಣು ಜೀವಿ ತಜ್ಞರೆಗ್ ಕೊರೊನಾ ಕಾರ್ಯಪಡೆ ಗುರ್ಕಾರ್ಲಾಯಿನ ಉಪ ಮುಖ್ಯಮಂತ್ರಿ ಡಾ.ಸಿ.ಎನ್‌.ಅಶ್ವತ್ಥನಾರಾಯಣಸೂಚನೆ ಕೊರ್ತೆರ್ .

ಖ್ಯಾತ ತಜ್ಞ ವೈದ್ಯೆರ್ ಬೊಕ್ಕ ಕೊರೊನಾ ಬೊಕ್ಕ ಬ್ಲ್ಯಾಕ್‌ ಫಂಗಸ್‌ ಚಿಕಿತ್ಸಾ ಶಿಷ್ಟಾಚಾರ ಸಮಿತಿದ ತಜ್ಞರ ಸಭೆಟ್ ಪಾಲ್ ಪಡೆದ್ ನೆತ್ತ ಮೂಲ ನಾಡ್ ಪತ್ತೆರೆ ಸೂಚನೆ ಕೊರಿಯೆರ್.

ಕದ್ರಿ ಅಗ್ನಿಶಾಮಕ ಸಿಬ್ಬಂದಿ ಕೋವಿಡ್ ಗ್ ಬಲಿ

ಕುಡ್ಲ, ಮೇ 25: ಕುಡ್ಲದ ಕದ್ರಿ ಅಗ್ನಿಶಾಮಕದಳಟ್ ಬೇಲೆ ಮಲ್ತೊಂದು ಇತ್ತಿನ ಸಿಬ್ಬಂದಿ ನವೀನ್ ಆಂಡ್ರಾ ಕೋವಿಡ್ ಸೋಂಕುಗು ಬಲಿಯಾತೆರ್ .

54 ವರ್ಷದ ನವೀನ್ ಮೆರೆಗ್ ಮೇ. 9 ತಾರೀಖ್ ಗ್ ಕೋವಿಡ್ ಸೋಂಕು ದೃಢ ಆದಿತ್ತುಂಡು .ಅವ್ವೆ ದಿನ ಖಾಸಗಿ ಆಸ್ಪತ್ರೆಗ್ ದಾಖಲಾಯಿನ ಮೆರ್ ಮೇ.23 ಐತಾರ ಸೋಂಕಿಗೆ ಬಲಿಯಾತೆರ್ .

1997 ಟ್ಟ್ ಸೇವೆ ಶುರು ಮಲ್ತಿನ ನವೀನ್, ಕದ್ರಿದ ಅಗ್ನಿಶಾಮಕದಳಟ್ ಸಿಬ್ಬಂದಿಯಾದಿತ್ತೆರ್.

ಉದ್ಯೋಗಿಲೆಗ್ ಕೋವಿಡ್ ಪರಿಹಾರ ಘೋಷಣೆ ಮಲ್ತಿನ ಅಮೇಜಾನ್

ಕುಡ್ಲ, ಮೇ 25 : ಕೊರೋನ ಸಾಂಕ್ರಾಮಿಕ ರೋಗರ್ದಾವರ ದೇಶಡ್ ನಕಾರಾತ್ಮಕ ಬೆಳವಣಿಗೆ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಅಂಚನೆ ತನ್ನ ಬೇಲೆ ದಕ್ಲೆನ ಕೂಟ ಬೊಕ್ಕ ಅಕ್ಲೆನ ರಕ್ಷಣೆಗಾದ್ ಅಮೆಝಾನ್ ಇಂಡಿಯಾ ಕೋವಿಡ್-19 ಪರಿಹಾರ ಯೋಜನೆ (ಸಿಆರ್‍ಎಸ್) ಪ್ರಕಟ ಮಲ್ದೆರ್.

ಕೋವಿಡ್ ಪರಿಹಾರಗಾದ್ 25 ದಶಲಕ್ಷ ಡಾಲರ್ ನೆರವು ನಿಧಿ ಬುಡುಗಡೆ ಮಲ್ದೆರ್, ಕೋವಿಡ್-19 ಲಸಿಕೆದ ರಡ್ಡ್ ಡೋಸ್ ಪಡೆಯಿನ ಸಿಬ್ಬಂದಿಗ್ 1500 ರೂಪಾಯಿ ಹೆಚ್ಚುವರಿ ವಿಶೇಷ ವೇತನನ್ಲಾ ಕೊರ್ರೆ ಉಲ್ಲೆರ್ ಪಂದ್ ಅಮೆಝಾನ್ ಇಂಡಿಯಾ ಮಾನವ ಸಂಪನ್ಮೂಲ ವಿಭಾಗದ ನಿರ್ದೇಶಕೆರಾಯಿನ ಸ್ವಾತಿ ರುಸ್ತಗಿ ಪ್ರಕಟಣೆಡ್ ತೆರಿಪಾಯೆರ್.

ಕ್ರಿಕೆಟ್ ಗೊಬ್ಬೊoದು ಇತ್ತಿನಕ್ಲೆನ ಮಿತ್ತ್ ಪ್ರಕರಣ ದಾಖಲ್

ಕಾಪು, ಮೇ 25: ಕಾಪು : ಲಾಕ್‍ಡೌನ್ ಆದೇಶ ಉಲ್ಲಂಘನೆ ಮಲ್ತ್ದ್ ಕ್ರಿಕೆಟ್ ಗೊಬ್ಬೊನ್ದು ಇತ್ತಿನ ಜಾಗೆಗ್ ಕಾಪು ಇನ್ಸ್ ಪೆಕ್ಟರ್ ನೇತೃತ್ವದ ಕೂಟ ದಾಳಿ ಮಲ್ತ್ 9 ಜನಕ್ಲೆನ ವಿರುದ್ಧ ಪ್ರಕರಣ ದಾಖಲ್ ಮಲ್ತಿನ ಘಟನೆ ಉಚ್ಚಿಲದ ಭಾಸ್ಕರ್ ನಗರಡ್ ಐತಾರ ನಡತುಂಡು ಳ್.

ಎರ್ಮಾಳ್ ದ ಸೂರಜ್, ಉಚ್ಚಿಲದ ರೂಪೇಶ್ ಬಂಗೇರ, ಭಾಸ್ಕರ್ ನಗರದ ಅಕ್ಷಯ್ ಸಾಲಿಯಾನ್, ಉಚ್ಚಿಲದ ಚೇತನ್ ವೈ, ಭಾಸ್ಕರ್ ನಗರದ ಸಂದೀಪ್ ಕುಮಾರ್, ಬಡಾ ಗ್ರಾಮದ ಸರ್ವೋತ್ತಮ್ ಸೋನ್ಸ್, ಪ್ರಜ್ವಲ್, ಪ್ರಖ್ಯಾತ್, ರಾಕೇಶ್ ವಿರುದ್ಧ ಪ್ರಕರಣ ದಾಖಲ್ ಮಲ್ದೆರ್ .

ಇನ್ಸ್ ಪೆಕ್ಟರ್ ಪ್ರಕಾಶ್ ನೇತೃತ್ವದ ತಂಡ ದಾಳಿ ನಡಪಾದೆರ್ , ನಾಲ್ ದ್ವಿಚಕ್ರ ಗಾಡಿ , 1 ಕಾರ್ ಕ್ರಿಕೆಟ್ ಗೊಬ್ಬೆರೆ ಉಪಯೋಗ ಮಲ್ತಿನ ವಸ್ತುಲೆನ್ ವಶಕ್ ದೆತೊನ್ದೆರ್.

ಜೂನ್ 1 ತಾರೀಖ್ ರ್ದ್ ಕುಡ್ಲಡ್ ಮೀನುಗಾರಿಕೆ ನಿಷೇದ

ಕುಡ್ಲ , ಮೇ 25: ಕೊರೊನಾ ವೈರಸ್, ಚಂಡಮಾರುತದ ಭೀಕರತೆಗ್ ಕುಡ್ಲಡ್ ಮತ್ಸೋದ್ಯಮ ಕುಗ್ಗು ದುಂಡು. ಮೀನುಗಾರಿಕೆ ಉತ್ತುಂಗವಿತ್ತಿನ ಪೊರ್ತುಡು ಲಾಕ್‌ಡೌನ್ ಬರೆ ಬುರ್ದು ಒಂಚೂರ್ ಸುಧಾರ್ನಗನೇ ಚಂಡಮಾರುತ ಪೆಟ್ಟ್ ಕೊರ್ತುಂಡು.

ನೆತ್ತ ನಡುಟು ಇತ್ತೆ ಮೀನುಗಾರಿಕಾ ಋತು ಮುಗಿಯೊಂದು ಇತ್ತಿಲಕನೇ , ಜೂನ್ 1 ರ್ದ್ ಮೀನುಗಾರಿಕೆನ್ ಉಂತಾವೊಡು ಪಂದ್ ರಾಜ್ಯ ಸರ್ಕಾರ ಸೂಚನೆ ಕೊರ್ತುಂಡು.

ಕೆ.ವಿ ರಾಜೇಂದ್ರಕುಮಾರ್ ಫೌಂಡೇಶನ್ ವತಿರ್ದ್ ಅನ್ನದಾಸೋಹ

ಬೆಂಗ್ಳೂರು , ಮೇ 25: ನಂದಿನಿ ಬಡಾವಣೆ ಸ್ಮಾರ್ಟ್ ವಾರ್ಡ್ಡ್ 30 ಕಡೆ ಸುಮಾರ್ 3000 ಜನಕ್ಲೆಗ್ ಕರಿನ 3 ವಾರರ್ದ್ ಗೋಪಾಲಯ್ಯ ಮೆರ್ನ ಮಾರ್ಗದರ್ಶನಡ್ ಕೆ.ವಿ ರಾಜೇಂದ್ರಕುಮಾರ್ ಫೌಂಡೇಶನ್ ವತಿರ್ದ್ ಅನ್ನದಾಸೋಹನ್ ಕಾರ್ಯಂತೆರ್ ಮಲ್ತೊಂದು ಉಲ್ಲೆರ್.

ಜೈ ಮಾರುತಿ ನಗರ, ರವಿ ಬಡಾವಣೆ, ಸಾಕಮ್ಮ ಬಡಾವಣೆ, ನರಸಿಂಹ ಲೇಔಟ್, ಜೆ.ಎಸ್ ನಗರ, PWD ಕ್ವಾಟ್ರಸ್, EWS ಕ್ವಾಟ್ರಸ್, ಪರಿಮಳ ನಗರ, ಕಂಠೀರವ ನಗರ, ಫಾರಂ ರೋಡ್, ಶ್ರೀನಿವಾಸ ನಗರ, ರಾಮಕೃಷ್ಣ ನಗರ ಬೊಕ್ಕ ಸುಮಾರ್ 30 ಕಡೆ ಮಾಜಿ ಬಿಬಿಎಂಪಿ ಸದಸ್ಯೆರಾಯಿನ ಕೆ.ವಿ ರಾಜೇಂದ್ರ ಕುಮಾರ್ ಮುತಾಲಿಕೆಡ್ ಕಾರ್ಯಂತೆರ್ ಇಂಚಿನ ಸೇವೆ ಮಲ್ತೊಂದು ಉಲ್ಲೆರ್.

ಕಾರವಾರದ ಜವಣ್ಯೆಗ್ ತೆಲುಗುದ ” ಡಾನ್ಸ್ ಪ್ಲಸ್ 2021″ ಮಾನದಿಗೆ

ಕಾರವಾರ, ಮೇ 25: ಕಾರವಾರದ ಜವಣ್ಯೆ ಸಂಕೇತ್ ಸಹದೇವ ಪ್ರಸಿದ್ಧ ತೆಲುಗು ಡ್ಯಾನ್ಸ್ ಶೋ “ಡ್ಯಾನ್ಸ್ ಪ್ಲಸ್ 2021” ಡ್ ಗೆಂದ್ ದ್ ಪಿದಾಯಿ ಬೈದೆರ್.

ಫೈನಲ್ ಬತ್ತಿನ ಸಂಕೇತ್ ತನ್ನ ಅದ್ಭುತ ನೃತ್ಯದ ಮುಖೇನ ಇನಾಮು ಗೆಂದ್ ದೆರ್.ಸಂಕೇತ್ ಮೆರೆಗ್ ಟ್ರೋಫಿದೊಟ್ಟುಗು 20 ಲಕ್ಷ ರೂ. ಪನವುದ ಇನಾಮು ತಿಕ್ಕ್ ದುಂಡು.

ಇಂದುವೆ ರಿಯಾಲಿಟಿ ಶೋಡ್ ಶಿವಮೊಗ್ಗದ ನಿವೇದಿತಾ ಬೊಕ್ಕ ಕುಡ್ಲದ ವೆಲಾಸಿಟಿ ಕೂಟ ಪಾಲ್ ಪಡೆದ್ ಇತ್ತುಂಡು.

ಕೋವಿಡ್ ಸೊಂಕಿತೆರ್ನ ಸಾಕಾರಗ್ ವೆಬ್ ಸೈಟ್ : ಪಿಯುಸಿ ಜೋಕ್ಲೆನ ಸಾಧನೆ

ಕುಡ್ಲ, ಮೇ 25: ಕೋವಿಡ್‌ದ ಈ ಕಷ್ಟದ ಪೊರ್ತುಡುಅವ್ವೆತೋ ಸಂಘ ಸಂಸ್ಥೆಲು , ವ್ಯಕ್ತಿಲು ಸ್ವಯಂ ಪ್ರೇರಿತೇರಾದ್ ಬೇತೆ ಬೇತೆ ರೀತಿದ ಸೇವೆ ಮಲ್ತೊಂದು ಇತ್ತಿಲಕನೆ ಕುಡ್ಲದ ರಡ್ಡ್ ಜವಣ್ಯೆರ್ ವಿಶೇಷ ರೀತಿಡ್ ಸಾಕಾರ ಕೊರ್ತೆರ್.

ಕುಡ್ಲದ ಲೂರ್ಡ್ಸ್ ಸೆಂಟ್ರಲ್ ಸ್ಕೂಲ್‌ದ 12ನೆ ತರಗತಿದ ವಿದ್ಯಾರ್ಥಿಲಾಯಿನ (ಪಿಸಿಎಂಸಿ) ಅಮೋಲ್ ಮೆಂಡೋನ್ಸಾ ಬೊಕ್ಕ ಅದ್ವಿಕ್ ಅಭ್ಯುದಿತ್ ಹೆಗ್ಡೆ ಕೊರೋನ ಸೋಂಕಿತೆರೆಗ್ ಮಾಹಿತಿ, ನೆರವುಗಾದ್ ವೆಬ್‌ಸೈಟ್ ನ್ ಸುರು ಮಲ್ದೆರ್ .

ದ.ಕ. ಜಿಲ್ಲೆಡ್ ಕೊರೋನ ಸೋಂಕಿತೆರೆಗ್ ಸುಲಭವಾದ್ ತಿಕ್ಕುನ ಅಂಚನೆ ಅಂಚನೆ ಬಳಕೆದಾರ ಸ್ನೇಹಿ ಅಂಕಿಅಂಶದ ಕೊರತೆನ್ ಗೇನಡ್ ದೀದ್ ಈ ರಡ್ಡ್ ಜವಣ್ಯೆರ್ www.covidwarzonedk.com ವೆಬ್‌ಸೈಟ್ ಸುರು ಮಲ್ದೆರ್ .

ಜೈ ತುಳುನಾಡ್ (ರಿ) ಕಾಸರಗೋಡು ಸಂಘಟನೆದ ವತಿರ್ದ್ ಆನ್ ಲೈನ್ಡೇ ಪತ್ತನಾಜೆ ಕೂಟ ಅಟ್ಟನೆ

ಕಾಸ್ರೋಡು, ಮೇ 25 : ಜೈ ತುಳುನಾಡ್ (ರಿ) ಸಂಘಟನೆದ ಕಾಸರಗೋಡು ಘಟಕದ ಮುತಾಲಿಕೆಡ್ ಪತ್ತನಾಜೆದ ಪತ್ತೆರಿ ಕೂಟ ಲಾಕ್ ಡೌನ್ ದ ನಡುಟುಲಾ ಆನ್‌ಲೈನ್ ಡೇ ನಡತುಂಡು.

ತುಳುನಾಡ್ ದ ಆಚಾರ ಇಚಾರ, ಲಿಪಿ, ಸಂಸ್ಕೃತಿ ಬೊಕ್ಕ  ಒರಿಪಾದ್ ಬುಲೆಪಾವುನ ಜವಾಬ್ದಾರಿಯುತ ಬೇಲೆನ್ ನಿಸ್ವಾರ್ಥವಾದ್ ಜವಣ್ಯೇರ್ನ ಅಂಚನೆ ಪೆರಿಯೇರ್ನ ಕೂಟ ಬಾರಿ ಒಗ್ಗಟ್ ಡ್ ಮಲ್ತೊಂದು ಉಲ್ಲೆರ್.ಐತ ಒಟ್ಟುಗು ತುಳುನಾಡ್ ಡ್ ಮಾಜೊಂದು ಉಪ್ಪುನ ಪರ್ಬಲೆನ್ ಯುವ ಪೀಳಿಗೆಗ್ ಗೊತ್ತು ಮಲ್ಪಾವುನ ಪ್ರಯತ್ನನ್ ಸಾರ್ವಜನಿಕವಾದ್ ಮಲ್ತೊಂದು ಉಲ್ಲೆರ್ . ಅಂಚನೆ ತುಳುನಾಡ್ ದ ವಿಶೇಷ ದಿನಟ್ ಒಂಜಾಯಿನ ಪತ್ತನಾಜೆನ್ಲ ಗಣ್ಯರ ಸಮ್ಮುಖಡ್ , ಲಾಕ್ ಡೌನ್ ನಡುಟುಲಾ ಗೂಗಲ್ ಮೀಟ್ ಪನ್ಪಿನ ಆನ್‌ಲೈನ್ ವೇದಿಕೆಡ್ ಬಾರಿ ಗೌಜಿ ಡ್ ಪತ್ತನಾಜೆದ ಪತ್ತೆರಿ ಕೂಟನ್ ಆಚರಣೆ ಮಲ್ತೆರ್ . ಲೇಸ್ ದ ಗುರ್ಕಾರ್ಮೆನ್ ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ವಯಿಸ್ದ್ ಇತ್ತೆರ್ .

ಪೆರಿಯ ಪತ್ರಕರ್ತ, ಸಹಕಾರಿ ದುರೀಣೆರ್ ತುಳು ಸಾಹಿತಿಲೂ ಆಯಿನ ಬಿ.ಪಿ. ಶೇಣಿ ಮೆರ್ ಪತ್ತನಾಜೆದ ಬಗ್ಗೆ ಮಾಹಿತಿ ಕೊರಿಯೆರ್ . ಘಟಕದ ಗೌರವಾಧ್ಯಕ್ಷೇರಾಯಿನ ಉಮೇಶ್ ಸಾಲಿಯಾನ್, ಘಟಕದ ಜೊತೆಕಾರ್ಯದರ್ಶಿ, ತುಳು ಸಾಹಿತಿ ಶ್ರೀನಿವಾಸ ಆಳ್ವ ಕಳತ್ತೂರು, ವಿಕಿಪೀಡಿಯ ಸಂಪಾದಕಿ ಬೊಕ್ಕ ಘಟಕದ ಉಪಾಧ್ಯಕ್ಷೆ ವಿನೋದ ಪ್ರಸಾದ್ ರೈ ಕಾರಿಂಜೆ ಅಂಚನೆ ತುಳು ಸಾಹಿತಿ, ಘಟಕದ ಸದಸ್ಯೆ ರಾಜಶ್ರೀ ಟಿ ರೈ ಪೆರ್ಲ ಪಾಲ್ ಪಡೆದಿತ್ತೆರ್.

ಊರು ಪರವೂರುರ್ದು ಆನ್ ಲೈನ್ ಮುಖೇನ ಪಾಲ್ ಪಡೆಯಿನ ಗಣ್ಯೆರ್ , ಅಭಿಮಾನಿಲು ಇಂಚಿನ ಲೇಸುಲು ನನಾತ್ ಸಂಘಟನೆ ಮುಖೇನ ನಡಪಾವಡ್ ಪಂದ್ ಎಡ್ಡೆಪ್ಪುನು ಬಯಕಿಯೆರ್.

ಲೇಸ್ ದ ನಿರೂಪಣೆನ್ ಘಟಕದ ಕಾರ್ಯದರ್ಶಿ ಕಾರ್ತಿಕ್ ಮಲ್ತೆರ್ ಅಂಚನೆ ಸದಸ್ಯೆ ಕುಶಾಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಸೊಲ್ಮೆ ಸಂದೈತ ಮಲ್ತೆರ್.