ಬೊಲ್ತೆರ್ ಸುದ್ದಿ | Belthangady News

ಬಿಲ್ಲವ ಜನಾಂಗದಕ್ಲೆಗ್ ಪರಿಹಾರ ಕೊರ್ರೆ ಸಂಸದೆರೆಗ್ ಮನವಿ

ಒಡಿಪು , ಜೂ.6: ಜನಪ್ರತಿನಿಧಿಲು ಬಿಲ್ಲವ ಜನಾಂಗದ ಬಗ್ಗೆ ಗೇನ ಕೊರ್ದು , ಮುಖ್ಯ ಮಂತ್ರಿಲೆನ ಮಿತ್ತ್ ಒತ್ತಡ ಕಂತ್ , ಬಿಲ್ಲವ ಜನಾಂಗಗ್ ನ್ಯಾಯ ಒದಗಿಸಾದ್ ಕೂಡಲೇ ಪರಿಹಾರ ಘೋಷಣೆ ಮಲ್ಪೊಡು ಪಂದ್ ಕಟಪಾಡಿ ವಿಶ್ವನಾಥ ಕ್ಷೇತ್ರದ ಗುರ್ಕಾರ್ಲಾಯಿನ ಬಿ.ಎನ್.ಶಂಕರ ಪೂಜಾರಿ ಅವಿಭಜಿತ ದ.ಕ. ಜಿಲ್ಲೆದ ಶಾಸಕೆರ್, ಸಂಸದೆರ್ ಪತ್ರ ಬರೆದ್ ಮನವಿ ಸಲ್ಲಿಸಾಯೆರ್ .

ಶೇಂದಿ ದೆತ್ದ್ ಬದುಕುವ ಬಿಲ್ಲವ/ಈಡಿಗ ಜನಾಂಗದ ಮೂರ್ತೆದಾರಿಕೆ ಕಸುಬು ಲಾಕ್‌ಡೌನ್‌ರ್ದಾವರ ಸಂಪೂರ್ಣ ಉಂಟುದುಂಡು , ಮೂರ್ತೆದಾರೆರ್ನ ಕುಟುಂಬ ಅನಾಥ ಆತುಂಡು.ಬಿಲ್ಲವ ಜನಾಂಗದ ಆರಾಧ್ಯ ದೇವೇರಾಯಿನ ಕೋಟಿ-ಚೆನ್ನಯ್ಯ ಗರಡಿಡ್ ಪೂಜೆ ಮಲ್ಪುನ ಗರಡಿ ಅರ್ಚಕೆರ್.ದರ್ಶನ ಪಾತ್ರಿಲು, ಸಿಬ್ಬಂದಿಲು, ದೇವಸ್ಥಾನದ ಸಿಬ್ಬಂದಿಲಕ ಸಂಕಷ್ಟಡ್ ಉಲ್ಲೆರ್ , ರಾಜ್ಯ ಸರಕಾರ ಮೆಕ್ಲೆನ ಸಾಕಾರಗ್ ಬರೊಡು ಪಂದ್ ಒತ್ತಾಯ ಮಲ್ದೆರ್.

ಸವಿತಾ ಸಮಾಜರ್ದ್ ಕಾರ್ಮಿಕ ಅಧಿಕಾರಿಲೆಗ್ ಮನವಿ

ಒಡಿಪು , ಜೂ.6: ಸರಕಾರದ ಸಹಾಯಧನ ವಿಚಾರಡ್ ಕ್ಷೌರಿಕ ಬಂಧುಲೆಗ್ ಸಾಕಷ್ಟು ಅನಾನುಕೂಲತೆ ಉಂಡು ಎಚ್ಚದ ರೀತಿಡ್ ನಮ್ಮ ಬಂಧುಲು ಫಲಾನುಭವಿಲೆಗ್ ಇಲಾಖಾ ವತಿರ್ದ್ ಸಾಕಾರ ಕೊರೊಡು ಒಡಿಪು ಜಿಲ್ಲಾ ಸವಿತಾ ಸಮಾಜದ ಗೌರವ ಗುರ್ಕಾರ್ಲಾಯಿನ ಗೋವಿಂದ ಭಂಡಾರಿ ಬೊಕ್ಕ ಪ್ರಧಾನ ಕಾರ್ಯದರ್ಶಿ ಸದಾಶಿವ ಬಂಗೇರ ಕುರ್ಕಾಲು ಒಡಿಪು ಜಿಲ್ಲಾ ಕಾರ್ಮಿಕ ಅಧಿಕಾರಿಲೆನ್ ಭೇಟಿ ಮಲ್ತ್ ಬಿನ್ನಾಪು ಮಲ್ತೆರ್.

ಸಿಪಿಎಂ ಪೆರಿಯ ಮುಖಂಡ ಕೆ. ಗೋವಿಂದ ಶೆಟ್ಟಿಗಾರ್ ನಿಧನ

ಕುಂದಾಪುರ, ಜೂ.5: ಸಿಪಿಐಎಂ ಪಕ್ಷದ ಪೆರಿಯ ಮುಖಂಡ, ಕರ್ನಾಟಕ ಪ್ರಾಂತ ರೈತ ಸಂಘದ ತಾಲೂಕು ಮಾಜಿ ಗುರ್ಕಾರ್ಲಾಯಿನ , ಕೋಟೇಶ್ವರ ಗ್ರಾಪಂ ಮಾಜಿ ಸದಸ್ಯ ಕೆ.ಗೋವಿಂದ ಶೆಟ್ಟಿಗಾರ್(88) ಜೂ.3 ತಾರೀಖ್ ಗ್ ಕೋಟೇಶ್ವರದ ಖಾಸಗಿ ಆಸ್ಪತ್ರೆಡ್ ವಯೋಸಹಜ ಅನಾರೋಗ್ಯರ್ದ್ ತೀರ್ ಪೋಯೆರ್ .

1970ಟ್ಟ್ ಸಿಪಿಐಎಂ ಪಕ್ಷಡ್ ರಾಜಕೀಯ ಜೀವನ ಸುರು ಮಲ್ತಿನ ಆರ್ ಭೂಸುಧಾರಣೆ ಕಾನೂನು ಜಾರಿಗಾದ್ ಗೇಣಿದಾರ ರೈತರ ಭೂಮಿ ಖಾಯಂತಿಗಾದ್ ನಡತಿನ ಹೋರಾಟಡ್ ಸಕ್ರೀಯವಾದ್, ಗೇಣಿದಾರೆರೆಗ್ ಭೂಮಿ ಮೆರ್ನ ಮಹತ್ವದ ಹೋರಾಟ ಆದಿತ್ತುಂಡು . ಕೋಟೇಶ್ವರ ಗ್ರಾಪಂಗ್ ರಡ್ಡ್ ಅವಧಿಗ್ ಸದಸ್ಯರಾದ್ ಆಯ್ಕೆಯಾಯೆರ್ .

ಕಟ್ಟಡ ಕಾರ್ಮಿಕೆರೆಗ್ ಕೋವಿಡ್ ಲಸಿಕೆ

ಒಡಿಪು , ಜೂ.6: ಒಡಿಪು ಜಿಲ್ಲೆದ ಆದ್ಯತಾ ಕೂಟದ ಕಟ್ಟಡ ಕಾರ್ಮಿಕೆರೆಗ್ ಸರಕಾರದ ನಿರ್ದೇಶನದಲಕ ಜೂ.5ರ್ದ್ ಪ್ರಾಥಮಿಕ ಆರೋಗ್ಯ ಘಟಕದ ವ್ಯಾಪ್ತಿಡ್ ಕಟ್ಟಡ ಕಾರ್ಮಿಕೆರೆಗ್ ಲಸಿಕೆ ಕೊರ್ಪಿನ ಕಾರ್ಯನ್ ಸುರು ಮಲ್ದೆರ್ .

ಐರ್ದಾವರ ಜಿಲ್ಲೆದ ನೋಂದಾಯಿತ ಕಟ್ಟಡ ಕಾರ್ಮಿಕೆರ್ , ಕಟ್ಟಡ ಬೊಕ್ಕ ಇತರೆ ನಿರ್ಮಾಣ ಕಾರ್ಮಿಕೆರ್ನ ಕಲ್ಯಾಣ ಮಂಡಳಿರ್ದ್ ಪಡೆಯಿನ ಮೂಲ ಗುರುತಿನಚೀಟಿ ಬೊಕ್ಕ ಆಧಾರ್‌ಕಾರ್ಡ್ ನ್ ತಮ್ಮ ಕೈತಲ್ದ ಪಿಹೆಚ್‌ಸಿ ಅತ್ತುಂಡ ಕೋವಿಡ್ ವ್ಯಾಕ್ಸಿನ್ ಸೆಂಟರ್‌ಡ್ ಹಾಜರ್ ಪಡಿಸಾದ್ ಲಸಿಕೆ ಲಭ್ಯತೆದ ಆಧಾರದ ಮಿತ್ತ್ ಲಸಿಕೆನ್ ಪಡೆಯೋಡು ಪಂದ್ ತೆರಿಪಾಯೆರ್.

ನೋಂದಣಿಯಾವಂದಿನ ಕಟ್ಟಡ ಕಾರ್ಮಿಕೆರ್ ಕಾರ್ಮಿಕೆರೆನ್ ಇಲಾಖೆರ್ದ್ ಈಗಾಗಲೇ ಪಡೆಯಿನ ಅನುಬಂಧ-3 ಬೊಕ್ಕ ಆಧಾರ್‌ಕಾರ್ಡ್‌ನ್ ಹಾಜರು ಪಡಿಸಾದ್ ಲಸಿಕೆನ್ ಲಭ್ಯತೆ ಆಧಾರದ ಮಿತ್ತ್ ಪಡೆಯೋಡು ಅಂಚನೇ ಇತ್ತೇ ಮುಟ ಅನುಬಂಧ-3ನ್ ಪಡೆವಂದಿನ ಕಟ್ಟಡ ಕಾರ್ಮಿಕೆರ್ ತಮ್ಮ ತಾಲೂಕು ಕಾರ್ಮಿಕ ನಿರೀಕ್ಷಕೆರೆನ್ ಸಂಪರ್ಕಿಸಾದ್ ಅನುಬಂಧ-3ನ್ ಪಡೆದ್ ಲಸಿಕೆ ಪಡೆಯೋಡು ಪಂದ್ ಜಿಲ್ಲಾ ಕಾರ್ಮಿಕ ಅಧಿಕಾರಿ ಕುಮಾರ್ ಪ್ರಕಟಣೆಡ್ ತೆರಿಪಾಯೆರ್ .

ದಕ್ಷಿಣ ಕನ್ನಡಡ್ ಸುರುತ್ತ ಆಕ್ಸಿಜನ್ ಉತ್ಪಾದನ ಘಟಕ ಬಂಟ್ವಾಳಡ್ ಉದಿಪನ

ಬಂಟ್ವಾಳ ಜೂ.06:ದಕ್ಷಿಣ ಕನ್ನಡ ಜಿಲ್ಲೆದ ಸುರುತ್ತ ಆಕ್ಸಿಜನ್ ಉತ್ಪಾದನಾ ಘಟಕನ್ ವಾಮದಪದವು ಸಮುದಾಯ ಬಂಟ್ವಾಳದ ಆರೋಗ್ಯ ಕೇಂದ್ರದ ಆವರಣಡ್ ಶನಿವಾರ ಉದಿಪನ ಮಲ್ತೆರ್ .

ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಆಕ್ಸಿಜನ್ ಘಟಕನ್ ಉದಿಪನ ಮಲ್ತೆರ್.ಬಂಟ್ವಾಳಡ್ ಕೊರೊನಾ ವಿರುದ್ಧ ಹೋರಾಟ ವ್ಯವಸ್ಥಿತವಾದ್ ನಡತೊಂದು ಉಂಡು , ಸಂಸದ ನಳಿನ್ ಕುಮಾರ್ ಕಟೀಲು, ಶಾಸಕ ರಾಜೇಶ್ ನಾಯ್ಕ್ ಬೊಕ್ಕ ಅಧಿಕಾರಿ ವೃಂದದ ಶ್ರಮನ್ ಮೇರ್ ಪುಗರಿಯೆರ್.

ಸಮಾಜ ಸೇವಾ ವೇದಿಕೆರ್ದ್ ಪೊಲೀಸ್ ವೃತ್ತ ನಿರೀಕ್ಷೆಕೆರ್ನ ಕಚೇರಿಗ್ ಕೊಡೆ, ಮಾಸ್ಕ್,ಸಾನಿಟೈಸರ್ ಕೊಡುಗೆ

ಕಾಪು, ಜೂನ್ 6 : ಸಮಾಜ ಸೇವಾ ವೇದಿಕೆ ಕಳತ್ತೂರು-ಕಾಪು ವತಿರ್ದ್ ಕಾಪು ಪೊಲೀಸ್ ವೃತ್ತ ನಿರೀಕ್ಷಕೆರ್ನ ಕಚೇರಿಗ್ 30 ಸಾರ ವೆಚ್ಚಡ್ ಉತ್ತಮ ಗುಣಮಟ್ಟದ N95 ಮಾಸ್ಕ್ ಸ್ಯಾನಿಟೈಝರ್ ಕೊಡೆನ್ ಪೊಲೀಸ್ ನಿರೀಕ್ಷಕೆರಾಯಿನ ಪ್ರಕಾಶ್ ಮೆರ್ಡ ಕಾಪು ಸಮಾಜ ಸೇವಾ ವೇದಿಕೆ ಗುರ್ಕಾರ್ಲಾಯಿನ ಮೊಹಮ್ಮದ್ ಫಾರೂಕ್ ಚಂದ್ರನಗರ,ಗೌರವ ಗುರ್ಕಾರ್ಲಾಯಿನ ದಿವಾಕರ ಬಿ ಶೆಟ್ಟಿ ಕಳತ್ತೂರು, ಸಂಚಾಲಕಕೆರಾಯಿನ ದಿವಾಕರ ಡಿ ಶೆಟ್ಟಿ ಕಳತ್ತೂರು ಮೇರ್ ಹಸ್ತಾಂತರ ಮಲ್ತೆರ್. ಈ ಪೊರ್ತುಡು ಪಾತೆರಿನ ಮೇರ್ ಸಮಾಜ ಸೇವಾ ವೇದಿಕೆ ಕೊರೋನ ಪೊರ್ತುಡು ಅವ್ವೆತೋ ರೀತಿದ ಸಮಾಜಮುಖಿ ಬೇಲೆ ನಿಜಗ್ಲಾ ಶ್ಲಾಘನಿಯ ಪಂಡೆರ್.

ಈ ಪೊರ್ತುಡು ಐಶ್ವರ್ಯ ಜೂವೆಲ್ಲರ್ಸ್ ಮಾಲಕೆರಾಯಿನ ದಿನೇಶ್ ಆಚಾರ್ಯ ಶಿರ್ವ, ಉದ್ಯಮಿ ವಿಲ್ಸನ್ ಕುಂದರ್ ಕಳತ್ತೂರು,ಗ್ಲಾಡೀಸ್ ಅಲ್ಮೆಡ ರೈಸ್ ಮಿಲ್, ಭಾರತಿ ಶೆಟ್ಟಿಗಾರ್ ರೈಸ್ ಮಿಲ್,ಕಾಪು ಮೆಡಿಕಲ್ ಮಾಲಕೆರಾಯಿನ ಹಾಫಿಲ್ ಇಬ್ರಾಹಿಂ,ಕಾಪು ಬ್ಲಾಕ್ ಕಾಂಗ್ರೆಸ್ ಅಲ್ಪ ಸಂಖ್ಯಾತ ಗುರ್ಕಾರ್ಲಾಯಿನ ಶರ್ಫುದ್ದಿನ್ ಶೇಖ್ ಮಜೂರು,ಶಿರ್ವ ಸಿ.ಆರ್ ಪ್ರಾಪರ್ಟಿಸ್ ಮಾಲಕೆರಾಯಿನ ಸಂತೋಷ್ ಆಚಾರ್ಯ, ರಾಘವೇಂದ್ರ ಭಟ್ ಕಳತ್ತೂರು, ಲೋಕೇಶ್ ಭಟ್ ಪಾದೂರು, ಸಂತೋಷ್ ಶೆಟ್ಟಿ ಗುರ್ಮೆ, ಗ್ಲಾಡ್ಸನ್ ಡಿ ಅಲ್ಮೆಡಾ ರೈಸ್ ಮಿಲ್,ಲಕ್ಷ್ಮಣ ಶೆಟ್ಟಿ ಇನ್ನಂಜೆ,ರಾಜೇಶ್ ನಾಯ್ಕ್ ಕಾಪು ಚೇತನಾ ನಾಯ್ಕ್ ಕಾಪು,ಬೊಕ್ಕ ಸಿ.ಪಿ.ಐ ಕಚೇರಿ ಸಿಬ್ಬಂದಿನಕುಲು ಪಾಲ್ ಪಡೆದಿತ್ತೆರ್.