ಕುಡ್ಲದ ಸುದ್ದಿ | Mangalore News

ಐಕಳ ಹರೀಶ್ ಶೆಟ್ರೆನ ಇಲ್ಲಡ್ ಬಂಗಾರ್ ಕಂಡ್ ದಿನ ಕೇಸ್ ದ 3 ನೇ ಆರೋಪಿ ಅರೆಸ್ಟ್

ಕಿನ್ನಿಗೋಳಿ : ಮುಲ್ಕಿ ಪೊಲೀಸ್ ಠಾಣಾ ವ್ಯಾಪ್ತಿದ ಐಕಳಡ್ ಇಲ್ಲಗ್ ಕಲ್ವೆರ್ ಪೊಗ್ಗ್‌ದಿನ ಕೇಸ್‌ ದ ಮಿತ್ತ್ ನನೊರಿ ಆರೋಪಿನ್ ಕುಡ್ಲ ಸಿಸಿಬಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್. ಉಂದೆತೊಟ್ಟುಗು ಕೇಸ್‌ಗ್ ಸಂಬಂಧ ಪಟ್ಟಿಲೆಕ್ಕ ಅರೆಸ್ಟ್ ಆಯಿನ ಆರೋಪಿಲೆನ ಸಂಖ್ಯೆ 3 ಕ್ಕ್ ಏರ್ದ್ಂಡ್.

ಜನವರಿ 1 ಬೊಕ್ಕ 2 ತ್ತ ನಡುಟ್ಟ್ ಕುಡ್ಲ ತಾಲೂಕು ತಾಳಿಪ್ಪಾಡಿ ಗ್ರಾಮದ ಗುತ್ತಕಾಡುಡು ಇಪ್ಪುನ ಐಕಳ ಹರೀಶ್ ಶೆಟ್ರೆನ ಚಂದ್ರಿಕಾ ಪುದರ್‌ದ ಇಲ್ಲದ ಎದುರ್‌ ಬಾಕಿಲ್‌ದ ಬೀಗ ಪೊಲ್ತುದ್ ಪೊಗ್ಗಿನ ಕಲ್ವೆರ್ ಬಂಗಾರ್, ಬೊಲ್ಲಿದ ಪದ್ದೆಯಿ ಅಂಚನೆ ಕಾಸ್‌ನ್ ಕಂಡ್‌ದಿತ್ತೆರ್. ಮುಲ್ಕಿ ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆದಿತ್ತ್ಂಡ್. ಈ ಕೇಸ್‌ದ ತನಿಖೆನ್ ಸಿಸಿಬಿ ಪೊಲೀಸೆರೆಗ್ ಕೊರ್ದಿತ್ತೆರ್.

ಈ ಕೇಸ್‌ಡ್ ತನಿಖೆಡ್ ರಡ್ಡ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದ್ ಅಕಲೆರ್ದ್ 56,50,000 ರೂ. ಬಿಲೆತ್ತ ಬಂಗಾರ್ ಬೊಕ್ಕ ಮೊಬೈಲ್ ಫೋನ್ ಅಂಚನೆ ಬೇತೆ ಸೊತ್ತುಲೆನ್ ವಶಕ್ಕ್ ದೆತೊಂದಿತ್ತೆರ್. ಇತ್ತೆ ಈ ಕೇಸ್‌ಡ್ ಕಂಡರೆ ಇಲ್ಲ್ ತೋಜ್ಪಾಯಿನ ನನೊರಿ ಆರೋಪಿ ಬೊಂಡಂತಿಲ ನಿವಾಸಿ ಮಹಮ್ಮದ್ ಶರೀಫ್(40) ಪನ್ಪಿನರೆನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದ್ ಅಯೆರ್ದ್ ಬಂಗಾರ್‌ದ ಪೆಂಡೆಂಟ್ ಅಂಚನೆ ಮೊಬೈಲ್ ಫೋನ್‌ನ್ ವಶಕ್ಕ್ ದೆತೊಂದೆರ್. ಈ ಕೇಸ್‌ಡ್ ಮಸ್ತ್ ಜನ ಆರೋಪಿಲು ಪಾಲ್ ಪಡೆದಿತ್ತ್‌ದ್ ಅಕಲೆನ್ ನಾಡ್ ಪತ್ತುನ ಬೇಲೆನ್ ಪೊಲೀಸೆರ್ ಮಲ್ತೊಂದುಲ್ಲೆರ್.

ಕಾಂತಾರರ್ದ್ ಬೊಕ್ಕ ತುಳುತ್ತ “ಬಾಯಿಲ್ಡ್ ರೈಸ್” ಕಿರುಚಿತ್ರದ ಕಮ್ಮೆನ

“ಬಾಯಿಲ್ಡ್ ರೈಸ್” ಪನ್ಪಿನ ಅಪ್ಪಟ ತುಳುನಾಡ್‌ದ ಪಿರಾಕ್‌ದ ಕಥೆ ಇಪ್ಪುನ ತುಳು ಕಿರುಚಿತ್ರ ಇತ್ತೆ ರಾಜ್ಯ ಮಟ್ಟಡ್ ಮಸ್ತ್ ಪ್ರಶಸ್ತಿಲೆನ್ ಪಡೆತ್ಂಡ್. ಆತೆ ಅತ್ತಂದೆ ಆಸ್ಕರ್ ಮಾನ್ಯತೆ ಪಡೆದಿನಂಚಿನ “ಬೆಂಗ್ಲೂರ್ ಅಂತಾರಾಷ್ಟ್ರೀಯ ಕಿರುಚಿತ್ರೋತ್ಸವ-2023” ಗ್ ಆಯ್ಕೆ ಆತ್ಂಡ್.

2022 ತ್ತ ಆಗೋಸ್ಟ್ 24 ಕ್ಕ್ ಮಾಯಿಲು ಫಿಲಂಸ್ ಯೂಟ್ಯೂಬ್ ಚಾನೆಲ್‌ಡ್ ಬುಡುಗಡೆ ಆಯಿನ “ಬಾಯಿಲ್ಡ್ ರೈಸ್” ಕಿರುಚಿತ್ರ ಜಯಂತ್ ನಿಟ್ಟಡೆ ಮೆರೆನ ಕಥೆ ಅಂಚನೆ ನಿರ್ದೇಶನಡ್ ಆತ್ಂಡ್. ದಿವ್ಯಾ ಎಲ್. ಮೂಡಿಗೆರೆ ನಿರ್ಮಾಣದ ಈ ಕಿರುಚಿತ್ರಗ್ ಆರ್.ಪ್ರದೀಪ್ ಮೇರೆನ ಸಂಕಲನ ಉಂಡು.

ಹೆಚ್ ಪಿ ಸಿ ಎಲ್ ಸಂಸ್ಥೆದ ಉದಿಪನದ ದಿನಾಚರಣೆ

ಕುಡ್ಲ: ಹಿಂದುಸ್ತಾನ್ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ ಕುಡ್ಲ ರಿಟೇಲ್ ಪ್ರಾದೇಶಿಕ ಕಚೇರಿಡ್ ಹೆಚ್ ಪಿ ಸಿ ಎಲ್ ನ 49 ನೇ ಉದಿಪನದ ದಿನಾಚರಣೆ ಜುಲೈ 17 ಸೋಮಾರ ನಡತ್ಂಡ್.

ಲೇಸ್‌ನ್ ಉಪ ಮಹಾಪ್ರಬಂಧಕೆರ್ ನವೀನ್ ಕುಮಾರ್ ಎಮ್ ಜಿ ಅಂಚನೆ ನಿವೃತ್ತ ಅಧಿಕಾರಿ ಶೈಲೇಶ್ ಆರ್ ರಾವ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.

ಲೇಸ್‌ಡ್ ಉಪ ಮಹಾ ಪ್ರಬಂಧಕೆರ್, ಮುಖ್ಯ ಅತಿಥಿಲು ಪೆಟ್ರೋಲಿಯಂ ಉದ್ಯಮ ಬೊಕ್ಕ ಉತ್ಪಾದನೆದ ಬಗೆಟ್ಟ್ ಮಾಹಿತಿ ಕೊರಿಯೆರ್. ಪೆಟ್ರೋಲಿಯಂ ಉತ್ಪನ್ನದ ಮಲ್ಲ ವಿತರಕೆರ್ ಬೊಕ್ಕ ಹೆಚ್ ಪಿ ಸಿ ಎಲ್ ಸಿಬ್ಬಂದಿಲು ಪಾಲ್ ಪಡೆದ್ ಇತ್ತೆರ್. ಅಯಿರ್ದ್ ಬೊಕ್ಕ ರೆಡ್ ಕ್ರಾಸ್ ಸಂಸ್ಥೆ ಕುಡ್ಲ ಮುತಾಲಿಕೆಡ್ ನೆತ್ತೆರ್ ದಾನ ಮಲ್ಪುನ ಲೇಸ್ ನಡತ್ಂಡ್. ಸುಮಾರ್ 120 ಜನಕುಲು ಈ ಲೇಸ್‌ಡ್ ಪಾಲ್ ಪಡೆದಿತ್ತೆರ್.