ಕುಡ್ಲದ ಸುದ್ದಿ | Mangalore News

ಪಡೀಲ್ ಅಂಡರ್ ಪಾಸ್ ಡ್ ಬೈಕ್ ಆಕ್ಸಿಡೆಂಟ್: ತೀರ್ ಪೋಯಿನ ಕಾಲೇಜ್ ಕಲ್ಪಾರ್ಥಿ

ಕುಡ್ಲ:  ಆಕ್ಸಿಡೆಂಟ್ ಡ್ ಕಲ್ಪಾರ್ಥಿ ಒರಿ ತೀರ್ ಪೋದ್ ಬೊಕ್ಕ ರಡ್ಡ್ ಜನಕ್ ಗಾಯ ಆತಿನ ಘಟನೆ ಪಡೀಲ್ ಪೇಂಟೆದ ಅಂಡರ್ ಪಾಸ್ ಡ್ ನಡತ್ಂಡ್.

ಬಜಾಲ್ ಕೈತಲ್ ದ ಪಲ್ಲಕೆರೆತ ನಿವಾಸಿ ಭವಿನ್ ರಾಜ್(20) ತೀರ್ ಪೋಯಿನ ಕಲ್ಪಾರ್ಥಿ. ಘಟನೆಡ್ ಗಾಡ್ವಿನ್ (20) ಬೊಕ್ಕ ಆಶಿತ್ (17) ಮೊಕ್ಲೆಗ್ ಗಾಯ ಆದ್ ಅಕ್ಲೆನ್ ಪೇಂಟೆದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್ ದೆರ್.

ಪೇಂಟೆದ ಖಾಸಗಿ ಕಾಲೇಜ್ ಡ್ ಸುರುತ ವರ್ಷದ ಪದವಿ ಕಲ್ತೊಂದು ಇತ್ತಿನ ಭವಿನ್ ರಾಜ್ ಗುರುವಾರ ಮಧ್ಯಾಹ್ನ ಫ್ರೆಂಡ್ಸ್ ನ ಒಟ್ಟಿಗೆ ಬೈಕ್ ಡ್ ಪೋನಗ ಪಡೀಲ್ ಅಂಡರ್‌ಪಾಸ್ ಡ್ ಬೈಕ್ ನಿಯಂತ್ರಣ ತತ್ತ್ ದ್ ಅಂಡರ್‌ಪಾಸ್ ಫುಟ್‌ಪಾತ್ ಗ್  ತಾಂಟ್ ದುಂಡು ಪಂದ್ ತೆರಿದ್ ಬೈದುಂಡು.

ಕುಡ್ಲದ ದಕ್ಷಿಣ ಸಂಚಾರ ಪೊಲೀಸ್ ಸ್ಟೇಷನ್ ಡ್ ಈ ಬಗೆಟ್ ಕೇಸ್ ದಾಖಲಾತ್‌ಂಡ್.

ಕಿನ್ನಿಗೋಳಿ: 49ನೇ ವರ್ಷದ ಗಣಪತಿ ಉಚ್ಚಯ

ಕಿನ್ನಿಗೋಳಿ; ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಕಿನ್ನಿಗೋಳಿ ನೆತ್ತ ಮುತಾಲಿಕೆಡ್ 49ನೇ ವರ್ಷದ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆ.19 ರ್ದ್ 21 ಮುಟ ನಡಪೆರೆ ಉಂಡು.

ಸೆ.19 ಅಂಗಾರೆದಾನಿ 8 ಗಂಟೆಗ್ ವೇ|ಮೂ|ಕೆ. ವಾಸುದೇವ ಅಸ್ರಣ್ಣ ಮೇರ್ ನ ಉಪಸ್ಥಿತಿಡ್ ವಿಗ್ರಹಪ್ರತಿಷ್ಠೆ, ಗಣಹೋಮ ನಡಪೆರೆ ಉಂಡು. ಕಾಂಡೆ 8.30 ಗಂಟೆಗ್ ಕಟೀಲು ಲಿಂಗಪ್ಪ ಶೆಟ್ಟಿಗಾರ್ ಮೊಕ್ಲೆನ ಬಳಗರ್ದ್ ನಾಗಸ್ವರ ವಾದನ, 10.30 ರ್ದ್ ಆದಶಕ್ತಿ ಭಜನಾ ಮಂಡಳಿರ್ದ್ ಕುಣಿತ ಭಜನೆ, 11 30 ರ್ದ್ ಕಟೀಲು ಶ್ರೀ ದೇವಿ ಭಜನಾ ಮಂಡಳಿರ್ದ್ ಭಜನೆ, 12.30 ಕ್ಕ್ ಮಹಾಪೂಜೆ, ಮದ್ಯಾಹ್ನ 1 ಗಂಟೆಗ್ ಸೋಮನಾಥೇಶ್ವರ ಭಜನಾ ಮಂಡಳಿ ವರ್ಣಬೆಟ್ಟಿ ಮೊಕ್ಲೆರ್ದ್ ಭಜನೆ, 2.30 ರ್ದ್ ಶ್ರೀನಿವಾಸ ಜೊಕ್ಲೆನ ಕುಣಿತ ಭಜನೆ, ಬಯ್ಯ 7 ಗಂಟೆಗ್ ರಂಗಪೂಜೆ-ಮಹಾಪೂಜೆ, 5 ಗಂಟೆರ್ದ್ 7 ಗಂಟೆ ಮುಟ ವಿದೂಷಿ ಅನ್ನಪೂರ್ಣ ರಿತೇಶ್ ನಿರ್ದೇಶನದ ಶಿವಪ್ರಣಾಮ್ ಕಿನ್ನಿಗೋಳಿ ಸಂಸ್ಥೆದ ಕಲ್ಪಾರ್ಥಿಲೆರ್ದ್ ನೃತ್ಯೋಲ್ಲಾಸ ಕಾರ್ಯಕ್ರಮ, 7.30 ರ್ದ್ ನಿಡ್ಲೆ ಮಹಾಗಣಪತಿ ಯಕ್ಷಗಾನ ಮಂಡಳಿರ್ದ್ ಕನಕಾಂಗಿ ಕಲ್ಯಾಣ ಗದಾಯದ್ದ ರಕ್ತರಾತ್ರಿ ಯಕ್ಷಗಾನ ನಡಪೆರೆ ಉಂಡು.

ಸೆ.20 ಬುಧವಾರದಾನಿ ಕಾಂಡೆ 8 ಗಂಟೆಗ್ ಶ್ರೀ ದುರ್ಗಾ ಭಜನಾ ಮಂಡಳಿ ಮೊಕ್ಲೆರ್ದ್ ಭಜನಾ ಕಾರ್ಯಕ್ರಮ, 8.30 ಕ್ಕ್ 108 ತಾರಾಯಿದ ಗಣಹೋಮ, ಮದ್ಯಾಹ್ನ 12 ಗಂಟೆರ್ದ್ ವೇ|ಮೂ| ಕಮಲಾದೇವಿ ಪ್ರಸಾದ ಅಸ್ರಣ್ಣ ಮೇರ್ ನ ಉಪಸ್ಥಿತಿಡ್ ಮಹಾಪೂಜೆ ಬೊಕ್ಕ ಪಲ್ಲಪೂಜೆ, 1 ಗಂಟೆರ್ದ್ ಸಾರ್ವಜನಿಕ ಅನ್ನಸಂತರ್ಪಣೆ, 1 ಗಂಟೆರ್ದ್ ದಾಸ ಕೀರ್ತನ ಶುಭ ಚಿಂತನ ಕಾರ್ಯಕ್ರಮ, 3 ಗಂಟೆಗ್ ಪಿರವುಡು ಒರಿ ಉಲ್ಲೆ ತುಳು ಹಾಸ್ಯಮಯ ನಾಟಕ 6 ಗಂಟೆರ್ದ್ ಧಾರ್ಮಿಕ ಸಭೆ, ಬಯ್ಯ 7 ಗಂಟೆಗ್ ಮಹಾಪೂಜೆ, 7.30 ರ್ದ್ ಸ್ವಿಂರ‍್ಸ್ ಡ್ಯಾನ್ಸ್ ಕ್ರೀವ್ ಕುಳಾಯಿ ಮೊಕ್ಲೆರ್ದ್ ನೃತ್ಯ ಗಾನ ವೈಭವ ನಡಪೆರೆ ಉಂಡು.

ಸೆ.21 ಗುರುವಾರದಾನಿ ಕಾಂಡೆ 7 ಗಂಟೆಗ್ ಗಣಹೋಮ, 8 ಗಂಟೆಗ್ ವಿಶ್ವಕರ್ಮ ಭಜನಾ ಮಂಡಳಿರ್ದ್ ಭಜನಾ ಕಾರ್ಯಕ್ರಮ, 9.30 ರ್ದ್ ಕೃಷ್ಣಾರ್ಪಣಮ್, 12.30 ಕ್ಕ್ ಮಹಾಪೂಜೆ, 5.30 ಕ್ಕ್ ಶ್ರೀ ವಿಘ್ನೇಶ್ವರ ದೇವೆರ್ನ ವಿಸರ್ಜನಾ ಮೆರವಣಿಗೆ ಕಿನ್ನಿಗೋಳಿರ್ದ್ ಶ್ರೀ ಕ್ಷೇತ್ರ ಕಟೀಲ್ ಮುಟ ನಡಪೆರೆ ಉಂಡು.

ಕಿನ್ನಿಗೋಳಿ: 37 ವರ್ಷದ ಸಾರ್ವಜನಿಕ ಶ್ರೀ ಬಾಲಗಣಪತಿ ಉಚ್ಚಯ

ಕಿನ್ನಿಗೋಳಿ: ಸಾರ್ವಜನಿಕ ಶ್ರೀ ಬಾಲಗಣೇಶೋತ್ಸವ ಸಮಿತಿ ರಾಜರತ್ನಪುರ ಕಿನ್ನಿಗೋಳಿ ನೆತ್ತ ಮುತಾಲಿಕೆಡ್ 37 ವರ್ಷದ ಸಾರ್ವಜನಿಕ ಶ್ರೀ ಬಾಲಗಣಪತಿ ಉಚ್ಚಯ ಸೆ.19 ಬೊಕ್ಕ 20 ದಾನಿ ನಡಪೆರೆ ಉಂಡು.

ಸೆ.19 ಅಂಗಾರೆ ಕಾಂಡೆ 9.30 ಗಂಟೆಗ್ ಮಹಾಗಣಪತಿ ಹೋಮ ಬೊಕ್ಕ ಶ್ರೀ ದೇವೆರ್ನ ವಿಗ್ರಹ ಪ್ರತಿಷ್ಠೆ, 9.30 ರ್ದ್ ಬಾಲಗಣಪತಿ ಭಜನಾ ಮಂಡಳಿರ್ದ್ ಭಜನೆ, 10.30 ರ್ದ್ ಭ್ರಾಮರಿ ಮಹಿಳಾ ಸಮಾಜ ಮೆನ್ನಬೆಟ್ಟು ಮೊಕ್ಲೆರ್ದ್ ಭಜನೆ, 12.30 ಕ್ಕ್ ಮಹಾಪೂಜೆ, 1.30 ರ್ದ್ ಬೇತೆ ಬೇತೆ ಪಂತೊ, ಬಯ್ಯ 4 ಗಂಟೆರ್ದ್ ಮನರಂಜನಾ ಕಾರ್ಯಕ್ರಮ ಬೊಕ್ಕ ಸ್ಥಳೀಯೆರೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ಭಕ್ತಿಗೀತೆ, ಛದ್ಮವೇಷ ಪಂತೊ, 5 ಗಂಟೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ, 5.30 ರ್ದ್ ಡಮರು ನಾಟ್ಯಾಲಯ ಬೊಕ್ಕ ಸಂಗೀತ ಕೇಂದ್ರ ಎಸ್ ಕೋಡಿ ಮೊಕ್ಲೆರ್ದ್ ಭರತನಾಟ್ಯ ವೈಭವ, ಬಯ್ಯ 6.30 ರ್ದ್ ವೀರಭದ್ರ ಯುವಕ ಮಂಡಲ ಬೊಕ್ಕ ಮಹಿಳಾ ಘಟಕರ್ದ್ ತಾಳಿಪಾಡಿ-ಪನರೂರು ಮೊಕ್ಲೆರ್ದ್ ಕಲಾವೈಭವ, 7.30 ರ್ದ್ ನಟರಾಜ ನೃತ್ಯ ಬೊಕ್ಕ ನೃತ್ಯ ರೂಪಕ ಕಲಾ ತಂಡ, ಕಟೀಲ್ ಮೊಕ್ಲೆರ್ದ್ ನವೀನ್ ಕುಮಾರ್ ಕೊಡೆತ್ತೂರು ಮೇಗಿನ ಮನೆ ಮೊಕ್ಲೆನ ನಿರ್ಮಾಣದ, ನಿರ್ದೇಶನದ ಭಕ್ತಪ್ರಧಾನ ನೃತ್ಯ ರೂಪಕ ಶಬರಿಮಲೆ ಸ್ವಾಮಿ ಅಯ್ಯಪ್ಪ ಕಾರ್ಯಕ್ರಮ, ರಾತ್ರೆ 8.30 ಗಂಟೆಗ್ ಮಹಾಪೂಜೆ, 8.45 ಕ್ಕ್ ಯಕ್ಷ ಕೌಸ್ತುಭ ಯಕ್ಷಗಾನ ತರಬೇತಿ ಕೇಂದ್ರ ರಾಜರತ್ನಪುರ ಮೊಕ್ಲೆರ್ದ್ ಯಕ್ಷಗಾನ ಪ್ರದರ್ಶನ ಪ್ರಸಂಗ; ಕದಂಬ ಕೌಶಿಕೆ, ನಡಪೆರೆ ಉಂಡು.

ಸೆ.20 ಬುಧವಾರದಾನಿ ಕಾಂಡೆ 7.30 ಕ್ಕ್ ಮಹಾಲಿಂಗೇಶ್ವರ ಭಜನಾ ಮಂಡಳಿ ಮೊಕ್ಲೆರ್ದ್ ಭಜನೆ, 9 ಗಂಟೆಗ್ ಮಹಾಪೂಜೆ, 10 ಗಂಟೆರ್ದ್ 108 ತಾರಾಯಿದ ಸಾರ್ವಜನಿಕ ಗಣಹೋಮ, 12.30 ಕ್ಕ್ ಮಹಾಪೂಜೆ, ಪ್ರಸಾದ ವಿತರಣೆ, 1 ಗಂಟೆಗ್ ಸಾರ್ವಜನಿಕ ಅನ್ನಸಂತರ್ಪಣೆ ಬೊಕ್ಕ ಕಿನ್ನಿಗೋಳಿ ಕಾಳಿಕಾಂಬ ಭಜನಾ ಮಂಡಳಿರ್ದ್ ಭಜನಾ ಕಾರ್ಯಕ್ರಮ, 2 ಗಂಟೆಗ್ ಪಂಜ-ಕೊಯ್ಕುಡೆ ನವಜ್ಯೋತಿ ಭಜನಾ ಮಂಡಳಿರ್ದ್ ಭಜನೆ, ಮದ್ಯಾಹ್ನ 3 ಗಂಟೆಗ್ ಮಂಗಳಾರತಿ, 4 ಗಂಟೆಗ್ ಶ್ರೀ ಬಾಲಗಣಪತಿ ವಿರ್ಸಜನಾ ಪೂಜೆ ನಡಪೆರೆ ಉಂಡು.

ತುಳುನಾಡ್ ಡ್ ಚೌತಿಗ್ ಸೆ.19 ದಾನಿ ರಜೆ ಕೊರಿಯೆರೆ ಸಚಿವೆರ್ನ ಸೂಚನೆ

ತುಳುನಾಡ್ ದ ಜಿಲ್ಲೆ ಸೇರಿನಂಚ ಬೇತೆ ಬೇತೆ ಜಿಲ್ಲೆಡ್ ಚೌತಿ ಸೆ.19 ದಾನಿ ಆಚರಣೆ ಮಲ್ಪುನೆಟ್ ಅವ್ವೆ ದಿನ ಸರಕಾರಿ ರಜೆ ಘೋಷಣೆ ಮಲ್ಪೊಡು ಪಂದ್ ಸಚಿವೆರ್ ಮನವಿ ಕೊರ್ತೆರ್.

ಈ ಹಿನ್ನಲೆಡ್ ದ.ಕ. ಜಿಲ್ಲೆಡ್ ಸರಕಾರಿ ರಜೆನ್ ಸೆ.18 ದ ಬದಲ್ 19 ದಾನಿ ಕೊರಿಯೆರೆ ಅಗತ್ಯ ಕ್ರಮ ದೆತೊನೊಡು ಪಂದ್ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರ್ ಸರಕಾರದ ಮುಖ್ಯ ಕಾರ್ಯದರ್ಶಿ ಬೊಕ್ಕ ದ.ಕ. ಜಿಲ್ಲಾಧಿಕಾರಿಗ್ ಸೂಚಿನೆ ಕೊರ್ತೆರ್.

ಸ್ಪೀಕರ್ ಖಾದರ್ ಮನವಿ:
ದ.ಕ. ಬೊಕ್ಕ ಒಡಿಪು ಜಿಲ್ಲೆಡ್ ಚೌತಿ ನ್ ಸೆ.19 ದಾನಿ ಆಚರಣೆ ಮಲ್ಪುನ ಹಿನ್ನಲೆಡ್ ಸಾರ್ವತ್ರಿಕ ರಜೆನ್ ಸೆ.19 ದಾನಿ ಕೊರ್ಪುನಂಚ ಸ್ಪೀಕರ್ ಖಾದರ್ ಡ ಮನವಿ ಮಲ್ತಿನ ಹಿನ್ನಲೆ ಡ್ ಕೂಡ್ಲೆ ಸ್ಪಂದಿಸಾಯಿನ್ ಆರ್ ಸಿಎಂ ಸಿದ್ದರಾಮಯ್ಯಡ ಪಾತೆರ್ವೆ ಪಂದ್ ಪಂತೆರ್. ಸೆ.19 ದಾನಿ ರಜೆ ಕೊರ್ಪುನ ಭರವಸೆನ್ ಕೊರ್ತೆರ್ ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್ ತೆರಿಪಾದೆರ್.

ಒಡಿಪು ಜಿಲ್ಲೆ ಡ್ ರಜೆ ಬದಲಾವಣೆದ ಬಗೆಟ್ ನಿರ್ಧಾರ ನನಲ ಆತಿಜಿ.

ನಿಪಾ ವೈರಸ್‌: ಕೇರಳದ 7 ಗ್ರಾಮಲು ಕಂಟೈನ್‌ಮೆಂಟ್ ವಲಯ, ಶಾಲೆಗ್ ರಜೆ

ಕೇರಳ : ನಿಪಾ ವೈರಸ್‌ ರ್ದ್ ರಡ್ಡ್ ಜನ ತೀರ್ ಪೋಯಿನ ಘಟನೆ ದಾತ್ರ ಕೇರಳದ ಕೋಝಿಕೋಡ್‌ ಡ್ ಏಳ್ ಗ್ರಾಮ ಪಂಚಾಯಿತಿಲೆನ್ ಕಂಟೈನ್‌ಮೆಂಟ್ ವಲಯ ಆದ್ ಘೋಷಣೆ ಮಲ್ತ್ ದ್, ಶಾಲೆಗ್ ರಜೆ ಕೊರ್ತೆರ್.

ಅತಂಚೇರಿ, ಮಾರುತೊಂಕರ, ತಿರುವಳ್ಳೂರು, ಕುಟ್ಟಿಯಾಡಿ, ಕಾಯಕ್ಕೋಡಿ, ವಿಲ್ಲ್ಯಪಲ್ಲಿ ಬೊಕ್ಕ ಕವಿಲುಂಪಾರ ಪಂಚಾಯಿತಿಲೆನ್ ಕಂಟೈನ್‌ಮೆಂಟ್ ವಲಯ ಆದ್ ಘೋಷಣೆ ಮಲ್ತ್ ದೆರ್ ಪಂದ್ ತೆರಿದ್ ಬೈದುಂಡು.