ಕಾಸ್ರೋಡ್ ಸುದ್ದಿ | Kasargod News

ವಿಟ್ಲ: ವೀರಕಂಭ ಗ್ರಾಮದ 206ನೇ ಬಿಜೆಪಿ ಬೂತ್ ಸಮಿತಿದ ರಚನೆ

Sep 7, 2021

ವಿಟ್ಲ : ವೀರಕಂಭ ಗ್ರಾಮದ 206ನೇ ಬಿಜೆಪಿ ಬೂತ್ ಸಮಿತಿ ರಚನೆ ಆತುಂಡು . ಬಂಟ್ವಾಳ ಬಿಜೆಪಿ ಮಂಡಲದ ಗುರ್ಕಾರ್ಲಾದ್ ದೇವಪ್ಪ ಪೂಜಾರಿ ಗುರಕಾರ್ಮೆಡ್ ಮಂಗಳಪದವು ಅಯ್ಯಪ್ಪ ಮಂದಿರಡ್ ನಡತುಂಡು .

ಬೂತ್ ಸಮಿತಿ ಗುರ್ಕಾರ್ಲಾದ್ ಧನಂಜಯ ಗೌಡ ಪಾದೆ ಅಯ್ಕೆಯಾಯೆರ್ , ಪ್ರಧಾನ ಕಾರ್ಯಂತೆರಾದ್ ನಿತಿನ್ ಸಾಲ್ಯಾನ್ ಮಡಿವಾಳಕೋಡಿ, ಒತ್ತು ಗುರ್ಕಾರ್ಲಾದ್ ರೋಹಿತ್ವಾಶ ಬಂಗ, ಯಾದವ ಬಂಗೇರ, ಮೋಹನ್ ಶೆಟ್ಟಿ, ಕಾರ್ಯಂತೆರಾದ್ ಸಂಜೀವ, ಸಮಿತಿದ ಸದಸ್ಯೆರಾದ್ ತಾರಾನಾಥ ಗೌಡ, ಸುಭಾಷ್ ರೈ, ಶ್ರೀಧರ ಗೌಡ, ಪ್ರವೀಣ್ ಶೆಟ್ಟಿ,ಬಾಲಚಂದ್ರ, ದಿನೇಶ್ ಗೌಡ ,ನಾಗಪ್ಪ ನಾಯ್ಕಅನಿಲ್ ಪೂಜಾರಿ, ನರಸಿಂಹ ಮೂರ್ತಿ, ಬಾಲಕೃಷ್ಣ, ಸುಮಿತಾ, ಗುರುಪ್ರಸಾದ್ ಅಚಾರ್ಯ, ರಂಜೀತ್ ಶೆಟ್ಟಿ ಅಆಯ್ಕೆ ಆಯೆರ್ .

ಕುಡ್ಲಡ್ ಅಂತರರಾಷ್ಟ್ರೀಯ ಜೀವವೈವಿಧ್ಯ ದಿನಾಚರಣೆ ಅಭಿಯಾನ

Sep 7, 2021

ಕುಡ್ಲ : ಪ್ರಸಕ್ತ ಸಾಲ್ ದ ಪ್ರತೀ ಗ್ರಾಮ ಪಂಚಾಯತ್ ವ್ಯಾಪ್ತಿಡ್ ಕನಿಷ್ಠ 500 ದೈ ನರ್ದ್ ಐಕ್ಲೆನ ಪೋಷಣೆ ಮಲ್ಪುನ ಚಟುವಟಿಕೆನ್ ಅಟ್ಟನೆ ಮಲ್ದೆರ್ ಐತ ಪ್ರಕಾರ , ಇತ್ತೆ 65 ಸಾರ ದೈ ನಡ್ತೆರ್ ಪಂದ್ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ. ಕುಮಾರ್ ಪಂಡೆರ್ .

ಮೇರ್ ಪೇಂಟೆದ ಜಿಲ್ಲಾ ಪಂಚಾಯತ್ ನೇತ್ರಾವತಿ ಸಭಾಂಗಣಡ್ ಜಿಲ್ಲಾ ಪಂಚಾಯತ್ ಬೊಕ್ಕ ಸಾಮಾಜಿಕ ಅರಣ್ಯ ವಿಭಾಗದ ಒಟ್ಟು ಸೇರಿಗೆಡ್ ನಡತಿನ ಅಂತರಾಷ್ಟ್ರೀಯ ಜೀವವೈವಿಧ್ಯ ದಿನಾಚರಣೆ ಅಭಿಯಾನ-2021 ಉದಿಪನ ಮಲ್ತ್ ಪಾತೆರಿಯೆರ್ .

ಸಾಮಾಜಿಕ ಅರಣ್ಯ ವಿಭಾಗದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಡಾ. ಪ್ರಶಾಂತ್ ಗುರ್ಕಾರ್ಮೆ ವಹಿಸ್ ದಿತ್ತೆರ್ . ಕುಡ್ಲ ಪ್ರಾದೇಶಿಕ ಉಪವಿಭಾಗದ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಪ್ರಕಾಶ್ ಎಸ್ ನಟಾಲ್ಕರ್, ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಸುಬ್ರಹ್ಮಣ್ಯ ರಾವ್ ಸಭೆಟ್ ಪಾಲ್ ಪಡೆದಿತ್ತೆರ್ .
ಬಿನ್ನೆರ್ ಆದ್ ಪಿಲಿಕುಳ ನಿಸರ್ಗಧಾಮದ ಸಸ್ಯಶಾಸ್ತ್ರಜ್ಞ ಡಾ. ಸೂರ್ಯಪ್ರಕಾಶ್ ಶೆಣೈ, ನಿವೃತ್ತ ಸಸ್ಯಶಾಸ್ತ್ರ ಪ್ರಾಧ್ಯಾಪಕೆರ್ ಅಂಚನೇ ಸಂಶೋಧಕ ಡಾ. ದೇವಿಪ್ರಸಾದ್, ಉಳ್ಳಾಲದ ಕೃಷಿ ಬೊಕ್ಕ ತೋಟಗಾರಿಕಾ ಸಂಶೋಧನಾ ಕೇಂದ್ರದ ಸಹ ಪ್ರಾಧ್ಯಾಪಕ ಬೊಕ್ಕ ಮುಖ್ಯಸ್ಥ ರವಿರಾಜ ಶೆಟ್ಟಿ ಜಿ. ಮೆರ್ನ ಸಾಧನೆನ್ ನೆಂಪು ಮಲ್ತ್ ಮಾನದಿಗೆ ಮಲ್ತೆರ್.

ಜಿ.ಪಂ. ತಾ.ಪಂ. ಓಟುಗು ತಯಾರ್ ಆಲೆ : ಸಚಿವವಿ.ಸುನೀಲ್ ಕುಮಾರ್

Sep 7, 2021

ಒಡಿಪು :ಸದ್ಯಡೆ ಬರರೇ ಉಪ್ಪುನ ಜಿಲ್ಲಾ ಪಂಚಾಯತ್ . ಬೊಕ್ಕ ತಾಲೂಕು ಪಂಚಾಯತ್ ಓಟುದ ನೆಲೆಟ್ಟ್ ಚುನ ಪ್ರತೀ ಮಹಾಶಕ್ತಿ ಕೇಂದ್ರದ ಬೂತ್ ಗುರ್ಕಾರ್ಲು , ಪ್ರಧಾನ ಕಾರ್ಯದರ್ಶಿ ಬೊಕ್ಕ ಗ್ರಾಮಪಂಚಾಯತ್ ದ ಸದಸ್ಯೆರ್ ಸಮಾವೇಶ ನಡಪಾವುನ ಮುಖೇನ ಪಕ್ಷ ಸಂಘಟನೆಗ್ ಒತ್ತು ಕೊರ್ಪಿನ ನೆಲೆಟ್ಟ್ ಸಮರ್ಪಕವಾದ್ ಎದುರಿಸಾಯೆರೆ ತಯಾರ್ ಆದ್ ಉಪ್ಪುಲೆ ಪಂದ್ರ್ನಾಟಕ ಸರಕಾರ ಇಂಧನ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಸಚಿವ ವಿ. ಸುನಿಲ್ ಕುಮಾರ್ ಪಂಡೆರ್ .

ಮೇರ್ ಬಿಜೆಪಿ ಜಿಲ್ಲಾಧ್ಯಕ್ಷ ಕುಯಿಲಾಡಿ ಸುರೇಶ್ ನಾಯಕ್ ಗುರ್ಕಾರ್ಮೆಡ್ ಮಾಜಿ ಜಿಲ್ಲಾ ಪಂಚಾಯತ್ ದ ಸದಸ್ಯೆರ್ ಬೊಕ್ಕ ಬಿಜೆಪಿ ಮಹಾಶಕ್ತಿ ಕೇಂದ್ರದ ಗುರ್ಕಾರ್ಲೆನ ಉಪಸ್ಥಿತಿಟ್ ಬಿಜೆಪಿ ಜಿಲ್ಲಾ ಕಛೇರಿಡ್ ನಡತಿನಜಿ.ಪಂ., ತಾ.ಪಂ. ಚುನಾವಣಾ ಪೂರ್ವಭಾವಿ ಸಭೆನ್ ಉದ್ದೇಶಿಸಾದ್ ಪಾತೆರಿಯೆರ್ .

ಒಡಿಪು ಗ್ರಾಮಾಂತರ ಬಿಜೆಪಿ ಅಲ್ಪಸಂಖ್ಯಾತ ಮೋರ್ಚಾವತಿರ್ದ್ ಬೃಹತ್ ನೆತ್ತೆರ್ದಾನ ಶಿಬಿರ

Sep 7, 2021

ಒಡಿಪು : ಭಾರತೀಯ ಜನತಾ ಪಾರ್ಟಿ ಒಡಿಪು ಗ್ರಾಮಾಂತರ ಅಲ್ಪಸಂಖ್ಯಾತಮೋರ್ಚಾ ಗುರ್ಕಾರ್ಲಾಯಿನ ಸುನೀತಾ ಡಿ.ಸೋಜಾ ಮೆರ್ನ ಮುತಾಲಿಕೆಡ್ ಅಲ್ಪಸಂಖ್ಯಾತ ಮೋರ್ಚಾ ವತಿರ್ದ್ ತಾರೀಖ್ 29.8.2021 ಗ್ ಉನ್ನತಿ ಸಭಾಭವನಡ್ “ಸ್ವಯಂಪ್ರೇರಿತ ಬೃಹತ್ ನೆತ್ತೆರ್ದಾನ ಶಿಬಿರ ನಡತುಂಡು . ಶಿಬಿರನ್ ಬಿಜೆಪಿ ಜಿಲ್ಲಾ ಗುರ್ಕಾರ್ಲಾಯಿನ ಕುಯಿಲಾ ಡಿ.ಸುರೇಶ್ ನಾಯಕ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಒಡಿಪು ಗ್ರಾಮಾಂತರ ಬಿಜೆಪಿ ಗುರ್ಕಾರ್ಲಾಯಿನ ವೀಣಾವಿ. ನಾಯ್ಕ್, ಪ್ರಧಾನ ಕಾರ್ಯದರ್ಶಿ ಗಣೇಶ್ ಕುಲಾಲ್, ರಾಜ್ಯ ಕಾರ್ಯದರ್ಶಿ ಸಲೀಂಅಂಬಾಗಿಲು, ಉಡುಪಿ ಜಿಲ್ಲಾ ಅಲ್ಪಸಂಖ್ಯಾತ ಮೋರ್ಚಾ ಜಿಲ್ಲಾ ಗುರ್ಕಾರ್ಲಾಯಿನ ದಾವೂದ್ ಅಬೂಬಕ್ಕರ್, ಪ್ರಧಾನ ಕಾರ್ಯಂತೆರಾಯಿನ ಶೇಖ್ ಆಶೀಫ್, ಅಲ್ವಿನ್ಡಿಸೋಜ, ಪ್ರಭಾರಿ ಗಿಲ್ಬರ್ಟ್, ರಾಜಶ್ರೀ ಮಸ್ಕರೇನಸ್, ರೆಡ್ಕ್ರಾ ಸ್ಸಂಸ್ಥೆದ ಜಯಕರ್ ಶೆಟ್ಟಿ , ಪಕ್ಷದ ಪ್ರಮುಖೆರ್ , ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್ .

ತುಳು ಬಾಸೆಗಾದ್ 80 ಸಾರ ಟ್ವೀಟ್

Sep 7, 2021

ಕುಡ್ಲ : ತುಳು ಬಾಸೆನ್ ಕರ್ನಾಟಕ ಸರ್ಕಾರದ ರಾಜ್ಯ ಬಾಸೆ ಪಂದ್ ಘೋಷಣೆ ಮಲ್ಪೋಡು ಪಂದ್ ಒತ್ತಾಯ ಮಲ್ಪರೆ ಬೋಡಾದ್ ಜೈ ತುಳುನಾಡ್ ಸಂಘಟನೆ ಬೇತೆ ಸಂಘಟನೆಲೆನ ಒಟ್ಟುಸೇರಿಗೆಡ್ ಐತಾರದಾನಿ ಮಲ್ತಿನ ಟ್ವಿಟ್ ಅಭಿಯಾನೊಡು 80 ಸಾರೊರ್ದುಲ ಎಚ್ಚ ತುಳುವೆರ್, ತುಳು ಅಭಿಮಾನಿಲು ಪಾಲ್ ಪಡೆದೆರ್.

ಸೆ.13 ಸೋಮಾರೊರ್ದು ಸುರುವಾಪಿನ ರಾಜ್ಯ ಸರ್ಕಾರದ ವಿಧಾನಸಭೆ ಅಧಿವೇಶನೊಡು ತುಳುನಾಡ ಶಾಸಕೆರ್, ಮಂತ್ರಿಲು, ಸಂಸದೆರಾಯಿನ ಈ ವಿಚಾರ ಮಂಡನೆ ಮಲ್ತ್‌ದ್ ಮುಖ್ಯಮಂತ್ರಿಲೆಡ ತುಳು ಬಾಸೆಗ್ ಮಾನಾದಿಗೆ ಕೊರ್ಪಾವುನ ವಿಚಾರೊಡು ಕುಡೊರ ಟ್ವಿಟ್ ಅಭಿಯಾನ ಮಲ್ಪುವೆರ್ ಪಂದ್ ಜೈ ತುಳುನಾಡ್ ಸಂಘಟನೆದ ಪ್ರಧಾನ ಕಾರ್ಯಂತೆರ್ ಸದಾಶಿವ ಮುದ್ರಾಡಿ ತೆರಿಪಾದೆರ್.

ಉಂದೆತ್ತ ದುಂಬುದ ಯೋಜನೆಯಾಯಿನ ‘ತುಳು ಬಾಸೆನ್ ದಾಯೆ ಆಡಳಿತ ಬಾಸೆಯಾದ್ ಮಲ್ಪೊಡು ‘ ಪನ್ಪಿನ ವಿಚಾರೊಡು ಸಾಮಾಜಿಕ ಜಾಲತಾಣೋಲೆಡ್ ಅಭಿಯಾನ ಮಲ್ಪರೆ ಉಲ್ಲ. ಕಲಾವಿದೆರ್, ಸಂಘ-ಸಂಸ್ಥೆದಕುಲು, ಜನ ಸಾಮಾನ್ಯರ್, ಗಣ್ಯರೆರ್ದ್ ಹೇಳಿಕೆ ದೆತೊಂದು ವೀಡಿಯೊ ರೂಪೊಡು ಪ್ರಸಾರ ಮಲ್ಪುನ ಯೋಜನೆ ಉಂಡು ಪಂದ್ ಆರ್ ಪಂಡೆರ್.

ಈ ಸರ್ತಿದ ಅಧಿವೇಶನೊಡಾಂಡಲ ತುಳು ಬಾಸೆಗ್, ತುಳುವೆರೆಗ್ ಬಿಲೆ ತಿಕ್ಕಡ್ ಪನ್ಪಿನ ಆಸೆ ಮಾತ ತುಳುವೆರೆನ.

ನಿವೃತ್ತ ಪೆರಿಯ ಶಿಕ್ಷಕ ಎ.ರಾಘವೇಂದ್ರ ಉಪಾಧ್ಯಾಯೆರೆಗ್ ಮಾನದಿಗೆ

Sep 7, 2021

ಒಡಿಪು : ಉಡುಪಿ ಜಿಲ್ಲಾ ಯುವ ಬ್ರಾಹ್ಮಣ ಪರಿಷತ್(ರಿ) ಒಟ್ಟು ಸೇರಿಗೆಡ್ ಶಿಕ್ಷಕೆರ್ನ ದಿನಾಚರಣೆದ ಪರವಾದ್ ನಿವೃತ್ತ ಪೆರಿಯ ಶಿಕ್ಷಕ ಎ.ರಾಘವೇಂದ್ರ ಉಪಾಧ್ಯಾಯೆರೆಗ್ ಆರ್ನ ಸ್ವಗೃಹಡ್ ಮಾನದಿಗೆ ಮಲ್ತೆರ್ .

ಪರಿಷತ್ ಗುರ್ಕಾರ್ಲಾಯಿನ ವಿಷ್ಣು ಪ್ರಸಾದ್ ಪಾಡಿಗಾರ್ ಪ್ರಸ್ತಾವಿಕ ಪಾತೆರ್ದ್ ಎದುಕೊಂಡೆರ್ ಐರ್ದ್ ಬೊಕ್ಕ ಪೆರಿಯ ಸದಸ್ಯೆರೆನ್ ಸೇರಾವೊಂದು ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಪ್ರವೀಣ್ ಉಪಾಧ್ಯ,ಚಂದ್ರಕಾಂತ್ ಕೆ ಎನ್, ಮಂಜುನಾಥ್ ರಾವ್,ರಘುಪತಿ ರಾವ್,ಪ್ರಕಾಶ್ ಹೆಬ್ಬಾರ್,ಮುರಳಿ ಅಡಿಗ,ರಂಗನಾಥ್ ಸರಳಾಯ,ರಮೇಶ್ ತೀರ್ಥಹಳ್ಳಿ, ರವಿರಾಜ್, ರವಿ ಬಲ್ಲಾಳ್, ದಿವ್ಯ ವಿ ಪ್ರಸಾದ್, ರಾಧಿಕಾ ಚಂದ್ರಕಾಂತ್, ರಾಜೇಶ್ವರಿ ಪ್ರವೀಣ್, ಆಶಾ ಹೆಬ್ಬಾರ್, ಪಾಲ್ ಪಡೆದಿತ್ತೆರ್.

ಕುಡ್ಲ – ಕೇರಳ ಗಡುಟ್ ಸೆ. 13 ತಾರೀಕ್ ಮುಟ್ಟ ಬಾರ್ ಬಂದ್

Sep 7, 2021

ಕುಡ್ಲ: ಕೇರಳಡ್ದು ತುಳುನಾಡುಗ್ ಕೊರೊನಾ ಸೋಂಕುನ್ ತಡೆಗಟ್ಟುನ ಹಿನ್ನಲೆಡ್ ಕೇರಳ ಗಡಿಟ್ ಪೊಂದಾದು ಇಪ್ಪುನ ತುಳುನಾಡುದ ಗಡಿ ಪ್ರದೇಶದ 5.ಕಿ.ಮೀ ವ್ಯಾಪ್ತಿಡ್ ಇಪ್ಪುನ 19 ಗ್ರಾಮದ ಬಾರು ನ್ ಮುಚ್ಚೋಡ್ ಪನ್ಪಿನ ಅದೇಶನ್ ಸೆ. 13 ಮುಟ್ಟ ವಿಸ್ತರಿಸಾವೊಡ್ ಪಂದು ಜಿಲ್ಲಾಧಿಕಾರಿ ಆದೇಶನ್ ಮಲ್ತುದೆರ್.

ಈ ಗಡಿ ಗ್ರಾಮದ ಬಾರ್ ಲೆನ್ ಸೆ. 6 ಮುಟ್ಟ ಮುಚ್ಚೋಡ್ ಪಂದು ನೆಡ್ದು ದುಂಬು ಪಂದಿತ್ತೆರ್. ಅಂಡ ಇತ್ತೆ ಅವೆನ್ ನನ ಒಂಜಿ ವಾರಗ್ ಪಂಡ ಸೆ. 13 ಮುಟ್ಟ ವಿಸ್ತರಿಸಾದೆರ್.

180 ವರ್ಷದ ಪರಪೋಕು ಉಪ್ಪುನ ತುಳುನಾಡ್ದ ಸುರುತ ಶಾಲೆ : ‘ಮಿಶನ್ ಶಾಲೆ’

Sep 7, 2021

ಕುಡ್ಲ : ಶೈಕ್ಷಣಿಕ ಕ್ರಾಂತಿಗ್ ಪುದರ್ ಮಲ್ತ್ದ್ ತುಳುನಾಡ್ ಡ್ 1836 ನೇ ಇಸವಿಡ್ ಆಧುನಿಕ ಶಿಕ್ಷಣದ ಸುರುತ ಸಾರ್ವಜನಿಕ ಶಾಲೆ ಸುರು ಆಯಿನಿ , ಪೇಂಟೆದ ರಥಬೀದಿಡ್ ಉಪ್ಪುನ ಮಿಶನ್ ಶಾಲೆ’ (ಬಿ.ಇ.ಎಂ.ಅನುದಾನಿತ) ಈ ಪುಗಾರ್ತೆ ಪಡೆತುಂಡು.

ಆನಿ ಕಾಲೋದ ತುಳುನಾಡ್ ಡ್ ಸುರು ಆಯಿನ ಸುರುತ ಶಾಲೆ ಉಂದಾತುಂಡು.

1834ಟ್ಟ್ ಭಾರತೊಗು ಬತ್ತಿನ ಬಾಸೆಲ್ ಮಿಶನರಿ 1836ಟ್ಟ್ ಈ ಕನ್ನಡ ಮಾಧ್ಯಮ ಪ್ರಾಥಮಿಕ ಶಾಲೆನ್ ಸುರು ಮಲ್ತೆರ್ . ಸಾಮ್ಯುವೆಲ್ ಹೆಬಿಕ್ ನೇತೃತ್ವ ವಹಿಸೊಂದು ಸುರು ಮಲ್ತೆರ್ . ಸುರುಕಾದ್ ನೆಲ್ಲಿಕಾಯಿ ಮಾರ್ಗದ ನಿರೇಶ್ವಾಲ್ಯಡ್ ಸುರು ಮಲ್ತ್ , ಐರ್ದ್ ಬೊಕ್ಕ ರಥಬೀದಿಗ್ ಸ್ಥಳಾಂತರ ಮಲ್ತೆರ್ . 1838ಟ್ಟ್ ಇಂಗ್ಲಿಷ್ ಮಾಧ್ಯಮಲಾ ಸುರು ಮಲ್ತೆರ್ . ಕನ್ನಡ ಪತ್ರಿಕೋದ್ಯಮದ ಪಿತಾಮಹ ಹರ್ಮನ್ ಹೋಗ್ಲಿಂಗ್ ನೆತ್ತ ಮುತಾಲಿಕೆ ವಹಿಸ್ದಿತ್ತೆರ್ ಪಂದ್ ಲೇಖಕ ಬೆನೆಟ್ ಜಿ. ಅಮ್ಮನ್ ‘ತುಳುನಾಡ್ ಡ್ ಬಾಸೆಲ್ ಮಿಶನ್ ಬೊಕ್ಕ ಲೇಖನಲು …’ಪನ್ಪಿನ ಕೃತಿಟ್ ಉಲ್ಲೇಖ ಮಲ್ದೆರ್ .

ಈ ಶಾಲೆನ್ ಜರ್ಮನ್ ಮಿಶನ್ ಶಾಲೆ, ಅಂಗೋ ವರ್ನಾಕ್ಯುಲರ್ ಶಾಲೆ, ಇಂಗ್ಲಿಷ್ ಶಾಲೆ, ಮಿಶನ್ ಶಾಲೆ, ಬಿ.ಇ.ಎಂ. ಶಾಲೆ ಪನ್ಪಿನ ಪುದರ್ ಡ್ ಲೆತ್ತೊಂದು ಇತ್ತೆರ್ . 1889ಟ್ಟ್ ಹೈಸ್ಕೂಲ್ ಸುರು ಆಂಡ್ . 1890ಟ್ಟ್ ಸುರುತ ಮೆಟ್ರಿಕ್ಯುಲೇಷನ್ ಕೂಟ ತಯಾರ್ ಆಂಡ್ . 1991ಟ್ಟ್ ನರ್ಸರಿ ಬೊಕ್ಕ 1992ಟ್ಟ್ ಪದವಿಪೂರ್ವ ಕಾಲೇಜು ಸುರು ಮಲ್ತೆರ್.

1841ಟ್ಟ್ ಈ ಶಾಲೆಡ್ 80 ಜೋಕುಲು ಇತ್ತೆರ್.ಶಿಕ್ಷಣ ವಂಚಿತೆರಾಯಿನ ಪೊಣ್ಣು ಜೋಕುಲು ಅಂಚನೇ ತಳ ಅಮ್ಮನ್ನ ಸಮುದಾಯಗ್ ಅವಕಾಶ ಕೊರ್ದಿತ್ತೆರ್ . ಪಾಠದ ಒಟ್ಟುಗು ಪೊಲ್ಲಿಯೆರೆ , ಬೈಂಡಿಂಗ್, ಕರಕುಶಲ ವಸ್ತು ತಯಾರ್ ಮಲ್ಪರೆ ತರಬೇತಿನ್ ಕೊರೊಂದು ಇತ್ತೆರ್.

‘ಹರ್ಮನ್ ಮೋಗ್ಲಿಂಗ್, ಜಿ.ಎಚ್. ವೈಗ್ಡೆ, ಫರ್ಡಿನಾಂಡ್ ಕಿಟೆಲ್, ಜೀಗ್ಲರ್ ನನಾತ್ ಜನ ಮುಲ್ಪ ಭೋಧನೆ ಮಲ್ದೆರ್ . ಕವಿ ಕಯ್ಯಾರ ಕಿಞ್ಚಿಣ್ಣ ರೈ, ರತ್ನವರ್ಮ ಹೆಗ್ಗಡೆ, ಜಸ್ಟೀಸ್ ಕೆ.ಎಸ್.ಹೆಗ್ಡೆ, ಮೂಲ್ಕಿ ಸುಂದರರಾಮ್ ಶೆಟ್ಟಿ ಸೇರಿನಂಚ ಜಿಲ್ಲೆದ ಪ್ರಮುಖೆರ್ ಮುಲ್ಪದ ಜೋಕುಲು ’ ಪಂದ್ ಶಾಲೆದ ಮುಖ್ಯಸ್ತೆರ್ ತೆರಿಪಾದೆರ್.

‘ಸ್ವಾತಂತ್ರ್ಯರ್ದ್ ಬೊಕ್ಕ ಶಾಲೆ ದಕ್ಷಿಣ ಕನ್ನಡ ಎಜುಕೇಷನಲ್ ಅಂಡ್ ಕಲ್ಟರಲ್ ಸೊಸೈಟಿ ಆಡಳಿತದ ಮುತಾಲಿಕೆಡ್ ಉಂಡು . ಇತ್ತೆ ಎಲ್‌ಕೆಜಿರ್ದ್ ದ್ವಿತೀಯ ಪಿಯು ಮುಟ ಉಂಡು . ಕಮ್ಮಿ ಪಣವೂ – ಗುಣಮಟ್ಟದ ಶಿಕ್ಷಣ ಶಾಲೆದ ಆದ್ಯತೆಯಾದ್ ಉಂಡು . 200ರ್ದ್ ಜಾಸ್ತಿ ಜೋಕ್ಲೆಗ್ ಉಚಿತ ಶಿಕ್ಷಣ ಕೊರೊಂದು ಉಲ್ಲೆರ್ .

ಇತ್ತೆ ಈ ಶಾಲೆ ಪರ ಜೋಕುಲು ಅಂಚನೇ ದಾನಿಲೆನ ಕೊಡುಗೆರ್ದ್ ನಡತೊಂದು ಉಂಡು . ಪಾರಂಪರಿಕ ಕಟ್ಟಡ ಒರಿಪಾವೊಂದು ಸ್ಮಾರ್ಟ್ ಕ್ಲಾಸ್ ಸುರು ಮಲ್ದ ಪಂದ್ ಆಡಳಿತ ಮಂಡಳಿ ಕಾರ್ಯದರ್ಶಿ ಸಂಚಾಲಕ ರೋಹನ್ ಎಂ. ಶಿರಿ ಪಂಡೆರ್ . .

ಕೇರಳಡ್ ನಿಫಾ ಸೋಂಕು ಜಾಸ್ತಿ ; ತುಳುನಾಡುಗ್ ಹೈ ಅಲರ್ಟ್

Sep 7, 2021

ಕುಡ್ಲ : ಕೇರಳಡ್ ನಿಫಾ ಸೋಂಕು ಜಾಸ್ತಿ ಆತುಂಡು. ಈ ಹಿನ್ನೆಲೆಡ್ ಕೇರಳದ ಗಡಿಭಾಗಡ್ ಇಪ್ಪುನ ತುಳುನಾಡುಗ್ ಹೈ ಅಲರ್ಟ್ ಘೋಷಿಸಾದೆರ್.

ಕೇರಳದ ಕೊಯಿಕ್ಕೋಡ್‌ಡ್ 12 ವರ್ಷದ ಪೊನ್ನು ನಿಫಾ ಈ ಸೋಂಕುಡ್ದು ತೀರ್ ಪೊಯಿನ ಪ್ರಕರಣ ಬೊಲ್ಪುಗು ಬೈದಿನ ಹಿನ್ನಲೆಡ್ ತುಳುನಾಡುಗ್ ಅಲರ್ಟ್ ನ್ ಘೋಷಿಸಾದೆರ್. ಜಿಲ್ಲೆಡ್ ಜಾಗ್ರತೆಡ್ ಇಪ್ಪುಲೆಕ್ಕ ದ.ಕ. ಜಿಲ್ಲಾಧಿಕಾರಿ ಡಾ.ಕೆ.ವಿ. ರಾಜೇಂದ್ರ ಜನಕುಲ್ಡ ಮನವಿ ಮಲ್ತುದೆರ್.