ಕುಡ್ಲ : ಒಡಿಪುಡು 1928 ಸೆಪ್ಟೆಂಬರ್ 23ಕ್ಕ್ ಸ್ಥಾಪನೆಯಾದ್, 2028ನೇ ಇಸ್ವಿಡ್ 100 ವರ್ಷದ ಸಂಬ್ರಮೊ ಆಚರಿಪುನ “ತುಳುವ ಮಹಾಸಭೆ” ಪನ್ಪಿನ ಐತಿಹಾಸಿಕ ಸಂಘಟನೆದ ಜಾಗತಿಕ ಕೂಟ ತುಳುವ ಮಹಾಸಭೆ ಇಂಟರ್ ನ್ಯಾಷನಲ್ದ ಅಂತರರಾಷ್ಟ್ರೀಯ ಗುರ್ಕಾರ್ಲಾದ್ ಯುನೈಟೆಡ್ ಅರಬ್ ಎಮಿರೇಟ್ಸ್ದ ಹಿರಿಯ ಸಮಾಜಸೇವಕೆರ್, ಉದ್ಯಮಿ ಬೊಕ್ಕ ಅನಿವಾಸಿ ತುಳುವ ಸಮುದಾಯದ ಪ್ರಮುಖ ಸಂಘಟಕೆ ಸರ್ವೋತ್ತಮ ಶೆಟ್ಟಿ ಆಯ್ಕೆ ಆತೆರ್.
ಒಡಿಪು ಜಿಲ್ಲೆ ಪಾರೀಕ ಗ್ರಾಮದಾರಾಯಿನ ಸರ್ವೋತ್ತಮ ಶೆಟ್ಟಿ ಮೇರ್ ಕರಿನ 48 ವರ್ಷರ್ದಿಂಚಿ ಯುನೈಟೆಡ್ ಅರಬ್ ಎಮಿರೇಟ್ಸ್ಡ್ ಕನ್ನಡ ಬೊಕ್ಕ ತುಳು ಭಾಷೆ, ಕಲೆ ಅಂಚೆನೆ ಸಂಸ್ಕೃತಿದ ಬುಳೆಚ್ಚಿಲ್ಗ್ ಮಲ್ಲ ಕೊಡುಗೆ ಕೊರ್ತೆರ್. ಅಬುಧಾಬಿ ಕರ್ನಾಟಕ ಸಂಘ, ಯುಎಇ ಬಂಟ್ಸ್, ಯುಎಇ ತುಳು ಕೂಟ ಸೇರ್ದ್ ಒಂಜಾತ್ ಸಂಘಟನೆಲೆನ ಸ್ಥಾಪನೆ ಬೊಕ್ಕ ಬುಳೆಚ್ಚಿಲ್ಡ್ ಮಲ್ಲ ಪಾತ್ರ ವಹಿಸ್ದಿನ ಮೇರ್, ಅನಿವಾಸಿ ತುಳುವೆರೆನ್ ಜಾಗತಿಕ ಮಟ್ಟಡ್ ಒಟ್ಟು ಮಲ್ಪುನ ಬೇಲೆಡ್ ಸಕ್ರಿಯವಾದುಲ್ಲೆರ್.
2016ಟ್ಟ್ ಕಾಸ್ರೋಡು ಜಿಲ್ಲೆ ಬದಿಯಡ್ಕಡ್ 5 ದಿನ ನಡತಿನ ಐತಿಹಾಸಿಕ “ವಿಶ್ವ ತುಳುವೆರೆ ಆಯನೊ”ದ ಅಧ್ಯಕ್ಷೆರಾದ್ ಯಶಸ್ವಿ ನಾಯಕತ್ವ ವಹಿಸ್ದಿತ್ತೆರ್. 2018 ಟ್ಟ್ ದುಬೈಡ್ ನಡತಿನ ವಿಶ್ವ ತುಳು ಸಮ್ಮೇಳನದ ಅಧ್ಯಕ್ಷೆರಾದ್ಲ ಸೇವೆ ಮಲ್ದೆರ್.
ಸರ್ವೋತ್ತಮ ಶೆಟ್ಟಿ ಮೇರ್ ತುಳುವರ್ಲ್ಡ್ ಫೌಂಡೇಶನ್ದ ನಿಕಟ ಪೂರ್ವ ಅಧ್ಯಕ್ಷೆರಾದ್ಲ ಸೇವೆ ಮಲ್ದೆರ್. 1998ನೇ ಕರ್ನಾಟಕ ಸರಕಾರ ರಾಜ್ಯೋತ್ಸವ ಪ್ರಶಸ್ತಿ (ಹೊರನಾಡ ಕನ್ನಡಿಗ) ಕೊರ್ದು ಗೌರವ ಮಲ್ದ್ಂಡ್.