ಕಾಸ್ರೋಡ್ ಸುದ್ದಿ | Kasargod News

ಶ್ರೀ ಕ್ಷೇತ್ರ ಗೆಜ್ಜೆ ಗಿರಿಟ್ ಮರ್ದ್ದ ದೈತ ನಾಟಿ ಅಭಿಯಾನಗ್ ಚಾಲನೆ

ಕುಡ್ಲ : ಗುರುಬೆಳದಿಂಗಳು ಕುದ್ರೋಳಿ ವತಿರ್ದ್ ಬ್ರಹ್ಮಶ್ರೀ ನಾರಾಯಣಗುರುಕ್ಲೆನ 167ನೇ ಪುಟ್ಟು ಪರ್ಬದ ಪರವಾದ್ ಮಹಾಮಾತೆ ದೇಯಿ ಬೈದೆತಿನ ಸಂಕಲ್ಪದಲಕ ಗುರುಕ್ಲೆನ ಒಂಜೇ ಜಾತಿ, ಒಂಜೇ ಮತ, ಒಂಜೇ ದೇವೆರ್ ಪನ್ಪಿನ ತತ್ವದಲಕ ಚರ್ಚ್, ದರ್ಗಾ, ಬಸದಿ, ದೈವಸ್ಥಾನ, ದೇವಸ್ಥಾನ, ಗುರುದ್ವಾರ, ಗರೋಡಿಡ್ ಮಾಜೊಂದು ಉಪ್ಪುನ ಮರ್ದ್ ದ ದೈಕ್ಲೆನ ನಡ್ಪಿನ ಯೋಜನೆಗ್ ಶ್ರೀ ಗೆಜ್ಜೆಗಿರಿ ನಂದನಬಿಲ್ ಕ್ಷೇತ್ರಡ್ ಶುಕ್ರವಾರ ಚಾಲನೆ ಕೊರಿಯೆರ್ .

ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ವಿಶೇಷ ಪ್ರಾರ್ಥನೆ, ಗುರುಪೂಜೆ ನಡತುಂಡು . ಗುರು ಬೆಳದಿಂಗಳು ಸಂಸ್ಥೆ ಗುರ್ಕಾರ್ಲಾಯಿನ ಪದ್ಮರಾಜ್ ಆರ್., ಕುದ್ರೋಳಿ ಅಭಿವೃದ್ಧಿ ಸಮಿತಿ ಗುರ್ಕಾರ್ಲಾಯಿನ ದೇವೇಂದ್ರ ಪೂಜಾರಿ, ಉದ್ಯಮಿ ಶೈಲೇಂದ್ರ ಸುವರ್ಣ, ಅನುಷ್ಕಾ ಬಿಲ್ಡರ್ಸ್‌ನ ಕಿಶೋರ್ ದಂಡೆಕೇರಿ, ಗುರು ಚಾರಿಟೆಬಲ್ ಟ್ರಸ್ಟ್ ಗುರ್ಕಾರ್ಲಾಯಿನ ಎಂ.ಜಯಾನಂದ, ಯುವಾಹಿನಿ ಕೇಂದ್ರ ಸಮಿತಿ ಮಾಜಿ ಗುರ್ಕಾರ್ಲಾಯಿನ ಜಯರಾಮ ಕಾರಂದೂರು, ಅಶೋಕ್ ಕುಮಾರ್, ಡೆಕೊರೇಟರ್ ರೋಹಿದಾಸ್, ಪರಿಸರ ಪ್ರೇಮಿ ಮಾಧವ ಉಳ್ಳಾಲ್, ನಮ್ಮ ಕುಡ್ಲ ಚಾನೆಲ್ ನಿರ್ದೇಶಕ ಲೀಲಾಕ್ಷ ಕರ್ಕೇರ, ಉರ್ವ ಬಿಲ್ಲವ ಸಂಘದ ಮಾಜಿ ಗುರ್ಕಾರ್ಲಾಯಿನ ಬಿ.ಪಿ ಹರೀಶ್, ಕುದ್ರೋಳಿ ದೇವಳದ ಮ್ಯಾನೇಜರ್ ವಿನೀತ್ ಕುಮಾರ್, ರಾಮಚಂದ್ರ, ಶೋಭಾ ಪಾಲ್ ಪಡೆದಿತ್ತೆರ್.

ಸೇವೆನೇ ಸಂಘಟನೆ ತತ್ವದಡಿ ಜಿಲ್ಲಾ ಆರೋಗ್ಯ ಸ್ವಯಂ ಸೇವಕೆರ್ನ ಪಾತ್ರ ಮಹತ್ವಪೂರ್ಣ: ಸಚಿವ ಕೋಟ

ಒಡಿಪು : ಬಾರಿ ಕಷ್ಟದ ಪರಿಸ್ಥಿತಿದ ನಡುಟು ಇನಿ ದೇಶ ಕೊರೋನಾನ್ ಎದುರಿಸಾವೊಂದು ಉಂಡು . ಈ ನೆಲೆಟ್ಟ್ ಬಿಜೆಪಿದ “ಸೇವೆಯೇ ಸಂಘಟನೆ” ತತ್ವದಡಿ ಜಿಲ್ಲಾ ಆರೋಗ್ಯ ಸ್ವಯಂ ಸೇವಕೆರ್ನ ಪಾತ್ರ ಮಹತ್ವಪೂರ್ಣ ಪಂದ್ ಕರ್ನಾಟಕ ಸರಕಾರದ ಸಮಾಜ ಕಲ್ಯಾಣ ಬೊಕ್ಕ ಹಿಂದುಳಿದ ವರ್ಗದ ಖಾತೆ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಪಂಡೆರ್ .

ಒಡಿಪು ಜಿಲ್ಲಾ ಬಿಜೆಪಿ ವತಿರ್ದ್ ಬಿಜೆಪಿ ಜಿಲ್ಲಾ ಕಚೇರಿಡ್ ನಡತಿನ ಜಿಲ್ಲಾ ಆರೋಗ್ಯ ಸ್ವಯಂ ಸೇವಕೆರ್ನ ಅಭಿಯಾನದ ಮುಗಿತಳದ ಲೇಸ್ ಡ್ ಪಾತೆರಿಯೆರ್.

ಬಿಜೆಪಿ ರಾಜ್ಯ ವೈದ್ಯಕೀಯ ಪ್ರಕೋಷ್ಠದ ಸಮಿತಿ ಸದಸ್ಯ ಡಾ. ವಿಜಯೇಂದ್ರ, ಜಿಲ್ಲಾ ವೈದ್ಯಕೀಯ ಪ್ರಕೋಷ್ಠದ ಸಂಚಾಲಕ ಡಾ. ರಾಮಚಂದ್ರ ಕಾಮತ್ ಬೊಕ್ಕ ಬಿಜೆಪಿ ಜಿಲ್ಲಾ ಆರೋಗ್ಯ ಸ್ವಯಂ ಸೇವಕೆರ್ ಪಾಲ್ ಪಡೆದಿತ್ತೆರ್ . ಜಿಲ್ಲಾ ಆರೋಗ್ಯ ಸ್ವಯಂ ಸೇವಕೆರ್ನ ಅಭಿಯಾನದ ಜಿಲ್ಲಾ ಸಂಚಾಲಕ ಶರತ್ ಶೆಟ್ಟಿ ಉಪ್ಪುಂದ ಎದುಕೊಂಡೆರ್ . ಜಿಲ್ಲಾ ಸಂಚಾಲಕಿ ಪ್ರಮೀಳಾ ಹರೀಶ್ ಲೇಸ್ ನಡಪಾದ್ ಕೊರಿಯೆರ್ , ಬೈಂದೂರು ಮಂಡಲ ಸಂಚಾಲಕ ಹರ್ಷ ಸಿದ್ಧಾಪುರ ಸೊಲ್ಮೆ ಸಂದೈತ ಮಲ್ತೆರ್ .

ಪೋಷಕೆರ್ ಶಾಲೆದೊಟ್ಟುಗು ಏಪಲಾ ಸಂಪರ್ಕಡ್ ಉಪ್ಪೊಡು – ರಶ್ಮಿಸಿ. ಭಟ್

ಒಡಿಪು : ಪೋಷಕೆರ್ ತಮ್ಮ ಜೋಕ್ಲೆನ್ ಶಾಲೆಗ್ ಸೇರ್ಸಾದ್ ಅತ್ತುಂಡ ಮೊಬೈಲ್ ದೆತ್ತ್ ಕೊರುಂಡ ಯಾವುಜಿ . ಜೋಕ್ಲೆನ ವರ್ತನೆನ್ ಗೇನಡ್ ದೀಯೊಂದು ಶಾಲೆದೊಟ್ಟುಗು ನಿರಂತರ ಸಂಪರ್ಕಡ್ ಉಪ್ಪೊಡು ಅಪಗ ಮಾತ್ರ ಸಾಧನೆ ಮಲ್ಪರೆ ಶಿಕ್ಷಕೆರ್ ಜೋಕ್ಲೆನ್ ಪ್ರೇರೇಪಣೆ ಮಲ್ಪೊಲಿ , ಸಾಧನೆ ಮಲ್ಪುನ ಛಲನ್ ಪುಟ್ಟು ಪಾಡೋಲಿ ಅಂಚಾದ್ ಪೋಷಕೆರ್ ಅಪಗಪಗ ಶಾಲೆಗ್ ಭೇಟಿ ಕೊರ್ಪಿನ ಎಡ್ಡೆ ಪಂದ್ ಅಜ್ಜರಕಾಡು ವಾರ್ಡ್‌ ನಗರ ಸಭಾ ಸದಸ್ಯೆ ರಶ್ಮಿಸಿ. ಭಟ್ ಪಂಡೆರ್.

ಒಡಿಪು ಬಾಲಕಿಯೆರ್ನ ಸರ್ಕಾರಿ ಪದವಿಪೂರ್ವ ಕಾಲೇಜ್ ದ ಪ್ರೌಢಶಾಲಾ ವಿಭಾಗಡ್ ನಡತಿನ ಪ್ರತಿಭಾ ಪುರಸ್ಕಾರ ಬೊಕ್ಕ ಪೋಷಕೆರ್ನ ಸಭೆನ್ ಉದ್ದೇಶಿಸಾದ್ ಪಾತೆರಿಯೆರ್ .

ಕುಡ್ಲ ಸಹಿತ ಐನ್ ಜಿಲ್ಲೆಡ್ ಕಟ್ಟೆಚ್ಚರ ವಹಿಸೆರೆ ಸಿಎಂ ಬೊಮ್ಮಾಯಿ ಸೂಚನೆ

ಬೆಂಗ್ಳೂರು: ಕೈತಲ್ ದ ಕೇರಳ ರಾಜ್ಯೋಡು ಕೊರೊನಾ ವೈರಸ್ ಸೋಂಕು ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ವಿಧಾನಸೌಧಡ್ ಮಹತ್ವದ ಸಭೆ ನಡಪಾದೆರ್ . ವಿಧಾನಸೌಧದ ಸಮ್ಮೇಳನ ಸಭಾಂಗಣಡ್ ಕುಡ್ಲ , ಒಡಿಪು , ಕೊಡಗು, ಚಾಮರಾಜನಗರ ಬೊಕ್ಕ ಹಾಸನ ಜಿಲ್ಲೆದ ಉಸ್ತುವಾರಿ ಸಚಿವೆರ್ ಬೊಕ್ಕ ಜಿಲ್ಲಾಧಿಕಾರಿಲೆನ ಒಟ್ಟುಗು ವಿಡಿಯೋ ಕಾನ್ಸರೆನ್ಸ್ ನಡಪಾದ್ , ಕೋವಿಡ್ 19 ಸ್ಥಿತಿಗತಿ ಬಗ್ಗೆ ಪರಿಶೀಲನೆ ನಡಪಾದ್ , ಕಟ್ಟೆಚ್ಚರ ವಹಿಸೊಡು ಪಂದ್ ಸಿಎಂ ಬೊಮ್ಮಾಯಿ ಸೂಚನೇ ಕೊರಿಯೆರ್ .