ಕಾಸ್ರೋಡ್ ಸುದ್ದಿ | Kasargod News

ಒಡಿಪುಡು “ಸ್ಟ್ರಕ್ಚರಲ್ ಇಕ್ವೇಷನ್ ಮಾಡೆಲಿಂಗ್” ಕಾರ್ಯಾಗಾರ

ಒಡಿಪು : ಉಡುಪಿ, ಮೇ 27: ಎಐಸಿಟಿಇ ತರಬೇತಿ ಬೊಕ್ಕ ಕಲಿಕೆ ಅಕಾಡೆಮಿ ಅಂಚನೆ ಮಣಿಪಾಲ ಮಾಹೆದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ ಮೆಂಟ್ ಒಟ್ಟು ಸೇರಿಗೇಡ್ ‘ಸ್ಟ್ರಕ್ಚರಲ್ ಇಕ್ವೇಷನ್ ಮಾಡೆಲಿಂಗ್’ ಬಗ್ಗೆ ಐನ್ ದಿನತ ಆನ್‌ಲೈನ್ ಫ್ಯಾಕಲ್ಟಿ ಡೆವಲಪ್‌ಮೆಂಟ್ ಲೇಸ್ ಅಟ್ಟನೆ ಮಲ್ತಿತ್ತೆರ್.

ಕಾರ್ಯಗಾರನ್ ಕೇಂದ್ರ ಶಿಕ್ಷಣ ಸಚಿವ ರಮೇಶ್ ಪೋಖ್ರಿವಲ್ ಉದಿಪನ ಮಲ್ತೆರ್ . ಎಐಸಿಟಿಇ ಗುರ್ಕಾರ್ಲಾಯಿನ ಪ್ರೊ.ಅನಿಲ್ ದತ್ತಾತ್ರಯ ಸಹಸ್ರಬುದ್ಧೆ ಬೊಕ್ಕ ಐಕ್ಟೆಯ ಉಪಾಧ್ಯಕ್ಷ ಪ್ರೊ.ಎಂ.ಪಿ.ಪೂನಿಯಾ ಪಾಲ್ ಪಡೆದಿತ್ತೆರ್ . ಭಾರತದ ಬೇತೆ ಬೇತೆ ಬಾಗೋರ್ದು 200ರ್ದ್ ಜಾಸ್ತಿ ಅಧ್ಯಾಪಕೆರ್ ಬೊಕ್ಕ ಸಂಶೋಧನಾ ವಿದ್ವಾಂಸೆರ್ ನೆಟ್ಟ್ ಪಾಲ್ ಪಡೆದಿತ್ತೆರ್.

ಎಂಐಎಂನ ನಿರ್ದೇಶಕೆರಾಯಿನ ಡಾ.ರವೀಂದ್ರನಾಥ ನಾಯಕ್, ಕಾರ್ಯಕ್ರಮದ ಸಂಯೋಜಕಿ ಡಾ.ಸವಿತಾ, ಸಂಪನ್ಮೂಲ ವ್ಯಕ್ತಿಲಾದ್ ಟ್ಯಾಪ್ಮಿಯ ಡಾ. ಶಿರ್ಷೇಂಡು ಗಂಗೂಲಿ, ಪ್ರಸನ್ನ ಸ್ಕೂಲ್ ಆಫ್ ಪಬ್ಲಿಕ್ ಹೆಲ್ತ್‌ನ ಡಾ.ಆಶಾ ಕಾಮತ್ ಬೊಕ್ಕ ಡಾ.ವಾಣಿ ಲಕ್ಷ್ಮೀ, ಎಂಐಎಂನ ಡಾ.ನಂದನಾ ಪ್ರಭು, ಡಾ.ಸುಹಾನ್ ಮೆಂಡನ್, ಡಾ.ಸವಿತಾ, ಕುಡ್ಲ ವಿವಿಯ ಡಾ.ಪ್ರೀತಿ ಡಿಸೋಜ ಪಾಲ್ ಪಡೆದಿತ್ತೆರ್ .

ಕೋವಿಡ್ ರೋಗಿಲೆನ ಸೇವೆಗ್ 10 ಆಂಬುಲೆನ್ಸ್

ಸುಬ್ರಹ್ಮಣ್ಯ ಮೇ 27: ಜನತೆದ ಆರೋಗ್ಯ ಸಮೃದ್ಧಿಗ್ ಕುಕ್ಕೆ ದೇವಳ ಕೊರಿನ ಕೊಡುಗೆ ಅನನ್ಯ. ದೇವಳದ ಆಡಳಿತ ಮಂಡಳಿ ನಿರ್ಣಯದ ಪ್ರಕಾರ ಸಾರ್ವಜನಿಕರ ಉಪಯೋಗಗಾದ್ 10 ಆಂಬುಲೆನ್ಸ್‌ ಸೇವೆ ಕೊರಿಯರೆ ಉಂಡು . ಇತ್ತೆ ಮೂಜಿ ಆಂಬುಲೆನ್ಸ್ ಕೊರ್ತೆರ್ , ನನ ಏಳ್ ಬೆಗೋಡೆ ಸೇವೆ ಸುರು ಮಲ್ಪರೆ ಉಂಡು ಪಂದ್ ಮೀನುಗಾರಿಕೆ, ಬಂದರು ಬೊಕ್ಕ ಒಳನಾಡು ಜಲಸಾರಿಗೆ ಸಚಿವ ಎಸ್. ಅಂಗಾರ ಪಂಡೆರ್ .

ಕೊಲ್ಲಮೊಗ್ರು, ಗುತ್ತಿಗಾರು, ಕಡಬ, ಪಂಜ, ನೆಲ್ಯಾಡಿ, ಅರಂತೋಡು, ಕೊಲ ಸೇರಿನಂಚ ಏಳ್ ಪ್ರಾಥಮಿಕ ಆರೋಗ್ಯ ಕೇಂದ್ರಗ್ ಪ್ರತ್ಯೇಕ ಆಂಬುಲೆನ್ಸ್‌ ನ್ ದೇವಳರ್ದ್ ಕೊರಿಯೆರೆ ವ್ಯವಸ್ಥಾಪನಾ ಸಮಿತಿ ನಿರ್ಣಯ ದೆತೊನ್ದೆರ್ . ಆಂಬುಲೆನ್ಸ್ ಚಾಲಕೆರೆಗ್ ಪಿಪಿಇ ಕಿಟ್, ಗ್ಲೌಸ್, ಸ್ಯಾನಿಟೈಸರ್, ಮಾಸ್ಕ್‌ ನ್ ದೇವಳರ್ದ್ ಕೊರ್ತೆರ್ . ದೇವಳದ ಆಡಳಿತ ಮಂಡಳಿ ಕೋವಿಡ್-19 ಸಮಸ್ಯೆ ನಿವಾರಣೆಗ್ ಸರ್ಕಾರದೊಟ್ಟುಗು ಜೋಡಾವುನವು ಶ್ಲಾಘನೀಯ ಪಂದ್ ಸಚಿವ ಎಸ್.ಅಂಗಾರ ಪಂಡೆರ್ .

ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲಾಯಿನ ಮೋಹನರಾಂ ಎಸ್. ಸುಳ್ಳಿ, ತಹಶೀಲ್ದಾರ್ ಅನಿತಾಲಕ್ಷ್ಮಿ, ತಾಲ್ಲೂಕು ವೈದ್ಯಾಧಿಕಾರಿ ಡಾ.ನಂದಕುಮಾರ್, ಕಾರ್ಯನಿರ್ವಹಣಾಧಿಕಾರಿ ಡಾ. ನಿಂಗಯ್ಯ, ಸಹಾಯಕ ಕಾರ್ಯನಿರ್ವಹಣಾಧಿಕಾರಿ ಪುಷ್ಪಲತಾ ರಾವ್, ವ್ಯವಸ್ಥಾಪನಾ ಸಮಿತಿ ಸದಸ್ಯಯೆರಾಯಿನ ವನಜಾ ವಿ.ಭಟ್, ಪ್ರಸನ್ನ ದರ್ಬೆ, ಜಿಲ್ಲಾ ಪಂಚಾಯಿತಿ ಸದಸ್ಯ ಹರೀಶ್ ಕಂಜಿಪಿಲಿ, ಜಿಲ್ಲಾ ಪಂಚಾಯಿತಿ ಮಾಜಿ ಗುರ್ಕಾರ್ಲಾಯಿನ ವೆಂಕಟ್ ದಂಬೆಕೋಡಿ, ಮುಳಿಯ ಕೇಶವ ಭಟ್, ಗ್ರಾಮ ಪಂಚಾಯಿತಿ ಒತ್ತು ಗುರ್ಕಾರ್ಲಾಯಿನ ಸವಿತಾ ಭಟ್, ಪ್ರಮುಖೆರಾಯಿನ ವೆಂಕಟ್ ವಳಲಂಬೆ ಪಾಲ್ ಪಡೆದಿತ್ತೆರ್ .

ಗ್ರಾಮೀಣಭಿವೃದ್ಧಿ ಇಲಾಖೆ ಸಿಬ್ಬಂದಿಲು ಕೊರೋನ ವಾರಿಯರ್ಸ್ : ಮುಖ್ಯಮಂತ್ರಿ ಯಡಿಯೂರಪ್ಪ ಘೋಷಣೆ

ಬೆಂಗ್ಳೂರು , ಮೇ 27 : ಗ್ರಾಮೀಣಾಭಿವೃದ್ಧಿ ಬೊಕ್ಕ ಪಂಚಾಯತ್ ರಾಜ್ ಇಲಾಖೆದ ಸಿಬ್ಬಂದಿನ್ ಕೊರೊನಾ ವಾರಿಯರ್ಸ್ ಪಂದ್ ಗಣನೆಗ್ ದೆತೊoದು , ಕಂದಾಯ ಇಲಾಖೆ ಸಿಬ್ಬಂದಿಗ್ ಕೊರೊಂದು ಉಪ್ಪುನ ಸೌಲಭ್ಯನ್ ವಿಸ್ತರಣೆ ಮಲ್ಪುವ ಪಂದ್ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಪಂಡೆರ್.

ಮೆರ್ ಕೋಡೆ ಬೆಳಗಾವಿ, ಬಳ್ಳಾರಿ, ಶಿವಮೊಗ್ಗ ಬೊಕ್ಕ ಮೈಸೂರು ಜಿಲ್ಲೆದ ಆಯ್ದ ಗ್ರಾಮ ಪಂಚಾಯಿತಿದ ಗುರ್ಕಾರ್ಲು ಬೊಕ್ಕ ಪಿಡಿಓ ನಕ್ಲೆನೊಟ್ಟಿಗೆ ಸಂವಾದ ನಡಪಾಯಿನ ಪೊರ್ತುಡು ಪಂಡೆರ್.

ಗಾಂಜಾ ಮಾರಾಟ ಪತ್ತೆ : ಆರೋಪಿಲೆನ ಬಂಧನ

ಉಳ್ಳಾಲ, ಮೇ 26: ಮೂಡಬಿದ್ರೆ ಪೊಲೀಸ್ ಠಾಣೆಡ್ ದಾಖಲಾಯಿನ ದರೋಡೆ ಪ್ರಕರಣದ ಆರೋಪಿ ಪತ್ತೆಗಾದ್ ಮೇಲಾಧಿಕಾರಿಲೆನ ಆದೇಶದ ಪ್ರಕಾರ ಮೂಡಬಿದ್ರೆ ಪೊಲೀಸ್ ಠಾಣಾ ಪಿ.ಎಸ್.ಐ ಶ್ರೀ: ಸುದೀಮ್ ಬೊಕ್ಕ ಸಿಬ್ಬಂದಿಲು ಅಂಚನೆ ದಕ್ಷಿಣ ಉಪ ವಿಭಾಗ ಸ್ಟಾಡ್ ಸಿಬ್ಬಂದಿಲು ಉಳ್ಳಾಲ ಠಾಣಾ ವ್ಯಾಪ್ತಿಡ್ ವಿಚಿತ ಮಾಹಿತಿದೊಟ್ಟುಗು ಆರೋಪಿಲಾಯಿನ 1)ಮೊಹಮ್ಮದ್ ಫಾರೂಕ್ (24), ಕಾಸರಗೋಡು, ಕೇರಳ ರಾಜ್ಯ, 2) ‘ಸೈಯ್ಯದ್ ಮೊಹಮ್ಮದ್‌ (31) ಕುಶಾಲನಗರ, ಕೊಡಗು ಜಿಲ್ಲೆ. 3) ಮೊಹಮ್ಮದ್ ಅನ್ಸಾರ್ (23) ಮುಡಿಪು, ಮಂಗಳೂರು, 4) ಮೊಧೀನ್ ನವಾಜ್ (34), ಮಂಜೇಶ್ವರ ಗ್ರಾಮ, ಕಾಸರಗೋಡು, ಕೇರಳ ರಾಜ್ಯ ಮೊಕ್ಲೆನ್ ಪತ್ತ್ ದೆರ್.

ಆರೋಪಿಲೇರ್ದ್ , ಸದರಿ ಒಂಜಿ ಗೋಣಿ ಚೀಲ ಬೊಕ್ಕ ಪ್ಲಾಸ್ಟಿಕ್ ಗೋಣಿ ಚೀಲದ ಕಟ್ಟ್ ಬೊಕ್ಕ 5 ಪ್ಯಾಕ್ ಅಂಚನೆ ಸುಮಾರ್ 200 ಕೆಜಿ ತೂಕದಾತ್ ಉಪ್ಪುನ ಗಾಂಜಾ ಜಿಂಜಿನ ಪ್ಯಾಕ್‌ಲೆನ್ ಅಂಚನೆ ಆರೋಪಿಲೆನ ವಶಟ್ ಇತ್ತಿನ 3 ತಲವಾರ್ , 1 ಚಾಕು, 4 ಮೊಬೈಲ್, 1 ವೈ ಫೈ ಸೆಟ್ ವಶಕ್ ದೆತೊನ್ದೆರ್.

ಬಂಟ್ವಾಳದ ಸರ್ಕಾರಿ ಆಸ್ಪತ್ರೆಗ್ ಪತ್ತ್ ಲಕ್ಷ ವೆಚ್ಚದ ಆಕ್ಸಿಜನ್ ಸಿಲಿಂಡರ್ ಕೊರಿನ ರಾಜೇಶ್ ನಾಯ್ಕ್

ಬಂಟ್ವಾಳ, ಮೇ 26: ಕೋರೋನಾ ಸಂಕಷ್ಟದ ಪೊರ್ತುಡು ಅವಶ್ಯಕವಾಯಿನ ವೈದ್ಯಕೀಯ ಅವಶ್ಯಕತೆರ್ದ್ ವಂಚಿತರಾಯೆರೆ ಬಲ್ಲಿ ಪನ್ಪಿನ ನೆಲೆಟ್ಟ್ ವೈಯಕ್ತಿಕವಾದ್ ಸುಮಾರ್ ಪತ್ತ್ ಲಕ್ಷ ವೆಚ್ಚದ ಅಮ್ಲಜನಕ ಸಿಲಿಂಡರ್ ನ್ ಸರ್ಕಾರಿ ಆಸ್ಪತ್ರೆ ಬಂಟ್ವಾಳಗ್ ಬಂಟ್ವಾಳ ಶಾಸಕೆರಾಯಿನ ರಾಜೇಶ್ ನಾಯ್ಕ್ ಕೊರಿಯೆರ್.

ಬ್ಲಾಕ್ ಫಂಗಸ್ ಮರ್ದ್ ದ ಅಭಿವೃದ್ಧಿದ ರೂವಾರಿ ಗಂಗೊಳ್ಳಿದ ಶ್ರೀಕಾಂತ್ ಪೈ

ಒಡಿಪು, ಮೇ 26: ಭಾರತ ಸೇರಿನಂಚ ಕೋವಿಡ್ 19 ಸೋಂಕು ಜಗತ್ತ್ ಡೇ ಬಾರಿ ಮಲ್ಲ ಪ್ರಮಾಡ್ ಸಾವು, ಆಯೆರೆ ಕಾರಣ ಆದುಂಡು, ನೆತ್ತ ನಡುಟು ಬ್ಲ್ಯಾಕ್ ಫಂಗಸ್( ಮ್ಯೂಕೋರ್ ಮೈಕೋಸಿಸ್) ಪಂದ್ ಸಾಂಕ್ರಾಮಿಕ ಸೀಕ್ ಲಾ ಇತ್ತೆ ಪತ್ತೆಆತುಂಡು . ಅಪರೂಪದ ಬ್ಲ್ಯಾಕ್ ಫಂಗಸ್ಗ್ ಅಗತ್ಯ ಉಪ್ಪುನ ಲೊಫೋಸೋಮಲ್ ಆಯಂಪೊಟೆರಿಸಿನ್ ಬಿ ಮರ್ದ್ ದ ಕೊರತೆರ್ದ್ ಅವ್ವೆತೋ ಜನ ತೀರ್ ಪೋಪಿನ ಪರಿಸ್ಥಿತಿ ಬೈದುಂಡು.

ಮಾರಕ ಬ್ಲ್ಯಾಕ್ ಫಂಗಸ್ ಗ್ ಲೊಫೊಸೋಮಲ್ ಆಯಂಪೊಟೆರಿಸಿನ್ ಬಿ ಮರ್ದ್ ನ್ ದೇಶಾದ್ಯಂತ ಬಳಕೆ ಮಲ್ತೊಂದು ಉಲ್ಲೆರ್ ಆಂಡ . ಈ ಮರ್ದ್ ಭಾರತಡ್ 2010-11ನೇ ಸಾಲ್ ಡ್ ಅಭಿವೃದ್ಧಿ ಮಲ್ದಿನರ್ ಕುಂದಾಪುರದ ಗಂಗೊಳ್ಳಿ ಮೂಲದ ಶ್ರೀಕಾಂತ್ ಅಣ್ಣಪ್ಪ ಪೈ.

ಮುಂಬೈದ ಭಾರತ್ ಸೀರಮ್ಸ್ ಬೊಕ್ಕ ವ್ಯಾಕ್ಸಿನ್ ಲಿಮಿಟೆಡ್ ಕಂಪೆನಿದ ಸಂಶೋಧನಾ ಬೊಕ್ಕ ಅಭಿವೃದ್ಧಿ ತಂಡದ ಗುರ್ಕಾರ್ಲಾದ್ ಬೇಲೆ ಮಲ್ತೊಂದು ಉಲ್ಲೆರ್..

ಹುಷಾರ್ ದಾಂತೆ ತೀರ್ ಪೋಯಿನ ಕೊರಗ ಸಮುದಾಯದ ಮುಂಚೂಣಿ ನಾಯಕೆ ಗೋಕುಲ್ ದಾಸ್

ಕುಡ್ಲ , ಮೇ 26: ಕೊರಗ ಅಭಿವೃದ್ಧಿ ಸಂಘದ ಒಕ್ಕೂಟದ ಗುರ್ಕಾರ್ಲಾಯಿನ , ಒಡಿಪು ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ ಪಳ್ಳಿ ಗೋಕುಲ್‌ದಾಸ್ ಇನಿ ಕಾಂಡೆ 8:25ಕ್ ತೀರ್ ಪೋಯೆರ್ .

ಸುಮಾರ್ 90 ವರ್ಷ ಪ್ರಾಯದ ಮೆರ್ ಕರಿನ ಕೆಲವು ದಿನರ್ದ್ ಬಹು ಅಂಗಾಂಗ ವೈಫಲ್ಯರ್ದ್ ಕುಡ್ಲದ ಖಾಸಗಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್..

ಕರಾವಳಿ ಜಿಲ್ಲೆದ ಮೂಲ ನಿವಾಸಿಲಾದ್ ಗುರ್ತಿಸಾವೊಂದಿನ ಕೊರಗ ಸಮುದಾಯದ ಭೂಮಿಗಾದ್ ಪಣ ತೊಟ್ಟುದು ಮುಂಚೂಣಿಡ್ ಗುರ್ತಿಸಾವೊಂದು ಪಿ. ಗೋಕುಲ್‌ದಾಸ್‌ , ಕೊರಗ ಸಮುದಾಯಗ್ ಆಹಾರ ಒದಗಿಸಾವುನ ಬಗ್ಗೆ ಹೋರಾಟಲ ಮಲ್ತಿತ್ತೆರ್.

ಗುರುಪುರ, ಕುಪ್ಪೆಪದವು ಗ್ರಾಮ ಪಂಚಾಯತ್ ಡ್ ಸಚಿವ ಈಶ್ವರಪ್ಪ ವಿಡಿಯೋ ಕಾನ್ಫರೆನ್ಸ್

ಗುರುಪುರ, ಮೇ 26: ಗ್ರಾಮೀಣ ಪ್ರದೇಶಡ್ ಬೇಗಡೆ ಪರಡೋನ್ದು ಉಪ್ಪುನ ಕೋವಿಡ್ ಸೋಂಕುನು ಉಂತಾವುನಲ್ಪ ಗ್ರಾಪಂ ದ ಪಾತ್ರ ಬಾರಿ ಮಲ್ಲ ಈ ನೆಲೆಟ್ಟ್ ಗ್ರಾಪಂ ಗುರ್ಕಾರ್ಲು, ಸದಸ್ಯೆರ್ ಬೊಕ್ಕ ಅಧಿಕಾರಿ ವರ್ಗ ಪ್ರತಿಯೊಂಜಿ ಇಲ್ಲಗ್ ಪೋದು ಜನಜಾಗೃತಿ ಮೂಡಾವುನ ಬೇಲೆ ಮಲ್ಪೋಡು ಪಂದ್ ರಾಜ್ಯ ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಈಶ್ವರಪ್ಪ ಸೂ ಚನೆ ಕೊರಿಯೆರ್ .

ಗುರುಪುರ ಬೊಕ್ಕ ಕುಪ್ಪೆಪದವು ಗ್ರಾಪಂ ಸಭಾಂಗಣಡ್ ಸೋಮವಾರ ಪ್ರತ್ಯೇಕವಾದ್ ಜನಪ್ರತಿನಿಧಿಲು ಬೊಕ್ಕ ಅಧಿಕಾರಿ ವರ್ಗದೊಟ್ಟುಗು ಅಟ್ಟನೆ ಮಲ್ತಿನ ವೀಡಿಯೊ ಕಾನ್ಫರೆನ್ಸ್‌ಡ್ ಮೆರ್ ಪಾತೆರಿಯೆರ್.

ಶ್ರೀನಿವಾಸ್ ವಿಶ್ವವಿದ್ಯಾಲಯ ರ್ಯಾಂಕ್ ಪ್ರಕಟ

ಕುಡ್ಲ , ಮೇ 26: ಪೇಂಟೆದ ಶ್ರೀನಿವಾಸ ವಿಶ್ವವಿದ್ಯಾನಿಲಯದ ಕಾಲೇಜ್ ಆಫ್ ಮ್ಯಾನೇಜ್ಮೆಂಟ್ ಆಯಂಡ್ ಕಾಮರ್ಸ್‌ದ 2020-21ನೇ ಸಾಲ್ ದ ಬಿ.ಎಸ್ಸಿ. (ಐ.ಡಿ.) ಪದವಿ ಕೋರ್ಸ್ ದ ಜೋಕ್ಲೆನ ರ್ಯಾಂಕ್ ಬೈದುಂಡು .

ಮುಹಮ್ಮದ್ ಶೆಬೀಬ್ 8.73 ಸಿಜಿಪಿಎದೊಟ್ಟುಗು ಸುರುತ್ತಾ ರ್ಯಾಂಕ್ ಬೊಕ್ಕ ಬಂಗಾರ್ದ ಪದಕ , ಅನೀಸ್ ಎಸ್. 8.69 ಸಿಜಿಪಿಎದೊಟ್ಟುಗು ರಡ್ಡನೆ ರ್ಯಾಂಕ್, ರಶೀತ್ ಟಿ. ಆರ್. 8.02 ಸಿಜಿಪಿಎದೊಟ್ಟುಗು ತೃತೀಯ ರ್ಯಾಂಕ್ ಪಡೆತೆರ್ ಪಂದ್ ವಿಭಾಗದ ಡೀನ್ ಪ್ರೊ. ಸ್ವಾಮಿನಾಥನ್ ಪ್ರಕಟನೆಯಡ್ ತೆರಿಪಾದೆರ್ .