ಉಡುಪಿದ ಸುದ್ದಿ | Udupi News

ಶಿರ್ವ ನಡಿಬೆಟ್ಟು ಜೋಡುಕರೆ ಕಂಬುಲಡ್ ಮಾರ್ಪಳ್ಳಿ ಕಂಬಳಮನೆ ರಾಜೇಶ್ ಶೆಟ್ಟಿ ಮೇರ್ನ ಎರುಕ್ಲೆಗ್ ರಡ್ಡನೇ ಇನಾಮು

ಶಿರ್ವ: 27ನೇ ವರ್ಷದ ಶಿರ್ವ ನಡಿಬೆಟ್ಟು ಸೂರ್ಯ-ಚಂದ್ರ ಜೋಡುಕರೆ ಕಂಬುಲಡ್ ಬಲ್ಲ್ ದ ಕಿರಿಯ ವಿಭಾಗಡ್ 30 ಜತೆ ಎರುಕುಲು ಬೊಕ್ಕ ಸಬ್ ಜೂನಿಯರ್ ವಿಭಾಗಡ್ 48 ಜತೆ ಸೇರ್ದ್ ಒಟ್ಟು 78 ಜತೆ ಎರುಕುಲು ಪಾಲ್ ಪಡೆದಿತ್ತ.

ಬಲ್ಲ್ ಕಿರಿಯ ವಿಭಾಗಡ್ ನಿಟ್ಟೆ ಪರಪ್ಪಾಡಿ ವಿಹಾನ್ ಕೋಟ್ಯಾನ್ ಸುರುತ್ತ ತಾನೊ (ಎರು ಗಿಡತ್ತಿನಾರ್ : ಬೈಂದೂರು ವಿಶ್ವನಾಥ ದೇವಾಡಿಗ), ಮಾರ್ಪಳ್ಳಿ ಕಂಬಳಮನೆ ರಾಜೇಶ್ ಶೆಟ್ಟಿ ಮೇರೆಗ್ ರಡ್ಡನೇ ಇನಾಮು ( ಎರು ಗಿಡತ್ತಿನಾರ್: ಭಟ್ಕಳ ಶಂಕರ್), ಸಬ್ ಜೂನಿಯರ್ ವಿಭಾಗಡ್ ಬೈಂದೂರು ತಗ್ಗರ್ಸೆ ನೀಲಕಂಠ ಹುದಾರ್ ಸುರುತ್ತ ಇನಾಮು (ಎರು ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ) ಭಟ್ಕಳ ಎಚ್.ಎನ್.ನಿವಾಸ ಪಿನ್ನು ಪಾಲ್ (ಎರು ಗಿಡತಿನಾರ್: ಭಟ್ಕಳ ಶಂಕರ್) ರಡ್ಡನೇ ಇನಾಮು ಪಡೆದೆರ್.

ಕನ್ನಡ ಸಂಸ್ಕೃತಿ ಇಲಾಖೆದ ರಮೇಶ್ ದೇವಾಡಿಗ, ಮುತ್ತುರಾಜ್, ಶಿರ್ವ ಠಾಣಾಧಿಕಾರಿ ರಾಘವೇಂದ್ರ ಸಿ., ಶಿರ್ವ ಗ್ರಾ.ಪಂ., ಅಧ್ಯಕ್ಷೆರ್ ರತನ್ ಕುಮಾರ್ ಶೆಟ್ಟಿ ಬೊಕ್ಕ ಪೊಲೀಸ್ ಇಲಾಖೆದ ಶಶಿಧರ್ ರಡ್ಡ್ ವಿಭಾಗಡ್ ಗೆಂದಿನ ಎರುತ್ತ ಧನಿಕ್ಲೆಗ್ ಬೊಕ್ಕ ಎರು ಗಿಡತ್ತಿನಕ್ಲೆಗ್ ಶಾಶ್ವತ ಫಲಕದೊಟ್ಟುಗು ಪನವುದ ಇನಾಮು ಕೊರಿಯೆರ್.

ಪೆರಿಯೆರ್ ಆಯಿನ ಶಿರ್ವ ನಡಿಬೆಟ್ಟು ಸುರೇಂದ್ರ ಹೆಗ್ಡೆ, ಕಿಶೋರ್ ಚಂದ್ರ ಹೆಗ್ಡೆ, ಚಂದ್ರಶೇಖರ್ ಹೆಗ್ಡೆ, ಅಟ್ಟಿಂಜೆ ಸುಧೀರ್ ಶೆಟ್ಟಿ, ಪ್ರದೀಪ್ ಶೆಟ್ಟಿ, ಕುತ್ಯಾರು ಸಾಯಿನಾಥ ಶೆಟ್ಟಿ, ಶಿಕ್ಷಕೆರ್ ರಿತೇಶ್ ಕುಮಾರ್ ಶೆಟ್ಟಿ ಸೇರಿನಂಚನೆ ಮಸ್ತ್ ಜನ ಲೇಸ್‌ಡ್ ಇತ್ತೆರ್. ಸುರೇಂದ್ರ ಪೂಜಾರಿ ಕೊಪ್ಪಲ ಲೇಸ್ ಸುಧಾರಿಕೆ ಮಲ್ತ್‌ದ್ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್. ವೀರೇಂದ್ರ ಪೂಜಾರಿ ಸಾಕಾರ ಮಲ್ತೆರ್.

ಜ.12 ಕ್ಕ್ ಒಡಿಪುಗ್ ಬರಿಯರೆ ಉಲ್ಲೆರ್ ಯೋಗಿ ಆದಿತ್ಯನಾಥ್

ಒಡಿಪು: ಜಿಲ್ಲಾ ಬಿಜೆಪಿ ಮುತಾಲಿಕೆಡ್ ಒಡಿಪುಡು ರಾಜ್ಯ ಮಟ್ಟದ “ಯುವ ಸಂಗಮ” ಲೇಸ್ ಜ.12 ಕ್ಕ್ ನಡಪರೆ ಉಂಡು. ಈ ಲೇಸ್‌ಡ್ ಪಾಲ್ ಪಡೆಯರೆ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಒಡಿಪುಗು ಬರಿಯರೆ ಉಲ್ಲೆರ್ ಪಂದ್ ಬಿಜೆಪಿ ಒಡಿಪು ಜಿಲ್ಲಾಧ್ಯಕ್ಷೆರ್ ಕುಯಿಲಾಡಿ ಸುರೇಶ್ ನಾಯಕ್ ತೆರಿಪಾದೆರ್.

ಬಿಜಿಪಿ ಯುವ ಮೋರ್ಚಾದ ಒಟ್ಟು ಸೇರಿಗೆಡ್ ನಡಪರೆ ಇಪ್ಪುನ ಈ ಮಾಮಲ್ಲ ಸಮಾವೇಶಡ್ ರಾಜ್ಯದ ಮಾತ ಜಿಲ್ಲೆಲೆರ್ದ್ ಸುಮಾರ್ 2 ಲಕ್ಷರ್ದ್‌ಲ ಎಚ್ಚದ ಯುವ ಮೋರ್ಚಾ ಪ್ರತಿನಿಧಿಲು ಬೊಕ್ಕ ಯುವ ಕಾರ್ಯಕರ್ತೆರ್ ಪಾಲ್ ಪಡೆಯರೆ ಉಲ್ಲೆರ್.

ಅಮೆರಿಕದ ಫೀನಿಕ್ಸ್‌ಡ್ ಇಪ್ಪುನ ವೆಂಕಟೇಶ್ವರ ದೇವೆರೆಗ್ 2 ಕೋ. ರೂ. ಬಿಲೆತ್ತ ಕಿರೀಟ ಕೊರ್ತಿನ ದಂಪತಿಲು

ಒಡಿಪು: ಶ್ರೀ ಪುತ್ತಿಗೆ ಮಠಾಧೀಶೆರ್ ಪರ್ಯಾಯ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಮೇರ್ ಅಮೆರಿಕದ ಫೀನಿಕ್ಸ್ ಡ್ ಶ್ರೀ ವೆಂಕಟೇಶ್ವರ ದೇವಲ್ಯನ್ ಸ್ಥಾಪನೆ ಮಲ್ತ್‌ದೆರ್. ಅಲ್ತ ಶ್ರೀ ವೆಂಕಟೇಶ್ವರ ದೇವೆರೆಗ್ ಅಮೆರಿಕದ ಭಕ್ತೆರಾಯಿನ ಅನಿಲಾ ದಂಪತಿಲು ಇಂಚೊಗು 2 ಕೋಟಿ ರೂ. ಬಿಲೆತ್ತ ವಜ್ರದ ಕಿರೀಟನ್ ಶ್ರೀ ಪುತ್ತಿಗೆ ಸ್ವಾಮೀಜಿ ಮುಕೇನ ಅರ್ಪಣೆ ಮಲ್ದೆರ್.

ಈ ಕಿರೀಟ 2023 ತ್ತ ಜ. 1 ಕ್ಕ್ ಶ್ರೀ ದೇವೆರೆನ ಮುಕುಟನ್ ಅಲಂಕರಿಸಾಯರೆ ಉಂಡು ಪಂದ್ ಸ್ವಾಮೀಜಿ ತೆರಿಪಾಯೆರ್. ಪ್ರಧಾನ ಅರ್ಚಕೆರ್ ಕಿರಣಾಚಾರ್ಯ, ಪ್ರಧಾನ ಕಾರ್ಯದರ್ಶಿ ಪ್ರಸನ್ನಾಚಾರ್ಯ ಈ ಪೊರ್ತುಡು ಲೇಸ್‌ಡ್ ಇತ್ತೆರ್.