ಉಡುಪಿದ ಸುದ್ದಿ | Udupi News

ಆನೆಗುಡ್ಡೆ ವಿನಾಯಕ ದೇವಲ್ಯಗ್ ಭೇಟಿ ಕೊರಿನ ರಿಷಭ್ ಶೆಟ್ಟಿ ಕುಟುಮ

ತೆಕ್ಕಟ್ಟೆ: ಕಾಂತಾರ ಪಿಚ್ಚರ್ ದ ನಿರ್ದೇಶಕೆರ್, ನಟೆ ರಿಷಬ್ ಶೆಟ್ಟಿ ಆನೆಗುಡ್ಡೆ ವಿನಾಯಕ ದೇವಲ್ಯಗ್ ಇನಿ (ಡಿ.೫) ಭೇಟಿ ಕೊರಿಯೆರ್.

ರಿಷಭ್ ಕುಟುಮ ಸಮೇತರಾದ್ ದೇವಲ್ಯಗ್ ಬತ್ತ್‌ದ್ ಶ್ರೀ ದೇವೆರೆಗ್ ವಿಶೇಷ ಪೂಜೆ ಸಂದಾಯೆರ್. ದೇವಲ್ಯದ ಮುತಾಲಿಕೆಡ್ ಅಕ್ಲೆನ್ ಮೋಕೆಡ್ ಎದ್ಕೊಂದು ಮಾನಾದಿಗೆ ಮಲ್ತೆರ್.

ಅಮೆರಿಕದ ಶಾಲೆಡ್ ಮೊಬೈಲ್ ನಿಷೇಧ: ಕಲ್ಪುನೆಟ್ಟ್ ಹುಷಾರಾತೆರ್ ಜೋಕುಲು!!

ವಾಷಿಂಗ್ಟನ್: ಅಮೆರಿಕದ ಪ್ರೌಢಶಾಲೆಡ್ ಸ್ಮಾರ್ಟ್ ಫೋನ್‌ನ್ ಗಳಸುನೆನ್ ನಿಷೇಧ ಮಲ್ತ್‌ದೆರ್. ಉಂದು ಎಡ್ಡೆ ರೀತಿಡ್ ಪರಿಣಾಮ ಬೂರ್ದಿತ್ತ್‌ದ್ ಕಲ್ಪಾರ್ಥಿಲು ಎಚ್ಚದ ಕುಷಿಟ್ಟ್ ಇಪ್ಪುನವು ತೋಜಿದ್ ಬೈದ್ಂಡ್. ಉಂದೆರ್ದಾವರ ಕಲ್ಪುನೆಟ್ಟ್ ಎಚ್ಚದ ಆಸಕ್ತಿ ಬೈದ್ಂಡ್.

ಮೆಸ್ಸಾಚುಸೆಟ್ಸ್‌ಡ್ ಇಪ್ಪುನ ಬುಕ್ಸಟನ್ ಸ್ಕೂಲ್‌ಡ್ ಮೊಬೈಲ್ ಗಳಸುನೆನ್ ನಿಷೇಧ ಮಲ್ತ್‌ದೆರ್. ಕೊರೋನಾರ್ದ್ ಬೊಕ್ಕ ಕಲ್ಪಾರ್ಥಿಲು ಶಾಲೆಗ್ ಬನ್ನಗ ಎಚ್ಚ ಮೊಬೈಲ್ ಗಳಸುನವು ತೋಜಿದ್ ಬತ್ತಿತ್ಂಡ್. ಇಂಚಾದ್ ನಿಷೇಧ ಮಲ್ತ್‌ದೆರ್.

ಬ್ಯಾಂಕ್‌ಗ್ ಪೋದು ಬರ್ಪೆ ಪಂದ್ ಬೈಕ್‌ಡ್ ಪೋಯಿನ ಜವನೆ ನಾಪತ್ತೆ: ಮಾಹಿತಿ ಕೊರ್ಲೆ ಪಂದ್ ಬಿನ್ನಾಪು

ಹೊನ್ನಾವರ: ಬ್ಯಾಂಕ್‌ಗ್ ಪೋದು ಬರ್ಪೆ ಪಂದ್ ಬೈಕ್‌ಡ್ ಪೋಯಿನ ಜವನೆ ಒರಿ ಇಲ್ಲಗ್ ಬರಂದೆ, ಬ್ಯಾಂಕ್‌ಗ್‌ಲ ಪೋವಂದೇ ನಾಪತ್ತೆ ಆಯಿನ ಘಟನೆ ಕುಂದಾಪುರಡ್ ನಡತ್ಂಡ್.

ಹೊನ್ನಾವರ ತಾಲೂಕ್‌ದ ಪೊಣ್ಣನ್ ಮದಿಮೆ ಆತಿನ ಕುಂದಾಪುರ ಮರವಂತೆ ಗ್ರಾಮದ ವಿಜಯ್‌ಕುಮಾರ್ ರಾವ್ (33) ಎಸ್‌ಸಿಡಿಸಿಸಿ ಬ್ಯಾಂಕ್ ತಲ್ಲೂರು ಉಂದೆತ್ತ ಉದ್ಯೋಗಿ ಆದ್ ಬೇಲೆ ಮಲ್ತೊಂದಿತ್ತೆರ್. ಮೆರೆನ ಫೋನ್ ಇತ್ತೆ ಸ್ವಿಚ್‌ಆಫ್ ಆತ್ಂಡ್. ಈ ಬಗೆಟ್ ಗಂಗೊಳ್ಳಿ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಆತ್ಂಡ್. ಮಾಹಿತಿ ತಿಕ್ಕುಂಡ 9482559996, 9972438960 ಈ ನಂಬರ್‌ಗ್ ಲೆಪ್ಪು ಕೊರ್ಲೆ ಪಂದ್ ಕುಟುಮದಕುಲು ಬಿನ್ನಾಪು ಮಲ್ತ್‌ದೆರ್.

ಕಟೀಲ್ ನುಡಿಪರ್ಬೊಡು ತುಳು ಉಚ್ಚಯೊ ಉದಿಪನ

ಕಿನ್ನಿಗೋಳಿ: ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಶಿಕ್ಷಣ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಸುರುವಾತಿನ ಭ್ರಮರ ಇಂಚರ ನುಡಿಪರ್ಬದ ರಡ್ಡನೇ ದಿನವಾಯಿನ ಸನಿಯಾರ ತುಳು ಉಚ್ಚಯೊ ನಡತ್ಂಡ್.

ಕಟೀಲು ಪದವಿಪೂರ್ವ ಕಾಲೇಜಿದ ಶ್ರೀ ವಿದ್ಯಾ ಸಭಾಭವನಡ್ ನಡತಿನ ತುಳು ಉಚ್ಚಯೊನು ಪುಗರ್ತೆದ ರಂಗನಟೆ, ನಿರ್ದೇಶಕೆರ್ ಡಾ.ದೇವದಾಸ್ ಕಾಪಿಕಾಡ್ ಉದಿಪನ ಮಲ್ತ್ ದ್ ಪಾತೆರಿಯೆರ್. ದೇವಲ್ಯದ ಅನುವಂಶಿಕ ಅರ್ಚಕೆರ್ ವೆಂಕಟರಮಣ ಆಸ್ರಣ್ಣ ಮೇರ್ ಆಶೀರ್ವಚನ ಕೊರಿಯೆರ್. ತುಳು ಬೊಕ್ಕ ಕನ್ನಡ ಜಾನಪದ ವಿದ್ವಾಂಸೆರ್ ಡಾ.ಗಣೇಶ್ ಅಮೀನ್ ಸಂಕಮಾರ್ ,ಸಮ್ಮೇಳನಾಧ್ಯಕ್ಷೆರ್ ಪಾದೇಕಲ್ಲು ವಿಷ್ಣುಭಟ್,ಕಟೀಲ್ ದೇವಲ್ಯದ ಅನುವಂಶಿಕ ಅರ್ಚಕ ಕಮಲಾದೇವಿ ಪ್ರಸಾದ ಆಸ್ರಣ್ಣ, ಡಾ.ಶಶಿಕುಮಾರ್, ಜ್ಯೋತಿ ಶುಭಾನಂದ ರಾವ್ ,ರತ್ನಾಕರ ಶೆಟ್ಟಿ ಎಕ್ಕಾರು ಲೇಸ್ ಡ್ ಪಾಲ್ ಪಡೆದಿತ್ತೆರ್. ಆಶಾಲತಾ ಲೇಸ್ ಸುಧಾರಿಕೆ ನಡತ್ಂಡ್.

ಅಯಿರ್ದ್ ಬೊಕ್ಕ ತುಳು ಜಾನಪದ ನಲಿಕೆ, ತುಳುನಾಡ ದೇವಲ್ಯ, ಕಿರಿತೆರೆ ಸಾಹಿತ್ಯ, ತುಳುನಾಡ ಗೊಬ್ಬುಲು ಇಂಚಿನ ವಿಚಾರೊಡು ತುಲಿಪು ಕಜ್ಜೊ ನಡತ್ಂಡ್.

ಒಡಿಪು ಪರ್ಯಾಯ ಉಚ್ಚಯ: ಪುತ್ತಿಗೆ ಮಠರ್ದ್ ಕೈಲ್ ಮೂರ್ತ

ಒಡಿಪು: ಪುತ್ತಿಗೆ ಮಠಟ್ಟ್ ನಡಪುನ ಪರ್ಯಾಯ ಮಹೋಚ್ಚಯಗ್ ಸುರುಕ್ಕಾದ್ ನಡಪುನ ಬಾರೆ ಕೈಲ್ ಮೂರ್ತ ಲೇಸ್‌ನ್ 2024 ಟ್ಟ್ ಪರ್ಯಾಯ ಪೀಠ ಏರುನ ಪುತ್ತಿಗೆ ಸ್ವಾಮೀಜಿ ಮಲ್ತೆರ್.

ಈ ಪೊರ್ತುಡು ಶ್ರೀ ಮಠತ್ತ ಸಾರರ್ದ್‌ಲ ಎಚ್ಚದ ಭಕ್ತೆರ್ ಪಾಲ್ ಪಡೆಯೆರ್.

ಕಟಪಾಡಿ: ಸ್ಕೂಟಿಗ್ ಟಿಪ್ಪರ್ ಲಾರಿ ಗುದ್ದುದು ತೀರ್ ಪೋಯಿನ ಜವನೆ

ಕಟಪಾಡಿ: ಸ್ಕೂಟಿಗ್ ಟಿಪ್ಪರ್ ಲಾರಿ ಗುದ್ದುದು ತಿರ್ತ್ ಬೂರ್ದು ಮಸ್ತ್ ಪೆಟ್ಟಾತಿನ ಜವನೆ ಒರಿ ತೀರ್ ಪೋಯಿನ ಘಟನೆ ಸುಕ್ರಾರ ಕಾಂಡೆ ಕಟಪಾಡಿ ಜಂಕ್ಷನ್‌ಡ್ ನಡತ್ಂಡ್. ಉದ್ಯಾವರದ ಶಿವಾನಂದ ಭಂಡಾರಿ ಮೆರೆನ ಮಗೆ ಸುಶಿಕ್ಷಿತ್ ಭಂಡಾರಿ(20) ತೀರ್ ಪೋಯಿನಾರ್.

ಈ ಘಟನೆಡ್ ಸ್ಕೂಟಿ ಬುಡೊಂದಿತ್ತಿನ ಜಯದೀಪ್ ಮೆರೆನ ಕೈಕ್ ಮಸ್ತ್ ಪೆಟ್ಟಾದಿತ್ತ್‌ದ್ ಒಡಿಪುದ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಉಲ್ಲೆರ್. ಕಟಪಾಡಿ ಜಂಕ್ಷನ್‌ಡ್ ಇನಿ ಕಾಂಡೆ ಸ್ಕೂಟಿಡ್ ಜಯದೀಪ್ ಬೊಕ್ಕ ಸುಶಿಕ್ಷಿತ್ ಉದ್ಯಾವರರ್ದ್ ಪಡುಬಿದ್ರೆಗ್ ಕ್ಯಾಟರಿಂಗ್‌ಗ್ ಪೋವೊಂದಿತ್ತೆರ್. ಅಪಗ ಟಿಪ್ಪರ್ ಲಾರಿ ಗುದ್ದ್‌ದ್ಂಡ್. ಅಪಗ ಸ್ಕೂಟಿದ ಮಾರ್ಗಡ್ ಪಿರವುಡು ಕುಲ್ದಿತ್ತಿನ ಸುಶಿಕ್ಷಿತ್‌ ತಿರ್ತ್ ಬೂರ್ದು ಪೆಟ್ಟಾದಿತ್ತ್ಂಡ್. ಅಪಗನೆ ಅರೆನ್ ಮಣಿಪಾಲ ಆಸ್ಪತ್ರೆಗ್ ಕೊನನಗ ಸಾದಿದ ನಡುಟ್ಟ್ ತೀರ್ ಪೋತೆರ್. ಕಾಪು ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆತ್ಂಡ್.

ಬಡಪತ್ತ್ ದಕ್ಲೆಗ್ ಸಕಾಯ ಮಲ್ಪುನ ಬೇಲೆ ಮಾತೆರ್ಲ ಮಲ್ಪೊಡು: ಸುದರ್ಶನ್ ಬೆದ್ರ

ಕಿನ್ನಿಗೋಳಿ: ಸುಖಾನಂದ ಶೆಟ್ಟಿ ಮೇರ್ ಹಿಂದೂ ಸಮಾಜಗ್ ಕೊರಿನ ಸೇವೆ, ಸಂಘಟನೆಗ್ ಬೇಲೆ ಮಲ್ತಿನ ಒರಿ ಎಡ್ಡೆ ನಾಯಕೆ. ಸಮಾಜಗಾದ್ ಬಲಿ ಆಯಿನ ಸಂಘಟನಾ ಚತುರನ ನೆಂಪು ಮಲ್ಪುನವು ಅಗತ್ಯವಾದುಂಡು. ಅವೆಟ್ಟ್‌ಲ ಬಡ ವರ್ಗಗ್ ಸಕಾಯ ಮಲ್ಪುನ ಬೇಲೆನ್ ಮಾತೆರ್ಲ ಮಲ್ಪೊಡು ಪಂದ್ ದ.ಕ. ಜಿಲ್ಲಾ ಬಿಜೆಪಿ ಅಧ್ಯಕ್ಷೆ ಸುದರ್ಶನ್ ಬೆದ್ರ ಪಂಡೆರ್.

ಆರ್ ಕಿನ್ನಿಗೋಳಿ ಯುಗ ಪುರುಷ ಸಭಾಭವನಡ್ ಸುಖಾನಂದ ಶೆಟ್ಟಿ ಅಭಿಮಾನಿ ಬಳಗ ಅಂಗರಗುಡ್ಡೆ-ಶಿಮಂತೂರು ಮುತಾಲಿಕೆಡ್ 100 ಜನ ಬಡವರ್ಗಗ್ 2 ಲಕ್ಷ ರೂ ಬಿಲೆತ್ತ ತೆನಸ್‌ದ ಧಾನ್ಯ ಕೊರ್ಪಿನ ಲೇಸ್‌ಡ್ ಪಾಲ್ ಪಡೆಯೆರ್.

ಮುಲ್ಕಿ ಬೆದ್ರ ಬಿಜೆಪಿ ಮಂಡಲ ಅಧ್ಯಕ್ಷೆರ್ ಸುನೀಲ್ ಆಳ್ವ ಪಾತೆರ್ದ್, ಸುಖಾನಂದ ಶೆಟ್ಟಿ ಮೇರ್ ತೀರ್ ಪೋಯಿನವು ಹಿಂದೂ ಸಮಾಜಗ್ ಮಲ್ಲ ನಷ್ಟ ಆತ್ಂಡ್ ಪಂದ್ ಪಂಡೆರ್. ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ಬಿಜೆಪಿ ಮುಖಂಡೆರ್ ಆಯಿನ ಕಸ್ತೂರಿ ಪಂಜ, ದೇವಪ್ರಸಾದ್ ಪುನರೂರು, ಅಭಿಲಾಷ್ ಶೆಟ್ಟಿ ಕಟೀಲು, ದಿವಾಕರ ಕರ್ಕೇರ, ಸ್ಟೇನಿ ಪಿಂಟೋ ಕಟೀಲು, ಸಂಘಟಕೆರ್ ಆಯಿನ ಜೀವನ್ ಶೆಟ್ಟಿ ಅಭಿಮಾನಿ ಬಳಗದ ಸುಧೀರ್ ಶೆಟ್ಟಿ, ಪ್ರವೀಣ್ ಶೆಟ್ಟಿ ಲೇಸ್‌ಡ್ ಇತ್ತೆರ್. ವಿನೋದ್ ಬೆಳ್ಳಾಯರು ಲೇಸ್ ಸುಧಾರಿಕೆ ಮಲ್ತೆರ್.

ಮುಲ್ಕಿ: ನೆತ್ತೆರ್ ಉಂಬೊಲಿ ಶಿಬಿರ

ಹಿಂದೂ ಯುವಸೇನೆ ಅಂಚನೆ ಮಹಿಳಾ ಮಂಡಳಿ ಮೂಲ್ಕಿ ಘಟಕ ಬೊಕ್ಕ ಎಸ್.ಎಸ್.ಫ್ರೆಂಡ್ಸ್ ಮೂಲ್ಕಿ ಮೊಕಲೆನ ಒಟ್ಟು ಸೇರಿಗೆಡ್ ಸುಖಾನಂದ ಶೆಟ್ಟಿ ಮೆರೆನ ನೆಂಪುಗಾದ್ ನೆತ್ತೆರ್ ಉಂಬೊಲಿ (ರಕ್ತ ದಾನ) ದ ಕಜ್ಜ ಡಿಸೆಂಬರ್ 1 ತಾರೀಕ್ ಗುರುವಾರ ಮೂಲ್ಕಿ ಹೋಟೆಲ್ ಅದಿಧನ್ ಸಭಾಗೃಹಡ್ ನಡತ್ಂಡ್.

ಎಚ್ಚಿನ ಸಂಖ್ಯೆಡ್ ಜನಕುಲು ಬತ್ತ್ ದ್ ನೆತ್ತೆರ್ ಉಂಬೊಲಿ ಮಲ್ತೆರ್.

ಕಡೆಕ್ಕ್‌ಲ ಬಂದ್ ಆಂಡ್ ತೊರ್ತಲ್ ದ ಟೋಲ್; ಕೇಕ್ ತಿಂದ್ ಕುಸಿ ಪಡೆಯಿನ ಪೊರ್ಂಬಾಟಗಾರೆರ್

ಕುಡ್ಲ: ಭಾರೀ ವಿವಾದರ್ದ್ ಬೊಕ್ಕ ತೊರ್ತಲ್ದ (ಸುರತ್ಕಲ್) ಎನ್‌ಐಟಿಕೆ ಟೋಲ್‌ಗೇಟ್ ಡಿಸೆಂಬರ್ 1 ಜೆಡ್ದ್ ಬಂದ್ ಆದಿತ್ತ್‌ದ್, ಇನಿರ್ದ್ ಸರಾಗವಾದ್ ಗಾಡಿಲು ಪೋವೊಂದು ಉಂಡು.

ಕರಿನ 35 ದಿನರ್ದ್ ನಡತಿನ ಪೊರ್ಂಬಾಟ ಕಡೆ ಆದಿತ್ತ್‌ದ್, ಇನಿ ಸುರತ್ಕಲ್ ಎನ್‌ಐಟಿಕೆ ಟೋಲ್‌ಗೇಟ್ ವಿರೋಧಿ ಪೊರ್ಂಬಾಟಗಾರೆರ್ ಕೋಡೆ ನಡುರಾತ್ರೆ ಕೇಕ್ ಕಟ್ ಮಲ್ತ್‌ದ್ ವಿಜಯೋತ್ಸವ ಆಚರಣೆ ಮಲ್ತೆರ್. ಈ ಪೊರ್ತುಡು ಪೊರ್ಂಬಾಟ ಸಮಿತಿದ ಮುಖಂಡೆರ್, ಕಾರ್ಯಕರ್ತೆರ್ ಅಂಚನೆ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಸಮಾನ ಮನಸ್ಕ ಸಂಘಟನೆದ ಮುಖಂಡೆರ್ ಇತ್ತೆರ್.