ಬಪ್ಪನಾಡ್ ಜಾತ್ರಾ ಮಹೋತ್ಸವ ಯಶಸ್ವಿ ಆವರೆ ಸೀಮೆದ ಭಕ್ತೆರೆನ ಸಾಕಾರ ಮುಖ್ಯ-ದುಗ್ಗಣ್ಣ ಸಾವಂತ ಅರಸುಲು
ಬಪ್ಪನಾಡ್ ಜಾತ್ರಾ ಮಹೋತ್ಸವದ ಪೂರ್ವಭಾವಿ ಸಭೆ
ಮುಲ್ಕಿ: ಸೀಮೆದ ಒರುಂಭ ಮಾಗಣೆದ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಜಾತ್ರಾ ಮಹೋತ್ಸವ ಏ. 1 ರ್ದ್ 8 ಮುಟ್ಟ ನಡಪರೆ ಇತ್ತ್ ದ್ ಪೂರ್ವಭಾವಿಯಾದ್ ಕ್ಷೇತ್ರದ ಆಡಳಿತ ಆಡಳಿತ ಮಂಡಳಿ ಬೊಕ್ಕ , ಅಭಿವೃದ್ಧಿ ಸಮಿತಿ, ಗ್ರಾಮಸ್ಥೆರೆನ ಸಭೆ ಕ್ಷೇತ್ರದ ಜ್ಞಾನ ಮಂದಿರದ ಸಭಾಂಗಣಡ್ ನಡತ್ಂಡ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಕ್ಷೇತ್ರದ ಅನುವಂಶಿಕ ಮುಕ್ತೇಸೆರೆರ್ ದುಗ್ಗಣ್ಣ ಸಾವಂತ ಅರಸುಲು ವಹಿಸೊಂದು ಪಾತೆರ್ದ್ ಬಪ್ಪನಾಡ್ ಕ್ಷೇತ್ರದ ಜಾತ್ರಾ ಮಹೋತ್ಸವ ಯಶಸ್ವಿಯಾವರೆ ಸೀಮೆದ ಭಕ್ತೆರೆನ ಸಾಕಾರ ಮುಖ್ಯ, ಜಾತ್ರಾ ಮಹೋತ್ಸವದ ದಿನಟ್ ಕ್ಷೇತ್ರಡ್ ನುಪ್ಪು ಪ್ರಸಾದ ಬೊಕ್ಕ ಪುತ್ತೂರು ಸುಳ್ಯ ಕಾಸರಗೋಡು ಬೊಕ್ಕ ಕೆಲವು ಕಡೆರ್ದ್ ಬರ್ಪುನ ಭಕ್ತೆರೆಗ್ ಟ್ರಾಫಿಕ್ ಸಮಸ್ಯೆ ಆವಂದಿಲೆಕ್ಕ ತೂವೊಡು ಪಂಡೆರ್.
ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಶ್ವೇತಾ ಪಳ್ಳಿ ಪಾತೆರ್ದ್ ದೇವಸ್ಥಾನದ ಸರ್ವತೋಮುಖ ಅಭಿವೃದ್ಧಿಗ್ ಅಂಚೆನೆ ಜಾತ್ರಾ ಮಹೋತ್ಸವದ ಯಶಸ್ಸಿಗ್ ಬೇತೆ ಬೇತೆ ಸಂಘ-ಸಂಸ್ಥೆಲು ಕೈ ಜೋಡಾವರೆ ಸಾಕಾರ ಕೊರೊಡು ಪಂಡೆರ್.
ಸಭೆಟ್ ಮುಲ್ಕಿ ಬಿಲ್ಲವರ ಸಂಘದ ಅಧ್ಯಕ್ಷೆರ್ ವಾಮನ್ ಕೋಟ್ಯಾನ್ ನಡಿಕುದ್ರು, ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ,ಅಭಿವೃದ್ಧಿ ಸಮಿತಿದ ಸುನಿಲ್ ಆಳ್ವ, ಕಿರಣ್ ಕುಮಾರ್ ಶೆಟ್ಟಿ ಕೋಲ್ನಾಡು ಗುತ್ತು, ಡಾ. ಹರಿಶ್ಚಂದ್ರ ಪಿ ಸಾಲ್ಯಾನ್, ವಿನೋದ್ ಸಾಲ್ಯಾನ್ ಬೆಳ್ಳಾಯರು, ಕೃಷ್ಣ ಶೆಟ್ಟಿ, ಉದಯಕುಮಾರ್ ಶೆಟ್ಟಿ ಅಧಿಧನ್, ಮೋಹನ್ ದಾಸ್ ಹೆಜಮಾಡಿ, ಕಾರು ಚಾಲಕ ಮಾಲಕರ ಸಂಘದ ಅಧ್ಯಕ್ಷೆರ್ ರಾಜೇಶ್ ಕೆರೆಕಾಡು, ಪದಾಧಿಕಾರಿಲಾಯಿನ ದೇವಣ್ಣ ನಾಯಕ್, ಚಂದ್ರಶೇಖರ್, ದೇವಸ್ಥಾನದ ಅಕೌಂಟೆಂಟ್ ಶಿವಶಂಕರ್, ಕಾರ್ತಿಕ್ ಕೋಟ್ಯಾನ್ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಸಭೆಟ್ ಜಾತ್ರಾ ಮಹೋತ್ಸವದ ದಿನಟ್ ಕೊಡಿ ಏರ್ದ್ , ಪಗೆಲ್ ತೇರ್, ಮಲ್ಲ ತೇರ್, ದಿನಟ್ ನುಪ್ಪು ಪ್ರಸಾದ ವ್ಯವಸ್ಥೆ, ಕ್ಷೇತ್ರಗ್ ಬರ್ಪುನ ಭಕ್ತೆರೆಗ್ ಪಾರ್ಕಿಂಗ್ ಸುವ್ಯವಸ್ಥೆ, ಬಗೆಟ್ ಚರ್ಚೆ ನಡತ್ಂಡ್ .
ಟ್ರಾಫಿಕ್ ವ್ಯವಸ್ಥೆ ಬಗೆಟ್ ಮುಲ್ಕಿ ಪೊಲೀಸ್ ಬೊಕ್ಕ ಕುಡ್ಲ ಉತ್ತರ ಟ್ರಾಫಿಕ್ ಪೊಲೀಸೆರೆನ ಸಭೆ ಮಾ. 28 ಕ್ಕ್ ಕಾಂಡೆ 10:30 ಗಂಟೆಗ್ ನಡಪಾವುನ ತೀರ್ಮಾನ ಆಂಡ್
ಮಾರ್ಚ್ 31ಕ್ಕ್ ಪುದೆ ಮೆರವಣಿಗೆ
ಬಪ್ಪನಾಡ್ ಕ್ಷೇತ್ರದ ಜಾತ್ರಾ ಮಹೋತ್ಸವದ ಅಂಗವಾದ್ ಸೀಮೆದ ಒರುಂಭ ಮಾಗಣೆದ ಭಕ್ತೆರೆರ್ದ್ ಪುದೆ ಮೆರವಣಿಗೆ ಸಮರ್ಪಣಾ ಕಾರ್ಯಕ್ರಮ ಮಾರ್ಚ್ 31 ತಾನಿ ಬಯ್ಯ ಮುಲ್ಕಿ ಬಸ್ ನಿಲ್ದಾಣದ ಬರಿತ ಶಿವಾಜಿ ಮಂಟಪರ್ದ್ ಭವ್ಯ ಮೆರವಣಿಡ್ ಬಪ್ಪನಾಡ್ ಕ್ಷೇತ್ರ ಮುಟ್ಟ ನಡಪರೆ ಉಂಡು.
