Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ರಡ್ಡನೇ ಸರ್ತಿ ದಾಖಲೆ ಮಲ್ತಿನ ಜಿಎಸ್‌ಟಿ : ಅಕ್ಟೋಬರ್‌ಡ್ 1.52 ಲಕ್ಷ ಕೋಟಿ ರೂ.

ದೆಲ್ಲಿ: ಸರಕು ಬೊಕ್ಕ ಸೇವಾ ತೆರಿಗೆ (ಜಿಎಸ್ ಟಿ) ಸಂಗ್ರಹಡ್ ಕುಡ ದಾಖಲೆ ಸೃಷ್ಟಿಯಾತ್ಂಡ್. ಅಕ್ಟೋಬರ್ ತಿಂಗೊಲ್‌ಡ್ 1.52 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹ ಆದಿತ್ತ್‌ದ್ ಇದ ಮುಟ್ಟ 2ನೇ ದಾಖಲೆ ಮಲ್ತ್‌ದ್ಂಡ್.

ಪರ್ಬದ ಪೊರ್ತುಡು ವೈವಾಟ್ ಎಚ್ಚ ಆತಿನೆಡ್ದಾವರ ಇಂಚ ಆತ್ಂಡ್. ಕರಿನ ವರ್ಷ ಅಕ್ಟೋಬರ್‌ಡ್ 1.30 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹ ಆದಿತ್ತ್ಂಡ್. ಈ ಸರ್ತಿ ಶೆ.16.6 ದಾತ್ ಎಚ್ಚ ಆತ್ಂಡ್.

ಕುಡ್ಲ: ಕಲ್ವ ಸಾದಿಡ್ ಕೊನೊಂದು ಇತ್ತಿನ 1.46 ಕೋ.ರೂ. ಬಿಲೆತ ಬಂಗಾರ್ ಕಸ್ಟಮ್ಸ್‌ ಅಧಿಕಾರಿಲೆನ ವಶಕ್

ಕುಡ್ಲ: ದುಬೈರ್ದ್ ಕುಡ್ಲ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಕಲ್ವ ಸಾದಿಡ್ ಕೊನೊಂದು ಇತ್ತಿನ ಬಂಗಾರ್ ನ್  ಕಸ್ಟಮ್ಸ್‌ ಅಧಿಕಾರಿಲು ವಶಕ್ ಪಡೆತೆರ್.

ಅ. 22ರ್ದ್ ಅ. 31 ಮುಟ್ಟ ಕಲ್ವ ಸಾದಿಡ್ ಕೊನೊಂದು ಇತ್ತಿನ 24 ಕ್ಯಾರೆಟ್‌ ದ 1,46,87,410 ರೂ. ಬಿಲೆತ 2,870 ಗ್ರಾಂ ಬಂಗಾರ್ ನ್ ಕಸ್ಟಮ್ಸ್‌ ಅಧಿಕಾರಿಲು ಕುಡ್ಲ ವಿಮಾನ ನಿಲ್ದಾಣಡ್ ವಶಕ್ ಪಡೆತೆರ್. ಅ. 8ರ್ದ್ 21 ಮುಟ್ಟ ಬೇತೆ ಬೇತೆ ಕೇಸ್ ಡ್ ಒಟ್ಟು 5 ಜನ ಪ್ರಯಾಣಿಕೆರ್ ದುಬಾೖರ್ದ್ ಕಲ್ವ ಸಾದಿಡ್ ಕೊನೊಂದು ಇತ್ತಿನ 1.59 ಕೋ.ರೂ. ಬಿಲೆತ ಬೊಕ್ಕ ಅ. 6 ರ್ದ್ 38.53 ಲ.ರೂ. ಬಿಲೆತ ಬಂಗಾರ್ ವಶಕ್ಕ್ ಪಡೆತೆರ್.

ಕುಡೊರ ಕೊರಗಜ್ಜನ ಪವಾಡ – ಪ್ರಾರ್ತನೆ ಮಲ್ತಿನ ರಡ್ಡೇ ದಿನಟ್ ನಾಪತ್ತೆ ಆದಿತ್ತಿನ ಬೆಂಗ್ಲೂರುದ ಪೊಣ್ಣು ಗೋವಾಡ್ ಪತ್ತೆ

ಸುಬ್ರಹ್ಮಣ್ಯ: ಬೆಂಗ್ಲೂರ್ ದ ಮಹಾಲಕ್ಷ್ಮಿ ಲೇಔಟ್‌ ದ ಭಾರ್ಗವಿ ಬೆಂಗ್ಲೂರ್ ರ್ದ್ ಬತ್ತ್ ದ್ ಕುಡ್ಲಡ್ ನಾಪತ್ತೆ ಆದಿತ್ತೆರ್.

ಮೆರೆನ ಪತ್ತೆಗಾದ್ ಯುವ ತೇಜಸ್ಸು ಟ್ರಸ್ಟ್ ಕಾರ್ಯಕರ್ತೆ ಆಯಿನ ನಿತಿನ್ ಭಟ್ ನೂಚಿಲ ಮೆರೆನ ಕುಟುಂಬಸ್ಥೆರ್ ಸುಳ್ಯದ ಉಜಿರಡ್ಕ ಸ್ವಾಮಿ ಕೊರಗಜ್ಜ ದೈವ ಸಾನಿಧ್ಯಡ್ ಪ್ರಾರ್ಥನೆ ಸಂದಾದೆರ್. ದೈವದ ನುಡಿತಂಚನೆ ಪೊಣ್ಣು ರಡ್ಡೇ ದಿನಟ್ ಗೋವಾಡ್ ಪತ್ತೆ ಆತೆರ್. ಈ ಬಗೆಟ್ ಐತಾರ ಪೊಣ್ಣನೊಟ್ಟಿಗೆ ಕುಟುಂಬಸ್ಥೆರ್ ಸಾನಿಧ್ಯಗ್ ಬತ್ತ್ ದ್ ಕೊರಗಜ್ಜನ ದರ್ಶನ ಮಲ್ದೆರ್.

ಟ್ವಿಟರ್ ಬ್ಲೂ ಟಿಕ್ ಗ್ ತಿಂಗೊಲ್‌ದ ಕಾಸ್‌ನ್ ಕಮ್ಮಿ ಮಲ್ತಿನ ಸಿಇಒ ಎಲಾನ್ ಮಸ್ಕ್

ವಾಷಿಂಗ್ಟನ್: ಟ್ವಿಟರ್‌ಡ್ ನೀಲಿ ಗುರ್ತ( ಬ್ಲೂ ಟಿಕ್) ಇಪ್ಪೊಡಾಂಡ ಒಂಜಿ ತಿಂಗೊಲ್‌ಗ್ 1,600 ರೂ. ಕಟ್ಟೊಡು ಪಂದ್ ಪೊಸ ಮಾಲಿಕೆರ್ ಎಲಾನ್ ಮಸ್ಕ್ ಮಲ್ತಿನ ನಿರ್ಧಾರಗ್ ಟೀಕೆ ವ್ಯಕ್ತವಾಯಿನ ಬಗೆಟ್ ಈ ಕಾಸ್‌ನ್ 650 ರೂ. ಗ್ ಕಮ್ಮಿ ಮಲ್ತ್‌ದೆರ್.

ಟ್ವಿಟರ್‌ನ್ ಎಲಾನ್ ಮಸ್ಕ್ ದೆತೊನಿ ಬೊಕ್ಕ ತಾನೇ ಸಿಇಒ ಆದ್ ನೇಮಕ ಮಲ್ತೊಂದೆರ್. ಟ್ವಿಟರ್‌ಡ್ ಬ್ಲೂ ಟಿಕ್ ಇಪ್ಪರೆ ಅಂಚನೆ ಅವೆನ್ ಗಲಸರೆ ಪಾಡ್ದಿನ ಕಾಸ್‌ನ್ ಸಾಹಿತಿ ಸ್ಸ್ಟೀಫನ್ ಕಿಂಗ್ ಸೇರಿನಂಚನೆ ಮಸ್ತ್ ಜನ ಖಂಡಿಸಾದೆರ್.

ಗುಜರಾತ್ ಸಂಕ ಬೂರ್ದಿನ ಪೊರ್ತುಡು 80 ಜನಕ್ಲೆನ್ ಬಚಾವ್ ಮಲ್ತಿನ ಮುಸ್ಲಿಂ ಜವನೆರ್

ಗಾಂಧಿನಗರ: ಗುಜರಾತ್‌ದ ಮೊರ್ಬಿಡ್ ಕೇಬಲ್ ಸಂಕ ಪೊಲಿದ್ ಬೂರ್ದು 140 ರ್ದುಲ ಎಚ್ಚ ಜನ ತೀರ್ ಪೋತೆರ್.ಆ ಪೊರ್ತುಡು ಮೊರ್ಬಿದ ಮುಸ್ಲಿಂ ಜವನೆರ್ 80 ರ್ದ್‌ಲ ಎಚ್ಚದ ಜನಕ್ಲೆನ ಜೀವ ಒರಿಪಾದೆರ್.

ಮೆಹಬೂಬ್ ಹುಸೇನ್ ಪಠಾಣ್, ತೌಫಿಕ್, ಹಬೀಬುಲ್ ಶೇಖ್, ನಯೀಮ್ ಶೇಖ್ ಮೊಕುಲು ತನ್ನ ಜೀವದ ಅಂಗ್ ಬುಡ್ದು ಬೇತೆ ಜೀವೊಲೆನ್ ಒರಿಪಾದೆರ್. ಅಪಾಯಡ್ ತಿಕೊಂದಿನ ಜೀವೊಲೆನ್ ಒರಿಪಾಯರೆ 5 ದೋಸ್ತಿನಕ್ಲೆನೊಟ್ಟುಗು ನೀಂದಿನ ನಯೀಮ್ ಶೇಖ್ ಮೇರ್ ಪಾತೆರ್ದ್, ಜೀವೊಲೆನ್ ಒರಿಪಾವುನ ಪೊರ್ತುಡು ಎಚ್ಚ ನೀರ್ ಪರ್ದ್ ಯನ್ನ ಒರಿ ದೋಸ್ತಿ ಪ್ರಾಣ ಕಳೆಯೊಂದೆರ್ ಪಂದ್ ಬೇಚಾರ್‌ಡ್ ಪಂಡೆರ್.

ಪ್ರವೀಣ್ ನೆಟ್ಟಾರ್ ನ್ ಕೆರ್ತಿನ ಕೇಸ್: ಆರೋಪಿಲೆನ ಪತ್ತೆಗ್ ಇನಾಮು ಘೋಷಣೆ ಮಲ್ತಿನ ಎನ್ ಐ ಎ

ಬೆಂಗ್ಲೂರ್: ಬಿಜೆಪಿ ಕಾರ್ಯಕರ್ತೆ ಪ್ರವೀಣ್ ನೆಟ್ಟಾರ್ ನ್ ಕೆರ್ತಿನ ಆರೋಪಿಲೆನ ಬಗೆಟ್ ಮಾಹಿತಿ ಕೊರ್ಂಡ ಅಕುಲೆಗ್ ಲಕ್ಷ ಲಕ್ಷ ರೂಪಾಯಿದ ಇನಾಮು ಕೊರ್ಪ ಪಂದ್ ಎನ್ ಐ ಎ ಘೋಷಣೆ ಮಲ್ದ್ಂಡ್.

ಸುರುತ ರಡ್ಡ್ ಆರೋಪಿಲೆನ ಬಗೆಟ್ ಮಾಹಿತಿ ಕೊರ್ನಕ್ಲೆಗ್ ಐದು ಲಕ್ಷ ರೂಪಾಯಿ, ಕುಡ ರಡ್ಡ್ ಜನತ ಮಾಹಿತಿ ಕೊರ್ನಕ್ಲೆಗ್ ರಡ್ಡ್ ಲಕ್ಷ ರೂಪಾಯಿ ಕೊರ್ಪ ಪಂದ್ ತೆರಿಪಾದ್ಂಡ್.
ಕೊಲೆ ಆರೋಪಿಲಾಯಿನ ಮೊಹಮ್ಮದ್ ಮುಸ್ತಾಫಾ, ತುಫೈಲ್, ಉಮ್ಮರ್ ಫಾರೂಖ್ ಬೊಕ್ಕ ಅಬೂಬಕರ್ ಸಿದ್ದೀಖ್ ಮೊಕುಲು ನಾಪತ್ತೆ ಆತೆರ್.

ಟಿ20 ವಿಶ್ವಕಪ್: ಭಾರತಗ್ ಸವಾಲ್ ಪಾಡಿಯರೆ ಉಲ್ಲೆರ್ ಬಾಂಗ್ಲಾದೇಶ

ಅಡಿಲೇಡ್: ಟಿ20 ವಿಶ್ವಕಪ್ ಸೂಪರ್ 12 ಪಂತೊಡು ಭಾರತ ಬಾಂಗ್ಲಾದೇಶನ್ ಎದುರಿಸಾಯರೆ ಉಂಡು. ಈ ಕೂಟೊಡು ಭಾರತ ಗೆಂದುನ ಕೂಟ ಆತ್ಂಡ್.

ಆಂಡ ಭಾರತ ಒವ್ವೆ ಪೊರ್ತುಡುಲ ಎಡ್ಡೆ ರೀತಿದ ರಿಸಲ್ಟ್ ಕೊರ್ಪಿನ ಸಾಧ್ಯತೆ ಉಂಡು. ಸೂರ್ಯಕುಮಾರ್ ಯಾದವ್ ಬೊಕ್ಕ ವಿರಾಟ್ ಕೊಹ್ಲಿ ಕೆಲ ಪಂತೊಡು ಎಡ್ಡೆ ರೀತಿದ ಗೊಬ್ಬುದೆರ್. ರೋಹಿತ್ ಶರ್ಮಾ ನೆದರ್ಲೆಂಡ್ಸ್ ವಿರುದ್ಧ ಅರ್ಧಶತಕ ಮಲ್ತ್‌ದ್ ಪುಗರ್ತೆ ಪಡೆದಿತ್ತೆರ್.

ಕನ್ನಡ ರಾಜ್ಯೋತ್ಸವದ ನಿಲೆಟ್ಟ್ ಪ್ರಕಾಶ್ ಆಚಾರ್ಯ ಕಿನ್ನಿಗೋಳಿ ಮೆರೆಗ್ ಮಾನಾದಿಗೆ ಮಲ್ತಿನ ಮುಲ್ಕಿ ಪೊಲೀಸೆರ್

ಮುಲ್ಕಿ: 67ನೇ ಕನ್ನಡ ರಾಜ್ಯೋತ್ಸವದ ನಿಲೆಟ್ಟ್ ಕಿನ್ನಿಗೋಳಿದ ಪುಗರ್ತೆದ ಗಾಯಕೆರ್, ಕಲಾವಿದೆರ್ ಯಕ್ಷಗಾನ, ನಾಟಕ, ನೃತ್ಯ, ನಿರೂಪಣೆ, ಮಿಮಿಕ್ರಿ, ಚಿತ್ರ ಕಲಾವಿದೆರ್ ಅಂಚೆನೆ ಕ್ರೀಡೆ, ಸಮಾಜಸೇವೆಡ್ ಬೇಲೆ ಮಲ್ತಿನ ಪ್ರಕಾಶ್ ಆಚಾರ್ ಕಿನ್ನಿಗೋಳಿ ಮೆರೆನ್ ಮುಲ್ಕಿ ಸ್ಟೇಷನ್ ದ ಪೊಲೀಸೆರ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಪೊಲೀಸ್ ನಿರೀಕ್ಷಕೆರ್, ಅಧಿಕಾರಿಲು ಬೊಕ್ಕ ಪೋಲಿಸ್ ಸಿಬ್ಬಂದಿ ವರ್ಗದಕುಲು ಇತ್ತೆರ್.

ದಿ.ಪುನೀತ್ ಪುದರ್‌ಡ್ ಸರ್ಕಾರಿ ಆಸ್ಪತ್ರೆ

ಪುನೀತ್ ರಾಜ್ ಕುಮಾರ್ ಪುದರ್‌ಡ್ 205 ಬೆಡ್‌ದ ಸಾಮರ್ಥ್ಯ ಇಪ್ಪುನ ಸರ್ಕಾರಿ ಆಸ್ಪತ್ರೆ ಬೆಂಗ್ಲೂರ್‌ದ ಗೋವಿಂದರಾಜನಗರಡ್ ನಿರ್ಮಾಣ ಮಲ್ಪರೆ ಉಂಡು ಪಂದ್ ಚಾಮರಾಜನಗರಡ್ ಸಚಿವೆರ್ ಸೋಮಣ್ಣ ಮಾಹಿತಿ ಕೊರಿಯೆರ್.

ಜನವರಿ 5 ಬೊಕ್ಕ 6 ಕ್ಕ್ ಆಸ್ಪತ್ರೆ ಲೋಕಾರ್ಪಣೆ ಆಯರೆ ಉಂಡು ಪಂದ್ ಸಚಿವೆರ್ ಮಾಹಿತಿ ಕೊರಿಯೆರ್.

ಮಹಾತ್ಮ ಗಾಂಧಿ ಶಾಂತಿ ಪ್ರತಿಷ್ಠಾನ (ರಿ) ಉಂದೆತ್ತ ಅಧ್ಯಕ್ಷೆರಾದ್ ಅತ್ತೂರು ಸದಾನಂದ ಶೆಟ್ಟಿ ಕುಡೊರ ಆಯ್ಕೆ

ಕುಡ್ಲ: ಮಹಾತ್ಮ ಗಾಂಧಿ ಶಾಂತಿ ಪ್ರತಿಷ್ಠಾನ (ರಿ), ಠಾಗೋರ್ ಪಾಕ್೯, ಕುಡ್ಲ ಉಂದೆತ್ತ 2022-24ನೇ ಸಾಲ್‌ದ ಅಧ್ಯಕ್ಷೆರಾದ್ ಕ್ರೀಡಾ, ಶಿಕ್ಷಣ, ಉಧ್ಯಮ ಅಂಚನೆ ಧಾರ್ಮಿಕ, ಸಾಮಾಜಿಕ ಕ್ಷೇತ್ರಡ್ ಸಾಧನೆ ಮಲ್ತಿನ ಶಾಂತಿ ಪ್ರತಿಷ್ಠಾನದ ಟ್ರಸ್ಟ್‌ಡ್ ನಡತಿನ ಮಹಾಸಭೆಟ್ಟ್ ಅತ್ತೂರು ಸದಾನಂದ ಶೆಟ್ಟಿ ಕುಡೊರ ಆಯ್ಕೆಯಾತೆರ್.

ಅಂಚನೆ ಉಪಾಧ್ಯಕ್ಷೆರಾದ್ ಬಿ. ಪ್ರಭಾಕರ್ ಶ್ರೀಯಾನ್, ಡಾ| ಜಿ. ಇಬ್ರಾಹಿಂ ಕೋಡಿಕಲ್, ಕಾಯ೯ದಶಿ೯ ಡಾ| ಇಸ್ಮಾಯಿಲ್ ಎನ್, ಸಹ ಕೋಶಾಧಿಕಾರಿ ಪ್ರೇಮ್ ಚಂದ್, ಜೊತೆ ಕಾಯ೯ದಶಿ೯ ಹೆರಾಲ್ಡ್ ಡಿಸೋಜ, ಕಲ್ಲೂರು ನಾಗೇಶ್, ಸಮಿತಿ ಸದಸ್ಯರು: ಎನ್.ಜಿ. ಮೋಹನ್, ಬಿ. ಪ್ರಕಾಶ್ ಹೆಗ್ಡೆ, ಚಂದ್ರಹಾಸ ಸಾಲಿಯಾನ್ ಯು, ಎವರೆಸ್ಟ್ ಕ್ರಾಸ್ತಾ, ಡಾ| ಅನಸೂಯ ಬಿ. ಸಾಲಿಯಾನ್, ಶ್ರೀಮತಿ ಉಷಾ ಹೆಚ್. ಬಲ್ಲಾಳ್, ಶ್ರೀಮತಿ ಪುಣ್ಯ ಕೆ. ಉಚ್ಚಿಲ್ ಆಯ್ಕೆಯಾತೆರ್.

You Missed