ವಿಧಾನಸಭೆ ವೋಟುದ ನಿಲೆಟ್ಟ್ ರಾಜ್ಯಡ್ ಮಾತ ಬಾರ್ ಬಂದ್ ಮಲ್ಪರೆ ಉಂಡು ಪಂದ್ ಚುನಾವಣಾ ಆಯೋಗ ತೆರಿಪಾದ್ಂಡ್.
ಮೇ8 ಕ್ಕ್ ಬಯ್ಯಗ್ 5 ಗಂಟೆಗ್ ರಾಜ್ಯದ ಬಾರ್ ಬಂದ್ ಆಪುಂಡು. ಮೇ10 ಕ್ಕ್ ವೋಟು ನಡಪರೆ ಉಂಡು. ಮೇ11 ಕ್ಕ್ ಬಾರ್ ಓಪನ್ ಆಪುಂಡು. ಮೇ12 ಕ್ಕ್ ಜನಕುಲೆಗ್ ಡ್ರಿಂಕ್ಸ್ ತಿಕ್ಕುಂಡು. ಮೇ13 ಕ್ಕ್ ವೋಟುದ ಲೆಕ್ಕ ಪ್ರಕಟ ಆಪಿನೆರ್ದಾವರ ಕುಡ ಬಂದ್ ಇಪ್ಪುಂಡು. ಮೇ15 ಕ್ಕ್ ಏಪದಲೆಕ್ಕನೆ ಅಂಗಡಿ ಓಪನ್ ಆಪುಂಡು.
ಸುಳ್ಯ ಸೀಮೆದ ಉಬರಡ್ಕ ಮಿತ್ತೂರ್ ಗ್ರಾಮದ ಉಳ್ಳಾಕ್ಲು ನಾಯರ್ ದೈವೊಲೆನ ಕಾಲಾಧಿದ ಜಾತ್ರೆ ಎ.26-ಮೇ8 ಮುಟ್ಟ ನಡಪರೆ ಉಂಡು.
ಮೇ2 ಅಂಗಾರೆ ಬಯ್ಯಗ್ ಮಿತ್ತೂರ್ ಮೂಲ ಸನ್ನಿಧಿರ್ದ್ ಉಳ್ಳಾರೆನ ಭಂಡಾರ ಬತ್ತ್ ದ್ ಓಲಸರಿಡ್ ದೇವೆರೆಗ್ ಸ್ವಸ್ತಿಕೆ ನಡತ್ಂಡ್. ಬೊಕ್ಕ ಬಲ್ಲಾಳರೆನ ಕಾಣಿಕೆ ಆದ್ ಅಡ್ತೆಲೆ ಕಿರುಚಾವಡಿಗ್ ಭಂಡಾರ ಬತ್ತ್ ದ್ ಉಳ್ಳಾರೆನ ದರ್ಶನ ನಡತ್ಂಡ್.
ಮೇ3 ಬುಧಾರ ಬಯ್ಯಗ್ ಮಿತ್ತೂರ್ ನಾಯರ್ ಭಂಡಾರ ಬತ್ತ್ ದ್ ಬಂದ್ಯತ್ತ ಒಲಸರಿ, ಮಿತ್ತೂರ್ ನಾಯರೆಗ್ ಕಿರೀಟವಾದ್ ಅಡ್ತಲೆ ಕಿರುಚಾವಡಿಗ್ ಬತ್ಂಡ್.
ಮೇ7 ಐತಾರ ರಾತ್ರೆ ಒಲಸರಿ, ಉಳ್ಳಾರೆಗ್ ಸಿರಿಮುಡಿ ನಾಯರ್ ಗ್ ಕಿರೀಟವಾದ್ ಪಡಂಪಾಳಿ ಮಾಳಿಗೆಗೆ ಭಂಡಾರ ಬರಿಯೆರೆ ಉಂಡು. ಬೊಕ್ಕ ಉಳ್ಳಾರೆನ ದರ್ಶನ ನಡಪರೆ ಉಂಡು.
ಮೇ8 ಸೋಮಾರ ಬೊಲ್ಪುಗು ನಾಯರ್ ನೇಮ, ಮೇಲ್ಮಂಚಗ್ ಕಾಯಿ ಹಾಕಿಯೆರೆ, ರೂಳುಕಾಯಿ, ಅಂಬುಕಾಯಿ, ಸ್ನಾನ, ಮಧ್ಯಾಹ್ನ ಚಾಕಟೆ ಅಡಿಟ್ಟ್ ಬಟ್ಟಲ್ ಕಾಣಿಕೆ, ಪರಕೆ, ಪೀಡೆ ಬುಡ್ಪಾಯೆರೆ, ತೊಡಕ-ಮಡಕ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಮಾಣಿಬೆಟ್ಟು ಪುರುಷೋತ್ತಮ ಗೌಡ, ಆಡಳಿತ ಮೊಕ್ತೇಸರೆರ್ ಕೆದಂಬಾಡಿ ವೆಂಕಟ್ರಮಣ ಗೌಡ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರ್: ಈ ಸರ್ತಿದ ಎಸ್‌ಎಸ್‌ಎಲ್‌ಸಿ ಪರೀಕ್ಷೆದ ರಿಸಲ್ಟ್ ಮೇ8 ಕ್ಕ್ ಪ್ರಕಟ ಆಪುನ ಅಂದಾಜಿ ಉಂಡು.
ಕರ್ನಾಟಕ ಶಾಲೆದ ಪರೀಕ್ಷೆ ಬೊಕ್ಕ ಮೌಲ್ಯಮಾಪನ ಮಂಡಳಿ (KSEAB) ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ಪ್ರಕಟ ಮಲ್ಪರೆ ಮತ ತಯಾರ್ ಮಲ್ತ್ ದ್ಂಡ್. ರಿಸಲ್ಟ್ ಪ್ರಕಟ ಆಯಿನ ಬೊಕ್ಕ ಕಲ್ಪಾರ್ಥಿಲು ಮಂಡಳಿದ ಅಧಿಕೃತ ವೆಬ್‌ಸೈಟ್– kseab.karnataka.gov.in ಅತ್ತಂಡ karresults.nic.in ಗ್ ಭೇಟಿ ಕೊರ್ದು, ಕರ್ನಾಟಕ SSLC ರಿಸಲ್ಟ್ 2023ನ್ ತೂವೊಲಿ.
ಕೆಎಸ್‌ಇಎಬಿ ಪ್ರಧಾನ ಕಾರ್ಯದರ್ಶಿ ರೇವಣಸಿದ್ದಪ್ಪ ಮೇರ್ ಕ್ಯಾರಿಯರ್‌ 360 ದೊಟ್ಟಿಗೆ ಪಾತೆರ್ದ್, ಎಕುಲು ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ನ್ ಮೇ8 ಕ್ಕ್ ಪ್ರಕಟ ಮಲ್ಪುನ ಅಂದಾಜಿ ಉಂಡು. ರಿಸಲ್ಟ್ ಪ್ರಕಟ ಮಲ್ಪುನ ಬಗೆಟ್ ನಿರ್ಧಾರ ದೆತೊನಿಯೆರೆ ಇನಿ ಸಭೆ ನಡಪಾಯೆರೆ ಉಲ್ಲ. ಸಭೆತ್ತ ಬೊಕ್ಕ ತಾರೀಕ್ ಘೋಷಣೆ ಮಲ್ಪುವ ಪಂದ್ ಪಂಡೆರ್.
ಪರೀಕ್ಷಾ ಮಂಡಳಿ ಕರ್ನಾಟಕ SSLC ಪರೀಕ್ಷೆನ್ ಮಾರ್ಚ್ 31 ರ್ದ್ ಏಪ್ರಿಲ್ 15 ಮುಟ್ಟ ನಡಪಾದ್ಂಡ್‌. ಕರ್ನಾಟಕ ಎಸ್‌ಎಸ್‌ಎಲ್‌ಸಿ ಉತ್ತರ ಪತ್ರಿಕೆದ ಮೌಲ್ಯಮಾಪನ ಪ್ರಕ್ರಿಯೆ ಏಪ್ರಿಲ್ 21 ರ್ದ್ ಸುರು ಅಪುಂಡು. ಮೇ 10 ಕ್ಕ್ ರಾಜ್ಯಡ್ ಕರ್ನಾಟಕ ವಿಧಾನಸಭೆ ವೋಟು ನಡಪರೆ ಉಂಡು. ನೆಕ್ಕ್ ರಡ್ಡ್ ದಿನ ದುಂಬೇ ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ಘೋಷಣೆ ಆಪುಂಡು. ಈ ಸರ್ತಿ ಸುಮಾರ್ 8 ಲಕ್ಷ ಕಲ್ಪಾರ್ಥಿಲು ಪರೀಕ್ಷೆ ಬರೆತೆರ್.
ಕರ್ನಾಟಕ SSLC ರಿಸಲ್ಟ್ (Karnataka SSLC Result 2023) ತೂಪುನೇ ಎಂಚ?
1. ಕಲ್ಪಾರ್ಥಿಲು ತನ್ನ ರಿಸಲ್ಟ್ ಗಾದ್ karresults.nic.in ಡ್ ಅಧಿಕೃತ ವೆಬ್‌ಸೈಟ್‌ಗ್ ಭೇಟಿ ಕೊರೊಡು.
2. ಮುಖಪುಟಡ್ ಇಪ್ಪುನ ‘ಕರ್ನಾಟಕ SSLC ರಿಸಲ್ಟ್ 2023’ ಲಿಂಕ್ ನ್ ಒತ್ತೊಡು.
3. ಉಂದು ನಿಕುಲೆನ್ KSEAB SSLC ರಿಸಲ್ಟ್ 2023 ಲಾಗಿನ್ ವಿಂಡೋಗ್ ಮರುನಿರ್ದೇಶ ಮಲ್ಪೊಂಡು.
4. ಬೊಕ್ಕ ನಿಕುಲು ದುಂಬುದ ಪುಟಡ್, ನೋಂದಣಿ ಸಂಖ್ಯೆ ಬೊಕ್ಕ ಪುಟ್ಟುನ ತಾರೀಕ್ ಪಾಡೊಡು.
5. ಪೊಲಬುನ್ ಸಂದಾದ್ ಬೊಕ್ಕ SSLC ರಿಸಲ್ಟ್ 2023 ಕರ್ನಾಟಕ ಪರದೆದ ಮಿತ್ತ್ ತೋಜುಂಡು.
6. ರಿಸಲ್ಟ್ ದ PDF ನ್ ಡೌನ್‌ಲೋಡ್ ಮಲ್ತ್ ದ್ ಬೊಕ್ಕ ಭವಿಷ್ಯದ ಉಲ್ಲೇಖಗಾದ್ ಕರ್ನಾಟಕ SSLC ರಿಸಲ್ಟ್ 2023 ತ್ತ ಮುದ್ರಣನ್ ದೆತೊನೊಲಿ.
ಬೊಕ್ಕ 10ನೇ ಕ್ಲಾಸ್ ಕಲ್ಪಾರ್ಥಿಲು ರಿಸಲ್ಟ್ ಆಧಾರದ ಮಿತ್ತ್ 11ನೇ ಕ್ಲಾಸ್ ಗ್ ತನ್ನ ಆದ್ಯತೆದ ಕೋರ್ಸ್ ಗ್ ಸೇರ್ಪಡೆ ಆಯೆರೆ ಸಹಕಾರಿ ಆಪುಂಡು. 2022ಟ್ಟ್ ಒಟ್ಟು 8.73 ಲಕ್ಷ ಕಲ್ಪಾರ್ಥಿಲು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಗ್ ಹಾಜರಾದಿತ್ತೆರ್. ನೆಟ್ಟ್ ಶೇ. 85.63 ದಾತ್ ರಿಸಲ್ಟ್ ಬೈದ್ಂಡ್.
ಕರ್ನಾಟಕ ವಿಧಾನಸಭೆ ವೋಟು ಮೇ10 ಕ್ಕ್ ನಡಪರೆ ಉಂಡು.
ಇಂಚಾದ್ ವೋಟುದ ಪಟ್ಟಿಡ್ ನಿಕ್ಲೆನ ಪುದರ್ ಉಂಡ ಇಜ್ಜ ಪಂದ್ ಸಂಶಯ ಇತ್ತಿನಕುಲು ಭಾರತದ ಚುನಾವಣಾ ಆಯೋಗ ನಿಯಮಿತವಾದ್ ನವೀಕರಣೆ ಮಲ್ತಿನ ಅಧಿಕೃತ ವೆಬ್ ಸೈಟ್ ಡ್ ಆನ್ ಲೈನ್ ಮುಖೇನ ತೂವೊಲಿ.
ಸುರುಕು https://electoralsearch.in ಸೈಟ್ ಗ್ ಭೇಟಿ ಕೊರ್ದು, ಸರ್ಚ್ ಬೈ ಡೀಟೇಲ್ಸ್ ನ್ ಆಯ್ಕೆ ಮಲ್ಪಿ. ಬೊಕ್ಕ ನಿಕ್ಲೆನ ಪುದರ್, ಪ್ರಾಯ, ರಾಜ್ಯ, ಜಿಲ್ಲೆ ಬೊಕ್ಕ ಕ್ಯಾಪ್ಚಾ ಕೋಡ್ ಪಾಡ್ಲೆ. ಅತ್ತನಗ ನಿಕ್ಲೆನ ಪುದರ್ ವೋಟುದ ಪಟ್ಟಿಡ್ ಇತ್ಂಡ ಪರದೆದ ತಿರ್ತ್ ಪೊಲಬು ಕೊರ್ದಿಪ್ಪುವೆರ್.
ಅಂಚೆನೆ ಕೊಡೊಂಜಿ ರೀತಿಡ್ಲಾ ತೂವೊಲಿ. ಮುಲ್ಪ ನಿಕುಲು ಸುರುಕು https://electoralsearch.in ಸೈಟ್ಗ್ ಭೇಟಿ ಕೊರ್ದು, ಸರ್ಚ್ ಬೈ ಎಪಿಕ್ ಆಯ್ಕೆ ಮಲ್ಪಿ. ಬೊಕ್ಕ ನಿಕ್ಲೆನ ವೋಟರ್ ಐಡಿ ನಂಬರ್, ರಾಜ್ಯ, ಕ್ಯಾಪ್ಚಾ ಕೋಡ್ ಪಾಡ್ಲೆ. ಅತ್ತನಗ ನಿಕ್ಲೆನ ಪುದರ್ ಪಟ್ಟಿಡ್ ಇತ್ಂಡ ಪರದೆದ ತಿರ್ತ್ ಜಿಲ್ಲೆ, ವಿಧಾನಸಭೆ ಕ್ಷೇತ್ರದ ಪೊಲಬು ತಿಕ್ಕುಂಡು. ನೆನ್ ನಿಕುಲು ವೋಟುಗು 10 ದಿನ ದುಂಬು ಇಪ್ಪುನಗ ತೂವೊಡಾಪುಂಡು.
ಮಂಜೇಶ್ವರ: ಮೀಯಪದವುದ ನಡುಗುಡ್ಡೆ-ಕುಳಬೈಲ್ ಶ್ರೀ ವನಶಾಸ್ತಾ ಬೊಕ್ಕ ಪರಿವಾರ ದೈವೊಲೆನ ಕ್ಷೇತ್ರಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶಾಭಿಷೇಕ ಮೇ21 ಬೊಕ್ಕ 22 ಕ್ಕ್ ನಡಪರೆ ಉಂಡು.
ವರ್ಕಾಡಿ ದಿನೇಶಕೃಷ್ಣ ತಂತ್ರಿಲೆನ ಕೈಟ್, ಗಣೇಶ ನಾಡವರ ಮೆರೆನ ಪೌರೋಹಿತ್ಯಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ನಡಪರೆ ಉಂಡು.
ಮೇ21 ಐತಾರ ಬಯ್ಯಗ್ ಪುದೆಕಾಣಿಕೆ ಕೊನಯೆರೆ, ತಂತ್ರಿಲೆಗ್ ಬೊಕ್ಕ ಋತ್ವಿಜರೆಗ್ ಪೂರ್ಣಕುಂಭ ಎದ್ಕೊನಿಯೆರ್, ವಾಸ್ತು ಹೋಮ, ಬೊಕ್ಕ ಕೈತಲ್ ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್ ಬೊಕ್ಕ ರಾತ್ರೆ ಕೈತಲ್ ದ ಪ್ರತಿಭೆಲೆನ ನೃತ್ಯ, ಗಾನ ವೈಭವ ಲೇಸ್ ನಡಪರೆ ಉಂಡು.
ಮೇ22 ಸೋಮಾರ ಬೊಲ್ಪುಗು ಗಣಪತಿ ಹವನ, ಕಲಶಪೂಜೆ, ಪ್ರತಿಷ್ಠೆ ಕಲಶಾಭಿಷೇಕ, ಆಶ್ಲೇಷ ಬಲಿ, ಸಭಾ ಲೇಸ್ ಬೊಕ್ಕ ಮಧ್ಯಾಹ್ನ ಮಹಾಪೂಜೆ, ಅನ್ನಸಂತರ್ಪಣೆ, ಬಯ್ಯಗ್ ಸಭಾ ಲೇಸ್, ರಾತ್ರೆ ವಿಜಯ್ ಕುಮಾರ್ ಕೊಡಿಯಲ್ ಬೈಲ್ ನಿರ್ದೇಶನದ ಶಿವದೂತೆ ಗುಳಿಗೆ ನಾಟಕ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರ್, ಉದ್ಯಮಿ ಕೆ.ಸದಾಶಿವ ಶೆಟ್ಟಿ ಕುಳೂರು, ಸೇವಾ ಸಮಿತಿದ ಗೌರವಾಧ್ಯಕ್ಷೆರ್ ಟಿ.ಡಿ ಸದಾಶಿವ ರಾವ್, ಅಧ್ಯಕ್ಷೆರ್ ಟಿ ಪೂವಪ್ಪ ಮೂಲ್ಯ ಕುಳಬೈಲ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ದುಬೈ: ಯು.ಎ.ಇ ಬಂಟ್ಸ್ ದ ವೇದಿಕೆಡ್ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಬಾಲ ಕಲಾವಿದೆರ್ ಪ್ರದರ್ಶನ ಮಲ್ತಿನ ಯಕ್ಷಗಾನ ನಾಟ್ಯ ವೈಭವ ದೇಶ ವಿದೇಶದ ಪ್ರೇಕ್ಷಕೆರೆನ ಮನಸ್ ಗೆಂದ್ ದ್ಂಡ್.
ಇಂಚಿಪ್ಪ ದುಬೈಡ್ ನಡತಿನ ಯುಎಇ ಬಂಟ್ಸ್ ದ 46ನೇ ಕೂಡುಕಟ್ಟ್ ದ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಎಲ್ಯ ಜೋಕುಲು ಬೊಕ್ಕ ಬಾಲ ಕಲಾವಿದೆರ್ ಅಭಿನಯ ಮಲ್ತಿನ ಯಕ್ಷಗಾನ ನಾಟ್ಯ ವೈಭವನ್ ತೂಯಿನ ಬಿನ್ನೆರ್ ಆಳ್ವಾಸ್ ಸಂಸ್ಥೆದ ರೂವಾರಿ ಮೋಹನ್ ಆಳ್ವ, ಚಲನಚಿತ್ರ ನಟೆ, ನಿರ್ದೇಶಕೆ ಶಿವಧ್ವಜ್, ಸಿಐಡಿ ಖ್ಯಾತಿದ ದಯಾ ಶೆಟ್ಟಿ, ಹರೀಶ್ ಶೆಟ್ಟಿ ಬೊಕ್ಕ ಬೊಂಬೈದ ರಂಗ ಕರ್ಮಿ ಅಶೋಕ್ ಪಕ್ಕಳ ಮೆಚ್ಚುಗೆದ ಪಾತೆರ ಪಾತೆರಿಯೆರ್.
ಕುಡ್ಲದ ಪುಗರ್ತೆದ ಟಿವಿ ಚಾನೆಲ್ ಡ್ ನೇರ ಪ್ರಸಾರ ಆತ್ಂಡ್. ದೇಶ ವಿದೇಶಡ್ ನಾಟ್ಯ ವೈಭವ ಪುಗರ್ತೆನ್ ಪಡೆತ್ಂಡ್.
ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಸಂಚಾಲಕೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ ಮೆರೆನ ಮಾರ್ಗದರ್ಶನಡ್, ಯಕ್ಷ ಗುರು ಶೇಖರ್ ಡಿ. ಶೆಟ್ಟಿಗಾರ್ ಬೊಕ್ಕ ಶರತ್ ಕುಡ್ಲ ಮೆರೆನ ನಿರ್ದೇಶನಡ್ ಮಾ.ನಿಲೇಶ್ ನಾರಾಯಣ ಶೆಟ್ಟಿ, ಮಾ.ಆದಿತ್ಯ ದಿನೇಶ್ ಶೆಟ್ಟಿ, ಮಾ.ಅಥರ್ವ ವಸಂತ ಶೆಟ್ಟಿ, ಕು.ನವೋಮಿ ಸಾಯಿನಾಥ್ ಶೆಟ್ಟಿ, ಕು.ಪ್ರೀಶ ಸಂತೋಷ್ ಶೆಟ್ಟಿ, ಕು.ಪ್ರಾಪ್ತಿ ಜಯನಂದ ಪಕ್ಕಳ ಅಭಿನಯ ಮಲ್ದೆರ್. ನೈಪಥ್ಯಡ್ ಗಿರೀಶ್ ನಾರಾಯಣ್, ಬಾಲಕೃಷ್ಣ ಶೆಟ್ಟಿಗಾರ್, ಆನಂದ ಸಾಲ್ಯಾನ್, ಭಾಸ್ಕರ ನೀರುಮಾರ್ಗ ಸಹಕಾರ ಮಲ್ದೆರ್.
ಗುರುಕುಲಾಯಿನ ಶರತ್ ಕುಡ್ಲ ಬೊಕ್ಕ ಬಾಲ ಕಲಾವಿದೆರೆಗ್ ಬಂಟ್ಸ್ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಸಲಹೆ ಸಮಿತಿದ ಸದಸ್ಯೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ ಮೇರ್ ನೆಂಪುದ ಕಾಣಿಕೆ, ಪ್ರಮಾಣ ಪತ್ರ ಕೊರ್ದು ಮಾನಾದಿಗೆ ಮಲ್ತೆರ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಮ್ಯಾನ್ಮಾರ್ ಡ್ ಬೊಲ್ಪುಗು 5.19 ಕ್ಕ್ 4.2 ಬಿರ್ಸ್ ದ ಭೂಕಂಪ ನಡತ್ ದ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.
ಭೂಕಂಪ ಕೇಂದ್ರ 10 ಕಿಮೀ ಅಡಿಟ್ಟ್ ಉಂಡು ಪಂದ್ ತೆರಿದ್ ಬೈದ್ಂಡ್.
ವಿಶ್ವಬ್ಯಾಂಕ್ ಗ್ ನನದ ಅಧ್ಯಕ್ಷೆರೆ ತಾನಗ್ ಭಾರತ ಮೂಲದ ಅಜಯ್ ಬಂಗಾ ಆಯ್ಕೆ ಆತೆರ್.
ಮಾಸ್ಟರ್ ಕಾರ್ಡ್ ದ ಮಾಜಿ ಸಿಇಒ ಆಯಿನ ಬಂಗಾ ಮೆರೆನ್ ವಿಶ್ವಬ್ಯಾಂಕ್ ದ ಮಲ್ಲ ತಾನಗ್ ಆಯ್ಕೆ ಮಲ್ಪುನ ಬಗೆಟ್ ಬುಧಾರ ನಡತಿನ ಸಭೆಟ್ಟ್ ತೀರ್ಮಾನ ಆತ್ಂಡ್. ಮೆರೆನ ಬೇಲೆದ ಅವಧಿ ಜೂ.2 ರ್ದ್ ಸುರು ಆಪುಂಡು. ಉಂದು 5 ವರ್ಷ ಮುಟ್ಟ ಇಪ್ಪುಂಡು ಪಂದ್ ವರದಿ ಆತ್ಂಡ್. ಬಂಗಾ ಮೆರೆನ ಪುದರ್ ನ್ ಜೋ ಬೈಡನ್ ಫೆಬ್ರವರಿಡ್ ನಾಮನಿರ್ದೇಶನ ಮಲ್ದೆರ್.
ಬೊಲ್ತೇರ್: ಶಿಶಿಲ ಶ್ರೀ ಶಿಶಿಲೇಶ್ವರ ದೇವಲ್ಯಡ್ ವರ್ಷಾಧಿದ ಜಾತ್ರೆ ಉಚ್ಚಯ ಮೇ14-22 ಮುಟ್ಟ ನಂತರ ಉಂಡು.
ಮೇ14 ಐತಾರ ರಾತ್ರೆ ವಾಸ್ತು ಬಲಿ, ವಾಸ್ತು ಪೂಜೆ ಆದ್ ಕೊಡಿ ಏರುಂಡು.
ಮೇ15 ಸೋಮಾರ ಬೊಲ್ಪುಗು ಶಾಂತಿ ಹವನ, ರಾತ್ರೆ ಕುದುರೆಮುಖ ದೈವೊದ ನೇಮ, ಉಗ್ರಾಣ ದಿಂಜಾಯೆರೆ, ದೇವೆರೆನ ಉಚ್ಚಯ ಸುರು ಆಪುಂಡು.
ಮೇ16 ಅಂಗಾರೆ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ದೇವೆರೆನ ಉಚ್ಚಯ, ಬೊಳ್ಳಿಕಟ್ಟೆ ಪೂಜೆ ನಡಪರೆ ಉಂಡು.
ಮೇ17 ಬುಧಾರ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ಉಚ್ಚಯ, ಸವಾರಿ ಮಂಟಪ ಕಟ್ಟೆ ಪೂಜೆ ನಡಪರೆ ಉಂಡು.
ಮೇ18 ಗುರುವಾರ ಬೊಲ್ಪುಗು ಅಂಗಣ ಉಚ್ಚಯ, ದೇವೆರೆನ ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ರಾತ್ರೆ ಬಂಗಾರ್ ದ ಕಟ್ಟೆ ಪೂಜೆ, ಬೊಕ್ಕ ಸರಯೂ ಬಾಲ ಯಕ್ಷ ವೃಂದ ಕೋಡಿಕ್ಕಲ್ಸ್ ಮೊಕ್ಲೆರ್ದ್ ವೀರ ವೀರೇಶ ಆಟ ನಡಪರೆ ಉಂಡು.
ಮೇ19 ಸುಕ್ರಾರ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ಮಲ್ಲ ತೇರ್ ಉಚ್ಚಯ, ಕವಾಟ ಬಂಧನ ನಡಪರೆ ಉಂಡು.
ಮೇ20 ಸನಿಯಾರ ಬೊಲ್ಪುಗು ಕವಾಟ ಉದಿಪನ, ಮಹಾಪೂಜೆ ಬಯ್ಯಗ್ ತೆಪ್ಪ ಉಚ್ಚಯ, ಕಟ್ಟೆಪೂಜೆ, ವಸಂತಕಟ್ಟೆಡ್ ಓಕುಳಿ, ಮೀನಗುಂಡಿಡ್ ಅವಭೃತ ಉಚ್ಚಯ ಆಯಿ ಬೊಕ್ಕ ಕೊಡಿ ಜಾಯೆರೆ ಉಂಡು.
ಮೇ21 ಐತಾರ ಬೊಲ್ಪುಗು ಶ್ರೀ ಶಿಶಿಲೇಶ್ವರ ದೇವೆರೆನ ಮೂಲತಾನ ಕುಮಾರಗುಡ್ಡೆಡ್ ರುದ್ರಾಭಿಷೇಕ, ಮಹಾಪೂಜೆ, ಕುಮಾರಾದಿ ದೈವೊಲೆಗ್ ನೇಮ, ರಾತ್ರೆ ಗೋಪುರದ ಬಾಕಿಲ್ ಡ್ ಚಕ್ರವರ್ತಿ ಕೊಡಮಣಿತ್ತಾಯ ಬೊಕ್ಕ ಪರಿವಾರ ದೈವೊಲೆಗ್ ನೇಮ, ವರ್ಷಾಧಿದ ಕಟ್ಟೆದ ಕೈತಲ್ ದೈವೊಲೆನ ನೇಮ ನಡಪರೆ ಉಂಡು.
ಮೇ22 ಸೋಮಾರ ಬೊಲ್ಪುಗು ಮಹಾಪೂಜೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಉಳ್ಳಾಲ: ಕೊಂಡಾಣದ ಮುಂಡತ್ತಾಯ ಶ್ರೀ ಪಿಲಿ ಚಾಮುಂಡಿ ಬಂಟ ದೈವೊಲ್ಯಡ್ ಶ್ರೀ ಪಿಲಿ ಚಾಮುಂಡಿ ಬಂಟ ವೈದ್ಯನಾಥ ಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯ ಮೇ9-12 ಮುಟ್ಟ ನಡಪರೆ ಉಂಡು.
ಉಚ್ಚಿಲತ್ತಾಯ ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಉಪಸ್ಥಿತಿಡ್, ವಾಸ್ತುಶಿಲ್ಪಿ ಬೆದ್ರಡ್ಕ ರಮೇಶ ಕಾರಂತ ಮೆರೆನ ಮಾರ್ಗದರ್ಶನಡ್, ಬಿ. ಗಂಗಾಧರ ಶಾಂತಿ ತಂತ್ರಿಲೆನ ಮುತಾಲಿಕೆಡ್, ಚರಣ್ ಬೇಬಿ ನಾರಾಯಣ ಪಂಡಿತ್ ಕುಂಪಲ ಮೆರೆನ ಪಾಲ್ವಿಕೆಡ್ ಈ ಲೇಸ್ ದ ವೈದಿಕ ವಿಧಿ ವಿಧಾನಲು ನಡಪರೆ ಉಂಡು.
ಮೇ9 ಅಂಗಾರೆ ಮಧ್ಯಾಹ್ನ ಉಗ್ರಾಣ ಮೂರ್ತ, ಪುದೆಕಾಣಿಕೆ ಕೊನೊಯೆರೆ ಉಂಡು.
ಮೇ10 ಬುಧಾರ ಬಯ್ಯಗ್ ತಂತ್ರಿಲು ಬರಿಯೆರೆ, ಗರಡಿಡ್ ಪ್ರಸಾದ ಪರಿಗ್ರಹ, ವಾಸ್ತುಬಲಿ ಬೊಕ್ಕ ಧರ್ಮಸಭೆ, ರಾತ್ರೆ ಕರಾವಳಿದ ಪುಗರ್ತೆದ ಹಿನ್ನೆಲೆ ಗಾಯಕಿ ತೃಪ್ತಿ ಉಚ್ಚಿಲ್ ಬೊಕ್ಕ ರಿದಂ ಮ್ಯೂಸಿಕ್ ಬ್ಯಾಂಡ್ ಕೂಟದಕ್ಲೆರ್ದ್ ಭಕ್ತಿ ಗಾನ ಸುಧೆ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಮೇ11 ಗುರುವಾರ ಬೊಲ್ಪುಗು ಗರಡಿಡ್ ಗಣಹೋಮ, ಪೊಸ ಮಂಚ ನ್ಯಾಸ ಕಲಶಾಭಿಷೇಕ, ಬೊಕ್ಕ ಪಿಲಿಚಾಮುಂಡಿ ಸನ್ನಿಧಿಡ್ ಗಣಹೋಮ, ಶಾಂತಿ ಹೋಮ, ಬಯ್ಯಗ್ ಭಂಡಾರ ಇಲ್ಲರ್ದ್ ಪಿಲಿಚಾಮುಂಡಿ ದೈವೊದ ಭಂಡಾರ ಮೆರವಣಿಗೆಡ್ ಬರಿಯೆರೆ ಉಂಡು. ಬೊಕ್ಕ ಪ್ರಜಾಪಿತ ಬ್ರಹ್ಮಕುಮಾರಿ ಈಶ್ವರೀಯ ವಿಶ್ವ ವಿದ್ಯಾಲಯ ತೊಕ್ಕೊಟ್ಟು ನೆತ್ತ ಸದಸ್ಯೆರೆರ್ದ್ ಅಮರನಾಥನ ಅಮರ ಕಥೆ, ರಾತ್ರೆ ಬ್ರಹ್ಮಕಲಶ ಪೂಜೆ, ಪರಿಕಲಶ ಪೂಜೆ ಬೊಕ್ಕ ಪುತ್ತೂರ್ ಜಗದೀಶ್ ಆಚಾರ್ಯ ಬೊಕ್ಕ ಕೂಟದಕ್ಲೆರ್ದ್ ಸಂಗೀತ ಗಾನ ಸಂಭ್ರಮ ನಡಪರೆ ಉಂಡು.
ಮೇ12 ಸುಕ್ರಾರ ಬೊಲ್ಪುಗು ಗಣಹೋಮ, ಬೊಕ್ಕ ಗುಳಿಗ, ಕೊರತಿ ಸಾನಿಧ್ಯಡ್ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ ಬಯ್ಯಗ್ ಆಕಾಶವಾಣಿ ಕಲಾವಿದೆ ಮಂಜುಳಾ ಜಿ. ರಾವ್ ಇರಾ ಮೆರೆರ್ದ್ ಶ್ರೀ ಕೃಷ್ಣ ಕಾರುಣ್ಯ ಹರಿಕಥೆ, ಬೊಕ್ಕ ವಿಠಲ ನಾಯಕ್ ಕಲ್ಲಡ್ಕ ಬೊಕ್ಕ ಕೂಟದಕ್ಲೆರ್ದ್ ಗೀತಾ ಸಾಹಿತ್ಯ ಸಂಭ್ರಮ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಪಿಲಿಚಾಮುಂಡಿ, ಬಂಟ ಬೊಕ್ಕ ಮುಂಡತ್ತಾಯ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಜಿತೇಂದ್ರ ಶೆಟ್ಟಿ ತಲಪಾಡಿ ಗುತ್ತು, ಗೌರವಾಧ್ಯಕ್ಷೆರ್ ಕುಳೂರು ಸದಾಶಿವ ಕೆ. ಶೆಟ್ಟಿ, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಕೃಷ್ಣ ಶೆಟ್ಟಿ ತಾಮಾರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ರಾಮಣ್ಣ ಶೆಟ್ಟಿ ಬೊಂಬೈ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
