ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ಕುಡ್ಲದ ಮುತಾಲಿಕೆಡ್ ಜಾಗತಿಕ ಬಂಟೆರೆನ ಕ್ರೀಡಾಕೂಟ ನಡತ್ಂಡ್.
ಈ ಕ್ರೀಡಾಕೂಟಡ್ ಆಂಜೋವುಲೆನ ವಿಭಾಗದ ಬಲ್ಲ್ ಒಯಿಪುನ ಪಂತೊಡು ಬಜಗೋಳಿ ಬಂಟೆರೆನ ಸಂಘ 1 ಲಕ್ಷ ರೂ. ದ ಸುರುತ್ತ ಇನಾಮು ಗೆಂದ್ ದ್ ಬಂಟ ಟ್ರೋಫಿನ್ ಪಡೆವೊಂದೆರ್.
ಬೋಲ್ತೆರ್: ರಾಷ್ಟ್ರೀಯ ಹಿಂದು ಜಾಗರಣ ವೇದಿಕೆದ ಮುಖಂಡೆರ್ ಮಹೇಶ್ ಶೆಟ್ಟಿ ತಿಮರೋಡಿ ವಿರುದ್ಧ ಬೋಲ್ತೆರ್ ಪೊಲೀಸ್ ಠಾಣೆಡ್ ಕೇಸ್ ಪಾಡ್ದೆರ್. ಧರ್ಮಸ್ಥಳ ಗ್ರಾಮದ ಸಂದೀಪ್ ರೈ ಪನ್ಪಿನಾರ್ ತಿಮರೋಡಿ ಬೊಕ್ಕ ಬೇತೆಕ್ಲೆನ ವಿರುದ್ಧ ಕೇಸ್ ದಾಖಲ್‌ ಮಲ್ತ್‌ದೆರ್.
ಮಹೇಶ್ ಶೆಟ್ಟಿ ತಿಮರೋಡಿ, ಅನಿಲ್ ಕುಮಾರ್ ಅಂತರ, ಕಿರಣ್ ಗೌಡ, ಪ್ರಜ್ವಲ್ ಕೆ.ವಿ. ಗೌಡ, ಮನೋಹರ್ ಮನ್ನಡ್ಕ, ಮನೋಜ್ ಸಾಲ್ಯಾನ್ ಕುಂಜರ್ಪ ಸಮಾಜದ ಆರೋಗ್ಯನ್ ಕೆಟ್ಟದಾದ್‌ ಬರೆನ ಬ್ಯಾನರ್ ಗ್ ಅನುಮತಿ ಕೊರ್ನ ಉಜಿರೆದ ಪಿಡಿಒ ಬೊಕ್ಕ ಕಾರ್ಯದರ್ಶಿ ವಿರುದ್ಧಲ ಕೇಸ್ ದಾಖಲಾತ್‌ಂಡ್.
ಅ.29 ದಾನಿ ಬೋಲ್ತೆರ್ ಠಾಣಾ ವ್ಯಾಪ್ತಿಡ್ ನಡತ್ತಿನ ಧರ್ಮಸಂರಕ್ಷಣಾ ಯಾತ್ರೆದ ಸಲುವಾದ್ ಸಂಬಂಧಪಟ್ಟ ಇಲಾಖೆರ್ದ್ ಅನುಮತಿ ಪಡೆದ್ ಯಾತ್ರೆಗ್ ಬೆಂಬಲ ಸೂಚಿಸಾದ್ ಪಾರ್ದ್ ಇತ್ತಿನ ಬ್ಯಾನರ್‌ದ ಕೈತಲ್ ಪಾದಯಾತ್ರೆನ್‌ ಉಂತಾವುನ ಒಳಸಂಚ್‌ರ್ದ್ ಪ್ರಾದೇಶಿಕ ಗುಂಪುದ ನಡುಟ್ ಸೌಹಾರ್ದಗ್‌ ಪೆಟ್ಟ್ ಆಪಿನಂಚ ಬರವಣಿಗ್‌ ಇತ್ತಿನ ಬ್ಯಾನರ್ ಪಾರ್ದ್ ಪ್ರಾದೇಶಿಕ ಗುಂಪುದ ನಡುಟ್ಟು ವೈರತ್ವ, ದ್ವೇಷ, ವೈಮನಸ್ಸು ಭಾವನೆ ಬರ್ಪುಲಕ ಬ್ಯಾನರ್ ಪಾರ್ದೆರ್‌ ಪಂದ್ ಸಂದೀಪ್ ರೈ ಕೊರ್ನ ದೂರುದಂಚ ಬೋಲ್ತೆರ್ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್‌ಂಡ್.
ಕುಡ್ಲ: ದಸರಾದ ಪೊರ್ತುಡು ದೇವಸ್ಥಾನಗ್ ಪೋದು ಪಿರ ಬರೊಂದಿಪ್ಪುನಗ ಕಾರ್ ಗುದ್ದುದು ತೀರ್ ಪೋಯಿನ ಪೊಣ್ಣನ ಇಲ್ಲ ಗ್ ಗುರುಬೆಳದಿಂಗಳು ಫೌಂಡೇಶನ್ ದ ಗುರ್ಕಾರೆ ಪದ್ಮರಾಜ್ ಆರ್. ಪೋದು ಕುಟುಂಬಕ್ಲೆಗ್ ಸಮಾಧಾನ ಮಲ್ತ್ ದ್ ಪನವುದ ಸಕಾಯ ಮಲ್ತೆರ್.
ಅ.18 ಕ್ಕ್ ಕುದ್ರೋಳಿ ದೇವಲ್ಯಗ್ ಪೋದು ಫುಟ್ ಪಾತ್ ಪಿರ ಬನ್ನಗ ಸುರತ್ಕಲ್ ಕಾನ, ಬಾಳ ನಿವಾಸಿ ರೂಪಶೀ ಕುಲಾಲ್ (23) ಮೆರೆಗ್ ಪಿರವುರ್ದ್ ಕಾರ್ ಬತ್ತ್ ದ್ ಗುದ್ದುದು ತೀರ್ ಪೋತೆರ್. ಆ ಪೊರ್ತುಡು ಪದ್ಮರಾಜ್ ಮೇರ್ ಆಸ್ಪತ್ರೆಡ್ ಅನಾರೋಗ್ಯದ ಕಾರಣ ಚಿಕಿತ್ಸೆ ಪಡೆವೊಂದು ಇತ್ತಿರ್ನೆದಾವೆರ ತೀರ್ ಪೋಯಿನಾರೆನ ಕುಟುಂಬಸ್ಥೆರೆನ್ ಭೇಟಿ ಆಯೆರೆ ಆದಿಜ್ಜಂಡ್.
ಆಂಡ ಇತ್ತೆ ಮೇರ್ ಆಸ್ಪತ್ರೆರ್ದ್ ಡಿಸ್ಚಾಜ್ ಆಯಿನ ಕೂಡ್ಲೆ ರೂಪಶ್ರೀ ಕುಲಾಲ್ ಮೆರೆನ ಇಲ್ಲಗ್ ಭೇಟಿ ಕೊರ್ದು ಕುಟುಂಬ ಸದಸ್ಯೆರೆಗ್ ಸಾಂತ್ವನ ಪಂಡ್ ದ್, ಕುದ್ರೋಳಿ ಗುರುಬೆಳದಿಂಗಳು ಫೌಂಡೇಶನ್ ರ್ದ್ ಪನವುದ ಸಕಾಯ ಮಲ್ತೆರ್.
ಅತ್ತಂದೆ ಈ ಘಟನೆಡ್ ಪೆಟ್ಟಾಯಿನ ಬಾಕಿದ ಪೊಣ್ಣು ಜೋಕುಲೆಗ್ ಲ ಪನವುದ ಸಕಾಯ ಮಲ್ದೆರ್. ಬೊಕ್ಕ ಮೊಕ್ಲೆನ ವಿದ್ಯಾಭ್ಯಾಸದ ಜಬದಾರಿನ್ ಒಯಿಸೊನುವೆ ಪಂದ್ ತೆರಿಪಾದೆರ್.
ಈ ಪೊರ್ತುಡು ಬೊಂಬೈ ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ಚೇರ್ಮನ್ ಸೂರ್ಯಕಾಂತ್ ಜೆ. ಸುವರ್ಣ, ರಾಜೇಂದ್ರ ಚಿಲಿಂಬಿ, ಪ್ರವೀಣ್ ಕುಮಾರ್ ಅರ್ಕುಳ, ಪದ್ಮನಾಭ ಕೋಟ್ಯಾನ್ ಕಾಟಿಪಳ್ಳ ಪಾಲ್ ಪಡೆದಿತ್ತೆರ್.
ಹೊಸಕೆರೆಹಳ್ಳಿ ವ್ಯಾಪ್ತಿದ ವೀರಭದ್ರ ನಗರದ ಖಾಸಗಿ ಬಸ್‌ ಗಾರೇಜ್‌ಡ್ ಏಕಾಏಕಿ ತೂ ತೋಜಿದ್ 10 ರ್ದ್ ಎಚ್ಚ ಬಸ್ಸ್‌ ಭಸ್ಮ ಆತ್‌ಂಡ್. ಬೇತೆ ಬೇತೆ ಸಂಸ್ಥೆಗ್‌ ಸೇರಿನ ಬಸ್‌ನ್‌ ಮೂಲು ಉಂತಾದ್‌ ಇತ್ತೆರ್. ರಾತ್ರೆ ಪೋಪಿನ ಬಸ್ಸ್‌ ಸೇರ್ದ್‌ ಬೇತೆ ಬೇತೆ ಬಸ್ಸ್‌ ಇತ್ತ್ಂಡ್.
ಈ ತೂ ಕೈತಲ್ದ ಶೆಡ್‌ಗ್‌ಲ ವಿಸ್ತರಣೆ ಆತ್‌ಂಡ್. ಕೂಡ್ಲೆ ಅಗ್ನಿ ಶಾಮಕ ದಳದ ಅಧಿಕಾರಿಗ್ ಮಾಹಿತಿ ಕೊರ್ದು ಅಗ್ನಿಶಾಮಕ ಗಾಡಿಲು ಬತ್ತ್‌ದ್‌ ತೂ ತೆಕ್ಕಾಯೆರೆ ಸಹಾಯ ಮಲ್ತೆರ್. ತೂ ಬೂರೆರೆ ಕಾರಣ ನನಲ ತೆರಿದ್‌ ಬೈದಿಜಿ. ನೆತ್ತ ಬಗ್ಗೆ ಹೊಸಕೆರೆಹಳ್ಳಿ ಠಾಣೆಡ್ ದೂರು ದಾಖಲಾತ್‌ಂಡ್.
ಮಿಜಾರು ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ ಸೇವಾ ಯೋಜನೆದ ಮುಖೇನ ಬಡಪತ್ತ್ ದ ಕುಟುಂಬದಕ್ಲೆಗ್ ಪನವುದ ಸಕಾಯನ್ ಮಲ್ತೆರ್.
ನೆತ್ತ 31ನೇ ಸೇವಾ ಯೋಜನೆದ ಮುಖೇನ ಕಾರ್ಲ ತಾಲೂಕ್ ದ ನಲ್ಲೂರು ಗ್ರಾಮದ ಕಲತ್ರಪಾದೆ ನಿವಾಸಿ ಆಯಿನ ಸುಗುಣ ಪೂಜಾರ್ತಿ ಮೆರೆಗ್ ರಡ್ಡ್ ಕಿಡ್ನಿದ ಸಮಸ್ಯೆ ಆದಿತ್ತ್ಂಡ್. ನೆತ್ತ ಚಿಕಿತ್ಸೆಗ್ ಬೊಕ್ಕ ಒಂಜಿ ಕಿಡ್ನಿ ಪಾಡಿಯೆರೆ ಸುಮಾರ್ 7 ಲಕ್ಷದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಮೆರೆಗ್ ರಡ್ಡ್ ವರ್ಷದ ಎಲ್ಯ ಬಾಲೆ ಉಂಡು. ಆರ್ಥಿಕವಾದ್ ಮಸ್ತ್ ಬಡಪತ್ತ್ ದ ಕುಟುಂಬ ಆಯಿನೆರ್ದಾವರ, ಆರೆನ ನನದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಸಕಾಯ ಮಲ್ಪುಲೆ ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಮಲ್ತಿತ್ತೆರ್.
ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟದ ಲೆಕ್ಕೊಡು 15000/- ರೂ.ದ ಚೆಕ್ ನ್ ಬೆದ್ರದ ಪರ ಮಾರಿಗುಡಿಟ್ಟ್ ಪುರಸಭೆ ಸದಸ್ಯೆರ್ ನಾಗರಾಜ್ ಪೂಜಾರಿ ಕೊರಿಯೆರ್.
32ನೇ ಸೇವಾ ಯೋಜನೆನ್ ಬಂಟ್ವಾಳ ತಾಲೂಕ್ ದ ಮೊಡಂಕಾಪು ಕುಪ್ಪಿಲ ನಿವಾಸಿ ಆಯಿನ ಸುರೇಶ್ ಕುಲಾಲ್ ಮೆರೆನ ಬೊಡೆದಿ ಯೋಗಿನಿ ಕುಲಾಲ್ ಮೇರ್ ಸುಮಾರ್ 8 ವರ್ಷೊದಿಂಚ ಕ್ಯಾನ್ಸರ್ ಸೀಕ್ ಡ್ ಇತ್ತೆರ್. ಮೆರೆನ ಚಿಕಿತ್ಸೆಗ್ ಸುಮಾರ್ 10 ಲಕ್ಷ ರೂ. ಖರ್ಚಾತ್ಂಡ್. ನನದ ಚಿಕಿತ್ಸೆಗ್ ಎಚ್ಚದ ಕಾಸ್ ದ ಅವಶ್ಯಕತೆ ಉಂಡು. ಮೇರ್ ಕೂಲಿ ಕೆಲಸ ಮಲ್ತ್ ದ್ ಜೀವನ ಕರಿಪುನ ಬಡಪತ್ತ್ ದ ಸಂಸಾರ ಆಯಿನೆರ್ದಾವರ ನನದ ಚಿಕಿತ್ಸೆಗ್ ಆತೊಂಜಿ ಕಾಸ್ ಇಜ್ಜಾಂಡ್. ಅಂಚಾದ್ ಯೋಗಿನಿ ಕುಲಾಲ್ ಮೆರೆನ ನನದ ಚಿಕಿತ್ಸೆಗ್ ಸಕಾಯ ಮಲ್ಪರೆ ಕೂಟಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್.
ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟದ ಲೆಕ್ಕೊಡು 15000/- ರೂ.ದ ಚೆಕ್ ನ್ ಪಿರಾಕ್ ದ ಆದಿಶಕ್ತಿ (ಮಾರಿಗುಡಿ) ದೇವಲ್ಯ ಬೆದ್ರಡ್ ಕೂಟದ ಗುರ್ಕಾರೆ ಸಂದೀಪ್ ಪುತ್ರನ್ ಮೆರೆನ ಮುಖೇನ ಕೊರಿಯೆರ್. ಈ ಪೊರ್ತುಡು ಪದುಕೆರ್ ಬೊಕ್ಕ ಸೇವೆ ಮಲ್ತಿನ ದಾನಿಲು ಇತ್ತೆರ್.
ಕುಡ್ಲ : ಕಿನ್ನಿಗೋಳಿ ಪಟ್ಟಣ ಪಂಚಾಯತ್‌ ವ್ಯಾಪ್ತಿದ ಕಟೀಲು ಕೈತಲ್ದ ಕೊಂಡೇಲ ಗ್ರಾಮದ ದುರ್ಗಾ ನಗರದಲ್ಪ ಪೊಂಜೊವ್ ಒರ್ತಿ ತೀರ್‌ಪೋದ್, ಕೆರ್ನ ಆರೋಪದ ಮಿತ್ತ್ ಪೊಂಜೊವ್‌ನ ಮಗನ್‌ ಬಜಪೆ ಪೊಲೀಸೆರ್ ಅರೆಸ್ಟ್‌ ಮಲ್ತ್‌ದೆರ್. ತೀರ್‌ಪೋಯಿನ ಪೊಂಜೊವ್ ರತ್ನ ಶೆಟ್ಟಿ (60) ಪಂದ್ ಗುರುತಿಸಾದೆರ್.
ತೀರ್‌ಪೋಯಿನ ಪೊಂಜೊವ್ ರತ್ನ ಕಟೀಲು ದುರ್ಗಾ ನಗರದ ಬಾಲಕೃಷ್ಣ ಪನ್ಪುನಾರ್ನ ಇಲ್ಲದ ಬರಿತ್ತ ಕೋಣೆಡ್ ಮಗೆ ರವಿರಾಜ್‌ ಒಟ್ಟುಗ್‌ ವಾಸ ಇತ್ತೆರ್. ಆರ್ ಗಿಡಿಗೆರೆ ಚರ್ಚ್‌ ಕೈತಲ್ದ ಹೋಟೆಲ್‌ಡ್‌ ಬೇಲೆ ಮಲ್ತೊಂದು ಇತ್ತೆರ್. ಶುಕ್ರವಾರ ಹುಷಾರ್‌ ದಾಂತೆ ಇತ್ತಿನೆಕ್ಕ್‌ ಬೇಲೆಗ್‌ ಪೋದು ಇಜ್ಜಾಂಡ್. ಈ ನಡುಟ್ ಮಗೆ ಅಪ್ಪೆ ಒಟ್ಟಿಗೆ ಇತ್ತಿನ ಕೋಣೆಗ್ ಬೀಗ ಪಾಡ್ದ್ ಪದ್ರಾಡ್ ಪಾರ್ ದಿತ್ತೆ ಪಂದ್ ಕೈತಲ್ದಕುಲ್ ತೆರಿಪಾದೆರ್.
ಐತಾರ ಕಾಂಡೆ ಇಲ್ಲದ ಕೈತಲ್‌ಡ್ ವಾಸನೆ ಬರೊಂದು ಇತ್ತಿನ ಗೊತ್ತಾದ್ ಸಂಸಯಡ್‌ ಇಲ್ಲದಕುಲ್‌ ಪೊಂಜೊವ್ ಇತ್ತಿನ ಕೋಣೆದ ಕಂಡಿಡ್‌ ತೂನಗ ಪೊಂಜೊವ್‌ನ ಮೋನೆಗ್‌ ಕುಂಟು ಮುಚ್ಚಿನ ಸ್ಥಿತಿಟ್‌ ಬೊಕ್ಕ ಕೈ ಕಾರ್ ಕಟ್ಟಿನ ಸ್ಥಿತಿಡ್ ಇತ್ತೆರ್, ಕೂಡ್ಲೆ ಕೈತಲ್ದಕುಲ್ ಬಜಪೆ ಪೊಲೀಸೆರೆಗ್ ಮಾಹಿತಿ ಕೊರ್ತೆರ್. ಈ ನಡುಟ್ಟು ವಿಷಯ ಕೈತಲ್‌ದಕ್ಲೆಗ್ ಮಾಹಿತಿ ತೆರಿನ ಕೂಡ್ಲೆ ಮಗೆ ಜಾಗೆರ್ದ್ ಪರಾರಿಯಾವೆರೆ ಪ್ರಯತ್ನ ಮಲ್ತ್ದ್, ಕೂಡ್ಲೆ ಪೊಲೀಸೆರ್ ಆರೋಪಿ ರವಿರಾಜ್‌ನ್ ಸಂಶಯಾತ್ಮಕ ಕೆರ್ನ ಕೇಸ್‌ಗ್ ಸಂಬಂಧಪಟ್ಟಿನಂಚ ಹಳೆಯಂಗಡಿ ಕೈತಲ್ದ ಸಸಿಹಿತ್ಲುಡ್‌ ಅರೆಸ್ಟ್‌ ಮಲ್ತ್ದ್ ತನಿಖೆ ಮಲ್ತೊಂದು ಉಲ್ಲೆರ್.
ಆರೋಪಿ ಒವ್‌ ಕಾರಣಗ್ ಕೃತ್ಯ ಮಲ್ತ್‌ದೆ ಪಂದ್ ನನ ತೆರಿಯೊಡಾತೆ. ಜಾಗೆಗ್ ಶ್ವಾನ ದಳ, ಬೆರಳಚ್ಚು ತಜ್ಞೆರ್, ಕುಡ್ಲ ಎಸಿಪಿ, ಬಜಪೆ ಪೊಲೀಸೆರ್ ಭೇಟಿ ಕೊರ್ದು ತನಿಖೆ ಮಲ್ತೊಂದು ಉಲ್ಲೆರ್.
ವಿಶ್ವ ಬಂಟರ ಸಮ್ಮೇಳನಡ್ ರಡ್ಡ್ ದಿನ ನಡತಿನ ಮಾತ ಲೇಸ್ ಡ್ ಬಂಟರ ಯಾನೆ ನಾಡವರ ಸಂಘ (ರಿ.) ಬ್ರಹ್ಮಾವರದ ಪೊಂಜೋವುಲೆನ ವಿಭಾಗದ ಸದಸ್ಯೆರೆನ ಡ್ಯಾನ್ಸ್ ಟೀಮ್ ಪಾಲ್ ಪಡೆದಿತ್ತ್ಂಡ್.
ತ್ರೋಬಾಲ್, ಬಲ್ಲ್ ಒಯಿಪುನ ಗೊಬ್ಬು, ಡ್ಯಾನ್ಸ್, ಪುದೆ ಮೆರವಣಿಗೆ ಇಂಚ ರಡ್ಡ್ ದಿನತ್ತ ಮಾತ ಲೇಸ್ ಲ ಪೊರ್ಲು ಇತ್ತ್ಂಡ್.
ಪೊಂಜೋವುಲೆನ ವಿಭಾಗಡ್ ಜಯಶ್ರೀ ವಿಜಯ ಕುಮಾರ್ ಶೆಟ್ಟಿ, ಶಕೀಲ ಹೆಗ್ಡೆ, ಕಿಶೋರಿ ಶೆಟ್ಟಿ, ಮಮತಾ ಶೆಟ್ಟಿ, ಪ್ರೇಮವತಿ ಶೆಟ್ಟಿ, ಪೂರ್ಣಿಮಾ ಶೆಟ್ಟಿ, ಡಾ. ಸುನಿತಾ, ಪ್ರತಿಮಾ, ಲಲಿತಾ, ಸವಿತಾ ಸೂಡ ಬೊಕ್ಕ ಲಾಯರ್ ಮೇಘನಾ ಶೆಟ್ಟಿ ಮೊಕ್ಲೆನ ಡಾನ್ಸ್ ಟೀಮ್ ಪಾಲ್ ಪಡೆದಿತ್ತ್ಂಡ್.
ಕಿನ್ನಿಗೋಳಿ: ಕಟೀಲ್ ಕೈತಲ್ದ ಉಲ್ಲಂಜೆ ಸಾಯಿಧಾಮ ಜುಮಾದಿಗುಡ್ಡೆದ ಕಟೀಲ್ ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರದ ಉದಿಪನದ ಲೇಸ್ ಭಾರೀ ಶ್ರದ್ಧಾ ಭಕ್ತಿಡ್ ನಡತ್ಂಡ್.
ಈ ಲೇಸ್ ನ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ಕೆ. ಲಕ್ಷ್ಮೀನಾರಾಯಣ ಆಸ್ರಣ್ಣ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ರಾಜ್ಯ ಕನ್ನಡ ಸಾಹಿತ್ಯ ಪರಿಷತ್ ದ ಮಾಜಿ ಗುರ್ಕಾರೆ, ಧರ್ಮದರ್ಶಿ ಡಾ.ಹರಿಕೃಷ್ಣ ಪುನರೂರು, ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಯುಗಪುರುಷ ಸಂಪಾದಕೆರ್ ಭುವನಾಭಿರಾಮ ಉಡುಪ, ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಗುರ್ಕಾರೆ ದೇವಿ ಪ್ರಸಾದ್ ಶೆಟ್ಟಿ, ಉಲ್ಲಂಜೆ ಬರ್ಕೆ ಫ್ರೆಂಡ್ಸ್ (ರಿ.) ದ ಪ್ರೇಮ್ ರಾಜ್ ಶೆಟ್ಟಿ, ಸಮಾಜ ಸೇವಕೆರ್ ಸಂಜೀವ ಮಡಿವಾಳ ಕಟೀಲ್, ಅಮ್ಮುಂಜೆ ಜನಾರ್ಧನ, ಸೀತಾರಾಮ ಕುಮಾರ್ ಕಟೀಲ್, ಎಕ್ಕಾರು ಲಯನ್ಸ್ ಕ್ಲಬ್ ದ ಗುರ್ಕಾರೆ ದಯಾನಂದ ರೈ ಚಾವಡಿಡ್ ಇತ್ತೆರ್.
ಅಂಚೆನೆ ಭಜನೆ, ತಾಳಮದ್ದಳೆ, ಭಕ್ತಿಸುಗಿಪು, ಸಾಧಕೆರೆಗ್ ಸನ್ಮಾನ, ಯಕ್ಷಗಾನ ಲೇಸ್ ನಡತ್ಂಡ್.
ಈ ಪೊರ್ತುಡು ಕಟೀಲ್ ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರದ ಪ್ರಧಾನ ಅರ್ಚಕೆರ್ ರಾಜ ಭಟ್ ಮೆರೆಗ್ ಸನ್ಮಾನ ನಡತ್ಂಡ್.
ಮುಲ್ಕಿ: ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಲ್ಯರ್ದ್ ಪಿದಾಡಿನ ಧರ್ಮ ಸಂರಕ್ಷಣಾ ರಥ ಯಾತ್ರೆ ಶುಕ್ರವಾರ ರಾತ್ರೆ 8 ಗಂಟೆಗ್ ದಕ್ಷಿಣ ಕನ್ನಡ ಜಿಲ್ಲೆದ ಗಡಿಭಾಗದ ಮುಲ್ಕಿಗ್ ಬತ್ತ್ಂಡ್.
ಈ ಪೊರ್ತುಡು ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅರ್ಚಕೆರ್ ನರಸಿಂಹ ಭಟ್ ಇಸೇಸ ಪೂಜೆ ಸಂದಾದ್ ಎದ್ಕೊನಿಯೆರ್.
ಮುಲ್ಕಿ ಸೀಮೆದ ಅರಸೆರಾಯಿನ ದುಗ್ಗಣ್ಣ ಸಾವಂತೆರ್ ಪಾತೆರ್ದ್, ಧರ್ಮ ಕ್ಷೇತ್ರಲೆಗ್ ಆಕ್ರಮಣ ಆನಗ ಸಮಾಜ ಅಲ್ಲೋಲ ಕಲ್ಲೋಲ ಆಪುಂಡು. ನೆನ್ ಉಂತಾಯೆರೆ ಧರ್ಮಕ್ಷೇತ್ರ ಸಂರಕ್ಷಣೆ ಮಲ್ಪುನ ಸದುದ್ದೇಶದೊಟ್ಟಿಗೆ ಧರ್ಮ ಸಂರಕ್ಷಣ ಯಾತ್ರಾ ಸಮಿತಿ ಯಾತ್ರೆ ಆಯೋಜನೆ ಮಲ್ದ್ಂಡ್. ರಥಯಾತ್ರೆನ್ ಯಶಸ್ವಿ ಮಲ್ಪರೆ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಕುಡ್ಲ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಮಾಜಿ ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ದೇವಲ್ಯದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಗೌತಮ್ ಜೈನ್ ಮುಲ್ಕಿ ಅರಮನೆ, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಮುಲ್ಕಿ ವಲಯದ ಗುರ್ಕಾರೆ ಬೊಕ್ಕ ಪದುಕೆರ್, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಬೋಲ್ತೆರ್: ಶಿರಸಿದ ಶ್ರೀ ಸರ್ವಜ್ಞೇಂದ್ರ ಸರಸ್ವತೀ ಪ್ರತಿಷ್ಠಾನ (ರಿ) , ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನ ಮೊಕ್ಲೆನ ಆಶ್ರಯಡ್ ಶಾಲಾ, ಕಾಲೇಜ್‌ ಕಲ್ಪಾರ್ಥಿಲೆಗ್ ಬೋಲ್ತೆರ್ ತಾಲೂಕು ಮಟ್ಟದ ಭಗವದ್ಗೀತೆ ಪಂತೊ ನ.18 ಶನಿವಾರ ಮಧ್ಯಾಹ್ನ 2 ಘಂಟೆಗ್ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿಪೂರ್ವ ಕಾಲೇಜ್‌ಡ್‌ ನಡಪೆರೆ ಉಂಡು.
ತಾಲೂಕು ಮಟ್ಟದ ಆಯಾ ಸ್ಪರ್ಧೆಡ್ ಗೆಂದಿನ ರಡ್ಡ್ ಜನನ್ ಜಿಲ್ಲಾ ಮಟ್ಟದ ಸ್ಪರ್ಧೆಗ್ ಆಯ್ಕೆ ಮಲ್ಪುವೆರ್. ಡಿಸೆಂಬರ್ 2 ದಾನಿ ಜಿಲ್ಲಾ ಮಟ್ಟದ ಸ್ಪರ್ಧೆ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕನ್ನಡ ಮಾಧ್ಯಮ ಪ್ರೌಢಶಾಲೆಡ್‌ ನಡಪೆರೆ ಉಂಡು. ಜಿಲ್ಲಾ ಮಟ್ಟದ ಬೊಕ್ಕ ರಾಜ್ಯ ಮಟ್ಟದ ಕಂಠಪಾಠಗ್ ಶ್ರೀ ಭಗವದ್ಗೀತೆದ 10 ನೆಯ ಅಧ್ಯಾಯ ಪೂರ್ತಿ ಶ್ಲೋಕನ್‌ ಪನಿಯೆರೆ ಇಪ್ಪುಂಡು. ಎಚ್ಚದ ವಿವರಗಾದ್ ಬೋಲ್ತೆರ್ ತಾಲೂಕು ಶ್ರೀ ಭಗವದ್ಗೀತಾ ಅಭಿಯಾನದ ಸಂಯೋಜಕೆರ್‌ ಬೊಕ್ಕ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿಪೂರ್ವ ಕಾಲೇಜ್‌ದ ಸಂಸ್ಕೃತ ಭಾಷಾ ವಿಭಾಗದ ಮುಖ್ಯಸ್ಥೆರ್‌ ಡಾ.ಪ್ರಸನ್ನಕುಮಾರ ಐತಾಳ್ 9964139855 ಮೇರೆನ್ ಸಂಪರ್ಕ ಮಲ್ಪೊಲಿ ಪಂದ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
