ಬೆಂಗ್ಲೂರುದ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣಗ್ ಪೋಪಿನ ದೊಡ್ಡಜಾಲದ ಕೈತಲ್ ಕೋಡೆ ಸರಣಿ ಆಕ್ಸಿಡೆಂಟ್ ಆದ್ 9 ಕಾರ್ ನಕ್ಕೆ ಆತ್ಂಡ್.
ಈ ಘಟನೆರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್. ಎದುರುಡು ಪೋವೊಂದು ಇತ್ತಿನ ಒಮ್ನಿ ಕಾರ್ ದ ಡ್ರೈವರ್ ಒರಾನೆ ಬ್ರೇಕ್ ಪಾಡಿರ್ನೆದಾವೆ ಪಿರವುಡು ಬರೊಂದು ಇತ್ತಿನ ಗಾಡಿಲು ಒಂಜೆಕ್ಕೊಂಜಿ ಗುದ್ದೊಂದುಂಡು. ರ್ನೆದಾವೆರ ಮಾತ ಕಾರ್ ದ ಎದುರುಡು ನಕ್ಕೆ ಆತ್ಂಡ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಚಂಪಾಷಷ್ಠಿ ಜಾತ್ರಾ ಮಹೋತ್ಸವದ ಪ್ರಯುಕ್ತ ಮಾರ್ಗಶಿರ ಶುದ್ಧ ಸಪ್ತಮಿದ ದಿನವಾಯಿನ ಅಂಗಾರೆ ಕಾಂಡೆ ಕುಮಾರಾಧಾರಾತುದೆಟ್ಟ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತ ಉಚ್ಚಯ ಸಂಪನ್ನ ಆಂಡ್.
ದೇವಲ್ಯದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಸೀತಾರಾಮ ಎಡಪಡಿತ್ತಾಯ ಅವಭೃತ ಉಚ್ಚಯದ ಧಾರ್ಮಿಕ ವಿಧಿವಿಧಾನ ನಡಪಾದ್ ಕೊರಿಯೆರ್. ಅರ್ಚಕೆರ್ ವೇದಮೂರ್ತಿ ರಾಜೇಶ್ ನಡ್ಯಂತಿಲ್ಲಾಯೆರ್ ಬೊಕ್ಕ ವೇದಮೂರ್ತಿ ಸತ್ಯನಾರಾಯಣ ನೂರಿತ್ತಾಯೆರ್ ಉತ್ಸವದ ವೈದಿಕ ವಿಧಿ ವಿಧಾನಡ್ ಸಹಕರಿಸಾಯೆರ್. ಭಕ್ತೆರ್ ಶ್ರೀ ದೇವೆರ್ನ ಅವಭೃತ ಸ್ನಾನಡ್ ಪಾಲ್ ಪಡೆದ್ ಪುಣ್ಯ ಸ್ನಾನ ಮಲ್ತೆರ್. ಕಾಂಡೆ ದೇವಸ್ಥಾನದ ದ್ವಾದಶಿ ಮಂಟಪಡ್ ಓಕುಳಿ ಪೂಜೆ ಬೊಕ್ಕ ಓಕುಳಿ ಚೆಲ್ಲಾಟ ನೆರವೇರಿಸಾಯೆರ್. ಬೊಕ್ಕ ದೇವೆರೆಗ್ ಓಕುಳಿ ಸಮರ್ಪಣೆಯಾದ್ ಭಕ್ತಾದಿಲೆಗ್ ಓಕುಳಿ ಪ್ರೋಕ್ಷಣೆ ಬೊಕ್ಕ ಓಕುಳಿ ಚೆಲ್ಲಾಟ ನಡತ್ಂಡ್.
ಕುಮಾರಧಾರೆದ ಮತ್ಸ್ಯತೀರ್ಥದ ಶ್ರೀ ದೇವೆರ್ನ ಜಳಕದ ಗುಂಡಿರ್ದ್ ದೇವೆರ್ನ ಅವಭೃತೋತ್ಸವ ನಡತ್ಂಡ್. ಕ್ಷೇತ್ರ ಪುರೋಹಿತೆರ್ ಮದುಸೂಧನ ಕಲ್ಲೂರಾಯ ನೇತೃತ್ವಡ್ ಪುರೋಹಿತೆರ್ ಮಂತ್ರಘೋಷ ನಡಪಾದ್ ಕೊರಿಯೆರ್. ಈ ಪೊರ್ತುಡು ಶ್ರೀ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನರಾಂ ಸುಳ್ಳಿ, ಕಾರ್ಯ ನಿರ್ವಹಣಾಧಿಕಾರಿ ಡಾ|ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ವನಜಾ.ವಿ.ಭಟ್, ಪ್ರಸನ್ನ ದರ್ಬೆ, ಪಿಜಿಎಸ್‌ಎನ್ ಪ್ರಸಾದ್, ಶ್ರೀವತ್ಸ ಬೆಂಗಳೂರು, ಶೋಭಾ ಗಿರಿಧರ್, ಮನೋಹರ ರೈ, ಲೋಕೇಶ್ ಮುಂಡುಕಜೆ,ಬ್ರಹ್ಮರಥ ದಾನಿಲೆಡ್ ಒರಿ ಆಯಿನ ಉದ್ಯಮಿ ಅಜಿತ್ ಶೆಟ್ಟಿ, ಮಾಸ್ಟರ್ ಪ್ಲಾನ್ ಮೇಲುಸ್ತುವಾರಿ ಸಮಿತಿ ಸದಸ್ಯೆರ್ ಪವನ್ ಎಂ.ಡಿ ದೇವಲ್ಯದ ಸಿಬ್ಬಂದಿಲು, ಭಕ್ತೆರ್ ಇತ್ತೆರ್. ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತೋತ್ಸವದ ಪೊರ್ತುಡು ಕ್ಷೇತ್ರದ ಆನೆ ಯಶಸ್ವಿ ಮಾತೆರ್ನ ಒಟ್ಟಿಗೆ ನೀರಾಟ ಗೊಬ್ಬುದು ಕುಷಿ ಪಡೆಯೆರ್. ಡಿ.24 ತಾನಿ ಮಾರ್ಗಶಿರ ಶುದ್ಧ ದ್ವಾದಶಿದಾನಿ ಕೊಪ್ಪರಿಗೆ ಜಪ್ಪುನ ಒಟ್ಟಿಗೆ ವಾರ್ಷಿಕ ಚಂಪಾಷಷ್ಠಿ ಜಾತ್ರೆ ಮುಕ್ತಾಯ ಆವೆರೆ ಉಂಡು.
ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಾಲಯದ ಅನ್ನದಾನಗ್ ತೆಲಂಗಾಣದ ಸಚಿವೆರ್ ಶ್ರೀನಿವಾಸ ರೆಡ್ಡಿ ಪನ್ಪುನಾರ್ ಒಂಜಿ ಕೋಟಿ ರೂ. ಪನವುನು ಅನ್ನದಾನಗ್ ಕೊರ್ದು ಪರಕೆ ಸಂದಾಯೆರ್. ತನ್ನ ಮಗಲ್ ನ ಮದಿಮೆಗಾದ್ ಮಲ್ತಿನ ಪ್ರಾರ್ಥನೆ ಫಲಿಸಾಯಿನ ಕಾರಣ ಈ ಸೇವೆ ಸಂದೈತ ಮಲ್ದೆರ್.
ಸಚಿವೆರ್ ಶ್ರೀನಿವಾಸ ರೆಡ್ಡಿ ಕುಟುಂಬ ಸಮೇತ ಶ್ರೀ ಕ್ಷೇತ್ರಗ್ ಬತ್ತ್ ದ್ ಅಪಾರ ಭಕ್ತಿ ತೊಜಪಾದೆರ್. ಈ ಪೊರ್ತುಡು ಅರೆನ ಒಟ್ಟಿಗೆ ಮಗಲ್, ಮರ್ಮಯೆ, ಅಣ್ಣೆ, ಬೊಕ್ಕ ತಿರುಪತಿದ ಪ್ರೊಫೆಸರ್ ಗಣಪತಿ ಭಟ್ ಇತ್ತೆರ್.
ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನ್ ರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾl ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಪಿ.ಜಿ.ಎಸ್.ಎನ್ ಪ್ರಸಾದ್, ಪ್ರಸನ್ನ ದರ್ಬೆ, ಶ್ರೀವತ್ಸ, ಲೋಕೇಶ್ ಮುಂಡಕಜೆ, ಶೋಭಾ ಗಿರಿಧರ್, ವನಜಾ ಭಟ್ ಮಾತ ಒಟ್ಟಿಗೆ ಇತ್ತ್ ದ್ ಚೆಕ್ ಹಸ್ತಾಂತರ ಮಲ್ತೆರ್.
ಎತ್ತಿನಹೊಳೆ ಯೋಜನೆ ಪರೀಕ್ಷೆ ಮಲ್ಪುನಗ ಸುಮಾರ್ ಕಡೆಟ್ಟ್ ಕುಡ ಜಲ ಸ್ಫೋಟ ಆತ್ಂಡ್ !
ಹೆಬ್ಬಸಾಲೆದ ದೇಖ್ಲಾ ಗ್ರಾಮಡ್ ಪೈಪ್ ಪುಡಾದ್ ಮಸ್ತ್ ಪ್ರಮಾಣದ ನೀರ್ ಜತ್ತ್ ಬೈದಿ ನೆರ್ದಾವರ ಕೈತಲ್ ದಕ್ಲೆನ ಇಲ್ಲಗ್ ನೀರ್ ಪೊಗ್ಗುದುಂಡು.
ಪೈಪ್ ರ್ದ್ ಮಸ್ತ್ ಪ್ರಮಾಣದ ನೀರ್ ಪಿದಯಿ ಬತ್ತಿರ್ನೆದಾವೆರ ಮಾರ್ಗದ ಬರಿತ್ತ ಇಲ್ಲ್ ಗ್ ತೊಂದರೆ ಆತ್ಂಡ್. ಅತ್ತಂದೆ ಮಾರ್ಗಗ್ ನೀರ್ ಪೊಗ್ಗುದು ಕೆಸರಾತ್ಂಡ್.
ರಡ್ಡ್ ವಾರದ ಪಿರವು ಹಾರ್ಲೆ ಕೂಡುದ ಕೈತಲ್ ಪೈಪ್ ಲೈನ್ ಪುಡಾದ್ ನೀರ್ ಪಿದಯಿ ಬತ್ತ್ ದ್ ಮಸ್ತ್ ತೊಂದರೆ ಆತ್ಂಡ್. ಇಂಚಾದ್ ಕೋಟಿ ಕೋಟಿ ಕರ್ಚಿ ಮಲ್ತಿನ ಎತ್ತಿನಹೊಳೆ ಯೋಜನೆ ಇಡೇಗ್ ಉಂತುನ ಲಕ್ಷಣ ತೋಜೊಂದು ಉಂಡು ಪಂದ್ ಜನಕುಲು ಪನೊಂದುಲ್ಲೆರ್.
ಕಳಿಯ: ಗೇರುಕಟ್ಟೆದ ಕಳಿಯ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಆಡಳಿತ ಮಂಡಳಿ ನಿರ್ದೇಶಕೆರೆನ ವೋಟು ಡಿ.19 ಕ್ಕ್ ಸೊಸೈಟಿ ಸಭಾಂಗಣಡ್ ನಡತ್ಂಡ್.
ಈ ವೋಟುಡು ಬಿಜೆಪಿ ಬೆಂಬಲವಾದ್ ಉಂತಿನ ಸಹಕಾರಿ ಭಾರತಿ ಅಭ್ಯರ್ಥಿ 12 ಟ್ಟ್ 12 ಜನಲ ಗೆಂದ್ ದೆರ್.
ಮಾಜಿ ಗುರ್ಕಾರೆ ವಸಂತ ಮಜಲು, ಹರಿದಾಸ್ ಪಡಂತ್ತಾಯ, ಕುಶಾಲಪ್ಪ ಗೌಡ, ಗೋಪಾಲ ಬನ, ಬಾಲಕೃಷ್ಣ ಗೌಡ ಬಿರ್ಮೊಟ್ಟು, ಲೋಕೇಶ್ ನಾಳ, ಶೇಖರ್ ನಾಯ್ಕ, ಉದಿತ್ ಕುಮಾರ್, ರಾಜಪ್ರಕಾಶ್ ಶೆಟ್ಟಿ, ಮಮತಾ ಆಳ್ವಾ, ಚಂದ್ರಾವತಿ, ಕೇಶವ ಪೂಜಾರಿ ಗೆಂದಿನಕುಲು.
ಪ್ರಕಾಶ್, ರಮೇಶ ಗೌಡ, ನೀನಾ ಕುಮಾರ್, ನೇವಿಲ್ ಮೊರಸ್., ಲಕ್ಷ್ಮಣ್ ನಾಯ್ಕ, ಕೇಶವತಿ, ಕೇಶವ ಪೂಜಾರಿ ನಾಳ, ಮರಿಟಾ ಪಿಂಟೊ, ಪೌಲಿನ್ ರೆಗೋ, ರೀತಾ ಪಿ. ಬೊಕ್ಕ ಹರೀಶ್ ಕುಮಾರ್ ಕಾಂಗ್ರೆಸ್ ಬೆಂಬಲಡ್ ವೋಟು ಉಂತಿನಕುಲು.
ಕೇರಳದ ತ್ರಿಶೂರ್ ಡ್ ಜ.5-9 ಮುಟ್ಟ ನಡಪುನ 7ನೇ ಅಂತರಾಷ್ಟ್ರೀಯ ಚಲನ ಚಿತ್ರೋತ್ಸವಗ್ ಇಂಚಿಪ್ಪ ಬುಡುಗಡೆ ಆಯಿನ ತುಳುತ್ತ ಸುರುತ್ತ ಸಂಶೋಧನಾತ್ಮಕ ಸಾಕ್ಷ್ಯಚಿತ್ರ “ಪುರ್ಸ ಕಟ್ಟುನೆ: ಇನಿ-ಕೋಡೆ- ಎಲ್ಲೆ” ಆಯ್ಕೆ ಆತ್ಂಡ್.
ವಿಕಿಪೀಡಿಯ ಫೌಂಡೇಶನ್ ತಯಾರ್ ಮಲ್ತಿನ ಈ ಸಾಕ್ಷ್ಯಚಿತ್ರದ ನಿರ್ಮಾಣನ್ ಭರತೇಶ ಅಲಸಂಡೆಮಜಲು ಬೊಕ್ಕ ಡಾ.ವಿಶ್ವನಾಥ ಬದಿಕಾನ ಮಲ್ದೆರ್. ಡಾ.ಸುಂದರ ಕೇನಾಜೆ ಚಿತ್ರಕತೆ ಬರೆದ್ ನಿರ್ದೇಶನ ಮಲ್ದೆರ್.
ಭಾರತದ ಬೇತೆ ಬೇತೆ ಭಾಷೆಲೆಡ್ ಆಯ್ಕೆ ಆಯಿನ 70 ಸಾಕ್ಷ್ಯಚಿತ್ರ ಬೊಕ್ಕ ಜಗತ್ತ್ ದ ಬೇತೆ ಬೇತೆ ದೇಶಲೆರ್ದ್ ಆಯ್ಕೆ ಆಯಿನ 310 ಚಲನ ಚಿತ್ರಲು ಈ ಚಿತ್ರೋತ್ಸವಡ್ ಪ್ರದರ್ಶನ ಆವೆರೆ ಉಂಡು. ಅವೆಟ್ಟ್ ತುಳು ಭಾಷೆದ ಜಾನಪದ ವಿಭಾಗಡ್ ಈ ಸಾಕ್ಷ್ಯಚಿತ್ರನ್ ಆಯ್ಕೆ ಮಲ್ದೆರ್. ನೆತ್ತ ವಿಶೇಷ ದಾದ ಪಂಡ ತುಳು ಭಾಷೆದ ಸುರುತ್ತ ಸಾಕ್ಷ್ಯಚಿತ್ರವಾದ್ ಆಯ್ಕೆ ಆತ್ಂಡ್.
ಮಧ್ಯಕಾಲೀನ ಕರ್ನಾಟಕದ ರಹಸ್ಯ ತಾಂತ್ರಿಕ ಪಂಥಲೆನ ಪ್ರಭಾವರ್ದ್ ಇತ್ತೆಲ ದಕ್ಷಿಣ ಕನ್ನಡ ಜಿಲ್ಲೆದ ಕೆಲವೊಂಜಿ ಭಾಗಡ್ ಇಪ್ಪುನ ಒಂಜಿ ಮಹತ್ವದ ನಲಿಕೆನೇ “ಪುರ್ಸ ಕಟ್ಟುನ”. ಬೊಲ್ತೇರ್ ತಾಲೂಕ್ ದ ಕುದುರೆಮುಖ ಘಟ್ಟದ ತಿರ್ತ ಭಾಗಡ್ ಇತ್ತೆಲ ಇಪ್ಪುನ ಈ ನಲಿಕೆ ಸುಗ್ಗಿ ತಿಂಗೊಲ್ದ ಪುಣ್ಣಮೆದ ದಿನಟ್ಟ್ ನಡಪುಂಡು.
ತುಳುಭಾಷೆನ್ ಪಾತೆರುನ ಸುಮಾರ್ ಜನಾಂಗಲು ಒಟ್ಟು ಸೇರ್ದ್ ನಡಪಾವುನ ಈ ನಲಿಕೆನ್ ಮೂಲತಃ ಗೌಡ ಸಮುದಾಯದಕುಲು ನಡಪಾವೊಂದು ಬೈದೆರ್. ಆಚರಣೆ, ಮನರಂಜನೆ, ನಂಬಿಕೆ, ವಿಡಂಬನೆ ಬೊಕ್ಕ ಸಮನ್ವಯದ ಭಾಗವಾದ್ ನಡಪುನ ಈ ನಲಿಕೆದ ಒಳತಿರ್ಲ್ ನೆಟ್ಟ್ ಉಂಡು. ಒಟ್ಟು 40 ನಿಮಿಷದ ಈ ಸಾಕ್ಷ್ಯಚಿತ್ರ ತುಳುನಾಡ್ ಡ್ ಇಪ್ಪುನ ತಾಂತ್ರಿಕ ಪಂಥ ಬೊಕ್ಕ ಜನಪದ ನಲಿಕೆಗ್ ಸಂಬಂಧಪಟ್ಟಿನವು ಆತ್ಂಡ್. ತುಳುನಾಡ್ ಘಟನಾವಳಿ ಬೊಕ್ಕ ವಿದ್ವಾಂಸೆರೆನ ವಿಶ್ಲೇಷಣೆದೊಟ್ಟಿಗೆ ಮೈಸೂರ್ ದ ಕನ್ನಡಿ ಕ್ರಿಯೇಷನ್ ತಯಾರ್ ಮಲ್ತಿನ ಈ ಸಾಕ್ಷ್ಯಚಿತ್ರ ಯೂಟ್ಯೂಬ್ ಬೊಕ್ಕ ವಿಕಿಮೀಡಿಯ ಕಾಮನ್ಸ್ ಮುಖೇನ ತೂಪುನಕ್ಲೆನ ಮೆಚ್ಚುಗೆಗ್ ಪಾತ್ರ ಆತ್ಂಡ್.
ಆಸ್ಟ್ರೇಲಿಯಾ ಸ್ಟಾರ್ ಕ್ರಿಕೆಟರ್ ಪ್ಯಾಟ್ ಕಮಿನ್ಸ್ ನ್ ಸನ್ ರೈಸರ್ಸ್ ಹೈದರಾಬಾದ್ ಟೀಮ್ ದಕುಲು ಬಿಡ್ ಡ್ 20.50 ಕೋಟಿ ರೂ.ಗ್ ದೆತೊಂದೆರ್.
ಕಮಿನ್ಸ್ ನ್ ಎಚ್ಚ ಬಿಲೆಕ್ಕ್ ದೆತೊನಿಯೆರೆ ಚೆನ್ನೈ ಸೂಪರ್ ಕಿಂಗ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗ್ಲೂರು, ಸನ್ ರೈಸರ್ಸ್ ಹೈದರಾಬಾದ್ ಬೊಕ್ಕ ಬೊಂಬೈ ಇಂಡಿಯನ್ಸ್ ದುಂಬು ಬತ್ತ್ ದ್ ಇತ್ತ್ಂಡ್.
ಉಂದು ಐಪಿಎಲ್ ಇತಿಹಾಸಡೇ ಕ್ರಿಕೆಟರ್ ಒರಿಯಗ್ ತಿಕಿನ ಮಲ್ಲ ಸಂಭಾವನೆ. ನೆರ್ದ್ ದುಂಬು ಮಲ್ಲ ಬಿಲೆಕ್ಕ್ ಏಲಂ ಆಯಿನ ದಾಖಲೆ ಸ್ಯಾಮ್ ಕರನ್ ನ ಪುದರ್ ಡ್ ಇತ್ತ್ಂಡ್. ಇತ್ತೆ ಕಮಿನ್ಸ್ ಗ್ 20.50 ಕೋಟಿ ರೂ. ಕೊರ್ಪುನ ಮುಖೇನ ಸನ್ ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿ ಪೊಸ ಇತಿಹಾಸ ನಿರ್ಮಾಣ ಮಲ್ದ್ಂಡ್.
ಕೇರಳಡ್ ಕೋವಿಡ್ 19 ಕೇಸ್ ವರದಿ ಆವೊಂದು ಇಪ್ಪುನ ನಿಲೆಟ್ಟ್ ಕರ್ನಾಟಕಡ್ ಅಗತ್ಯ ಮುಂಜಾಗ್ರತೆ ಬೊಕ್ಕ ಪೂರ್ವಭಾವಿ ಕ್ರಮನ್ ಪಾಲನೆ ನಿಲೆಟ್ಟ್ ಸರ್ಕಾರ ಪೊಸ ಮಾರ್ಗಸೂಚಿ (ಗೈಡ್ ಲೈನ್ಸ್) ಬುಡುಗಡೆ ಮಲ್ದ್ಂಡ್.
ಭಾರತ ಸರ್ಕಾರದ ಮಾರ್ಗಸೂಚಿ ಪ್ರಕಾರ, ಅನಗತ್ಯ ಪೋಡಿಗೆರ್ದ್ ಇತ್ತೆನೇ ಕೇರಳ ಬೊಕ್ಕ ತಮಿಳುನಾಡ್ ರಾಜ್ಯಗ್ ಸೇರ್ದಿನ ಕರ್ಮಾಟಕದ ಗಡು ಜಿಲ್ಲೆಡ್ ನಿರ್ಬಂಧ ಪಾಡುನ ಅವಶ್ಯಕತೆ ಇಜ್ಜಿ.
•ಈ ಗಡಿ ಜಿಲ್ಲೆಡ್ ಎಚ್ಚರಿಕೆಡ್ ಪರೀಕ್ಷೆನ್ ನಡಪಾವುನೇ ಬೊಕ್ಕ ವರದಿ ಸಂದಾವೊನೇ ಅಗತ್ಯ ಉಂಡು.
•ಸರ್ಕಾರಿ, ಖಾಸಗಿ ಬೊಕ್ಕ ವೈದ್ಯಕೀಯ ಕಾಲೇಜ್ ಆಸ್ಪತ್ರೆಡ್ ಮಾತ SARI ಕೇಸ್ ಬೊಕ್ಕ 20 ILI ಕೇಸ್ ಲೆಡ್ ಕೋವಿಡ್-19 ಪರೀಕ್ಷೆಗ್ ಸೇರ್ಸಾದ್ಂಡ್.
ವಾ ಸೀಕ್ ಇತ್ತಿನಕ್ಲೆನ್ WGS (Whole genome sequencing) ಪರೀಕ್ಷೆಗ್ ಸೇರ್ಸಾವೊಡು:
•ಅಂತರಾಷ್ಟ್ರೀಯ ಪ್ರಯಾಣದ ನಿಲೆಟ್ಟ್ ಕೋವಿಡ್-19 ಸೋಂಕುದ ಲಕ್ಷಣ ಇತ್ತಿನಕ್ಲೆನ್,
ಗುಂಪು ಗುಂಪಾದ್ ಒಟ್ಟಾಪಿನ ಲೇಸ್ ಅತ್ತಂಡ ಎಚ್ಚ ಕೇಸ್ ಬೊಕ್ಕ ಸಾವು ವರದಿ ಆಪುನ ಪೋಕಲ್ ಔಟ್ ಬ್ರೇಕ್ ದ ಪೊರ್ತುಡು ಅಗತ್ಯ ಸಂಖ್ಯೆದ ಮಾದರಿನ್ WGS ಪರೀಕ್ಷೆಗ್ ಕಡಪಾವೊಡು.
•ತೀವ್ರ ರೋಗಲಕ್ಷಣ ಇಪ್ಪುನಕ್ಲೆನ್, ಆಸ್ಪತ್ರೆಗ್ ದಾಖಲಾಯಿನ ಕೇಸ್, SARI ಕೇಸ್ ಬೊಕ್ಕ ಸುದೀರ್ಘ ಅವಧಿ ಮುಟ್ಟ ಆಸ್ಪತ್ರೆಡ್ ದಾಖಲಾಯಿನ ಕೇಸ್.
•ಕೋವಿಡ್-19 ಕುಡ ಸೀಕ್ ಬತ್ತಿನಕುಲು,
•ಕೋವಿಡ್-19 ಇಂಜೆಕ್ಷನ್ ರಡ್ಡ್ ಡೋಸ್ ವ್ಯಾಕ್ಸಿನ್ ದೆತೊನ್ನ ಬೊಕ್ಕಲ ಕೋವಿಡ್-19 ಸೀಕ್ ಬತ್ತಿನಕುಲು,
ಕೋವಿಡ್-19 ಸಾವುದ ಕೇಸ್.
ಸರ್ಕಾರಿ ಬೊಕ್ಕ ಖಾಸಗಿ ಆಸ್ಪತ್ರೆಡ್ ವರದಿ ಆವೊಂದು ಇಪ್ಪುನ 25 ರ್ದ್ ಕಮ್ಮಿ Ct value ಇಪ್ಪುನ ಮಾದರಿನ್ (ಅಂತರಾಷ್ಟ್ರೀಯ ಪ್ರಯಾಣದ ಹಿನ್ನೆಲೆಡ್ ಇಪ್ಪುನಕ್ಲೆನ್ ಬುಡ್ದು) BMC&RJ ಬೆಂಗ್ಲೂರುಗ್ WGS ಪರೀಕ್ಷೆಗ್ ಕಡಪಾವೊನ ದಿಟ್ಟಿಡ್ ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಅಗತ್ಯ ಸಮನ್ವಯನ್ ಒಯಿಸೊನೊಡು.
ಅಂಚೆನೆ ನನ ಬರ್ಪುನ ದಿನಟ್ಟ್ ಕೋವಿಡ್-19 ಕೇಸ್ ದ ಸಂಖ್ಯೆಡ್ ಎಚ್ಚಾಂಡ, ಪರಿಸ್ಥಿತಿನ್ ಸಮರ್ಪಕವಾದ್ ನಿಭಾಯಿಸೊನ ದಿಟ್ಟಿಡ್ ರಾಜ್ಯದ ಮಾತ ಸರ್ಕಾರಿ ಬೊಕ್ಕ ಖಾಸಗಿ ಆಸ್ಪತ್ರೆಲೆನ ಕಾರ್ಯಾಚರಣೆದ ತಯಾರಿನ್ ನಿಘಂಟ್ ಮಲ್ತೊನ್ನೇ ಅಗತ್ಯ ಆತ್ಂಡ್. ಈ ದಿಟ್ಟಿಡ್ ಅರೆ-ಸರ್ಕಾರಿ ಪತ್ರಡ್ ತೆರಿನ ಮಾನದಂಡನ್ ಗಮನಡ್ ದೀದ್ ಸರ್ಕಾರಿ ಬೊಕ್ಕ ಖಾಸಗಿ ಆಸ್ಪತ್ರೆಲು ಡಿ.3-4ನೇ ವಾರದೊಲಯಿ ಅಣುಕು ಪ್ರದರ್ಶನನ್ ಮುಗಿಪೆರೆ ಸೂಚನೆ ಕೊರ್ತುಂಡು.
ಒಟ್ಟಾರೆಯಾದ್ ಸಾರ್ವಜನಿಕೆರೆನ ಆರೋಗ್ಯದ ಹಿತದೃಷ್ಟಿರ್ದ್ ಈ ಮಾತ ಅಂಶಲೆನ ಪಾಲನೆನ್ ಮಲ್ಪರೆ ಬಿಬಿಎಂಪಿ ಬೊಕ್ಕ ಜಿಲ್ಲಾಡಳಿತ ಸೂಚನೆ ಕೊರ್ತುಂಡು ಪಂದ್ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸೇವೆದ ಆಯುಕ್ತೆರ್ ರಣ್ ದೀಪ್ ಡಿ ಪ್ರಕಟಣೆಡ್ ತೆರಿಪಾದೆರ್.
ಶಿಶಿಲ: ಕೋಟೆ ಬಾಗಿಲು ನಿವಾಸಿ ಸುರೇಶ್ ಪನ್ಪುನಾಯೆ ಬೊಡೆದಿ ಬೋಕ್ಕ ಮಗಲೆನ ಮಿತ್ತ್ ಮಾರಣಾಂತಿಕ ಪೆಟ್ಟ್ ಮಲ್ತಿನ ಘಟನೆ ಡಿ.18 ಕ್ಕ್ ನಡತ್ಂಡ್.
ಸುರೇಶ್ ಪನ್ಪುನಾಯೆ ತನ್ನ ಬೊಡೆದಿನ ಮೋನೆಗ್ ಚುಚ್ಚಿದ್ ಮಾಸ ದೆತ್ತ್ ದೆ, ಅತ್ತಂದೆ ಕಣ್ಣ್ ಗ್ ಕೋಲ್ ಡ್ ಕುಟ್ಟುದು ಎಡತ್ತ ಕಣ್ಣ್ ಗ್ ಪೆಟ್ಟ್ ಮಲ್ದೆ. ಬೊಕ್ಕ ಮಗಲೆಗ್ ತರೆಕ್ಕ್ ಹಾಕ್ ದೆ. ಬೊಕ್ಕ ಅಪ್ಪೆ ಮಗಲ್ ರಡ್ಡ್ ಜನಲ ತಪ್ಪಾವೊಂದು ಕೈತಲ್ ದಕ್ಲೆಡ ಬತ್ತ್ ದ್ ಸಕಾಯ ಕೇಂದೆರ್. ಕೂಡ್ಲೆ ಸ್ಪಂದಿಸಾಯಿನ ಕೈತಲ್ ದಕುಲು ಆಂಬ್ಯುಲೆನ್ಸ್ ಸಹಾಯರ್ದ್ ಉಜಿರೆ ಎಸ್.ಡಿ.ಎಂ ಆಸ್ಪತ್ರೆಗ್ ಮೊಕ್ಲೆನ್ ದಾಖಲ್ ಮಲ್ದೆರ್.
ಈ ಘಟನೆದ ಬಗೆಟ್ಟ್ ಧರ್ಮಸ್ಥಳ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್, ಆಸ್ಪತ್ರೆಗ್ ಪೋದು ಘಟನೆದ ಬಗೆಟ್ಟ್ ಪೊಲಬು ಪಡೆವೊಂದು ಉಲ್ಲೆರ್.
ಮೀರಾರೋಡ್ : ಒಡಿಪುದ ಅಷ್ಟ ಮಠಟ್ಟ್ ಒಂಜಿ ಆಯಿನ ಪಲಿಮಾರು ಮಠತ್ತ ಶ್ರೀ ವಿದ್ಯಾಧೀಶ ತೀರ್ಥ ಸ್ವಾಮೀಜಿನ ಪ್ರೇರಣೆದಂಚ ಪಲಿಮಾರು ಮಠದ ಬಾಲಾಜಿ ಸನ್ನಿಧಿಡ್ ಸುಬ್ರಹ್ಮಣ್ಯ ಷಷ್ಠಿ ಉಚ್ಚಯೊನ್ ಧಾರ್ಮಿಕ ಕಾರ್ಯಕ್ರಮದೊಟ್ಟಿಗೆ ಭಾರಿ ಶ್ರದ್ಧಾಭಕ್ತಿಡ್ ಆಚರಣೆ ಮಲ್ತೆರ್.
ಕಾಂಡೆ 8.30 ರ್ದ್ ಪುಣ್ಯಾಹವಾಚನ ನವಕ ಪ್ರಧಾನ ಹೋಮ, ಸಾಮೂಹಿಕ ಅಶ್ಲೇಷ ಬಲಿ ,ಸುಬ್ರಹ್ಮಣ್ಯ ದೇವೆರೆಗ್ ಕಲಶಾಭಿಷೇಕ, ತನು-ತಂಬಿಲ, ಮಹಾಪೂಜೆ ಬೊಕ್ಕ ಅನ್ನಸಂತರ್ಪಣೆ ನಡಪೆರೆ ಉಂಡು.
ಬಾಲಾಜಿ ಸನ್ನಿಧಿ ಬೊಕ್ಕ ಮಠದ ಪ್ರಭಂದಕೆರಾಯಿನ ಸಚ್ಚಿದಾನಂದ ರಾವ್ , ಟ್ರಸ್ಟಿ ಬೊಕ್ಕ ಪ್ರದಾನ ಅರ್ಚಕೆರ್ ವಾಸುದೇವ ಉಪಧ್ಯಾಯೆರ್ನ ಪೌರೋಹಿತ್ಯಡ್ ಸುಬ್ರಹ್ಮಣ್ಯ ಷಷ್ಠಿದ ಪೂಜಾ ವಿಧಿಕ್ಲೆನ್ ಸಂತೋಷ್ ಭಟ್, ಗೋಪಾಲ್ ಭಟ್, ದೀಪಕ್ ಭಟ್ ಬೊಕ್ಕ ಶ್ರೀನಿವಾಸ್ ನಕ್ಷತ್ರಿ ಮಲ್ತೆರ್.
ಪಲಿಮಾರು ಮಠತ್ತ ಭಜನಾ ಸಮಿತಿದ ಸದಸ್ಯೆರ್, ಸಂಘ ಸಂಸ್ಥೆದ ಮಸ್ತ್ ಜನ ಬೊಕ್ಕ ಕರಮಚಂದ್ರ ಗೌಡ ಮೊಕುಲು ಮಾತ ಉಚ್ಚಯೊನು ಯಶಸ್ವಿ ಮಲ್ಪೆರೆ ಸಹಕಾರ ಮಲ್ತೆರ್.
ಸಾವಿರ ಸಂಖ್ಯೆಡ್ ಭಕ್ತೆರ್ ಪಾಲ್ ಪಡೆದ್ ಈ ಪುಣ್ಯ ಉಚ್ಚಯಡ್ ಪಾಲ್ ಪಡೆದ್ ಪ್ರಸಾದ ಸ್ವೀಕಾರ ಮಲ್ತೆರ್.
