ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 39ನೇ ಸಂಚಿಕೆ ಡಿ.25 ಕ್ಕ್ ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಡಿ.26 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಮೂಗಜ್ಜನ ಕೋಳಿ ಪಿಕ್ಚರ್ ಡ್ ಮೂಗನ ಪಾತ್ರಡ್ ಅಭಿನಯ ಮಲ್ತಿನ ಪಡೀಲ್
ಕುಡ್ಲ: ಕರ್ನಾಟಕ ಅಂತರಾಷ್ಟ್ರೀಯ ಚಲನಚಿತ್ರ ಅಕಾಡೆಮಿದ ಮುತಾಲಿಕೆಡ್ ಹುಬ್ಬಳ್ಳಿಡ್ ನಡತಿನ ಕರ್ನಾಟಕ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಡ್ ತುಳುನಾಡ ಅದ್ಭುತ ಕಲಾವಿದೆ ಕುಸಲ್ದರಸೆ ನವೀನ್ ಡಿ ಪಡೀಲ್ ಮೆರೆಗ್ ಅತ್ಯುತ್ತಮ ನಟ ಪ್ರಶಸ್ತಿ ತಿಕ್ ದ್ಂಡ್.
ರಾಷ್ಟ್ರಪ್ರಶಸ್ತಿ ಗೆಂದಿನ ಪಿಕ್ಚರ್ ‘ಜೀಟಿಗೆ’ ದ ಬೊಕ್ಕ ಸಂತೋಷ್ ಮಾಡ ಮೇರ್ ನಿರ್ದೇಶನ ಮಲ್ತಿನ ಸುರುತ್ತ ಅರೆಭಾಷೆ ಪಿಕ್ಚರ್ ಮೂಗಜ್ಜನ ಕೋಳಿ, ಈ ಪಿಕ್ಚರ್ ಡ್ ಮೂಗಜ್ಜನ ಪಾತ್ರಡ್ ನವೀನ್ ಡಿ ಪಡೀಲ್ ಮೇರ್ ಅಭಿನಯ ಮಲ್ದೆರ್. ಮೇರ್ ಇಡೀ ಪಿಕ್ಚರ್ ಡ್ ಒಂಜೇ ಒಂಜಿ ಪಾತೆರಂದೆ, ಕೋರಿನ್ ಮೋಕೆ ಮಲ್ಪುನ ಒರಟ್ ಅಜ್ಜನ ಪಾತ್ರ ಮಲ್ದೆರ್.
ಈ ಪಿಕ್ಚರ್ ನ್ ‘ನಮ್ಮಕನಸು ಪ್ರೊಡಕ್ಷನ್ಸ್‌’ ಪನ್ಪುನ ಬ್ಯಾನರ್ ಡ್ ಕೆ.ಸುರೇಶ್ ಮೇರ್ ನಿರ್ಮಾಣ ಮಲ್ದೆರ್. ರಾಷ್ಟ್ರಪ್ರಶಸ್ತಿ ಗೆಂದಿನ ಖ್ಯಾತ ಸಂಕಲನಕಾರೆ ಸುರೇಶ್ ಅರಸ್ ಪಿಕ್ಚರ್ ದ ಸಂಕಲನ ಮಲ್ದೆರ್. ಕಾಂತಾರ-2, ಸಲಾರ್ ದಂಚಿನ ಬಿಗ್ ಬಜೆಟ್ ಪಿಕ್ಚರ್ ಡ್ ಕೆಲಸ ಮಲ್ತಿನ ಖ್ಯಾತ ಮೇಕಪ್ ಮ್ಯಾನ್‌ ರಂಜಿತ್‌ ಅಂಬಾಡಿ ಮೇಕಪ್ ಮಲ್ದೆರ್. ಖ್ಯಾತ ಸಾಹಿತಿ ಸುಬ್ರಾಯ ಚೊಕ್ಕಾಡಿ ಸಾಹಿತ್ಯ ಬರೆತೆರ್. ಪಿ.ವಿಷ್ಣುಪ್ರಸಾದ್ ಛಾಯಾಗ್ರಾಹಕೆರಾತೆರ್. ಕಥಾಕಲ್ಪನೆ ವಿನೀತ್‌ ವಟ್ಟಂಕುಳತ್‌ ಮೇರೆನವು. ಚಿತ್ರಕಥೆ ಬೊಕ್ಕ ಸಂಭಾಷಣೆನ್ ಕಾದಂಬರಿಕಾರೆ ರಮೇಶ್ ಶೆಟ್ಟಿಗಾರ್ ಬರೆತೆರ್. ಈ ಪಿಕ್ಚರ್ ಗ್ ಸುಳ್ಯದ ಯುವ ಕವಯತ್ರಿ ರಮ್ಯಶ್ರೀ ನಡುಮನೆ ಮೇರ್ ಅರೆಭಾಷೆದ ಸಕಾಯ ಮಲ್ದೆರ್. ಹಿನ್ನೆಲೆ ಸಂಗೀತ ದೀಪಾಂಕುರನ್, ಪದ್ಯ ಅರುಣ್ ಗೋಪನ್, ಕಲಾ ನಿರ್ದೇಶನ ರಾಜೇಶ್ ಬಂದ್ಯೋಡ್, ವಸ್ತ್ರಾಲಂಕಾರ ಮೀರಾ ಸಂತೋಷ್ ಮಲ್ದೆರ್.
ಸಹ ನಿರ್ದೇಶಕೆರಾದ್ ಅವಿನಾಶ್ ರೈ ಕಾಸ್ರೋಡು, ಸಹಾಯಕ ನಿರ್ದೇಶಕೆರಾದ್ ರವಿ ವರ್ಕಾಡಿ, ಗಿರೀಶ್ ಸುಳ್ಯ ಬೊಕ್ಕ ಕಾರ್ಯ ನಿರ್ವಹಣೆನ್ ವಿಜಯ್ ಮಯ್ಯ ಮಲ್ದೆರ್. ಈ ಪಿಕ್ಚರ್ ಗ್ 23ನೇ ಯುಫ್ಎಂಸಿ ಗೋವಾ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಬೇಬಿ ಗೌರಿಕಾಗ್ ಉತ್ತಮ ಬಾಲನಟಿ ಪ್ರಶಸ್ತಿ, ಜಾಗರಣ್ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಉತ್ತಮ ನಿರ್ದೇಶಕ ಪ್ರಶಸ್ತಿ, ಫ್ರಾನ್ಸಿನ ಫೆಸ್ಟಿವಲ್ ಡೆ ಸಿನಿಮಾ ಡಿ ಸಿಫಾಲು, ಇಟಲಿದ ಗೋಲ್ಡನ್‌ ಫೆಮಿ ಫಿಲ್ಮ್‌ ಫೆಸ್ಟಿವಲ್ 2023, ಜಮ್ಮು ಕಾಶ್ಮೀರ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ 2023, ಸ್ಟೂಡೆಂಟ್‌ ವರ್ಲ್ಡ್‌ಇಂಪಾಕ್ಟ್‌ ಫೀಲ್ಮ್‌ ಫೆಸ್ಟಿವಲ್, ಬಿರಿಸಮುಂಡ ಚಿತ್ರೋತ್ಸವ, ತಮೀಝಗಂ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಬೆಸ್ಟ್ ಇಂಟರ್ ನ್ಯಾಷನಲ್ ಫಿಲಂ ಅವಾರ್ಡ್, ರೋಹಿಪ್ ಇಂಟರ್ ನಲ್ ನ್ಯಾಷನಲ್ ಫಿಲಂ ಫೆಸ್ಟಿವಲ್ ಡ್ special jury mention, UK ದ ಲಿಫ್ಟ್ ಆಫ್ ಗ್ಲೋಬಲ್‌ ನೆಟ್‌ವರ್ಕ್‌ ಚಲನಚಿತ್ರೋತ್ಸವ ಬೊಕ್ಕ ಭಾರತದ ಪ್ರತಿಷ್ಠಿತ ಫಿಲಂ ಫೆಸ್ಟಿವಲ್ ಆಯಿನ ಈ ಪಿಕ್ಚರ್ 29ನೇ ಕೊಲ್ಕತ್ತಾ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗ್ ಆಯ್ಕೆ ಆತ್ಂಡ್.
ಈ ಪಿಕ್ಚರ್ ಡ್ ಬಾಬೆಕ್ಕ ಪನ್ಪುನ ಬಾಲೆದ ಪಾತ್ರಡ್ ಕುಮಾರಿ ಗೌರಿಕಾ ನಟನೆ ಮಲ್ದೆರ್. ಬೊಕ್ಕದ ಪಾತ್ರಲಡ್ ಪುಗರ್ತೆದ ನಟೆ, ನಟಿಯೆರಾಯಿನ ಪ್ರಕಾಶ್ ತೂಮಿನಾಡು, ದೀಪಕ್ ರೈ ಪಾಣಾಜೆ, ರೂಪಶ್ರೀ ವರ್ಕಾಡಿ, ಸುಕನ್ಯ, ರಾಘವೇಂದ್ರ ಭಟ್, ಡಾ. ಜೀವನ್ ರಾಮ್‌ ಸುಳ್ಯ, ಕುಮಾರಿ ಸಾನಿಧ್ಯ ಬೊಕ್ಕ ಸುಮಾರ್ ಜೋಕುಲು ಅಭಿನಯ ಮಲ್ದೆರ್.
ಡಾ. ಜೀವನ್ ರಾಮ್‌ ಸುಳ್ಯ ನಿರ್ದೇಶನ ಮಲ್ತಿನ ಅಮರಸುಳ್ಯ ಸ್ವಾತಂತ್ರ್ಯ ಹೋರಾಟ 1837 ನಾಟಕದ ಕೆಲವೊಂಜಿ ದೃಶ್ಯಲ ಈ ಪಿಕ್ಚರ್ ಡ್ ಉಂಡು. ಅಂಚೆನೆ ಸುಳ್ಯ ಪೇಟೆ, ಕೇರ್ಪಳ, ಕುಡೆಕಲ್ಲು, ಪದ್ಮಶ್ರೀ ಗಿರೀಶ್ ಭಾರಧ್ವಜ್‌ ಮೇರ್ ನಿರ್ಮಾಣ ಮಲ್ತಿನ ತೂಗು ಸೇತುವೆ ಇಂಚ ಮ
ಸುಳ್ಯದ ಸುತ್ತಮುತ್ತ ಈ ಪಿಕ್ಚರ್ ದ ಶೂಟಿಂಗ್ ನಡತ್ಂಡ್. ಅತ್ತಂದೆ ಈ ಪಿಕ್ಚರ್ 2024 ಟ್ಟ್ ರಿಲೀಸ್ ಆಪುಂಡು ಪಂದ್ ನಿರ್ಮಾಪಕೆರ್ ಕೆ. ಸುರೇಶ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಕ್ರಿಸ್ಮಸ್ ಇಸೇಸ ಲೇಸ್ ಡಿ.25 ಸೋಮಾರ ಮಧ್ಯಾಹ್ನ 12.15 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಶೋಕಮಾತಾ ಇಗರ್ಜಿದ ಪ್ಯಾರಿಷ್ ಪ್ರಿಸ್ಟ್ ರೆ |ಫಾ| ಚಾರ್ಲ್ಸ್ ಮಿನೇಜಸ್ ಎಡ್ಡೆ ಸಂದೇಶ ಕೊರಿಯೆರೆ ಉಲ್ಲೆರ್. ಡಿ.25 ಕ್ಕ್ ಬಯ್ಯಗ್ 6.55 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಪ್ರಪಂಚದ ಮಾತ ಕಡೆರ್ದ್ಲಾ ಪ್ರತಿ ದಿನೊಲ ಸಾರರ್ದ್ ಎಚ್ಚ ಭಕ್ತೆರ್ ಬರ್ಪುನ ಪುಣ್ಯಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಗ್ ಭಕ್ತೆರೆನ ಅನುಕೂಲಗಾದ್ ಸರಿಯಾಯಿನ 24×7 ಆಸ್ಪತ್ರೆ ಸೇವೆಗಾದ್ ವಿಧಾನಸಭೆ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಗ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ|ರವಿ ಕಕ್ಕೆಪದವು ಮೇರ್ ಬಿನ್ನಾಪು ಸಂದಾಯೆರ್.
ಐತಾರ ಕುಕ್ಕೆ ಸುಬ್ರಹ್ಮಣ್ಯಗ್ ಬತ್ತಿನ ವಿಧಾನಸಭೆ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಮೆರೆಗ್ ಮುಲ್ಪದ ಇತ್ತೆದ ಆಸ್ಪತ್ರೆದ ಪರಿಸ್ಥಿತಿನ್ ವಿವರವಾದ್ ತೆರಿಪಾದ್ ಈ ಕ್ಷೇತ್ರಗ್ ಬರ್ಪುನ ಭಕ್ತೆರ್ ಆರೋಗ್ಯ ಸೇವೆಗಾದ್ ಕಷ್ಟ ಪಡೆಪುನ ಪರಿಸ್ಥಿತಿನ್ ತೆರಿಪಾಯೆರ್. ಬೊಕ್ಕ ಬಿನ್ನಾಪು ಸಂದಾಯೆರ್. ಬಿನ್ನಾಪುನ್ ಸ್ವೀಕಾರ ಮಲ್ತಿನ ಮಾಜಿ ಸ್ಪೀಕರ್ ಈ ಸರಕಾರದ ತೆರಿಪಾವೆ ಪಂದ್ ಪಂಡೆರ್.
ಈ ಪೊರ್ತುಡು ಸುಬ್ರಹ್ಮಣ್ಯ ಸೇವಾ ಸಹಕಾರಿ ಸಂಘದ ಒತ್ತು ಗುರ್ಕಾರೆ ಮಾದವ ದೇವರಗದ್ದೆ ಪಾಲ್ ಪಡೆದಿತ್ತೆರ್.
ಕಾರ್ಲ ತಾಲೂಕ್ ದ ಮುಂಡ್ಕೂರುದ ಮುಲ್ಲಡ್ಕ ನಾನಿಲ್ತಾರು ಕುಲಾಲ ಸಂಘ (ರಿ.) ದ ಮುತಾಲಿಕೆಡ್ ಸಹಕಾರಿ ಸಂಸ್ಥೆ ಆಯಿನ ಕುಂಭ ನಿಧಿ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿ ಸ್ಥಾಪನೆದ ಪಾಲ್ ಬಂಡವಾಳ ಸಂಗ್ರಹಣೆ ಬೊಕ್ಕ ಬಿನ್ನಾಪು ಪತ್ರ ಬುಡುಗಡೆ ಲೇಸ್ ಡಿ.24 ನಾನಿಲ್ತಾರು ಕುಲಾಲ ಭವನಡ್ ನಡತ್ಂಡ್.
ಸಂಘದ ಮಾಜಿ ಗುರ್ಕಾರೆ ಮಂಜಪ್ಪ ಮೂಲ್ಯ ಉದಿಪನ ಮಲ್ತ್ ದ್, ಪಾತೆರ್ದ್, ಸಂಘ ಸುಮಾರ್ 36 ವರ್ಷೊದಿಂಚ ಏಪಲ ಸಮಾಜಮುಖಿ ಲೇಸ್ ನ್ ಆಯೋಜನೆ ಮಲ್ತ್ ದ್ ಬರೊಂದು ಉಂಡು. ಇತ್ತೆ ಸಹಕಾರಿ ಸಂಸ್ಥೆ ಸ್ಥಾಪನೆ ಮಲ್ತ್ ದ್ ಸಮಾಜಗ್ ನನಾತ್ ಆರ್ಥಿಕ ಶಕ್ತಿನ್ ಕೊರ್ಪುನಂಚಿನ ಲೇಸ್ ನ್ ಆಯೋಜನೆ ಮಲ್ಪರೆ ಉಂಡು ಪಂಡೆರ್.
ಮುಖ್ಯ ಪ್ರವರ್ತಕೆರ್ ಕುಶ ಆರ್ ಮೂಲ್ಯ ಇನ್ನಾ ಪಾತೆರ್ದ್, ಸುಮಾರ್ ವರ್ಷೊದಿಂಚ ಸಹಕಾರಿ ಸಂಘ ಸ್ಥಾಪನೆ ಮಲ್ಪುನ ಉದ್ದೇಶಲು ಯೋಜನೆಲು ಪ್ರತಿ ಗ್ರಾಮಲೆನ ಜನಾಭಿಪ್ರಾಯನ್ ಸಂಗ್ರಹ ಮಲ್ತ್ ದ್ ಸದೃಢ ಆಯಿನ ಸೊಸೈಟಿ ರಚನೆಗ್ ಸಮಾಜದ ಮಾತ ಬಂಧುಲು ಸದಸ್ಯತ್ವನ್ ಪಡೆಯೆರೆ ಬಿನ್ನಾಪು ಮಲ್ತೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಸಂಘದ ಗುರ್ಕಾರೆ ಜಯರಾಮ್ ಕುಲಾಲ್ ಅಗರಟ್ಟ ಒಯಿಸ್ ದಿತ್ತೆರ್. ಸುಧಾಕರ್ ಕುಲಾಲ್ ಮುಂಡ್ಕೂರು, ಪ್ರಭಾಕರ್ ಇನ್ನಾ, ಸಂತೋಷ್ ಬೆಲ್ಮನ್ ಶಿಕ್ಷಕೆರ್ ಸುರೇಶ್ ಕುಲಾಲ್ ಕೆಮುಂಡೆಲ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಸಂಘದ ಮಹಿಳಾ ಗುರ್ಕಾರ್ದಿ ಪ್ರತಿಮಾ ಶ್ರೀಧರ್, ಸಹಾಯಕಿ ಆಶಾ ವರದರಾಜ್, ಯುವ ವೇದಿಕೆ ಗುರ್ಕಾರೆ ಲೋಕೇಶ್ ಕುಲಾಲ್ ಮುಂಡ್ಕೂರು, ಸೊಸೈಟಿ ಪ್ರವರ್ತಕೆರ್ ಜಗನ್ನಾಥ ಮೂಲ್ಯ ಬೆಳ್ಮಣ್, ಬೊಗ್ಗು ಮೂಲ್ಯ ಬೇಲಾಡಿ, ಗೋಪಾಲ್ ಮೂಲ್ಯ ಮುಲ್ಲಡ್ಕ, ಗಣೇಶ್ ಕುಲಾಲ್ ಬೋಳ, ಸುರೇಶ್ ಮೂಲ್ಯ ಕೆದಿಂಜೆ, ದೀಪಕ್ ಬೆಳ್ಮಣ್, ರಮಾನಂದ ಮೂಲ್ಯ ಬೆಳ್ಮಣ್, ಸುಗಂಧಿ ಬೋಳ ಶಂಕರ್ ಮೂಲ್ಯ ಇನ್ನಾ, ಅಶೋಕ್ ಕುಲಾಲ್ ಮುಂಡ್ಕೂರು ಪಾಲ್ ಪಡೆದಿತ್ತೆರ್.
ಶಿಕ್ಷಕೆರ್ ಶ್ರೀಕಾಂತ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ರಾಜೇಶ್ ಕುಲಾಲ್ ಸಾಂತೂರು ಸೊಲ್ಮೆ ಸಂದಾಯೆರ್.
ಕುಡ್ಲ: “ಎನ್ನ ಆದಾಯದ ಒಂಜಿ ಭಾಗನ್ ಸಮಾಜಗ್ ಮೀಸಲ್ ದೀದ್ ಅಶಕ್ತೆರ್ ಬೊಕ್ಕ ಆರ್ಥಿಕವಾದ್ ಕಷ್ಟ ಇಪ್ಪುನಕ್ಲೆಗ್ ಶಿಕ್ಷಣ, ಅರೋಗ್ಯ ಕೊರ್ಪಿನ ಉದ್ದೇಶಡ್ ಎಂ.ಆರ್.ಜಿ. ಗ್ರೂಪ್ ಮುಖೆನ ಪ್ರತಿವರ್ಷ ನೆರವು ಪಟ್ಟುನ ಕಾರ್ಯಕ್ರಮಗ್ ಚಾಲನೆ ಕೊರ್ತೆ ಉಲ್ಲ. ಸುರುಟ್ಟು 1 ಕೋಟಿ 25 ಲಕ್ಷ ರೂ. ನೆರವು ಕೊರ್ದು ಇತ್ತ. ಈ ಸರ್ತಿ 4 ಕೋಟಿ ರೂ. ನೆರವು ಕೊರಿಯೆರೆ ಎದುರು ಬೈದ. ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆದ ಮಾತ ಸಂಘ ಸಂಸ್ಥೆಲೆಗ್ ನೆತ್ತ ಅರ್ಜಿ ನಮೂನೆನ್ ಕಡಪಾದ್ ಪ್ರತೀ ಭಾಗರ್ದ್ 25 ದಾತ್ ಅರ್ಜಿನ್ ಸ್ವೀಕಾರ ಮಲ್ತ್ ಅವೆನ್ ಪರಿಶೀಲಿಸಾದ್ 2000 ಅರ್ಜಿಡ್ 1800 ಅರ್ಜಿಲೆನ್ ಸ್ವೀಕಾರ ಮಲ್ತ್ ದ. ಸಮಾಜಡ್ ಬೇನೆ ಪಡೆನಕುಲು ಅಶಕ್ತೆರೆಗ್ ನೆರವು ಕೊರ್ಪಿನ ಉದ್ದೇಶರ್ದ್ ಈ ಕಾರ್ಯಕ್ರಮ ದೀಯೊಂದ ಪಂದ್ ಎಂ.ಆರ್.ಜಿ. ಗ್ರೂಪ್ ಚೇರ್ ಮೆನ್ ಕೆ. ಪ್ರಕಾಶ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.
“ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ ಯೋಜನೆದ ನೆರವು ಪ್ರದಾನ ಕಾರ್ಯಕ್ರಮ ಡಿಸೆಂಬರ್ 25 ಬಯ್ಯಗ್ 3 ಗಂಟೆಗ್ ಕುಡ್ಲದ ಗೋಲ್ಡ್ ಫಿಂಚ್ ಸಿಟಿಟ್ ನಡಪೆರೆ ಉಂಡು. ಕಾರ್ಯಕ್ರಮಡ್ ಚಲನಚಿತ್ರ ನಟೆ, ನಿರ್ದೇಶಕೆರ್ ರಮೇಶ್ ಅರವಿಂದ್, ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಗುರ್ಕಾರ್ಲು ಡಾ.ಎಂ.ಮೋಹನ್ ಆಳ್ವ, ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಆಡಳಿತ ನಿರ್ದೇಶಕೆರ್ ಗೌರವ್ ಪಿ. ಶೆಟ್ಟಿ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.
ನೆರವು ಪಟ್ಟುನ ಲೇಸ್ ಡ್ 25 ಕೌಂಟರ್ ಇಪ್ಪುಂಡು. ಅಲ್ಪ ಫಲಾನುಭವಿಲು ತಮ್ಮ ಪುದರ್ ಪಂದ್ ಬೊಕ್ಕ ವಿತರಣೆ ಮಲ್ತಿನ ಟೋಕನ್ ತೊಜಪಾದ್ ಚೆಕ್ ದೆತೊನೊಲಿ ಪಂದ್ ಪಂಡೆರ್.
ಮಾನವೀಯ ನೆರವು:
ಬೆಂಗ್ಲೂರುಡು ಕಂಬುಲ ತೂದು ಊರುಗ್ ಪಿರ ಬನ್ನಗ ಆಕ್ಸಿಡೆಂಡ್ ಆದ್ ತೀರ್ ಪೋಯಿನ ಕುಟುಂಬದಕ್ಲೆಗ್ ಬೊಕ್ಕ ಗಾಯ ಆಯಿನಕ್ಲೆಗ್ ಮಾನವೀಯ ನಿಲೆಟ್ಟ್ ನೆರವು ಕೊರೊಂದು ಉಲ್ಲ ಪಂದ್ ಆರ್ ಪಂಡೆರ್.
ಕಾಪು ಶಾಲೆಡ್ ಶಿಕ್ಷಕೆರ್ನ ನೇಮಕ:
ಸಮಾಜ ಸೇವಾ ರತ್ನ ದಿ. ಕಾಪು ಲೀಲಾಧರ ಶೆಟ್ರ್ ನಡಪಾವೊಂದು ಇತ್ತಿನ ಶಾಲೆಡ್ ಶಿಕ್ಷಕರ ಕೊರತೆ ಇಪ್ಪುನೆದಾತ್ರ ಶಿಕ್ಷಕೆರ್ನ ನೇಮಕ ಮಲ್ತ್ ಖರ್ಚಿನ್ ಆರೇ ತೂವೊಂದಿನ ನಿಲೆಟ್ಟ್ ನನ ದುಂಬಗ್ ಶಿಕ್ಷಕೆರೆಗ್ ಸಂಬಳದ ಸಮಸ್ಯೆ ಆವೆರೆ ಬಲ್ಲಿ ಪಂದ್ ಬೊಕ್ಕ ಜೋಕುಲು ವಿದ್ಯಾ ವಂಚಿತ ಆವೆರೆ ಬಲ್ಲಿ ಪಂದ್ ಎಂದು ಈ ನೆರವು ಕೊರೊಂದು ಉಲ್ಲ ಪಂದ್ ತೆರಿಪಾಯೆರ್.
ಡಿಜಿಟಲ್ ಗ್ಯಾಪ್ ನಿವಾರಣೆ:
ಬಂಟ್ವಾಳದ ಒಂಜಿ ಶಾಲೆಗ್ ಕಂಪ್ಯೂಟರ್ ಕೊರ್ಪುನ ಮುಖೆನ ಅಲ್ಪದ ಜೋಕ್ಲೆನ್ ಕಂಪ್ಯೂಟರ್ ಸಾಕ್ಷರೆರಾದ್ ಮಲ್ಪುನ ಪ್ರಯತ್ನ ಮಲ್ತೊಂದು ಉಲ್ಲ.
ಶೌಚಾಲಯ ನೆರವು:
ಕಾಪು ಕೈಪುಂಜಾಲ್ ಒಡಿಪು ಶ್ರೀ ಪೇಜಾವರ ಮಠದ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಗುರ್ಕಾರ್ಲು ಆದ್ ಇಪ್ಪುನ ವಿದ್ಯಾ ಸಾಗರ ಎಜ್ಯುಕೇಶನ್ ಟ್ರಸ್ಟ್ ಶಾಲೆಡ್ ಶೌಚಾಲಯ ನಿರ್ಮಾಣ.
ಕ್ರೀಡಾ ಪ್ರೋತ್ಸಾಹ:
ಅಂತಾರಾಷ್ಟ್ರೀಯ ಮಟ್ಟಡ್ ದೇಶನ್ ಪ್ರತಿನಿಧಿಸಾಯಿನ ನಮ್ಮ ಜಿಲ್ಲೆದ ಕ್ರೀಡಾಳು ಆಯುಷ್ ಶೆಟ್ಟಿ ಅಮೆರಿಕಾಡ್ ನಡತ್ತಿನ ವಿಶ್ವ ಜ್ಯೂನಿಯರ್ ಚಾಂಪಿಯನ್ ಶಿಪ್ ಡ್ ಕಂಚ್ ದ ಪದಕ ಪಡೆಯೊಂದೆರ್. ವಿಶ್ವ ಚಾಂಪಿಯನ್ ಶಿಪ್ ಡ್ ಭಾರತದ ಪತ್ತನೇ ಶಟ್ಲರ್ ಬೊಕ್ಕ ವಿಶ್ವ ಚಾಂಪಿಯನ್ ಶಿಪ್ ಡ್ ಪದಕ ಪಡೆನ ಕರ್ನಾಟಕ ಸುರುತ ಶಟ್ಲರ್ ಅರ್ಜುನ್ ಶೆಟ್ಟಿ. ಅರೆಗ್ ನೆರವು ಕೊರೊಂದುಲ್ಲ
ಶೈಕ್ಷಣಿಕ ಸಾಧಕೆರೆಗ್ ವಿದ್ಯಾರ್ಥಿ ವೇತನ:
ಪಿ.ಯು.ಸಿ.ಡ್ 600/600 ಅಂಕ ದೆತ್ತೊನ್ನ ಅನನ್ಯ ಬೊಕ್ಕ ಎಸ್.ಎಸ್.ಎಲ್.ಸಿ.ಡ್ 625/625 ಅಂಕ ಪಡೆನ ವೀಕ್ಷಿತಾ ಮೊಕ್ಲೆಗ್ ಶೈಕ್ಷಣಿಕ ಸಾಧನೆಗಾದ್ ವಿದ್ಯಾರ್ಥಿ ವೇತನ ಕೊರೊಂದುಲ್ಲ.
ಪುರುಷೋತ್ತಮ ಭಂಡಾರಿ ಲೇಸ್ ದ ಸುದಾರಿಕೆ ಮಲ್ತೆರ್.
ಕುಕ್ಕೆ ಸುಬ್ರಹ್ಮಣ್ಯಗ್ ದೂರದ ಹಾವೇರಿ ಜಿಲ್ಲೆದ ಹಳ್ಳಿ ಒಂಜೆರ್ದ್ ಶಾಲೆದ ಪ್ರವಾಸದ ಬಸ್ ಡಿ.19 ಅಂಗಾರೆ ರಾತ್ರೆ ತಡವಾದ್ ಬತ್ತಿನೆರ್ದಾವರ ಕುಕ್ಕೆ ದೇವಲ್ಯದ ವನಸ್ ವ್ಯವಸ್ಥೆ ಬೊಕ್ಕ ಹೋಟೆಲ್ ಮುಚ್ಚಿದ್ ಇತ್ತ್ಂಡ್.
ಈ ಪೊರ್ತುಡು ಆಕಸ್ಮಿಕವಾದ್ ಭೇಟಿ ಕೊರ್ನ ಡಾ| ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಗುರ್ಕಾರೆ ಡಾ|ರವಿ ಕಕ್ಕೆಪದವು ಮೇರ್ ಬಡವುಡು ಕಂಗಾಲಾಯಿನ ಜೋಕ್ಲೆನ್ ತೂದು ಅಕ್ಲೆಡ ಪಾತೆರ್ದ್ ಅಕ್ಲೆನ್ ವನಸ್ ಗ್ ತನ್ನ ಇಲ್ಲಡೆ ಲೆತೊಂದು ಪೋದು ಸುಮಾರ್ 65 ಜೋಕುಲು ಬೊಕ್ಕ ಶಿಕ್ಷಕೆರೆಗ್ ಆರೆನ ಬೊಡೆದಿ ಗೀತಾ ಮೇರ್ ವನಸ್ ದ ವ್ಯವಸ್ಥೆ ಮಲ್ತೆರ್. ಬೊಕ್ಕ ಮೆರೆನ ಇಲ್ಲಲೇ ಜೆಪ್ಪುನ ವ್ಯವಸ್ಥೆಲ ಮಲ್ತೆರ್.
ಈ ಪೊರ್ತುಡು ಟ್ರಸ್ಟ್ ದ ಕೋಶಾಧಿಕಾರಿ ಮಣಿಕಂಠ, ಸದಸ್ಯೆರ್ ವಸಂತ್ ಬೊಕ್ಕ ಕಾರ್ತಿಕ್ ಸಹಕಾರ ಕೊರಿಯೆರ್.
ಕಲ್ಪಾರ್ಥಿಲೆನ ನಡುಟ್ಟ್ ಪಂತೊ ಇತ್ತ್ಂಡ ಅವು ಪ್ರತಿಯೊರಿಯಾನ್ಲಾ ನನಾತ್ ತೆರಿವೊನಿಯೆರೆ, ಎಚ್ಚ ಕಲ್ಪರೆ ಬೊಕ್ಕ ಉತ್ಕೃಷ್ಟ ಮಲ್ಪರೆ ಹೆಚ್ಚುವರಿ ಪ್ರಯತ್ನನ್ ಮಲ್ಪರೆ ಪ್ರೇರೇಪಣೆ ಮಲ್ಪುಂಡು. ಕ್ರೀಡೆ ಅವಡ್ ಅತ್ತಂಡ ಅಧ್ಯಯನ ಅವಡ್ ಕಲ್ಪಾರ್ಥಿಲು ಸಾಧಕೆರಾಯೆರೆ ಪ್ರೇರೇಪಣೆ ಮಲ್ಪು ಒಂಜಿ ಮಾರ್ಗ ಆತ್ಂಡ್. ಕ್ರೀಡೆಡ್ ಪಾಲ್ ಪಡೆನಗ ಪ್ರತಿಯೊರಿಡ್ಲಾ ಗೆಂದುನ ಜಬದಾರಿ ಇಪ್ಪುಂಡು. ಈ ಜಬದಾರಿದ ಪ್ರಜ್ಞೆ ಜೀವನದ ಬೇತೆ ಕ್ಷೇತ್ರಗ್ ಪಸರುಂಡು ಪಂದ್ ಮುಲ್ಕಿ ಶಾಂಭವಿ ಜೇಸೀ ಟ್ರಸ್ಟ್ ದ ಗುರ್ಕಾರೆ ಮೊಹಮ್ಮದ್ ಹಬೀಬುಲ್ಲಾ ಪಂಡೆರ್.
ಮೇರ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರುದ ಶಾಲಾ ವಾರ್ಷಿಕ ಇನಾಮು ಪಟ್ಟುನ ಲೇಸ್ ದ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಉದ್ಯಮಿ ಜನಕರಾಜ್ ರಾವ್ ಪಾತೆರ್ದ್, ಪಂತೊ ಮಲ್ಲ ತಾನನ್ ಪೋಪುನ ಬಗೆಟ್ಟ್ ಇಪ್ಪುಂಡು. ಆಂಡ ಉಂದು ಸಾಧಕೆರೆಗ್ ತನ್ನ ಪ್ರಯತ್ನನ್ ಗುರಿತಿಸಾವೊಂಡು ಬೊಕ್ಕ ಪುರಸ್ಕಾರ ಮಲ್ಪುನ ಪನ್ಪುನ ತೃಪ್ತಿ ಆಯೆರೆ ಒಂಜಿ ಮಾರ್ಗ ಆತ್ಂಡ್ ಪಂದ್ ಪಂಡೆರ್. ಬೊಕ್ಕ ಈ ವರ್ಷರ್ದ್ ಉತ್ತಮ ವಿದ್ಯಾರ್ಥಿ ಪ್ರಶಸ್ತಿಗ್ 5000 ರೂ. ಇನಾಮುನ್ ಕೊರ್ಪ ಪಂದ್ ಘೋಷಣೆ ಮಲ್ತೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಶ್ರೀ ಶಾರದಾ ಸೊಸೈಟಿದ ನಿರ್ದೇಶಕೆರ್ ಸುರೇಶ್ ರಾವ್ ನೀರಳಿಕೆ ಒಯಿಸ್ ದಿತ್ತೆರ್. ಈ ಪೊರ್ತುಡು ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್, ಶಿಕ್ಷಕ ರಕ್ಷಕ ಸಂಘದ ಗುರ್ಕಾರೆ ದೀಪಕ್ ಭಂಡಾರಿ ಪಾಲ್ ಪಡೆದಿತ್ತೆರ್.
ಕ್ರೀಡೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಡ್ ಪಾಲ್ ಪಡೆಯಿನ ಕಲ್ಪಾರ್ಥಿಲೆಗ್ ಇನಾಮುನ್ ಕೊರಿಯೆರ್. ಬೊಕ್ಕ ಮಾತ ವಿಭಾಗಡ್ ಎಡ್ಡೆ ಪ್ರದರ್ಶನ ಕೊರ್ನ ಶಾಲೆದ ಮಂಜಲ್ ಬಣ್ಣದ ಕೂಟಗ್ ಚಾಂಪಿಯನ್ ಶಿಪ್ ಇನಾಮು ಕೊರಿಯೆರ್.
ಸಹ ಶಿಕ್ಷಕಿ ಪ್ರತಿಭಾ ಭಟ್ ಎದ್ಕೊನಿಯೆರ್. ದೀಪಿಕಾ ಬೊಕ್ಕ ನಿಶ್ಮಿತಾ ಗೆಂದಿನಕ್ಲೆನ ಪಟ್ಟಿನ್ ಓದಿಯೆರ್. ಅಶ್ಮಿತ ಸೊಲ್ಮೆ ಸಂದಾಯೆರ್. ದೀಕ್ಷಿತ ಲೇಸ್ ದ ಸುಧಾರಿಕೆ ಮಲ್ತೆರ್.
ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ ಬೊಕ್ಕ ಕುಡ್ಲ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಒಟ್ಟು ಸೇರಿಗೆಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ 2023 ಲೇಸ್ ಡಿ.24 ಐತಾರ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರೋಡಿದ ಗುರ್ಕಾರೆ ಚಿತ್ತರಂಜನ್ ಕೆ ಮೆರೆಗ್ ಆತ್ಮಶಕ್ತಿ ಪ್ರಶಸ್ತಿ ಪುರಸ್ಕಾರ ಮಲ್ಪರೆ ಉಂಡು.
ಇರಾ ಯುವಕ ಮಂಡಲ (ರಿ.) ದ ಸುವರ್ಣ ಮಹೋತ್ಸವ ಡಿ.23 ಬೊಕ್ಕ 24 ಕ್ಕ್ ಇರಾ ಯುವಕ ಮಂಡಲ (ರಿ.) ದ ಬಯಲು ರಂಗಮಂದಿರಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಇರಾ ಯುವಕ ಮಂಡಲ (ರಿ.) ದಕುಲು ಲೆಪ್ಪೋಲೆಡ್ ತೆರಿಪಾದೆರ್.
