ಕುಡ್ಲ : ಇಂಡಿಗೋ ಏರ್ ಲೈನ್ ಡ್ ಮುಂಬೈ – ಕುಡ್ಲ ಪ್ರಯಾಣದ ಪೊರ್ತುಡು ವಿಮಾನದ ಫಸ್ಟ್ ಆಫೀಸರ್ ತುಳು ಭಾಷೆಡ್ ಮಲ್ದಿನ ಎನೌನ್ಸ್ಮೆಂಟ್ ಸಾಮಾಜಿಕ ಜಾಲತಾಣಡ್ ವೈರಲ್ ಆತುಂಡು ತುಳುವೆರ್ನ ಮನ ಗೆಂದ್ಡ್.
ದೇಶದ ಮಾತಾ ವಿಮಾನ ನಿಲ್ದಾಣಡ್ ಪ್ರಯಾಣಿಕ ಬೊಕ್ಕ ಸಾರ್ವಜನಿಕ ಪ್ರಕಟಣೆನ್ ದುಂಬು ಕೈತಲ್ ದ ಭಾಷೆಡ್ ಮಲ್ತ್ ಐರ್ದ್ ಬೊಕ್ಕ ಹಿಂದಿ ಬೊಕ್ಕ ಇಂಗ್ಲಿಷ್‍ಡ್ ಮಲ್ಪೊಡು ಪಂದ್ ಎಂದು ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರದ ಆದೇಶ ಉಂಡು . ಆಂಡ ಕೊಡೆ ಇಂಡಿಗೋ ವಿಮಾನಡ್ ಪೈಲೆಟ್ ಪ್ರದೀಪ್ ಪದ್ಮಶಾಲಿ ಮೇರ್ ಪ್ರಕಟನೆ ಬರೆದ್ ತುಲುಟ್ಟು ಓದುದೆರ್.
ಒಡಿಪು : ಒಡಿಪು ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ನೆತ್ತ 2022ನೇ ಸಾಲ್ ದ ಡೈರಿನ್ ಜಿ.ಶಂಕರ್ ಫ್ಯಾಮಿಲಿ ಟ್ರಸ್ಟ್‌ದ ಪ್ರವರ್ತಕೆರಾಯಿನ ನಾಡೋಜ ಡಾ.ಜಿ.ಶಂಕರ್ ಬುಡುಗಡೆ ಮಲ್ತೆರ್ .
ಉಚ್ಚಿಲ ಮಹಾಲಕ್ಷ್ಮೀ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿಗ್ ಬ್ಯಾಂಕ್ ದ ವತಿರ್ದ್ ಮಂಜೂರಾಯಿನ 30 ಲಕ್ಷ ಪಣವುದ ರಡ್ಡನೇ ಹಂತದ 5 ಲಕ್ಷದ ಚೆಕ್ ನ್ ನಾಡೋಜ ಡಾ.ಜಿ.ಶಂಕರ್ ಮೆರೆಗ್ ಕೊರಿಯೆರ್.
ಶಿರ್ವ: ಬಂಟಕಲ್ಲ್ ದ ಶ್ರೀಮಧ್ವ ವಾದಿರಾಜ ತಾಂತ್ರಿಕ ಮಹಾ ವಿದ್ಯಾಲಯದ ಗಣಿತಶಾಸ್ತ್ರ ವಿಭಾಗ ಕಾಲೇಜ್ ದ ಐಎಸ್‌ಟಿಇ ವಿದ್ಯಾರ್ಥಿ ಘಟಕದ ಒಟ್ಟು ಸೇರಿಗೇಡ್ ಶ್ರೀನಿವಾಸ ರಾಮಾನುಜನ್ ಮೆರೆನ 134ನೆ ಪುಟ್ಟು ಪರ್ಬದ ಪರವಾದ್ ರಾಷ್ಟ್ರೀಯ ಗಣಿತಶಾಸ್ತ್ರ ದಿನನ್ ಡಿ.22ಕ್ಕ್ ಆಚರಣೆ ಮಲ್ತೆರ್ .
ಸುರತ್ಕಲ್‌ದ ಎನ್‌ಐಟಿಕೆದ ಗಣಿತ ಬೊಕ್ಕ ಗಣಕ ಯಂತ್ರ ವಿಭಾಗದ ಪ್ರಾಧ್ಯಾಪಕ ಡಾ.ಬಿಆರ್.ಶಂಕರ್, ಶ್ರೀನಿವಾಸ ರಾಮಾನುಜನ್: ಜೀವನ ಬೊಕ್ಕ ಪರಂಪರೆ ಬೊಕ್ಕ ಶಿರ್ಷಿಕೆದಡಿ ಉಪನ್ಯಾಸ ಕೊರಿಯೆರ್ .
ಬ್ರಹ್ಮಾವರ: ಬ್ರಹ್ಮಾವರದ ರುಡ್ಲೆಟ್ ಸಂಸ್ಥೆ ಸಾಕರಡ್ 82 ಜನ ಕೆನರಾ ಬ್ಯಾಂಕ್ ಅಧಿಕಾರಿಲು ಶ್ರೀ ವಿಶ್ಲೇಶ್ವರ ಪ್ರಿಂಟರ್ಸ್ಗ್ ಭೇಟಿ ಕೊರಿಯೆರ್ .ರುಡ್ಲೆಟ್ ಸಂಸ್ಥೆರ್ದ್ ತರಬೇತಿ ಪಡೆದ್ ಯಶಸ್ವಿಯಾದ್ ಕಾರ್ಯಾಚರಣೆ ಮಲ್ತೊಂದು ಉಪ್ಪುನ ಶ್ರೀ ವಿಶ್ಲೇಶ್ವರ ಪ್ರಿಂಟರ್ಸ್ಗ್ ಕೆನರಾ ಬ್ಯಾಂಕ್ದ ಬೇತೆ ಬೇತೆ ರಾಜ್ಯದ ಅಧಿಕಾರಿಲು ಭೇಟಿ ಕೊರ್ದು ಪ್ರಿಂಟರ್ಸ್ದ ಕಾರ್ಯ ವೈಖರಿದ ಬಗ್ಗೆ ಎಡ್ಡೆಪ್ಪುದ ಪಾತೆರ ಪಾತೆರಿಯೆರ್ .
ಕೆನರಾ ಬ್ಯಾಂಕ್ದ ಉನ್ನತ ಅಧಿಕಾರಿಲು ಬೊಕ್ಕ ರುಡ್ಲೆಟ್ ಸಂಸ್ಥೆ ಬ್ರಹ್ಮಾವರದ ಉಪನ್ಯಾಸಕ ಸಂತೋಷ್ ಶೆಟ್ಟಿ ಬೊಕ್ಕ ಸಹಾಯಕ ಪ್ರಥ್ವಿ ರಾಜ್. ಅಂಚನೆ ಪ್ರಿಂಟರ್ಸ್ದ ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್ .
ಕುಡ್ಲ : ಕೊಂಚಾಡಿ ಶ್ರೀ ದುರ್ಗಾಪರಾಮೇಶ್ವರಿ ನಾಗಕನ್ನಿಕಾ ದೇವಲ್ಯದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಳುನಾಡ್ (ರಿ.) ಮೊಕ್ಲೆನ ಒಟ್ಟು ಸೇರಿಗೇಡ್ ತೇದಿ :24/12/2021 ನೇ ಶುಕ್ರಾರ ಬೈಯ್ಯಗ್ 7 ಗಂಟೆಗ್ ಕೊಂಚಾಡಿ ಶ್ರೀ ದುರ್ಗಾಪರಾಮೇಶ್ವರಿ ನಾಗಕನ್ನಿಕಾ ದೇವಲ್ಯೋಡು ಬಲೆ ತುಲು ಲಿಪಿ ಕಲ್ಪುಗ ಕಜ್ಜ ಕೊಟ್ಯ ನಡಪರೇ ಉಂಡು.
ಕಾರ್ಲ : ವರ್ಷಿಣಿ ಯೋಗಕೇಂದ್ರ ಶಿವಮೊಗ್ಗ ನೆತ್ತ ವತಿರ್ದ್ ಇಂಚೋಗು ನಡತಿನ ಆನ್‌ಲೈನ್ ಯೋಗ ಪಂಥಡ್ ಪಾಲ್ ಪಡೆಯಿನ ನಿರಂತರ ಯೋಗ ಕೇಂದ್ರದ 16 ಯೋಗಪಟುಲು ರಾಷ್ಟ್ರೀಯ ಯೋಗ ಪಂಥಗ್ ಆಯ್ಕೆಯಾತೇರ್ .
ವೀಣಶ್ರೀ ಯು.ಎ., ಪ್ರತ್ಯಷ, ಅಲ್ಲಿ ಕೋಟ್ಯಾನ್, ಅನ್ವಿ ಕೋಟ್ಯಾನ್, ಅನ್ವಿ ಎಸ್. ಅಂಚನ್, ಅನ್ವಿ ಕೋಟ್ಯಾನ್, ಮಮತ, ಮಾನ್ವಿ, ಗಾನ್ವಿ ಜಿ., ಶಿಲ್ಪ, ಸಿಯಾ ಶೆಟ್ಟಿ, ಶಿವಾನಿ ಶೆಟ್ಟಿ, ಧನ್ವಿ ಮರವಂತೆ, ನಮಿತ ಎನ್. ಪ್ರಭು, ನಿತ್ಯಾನಂದ, ಆಯುಷ್ಯ, ಕಾಂತಿಶ್ರೀ ಶೆಣೈ ಅವರು ರಾಷ್ಟ್ರೀಯ ಯೋಗ ಪಂಥಗ್ ಆಯ್ಕೆ ಆತೆರ್ . ಮೆಕ್ಲೆಗ್ ಯೋಗ ಗುರುಕುಲಾಯಿನ ಕೆ. ನರೇಂದ್ರ ಕಾಮತ್ ಬೊಕ್ಕ ಅಶೋಕ್ ಕುಮಾರ್ ತರಬೇತಿ ಕೊರ್ತೆರ್ .
ಕಾರ್ಲ : ಕಾರ್ಲ ಜ್ಞಾನಸುಧಾ ಶಿಕ್ಷಣ ಸಂಸ್ಥೆದ ವತಿರ್ದ್ಇಂಚೋಗು ತೀರ್ ಪೋಯಿನ ಹೊಟೇಲ್ ಉದ್ಯಮಿ, ದಾನಿ ಜಗನ್ನಾಥ ಶೆಟ್ಟಿ ಮೆರೆಗ್ ಭಾವಪೂರ್ಣ ಶ್ರದ್ಧಾಂಜಲಿ ಮಲ್ತೆರ್ . ಕಾರ್ಕಳದ ಬೈಲೂರು ಓಣಿಮಜಲ್ ಡ್ ಪುಟ್ಟುದು ಪುಣೆಡ್ ಹೊಟೇಲ್ ಉದ್ಯಮಿಯಾದ್ ಸಾಮಾಜಿಕ, ಧಾರ್ಮಿಕ, ಶೈಕ್ಷಣಿಕ ಕ್ಷೇತ್ರಗ್ ಎಡ್ಡೆ ಸಾಕಾರ ಕೊರ್ತಿನರ್ .
ಶಿಕ್ಷಣ ಸಂಸ್ಥೆದ ಏಳಿಗೆಡ್ ತನನ್ ತೊಡಗಾವೊಂದು , ಅವ್ವೆತೋ ಜೋಕ್ಲೆನ ಶಿಕ್ಷಣಗ್ ಬೆರಿ ಸಾಕಾಯ ಕೊರಿನ ಜಗನ್ನಾಥ ಶೆಟ್ರ್ ನ್ ನೆಂಪು ಮಲ್ತೆರ್ . ಅಜೆಕಾರ್ ಪದ್ಮಗೋಪಾಲ್ ಎಜ್ಯುಕೇಶನ್ ಟ್ರಸ್ಟ್ ಗುರ್ಕಾರ್ಲಾಯಿನ ಡಾ. ಸುಧಾಕರ್ ಶೆಟ್ಟಿ, ಟ್ರಸ್ಟಿ ಕರುಣಾಕರ್ ಶೆಟ್ಟಿ, ಕಾಲೇಜು ಪ್ರಾಂಶುಪಾಲ ದಿನೇಶ್ ಎಂ. ಕೊಡವೂರು, ಉಪಪ್ರಾಂಶುಪಾಲೆ ಸಾಹಿತ್ಯ, ಹೈಸ್ಕೂಲ್ ಪ್ರಾಂಶುಪಾಲೆ ಉಷಾ ರಾವ್ ಯು. ಉಪಪ್ರಾಂಶುಪಾಲೆ ವಾಣಿ ಕೆ., ಪಿಆರ್‌ಒ ಜ್ಯೋತಿ ಪದ್ಮನಾಭ ಭಂಡಿ ಪಾಲ್ ಪಡೆದಿತ್ತೆರ್.
ಕುಡ್ಲ : ದ. ಕ. ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಒಟ್ಟು ಸೇರಿಗೇಡ್ ಡಿ.. 28ಗ್ ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ನಡಪರೇ ಉಪ್ಪುನ ಜಿಲ್ಲಾ ಪತ್ರಕರ್ತರ ಸಮ್ಮೇಳನ ‘ಸಾಧನೆ ಸಂಭ್ರಮ 2021’ ಸರ್ವಾಧ್ಯಕ್ಷರಾದ್ ಹಿರಿಯ ಪತ್ರಕರ್ತ ಮನೋಹರ್ ಪ್ರಸಾದ್ ಆಯ್ಕೆಯಾತೆರ್ .
ಆನಿ ಕಾಂಡೆ 10 ಗಂಟೆಗ್ ಗೃಹ ಸಚಿವ ಆರಗ ಜ್ಞಾನೇಂದ್ರ ಸಮ್ಮೇಳನ ಉಧಿಪನ ಮಲ್ಪರೆ ಉಲ್ಲೆರ್ . ಜಿಲ್ಲಾ ಸಂಘದ 3 ವರ್ಷದ ಪ್ರಗತಿದ ವಿವರದ ವಿಶೇಷ ಸಂಚಿಕೆನ್ ಸಂಸದ ನಳಿನ್ ಕುಮಾರ್ ಕಟೀಲು ಬುಡುಗಡೆ ಮಲ್ಪರೆ ಉಲ್ಲೆರ್ . ಶಾಸಕೆರಾಯಿನ ಡಿ. ವೇದವ್ಯಾಸ ಕಾಮತ್, ಡಾ. ಭರತ್ ಶೆಟ್ಟಿ ವೈ. ಮೆರವಣಿಗೆಗ್ ಚಾಲನೆ ಕೊರಿಯರೆ ಉಲ್ಲೆರ್ . ಮನೋಹರ ಪ್ರಸಾದ್ ಮೆರೆನ ಕೃತಿ ‘ಭಾವಚಿತ್ರ ಯಾನ’ನ್ ಕರಾವಳಿ ಶಿಕ್ಷಣ ಸಂಸ್ಥೆದ ಗುರ್ಕಾರ್ಲಾಯಿನ ಗಣೇಶ್ ರಾವ್ ಬುಡುಗಡೆ ಮಲ್ಪರೆ ಉಲ್ಲೆರ್ . ಪಂದ್ ಜಿಲ್ಲಾ ಪತ್ರಕರ್ತರ ಸಂಘದ ಗುರ್ಕಾರ್ಲಾಯಿನ ಶ್ರೀನಿವಾಸ ನಾಯಕ್ ಇಂದಾಜೆ ಪಂಡೆರ್.
ಕಾರ್ಲ : ಕಾರ್ಲದ ಶ್ರೀ ಗುರು ರಾಗವೇಂದ್ರ ಮಠಟ್ ಲೋಕಕಲ್ಯಾಣಾರ್ಥ ಬೊಕ್ಕ ವಿಪ್ರ ಸಂಘಟನೆಗಾದ್ ಪೇಜಾವರ ವಿಶ್ವೇಶ ತೀರ್ಥರ ಸಂಸ್ಮರಣಾರ್ಥ, ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿಲೆನ ಆಶೀರ್ವಾದಡ್ ಶ್ರೀ ರಾಮತಾರಕ ಜಪ-ಯಜ್ಞ ಐತಾರ ನಡತುಂಡು . ಕಾಂಡೆ 6 ಗಂಟೆಗ್ ತುಡರ್ ಅರ್ಲಾವುನ ಮುಖೇನ ಜಪ ಯಜ್ಞ ಸುರು ಆಂಡ್.
ಕುಡ್ಲ : ಒಡಿಯೂರು ಶ್ರೀಲೆನ ಷಷ್ಯಬ್ಧ ಸಂಭ್ರಮ ಜ್ಞಾನವಾಹಿನಿ ಒಡಿಯೂರು ಶ್ರೀ ಚ್ಯಾರಿಟೇಬಲ್ ಟ್ರಸ್ಟ್ (ರಿ .) ಸಂಚಾಲಿತ ಒಡಿಯೂರು ಶ್ರೀ ಗ್ರಾಮ ವಿಕಾಸ ಯೋಜನೆ ಒಡಿಯೂರು ಶ್ರೀ ವಿಕಾಸ ವಾಹಿನಿ ಘಟ ಸಮಿತಿ ಉರ್ವ ಕೋಡಿಕಲ್ ಕುಡ್ಲ ಮೆಕ್ಲೆನ ಒಟ್ಟು ಸೇರಿಗೆಡ್ ಇನಿ ಕುಡ್ಲದ ಉರ್ವ ಮಾರಿಯಮ್ಮ ದೇವಲ್ಯೊದ ಎದುರು ಉಪ್ಪುನ ರಂಗ ಚಾವಡಿಡ್ ಶ್ರೀ ಗುರುವಂದನೆ, ಶ್ರೀ ಹನುಮಾನ್ ಚಾಲೀಸಾ ಪಠಣ ಬೊಕ್ಕ ಸಾಧಕೆರೆಗ್ ಅಂಚನೆ ಸಂಘದ ಪೆರಿಯಾಕ್ಲೆಗ್ ಮಾನದಿಗೆ ಮಲ್ಪುನ ಕಜ್ಜ ನಡತುಂಡು.
ಈ ಪೊರ್ಲ ಲೇಸ್ ಡ್ ದಿವ್ಯ ಉಪಸ್ಥಿತಿ ಬೊಕ್ಕ ಆಶೀರ್ವಚನ ಪಾತೆರನ್ ಶ್ರೀ ಗುರುದೇವದತ್ತ ಸಂಸ್ಥಾನಮ್, ಒಡಿಯೂರುದ ಪರಮಪೂಜ್ಯ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ ಬಾರಿ ಅರ್ಥ ಬದ್ಧವಾದ್ ಆಶೀರ್ವಚನ ಕೊರಿಯೆರ್.ಅಂಚನೆ ಗುರುದೇವದತ್ತ ಸಂಸ್ಥಾನಮ್, ಒಡಿಯೂರುದ ಶ್ರೀ ಶ್ರೀ ಮಾತಾನಂದಮಯಿ ಅಮ್ಮ ಚಾಲೀಸ್‌ ಪಠಣ ಮಲ್ತ್ ಆಶೀರ್ವಚನ ಕೊರಿಯೆರ್.
ಮಲ್ಲ ಬಿನ್ನೆರ್ ಆದ್ ಒಡಿಯೂರು ಶ್ರೀ ವಿವಿಧೋದ್ದೇಶ ಸೌಹಾರ್ದ ಸಹಕಾರಿ ನಿಯಮಿತದ ಗುರ್ಕಾರ್ಲಾಯಿನ
ಶ್ರೀ ಸುರೇಶ್ ರೈ,ಉರ್ವ ಕುಡ್ಲ ನಗರ ಪಾಲಿಕಾ ಸದಸ್ಯೆರಾಯಿನ ಶ್ರೀ ಗಣೇಶ್ ಕುಲಾಲ್, ನಿವೃತ್ತ ಪ್ರಾಧ್ಯಾಪಕೆರಾಯಿನ ಶ್ರೀಮತಿ ಕೆ.ಎ, ರೋಹಿಣಿ, ಯೋಗ ಶಿಕ್ಷಕಿಯಾಯಿನ ಶ್ರೀಮತಿ ಕಲಾವತಿ ಪದ್ಮನಾಭ,ನಿವೃತ್ತ ಸಿವಿಲ್ ಇಂಜಿನಿಯರ್ ಆಯಿನ ಶ್ರೀ ಜಗದೀಶ್ ಶೆಟ್ಟಿ,ಒಡಿಯೂರು ಶ್ರೀಲೆನ ಷಷ್ಟಬ್ಬ ಸಂಭ್ರಮ ಕೇಂದ್ರ ಸಮಿತಿ ಕಾರ್ಯಂತೆರಾಯಿನ ಶ್ರೀ ಯಶವಂತ ವಿಟ್ಲ,ಒಡಿಯೂರು ಶ್ರೀ ಗ್ರಾಮವಿಕಾಸ ಯೋಜನೆ ಕುಡ್ಲದ ಯೋಜನಾ ನಿರ್ದೇಶಕೆರ್ ಆಯಿನ ಕಿರಣ್ ಉರ್ವ ,ಈ ಪೊರ್ಲ ಲೇಸ್ ಡ್ ಪಾಲ್ ಪಡೆದಿತ್ತೆರ್.
ಇಂದುವೆ ಪೊರ್ತುಡು ಸಾಧಕೆರೆಗ್ ಮಾನದಿಗೆ ಮಲ್ಪುನ ಕಜ್ಜ ಬೊಕ್ಕ 60 ವರ್ಷ ಮಿತ್ತ್ ದ ಪೆರಿಯಾಕ್ಲೆಗ್ ಶಾಲ್ ಪಾರ್ದ್ ಫಲಮಂತ್ರಾಕ್ಷತೆ
ಕೊರಿಯೆರ್.
ಇಂದುವೆ ಪೊರ್ತುಡು ಒಡಿಯೂರು ಶ್ರೀ ವಿಕಾಸ ವಾಹಿನಿ ಘಟ ಸಮಿತಿದ ಪರವಾದ್ ಒಡಿಯೂರುದ ಗೋ ಶಾಲೆಗ್ ಪಣವುದ ಸಾಕಾರ ಕೊರಿಯೆರ್.ಲೇಸ್ ಡ್ ಸ್ವಾಗತ ಭಾಷಣನ್ ಘಟಕದ ಸಂಯೋಜಕಿಯಾಯಿನ ಶ್ರೀಮತಿ ಸುಮತಿ ಮೇರ್ ಮಲ್ತೆರ್ ಅಂಚನೆ ಒಡಿಯೂರು ಶ್ರೀಲೆನ ಷಷ್ಟಬ್ಬ ಸಂಭ್ರಮ ಕೇಂದ್ರ ಸಮಿತಿ ಕಾರ್ಯಂತೆರಾಯಿನ ಶ್ರೀ ಯಶವಂತ ವಿಟ್ಲ,ಮೇರ್ ಪ್ರಸ್ತಾವಿಕ ನುಡಿ ಪಂಡೆರ್. ಶ್ರೀಮತಿ ಪ್ರಭಾವತಿ ಮೇರ್ ಸಾಧಕೆರೆನ ಪಟ್ಟಿ ಪ್ರಕಟ ಮಲ್ತೆರ್, ಕುಮಾರಿ ಶ್ರೀನಿಧಿ ಶೆಟ್ಟಿ ಲೇಸ್ ನಡಪಾದ್ ಕೊರಿಯೆರ್.
