ಕುಡ್ಲ: ಕುಡ್ಲ ಪಿಲಿ ಪರ್ಬದ ಮುರ್ತ ಕಾರ್ಯಕ್ರಮ ಇನಿ ಕುಡ್ಲದ ಕೇಂದ್ರ ಮೈದಾನಡ್ ನಡತ್ಂಡ್.
ಕುಡ್ಲ ದಕ್ಷಿಣ ಶಾಸಕೆರ್ ವೇದವ್ಯಾಸ್ ಕಾಮತ್ ಈ ಲೇಸ್ಡ್ ಇತ್ತೆರ್. ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ಮುತಾಲಿಕೆಡ್ ನವರಾತ್ರಿ ಬಗೆಟ್ ಕುಡ್ಲದ ಪಿಲಿ ಪರ್ಬ ಅಟ್ಟಣೆ ಮಲ್ತ್ದೆರ್. ಅಕ್ಟೋಬರ್ 2ನೇ ತಾರೀಕ್ಗ್ ಕುಡ್ಲದ ಕೇಂದ್ರ ಮೈದಾನಡ್ ಪಿಲಿ ಪರ್ಬ ನಡಪರೆ ಉಂಡು.
ಉಳ್ಳಾಲ: ತೊಕ್ಕೊಟ್ಟು ದ ಪಿರಾಕ್ ದ ಮಸಣ, ಚೆಂಬುಗುಡ್ಡೆ ಹಿಂದೂ ರುದ್ರಭೂಮಿಡ್ ತುಳುನಾಡ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ ದಕುಲು ಶ್ರಮದಾನ ಮಲ್ತ್ ದ್ ಪೊರ್ಲು ಮಲ್ತೆರ್.
ಅಂಚೆನೆ ಮನುಸನ ಕಡೆತ ಸಂಸ್ಕಾರಗ್ ಕುಕ್ಕುದ ಮರ, ಇರೆಕ್ಕುಲು ಅಗತ್ಯ. ಈ ನಿಟ್ಟ್ ಡ್ ಪರಿಸರವಾದಿಲು, ಸಾಯಿ ಪರಿವಾರ್ ನ ಸೇವಕೆರ್ ಮಾಧವ ಉಳ್ಳಾಲೆರ್ನ ಸಹಕಾರಡ್ ಕುಕ್ಕುದ ದೈಕ್ಲೆನ್ ನಡಿಯೆರ್. ಚೆಂಬುಗುಡ್ಡೆ ಹಿಂದೂ ರುದ್ರಭೂಮಿ ನಿರ್ವಹಣಾ ಸಮಿತಿದ ಅಧ್ಯಕ್ಷೆರ್ ಚಂದ್ರಹಾಸ್ ಉಳ್ಳಾಲ್, ಆರ್ ಬತ್ತ್ ದ್, ಪರಿವಾರ್ ದ ಸೇವಾ ಕಜ್ಜೊಲೆನ್ ಪುಗರಿಯೆರ್.
ಸಾಯಿ ಪರಿವಾರ್ ಟ್ರಸ್ಟ್ ದ ಪುರುಷೋತ್ತಮ ಕಲ್ಲಾಪು, ಪ್ರವೀಣ್ ಎಸ್ ಕುಂಪಲ, ಗಣೇಶ್ ಅಂಚನ್, ಧೀರಜ್ ಗಟ್ಟಿ ಕೊಲ್ಯ ಅಶೋಕ್ ಉಚ್ಚಿಲ್, ರಾಜೇಶ್ ಕಾಪಿಕಾಡ್, ಗಣೇಶ್ ಪಂಡಿತ್ ಮುಳಿಹಿತ್ಲು, ಸಂಪತ್ ಪಿಲಾರ್, ಶವಿತ್ ಉಚ್ಚಿಲ್, ಸತೀಶ್ ಭಟ್ನಗರ, ಸೂರ್ಯ ಕುಂಪಲ, ಸಂತೋಷ್ ಚೆಂಬುಗುಡ್ಡೆ, ಪ್ರಕಾಶ್ ಸಿಂಪೋನಿ, ಶೈಲೇಶ್ ಸೇವಂತಿಗುಡ್ಡೆ, ಪ್ರವೀಣ್ ಮೆಸ್ಕಾಂ, ಸತೀಶ್ ಚೆಂಬುಗುಡ್ಡೆ, ಶೇಖರ್ ಚೆಂಬುಗುಡ್ಡೆ, ಶಿವರಾಮ ಗಟ್ಟಿ ಎಕ್ಕೂರು, ಪ್ರವೀಣ್ ಸುವರ್ಣ ಜಪ್ಪಿನಮೊಗೆರ್, ಪ್ರವೀಣ್ ಕೊಲ್ಯ, ಶರತ್ ತೊಕ್ಕೊಟ್ಟ್, ಉಮೇಶ್ ಕುತ್ತಾರ್, ತಾರನಾಥ ತೊಕ್ಕೊಟ್ಟ್, ಸಂತೋಷ್ ಅಂಬ್ಲಮೊಗರ್, ಪ್ರಸಾದ್ ಧರ್ಮನಗರ, ಶೇಖರ್ ಗಾಂಧಿನಗರ, ದೇವರಾಜ್, ಕಾರ್ತಿಕ್ ಉಚ್ಚಿಲ್ ಬೊಕ್ಕ ಬೇತೆ ಸೇವಕೆರ್ ಶ್ರಮದಾನಡ್ ಪಾಲ್ ಪಡೆತೆರ್.
ಎರ್ಮಾಳ್ : ಬ್ರಹ್ಮಶ್ರೀ ನಾರಾಯಣ ಗುರು ಸ್ವಾಮಿ ಸೇವಾ ಮಂದಿರ ಎರ್ಮಾಳ್ ತೆಂಕ ಮುಲ್ಪ ಎಲ್ಲೆರ್ದ್(ಸೆ.26) ಶರನ್ನವರಾತ್ರಿ ಉಚ್ಚಯ ಭಾರಿ ವಿಜ್ರಂಭಣೆ ಡ್ ನಡಪರೆ ಉಂಡು.
ಪ್ರತಿ ದಿನ ರಾತ್ರೆಗ್ ಭಜನೆ, ಪ್ರಸಾದ ವಿತರಣೆ ನಡಪರೆ ಉಂಡು. ಪ್ರತಿ ದಿನಲಾ ಅ ಭಕ್ತಾದಿಲೆರ್ದ್ ಸೇವೆ ನಡಪುಂಡು. ಪ್ರತೀ ದಿನಲಾ ಭಾರಿ ಸಂಖ್ಯೆ ಡ್ ಭಕ್ತೆರ್ ಸೇರ್ದ್ ಭಜನಾ ಸೇವೆ ಮಲ್ಪುವೆರ್ .
ಆಯಿನಾತ್ ಬೇಗ ತುಳುಕ್ಕು ಸಾಂವಿಧಾನಿಕ ಮಾನಾದಿಗೆ ಕೊರ್ಪಾವ ಪಂಡೆರ್ ಸಚಿವೆರ್ ಸುನಿಲ್ ಕುಮಾರ್
ಕುಡ್ಲ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮುತಾಲಿಕೆಡ್ 2021ನೇ ಸಾಲ್ದ ಗೌರವ ಪ್ರಶಸ್ತಿ , ಬೂಕು ಇನಾಮುದ ಲೇಸ್ ಅಂಚೆನೆ ಊರು ಪರವೂರುದ ತುಳು ಸಾಧಕೆರೆಗ್ ರಾಜ್ಯ ಪ್ರಶಸ್ತಿ ಕೊರ್ಪಿನ ಲೇಸ್ ಸೆ. 24 ತಾರೀಕ್ ಸನಿವಾರದಾನಿ ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ನಡತ್oಡ್.
ಮೀನುಗಾರಿಕೆ, ಬಂದರು ಬೊಕ್ಕ ಒಳನಾಡು ಜಲ ಸಾರಿಗೆ ಸಚಿವೆರ್ ಎಸ್. ಅಂಗಾರ ಲೇಸ್ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಆಯಿಬೊಕ್ಕ ಪಾತೆರಿನ ಆರ್, ದಯಾನಂದ ಕತ್ತಲ್ ಸಾರ್ ಮೆರೆನ ಮಾತಾಲಿಕೆದ ಈ ತಂಡ ಕರಿನ 3 ವರ್ಷಡ್ ಯಶಸ್ವಿಯಾದ್ ಕಾರ್ಯಚಟುವಟಿಕೆನ್ ಮಲ್ತೊಂದು ಬೈದ್oಡ್. ಆತೆ ಅತ್ತಂದೆ ಇನಿತ್ತ ಪ್ರಶಸ್ತಿ ಪ್ರಧಾನ ಲೇಸ್ ನ್ ಲ ಭಾರೀ ಪೊರ್ಲುಡ್ ಮಲ್ತ್ ದೆರ್. ಈ ಪ್ರದೇಶ ಮಾತ್ರ ಅತ್ತಂದೆ ರಾಜ್ಯ, ರಾಷ್ಟ್ರಮಟ್ಟದ ಸಾಧಕೆರೆನ್ಲ ಗುರ್ತಿಸಾದ್ ಅಕುಲೆಗ್ ಪ್ರಶಸ್ತಿ ಕೊರ್ಪುನ ಕಾರ್ಯಕ್ರಮಲ ಅಕಾಡೆಮಿದ ಮುಕೇನ ಮಲ್ತ್ ದೆರ್. ತುಳು ಭಾಷೆದ ಒಟ್ಟುಗ್ ಸಂಸ್ಕೃತಿಲ ಉಂಡು ಪನ್ಪಿನೆನ್ ಮದಪರೆ ಇಜ್ಜಿ. ಆಯಿನಾತ್ ಬೇಗ ತುಳು ಭಾಷೆನ್ ರಾಜ್ಯದ 8 ನೇ ಪರಿಚ್ಛೇದಗ್ ಸೇರ್ಸಾವುನ ಪ್ರಯತ್ನನ್ ಯಾನ್ ಮಲ್ಪುವೆ ಪಂದ್ ಪoಡೆರ್.
ಮದಿಪು ಬೂಕುನ್ ಬುಡುಗಡೆ ಮಲ್ತ್ ದ್ ಪಾತೆರಿನ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಕರ್ನಾಟಕ ಸರ್ಕಾರ ಕುಡ್ಲಡ್ ತುಳು ಭವನ ಆಯರೆ ವಿಶೇಷವಾಯಿನ ಸಾಕಾರ ಕೊರ್ತ್oಡ್. ಆಯಿಕ್ಕಾದ್ ಸುಮಾರ್ 9 ಕೋಟಿನ್ ಬುಡುಗಡೆ ಮಲ್ತ್ ದ್oಡ್. ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ಅಂಚನೆ ಮಾತ ಪದುಕೆರ್ ಎಡ್ಡೆ ಎಡ್ಡೆ ಬೇಲೆನ್ ಮಲ್ತ್ ದೆರ್. ಪ್ರಶಸ್ತಿ ಪಡೆಯಿನ ಮಾತೆರೆಗ್ಲ ಎಡ್ಡೆಪ್ಪುನ್ ಬಯಕ್ಯೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ದಯಾನಂದ ಜಿ. ಕತ್ತಲ್ಸಾರ್ ಲೇಸ್ದ ಗುರ್ಕಾರ್ಮೆ ವಹಿಸ್ ದಿತ್ತೆರ್ .
ಮಲ್ಲ ಬಿನ್ನೆರಾದ್ ದ.ಕ ಜಿಲ್ಲಾ ಮೀನುಗಾರಿಕಾ ಫೆಡರೇಶನ್ ದ ಗುರ್ಕಾರ್ಲು ಯಶ್ಪಾಲ್ ಸುವರ್ಣ, ದ.ಕ.ಜಿಲ್ಲಾ ಹಾಲು ಉತ್ಪಾದಕರ ಸಹಕಾರಿ ಸಂಘದ ಗುರ್ಕಾರ್ಲು ಕೆ.ಪಿ. ಸುಚರಿತ ಶೆಟ್ಟಿ, ಪ್ರಾಂತ ಸಹ ಸೇವಾ ಪ್ರಮುಖ್ ನಾ. ಸೀತಾರಾಮ್ ಜಿ. ಲೇಸ್ಡ್ ಪಾಲ್ ಪಡೆದ್ ಇತ್ತೆರ್.
ಬಯ್ಯಡ್ ನಡತಿನ ಮುಗಿತಲದ ಲೇಸ್ ಡ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಅಂಚನೆ ಇಂಧನ ಸಚಿವೆರ್ ವಿ. ಸುನೀಲ್ ಕುಮಾರ್ ಸಾಧಕೆರೆಗ್ ಪ್ರಶಸ್ತಿ ಪಟ್ಟಿಯೆರ್. ತುಳುಕ್ಕು ಸಂವಿಧಾನದ ಮಾನಾದಿಗೆ ಕೊರ್ಪಾವರೆ ಪ್ರಯತ್ನ ಮಲ್ಪುವ ಪಂಡೆರ್.
ಈ ಪೊರ್ತುಡು “ಮದಪೆರೆ ಆವಂದಿ ತುಳುವೆರ್” ಬೊಕ್ಕ “ಮದಿಪು” ಬೂಕ್ ನ್ ಸಂಸದೆರ್ ಬುಡುಗಡೆ ಮಲ್ತೆರ್.
ಗೌರವ ಪ್ರಶಸ್ತಿಗ್ ಬೇತೆ ಬೇತೆ ಕ್ಷೇತ್ರಡ್ ಸೇವೆ ಮಲ್ತಿನ 3 ಪೆರಿಯ ಸಾಧಕೆರೆಗ್ ಶಾಲ್ ಪಾಡ್ದ್ ಪೊ ಕೊರ್ದು ಮಾನಾದಿಗೆ ಮಲ್ತೆರ್. ಅಂಚನೆ ವಿಶೇಷ ಬಾಲ ಪ್ರತಿಭಾ ಪುರಸ್ಕಾರ, ಯುವ ಸಾಧಕ, ಮಾಧ್ಯಮ ಪುರಸ್ಕಾರ, ಸಂಘಟನಾ ಪುರಸ್ಕಾರಗ್ ರಾಜ್ಯ ಅತ್ತಂದೆ ಪಿದಯಿ ರಾಷ್ಟ್ರ ಮಟ್ಟಡ್ ವಿಶೇಷವಾದ್ ಗುರ್ತಿಸಾದ್ ಸಾಧಕೆರೆಗ್ ಮಾನಾದಿಗೆ ಮಲ್ತೆರ್. ತುಳು ಜಾನಪದ ಕ್ಷೇತ್ರಡ್ ಸಾಧನೆ ಮಲ್ತಿನ ಸಂಜೀವ ಬಂಗೇರ ತಲಪಾಡಿ, ತುಳು ಸಿನಿಮಾ ವಿಭಾಗಡ್ ಕೃಷ್ಣಪ್ಪ ಉಪ್ಪೂರು, ತುಳು ಸಾಹಿತ್ಯ ವಿಭಾಗಡ್ ಉಲ್ಲಾಸ್ ಕೃಷ್ಣ ಪೈ ಪುತ್ತೂರ್ ಮುಕ್ಲೆಗ್ ಪ್ರಶಸ್ತಿ ಸಚಿವೆರ್ ಪ್ರಶಸ್ತಿ ಪಟ್ಟಿಯೆರ್. ಈ ಪ್ರಶಸ್ತಿಡ್ 50,000 ರೂ. ಪಣವು, ಪ್ರಶಸ್ತಿ ಪತ್ರ ಅoಚನೆ ಸ್ಮರಣಿಕೆ ಇತ್ತ್ಂಡ್.
ಈ ಪೊರ್ತುಡು 2021ನೇ ಸಾಲ್ ದ ಬೂಕುದ ಇನಾಮು ಯೋಜನೆದ ಪ್ರಶಸ್ತಿಗಾದ್ 3 ಬೇತೆ ಬೇತೆ ವಿಭಾಗದ ಒಂಜಿ ಬೂಕು ನ್ ತೀರ್ಪುಗಾರೆರ್ನ ಮುಖೇನ ಆಯ್ಕೆ ಮಲ್ತ್ ದ್ ಅಕ್ಲೆಗ್ ಮಾನಾದಿಗೆ ಮಲ್ತೆರ್. ಕವನ ಸಂಕಲನ ವಿಭಾಗಡ್ ಯೋಗೀಶ್ ಕಾಂಚನ್, ಬೈಕಂಪಾಡಿ ಮೇರ್ನ “ತಂಞನ ಬೊಳ್ಳಿ” ಬೂಕ್ ಗ್, ನಾಟಕ ವಿಭಾಗಡ್ ಅಕ್ಷತಾರಾಜ್ ಪೆರ್ಲ ಮೇರ್ನ “ಬೇಲಿ, ಸಾಪೊದ ಕಣ್ಣ್” ಬೂಕ್ ಗ್ ಅಂಚನೆ ಅಧ್ಯಯನ ವಿಭಾಗಡ್ ಡಾ| ಅಶೋಕ್ ಆಳ್ವ ಸುರತ್ಕಲ್ ಮೇರ್ನ “ತುಳುನಾಡ್ ದ ಪ್ರಾಣಿ ಜಾನಪದ” ಈ ಬೂಕ್ ಗು ಗೌರವ ತಿಕ್ ದ್ಂಡ್. ಈ ಇನಾಮುಡ್ 25,000 ರೂ.ಪಣವು, ಪ್ರಶಸ್ತಿ ಪತ್ರ ಅಂಚನೆ ಸ್ಮರಣಿಕೆ ಇತ್ತ್ಂಡ್.
2021ನೇ ವಿಶೇಷ ಪುರಸ್ಕಾರವಾದ್ ಬಾಲ ಪ್ರತಿಭಾ ಪುರಸ್ಕಾರ ನಿರೀಕ್ಷಾ ಕೋಟ್ಯಾನ್ ಕೋಡಿಕೆರೆ, ಜೀವಿಕಾ ಶೆಟ್ಟಿ ಬೊಂಬಾಯಿ, ಸಾನ್ವಿ ಅಂಚನೆ ಯುವ ಸಾಧಕ ಪುರಸ್ಕಾರ ಹರಿಪ್ರಸಾದ್ ನಂದಳಿಕೆ, ಚಿನ್ಮಯಿ ಮೋಹನ್ ಸಾಲಿಯಾನ್ ಬೊಂಬಾಯಿ, ರಮಾನಂದ ಶೆಟ್ಟಿ, ಮಾಧ್ಯಮ ಪುರಸ್ಕಾರ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಶಶಿ ಬಂಡಿಮಾರ್, ರೋನ್ಸ್ ಬಂಟ್ವಾಳ್ ಬೊಂಬಾಯಿ, ಜೈ ತುಳುನಾಡು(ರಿ.), ತುಳು ಕೂಟ ಫೌಂಡೇಶನ್ ನಾಲ ಸೋಪಾರ(ರಿ.) ಬೊಂಬಾಯಿ, ತುಳು ಕೂಟ ಕತಾರ್ ಈ ಸಂಘಟನೆಗ್ ಸಂಘಟನಾ ಪುರಸ್ಕಾರ ಸಂದ್ಂಡ್. 10,000 ರೂ.ದ ಪಣವು, ಪ್ರಶಸ್ತಿ ಪತ್ರ ಅಂಚನೆ ಸ್ಮರಣಿಕೆದೊಟ್ಟುಗು ಈ ವಿಶೇಷ ಪುರಸ್ಕಾರ ಇತ್ತ್ಂಡ್.
ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಕುಡ್ಲದ ಗುರ್ಕಾರ್ಲು ಮಟ್ಟಾರು ರತ್ನಾಕರ ಹೆಗ್ಡೆ ಮೇರ್ ತುಳುಭಾಷಾ ಎಂ.ಎ ಶಿಕ್ಷಕೆರೆಗ್ ಮಾನಾದಿಗೆ ಮಲ್ತೆರ್. ಈ ಲೇಸ್ಡ್ ಬೇತೆ ಬೇತೆ ರೀತಿದ ಸಾಂಸ್ಕೃತಿಕ ಕಾರ್ಯಕ್ರಮಲ ನಡತ್oಡ್. ಪುಣ್ಯಕೋಟಿ ಯಕ್ಷಗಾನ ಜನಕ್ಲೆನ ಮನಸ್ಸ್ ನ್ ಗೆಂದ್ ದ್oಡ್.
ಈ ಪೊರ್ತುಡು ಆಳ್ವಾಸ್ ಶಿಕ್ಷಣ ಸಂಸ್ಥೆದ ಮುಖ್ಯಸ್ಥೆರ್ ಡಾ| ಮೋಹನ್ ಆಳ್ವ, ಶಾಸಕೆರಾಯಿನ ಉಮಾನಾಥ್ ಕೋಟ್ಯಾನ್, ವೇದವ್ಯಾಸ ಕಾಮತ್, ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ, ಅಕಾಡೆಮಿದ ಪದುಕೆರಾಯಿನ ಸರ್ವೋತ್ತಮ ಶೆಟ್ಟಿ, ಅಬುಧಾಬಿ,ಡಾ. ಆಕಾಶ್ ರಾಜ್ ಜೈನ್, ಕಾಂತಿ ಶೆಟ್ಟಿ, ಬೆಂಗಳೂರು, ದಿನೇಶ್ ರೈ ಕಡಬ, ನಾಗೇಶ್ ಕುಲಾಲ್, ನರೇಂದ್ರ ಕೆರೆಕಾಡು, ಚೇತಕ್ ಪೂಜಾರಿ, ಸಂತೋಷ್ ಪೂಜಾರಿ, ಲೀಲಾಕ್ಷ ಕರ್ಕೇರ ಸೇರಿನಂಚನೆ ಮಲ್ಲ ಬಿನ್ನೆರ್ ಲೇಸ್ ಡ್ ಪಾಲ್ ಪಡೆದ್ ಇತ್ತೆರ್.
ಕುಡ್ಲ : ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಡಪುನ ಮಂಗಳೂರು ದಸರಾ ಉಚ್ಚಯ ಸೆ.26 ತಾರೀಕ್ ರ್ದ್ ಅ. 6 ತಾರೀಕ್ ಮುಟ್ಟ ಪ್ರತಿದಿನ ಲ ಬೇತೆಬೇತೆ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದ ಒಟ್ಟುಗು ಭಾರಿ ಗೌಜಿಡ್ ನಡಪರೆ ಉಂಡು ಪಂದ್ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರ್ಲು ಎಚ್.ಎಸ್. ಸಾಯಿರಾಮ್ ತೆರಿಪಾಯೆರ್.
ಆರ್ ಕುದ್ರೋಳಿ ಕ್ಷೇತ್ರದ ಜಯ ಸುವರ್ಣ ಸಭಾಂಗಣಡ್ ಸನಿಯಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡೆರ್.
ಸೆ.26 ಕಾಂಡೆ 9.30 ಗಂಟೆಗ್ ಗುರು ಪ್ರಾರ್ಥನೆ, ಕಲಶ ಪ್ರತಿಷ್ಠೆ ಇಂಚಿನ ವಿಧಿಕುಲು ನಡತಿ ಬೊಕ್ಕ ಶ್ರೀ ಶಾರದೆ , ಗಣಪತಿ ಬೊಕ್ಕ ನವದುರ್ಗೆಯೆರೆನ ಮೂರ್ತಿ ಪ್ರತಿಷ್ಠೆ ಆವರೆ ಉಂಡು. ಸೆ.27 ಕಾಂಡೆ ದುರ್ಗಾಹೋಮ ,ಸೆ.30 ಲಲಿತಾ ಪಂಚೆಮಿದಾನಿ ಭಗವತಿ ದುರ್ಗಾ ಹೋಮ, ಸಾಮೂಹಿಕ ಚಂಡಿಕಾಯಾಗ, ಅಕ್ಟೋಬರ್ 1 ಕಾಂಡೆ ಕುಮಾರಿ ದುರ್ಗಾ ಹೋಮ, ಅ.2 ಕಾಂಡೆ೬ ಮಹಿಷ ಮರ್ದಿನಿ ದುರ್ಗಾ ಹೋಮ, ಅ.3 ಚಂಡಿಕಾ ಹೋಮ, ಪಗೆಲ್ ಉಚ್ಚಯ, ದುರ್ಗಾಷ್ಟಮಿ, ಅ.4 ಸರಸ್ವತಿ ದುರ್ಗಾ ಹೋಮ, 100 ಬೊಂಡಾಭಿಷೇಕ, ಶಿವ ಪೂಜೆ , ಅನ್ನಸಂತರ್ಪಣೆ ಸೇವೆ ನಡಪರೆ ಉಂಡು ಪಂಡೆರ್.
ಕ್ಷೇತ್ರಾಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ ಮೇರ್ ಪಾತೆರ್ದ್, ಅ.5 ಕ್ಕ್ ಶ್ರೀ ಕ್ಷೇತ್ರದ ಅಭಿವೃದ್ಧಿದ ರೂವಾರಿ ಜನಾರ್ದನ ಪೂಜಾರಿ ಮೆರೆನ ಮುತಾಲಿಕೆಡ್ ಶೋಭಾಯಾತ್ರೆ ಭಾರಿ ವೈಭೋಗಡ್ ನಡಪರೆ ಉಂಡು. ಸೆ.26 ಕ್ಕ್ ದಸರಾ ಉದಿಪನೊಗು ಜನಾರ್ದನ ಪೂಜಾರ್ಲೆನ್ ಬಿನ್ನಾಪು ಮಲ್ದ. ಆರ್ ಕಾಂಡೆ 11.45 ಕ್ಕ್ ಉದಿಪನ ಮಲ್ಪರೆ ಉಲ್ಲೆರ್ ಪಂಡೆರ್.
ಕ್ಷೇತ್ರಾಡಳಿತ ಸಮಿತಿದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪಾತೆರ್ದ್, ಮಂಗಳೂರು ದಸರಾಗ್ ಈ ಸರ್ತಿ ನಿರೀಕ್ಷೆರ್ದ್ ಲ ಹೆಚ್ಚಿನ ಸಂಖ್ಯೆಡ್ ಭಕ್ತೆರ್ ಬರ್ರೆ ಉಲ್ಲೆರ್. ಪಾರ್ಕಿಂಗ್ ಗ್ ಕೆಲವು ಕಡೆಟ್ಟ್ ವ್ಯವಸ್ಥೆ ಮಲ್ತ್ ದ. ಭಕ್ತೆರೆಗ್ ಅನಾನುಕೂಲ ಆವಂದಿಲೆಕ ತೂಪಿನವು ನಮ್ಮ ಕರ್ತವ್ಯ ಪಂದ್ ಪಂಡೆರ್.
ಅ.5 ಶೋಭಾಯಾತ್ರೆ
ಅ.5 ಕಾಂಡೆ ವಾಗೀಶ್ವರಿ ದುರ್ಗಾಹೋಮ, ಶಿವ ಪೂಜೆ ಬಯ್ಯಡ್ 4 ಗಂಟೆಗ್ ಶ್ರೀ ಶಾರದಾ ದೇವಿ ಬೊಕ್ಕ ನವದುರ್ಗೆಯೆರ್ನ ಮೂರ್ತಿಲೆನ ಶೋಭಾಯಾತ್ರೆ ನಡಪರೆ ಉಂಡು. ಅ.6 ಕಾಂಡೆ ಪೂಜೆ ಬಲಿ, ಮಂಟಪ ಬಲಿ ಮಂಟಪ ಪೂಜೆ ಆದ್ ವಿಸರ್ಜನೆ ನಡಪರೆ ಉಂಡು.ಭಕ್ತೆರೆನ ಅನುಕೂಲೊಗು ಬೋಡಾದ್ ಈ ಸರ್ತಿ ನವದುರ್ಗೆಯೆರ್ ಬೊಕ್ಕ ಶ್ರೀ ಶಾರದಾ ದೇವಿನ ಮೂರ್ತಿಲೆನ ಮೆರವಣಿಗೆ ಎದುರುಡು ಪೋವರೆ ಉಂಡು. ಕಲಾತಂಡೊಲು, ಪಿಲಿ ವೇಷ ಬೊಕ್ಕ ವೇಷಭೂಷಣಲೆನ ಟ್ಯಾಬ್ಪೊ ಪಿರವುಡು ಪೋವರೆ ಉಂಡು ಪಂದ್ ಕ್ಷೇತ್ರಾಭಿವೃದ್ಧಿ ಸಮಿತಿದ ಸದಸ್ಯೆರ್ ಹರಿಕೃಷ್ಣ ಬಂಟ್ವಾಳ ತೆರಿಪಾಯೆರ್.
ಸುದ್ದಿಗೋಷ್ಠಿಡ್ ಕ್ಷೇತ್ರಾಡಳಿತ ಸಮಿತಿದ ಉಪಾಧ್ಯಕ್ಷೆರ್ ಊರ್ಮಿಳಾ ರಮೇಶ್, ಕಾರ್ಯದರ್ಶಿ ಬಿ.ಮಾಧವ ಸುವರ್ಣ, ಟ್ರಸ್ಟಿಲಾಯಿನ ರವಿಶಂಕರ್ ಮಿಜಾರ್, ಕೆ.ಮಹೇಶ್ಚಂದ್ರ, ಎಂ.ಶೇಖರ ಪೂಜಾರಿ, ಸಂತೋಷ್ ಕುಮಾರ್ ಜೆ., ಜಗದೀಪ್ ಡಿ.ಸುವರ್ಣ, ಅಭಿವೃದ್ಧಿ ಸಮಿತಿದ ಕೋ ಚೇರ್ಮನ್ ಡಾ.ಅನಸೂಯಾ ಬಿ.ಟಿ.ಸಾಲ್ಯಾನ್, ಉಪಾಧ್ಯಕ್ಷೆರ್ ಡಾ.ಬಿ.ಜಿ.ಸುವರ್ಣ, ಸದಸ್ಯೆರಾಯಿನ ಕೆ.ಚಿತ್ತರಂಜನ್ ಗರೋಡಿ, ರಾಮನಾಥ್ ಕಾರಂದೂರು, ಕಿಶೋರ್ ದಂಡಕೇರಿ, ಜತಿನ್ ಅತ್ತಾವರ, ಗೌರವಿ ಪಿ.ಕೆ., ಲೀಲಾಕ್ಷ ಕರ್ಕೇರ ಮೊಕುಲು ಮಾತ ಇತ್ತೆರ್.
ಮುಂಡ್ಕೂರ್ : ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಮುಂಡ್ಕೂರ್ ಡ್ ಸೆ.26 ರ್ದ್ ಅ.5 ಮುಟ ಶರನ್ನವರಾತ್ರಿ ಉಚ್ಚಯ ನಡಪರೆ ಉಂಡು.
ಈ ಉಚ್ಚಯಡ್ ದಿನೊಲ ದೇವೆರೆಗ್ ಬೇತೆ ಬೇತೆ ರೀತಿದ ಪೂಜೆಲು ನಡಪುಂಡು. ಅಂಚಾದ್ ಮತ ಭಕ್ತೆರ್ಲಾ ಬತ್ ದ್ ದೇವಿನ ದರ್ಶನ ಮಲ್ತ್ ದ್, ಪ್ರಸಾದ ದೆತೊಂದು ದೇವಿನ ಕೃಪೆಗೆ ಪ್ರಾತರಾವೊಡ್ ಪಂದ್ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್, ಕಾರ್ಯನಿರ್ವಹಣಾ ಅಧಿಕಾರಿ, ಪವಿತ್ರಪಾಣಿ, ಪ್ರಧಾನ ಅರ್ಚಕೆರ್ ಬೊಕ್ಕ ವ್ಯವಸ್ಥಾಪನ ಸಮಿತಿದ ಸದಸ್ಯೆರ್, ದೇವಲ್ಯದ ಸಿಬ್ಬಂದಿ ವರ್ಗದಕುಲ್, ಬೊಕ್ಕ ಇನ್ನಾ, ಮುಂಡ್ಕೂರ್,ಮುಲ್ಲಡ್ಕದ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮೂಲ್ಕಿ : ಬಿಲ್ಲವ ಸಮಾಜ ಸೇವಾ ಸಂಘ (ರಿ.)ಮೂಲ್ಕಿ ಸಂಘಡ್ ಈ ವರ್ಸದ ಶರನ್ನವರಾತ್ರಿ ಉಚ್ಚಯ ಸೆ.26ರ್ದ್ ಅ.4 ಮುಟ್ಟ ನಡಪರೆ ಉಂಡು. ಸೆ.26ದಾನಿ ಬಯ್ಯ 6 ಗಂಟೆಗ್ ಭಾರತೀಯ ಜೀವವಿಮಾ ನಿಗಮ ಮೂಲ್ಕಿ ಶಾಖೆದ ಪ್ರಬಂಧಕೆರ್ ಕೆ.ಪ್ರಕಾಶ್ ಭಜನೆದ ದೀಪ ಉದಿಪನ ಮಲ್ಪೆರೆ ಉಲ್ಲೆರ್.
ಬೊಕ್ಕ ನಡುಕೆರೆ, ಒಡಯರಬೆಟ್ಟು ಗ್ರಾಮಸ್ಥೆರೆರ್ದ್ ಭಜನೆ ಆಯಿನೆರ್ದ್ ಬೊಕ್ಕ ಶಿವಪ್ರಸಾದ್ ನೃತ್ಯ ತಂಡದಕುಲೆರ್ದ್ ಭರತನಾಟ್ಯ ಕಾರ್ಯಕ್ರಮ ನಡಪುಂಡು.
ಸೆ.27ದಾನಿ ಶಿಮಂತೂರು, ಕುಬೆವೂರು ಗ್ರಾಮಸ್ಥೆರೆರ್ದ್ ಭಜನೆ, ಸೆ. 28 ಮಾನಂಪಾಡಿ, ಕೊಯ್ಯಾರು ವಾದ್ಯ ಕೇರಿ,ಬಾಳೆಹಿತ್ಲು ಗ್ರಾಮಸ್ಥೆರೆರ್ದ್ ಭಜನೆ, ಸೆ.29 ಕಕ್ವ, ಕೊಲಕಾಡಿ, ಕಿಲ್ಪಾಡಿ ಗ್ರಾಮಸ್ಥೆರೆರ್ದ್ ಭಜನೆ, ಸೆ.30 ಕೊಳಚಿಕಂಬಳ, ನಡಿಕುದ್ರು ಗ್ರಾಮಸ್ಥೆರೆರ್ದ್ ಭಜನೆ ಬೊಕ್ಕ ಅ.1 ಬಡಗುಹಿತ್ಲು ಗ್ರಾಮಸ್ಥೆರೆರ್ದ್ ಭಜನೆ, ಅ.2 ಕರ್ನಿರೆ, ಕವತ್ತಾರು,ಕೊಲ್ಲೂರು,ಗ್ರಾಮಸ್ಥೆರೆರ್ದ್ ಭಜನೆ, ಅ.3 ಕೊಕ್ಕರ್ ಕಲ್, ಕನ್ನಡೆರಬೆಟ್ಟು, ಮೂಡುಕಾರ್ನಾಡು, ಪಡುಕಾರ್ನಾಡು, ಗ್ರಾಮಸ್ಥೆರೆರ್ದ್ ಭಜನೆ, ಅ.4 ಬಿಲ್ಲವ ಸಮಾಜ ಸಂಘ(ರಿ.)ಮೂಲ್ಕಿ ಶ್ರೀ ನಾರಾಯಣಗುರು ಮಹಿಳಾ ಮಂಡಳಿ, ಶ್ರೀ ನಾರಾಯಣಗುರು ಸೇವಾದಳ ಮೊಕಲೆರ್ದ್ ಭಜನೆ ಕಾರ್ಯಕ್ರಮಲು ನಡಪರೆ ಉಂಡು. ಅಂಚನೆ ದಿನೊಲ ಬಯ್ಯಗ್ ಭಜನೆ ಅಯಿ ಬೊಕ್ಕ ಮಹಾಪೂಜೆ ನಡಪರೆ ಉಂಡು. ಅಂಚನೆ ಭಕ್ತಾದಿಲು ಜಾಸ್ತಿ ಜನಸಂಖ್ಯೆಡ್ ಸೇರ್ದ್ ಶ್ರೀ ಶಾರದಮಾತೆ ಬೊಕ್ಕ ಶ್ರೀ ಗುರುವರ್ಯನ ಕೃಪೆಗೆ ಪಾತ್ರರಾವೊಡ್. ಇಸೇಸವಾದ್ ಈ ಬಗೆಟ್ 100ರೂ.ರ್ದ್ ಲ ಜಾಸ್ತಿದ ಪೂಜೆಲ ಮಲ್ಪೊಲಿ. ಅಂಚನೆ ಬೊಲ್ಪುಗ್, ಮಧ್ಯಾಹ್ನ, ಕತ್ತಲೆ ಶಾರದಾಂಬೆ ಬೊಕ್ಕ ಗುರುಪೂಜೆ ಮಲ್ಪೆರೆ ಅವಕಾಶ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಕನ್ನಡ ಸಂಘ ಬಹರೇನ್ ಮೊಕಲೆಡ್ದ್ ನಿರ್ಮಾಣ ಆಯಿನ ಪೊಸ “ಕನ್ನಡ ಭವನ” ಸೆ. 23 ಕ್ಕ್ ಸುಕ್ರಾರ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೇರ್ ಲೋಕಾರ್ಪಣೆ ಮಲ್ಪರೆ ಉಲ್ಲೆರ್ ಪಂದ್ ಕನ್ನಡ ಭವನ ಕಟ್ಟಡ ಸಮಿತಿದ ಅಧ್ಯಕ್ಷೆರಾಯಿನ ಆಸ್ಟಿನ್ ಸಂತೋಷ್ ತೆರಿಪಾಯೆರ್.
ಕಾಂಡೆ 9 ಗಂಟೆಗ್ ಬಿನ್ನೆರ್ ನ ಸಮ್ಮುಖಡ್ ವರ್ಚುವಲ್ ವೇದಿಕೆದ ಮುಖೇನ ಪೊಸ ಕನ್ನಡ ಭವನ ಉದಿಪನ ಆದಿತ್ತ್ದ್, ಬಯ್ಯ 5 ಕ್ಕ್ ಜಿನ್ಜ್ ಡ್ ಇಪ್ಪುನ ನ್ಯೂ ಮಿಲೇನಿಯಮ್ ಶಾಲೆದ ಕಿಂಗ್ಡಮ್ ಚಾವಡಿಡ್ ಉದಿಪನ ಸಮಾರಂಭಗ್ ಸಂಬಂದಿಸಾಯಿನ ಕಾರ್ಯಕ್ರಮಲು ನಡಪರೆ ಉಂಡು ಪಂದ್ ಆರ್ ತೆರಿಪಾದೆರ್.
ಭಾರತದ ರಾಯಭಾರಿ ಗೌರವಾನ್ವಿತೆರ್ ಪೀಯೂಷ್ ಶ್ರೀ ವಾಸ್ತವ ಮೇರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಇತ್ತ್ದ್, ಸಮಾರಂಭದ ಅಧ್ಯಕ್ಷತೆನ್ ಕನ್ನಡ ಸಂಘದ ಅಧ್ಯಕ್ಷೆರ್ ಪ್ರದೀಪ್ ಶೆಟ್ಟಿ ವಹಿಸೊನರೆ ಉಲ್ಲೆರ್.
ಲೇಸ್ ಡ್ ಕರ್ನಾಟಕ ಬಿಜೆಪಿದ ಉಪಾಧ್ಯಕ್ಷೆರ್ ಬಿ. ವೈ. ವಿಜಯೇಂದ್ರ, ಕನ್ನಡ ಸಾಹಿತ್ಯ ಪರಿಷತ್ತಿದ ಅಧ್ಯಕ್ಷೆರ್ ಡಾ. ಮಹೇಶ್ ಜೋಶಿ, ಪೂರ್ವಾಧ್ಯಕ್ಷೆರ್ ಡಾ. ಮನು ಬಳಿಗಾರ್, ಕರ್ನಾಟಕ ಹಿಂದುಳಿದ ಆಯೋಗದ ಅಧ್ಯಕ್ಷೆರ್ ಕೆ. ಜಯಪ್ರಕಾಶ್ ಹೆಗ್ಡೆ, ಕರ್ನಾಟಕ ಅನಿವಾಸಿ ವೇದಿಕೆದ ಮಾಜಿ ಉಪಾಧ್ಯಕ್ಷೆರ್ ಡಾ. ಆರತಿ ಕೃಷ್ಣ, ವಿಶ್ವವಾಣಿ ಪತ್ರಿಕೆದ ಪ್ರಧಾನ ಸಂಪಾದಕೆರ್ ವಿಶ್ವೇಶ್ವರ್ ಭಟ್, ಸುವರ್ಣ ನ್ಯೂಸ್ ಬೊಕ್ಕ ಕನ್ನಡ ಪ್ರಭದ ಮುಖ್ಯ ಸಂಪಾದಕೆರ್ ರವಿ ಹೆಗ್ಡೆ, ಎಂ.ಆರ್.ಜಿ. ಗ್ರೂಪ್ ಬೆಂಗ್ಲೂರು ಉಂದೆತ್ತ ಅಧ್ಯಕ್ಷೆರ್ ಕೆ. ಪ್ರಕಾಶ್ ಶೆಟ್ಟಿ, ಬೆಂಗ್ಲೂರ್ ದ ಉದ್ಯಮಿ ಆನಂದ್ ಭಟ್, ಬೆಂಗ್ಲೂರ್ ದ ಮಾಜಿ ಕೌನ್ಸಿಲ್ಲರ್ ಕೆ. ಮೋಹನ್ ದೇವ್ ಆಳ್ವಾ ಕನ್ನಡ ಪ್ರಭ ಪುರವಣಿ ಸಂಪಾದಕೆರ್ ಗಿರೀಶ್ ರಾವ್ ಹತ್ವಾರ್ (ಜೋಗಿ) ಅಂಚನೆ ಬಹರೈನ್ ದ ಮಲ್ಲ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್.
ಉಂದು ಭಾರತದ ಪಿದಯ್ ನಿರ್ಮಾಣ ಆಯಿನ ಸುರುತ್ತ ಅಂತರ್ರಾಷ್ಟ್ರೀಯ ಕನ್ನಡ ಭವನ ಆದಿತ್ತ್ ದ್, ಸುಮಾರ್ ಪತ್ತ್ ಕೋಟಿ ಕರ್ಚಿಡ್ ಮೂಜಿ ಮಾಲಿಗೆದ ಪೊಸ ಕಟ್ವಾಣ ಕಟ್ಟಾದೆರ್ .
ಕನ್ನಡ ಪೊಸ ಕಟ್ವಾನೊಡ್ ಗ್ರಂಥಾಲಯ, ವಿಶಾಲವಾಯಿನ ಸಭಾಂಗಣ, ಕನ್ನಡ ಕಲಿಕಾ ಕೇಂದ್ರ, ಯಕ್ಷಗಾನ, ಸಾಂಸ್ಕೃತಿಕ ಬೊಕ್ಕ ಕ್ರೀಡಾ ಚಟುವಟಿಕೆಲು, ಅಗತ್ಯ ಇಪ್ಪುನ ಕೊಠಡಿಲು ಬೊಕ್ಕ ವಾಣಿಜ್ಯ ಸಂಕೀರ್ಣಲು ಉಂಡು. ಕರ್ನಾಟಕ ಸರಕಾರ 2 ಕೋಟಿ ರೂಪಾಯಿನ್ ಈ ಕನ್ನಡ ಭವನಗ್ ಅನುದಾನವಾದ್ ಕೊರ್ತೆರ್.
ಈ ಸಂಘ ಕರ್ನಾಟಕ ಕರಾವಳಿದ ಜವನೆರೆರ್ದ್ 1977 ಟ್ ಸ್ಥಾಪನೆ ಆದಿತ್ತ್ ದ್, ಬಹರೈನ್ ಸರಕಾರದ ಸಾಮಾಜಿಕ ಅಭಿವೃದ್ಧಿ ಸಚಿವಾಲಯರ್ದ್ ನೋಂದಾವಣೆ ಆತ್ಂಡ್. ಕರಿನ 45 ವರುಷರ್ದ್ ಕನ್ನಡ ಭಾಷೆ ಅಂಚನೆ ಸಂಸ್ಕೃತಿದ ಸೇವೆನ್ ಮಲ್ತೊಂದು ಬೈದ್oಡ್. ಡಾ. ಧರ್ಮಸ್ಥಳ ವೀರೇಂದ್ರ ಹೆಗ್ಡೆಡೆರ್, ವರನಟ ಡಾ. ರಾಜ್ ಕುಮಾರ್, ಜ್ಞಾನಪೀಠ ಪ್ರಶಸ್ತಿ ವಿಜೇತೆರ್ ಯು. ಆರ್ . ಅನಂತಮೂರ್ತಿ, ಮಾಜಿ ಲೋಕಾಯುಕ್ತೆರ್ ಜಸ್ಟಿಸ್ ಸಂತೋಷ್ ಹೆಗ್ಗಡೆ, ಮಾಜಿ ಮುಖ್ಯಮಂತ್ರಿ ಬಿ.ಎಸ್ . ಯಡಿಯೂರಪ್ಪ, ಸಾಹಿತಿ ಎಸ್ ಎಲ್. ಭೈರಪ್ಪ, ಇಂಚಿತ್ತಿನ ಬಿನ್ನೆರ್ ಕನ್ನಡ ಸಂಘನ್ ಈ ಪಿರವುದ ವರುಷಡ್ ಸಂದರ್ಶಿಸಾದೆರ್.
ಕಾಪುದ ಕಡಲ್ ಡ್ ಶಾರದೆ, ನವದುರ್ಗೆಯೆರೆಗ್ ಗಂಗಾರತಿ, 30 ಬೋಟುಡು ದೀಪಾಲಂಕಾರ, ಮೂರ್ತಿಲೆನ ಜಲಸ್ತಂಭನ
ಉಚ್ಚಿಲ : ಮೈಸೂರು ದಸರಾ, ಮಂಗಳೂರು ದಸರಾ, ಮಡಿಕೇರಿ ದಸರಾ ಇತ್ತಿಲೆಕನೆ ಒಡಿಪು ಜಿಲ್ಲೆಡ್ ಉಂದುವೇ ಸೂರೂತ್ತ ಸರ್ತಿ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನ ದ ವಠಾರೊಡು “ಉಚ್ಚಿಲ ದಸರಾ 2022 ” ಭಾರಿ ಗೌಜಿಡ್ ಆಚರಣೆ ಮಲ್ಪರೆ ದ.ಕ. ಮೊಗವೀರ ಮಹಾಸಭಾ ಅಟ್ಟಣೆ ಮಲ್ದ್ಂಡ್ ಪಂದ್ ನಾಡೋಜ ಡಾ.ಜಿ.ಶಂಕರ್ ತೆರಿಪಾಯೆರ್.
ಆರ್ ಉಚ್ಚಿಲದ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನದ ಕಚೇರಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.
ಉಚ್ಚಿಲ ದೇವಸ್ಥಾನದ ಕೈತಲ್ ಪೊಸತ್ತಾದ್ ನಿರ್ಮಾಣವಾಯಿನ “ಶ್ರೀಮತಿ ಶಾಲಿನಿ ನಾಡೋಜ ಡಾ.ಜಿ.ಶಂಕರ್ ಸಭಾಂಗಣ”ಡ್ ಸೆಪ್ಟೆಂಬರ್ 26 ತಾರೀಕ್ ರ್ದ್ ಅಕ್ಟೋಬರ್ 10 ತಾರೀಕ್ ಮುಟ್ಟ ಶಾರದಾ ದೇವಿ, ನವ ದುರ್ಗೆಯೆರ್ ನ ಮೂರ್ತಿಲೆನ ಪ್ರತಿಷ್ಠಾಪನೆ ಆದ್ ನಿತ್ಯಲ ಪೂಜೆ, ಭಜನೆ, ಚಂಡಿಕಾಯಾಗ, ಅನ್ನಸಂತರ್ಪಣೆ, ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು ಪಂಡೆರ್.
ಉಚ್ಚಿಲ ದಸರಾಗ್ ಅಂದಾಜಿ 3 ಕೋಟಿ ರೂ.ದ ಕರ್ಚಿ ಉಂಡು. ದಾನಿಲೆನ ಸಾಕಾರ ಬೊಕ್ಕ ಸರಕಾರದ ಅನುದಾನದ ಮುಕೇನ ಉಚ್ಚಿಲ ದಸರಾ ಅದ್ಧೂರಿಯಾದ್ ನಡಪರೆ ಉಂಡು ಪಂಡೆರ್.
ಸೆ.24 ರಾತ್ರೆ 7 ಗಂಟೆಗ್ ಉಚ್ಚಿಲ ಪರಿಸರ ಬೊಕ್ಕ ಪೆಜಮಾಡಿರ್ದ್ ಕಾಪು ದೀಪಸ್ತಂಭ ಮುಟ್ಟದ ವಿದ್ಯುತ್ ದೀಪಾಲಂಕಾರದ ಉದಿಪನ ಆವರೆ ಉಂಡು.
ಸೆ.26 ಕಾಂಡೆ 1.70 ಕೋಟಿ ರೂ. ಕರ್ಚಿದ ಶ್ರೀಮತಿ ಶಾಲಿನಿ ಜಿ.ಶಂಕರ್ ಸಭಾಂಗಣದ ಉದಿಪನ, ಶಾರದೆ ನವದುರ್ಗೆಯೆರೆನ ಮೂರ್ತಿ ಪ್ರತಿಷ್ಠಾಪನೆ ಆವರೆ ಉಂಡು ಪಂದ್ ಜಿ.ಶಂಕರ್ ತೆರಿಪಾಯೆರ್.
ಪ್ರತಿದಿನ ಕಾಂಡೆರ್ದ್ ಬಯ್ಯ ಮುಟ್ಟ ಭಜನಾ ಸೇವೆ, ಚಂಡಿಕಾ ಹೋಮ, ತ್ರಿಕಾಲಪೂಜೆ ಅನ್ನಸಂತರ್ಪಣೆ, ಮಹಾಲಕ್ಷ್ಮಿ ದೇವಸ್ಥಾನ ಡ್ ಬಯ್ಯಡ್ ಕಲ್ಪೋಕ್ತ ಪೂಜೆ, ಇಸ್ಕಾನ್ ರ್ದ್ ಪ್ರಸಾದ ವಿತರಣೆ ನಡಪರೆ ಉಂಡು ಪಂಡೆರ್.
ಶೋಭಾಯತ್ರೆದ ಮೆರವಣಿಗೆ ಒಟ್ಟು 24 ಕಿ.ಮೀ. ಪೋವರೆ ಉಂಡು. ಅಯಿಟ್ಟ್ 4 ಕಿ.ಮೀ. ನಡತೊಂದೇ ಪೋವರೆ ಉಂಡು. ಶಾರದೆ ಬೊಕ್ಕ ನವದುರ್ಗೆನ ಪ್ರತಿಷ್ಠಾಪನೆ ಗ್ ಮಂಟಪ ತಯಾರಾತ್ಂಡ್. ಶಿವಮೊಗ್ಗದ ಕಲಾವಿದೆರ್ ಮೂರ್ತಿ ರಚನೆದ ಬೇಲೆ ಮಲ್ತೊಂದುಲ್ಲೆರ್ ಪಂದ್ ಆರ್ ತೆರಿಪಾಯೆರ್.
ಸುದ್ಧಿಗೋಷ್ಠಿಡ್ ದ.ಕ.ಮೊಗವೀರ ಮಹಾಜನ ಸಂಘದ ಅಧ್ಯಕ್ಷೆರ್ ಜಯ ಸಿ.ಕೋಟ್ಯಾನ್ ಬೆಳ್ಳಂಪಳ್ಳಿ, ಪ್ರಧಾನ ಕಾರ್ಯದರ್ಶಿ ಸುಧಾಕರ ಕುಂದರ್, ಉಪಾಧ್ಯಕ್ಷೆರ್ ಸುಭಾಷ್ಚಂದ್ರ ಕಾಂಚನ್, ಕ್ಷೇತ್ರಾಡಳಿತ ಸಮಿತಿದ ಅಧ್ಯಕ್ಷೆರ್ ವಾಸುದೇವ ಸಾಲ್ಯಾನ್, ದ.ಕ.ಮೊಗವೀರ ಮಹಿಳಾ ಸಂಘ ಉಚ್ಚಿಲದ ಅಧ್ಯಕ್ಷೆರ್ ಅಪ್ಪಿ ಎಸ್.ಸಾಲ್ಯಾನ್ ಇತ್ತೆರ್.
ಅ.5 ಬುಧಾರ ವಿಜಯದಶಮಿದ ದಿನ ಮಧ್ಯಾಹ್ನ 3 ಗಂಟೆಗ್ ಭಾರಿ ಗೌಜಿದ ಶೋಭಾಯಾತ್ರೆದ ಮೆರವಣಿಗೆ ನಡಪರೆ ಉಂಡು. ಶೋಭಾಯಾತ್ರೆ ಉಚ್ಚಿಲ ದೇವಲ್ಯರ್ದ್ ಪಿದಾಡ್ದ್ ಹೈವೇಡ್ ಎರ್ಮಾಳ್, ಪಡ್ಡೆದ್ರ,ಪೆಜಮಾಡಿ ಟೋಲ್ ಮುಟ್ಟ ಪೋದು ಪಿರ ಪಡ್ಡೆದ್ರ, ಎರ್ಮಾಳ್,ಉಚ್ಚಿಲ, ಮೂಳೂರು, ಕೊಪ್ಪಲಂಗಡಿರ್ದ್ ಕಾಪು ದೀಪಸ್ತಂಭ ಮುಟ್ಟ ಪೋವರೆ ಉಂಡು. ನಲಿಕೆದ ಭಜನಾ ತಂಡ , ಪಿಲಿ ವೇಷ, ಬೇತೆ ಬೇತೆ ವೇಷಲು ಸೇರ್ದ್ 50 ರ್ದ್ ಲ ಎಚ್ಚ ಟ್ಯಾಬ್ಲೋ ಸಮೇತ ಶೋಭಾಯಾತ್ರೆ ನಡಪರೆ ಉಂಡು ಪಂದ್ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನದ ಕ್ಷೇತ್ರಾಡಳಿತ ಸಮಿತಿದ ಅಧ್ಯಕ್ಷೆರ್ ವಾಸುದೇವ ಸಾಲ್ಯಾನ್ ತೆರಿಪಾಯೆರ್.
ಕಾಪು ಕಡಲ್ ಡ್ ವಿಶೇಷ ರೀತಿಡ್ ಜಲಸ್ಥಂಭನ
ಅ.5 ತಾರೀಕ್ ಗ್ ರಾತ್ರೆ 11 ಗಂಟೆಗ್ ಶಾರದೆ ಬೊಕ್ಕ ನವದುರ್ಗೆಯೆರೆನ ಮೂರ್ತಿಲೆನ ವಿಸರ್ಜನೆ ವಿಶೇಷ ರೀತಿಡ್ ನಡಪರೆ ಉಂಡು ಪಂದ್ ಡಾ.ಜಿ.ಶಂಕರ್ ತೆರಿಪಾಯೆರ್.
ಕಾಪು ದೀಪಸ್ತಂಭದಲ್ಪ ಕಾಶಿಡ್ ಆಪಿನ ಗಂಗಾರತಿದ ಲೆಕ 10 ಕಡೆಟ್ಟ್ ಗಂಗಾರತಿ ನಡಪರೆ ಉಂಡು.ಅವೆರ್ದ್ ಬೊಕ್ಕ10 ಸಾರ ಪೊಂಜೊವುಲೆರ್ದ್ ಶಾರದೆ ಬೊಕ್ಕ ದುರ್ಗೆಯೆರೆಗ್ ಸಾಮೂಹಿಕ ಮಂಗಳಾರತಿ ನಡಪರೆ ಉಂಡು. ಅವತ್ತಾಂದೆ ಮಲ್ಪೆದ ಸೈಂಟ್ ಮೇರೀಸ್ ಬೀಚ್ ಗ್ ಪೋಪಿನ 30 ಬೋಟುಲೆನ್ ಕಾಪುಗು ಕನತ್ ದ್ ಸುತ್ತ ಉಂತಾದ್ ಲೈಟಿಂಗ್ ದ ವ್ಯವಸ್ಥೆ ಮಲ್ತ್ ದ್ ಅವೆತ್ತ ನಡುಟ್ಟು ಓಡದ ಮುಕೇನ ಒಂಜೊಂಜೇ ಮೂರ್ತಿಲೆನ್ ಗೌರವಪೂರ್ವಕವಾದ್ ವಿಧಿ ಪ್ರಕಾರ ವಿಸರ್ಜನೆ ಮಲ್ಪರೆ ಉಂಡು ಪಂದ್ ಆರ್ ಪಂಡೆರ್.
ಅ.5 ವಿಜಯದಶಮಿದ ದಿನ ಶೋಭಾಯಾತ್ರೆಡ್ 25,000 ಜನ ಸೇರುನ ನಿರೀಕ್ಷೆ ಉಂಡು. ಒಟ್ಟಾರೆ 10 ದಿನತ್ತ ದಸರಾ ಉಚ್ಚಯೊಡು ಸುಮಾರ್ 5 ಲಕ್ಷ ಭಕ್ತೆರ್ ಶ್ರೀ ಕ್ಷೇತ್ರೊಗು ಭೇಟಿ ಕೊರ್ಪಿನ ಸಾಧ್ಯತೆ ಉಂಡು.
– ನಾಡೋಜ ಡಾ.ಜಿ.ಶಂಕರ್,
ಗೌರವ ಸಲಹೆಗಾರೆರ್
Ucchila Dasshara:To be on scale with Mysore, Mangalore Dasshara — Nadoja Dr G Shankar
Sharada mata, Navadurga to have Gangarathi on the seashore
Ucchila: The Dasshara celebrations at Ucchila Mahalakshmi temple in Udupi district is being planned in a grand manner for the first time this year by the DK district Mogaveera Mahasabha informed Dr G Shankar .
The festivities will start from the 26th of September and will go on till October 10th.
Bajans,holy customs , pooja rituals cultural programs with Mahaprasad to follow will be provided on all days.
ಬೊಲ್ತೇರ್: ತುಳುನಾಡ್ ಡ್ ಶಿಕ್ಷಣ ಬೊಕ್ಕ ಆಡಳಿತೆಡ್ ತುಳು ಬಾಸೆ ಕಡ್ಡಾಯ ಮಲ್ಪೊಡು ಪಂದ್ ತುಳುವೆರೆ ಪಕ್ಷ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೆರೆಗ್ ಬಿನ್ನಾಪು ಮಲ್ದ್ಂಡ್.
ಕನ್ನಡ ನಾಡ್ ಡ್ ಕನ್ನಡ ಬಾಸೆನ್ ಆಡಳಿತ ಬೊಕ್ಕ ಶಿಕ್ಷಣೊಡು ಕಡ್ಡಾಯ ಮಲ್ಪುನೆಕ್ಕ್ ನಮ್ಮ ದಾಲ ಅಡ್ಡಿ ಇಜ್ಜಿ, ಆಂಡ ಒಡಿಪು, ದ.ಕ ಜಿಲ್ಲೆ ಬೊಕ್ಕ ಮಲೆನಾಡ್ ದ ತುಳುಬಾಷಿಕ ಜಾಗೆಡ್ ಶಿಕ್ಷಣ ಬೊಕ್ಕ ಆಡಳಿತೊಡು ತುಳು ಬಾಸೆ ಅಂಚೆನೆ ಕೊಡಗು ಜಿಲ್ಲೆ ಡ್ ಕೊಡವ ಬಾಸೆನ್ ಕಡ್ಡಾಯ ಮಲ್ಪೊಡು.
ಈ ಮುಕೇನ ಈ ಭಾಗೊಡು ಕನ್ನಡ ಕಡ್ಡಾಯ ಪಂದ್ ಒತ್ತಡ ಪಾಡುನ ಸರಿಯತ್ತ್ ಪಂದ್ ತುಳುವೆರೆ ಪಕ್ಷದ ಗುರ್ಕಾರ್ ಶೈಲೇಶ್ ಆರ್.ಜೆ ಬೊಕ್ಕ ಸರ್ವ ಸದಸ್ಯೆರ್ ಮುಖ್ಯಮಂತ್ರಿಲೆಗ್ ಕಾಕಜಿ ಬರೆದ್ ಬಿನ್ನಾಪು ಮಲ್ದೆರ್.
ಅವ್ವತ್ತಾಂದೆ ಭಾರತ ದೇಶದ ಸಂವಿಧಾನದ 345 ನೇ ವಿಧಿತ್ತ ಪಿರ್ಕಾರ ತುಳುನಾಡ್ ಡ್ ತುಳು ಬಾಸೆನ್ ಅಂಚೆನೆ ಕೊಡಗುಡು ಕೊಡವ ಬಾಸೆನ್ ರಾಜ್ಯದ ಅಧಿಕೃತ ಬಾಸೆಂದ್ ಘೋಷಣೆ ಮಲ್ಪೊಡು ಪಂದ್ ಆರ್ ಬಿನ್ನಾಪು ಮಲ್ದೆರ್.
Tuluvere Paksha urges for making Tulu language compulsory in official usage and education in Tulunadu.
Bheltangady: Tulu language must be made compulsory in official usage and education in Tulunadu urged Tuluvere Paksha in a request sent to the CM Basavaraj Bommai.
In the coastal districts of DK, Udupi and Kasaragod which is basically Tulunadu instead of making Kannada compulsory, the push must be for Tulu said president of Tuluvere Paksha Shailesh R J and other members. As per section 345 of the constitution Tulu must be compulsory in Tulunadu and Kodava language in Kodagu.
