ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ನಾಟಕೊಲೆರ್ದ್ ನಮ್ಮ ಜೀವನಡ್ ಎಡ್ಡೆ ಪರಿವರ್ತನೆ ಆವೊಡು : ಉಮಾನಾಥ ಕೋಟ್ಯಾನ್

ಹಳೆಯಂಗಡಿ : ನಮ್ಮ ಜೀವನನೇ ಒಂಜಿ ನಾಟಕ. ನಮ್ಮ ಪ್ರತಿ ಒರಿಲ ಒಂಜೊಂಜಿ ಪಾತ್ರಧಾರಿಲು. ನಮ ಮಲ್ಪುನ ಬೇಲೆನೇ ಅಭಿನಯ. ದೇವೆರೇ ನಿರ್ದೇಶಕೆರ್. ಇತ್ತೆದ ನಾಟಕೊಲೆಡ್ ಕಾಮಿಡಿಗೇ ಎಚ್ಚಿನ ಡಿಮಾಂಡ್ ಉಂಡು. ಆಂಡ
ದುಂಬುದ ನಾಟಕೊಲೆಡ್ ಎಡ್ಡೆ ನೀತಿ ಪಾಠ
ಇತ್ತ್ಂಡ್. ಅವೇತೋ ಜನ ಆ ನೀತಿನ್ ಅಕ್ಲೆನ ಜೀವನೊಡು ದೆತೊಂದು ಪರಿವರ್ತನೆ ಆತೆರ್. ನಾಟಕರ್ದ್ ಮಾತೆರ್ನಲ ಜೀವನಡ್ ಎಡ್ಡೆ ಪರಿವರ್ತನೆ ಆವೊಡು ಪಂದ್ ಶಾಸಕೆರ್
ಉಮಾನಾಥ ಕೋಟ್ಯಾನ್ ಪಂಡೆರ್.

ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆತಿನ ಹಳೆಯಂಗಡಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ ದ ಬಂಗಾರ್ ಪರ್ಬ ಅಂಚೆನೆ ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ ದ ಬೊಳ್ಳಿ ಪರ್ಬದ ಉಚ್ಚಯ ನಿಲೆಟ್ಟ್ ನ.4 ಶನಿಯಾರ ಬಯ್ಯಗ್ ತುಳು ನಾಟಕ ಪಂತೊನು ಉದಿಪನ ಮಲ್ತ್ ದ್ ಆರ್ ಪಾತೆರಿಯೆರ್.

ನಾಟಕ ಪಂತೊಲೆಡ್ ಇನಾಮು ಗೆಂದುನು ಮುಖ್ಯ ಅತ್ತ್, ಪಾಲ್ ಪಡೆವುನು ಮುಖ್ಯ . ಈ ಮುಕೇನ ತೀರ್ಪುಗಾರೆರ್ ಪಂಡಿಲೆಕ ತಪ್ಪುಲೆನ್ ತಿದ್ದೊನರೆ ಅವಕಾಶ ಉಂಡು ಪಂದ್ ಆರ್ ಪಂಡೆರ್.

ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ನಾಟಕ ಸಮಿತಿದ ಸಂಚಾಲಕೆರ್, ಒಡಿಪು ತುಳುಕೂಟದ ಪ್ರಭಾಕರ ಭಂಡಾರಿ ಮೇರ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಪುನರೂರು ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಪಟೇಲ್ ವಾಸುದೇವ ರಾವ್ ಪುನರೂರು, ಪಡುಪಣಂಬೂರು ಸೇವಾ ಸಹಕಾರ ಸಂಘದ ಅಧ್ಯಕ್ಷೆರ್ ಸತೀಶ್ ಭಟ್ ಕೊರುವೇಲ್ ಬತ್ತಿತ್ತೆರ್.

ಸುವರ್ಣ ಮಹೋತ್ಸವ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಕಾರ್ಯಾಧ್ಯಕ್ಷೆರ್ ಸುಧಾಕರ ಅಮೀನ್, ಯುವಕ ಮಂಡಲದ ಅಧ್ಯಕ್ಷೆರ್ ನಾಗೇಶ್ ಟಿ.ಜಿ., ಸಲಹಾ ಸಮಿತಿದ ಮೋಹನ್ ಬಂಗೇರ, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ರೇಷ್ಮಾ ಬಾನು, ಯುವತಿ ಮಂಡಲದ ಅಧ್ಯಕ್ಷೆರ್ ರಶ್ವಿತಾ ಮಿತ್ತರ್ಮೆಡ್ ಇತ್ತೆರ್.

ಕಾರ್ಯಾಧ್ಯಕ್ಷೆರ್ ಸುಧಾಕರ ಅಮೀನ್ ಬಿನ್ನೆರೆನ್ ಎದ್ಕೊಂಡೆರ್.

ಗೌ.ಪ್ರ.ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಸಭೆ ಸುಧಾರಿಕೆ ಮಲ್ತೆರ್. ಯುವಕ ಮಂಡಲದ ಅಧ್ಯಕ್ಷೆರ್ ಗಣೇಶ್ ಟಿ. ಜಿ. ಸೊಲ್ಮೆ ಸಂದಾಯೆರ್.

ಯುವಕ ಮಂಡಲದ ಬೊಳ್ಳೂರು ವಾರಿಜ ವಾಸುದೇವ ಕಲಾ ವೇದಿಕೆಡ್ ಶನಿಯಾರ ಕೂಡ್ದಿ ಕಲಾವಿದೆರ್, ಪೆರ್ಡೂರು ಕೂಟದಕ್ಲೆರ್ದ್
ಎರುಮೈಂದೆ ನಾಟಕ ನಡತ್ಂಡ್.

ನ. 5 ರ್ದ್ ಪ್ರತಿದಿನಲ ಕ್ರಮವಾದ್ ಬಯ್ಯಡ್ ನಿರೆಲ್, ಪನರೆ ಪೋವೊಡ್ಚಿ, ಈ ದಾಯೆ ಪಾತೆರುಜ? ನಾಲಾಯಿ ಮಗುರುಜಿ, ಪನೊಡಿತ್ತಿಂಡ್ ಸ್ಸಾರಿ ಪನ್ಪಿನ ನಾಟಕಲೆನ ಪ್ರದರ್ಶನ ಉಂಡು.