Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

‘ಆಸ್ಪತ್ರೆದ ಚಿಕಿತ್ಸೆದ ಶುಲ್ಕ ಪಟ್ಟಿನ್ ಕಡ್ಡಾಯವಾದ್ ಪ್ರಕಟ ಮಲ್ಪೊಡು’

ಖಾಸಗಿ ಆಸ್ಪತ್ರೆಗಳಿಗೆ ಆರೋಗ್ಯ ಇಲಾಖೆ ಎಚ್ಚರಿಕೆ

ಬೆಂಗಳೂರು : ರಾಜ್ಯದ ಖಾಸಗಿ ಆಸ್ಪತ್ರೆಲೆಡ್ ವೈದ್ಯಕೀಯ ಚಿಕಿತ್ಸೆದ ಫೀಸ್‌ದ ಪಟ್ಟಿನ್ ಕಡ್ಡಾಯವಾದ್ ಪ್ರದರ್ಶನ ಮಲ್ಪೊಡು ಪಂಡ್‌ದ್ ಆರೋಗ್ಯ ಇಲಾಖೆ ಖಡಕ್ ಸೂಚನೆ ಕೊರ್ತುಂಡು.
ಈ ನಿಯಮ ಪಾಲನೆ ಆಪುಂಡಾ ಇಜ್ಜಾ ಪಂಡ್‌ದ್ ಪರಿಶೀಲನೆ ಮಲ್ಪರೆ ರಾಜ್ಯದ ಮಾತಾ ಜಿಲ್ಲಾ ಆರೋಗ್ಯಾಧಿಕಾರಿಲೆಗ್ ನಿರ್ದೇಶನ ಕೊರ್ತುಂಡು.
ದರ ಪಟ್ಟಿ ಪ್ರದರ್ಶನ ಮಲ್ಪಂದಿನ ಆಸ್ಪತ್ರೆದ ವಿರುದ್ಧ ಕಾನೂನು ಕ್ರಮ ದೆತೊನುನ ಎಚ್ಚರಿಕೆನ್‌ಲ ಇಲಾಖೆ ಕೊರ್ತುಂಡು.
ಖಾಸಗಿ ಆಸ್ಪತ್ರೆಲೆಡ್ ಚಿಕಿತ್ಸೆ ಕೊರ್ಪಿನೆರ್ದ್ ದುಂಬೇ ರೋಗಿಲು ಬೊಕ್ಕ ಸಂಬಂಧಿಲೆಗ್ ಚಿಕಿತ್ಸಾ ಕರ್ಚಿದ ಬಗ್ಗೆ ಸ್ಪಷ್ಟ ಮಾಹಿತಿ ತಿಕ್ಕೊಡು ಪನ್ಪಿನ ಉದ್ದೇಶಡ್ ಈ ಕ್ರಮ ದೆತೊಂದೆರ್.

ತೆತ್ತಿದ ಗಾಡಿಡ್ ಸಾಗಾವೊಂದಿತ್ತಿನ 16 ಪೆತ್ತ ಕಂಜಿಲೆನ ರಕ್ಷಣೆ : 2 ಜನ ಅರೆಸ್ಟ್

ಕುಡ್ಲ : ಪಂಪ್‌ವೆಲ್ ಕೈತಲ್ ತೆತ್ತಿ ಕೊನೊಪಿನ ಗಾಡಿಡ್ ಅಕ್ರಮವಾದ್ ಸಾಗಾವೊಂದಿತ್ತಿನ 16 ಪೆತ್ತ ಕಂಜಿಲೆನ್ ಕಂಕನಾಡಿ ಪೊಲೀಸೆರ್ ರಕ್ಷಣೆ ಮಲ್ದೆರ್.

ಈ ಕೇಸ್‌ಡ್ ಪೊಲೀಸೆರ್ ಗಾಡಿದ ಡ್ರೈವರ್ ಮೈಸೂರು ಮೂಲದ ಮೊಹಮ್ಮದ್ ರಫೀಕ್ (52) ಬೊಕ್ಕ ರೆಹಮಾನ್ ಪನ್ಪಿನಕ್ಲೆನ್ ಅರೆಸ್ಟ್ ಮಲ್ದೆರ್.
ಪೊಲೀಸ್ ಮೂಲದ ಪ್ರಕಾರ, ತೆತ್ತಿ ಸಾಗಾಟ ಮಲ್ಪುನ ‘ಸ್ಟಾರ್ ಎಗ್’ ಪಂಡ್‌ದ್ ಬರೆತಿನ ಗಾಡಿಡ್ ಅಕ್ರಮವಾದ್ ಗೋ ಸಾಗಾಟ ಮಲ್ಪುನೆತ್ತ ಬಗೆಟ್ಟ್ ಮಾಹಿತಿ ಬೈದಿತ್ತ್ಂಡ್. ಈ ಮಾಹಿತಿದ ಆಧಾರಡ್ ಪೊಲೀಸೆರ್ ಎನ್ಎಚ್ 66 ತ್ತ ಪಂಪ್‌ವೆಲ್ ಕೈತಲ್ ಉಜ್ಜೋಡಿಡ್ ಗಾಡಿ ತಡೆಪುನಗ ಜಾನುವಾರು ಪತ್ತೆ ಆತ್ಂಡ್.
ಬೆಳಗಾವಿ ಜಿಲ್ಲೆದ ಯಮಕನಮರಡಿರ್ದ್ ಪೆತ್ತಕಂಜಿಲೆನ್ ಕನತ್‌ದ್ ಕಾಸರಗೋಡು ಕೊನೊವೊಂದಿತ್ತೆರ್ ಪಂಡ್‌ದ್ ತೆರಿದ್ ಬೈದ್ಂಡ್.

ಹಿರಿಯ ಪತ್ರಕರ್ತೆರ್ ಪಿ.ಬಿ.ಹರೀಶ್ ರೈ ಮೆರೆಗ್ ರಾಜ್ಯಮಟ್ಟದ ಸಹಕಾರ ಸಪ್ತಾಹ ಗೌರವ ಪ್ರಶಸ್ತಿ

ಕುಡ್ಲ : ಕರ್ನಾಟಕ ರಾಜ್ಯ ಸಹಕಾರ ಮಹಾ ಮಂಡಳ ಬೆಂಗಳೂರು ಬೊಕ್ಕ ದ.ಕ.ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ನಿರೆಲ್‌ಡ್ ನಡಪುನ 73ನೇ ಸಹಕಾರ ಸಪ್ತಾಹದ ಲೇಸ್‌ಡ್ ಪತ್ರಿಕಾ ರಂಗದ ಸೇವೆಗಾದ್ ಕೊರ್ಪಿನ ರಾಜ್ಯಮಟ್ಟದ ಗೌರವ ಪ್ರಶಸ್ತಿಗ್ ಹಿರಿಯ ಪತ್ರಕರ್ತೆರ್, ಮಂಗಳೂರು ಪ್ರೆಸ್ ಕ್ಲಬ್ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ ಆಯ್ಕೆ ಆತೆರ್.
ಈ ಪ್ರಶಸ್ತಿಗ್ ಪುಗರ್ತೆದ ಪತ್ರಕರ್ತೆರ್, ಸಮಾಜಮುಖಿ ಚಿಂತಕೆ ಪಿ.ಬಿ.ಹರೀಶ್ ರೈ ಮೆರೆನ್ ಆಯ್ಕೆ ಮಲ್ತ್‌ದ ಪಂಡ್‌ದ್ ದ.ಕ.ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರ್ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ತೆರಿಪಾದೆರ್.
73ನೇ ಸಹಕಾರ ಸಪ್ತಾಹದ ರಾಜ್ಯಮಟ್ಟದ ಕಾರ್ಯಕ್ರಮ ನವೆಂಬರ್ 20 ಕಾಂಡೆ 10 ಗಂಟೆಗ್ ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ನಡಪರೆ ಉಂಡು.

ನನ ಅರ್ಧ ಹೆಲ್ಮೆಟ್ ಪಾಡರೆ ಇಜ್ಜಿ !

ಜ.1ರ್ದ್ ಪೊಸ ರೂಲ್ಸ್, ಫುಟ್‌ಪಾತ್‌ಡ್ ಗಾಡಿ ಕೊನೆಯರ್ಡ ಭಾರಿ ಫೈನ್

ಬೆಂಗಳೂರು : ಪೊಸ ವರ್ಷದ ಜನವರಿ 1 ತಾರೀಕ್‌ರ್ದ್ ಬೊಕ್ಕ ರಡ್ಡ್ ಚಕ್ರದ ಗಾಡಿದಕ್ಲೆಗ್ ಪೊಸ ಟ್ರಾಫಿಕ್ ರೂಲ್ಸು ಜಾರಿಗ್ ಬರಿಯರೆ ಉಂಡು.
ಪೊಸ ನಿಯಮದ ಪ್ರಕಾರ, ನನ ಮಿತ್ತ್‌ಗ್ ಇಡೀ ರಾಜ್ಯೊಡೇ ಟೂ ವ್ಹೀಲರ್‌ಡ್ ಪೋಪಿನಕುಲು ಹಾಫ್ ಹೆಲ್ಮೆಟ್ ಪಾಡರೆ ಇಜ್ಜಿ. ಪಾಡ್ಂಡ ಭಾರಿ ದಂಡ ಕಟ್ಟೊಡಾವು. ಗಾಡಿದಕ್ಲೆನ ಸುರಕ್ಷತೆದ ದೃಷ್ಟಿಡ್ ಬೊಕ್ಕ ಆಕ್ಸಿಡೆಂಟ್ ಆಂಡಲ ಪ್ರಾಣಾಪಾಯ ತಡೆಪುನ ಉದ್ದೇಶಡ್ ಫುಲ್ ಹೆಲ್ಮೆಟ್ ನಿಯಮ ಜಾರಿಗ್ ಬರಿಯರೆ ಉಂಡು.
ಕುಡೊಂಜಿ ಮಲ್ಲ ರೂಲ್ಸ್ ದಾದ ಪಂಡ ಫುಟ್‌ಪಾತ್‌ದ ಮಿತ್ತ್ ರಡ್ಡ್ ಚಕ್ರದ ಗಾಡಿ ಕೊನೆಯರ್ಡ ಭಾರಿ ದಂಡ ಕಟ್ಟೊಡಾವು. ಒರ ತಿಕ್‌ದ್ ಬೂರುಂಡ 5 ಸಾರ ರೂ. ಫೈನ್, 2 ನೇ ಸರ್ತಿ ತಿಕ್‌ದ್ ಬೂರುಂಡ ಫೈನ್ 10 ಸಾರ ಆಪುಂಡು. ಮೂಜಿನೇ ಫುಟ್ ಪಾತ್ ರೈಡ್ ಮಲ್ತ್ಂಡ ಸರ್ತಿಲ ಮಲ್ತ್ಂಡ ಗಾಡಿ ಸೀಸ್ ಮಲ್ಪುವೆರ್.
ಈ ವಿಚಾರದ ಬಗೆಟ್ ಸಾರಿಗೆ ಸಚಿವೆರ್ ಭೈರತಿ ಸುರೇಶ್ ಮಾಹಿತಿ ಕೊರ್ತೆರ್. ಆಂಡ ಈ ನಿಯಮ ಕಾನೂನು ಆದ್ ಜಾರಿಗ್ ಬರೊಡಾತೆ.

ಕಾಪು ಪೊಸ ಮಾರಿಗುಡಿಕ್ಕ್ ಕೇಂದ್ರ ಸಚಿವೆರ್ ಎಚ್.ಡಿ ಕುಮಾರಸ್ವಾಮಿ ಕುಟುಂಬ ಭೇಟಿ, ಘಂಟಾನಾದ ಸೇವೆ

ಕಾಪು : ಪೊಸ ಮಾರಿಗುಡಿ ಶ್ರೀ ಮಾರಿಯಮ್ಮ ದೇವಸ್ಥಾನಗ್ ಕೇಂದ್ರ ಭಾರೀ ಕೈಗಾರಿಕೆ ಬೊಕ್ಕ ಉಕ್ಕು ಸಚಿವೆರ್ ಎಚ್. ಡಿ ಕುಮಾರಸ್ವಾಮಿ ಕುಟುಂಬ ಸಮೇತ ಸೋಮವಾರ ಭೇಟಿ ಕೊರ್ದು ಉಚ್ಚಂಗಿ ದೇವಿ ಸಮೇತ ಶ್ರೀ ಮಾರಿಯಮ್ಮ ದೇವಿನ ದರ್ಶನ ಮಲ್ತೆರ್.
ಈ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಬೊಕ್ಕ ಅಭಿವೃದ್ಧಿ ಸಮಿತಿ ವತಿರ್ದ್ ಅಮ್ಮನ ಅನುಗ್ರಹ ಪ್ರಸಾದ ಕೊರ್ದು ಸಚಿವೆರೆನ್ ಗೌರವ ಮಲ್ತೆರ್.

ಈ ಪೊರ್ತುಡು ದೇವಲ್ಯದ ನವ ನಿರ್ಮಾಣದ ಬಗೆಟ್ಟ್ ಬೊಕ್ಕ ನವದುರ್ಗಾ ಲೇಖನ ಯಜ್ಞದ ಬಗೆಟ್ಟ್ ಮಾಹಿತಿ ಕೊರಿಯೆರ್. ಅಂಚೆನೆ ರಡ್ಡನೇ ಹಂತದ ಕಾಮಗಾರಿದ ಸಮಗ್ರ ಚಿತ್ರಣದ ಒಟ್ಟುಗು ಸರಕಾರರ್ದ್ ಅನುದಾನ ಕೊರ್ಪಿನ ಬಗೆಟ್ಟ್ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ರಾಜರ್ಷಿ ಕೆ. ವಾಸುದೇವ ಶೆಟ್ಟಿ ಮೇರ್ ಬಿನ್ನಾಪುದ ಓಲೆ ಕೊರಿಯೆರ್.

ದೇವಳದ ಪ್ರಧಾನ ತಂತ್ರಿ ವಿದ್ವಾನ್ ಕೆ.ಪಿ ಕುಮಾರಗುರು ತಂತ್ರಿಲು, ಪ್ರಧಾನ ಅರ್ಚಕೆರ್ ಶ್ರೀನಿವಾಸ ತಂತ್ರಿ ಕಲ್ಯ ಪ್ರಾರ್ಥನೆ ಮಲ್ತ್‌ದ್ ಅನುಗ್ರಹ ಪ್ರಸಾದ ಕೊರಿಯೆರ್.

ಸಚಿವೆರ್ ತನ್ನ ಬೊಡೆದಿ ಅನಿತಾ ಕುಮಾರಸ್ವಾಮಿ, ಮಗೆ ನಿಖಿಲ್ ಕುಮಾರಸ್ವಾಮಿ, ಮರ್ಮಲ್ ರೇವತಿ, ಪುಲ್ಲಿ ಅವ್ಯಾನ್ ದೇವ್ ಸೇರ್ದ್ ಘಂಟಾನಾದ ಸೇವೆ ಕೊರಿಯೆರ್. ವಿಧಾನಪರಿಷತ್ ಸದಸ್ಯೆರ್ ಭೋಜೇಗೌಡ ಇತ್ತೆರ್. ಅವೆರ್ದ್ ಬೊಕ್ಕ ದೇವಿಗ್ ಕಾರ್ತಿಕ ತಿಂಗೊಲ್ದ ವಿಶೇಷ ಸೇವೆಯಾದ್ ನೆಯಿತ್ತ ದೀಪ ಬೆಳಗಾಯೆರ್.
ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಮಾಜಿ ಶಾಸಕೆರ್ ಮೋಹಿದ್ದಿನ್ ಬಾವ, ಕಾರವಾರ ಮಾಜಿ ಶಾಸಕೆರ್ ಆನಂದ್ ವಸಂತ್ ಅಸ್ನೋಟಿಕರ್, ಜಾತ್ಯತೀತ ಜನತಾದಳ ರಾಜ್ಯ ಉಪಾಧ್ಯಕ್ಷೆರ್ ಸೂರಜ್ ನಾಯ್ಕ್ ಸೋನಿ, ದೇವಳದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ನಡಿಕೆರೆ ರತ್ನಾಕರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ರವಿಕಿರಣ್, ಅಭಿವೃದ್ಧಿ ಸಮಿತಿ ಪ್ರಧಾನ ಕಾರ್ಯದರ್ಶಿ ರಮೇಶ್ ಹೆಗ್ಡೆ ಕಲ್ಯ, ಪ್ರಚಾರ ಸಮಿತಿ ಪ್ರಧಾನ ಸಂಚಾಲಕೆರ್ ಯೋಗೀಶ್ ವಿ. ಶೆಟ್ಟಿ ಬಾಲಾಜಿ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಮಾಧವ ಆರ್.ಪಾಲನ್, ಶೇಖರ್ ಸಾಲ್ಯಾನ್, ಮನೋಹರ್ ರಾವ್ ಕಲ್ಯ, ರವೀಂದ್ರ ಮಲ್ಲಾರ್, ಜಯಲಕ್ಷ್ಮೀ ಎಸ್.ಶೆಟ್ಟಿ, ಚರಿತಾ ದೇವಾಡಿಗ, ಆರ್ಗಾನಿಕ್ ಇಂಡಸ್ಟ್ರೀಸ್ ನಿರ್ದೇಶಕೆರ್ ಆನಂದ ಎಮ್. ಶೆಟ್ಟಿ, ಅದಾನಿ ಸಮೂಹ ಸಂಸ್ಥೆದ ಕಾರ್ಯನಿರ್ವಾಹಕ ನಿರ್ದೇಶಕೆ ಕಿಶೋರ್ ಆಳ್ವ, ಆಸ್ಪೆನ್ ಎಸ್‌ಇಝೆಡ್‌ ಮಹಾ ಪ್ರಬಂಧಕೆರ್ ಅಶೋಕ್ ಶೆಟ್ಟಿ, ಕೆ. ಭಗವಾನ್ ದಾಸ್, ಜಯರಾಮ್ ಆಚಾರ್ಯ, ಗೀತಾಂಜಲಿ ಸುವರ್ಣ, ಶ್ರೀಕರ ಶೆಟ್ಟಿ ಕಲ್ಯ, ಸಾವಿತ್ರಿ ಗಣೇಶ್, ರವಿಕುಮಾರ್ ಮಂದಾರ, ರಘುರಾಮ್ ಶೆಟ್ಟಿ ಕೊಪ್ಪಲಂಗಡಿ, ರವಿರಾಜ್ ಶೆಟ್ಟಿ ಪಂಜಿತ್ತೂರು, ಉದಯ ಹೆಗ್ಡೆ, ಉದಯ ಶೆಟ್ಟಿ ಕೊಪ್ಪಲಂಗಡಿ ಮೊಕುಲು ಮಾತ ಇತ್ತೆರ್.

ಕುಡ್ಲ ಏರ್‌ಪೋರ್ಟ್‌ಡ್ ತತ್ತ್ ಪೋಂಡು ಮಾಮಲ್ಲ ದುರಂತ!

229 ಪ್ರಯಾಣಿಕೆರೆನ ಜೀವ ಒರಿತಿನ ಪೈಲಟ್

ಕುಡ್ಲ : ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಪೈಲಟ್‌ನ ಸಮಯಪ್ರಜ್ಞೆರ್ದಾವರ ಬಾರಿ ಮಲ್ಲ ದುರಂತ ಆಪಿನವು ತತ್ತ್‌ದ್ 229 ಪ್ರಯಾಣಿಕೆರೆನ ಜೀವ ಬಚಾವ್ ಆಯಿನ ಘಟನೆ ಸೋಮಾರ ಬಯ್ಯಡ್ ನಡತ್ಂಡ್.
ಕುಡ್ಲರ್ದ್ ಬೆಂಗಳೂರುಗು ಪೋಪಿನ ವಿಮಾನ ಬಯ್ಯಡ್ 6.05 ಕ್ಕ್ ಟೇಕಾಫ್ ಆಫಿನ ಪೊರ್ತುಡು ತಾಂತ್ರಿಕ ದೋಷ ತೋಜಿದ್ ಬತ್ತ್ಂಡ್. ಉಂದೆನ್ ಕೂಡ್ಲೆ ಪತ್ತೆ ಮಲ್ತಿನ ಪೈಲಟ್ ಟೇಕಾಫ್ ಆವೊಡಿತ್ತಿನ‌ ವಿಮಾನನ್ ಕಂಟ್ರೋಲ್‌ಗ್ ಕನತ್‌ದ್ ಮಾತಾ ಪ್ರಯಾಣಿಕೆರೆನ್ ಜಪುಡಾದ್ ಮಲ್ಲ ದುರಂತನ್ ತಪ್ಪಾಯೆರ್. ವಿಮಾನಡ್ 3 ಜೋಕುಲು ಸೇರ್ದ್ 229 ಪ್ಯಾಸೆಂಜರ್ಸ್, 7 ಜನ ಸಿಬ್ಬಂದಿಲು ಇತ್ತೆರ್. ಬೊಕ್ಕ ಬೇತೆ ಅಕ್ಲೆಗ್ ಬೇತೆ ವಿಮಾನದ ವ್ಯವಸ್ಥೆ ಮಲ್ತ್‌ದ್ ಬೆಂಗಳೂರುಗು ಕಡಪಾದೆರ್ ಪಂಡ್‌ದ್ ತೆರಿದ್ ಬೈದ್ಂಡ್.

ಇನಿ ಶಬರಿಮಲೆ ದೇವಸ್ಥಾನದ ಬಾಕಿಲ್ ದೆಪ್ಪರೆ

ದಿನೊಕ್ಕು 80 ಸಾವಿರ ಭಕ್ತೆರೆಗ್ ದರ್ಶನೊಗು ಅವಕಾಶ

ಶಬರಿಮಲೆ : ಪ್ರಸಿದ್ಧ ಶಬರಿಮಲೆ ಶ್ರೀ ಅಯ್ಯಪ್ಪ ಸ್ವಾಮಿನ ವಾರ್ಷಿಕ ಮಂಡಲ ಪೂಜೆ ಬೊಕ್ಕ ತೀರ್ಥಯಾತ್ರೆ ಹಿನ್ನೆಲೆಡ್ ಇನಿ(ಸೋಮವಾರ) ಬಯ್ಯಡ್ 5 ಗಂಟೆಗ್ ದೇವಸ್ಥಾನದ ಬಾಕಿಲ್ ದೆಪ್ಪುವೆರ್.

ನಿರ್ಗಮಿತ ಮುಖ್ಯ ಅರ್ಚಕೆರ್ ಇ.ಡಿ.ಪ್ರಸಾದ್​ ನಂಬೂದರಿ ಮೇರ್ ತಂತ್ರಿಲಾಯಿನ ಕಂಕರು ಬ್ರಹ್ಮದತ್ತನ್​ ಮೆರೆನ ಉಪಸ್ಥಿತಿಡ್ ಗರ್ಭಗುಡಿತ್ತ ತುಡರ್ ಪೊತ್ತಾವೆರ್. ಬೊಕ್ಕ ಪವಿತ್ರ 18 ಮುಟ್ಟು ಜತ್ತ್‌ದ್ ಪವಿತ್ರ ಅಗ್ನಿ ಬೆಳಗಾದ್ ಪೊಸತ್ತಾದ್ ಆಯ್ಕೆ ಆತಿನ ಪ್ರಮುಖ ಅರ್ಚಕೆರೆನ್ ಸನ್ನಿಧಾನಗ್ ಎದ್ಕೊನರೆ ಉಲ್ಲೆರ್.

ಇನಿ ಬಯ್ಯಡ್ 6:30 ಗಂಟೆಗ್ ತಂತ್ರಿಲು ಶಬರಿಮಲೆತ್ತ ಪೊಸ ಮೇಲ್ಶಾಂತಿ ಅರೀಕ್ಕರ ಸುಬ್ರಹ್ಮಣ್ಯನ್ ಶಂಕರನ್ ನಂಬೂತಿರಿಲೆನ ಪ್ರತಿಷ್ಠಾಪನಾ ವಿಧಿ ಮಲ್ಪರೆ ಉಲ್ಲೆರ್. ಇಂಚೆನನೇ ಪೂಜಾ ವಿಧಿ ಮಾಳಿಕಪ್ಪುರಂ ದೇವಲ್ಯಡ್‌ಲ ನಡಪರೆ ಇತ್ತ್‌ದ್, ಅವುಲು ಎ.ದಾಮೋದರನ್ ನಂಬೂತಿರಿ ಪೊಸ ಮುಖ್ಯ ಅರ್ಚಕೆರಾದ್ ಅಧಿಕಾರ ಸ್ವೀಕಾರ ಮಲ್ಪುವೆರ್.
ಎಲ್ಲೆ (ಅಂಗಾರೆ) ಬೊಲ್ಪುಗು 3 ಗಂಟೆಗ್ ಮುಖ್ಯ ಅರ್ಚಕೆರ್ ಶಬರಿಮಲೆ ಬೊಕ್ಕ ಮಾಳಿಕಪ್ಪುರಂ ದೇವಲ್ಯದ ಬಾಕಿಲ್ ದೆಪ್ಪುನೆತ್ತ ಒಟ್ಟಿಗೆ ಭಕ್ತೆರೆನ ಮಂಡಲ ಯಾತ್ರಾ ಋತು ಅಧಿಕೃತವಾದ್ ಶುರು ಆಪುಂಡು.
ಡಿಸೆಂಬರ್ 27ಕ್ಕ್ ಮಂಡಲ ಪೂಜೆ ನಡಪರೆ ಉಂಡು. ಮಕರವಿಳಕ್ಕು ಉತ್ಸವ ಜನವರಿ 14ರಂದು ನಡಪರೆ ಉಂಡು. ಭಕ್ತೆರ್ ಜನವರಿ 19 ಮುಟ್ಟ ದೇವೆರ್‌ನ ದರ್ಶನ ಮಲ್ಪೊಲಿ ಪಂಡ್‌ದ್ ದೇವಸ್ವಂ ಮಂಡಳಿ ಪ್ರಕಟಣೆಡ್ ತೆರಿಪಾದ್ಂಡ್.

ಪಾರಂಪರಿಕ ಸ್ಮಾರಕ ಸಂರಕ್ಷಣೆಡ್ ಐತಿಹಾಸಿಕ ತಿರುವು

ಬಪ್ಪನಾಡ್ ಸ್ವಾಗತ ಗೋಪುರದ ಸ್ಥಳಾಂತರ ಕಾರ್ಯ 185 ದಿನೊತ್ತ ಸುದೀರ್ಘ ಪ್ರಯತ್ನದ ಬೊಕ್ಕ ಯಶಸ್ವಿ

ಪಾರಂಪರಿಕ ಸ್ಮಾರಕ ಸಂರಕ್ಷಣೆ, ಇಂಜಿನಿಯರಿಂಗ್ ಪರಿಣತಿ ಬೊಕ್ಕ ಧಾರ್ಮಿಕ ಬದ್ಧತೆದ ಅಪೂರ್ವ ಸಂಗಮಗ್ ಸಾಕ್ಷಿಯಾದ್, ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಐತಿಹಾಸಿಕ ಸ್ವಾಗತ ಗೋಪುರನ್ ನ.12 ಕ್ಕ್ ಯಶಸ್ವಿಯಾದ್ ಅವೆತ್ತ ಅಕೇರಿದ ಸ್ಥಾನಡ್ ಪ್ರತಿಷ್ಠಾಪನೆ ಮಲ್ತೆರ್. ಮೇ.13 ಕ್ಕ್ ಸುರು ಆಯಿನ ಈ ಸವಾಲ್ ದ ಕಾರ್ಯ ಒಟ್ಟು 185 ದಿನೊತ್ತ ಸುದೀರ್ಘ ಪ್ರಯತ್ನದ ಫಲವಾದ್ ಮುಗಿತಲ ಆಂಡ್.

1996ಟ್ಟ್ ಐಕಳ ಹರೀಶ್ ಶೆಟ್ಟಿ ಬೊಕ್ಕ ಕುಟುಂಬದಕುಲು ದೇವಸ್ಥಾನಗ್ ಸಮರ್ಪಣೆ ಮಲ್ತಿನ ಈ ಸ್ವಾಗತ ಗೋಪುರ ರಾಷ್ಟ್ರೀಯ ಮಾರ್ಗ ಅಗಲೀಕರಣದ ಲೆಕ್ಕೊಡು ದೆತ್ತಿನ ಅತ್ತಂಡ ದೆಪ್ಪುನ ಅನಿವಾರ್ಯತೆನ್ ಎದುರಿಸಾದ್ಂಡ್. ಈ ಪೊರ್ತುಡು, ಪಾರಂಪರಿಕ ರಚನೆನ್ ದೆಪ್ಪುನ ಬದಲ್ ವೈಜ್ಞಾನಿಕವಾದ್ ಸ್ಥಳಾಂತರ ಮಲ್ತ್ ದ್ ಸಂರಕ್ಷಣೆ ಮಲ್ಪು‌ನ ಪರ್ಯಾಯ ಯೋಜನೆನ್ ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ, ಶಾರದಾ ಅಸೋಸಿಯೇಟ್ಸ್ ಮೇರ್ ಪ್ರಸ್ತಾಪ ಮಲ್ತೆರ್.

ಈ ಪಾರಂಪರಿಕ ಸಂರಕ್ಷಣಾ ಕಾರ್ಯದ ಮಹತ್ವನ್ ತೆರಿದ್ ಐಕಳ ಹರೀಶ್ ಶೆಟ್ಟಿ ಮೇರ್ ಸಂಪೂರ್ಣ ಸ್ಥಳಾಂತರ ಕಾರ್ಯದ ಕರ್ಚಿನ್ ದೆತೊನಿಯೆರೆ ಎಡ್ಡೆ ಮನಸ್ ಡ್ ದುಂಬು ಬತ್ತೆರ್. 1996ಟ್ಟ್ ಮೂಲ ಗೋಪುರನ್ ಸಮರ್ಪಣೆ ಮಲ್ತಿನ ದಾನಿಲಾದ್ ಬೊಕ್ಕ 2026ಟ್ಟ್ ಅವೆತ್ತ ಸ್ಥಳಾಂತರದ ಪೂರ ಕರ್ಚಿನ್ ದೆತೊನ್ನ ಮಹಾದಾನಿಯಾದ್ ಅರೆನ ಕೊಡುಗೆ ಇಸೇಸವಾದ್ ಮೆಚ್ಚೊಡಾಯಿನವು.

ಇಂಜಿನಿಯರಿಂಗ್ ದುಂಬಾತ್ತಿಗೆ ಬೊಕ್ಕ ಯೋಜನಾ ನಿರ್ವಹಣೆ:

ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ ಮೇರ್ ಈ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾದ್ ಬೆಂದ್ ದ್, ದಾನಿಲು, ದೇವಸ್ಥಾನದ ಆಡಳಿತ ಮಂಡಳಿ, ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI), ಬೇತೆ ಬೇತೆ ಸರ್ಕಾರಿ ಇಲಾಖೆಲು ಬೊಕ್ಕ ಕಾಮಗಾರಿ ಗುತ್ತಿಗೆದಾರೆರೆನ ನಡುಟ್ಟು ಸಮನ್ವಯ ಮಲ್ಪುನಲ್ಪ ಪ್ರಮುಖ ಪಾತ್ರ ಒಯಿಸೊಂದೆರ್.

ಎಂಜಿನಿಯರ್ ನಿತಿನ್ ದೇವಾಡಿಗ ಮೇರ್ ಸ್ಟ್ರಕ್ಚರಲ್ ಎಂಜಿನಿಯರ್ ಆದ್ ತನ್ನ ತಾಂತ್ರಿಕ ಪರಿಣತಿ ಬೊಕ್ಕ ರಚನಾತ್ಮಕ ಮಾರ್ಗದರ್ಶನನ್ ಕೊರಿಯೆರ್. ಹರಿಯಾಣದ HSPL ಸಂಸ್ಥೆ ಸ್ಥಳಾಂತರ ಕಾಮಗಾರಿದ ಅನುಷ್ಠಾನದ ಜಬದಾರಿನ್ ಮಲ್ತೆರ್.

77 ಅಡಿ ಸಮತಲ ಸ್ಥಳಾಂತರ ಬೊಕ್ಕ 4 ಅಡಿ ಲಂಬ ಎತ್ತರ ಮಲ್ಪೆರೆ ಉಂಡು.

ಒಟ್ಟು 185 ದಿನಟ್ಟ್ ಗೋಪುರದ ಸ್ಥಳಾಂತರ ಕಾರ್ಯನ್ ಐನ್ ಹಂತಡ್ ಮಲ್ಪೆರೆ:

1. ಸುರುತ್ತ ಹಂತದ ಲಂಬ ಎತ್ತರ ಮಲ್ಪೆರೆ – 3 ಅಡಿ.
2. ಪಶ್ಚಿಮ ದಿಕ್ಕ್ ರ್ದ್ ದೇವಸ್ಥಾನದ ಕಡೆಕ್ಕ್ ಸಮತಲ ಸ್ಥಳಾಂತರ – 51 ಅಡಿ.
3. ಉತ್ತರ ದಿಕ್ಕ್ ಗ್ ಸ್ಥಳಾಂತರ – 11 ಅಡಿ.
4. ಪುನಃ ಪಶ್ಚಿಮ ದಿಕ್ಕ್ ಡ್ ದೇವಸ್ಥಾನದ ಕಡೆಕ್ಕ್ ಸ್ಥಳಾಂತರ – 15 ಅಡಿ.
5. ಅಕೇರಿದ ಹೆಚ್ಚುವರಿ ಲಂಬ ಎತ್ತರ ಮಲ್ಪೆರೆ – 1 ಅಡಿ.

ಈ ಮುಕೇನ ಗೋಪುರನ್ ಒಟ್ಟು 77 ಅಡಿ ಸಮತಲವಾದ್ ಸ್ಥಳಾಂತರ ಮಲ್ತ್ ದ್, 4 ಅಡಿ ಲಂಬವಾದ್ ಎತ್ತರ ಮಲ್ತೆರ್.

ಮೂಜಿ ಪ್ರಮುಖ ತಾಂತ್ರಿಕ ಉದ್ದೇಶಲೆನ ಯಶಸ್ವಿ ಸಾಧನೆ:

ಗೋಪುರದ ಅಕೇರಿದ ಸ್ಥಾನನ್ ನಿರ್ಧಾರ ಮಲ್ಪುನಗ ಮೂಜಿ ಪ್ರಮುಖ ತಾಂತ್ರಿಕ ಬೊಕ್ಕ ಧಾರ್ಮಿಕ ಅಗತ್ಯಲೆಗ್ ಆದ್ಯತೆ ಕೊರ್ತೆರ್.

1.ರಾಷ್ಟ್ರೀಯ ಮಾರ್ಗದ ಸ್ವಾಧೀನ ಮಲ್ತಿನ ಗಡಿ ಪ್ರದೇಶದ ಪಿದಯಿಗ್ ಸ್ಥಳಾಂತರ:

ರಾಷ್ಟ್ರೀಯ ಮಾರ್ಗಗಾದ್ ಸ್ವಾಧೀನ ಮಲ್ತೊನ್ನ ಗಡಿ ಪ್ರದೇಶರ್ದ್ ಮಾಸ್ತ್ ದೂರಡ್ ಗೋಪುರನ್ ಸುರಕ್ಷಿತವಾದ್ ಸ್ಥಾಪನೆ ಮಲ್ಪುನ ಮುಕೇನ ಮಾರ್ಗ ಅಭಿವೃದ್ಧಿ ಕಾಮಗಾರಿಗ್ ಒವ್ವೇ ಅಡಚಣೆ ಅವಂದಿಲೆಕ್ಕ ಕ್ರಮ ದೆತೊಂದೆರ್.

2. ಬ್ರಹ್ಮರಥದ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ರಥಬೀದಿಡ್ ಗೋಪುರದ ಕೈತಲ್ದ ಮುಕೇನ ಪವಿತ್ರ ಬ್ರಹ್ಮರಥ ಸುರಕ್ಷಿತವಾದ್ ಸಂಚಾರ ಮಲ್ಪೆರೆ ಅಗತ್ಯವಾಯಿನ ಸ್ಥಳಾವಕಾಶನ್ ನಿಗಂಟ್ ಮಲ್ತೆರ್.

3. ಇಮಾನ ರಥತ್ತ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ಇಮಾನ ರಥ ಸ್ವಾಗತ ಗೋಪುರದ ತೀರ್ತ್ ಭಾಗರ್ದ್ ಒವ್ವೇ ಅಡಚಣೆ ಇಜ್ಜಂದೆ ಸುರಕ್ಷಿತವಾದ್ ಪೋಯೆರೆ ಅಗತ್ಯವಾಯಿನ ಲಂಬ ಎತ್ತರನ್ ಕೊರ್ತುಂಡು. ಈ ಉದ್ದೇಶಗಾದ್ ಅಕೇರಿದ ಹೆಚ್ಚುವರಿ ಒಂಜಿ ಅಡಿ ಎತ್ತರ ಮಲ್ಪುನ ಬೇಲೆನ್ ಮಲ್ಪೊಡು.

ಪ್ರಮುಖ ಇಂಜಿನಿಯರಿಂಗ್ ಸವಾಲುಲೆನ ಯಶಸ್ವಿ ನಿರ್ವಹಣೆ:

ಈ ಸ್ಥಳಾಂತರ ಕಾರ್ಯಡ್ ಸುಮಾರ್ ಕಠಿಣ ತಾಂತ್ರಿಕ ಸವಾಲು ಉಂಡು. ಇಸೇಸವಾದ್, ಮಿತ್ತ್ ಭಾಗಡ್ ಇತ್ತಿನ ಹೈಟೆನ್ಷನ್ ಕರೆಂಟ್ ವಾಯರ್ ನ್ ಸುರಕ್ಷಿತವಾದ್ ಪಾಡುನ ಬೊಕ್ಕ ಸ್ಥಳಾಂತರದ ಮಾರ್ಗಡ್ ತೀರ್ತ್ ಇತ್ತಿನ ಬೃಹತ್ ಬರ್ಸದ ನೀರ್ ಪರಪುನ ಚರಂಡಿನ್ ಮಲ್ಪುನೇ ಮಾಸ್ತ್ ಸವಾಲ್ ದ ಕೆಲಸ ಆತ್ಂಡ್.

ಮರಿಯಾಲದ ಪೊರ್ತುಡು ಈ ಮಾತ ಬೇಲೆನ್ ಯಶಸ್ವಿಯಾದ್ ಮಲ್ಪುನೇ ಯೋಜನೆದ ಕುಡೊಂಜಿ ಮಹತ್ವದ ಸಾಧನೆ ಆತ್ಂಡ್.

ಈ ಕಾರ್ಯಾಚರಣೆಡ್ ಇಸೇಸ ಟ್ರ್ಯಾಕ್ ಪಾಡುನ ವ್ಯವಸ್ಥೆ, ರೋಲರ್‌ಲು ಬೊಕ್ಕ ಕೈಚಾಲಿತ ಜ್ಯಾಕ್‌ನ್ ಗಲಸ್ ದೆರ್, ಸರಿಯಾಯಿನ ತಾಂತ್ರಿಕ ಯೋಜನೆ, ರಚನಾತ್ಮಕ ಮೇಲ್ವಿಚಾರಣೆ ಬೊಕ್ಕ ಸಂಬಂಧಪಟ್ಟಿನ ಇಲಾಖೆಲೆನ ನಿರಂತರ ಸಮನ್ವಯದೊಟ್ಟಿಗೆ ಕಾಮಗಾರಿನ್ ಯಶಸ್ವಿಯಾದ್ ಮುಗಿತಲ ಮಲ್ತೆರ್.

ನನದ ಪೀಳಿಗೆಗಾದ್ ಸಂರಕ್ಷಣೆ ಆಯಿನ ಪಾರಂಪರಿಕ ಸ್ಮಾರಕ:

ಈ ಯೋಜನೆ ಆಧುನಿಕ ಮೂಲಸೌಕರ್ಯ ಅಭಿವೃದ್ಧಿದೊಟ್ಟಿಗೆ ಪಾರಂಪರಿಕ ಸ್ಮಾರಕಲೆನ ಸಂರಕ್ಷಣೆ ಸಾಧ್ಯ ಪನ್ಪಿನೆನ್ ಇಂಜಿನಿಯರಿಂಗ್ ಪರಿಣತಿ, ದಾನಶೀಲತೆ ಬೊಕ್ಕ ಸಾಮೂಹಿಕ ಬದ್ಧತೆದ ಮುಕೇನ ಸಾಬೀತು ಮಲ್ದೆರ್.

1996ಟ್ಟ್ ಭಕ್ತಿಭಾವರ್ದ್ ದೇವಸ್ಥಾನಗ್ ಸಮರ್ಪಣೆ ಮಲ್ಪುನ ಈ ಗೋಪುರ 2026ಟ್ಟ್ ಕುಡೊಂಜಿ ಮಹತ್ವದ ದಾನಶೀಲ ಪ್ರಯತ್ನದ ಮುಕೇನ ಸಂರಕ್ಷಣೆ ಮಲ್ತ್ ದ್ ನನದ ಪೀಳಿಗೆಗ್ ಒರಿಪುಲೆಕ್ಕ ಅವಡ್.

ಒಂಜಿ ಪಾರಂಪರಿಕ ಸ್ಮಾರಕ ಒರಿಯೆರೆ ಉಂಡು. ಒಂಜಿ ಧಾರ್ಮಿಕ ಸಂಪ್ರದಾಯಗ್ ಸುರಕ್ಷತೆ ಕೊರೊಡು. ಒಂಜಿ ಮಹತ್ವದ ಇಂಜಿನಿಯರಿಂಗ್ ಸಾಧನೆ ಸಾಕಾರ ಆತ್ಂಡ್. ಒಂಜಿ ಪರಂಪರೆ ನನದ ಪೀಳಿಗೆಗಾದ್ ಸಂರಕ್ಷಣೆ ಆತ್ಂಡ್.

ಎಂಜಿನಿಯರ್ ಮುಲ್ಕಿ ಜೀವನ್ ಕೆ.ಶೆಟ್ಟಿ ಮೇರ್ ಶಾರದಾ ಅಸೋಸಿಯೇಟ್ಸ್ ದ ಸ್ಥಾಪಕೆರ್, ಮುಲ್ಕಿ ಅಸೋಸಿಯೇಷನ್ ಆಫ್ ಸಿವಿಲ್ ಎಂಜಿನಿಯರ್ಸ್ (ACEM) ಸ್ಥಾಪಕ ಅಧ್ಯಕ್ಷೆರ್, ಇಂಡಿಯನ್ ರೋಡ್ಸ್ ಕಾಂಗ್ರೆಸ್ (ನವ ಡೆಲ್ಲಿ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವಾಲಯ,) ಜೀವಮಾನ ಸದಸ್ಯೆರ್, ಹೈದರಾಬಾದ್ ಇಂಡಿಯನ್ ಗ್ರೀನ್ ಬಿಲ್ಡಿಂಗ್ ಕೌನ್ಸಿಲ್ ಸದಸ್ಯೆರ್, ಸ್ವಾಗತ ಗೋಪುರ ಸ್ಥಳಾಂತರ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾತೆರ್.

ಸುಳ್ಯಡ್ ಇನಿರ್ದ್ “ಜ್ಞಾನ ಚಂದನ, ಜ್ಞಾನ ನಂದನ” ಸ್ಪರ್ಧೆಗ್ ಚಾಲನೆ

ಬೊಲ್ತೇರ್ : ಪೂಜ್ಯ ಡಾ. ಡಿ. ವೀರೇಂದ್ರ ಹೆಗ್ಗಡೆರೆನ ದೂರದೃಷ್ಟಿ ಅಂಚೆನೆ ಮಾರ್ಗದರ್ಶನಡ್ ನಡಪುನ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಬೊಕ್ಕ ನೈತಿಕ ಶಿಕ್ಷಣ ಯೋಜನೆ
ಶಾಂತಿವನ ಟ್ರಸ್ಟ್ (ರಿ), ಶ್ರೀ ಕ್ಷೇತ್ರ ಧರ್ಮಸ್ಥಳ ಅಂಚೆನೆ ಶಾಲಾ ಶಿಕ್ಷಣ, ಸಾಕ್ಷರತಾ ಇಲಾಖೆದ ಒಟ್ಟು ಸೇರಿಗೆಡ್ ಇತ್ತೆದ ಇಂದಿನ ವಿದ್ಯಾರ್ಥಿಲೆಡ ಜೀವನ ಮೌಲ್ಯ, ಎಡ್ಡೆ ಗುಣ ಬೊಕ್ಕ
ಭಾರತೀಯ ಸಂಸ್ಕಾರನ್ ಪುಟ್ಟಾವುನ ಮಲ್ಲ ಉದ್ದೇಶ ದೀವೊಂದು ಪ್ರತೀ ವರ್ಷದಂಚೆನೆ 2026ನೇ
ಶೈಕ್ಷಣಿಕ ವರ್ಷಡ್ 1 ಲಕ್ಷ “ಜ್ಞಾನ ಚಂದನ ಬೊಕ್ಕ ಜ್ಞಾನ ನಂದನ” ನೈತಿಕ ಮೌಲ್ಯಾಧಾರಿತ
ಪುಸ್ತಕಲೆನ್ ದಕ್ಷಿಣ ಕನ್ನಡ, ಉಡುಪಿ, ಚಿಕ್ಕಮಗಳೂರು ಬೊಕ್ಕ ಉತ್ತರ ಕನ್ನಡ ಜಿಲ್ಲೆದ ಶಾಲೆಗ್ ಪಟ್‌ದ್ಂಡ್. ಈ
ಪುಸ್ತಕಲೆನ ಅಧ್ಯಯನದ ಒಟ್ಟುಗು ವಿದ್ಯಾರ್ಥಿಲೆನ ಪ್ರತಿಭೆ ಬೊಕ್ಕ ಮೌಲ್ಯನ್ ತೆರಿವೊನ್ನಲ್ಪ ಉಮೇದ್ ಕೊರಿಯರೆ
ಈ ನಾಲ್ ಜಿಲ್ಲೆಡ್ ತಾಲೂಕು ಬೊಕ್ಕ ಜಿಲ್ಲಾ ಮಟ್ಟದ ಸ್ಪರ್ಧೆಲೆನ್ ಆಯೋಜನೆ ಮಲ್ತ್‌ದ. ನವೆಂಬರ್ 16 ಕ್ಕ್ ದಕ್ಷಿಣ ಕನ್ನಡ ಜಿಲ್ಲೆದ ಸುಳ್ಯ ತಾಲೂಕುರ್ದ್ ಅಧಿಕೃತವಾದ್ ಸ್ಪರ್ಧೆಗ್ ಚಾಲನೆ ತಿಕ್‌ದ್ ಬೊಕ್ಕ ನಾಲ್ ಜಿಲ್ಲೆದ ನಿಗದಿತ ಜಾಗೆಡ್ ಪರೀಕ್ಷೆ ನಡಪರೆ ಉಂಡು ಪಂಡ್‌ದ್ ಯೋಜನೆದ
ನಿರ್ದೇಶಕೆರಾಯಿನ ಡಾ. ಐ. ಶಶಿಕಾಂತ್ ಜೈನ್ ಮೇರ್ ಪ್ರಕಟಣೆಡ್ ತೆರಿಪಾದೆರ್.

 

ನ.20 : ಕುಡ್ಲಡ್ 73ನೇ ರಾಜ್ಯಮಟ್ಟದ ಸಹಕಾರ ಸಪ್ತಾಹ

ನಾಲ್ ಜನ ಸಾಧಕೆರೆಗ್ ಸಹಕಾರ ರತ್ನ ಪ್ರಶಸ್ತಿ ಪ್ರದಾನ: ಡಾ.ಎಂಎನ್‌ಆರ್

ಕುಡ್ಲ : 73ನೇ ಅಖಿಲ ಭಾರತ ಸಹಕಾರ ಸಪ್ತಾಹದ ಅಂಗವಾದ್ ನವೆಂಬರ್ 20 ಗು ಕುಡ್ಲದ ಕರಾವಳಿ ಉತ್ಸವ ಮೈದಾನಡ್ ರಾಜ್ಯಮಟ್ಟದ ಸಹಕಾರ ಸಪ್ತಾಹ ಕಾರ್ಯಕ್ರಮ ನಡಪರೆ ಉಂಡು. ಈ ಲೇಸ್‌ಡ್ ಸಹಕಾರ ಕ್ಷೇತ್ರದ ಸಾಧಕೆರೆಗ್ ಪ್ರಶಸ್ತಿ ಪ್ರದಾನ ಬೊಕ್ಕ ಬೇತೆ ಬೇತೆ ಸಹಕಾರಿ ಸಂಘದಕ್ಲೆಗ್ ಮಾನಾದಿಗೆ ನಡಪರೆ ಉಂಡು ಪಂಡ್‌ದ್ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರ್ ಡಾ. ಎಂ.ಎನ್. ರಾಜೇಂದ್ರ ಕುಮಾರ್ ತೆರಿಪಾಯೆರ್.

ಸುದ್ದಿಗೋಷ್ಠಿಡ್ ಈ ವಿಷಯ ತೆರಿಪಾಯಿನ ಆರ್, ರಾಜ್ಯಮಟ್ಟದ ಈ ಕಾರ್ಯಕ್ರಮನ್ ಸಹಕಾರ ಸಚಿವೆರ್ ಲಕ್ಷ್ಮಣ ಸಂಗಪ್ಪ ಸವದಿ ಉದಿಪನ ಮಲ್ಪುವೆರ್. ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಸಹಕಾರ ಮಾಣಿಕ್ಯ ಪ್ರಶಸ್ತಿ ಪ್ರದಾನ ಮಲ್ಪುವೆರ್. ಉತ್ತಮ ಸಹಕಾರಿ ಸಂಘಲೆಗ್ ಶಾಸಕೆರ್, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳದ ಅಧ್ಯಕ್ಷೆರ್ ಜಿ.ಟಿ. ದೇವೇಗೌಡ ಪ್ರಶಸ್ತಿ ಪಟ್ಟುವೆರ್ ಪಂಡ್‌ದ್ ಮಾಹಿತಿ ಕೊರಿಯೆರ್.
ಅಂಚೆನೇ 2025-26ನೇ ವರ್ಷಡ್ ಸಮಗ್ರ ಪ್ರಗತಿ ತೊಜಪಾಯಿನ ನಾಲ್ ಸಹಕಾರಿ ಸಂಘಲೆಗ್ “ಸಹಕಾರ ಮಾಣಿಕ್ಯ” ಪ್ರಶಸ್ತಿ ಕೊರಿಯರೆ ಉಲ್ಲ. ಪ್ರಶಸ್ತಿದ ಒಟ್ಟುಗು ತಲಾ 5 ಗ್ರಾಂ ಬಂಗಾರ್‌ದ ಪದಕ, 10 ಸಾವಿರ ರೂ. ದುಡ್ಡು ಬೊಕ್ಕ ಪಾರಿತೋಷಕ ಕೊರ್ದು ಗೌರವ ಮಲ್ಪರೆ ಉಂಡು. ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆದ ಅತ್ಯುತ್ತಮ ಕೃಷಿ ಪತ್ತಿನ, ಮಹಿಳಾ, ಹೈನುಗಾರಿಕೆ, ಮೀನುಗಾರಿಕೆ, ಕ್ರೆಡಿಟ್ ಅಂಚೆನೆ ಸೌಹಾರ್ದ ಸಹಕಾರಿ ಸಂಘೊಲು ಬೊಕ್ಕ 100 ವರ್ಷ ಆಚರಣೆ ಮಲ್ದಿನ ಸಹಕಾರ ಸಂಘಲೆನ್‌ಲ ಸನ್ಮಾನ ಮಲ್ಪರೆ ಉಂಡು ಪಂಡೆರ್.

35 ಸಾರರ್ದ್‌ಲ ಎಚ್ಚ ನವೋದಯ ಸ್ವಸಹಾಯ ಗುಂಪು

ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ 35 ಸಾರರ್ದ್‌ಲ ಎಚ್ಚ ನವೋದಯ ಸ್ವಸಹಾಯ ಗುಂಪುಲು ಕೆಲಸ ಮಲ್ತೊಂದಿತ್ತ್‌ದ್ ಬಡವೆರ್‌ನ್ ಆರ್ಥಿಕವಾದ್ ಬಲ ಮಲ್ಪುನೆಟ್ಟ್ ಮಲ್ಲ ಪಾತ್ರ ವಹಿಸಾದೆರ್. ಈ ಹಿನ್ನೆಲೆಡ್ ರಡ್ಡ್ ಜಿಲ್ಲೆದ ಅತ್ಯುತ್ತಮ ಸ್ವಸಹಾಯ ಗುಂಪುಲೆಗ್ ಗೌರವ ಮಲ್ಪರೆ ಉಂಡು. ಉಂದುವೇ ಸಂದರ್ಭಡ್ ಪತ್ರಿಕಾ ರಂಗದ ಒರಿ ಸಾಧಕೆರ್ ಅಂಚೆನೆ ಮೂಡುಬಿದಿರೆ ತರಬೇತಿ ಕೇಂದ್ರಡ್ ರ‌್ಯಾಂಕ್ ಪಡೆತಿನ ಇರ್ವೆರೆನ್ ಗೌರವ ಮಲ್ಪರೆ ಉಂಡು ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಗೋಪಾಲಕೃಷ್ಣ ಭಟ್, ಜಯರಾಜ್ ಶೆಟ್ಟಿ, ಶಶಿಕುಮಾರ್ ರೈ ಬಲ್ಯೊಟ್ಟು ಇತ್ತೆರ್.

“ಸಹಕಾರ ಚಳುವಳಿದ ಸಾಧನೆಲೆನ್ ನೆಂಪು ಮಲ್ಪುನೆತ್ತ ಒಟ್ಟುಗು ನನ ದುಂಬಗ್ ಸಹಕಾರಿ ಕ್ಷೇತ್ರದ ಬೆಳವಣಿಗೆಗ್ ಪೊಸ ಪೊಸ ಚಿಂತನೆ ಮಲ್ಪುನು, ಅವೆನ್ ಕಾರ್ಯಗತ ಮಲ್ಪುನು ಸಹಕಾರ ಸಪ್ತಾಹದ ಮುಖ್ಯ ಉದ್ದೇಶವಾದುಂಡು”

ಡಾ. ಎಂ.ಎನ್. ರಾಜೇಂದ್ರ ಕುಮಾರ್,
ಅಧ್ಯಕ್ಷೆರ್,
ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್

You Missed