ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಮಂಗಳೂರು ವಿಶ್ವವಿದ್ಯಾಲಯದ ಪೊಸ ಕುಲಸಚಿವೆರಾದ್ ಡಾ.ಕಿಶೋರ್ ಕುಮಾರ್ ಅಧಿಕಾರ ಸ್ವೀಕಾರ

ಕುಡ್ಲ, ಎಪ್ರಿಲ್ 22: ವಿಶ್ವವಿದ್ಯಾನಿಲಯದ ದೈಹಿಕ ಶಿಕ್ಷಣ ವಿಭಾಗದ ನಿರ್ದೇಶಕೆರಾಯಿನ ಡಾ. ಕಿಶೋರ್ ಕುಮಾರ್ ಸಿಕೆ (ಎಂ.ಪಿ.ಎಡ್, ಪಿ.ಹೆಚ್.ಡಿ) ಮೇರ್ ಪೊಸ ಕುಲಸಚಿವೆರಾದ್ ಅಧಿಕಾರ ವಹಿಸೊಂದೆರ್ .

ರಾಜ್ಯ ಸರ್ಕಾರದ ಅಧೀನ ಕಾರ್ಯದರ್ಶಿ (ಉನ್ನತ ಶಿಕ್ಷಣ ಇಲಾಖೆ) ಮಹೇಶ್ ಆರ್ ಕೊರಿನ ಆದೇಶಾನುಸಾರ, ಮಾರ್ಚ್ 22 ರ್ದ್ ಕೆ. ರಾಜು ಮೊಗವೀರ (ಕೆ.ಎ.ಎಸ್) ಮೆರ್ನ ವರ್ಗಾವಣೆರ್ದ್ ಬೊಕ್ಕ ಉಸ್ತುವಾರಿ ಕುಲಸಚಿವೆರಾದ್ ಬೇಲೆ ಮಲ್ತೊಂದು ಇತ್ತಿನ ಪರೀಕ್ಷಾಂಗ ಕುಲಸಚಿವ ಪ್ರೊ. ಪಿ ಎಲ್ ಧರ್ಮ ಮೇರ್ ಅಧಿಕಾರ ಕೊರಿಯೆರ್ .

ಸುಮಾರ್ ವರ್ಷದ ಬೋಧನೆ/ಆಡಳಿತ ಅನುಭವ ಉಪ್ಪುನ ಡಾ. ಕಿಶೋರ್ ಕುಮಾರ್ ಸಿಕೆ ಕುಡ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಸಿಂಡಿಕೇಟ್ ಸದಸ್ಯ, ಅಕಾಡೆಮಿಕ್ ಕೌನ್ಸಿಲ್ ಸದಸ್ಯ, ಡೀನ್ (ಶಿಕ್ಷಣ) ಇಂಚ ಜವಾಬ್ದಾರಿಲೆನ್ ಯಶಸ್ವಿಯಾದ್ ಮಲ್ದೆರ್ .

ಸೆಲ್ಫ್ ಡಿಫೆನ್ಸ್ ಬೊಕ್ಕ ಗೃಹರಕ್ಷಕದಳದ ಕೋವಿಡ್ ಮಾರ್ಷಲ್‌ರ್ದ್ ಕೋವಿಡ್ ಜಾಗೃತಿ

ಕುಡ್ಲ , ಎ.20: ಕುಡ್ಲಡ್ ಕೊರೋನ ಸೋಂಕುದ ಪ್ರಮಾಣ ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಜನಕುಲು ಎಚ್ಚದ ಸಂಖ್ಯೆಡ್ ಸೇರುನ ಜಾಗೆಡ್ ಐಟ್ಲಾ ಪೇಂಟೆಡ್ ಮಾಸ್ಕ್ ಪಾಡಂದೆ ತಿರ್ಗೊಂದು ಇತ್ತಿನ ಸಾರ್ವಜನಿಕೆರೆಗ್ ಸೆಲ್ಫ್ ಡಿಫೆನ್ಸ್ ಬೊಕ್ಕ ಗೃಹರಕ್ಷಕದಳದ ಕೋವಿಡ್ ಮಾರ್ಷಲ್‌ ಲು ಐತಾರ ಕೆಂಪು ಗುಲಾಬಿ ಪೂ ಬೊಕ್ಕ ಮಾಸ್ಕ್ ಕೊರ್ದು , ಕೋವಿಡ್ ಜಾಗೃತಿ ಮೂಡಾಯೆರ್.

ಗೃಹರಕ್ಷಕದಳದ ಕಮಾಂಡೆಂಟ್ ಡಾ.ಮುರಲಿ ಮೋಹನ್ ಚೂಂತಾರು, ಸಮಾಜ ಸೇವಕ ಪ್ರೊ.ಸುರೇಶ್‌ನಾಥ್, ಉದ್ಯಮಿ ಆಲ್ವಿನ್ ಜೋಯೆಲ್ ನೊರೊನ್ಹಾ, ಸಿವಿಲ್ ಡಿಫೆನ್ಸ್‌ದ ಅಜಯ ಕುಮಾರ್ ಬೇತೆ ಮಾರ್ಷಲ್‌ನ ಒಟ್ಟು ಸೇರ್ದ್ ಮಾಸ್ಕ್ ಪಾಡ್ಯರೆ ಪ್ರೇರೇಪಣೆ ಮಲ್ತೆರ್.