ಒಂತೆ ಒಂತೆನೇ ಪಿಸ್ತಾ ತಿಂದ್ಂಡ ಕೋಎಂಜೈಮ್ Q10 ದೇಹದ ಜೀವಕೋಶಡ್ ಶಕ್ತಿನ್ ಎಚ್ಚ ಮಲ್ಪುಂಡು.
ಪಿಸ್ತಾಡ್ ಇಪ್ಪುನ ಆರೋಗ್ಯಕರ ಕೊಬ್ಬು ಹೃದ್ರೋಗದ ಅಪಾಯನ್ ಕಮ್ಮಿ ಮಲ್ಪುಂಡು. ಪಾರ್ಶ್ವವಾಯು ಬೊಕ್ಕ ಬೇತೆ ಸುಮಾರ್ ಹೃದಯ ಸಮಸ್ಯೆದ ಅಪಾಯನ್ ತಡೆಪುಂಡು.
ಅತ್ತಂದೆ ಪಿಸ್ತಾ ತಿನ್ಪುನೆರ್ದ್ ದೇಹದ ಪ್ರತಿರೋಧನ್ ಎಚ್ಚ ಮಲ್ಪೆರೆ, ಜೀರ್ಣಕ್ರಿಯೆ ಬೊಕ್ಕ ಸಾಮಾನ್ಯ ಆರೋಗ್ಯನ್ ಸುಧಾರಿಸಾಯೆರೆ ಸಹಾಯ ಆಪುಂಡು. ನೆತ್ತ ಬಗೆಟ್ಟ್ ಆಹಾರ ತಜ್ಞೆರೆನ ಸಲಹೆ ದೆತೊನುನೇ ಎಡ್ಡೆ.
ಕುಡ್ಲ: ಲೋಕಸಭಾ ಚುನಾವಣೆದ ನೀತಿ ಸಂಹಿತೆ ಜಾರಿಯಾಯಿನ ದಿನರ್ದ್ ಮಾರ್ಚ್ 20 ಮುಟ್ಟ 12,300 ರೂಪಾಯಿ ಬಿಲೆತ್ತ 21.34 ಲೀಟರ್ ಗಂಗಸರ ಜಪ್ತಿ ಮಲ್ತ್ದೆರ್. 3,13,500ರೂಪಾಯಿ ಬಿಲೆತ್ತ 1.65 ಕೆಜಿ ಡ್ರಗ್ಸ್ನ್ ವಶಕ್ಕ್ ದೆತೊಂದೆರ್ ಪಂದ್ ಜಿಲ್ಲಾಧಿಕಾರಿಲೆನ ಕಚೇರಿ ತೆರಿಪಾದೆರ್.
2024 ಲೋಕಸಭಾ ಚುನಾವಣೆಗ್ ಸಂಬಂಧಿಸಾದ್ ಚುನಾವಣಾ ಅಕ್ರಮನ್ ತಡೆಯೊನರೆ ಜಿಲ್ಲೆಡ್ ಒಟ್ಟು 8 ಕರ್ಚಿ ವೆಚ್ಚದ ಪರೀವೀಕ್ಷಕೆರೆನ್, 72 ಪ್ಲೈಯಿಂಗ್ ಸ್ಟ್ಯಾಡ್ (ಎಫ್.ಎಸ್.ಟಿ), 69 ಎಸ್.ಎಸ್.ಟಿ ಕೂಟಲು ಬೊಕ್ಕ 8 ಅಬಕಾರಿ ತಂಡಲೆನ್ ಜಿಲ್ಲೆಡ್ ನಿಯೋಜನೆ ಮಲ್ತ್ದೆರ್.
ಮಾಯಿದೆ ದೇವುಸ್ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ & ಸಂತ ವಿಕ್ಟರ್ ಆಂಗ್ಲ ಮಾಧ್ಯಮ ಹಿರಿಯ ಪ್ರಾಥಮಿಕ ಶಾಲೆ ಬೊಕ್ಕ ಮೇಘ ಕಲಾ ಆರ್ಟ್ & ಡ್ಯಾನ್ಸ್ ಮುರಳಿ ಬ್ರದರ್ಸ್ ಡ್ಯಾನ್ಸ್ ಕ್ರೂ ಪುತ್ತೂರುದ ಒಟ್ಟುಸೇರಿಗೆಡ್ *’ಚಿತ್ತಾರ’* ಜೋಕ್ಲೆನ ಬೇಸಿಗೆ ಶಿಬಿರ ಎ.2-11 ಮುಟ್ಟ ಪುತ್ತೂರು ಮಾಯಿದೆ ದೇವುಸ್ ಸಭಾಂಗಣಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತ ಶಾಲೆದ ಜೋಕ್ಲೆಗ್ ಅವಕಾಶ ಬೊಕ್ಕ ಉತ್ತಮವಾಯಿನ ಸಮ್ಮರ್ ಕ್ಯಾಂಪ್ ವೇದಿಕೆ ಉಂಡು. ಅತ್ತಂದೆ ಗೇಮ್ಸ್, ನಟನೆ, ಡ್ಯಾನ್ಸ್, ವರ್ಲಿ ಆರ್ಟ್, ಕ್ರಾಪ್ಟ್, ಸೂ ಇಜ್ಜಂದಿನ ಅಡಿಗೆ, ಸ್ಟೇಜ್ ಫಿಯರ್ ಇಂಚ ಬೇತೆ ಬೇತೆ ಚಟುವಟಿಕೆಲು ನಡಪರೆ ಉಂಡು.
ಈ ಲೇಸ್ ಡ್ ಪಾಲ್ ಪಡೆಪುನಕುಲು 6-16 ವರ್ಷದಕುಲು ಆದಿಪ್ಪೊಡು. ನೆಕ್ಕ್ ಪ್ರವೇಶ ಶುಲ್ಕ 850 ರೂ. ಉಂಡು.
ಅಂಚೆನೆ ಈ ಲೇಸ್ ಡ್ ಪಾಲ್ ಪಡೆಯಿನಕ್ಲೆಗ್ ಸರ್ಟಿಫಿಕೇಟ್ ತಿಕ್ಕುಂಡು. ಈ ಶಿಬಿರಗ್ ಟೈಮ್ಸ್ ಆಫ್ ಕುಡ್ಲ ತುಳು ಪ್ರತಿಕಾಕೂಟದಕುಲು ಎಡ್ಡೆಪ್ಪು ಬಯಕ್ ದೆರ್.
ಹಳೆಯಂಗಡಿ: ಸೌದಿ ಅರೇಬಿಯಾದ ತಾಯಿಫ್ ಕೈತಲ್ ಕಾರ್ ಆಕ್ಸಿಡೆಂಟ್ ಆದ್ ಹಳೆಯಂಗಡಿ ತೋಕೂರು ಶಾಲೆದ ಕೈತಲ್ದ ನಾಲ್ ಜನ ತೀರ್ ಪೋಯಿನ ಘಟನೆ ನಡತ್ಂಡ್.
ತೀರ್ ಪೋಯಿನಕ್ಲೆನ್ ತೋಕೂರು ನಿವಾಸಿ ಶಮೀಮ್ ಬೊಕ್ಕ ಝರೀನಾ ದಂಪತಿಲೆನ ಮಗಲ್ ಹಿಬಾ (29) ಅರೆನ ಕಂಡನಿ ಮುಹಮ್ಮದ್ ರಮೀಝ್ (34) ಜೋಕುಲ್ ಆಯಿನ ಆರೂಶ್ (3) ಬೊಕ್ಕ ರಾಹ (3 ತಿಂಗೊಲ್) ಪಂದ್ ಗುರ್ತಿಸಾದೆರ್.
ಕತಾರ್ರ್ದ್ ಸೌದಿ ಅರೇಬಿಯಾಗ್ ಉಮ್ರಾ ಮಲ್ಪರೆ ಪಂದ್ ಕಾರ್ಡ್ ಪೋವೊಂದಿತ್ತೆರ್. ಕಾರ್ಡ್ ನನೊಂಜಿ ಬಾಲೆಗ್ ಮಸ್ತ್ ಪೆಟ್ಟಾದಿತ್ತ್ದ್, ಆಸ್ಪತ್ರೆಗ್ ದಾಖಲ್ ಮಲ್ತ್ದೆರ್.
ಪಸಕ್ತ ಹಣಕಾಸು ವರ್ಷದ ಅಕೇರಿದ ಲೆಕ್ಕಪತ್ರಲೆನ ಮುಗಿತಲದ ದಿನವಾಯಿನೇರ್ದಾವೆರ ಮಾ.31 ಕ್ಕ್ ಪಂಡ ಐತಾರ ದೇಶದ ಮಾತ ಬ್ಯಾಂಕ್ ಲು ಏಪದಲೆಕ್ಕನೇ ಕೆಲಸ ಮಲ್ಪುಂಡು ಪಂದ್ ಆರ್ ಬಿಐ ತೆರಿಪಾದ್ಂಡ್.
ಸರ್ಕಾರಿ ವ್ಯವಹಾರ ಇಪ್ಪುನ ದೇಶದ ಮಾತ ಬ್ಯಾಂಕ್ ಲು ಮಾ.31 ಐತಾರದಾನಿ ಓಪನ್ ಇಪ್ಪೊಡು ಪಂದ್ ಕೇಂದ್ರ ಸರ್ಕಾರ ಬಿನ್ನಾಪು ಮಲ್ದ್ಂಡ್.
ಅಂಚಾದ್ ಮಾ.31 ಕ್ಕ್ ಸರ್ಕಾರದ ರಸೀದಿ ಬೊಕ್ಕ ಪಾವತಿದೊಟ್ಟಿಗೆ ವ್ಯವಹಾರ ಮಲ್ಪುನ ಬ್ಯಾಂಕ್ ಲೆನ ಮಾತ ಶಾಖೆನ್ ವಹಿವಾಟುಲೆಗ್ ದೆತ್ತ್ ದೀಯೆರೆ ತೆರಿಪಾದ್ಂಡ್ ಪಂದ್ ಆರ್ ಬಿಐ ಪಂತ್ಂಡ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ‘ಚಿಣ್ಣರ ದನಿ ಲೇಸ್ ಮಾ.20 ಬುದಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ದ 30ನೇ ಸಂಚಿಕೆಡ್ ವಿಶೇಷ ಬಾಲ ಪ್ರತಿಭೆ ಅನುರಾಗ್ ನಾಯಕ್ ತ್ರಾಸಿ ಪಾಲ್ ಪಡೆಯೆರ್. ಮಾ.21 ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಒಡಿಪು: ಪೆರ್ಣಂಕಿಲ ಶ್ರೀ ಮಹಾಲಿಂಗೇಶ್ವರ ಶ್ರೀ ಮಹಾಗಣಪತಿ ದೇವೆರೆನ ಪೊಸ ದೇವಸ್ಥಾನದ ಸಮರ್ಪಣೆ, ಪುನಃಪ್ರತಿಷ್ಠೆ ಸಹಸ್ರ ಕಲಶ ಬ್ರಹ್ಮಕುಂಭಾಭಿಷೇಕದ ಲೆಕ್ಕೊಡು ದೇವಸ್ಥಾನಡ್ ಬೇತೆ ಬೇತೆ ಧಾರ್ಮಿಕ ಪ್ರಕ್ರಿಯೆಲು ನಡತ್ಂಡ್.
ಪುಣ್ಯಾಹ ವಾಚನ, ಗಣಪತಿ ಯಾಗ, ಮಠಟ್ಟ್ ಗಣಪತಿ ಯಾಗ, ನವಗ್ರಹ ಯಾಗ, ವಿರಜಾ ಹೋಮ, ಶ್ರೀರಾಮ ದೇವೆರೆನ ಪ್ರತಿಷ್ಠೆ ಕಲಶಾಭಿಷೇಕ, ಅರಣಿ ಮಥನ, ಮಹಾಪೂಜೆ, ವಾಸ್ತು ಪೂಜೆ, ವಾಸ್ತುಬಲಿ, ವಾಸ್ತು ಹೋಮ, ಪ್ರಕಾರ ಬಲಿ, ಪಂಚಗವ್ಯ ಪುಣ್ಯಾಹ ವಾಚನ, ಕಂಕಣ ಬಂದ, ಅಥರ್ವಶೀರ್ಷ ಹೋಮ, ಮಹಾ ಸುದರ್ಶನ ಹೋಮ ನಡತ್ಂಡ್.
ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಯೋಗೀಶ್ ಆಚಾರ್ಯ ಮೆರೆರ್ದ್ ಮಸ್ತ್ ಮಜಾ ಮ್ಯಾಜಿಕ್, ಪೆರ್ಣಂಕಿಲ ಶಾಲೆದ ಜೋಕ್ಲೆರ್ದ್ ನೃತ್ಯ ವೈವಿಧ್ಯ, ನಡತ್ಂಡ್.
ಈ ಪೊರ್ತುಡು ಜೀರ್ಣೋದ್ದಾರ ಸಮಿತಿ ಅಧ್ಯಕ್ಷೆರ್ ವಿ. ಪೆರ್ಣಂಕಿಲ ಹರಿದಾಸ ಭಟ್, ಪ್ರದಾನ ಕಾರ್ಯದರ್ಶಿ ಪೆರ್ಣಂಕಿಲ ಶ್ರೀಶ ನಾಯಕ್, ಪೇಜಾವರ ಮಠತ್ತ ದಿವಾನ ಎಂ. ರಘುರಾಮ ಆಚಾರ್ಯ, ಕಾರ್ಯ ನಿರ್ವಹಣಾಧಿಕಾರಿ ಸುಬ್ರಹ್ಮಣ್ಯ ಭಟ್, ದೇವಸ್ಥಾನದ ವಿಶ್ವಸ್ಥೆರ್ ನ್ಯಾಯವಾದಿ ಸತೀಶ್ ಪೂಜಾರಿ, ಸಂಘಟನಾ ಕಾರ್ಯದರ್ಶಿ ಸದಾನಂದ ಪ್ರಭು, ಉಪಾಧ್ಯಕ್ಷೆರ್ ಶ್ರೀಕಾಂತ್ ನಾಯಕ್ ಅಲೆವೂರು, ಕಾರ್ಯದರ್ಶಿ ಉಮೇಶ್ ನಾಯಕ್ ಪಾಲ್ ಪಡೆದಿತ್ತೆರ್.
ಕುಡ್ಲ ಅಮೃತ ಸಂಜೀವಿನಿ (ರಿ.) ಸಂಸ್ಥೆದ 100ನೇ ತಿಂಗೊಲ್ದ ಯೋಜನೆದ ಲೆಕ್ಕೊಡು ರಾಜಕೇಸರಿ ಯೂತ್ ಕ್ಲಬ್ ಗಂಜಿಮಠ ಸಂಸ್ಥೆದ ಮುತಾಲಿಕೆಡ್ ಸಂಸ್ಥೆದ 10ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಸಂಜೀವಿನಿ ವಜ್ರ ಮಹೋಚ್ಚಯ, ಬಡಪತ್ತ್ ದ ಕುಟುಂಬಲೆಗ್ ಪನವುದ ಸಕಾಯ ಬೊಕ್ಕ ವೈಶಿಷ್ಟ್ಯ ಪೂರ್ಣ ಲೇಸ್ ಎಡಪದವುದ ಶ್ರೀ ರಾಮ ಮಂದಿರಡ್ ಮಾ.17 ಕ್ಕ್ ನಡತ್ಂಡ್.
ಒಂಜೇ ವೇದಿಕೆಡ್ 33 ಕುಟುಂಬಲೆಗ್ ಒಟ್ಟು 8 ಲಕ್ಷದ 40 ಸಾರ ರೂ. ಪನವುದ ಸಹಾಯ ಬಿನ್ನೆರೆನ ಉಪಸ್ಥಿತಿಡ್ ಕೊರಿಯೆರ್.
ವಜ್ರದೇಹಿ ಮಠತ್ತ ಪರಮಪೂಜ್ಯ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್. ಯುವರಾಜ್ ಜೈನ್ ಬೆದ್ರ ಸಭಾ ಲೇಸ್ ದ ಉದಿಪನ ಮಲ್ತೆರ್. ಸಭಾಧ್ಯಕ್ಷತೆನ್ ಚಂದ್ರಹಾಸ ಶೆಟ್ಟಿ ನಾರಳ ಒಯಿಸ್ ದಿತ್ತೆರ್. ಲೇಸ್ ಡ್ 50 ಸೇವಾ ಸಂಸ್ಥೆಲೆನ್ ಮಾನಾದಿಗೆ ನಡತ್ಂಡ್. ಚೇತನ್ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ರಾಜಕೇಸರಿ ಸಂಸ್ಥೆದ 10ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ನಡತ್ಂಡ್.
ತುಳು ನಾಟಕ ಬೊಕ್ಕ ತುಳು, ಕನ್ನಡ ಪಿಕ್ಚರ್ ದ ಪುಗರ್ತೆದ ನಟೆ, ನಿರ್ದೇಶಕೆ, ಸಂಘಟಕೆ ವೇಣುಗೋಪಾಲ ಟಿ ಕೋಟ್ಯಾನ್ (ವಿ.ಜಿ ಪಾಲ್) ಇನಿ ದೇವೆರೆ ಪಾದೊ ಸೇರಿಯೆರ್.
ತುಳು ರಂಗಭೂಮಿಡ್ 50 ವರ್ಷರ್ದ್ ಎಚ್ಚ ಕಾಲ ಸೇವೆ ಸಂದಾಯಿನ ಮೇರ್ ಸುಮಾರ್ 2 ಸಾರ ನಾಟಕಡ್ ಅಭಿನಯ ಮಲ್ದೆರ್.
ತುಳು ಪಿಕ್ಚರಾಯಿನ ಬಂಗಾರ್ ಪಟ್ಲೇರ್, ತುಡರ್, ಕನ್ನಡದ ಜೀವನ್ಮುಖಿ, ಮಹಾನದಿ ಪಿಕ್ಚರ್ ಡ್ ನಟನೆ ಮಲ್ದೆರ್.
ಕಲ್ಜಿಗದ ಕುರುಕ್ಷೇತ್ರ ಪನ್ಪಿನ ತುಳು ನಾಟಕದ ಮುಕೇನ 1961 ಟ್ಟ್ ರಂಗ ಪ್ರವೇಶ ಮಲ್ತಿನ ಪಾಲ್, ಹಾಸ್ಯ ಪಾತ್ರನ್ ಅದ್ಭುತವಾದ್ ಮಲ್ತೊಂದು ಇತ್ತೆರ್.
ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರದ 2024-26 ನೇ ಸಾಲಿನ ಪೊಸ ಪದಾಧಿಕಾರಿಲೆನ ಆಯ್ಕೆ ಇಂಚೊಗು ನಡತ್ಂಡ್.ಪೊಸ ಅಧ್ಯಕ್ಷೆರಾದ್ ಕರುಣಾಕರ ಶೆಟ್ಟಿ ಪಂಜದ ಗುತ್ತು ಆಯ್ಕೆ ಆತೆರ್.
ಗೌರವಾಧ್ಯಕ್ಷೆರಾದ್ ವಿಶ್ವನಾಥ ಶೆಟ್ಟಿ ಪಂಜದ ಗುತ್ತು, ಸದಾನಂದ ಎಂ ಶೆಟ್ಟಿ ಉಪಾಧ್ಯಕ್ಷೆರಾದ್ ರಾಜೇಶ್ ಶೆಟ್ಟಿ ಮಜಲ ಗುತ್ತು, ರಾಮಚಂದ್ರ ಶೆಟ್ಟಿ, ಧೀರಜ್ ಶೆಟ್ಟಿ ಮೊಗಪಾಡಿ, ಭಾಸ್ಕರ್ ಪೂಜಾರಿ ಉಲ್ಯ, ಕಾರ್ಯದರ್ಶಿಯಾದ್ ಪದ್ಮನಾಭ ಪೂಜಾರಿ ಪಂಜ ಜೊತೆ ಕಾರ್ಯದರ್ಶಿ ಲಾದ್ ಅವಿನಾಶ್ ಶೆಟ್ಟಿ ಪಂಜ, ಭರತ್ ಶೆಟ್ಟಿ ಪಂಜ, ಕೋಶಾಧಿಕಾರಿಯಾದ್ ಲಕ್ಷ್ಮೀಶ ಶೆಟ್ಟಿ ಪಂಜ, ಜೊತೆ ಕೋಶಾಧಿಕಾರಿಲಾದ್ ಹರಿಪ್ರಸಾದ್ ಶೆಟ್ಟಿ, ಪ್ರಮೋದ್ ಶೆಟ್ಟಿ, ಭಜನಾ ಸಂಚಾಲಕೆರಾದ್ ಸತೀಶ್ ಎಂ ಶೆಟ್ಟಿ ಬೈಲಗುತ್ತು, ಲೆಕ್ಕ ಪರಿಶೋಧಕೆರಾದ್ ನಾರಾಯಣ ಬಿ .ಶೆಟ್ಟಿ ಕೊಯಿಕುಡೆ, ಭಜನಾ ಮಂದಿರದ ಅರ್ಚಕೆರಾದ್ ಸತೀಶ್ ಶೆಟ್ಟಿ ಪಂಜದ ಗುತ್ತು, ಅಶೋಕ್ ಪೂಜಾರಿ ಆಯ್ಕೆ ಆತೆರ್ ಈ ಪೊರ್ತುಡು ಗೌರವ ಸಲಹೆಗಾರೆರ್ ಬೊಕ್ಕ ಕಾರ್ಯಕಾರಿ ಸಮಿತಿಗ್ ಸದಸ್ಯೆರೆನ್ ಆಯ್ಕೆ ಮಲ್ತೆರ್.
