ಕುಡ್ಲ: ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅಂಚೆನೆ ಮಾರ್ನೆಮಿ ಪೂಜೆದ ಲೆಕ್ಕೊಡು ಪ್ರತಿ ದಿನೊಲ ರಾತ್ರೆ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಡೆಕಾಯಿನ್ ಒಂತೆ ಒಂತೆನ್ ತಿನ್ಪುನೆರ್ದ್ ಸುಮಾರ್ ಪ್ರಯೋಜನಲು ಉಂಡು.
ನೆಟ್ಟ್ ವಿಟಮಿನ್ ಎ, ಸಿ, ಪೊಟ್ಯಾಸಿಯಮ್‌, ಕ್ಯಾಲ್ಸಿಯಂ ಪೋಷಕಾಂಶ ಉಂಡು. ನೆರ್ದ್ ರೋಗನಿರೋಧಕ ಶಕ್ತಿ ಎಚ್ಚಾಪುಂಡು. ದೃಷ್ಟಿ ದೋಷ ನಿವಾರಣೆ ಆಪುಂಡು. ಎಲು ಗಟ್ಟಿ ಆಪುಂಡು ಬೊಕ್ಕ ಚರ್ಮ ಆರೋಗ್ಯವಾದ್ ಇಪ್ಪುಂಡು. ನೆಕ್ಕ್ ಫೈಬರ್ ಜೀರ್ಣಕ್ರಿಯೆ ಸಕಾಯ ಮಲ್ಪುಂಡು. ಅತ್ತಂದೆ ನೆತ್ತೆರ್ ಡ್ ಇಪ್ಪುನ ಸೆಕ್ಕರೆ ಬೊಕ್ಕ ಕೊಲೆಸ್ಟ್ರಾಲ್ ಮಟ್ಟನ್ ಕಮ್ಮಿ ಮಲ್ಪುಂಡು.
ಜೆಡಿಎಸ್ ಪಕ್ಷದ ಪೊಸ ರಾಜ್ಯಾಧ್ಯಕ್ಷೆರಾದ್ ಮಾಜಿ ಸಿಎಂ ಹೆಚ್ ಡಿ ಕುಮಾರಸ್ವಾಮಿ ಮೇರ್ ನೇಮಕ ಆತೆರ್.
ಬೆಂಗ್ಲೂರ್ ದ ಜೆಪಿ ಭವನಡ್ ನಡತಿನ ಪಕ್ಷದ ಕೋರ್ ಕಮಿಟಿ ಸಭೆಟ್ಟ್ ಹೆಚ್ ಡಿಕೆ ಮೆರೆನ್ ರಾಜ್ಯಾಧ್ಯಕ್ಷೆರಾದ್ ನೇಮಕ ಮಲ್ದೆರ್.
ಇತ್ತೆ ಜೆಡಿಎಸ್ ಶಾಸಕಾಂಗ ಪಕ್ಷದ ನಾಯಕೆ ಆಯಿನ ಮೇರ್, ನೆರ್ದ್ ದುಂಬು ರಾಜ್ಯಾಧ್ಯಕ್ಷೆರಾದ್ ಪಕ್ಷನ್ ಸಂಘಟನೆ ಮಲ್ತ್ ದ್ ಇತ್ತೆರ್.
ನವದೆಹಲಿ: ಪಿಕ್ಸೆಲ್‌ ಸ್ಮಾರ್ಟ್‌ ಫೋನ್‌ನ್ ಭಾರತಡ್ ತಯಾರ್‌ ಮಲ್ಪೆರೆ ಯೋಜನೆ ಪಾರ್ದ ಪಂದ್ ಗೂಗಲ್‌ ಕಂಪನಿ ಅಕ್ಟೋಬರ್‌ 19 ದಾನಿ ಘೋಷಣೆ ಮಲ್ತಿನ ವರದಿಯಾತ್‌ಂಡ್.
ಇತ್ತೆ ಗೂಗಲ್‌ ಭಾರತಡ್ ಪಿಕ್ಸೆಲ್‌ 8, ಪಿಕ್ಸೆಲ್‌ 8 ಪ್ರೊ, ಪಿಕ್ಸೆಲ್‌ ವಾಚ್‌ನ್‌ ಬುಡುಗಡೆ ಮಲ್ತ್‌ದ್‌ಂಡ್. ಬರ್ಪಿನ ವರ್ಷ ಭಾರತಡೆ ಪಿಕ್ಸೆಲ್‌ 8 ಉತ್ಪಾದನೆ ಸುರು ಆವರೆ ಉಂಡು. ಕಂಪನಿಡ್ ಸ್ಥಳೀಯೆರ್ ಬೊಕ್ಕ ವಿದೇಶಿ ತಯಾರಿಕೆರ್‌ ಉಲ್ಲೆರ್ ಪಂದ್ ಗೂಗಲ್‌ ತೆರಿಪಾದ್ಂಡ್.
ಕುಡ್ಲ: ಪಣಂಬೂರು ಕೈತಲ್‌ದ ಕಡಲ್‌ಡ್‌ ರಡ್ಡ್ ಜನತ ಪುನ ಗುರುವಾರ ಕಾಂಡೆ ನಡತ್ಂಡ್. ಬೆಂಗಳೂರುರ್ದು ಬೂದಿನ ಲಕ್ಷ್ಮಿ (43) ಬೊಕ್ಕ ಬೋರಲಿಂಗಯ್ಯ (50) ತೀರ್‌ ಪೋಯಿನಕುಲ್ ಪಂದ್ ತೆರಿದ್‌ ಬೈದ್‌ಂಡ್.
ರಡ್ಡ್ ಜನ ಕಡಲ್‌ಗ್‌ ಲಾಗಿದ್ ಆತ್ಮಹತ್ಯೆ ಮಲ್ತ್ ಇಪ್ಪೊಡು ಪಂದ್ ತೆರಿದ್‌ ಬೈದ್‌ಂಡ್. ಸಂಬಂಧಡ್‌ ರಡ್ಡ್ ಜನ ಅತ್ತಿಗೆ ಬೊಕ್ಕ ಭಾವೆ ಪಂದ್ ತೆರಿದ್‌ ಬೈದ್‌ಂಡ್. ಬೆಂಗಳೂರು ಮೂಲದಕುಲ್‌ ಆಯಿನ ಮೊಕುಲ್ ಇಲ್ಲಲ್‌ ಏರೆಗ್ಲಾ ಪನಂದೆ ಬತ್ತಿತ್ತೆರ್ ಪನ್ಪುನ ಮಾಹಿತಿ ಪೊಲೀಸೆರೆಗ್ ತಿಕ್ ದ್ಂಡ್.
ಅಕಲ್ನ ಮೊಬೈಲ್ ಕಡಲ್‌ದ ದಂಡೆಡ್‌ ತಿಕ್ಕ್‌ದ್‌ ಪಣಂಬೂರು ಪೊಲೀಸೆರ್ ಸಂಬಂಧಿಕೆರೆನ್ ಸಂಪರ್ಕ ಮಲ್ತ್‌ದೆರ್‌ ಪಂದ್ ತೆರಿದ್‌ ಬೈದ್‌ಂಡ್.
ಕೇಂದ್ರ ಸರ್ಕಾರ ಉಜ್ವಲಾ ಯೋಜನೆದ ಮುಖೇನ ಧರ್ಮೊಗು ಎಲ್ ಪಿಜಿ ಗ್ಯಾಸ್ ಸಂಪರ್ಕ ಕೊರೊಂದು ಉಂಡು.
ಬಿಪಿಎಲ್ ಕಾರ್ಡ್ ಇಪ್ಪುನಕುಲು ಈ ಯೋಜನೆದ ಲಾಭ ಪಡೆವೊಲಿ. ಅಂಚಾದ್, ಬಿಪಿಎಲ್ ರೇಷನ್ ಕಾರ್ಡ್ ಜೆರಾಕ್ಸ್, ಇಲ್ಲದ ಮಾತ ಸದಸ್ಯೆರೆನ ಆಧಾರ್ ಕಾರ್ಡ್ ಜೆರಾಕ್ಸ್, ಇಲ್ಲದ ಯಜಮಾನಿನ ಬ್ಯಾಂಕ್ ಪಾಸ್ ಬುಕ್ ಜೆರಾಕ್ಸ್, ಪಾಸ್ ಪೋರ್ಟ್ ಸೈಜ್ ಪೋಟೋ, ಆಧಾರ್ ಕಾರ್ಡ್ ಗ್ ಲಿಂಕ್ ಆಯಿನ ಮೊಬೈಲ್ ಪತೊಂದು ಸರ್ಕಾರಿ ಸ್ವಾಮ್ಯದ ಗ್ಯಾಸ್ ಏಜೆನ್ಸಿದ ಕಚೇರಿಗ್ ಪೋದು ಅರ್ಜಿ ಸಂದಾವೊಲಿ.
ಮುಲ್ಕಿ : ಸಮಾಜ ಸರಿಯಾಯಿನ ಸಾದಿಡ್ ನಡಪೊಡು. ಜೋಕುಲೆನ ಭವಿಷ್ಯ ಹಾಳ್ ಮಲ್ಪುನ ಮಾದಕವಸ್ತು ಬೊಕ್ಕ ಬೊಡ್ಚಾಂದಿನ ಚಟುವಟಿಕೆನ್ ತಡೆಪರೆ ಮಾತೆರ್ಲ ಸಹಕಾರ ಕೊರೊಡು ಪಂದ್ ಮುಲ್ಕಿ ಪೊಲೀಸ್ ಠಾಣೆದ ಇನ್ಸ್ ಪೆಕ್ಟರ್ ವಿದ್ಯಾಧರ್ ಡಿ. ಬೈಕೇರಿಕರ್ ತೆರಿಪಾಯೆರ್.
ಆರ್ ಮುಲ್ಕಿ ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿದ ನಿರೆಲ್ಡ್ ಮುಲ್ಕಿದ ಶಿವಾಜಿ ಮಂಟಪಡ್ ಗುರುವಾರದಾನಿ 25 ನೇ ವರ್ಷದ ಬೊಳ್ಳಿ ಪರ್ಬದ ಶಾರದಾ ಮಹೋತ್ಸವದ ಮೂರ್ತಿ ಪ್ರತಿಷ್ಠಾಪನೆ ಲೇಸ್ ರ್ದ್ ಬೊಕ್ಕ ಭಗವಾಧ್ವಜ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಡಾ. ಅರುಣ್ ಕುಡ್ವ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಅರಸು ಕಂಬುಲ ಸಮಿತಿ ದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಶೆಟ್ಟಿ, ಉದ್ಯಮಿ ಬೊಕ್ಕ ದಾನಿಲಾಯಿನ ಪ್ರಕಾಶ್ ಶೆಣೈ, ಪ್ರಭೋದ್ ಕುಡ್ವ, ಹಿಂದೂ ಯುವ ಸೇನೆ ಮುಲ್ಕಿ ಘಟಕದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್ ಮಿತ್ತರ್ಮೆಡ್ ಇತ್ತೆರ್.
ಈ ಪೊರ್ತುಡು ನಾಗಸ್ವರ ವಾದಕೆರ್ ನಾಗೇಶ್ ಎ. ಬಪ್ಪನಾಡು ಮೆರೆಗ್ ಮಾನಾದಿಗೆ ನಡತ್ಂಡ್. ಶಂಕರ್ ಭಟ್ ಪ್ರಾರ್ಥನೆ ಮಲ್ತೆರ್.
ದಿನೇಶ್ ಕೊಲ್ನಾಡ್ ಪ್ರಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದ್ಕೊಂಡೆರ್. ಹರ್ಷರಾಜ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಶಿವಶಂಕರ್ ನಿರೂಪಣೆ ಮಲ್ತೆರ್. ಅವರ್ದ್ ಬೊಕ್ಕ ಮಾತೃ ಮಂಡಳಿ ಬಪ್ಪನಾಡು ಮೊಕ್ಲೆರ್ದ್ ಭಜನಾ ಸೇವೆ ನಡತ್ಂಡ್.
UPSC ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಟ್ಟ್ (CAPF) ಸಹಾಯಕ ಕಮಾಂಡೆಂಟ್ ಬೇಲೆಗ್ ಅರ್ಜಿ ಸಂದಾವೊಲಿ.
ಬಿಎಸ್ಎಫ್, ಐಟಿಬಿಪಿ ಬೊಕ್ಕ ಎಸ್ಎಸ್ ಬಿಡ್ ಖಾಲಿ ಇಪ್ಪುನ 322 ಬೇಲೆಗ್ ನೇಮಕಾತಿ ನಡಪರೆ ಉಂಡು.
ಅಪ್ಲಿಕೇಶನ್ ಪ್ರಕಿಯೆ ಸುರು ಆತ್ಂಡ್. ಆಸಕ್ತ ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ upsconline.nic.in ಗ್ ಭೇಟಿ ಕೊರ್ಪುನ ಮುಖೇನ ಅ.25 ತ್ತೊಲಯಿ ಅರ್ಜಿ ಸಂದಾವೊಲಿ.
ಪುತ್ತೂರು: ಕೋಡಿಂಬಾಡಿದ ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಸ್ಥಾನಡ್ ನವರಾತ್ರಿ ಪ್ರಯುಕ್ತ ನಡತೊಂದು ಇಪ್ಪುನ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಪುತ್ತೂರುದ ಸಾಧನ ಸಂಗೀತ ಪ್ರತಿಷ್ಠಾನದ ಡಾ.ವಿದುಷಿ ಸುಚಿತ್ರಾ ಹೊಳ್ಳ ಮೇರ್ನ ಶಿಷ್ಯ ವೃಂದರ್ದ್ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡತ್ಂಡ್.
ಇಶಾ .ಬಿ, ಅಂಜಲಿ ನಾಯಕ್ ಕೆ, ಮಾನಸ .ಬಿ, ಆರ್ಯನ್ ಸಿ. ಆರ್, ಮಾನ್ವಿ ಕಜೆ, ಅವನಿ ನಾಯಕ್, ಸುಪ್ರಜಾ ರಾವ್, ಮಯೂರಿ.ಕೆ, ಶ್ರೀವಿಭಾ ಕೇಪು, ಕಾರ್ತಿಕ್ ಪ್ರಸಾದ್, ಹೃಷಿಕೇಶ್ ಕೆ, ವಯಲಿನ್‌ಡ್ ಅನನ್ಯ ಪಿ.ಎಸ್, ಮೃದಂಗಡ್ ಶ್ಯಾಮ್ ಭಟ್ ಸಹಕಾರ ಕೊರಿಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ಇನಿ ಬಯ್ಯಗ್ (ಅ.19) 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆದ್ ಪಾತೆರಿಯೆರೆ ಉಲ್ಲೆರ್. ಅ.20 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
