ಒಡಿಪು: ತುಳುನಾಡ್ ದ ಪುಗರ್ತೆದ ‘ಆಭರಣ’ ಬಂಗಾರ್ ರ ಅಂಗಡಿಗ್ ಬೊಲ್ಪು ಬೊಲ್ಪುಗು ಐಟಿ ಅಧಿಕಾರಿಲು ದಾಳಿ ಮಲ್ದೆರ್.
ತುಳುನಾಡ್ ದ ಸುಮಾರ್ ಕಡೆಟ್ಟ್ ತನ್ನ ಶೋರೂಮ್ ಇಪ್ಪುನ ಪುಗರ್ತೆದ ಬಂಗಾರ್ ದ ಅಂಗಡಿ ಉಂದಾತ್ಂಡ್. ಪಿದಯಿ ಜಿಲ್ಲೆಡ್ಲಾ ನೆತ್ತ ಅಂಗಡಿ ಉಂಡು. ಇನಿ ಬೊಲ್ಪುಗು ಒಡಿಪು, ಕಾರ್ಲ, ಕುಂದಾಪುರ, ಪುತ್ತೂರು, ಪಡ್ಡೆದ್ರ, ಬೊಲ್ತೇರ್, ಬ್ರಹ್ಮಾವರ ಸೇರಿನಂಚೆನೆ ಸುಮಾರ್ ಕಡೆಟ್ ದಾಳಿ ನಡತ್ ದ್ಂಡ್. ಸುಮಾರ್ ಅಂಗಡಿದ ಮಿತ್ತ್ ದಾಳಿ ಮಲ್ತಿನ ಅಧಿಕಾರಿಲು ದಾಖಲೆನ್ ಪರಿಶೀಲನೆ ಮಲ್ತೊಂದು ಉಲ್ಲೆರ್.
ಒಡಿಪು: ವಿಶ್ವ ಬಂಟ ಸಮ್ಮೇಳನದ ಲೆಕ್ಕೊಡು ಸ್ಥಿತ್ಯಂತರಡ್ ಬಂಟೆರ್, ಶಿಕ್ಷಣ ಬೊಕ್ಕ ನಿರುದ್ಯೋಗದ ಬಗೆಟ್ಟ್ ವಿಚಾರ ಸಂಕಿರಣ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಂಗಣಡ್ ಐತಾರ ನಡತ್ಂಡ್.
ಹೇರಂಬ ಇಂಡಸ್ಟ್ರೀಸ್ ಲಿ. ಸಿಎಂಡಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಲೇಸ್ ಉದಿಪನ ಮಲ್ತೆರ್.
ಗುರ್ಕಾರ್ಮೆನ್ ವಿಶ್ವಾತ್ ಕೆಮಿಕಲ್ಸ್ ದ ಸಿಎಂಡಿ ಬಿ.ವಿವೇಕ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಒಯಿಸ್ ದಿತ್ತೆರ್.
ಕರ್ನಾಟಕ ಜಾನಪದ ಯಕ್ಷಗಾನ ಬೊಕ್ಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಸದಸ್ಯೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಮೇರ್ ಪಾತೆರ್ದ್, ಇತ್ತೆದ ಶಿಕ್ಷಣ ಒಂಚಿ ಪೋವೊಂದು ಉಂಡು, ನಿರುದ್ಯೋಗನೇ ಸೃಷ್ಟಿ ಮಲ್ಪುನ ಶಿಕ್ಷಣ ಸಂಸ್ಥೆಲು ಉದ್ಯೋಗ ಕೊರ್ಪುನೆ ಎಂಚ? ಮುಲ್ಪ ಕಲ್ತಿನ ಅರ್ಹ ಜವನೆರೆಗ್ ಉದ್ಯೋಗ ತಿಕ್ಕಂದೆ ವಿದೇಶಗ್ ಪೋವೊಡಾಪುಂಡು. ನೆನ್ ಪ್ರತಿಭಾ ಪಲಾಯನ ಪನ್ಪೆರ್ ಪ್ರತಿಭಾವಂತ ಬಂಟ ಸಮುದಾಯದ ಜವನೆರೆನ್ ನಮ್ಮ ಸಮಾಜದ ಅಭಿವೃದ್ಧಿಡ್ ಎಂಚ ಸೇರ್ಸಾವೊಡು ಪನ್ಪುನ ದಿಟ್ಟಿಡ್ ವಿಚಾರ ವಿನಿಮಯ ನಡಪೊಡು ಪಂದ್ ಪಂಡೆರ್.
ಹೇರಂಬ ಇಂಡಸ್ಟ್ರಿಸ್ ಬೊಂಬೈದ ಸಿಎಂಡಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಪಾತೆರ್ದ್, ಬಂಟೆರೆಗ್ ಕೃಷಿ ಪ್ರಧಾನ ಆಯಿನ ಹಿನ್ನೆಲೆ ಉಂಡು. ನಮ ಆಸಕ್ತಿ ಇಪ್ಪುನ ಕ್ಷೇತ್ರಡ್ ಉದ್ಯೋಗ ಮಲ್ಪೊಡು. ಎನ್ನ ಕಂಪೆನಿಡ್ 2500 ಜನ ಕೆಲಸ ಮಲ್ತೊಂದು ಉಲ್ಲೆರ್. ಶಿಕ್ಷಣ ಪಡೆಯಿನಕುಲು ನಮ ವಾ ಕ್ಷೇತ್ರಡ್ ಸಾಧನೆ ಮಲ್ಪೊಡು ಅವ್ವೇ ಕ್ಷೇತ್ರಡ್ ಬೇನೊಡು. ಯಾನ್ ಕಾಸ್ ನೇ ಸಾಧನೆ ಪಂದ್ ಪನ್ಪುಜಿ. ಆಂಡ ಜನರ್ದ್ ಗುರುತಿಸಾವುನ ನಿಜವಾಯಿನ ಸಾಧನೆ ಪಂದ್ ಪಂಡೆರ್.
ಉಪೇಂದ್ರ ಶೆಟ್ಟಿ ಮೇರ್ ಪಾತೆರ್ದ್, ಉದ್ಯೋಗಗ್ ಬೋಡಾಯಿನ ಅರ್ಹತೆ ಇಜ್ಜಿಂಡ ನಮ ನಮಡ ಇಪ್ಪುನ ಕೌಶಲ್ಯನ್ ಅಭಿವೃದ್ಧಿ ಮಲ್ಪೊಡು. ನೆಕ್ಕಾದ್ ಬಂಟೆರೆನ ಸಂಘಟನೆಲು ಅಗತ್ಯ ಇಪ್ಪುನ ಆರ್ಥಿಕ ವ್ಯವಸ್ಥೆನ್ ಮಲ್ಪೊಡು ಪಂದ್ ಪಂಡೆರ್.
ಅದಾನಿ ಗ್ರೂಫ್ ದ ಕಿಶೋರ್ ಆಳ್ವ ಪಾತೆರ್ದ್, ನಮ್ಮ ದೇಶಡ್ ಮಸ್ತ್ ಗುಣಮಟ್ಟದ ಶಿಕ್ಷಣ ಸಂಸ್ಥೆಲು ಉಂಡು. ಇಂಚಾದ್ ಉದ್ಯೋಗ ನಾಡಿಯೆರೆ ಕಷ್ಟ ಅಪುಜಿ. ನಮ್ಮ ಜಿಲ್ಲೆಡೇ ಉದ್ಯೋಗ ಸೃಷ್ಟಿ ಮಲ್ಪುನ ಕೆಲಸ ಆವೊಡು. ಜವನೆರ್ ರಾಜಕೀಯಗ್ ಬರೊಡು. ಆಪಗ ಶಿಕ್ಷಣ ಬೊಕ್ಕ ಉದ್ಯೋಗದ ವ್ಯವಸ್ಥೆ ಬದಲಾಪುಂಡು ಪಂದ್ ಪಂಡೆರ್.
ಪ್ರದೀಪ್ ರೈ ಪಾತೆರ್ದ್, ಮಸ್ತ್ ಸ್ಥಿತಿವಂತರಾಯಿನ ಬಂಟೆರ್ ಬಡ ಬಂಟ ಕುಟುಂಬದ ಜೋಕುಲೆನ್ ಶೈಕ್ಷಣಿಕ ಉದ್ದೇಶಕ್ಕಾದ್ ದತ್ತು ಪಡೆವೊಡು. ನೆರ್ದ್ ನನದ ದಿನಟ್ಟ್ ಬಡತನ, ನಿರುದ್ಯೋಗದ ಸಮಸ್ಯೆ ನಿರ್ಮೂಲನೆ ಆಪುಂಡು ಪಂದ್ ಪಂಡೆರ್.
ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ಪಾತೆರ್ದ್, ಸುರುಕು ನಮ ಜೋಕುಲೆಗ್ ಎಡ್ಡೆ ಗುಣಮಟ್ಟದ ಶಿಕ್ಷಣ ಕೊರೊಡು. ಜೋಕುಲು ಉದ್ಯೋಗಗಾದ್ ಬೇತೆ ದೇಶಗ್ ಪೋಪುನೆನ್ ತಪ್ಪಾಯೆರೆ ನಮ್ಮ ಸಮಾಜದ ಉದ್ಯಮಿಲು ಮನಸ್ ಮಲ್ಪೊಡು ಪಂದ್ ಪಂಡೆರ್.
ತೋನ್ಸೆ ಆನಂದ ಶೆಟ್ಟಿ ಪಾತೆರ್ದ್, ಶಿಕ್ಷಣ ಬೊಕ್ಕ ಉದ್ಯೋಗ ಒಂಜೇ ಪಾವೊಲಿದ ರಡ್ಡ್ ಮೋನೆ ಇತ್ತಿಲೆಕ್ಕ. ಶಿಕ್ಷಣ ಪಡೆಂಡ ಮಾತ್ರ ಉದ್ಯೋಗ ತಿಕ್ಕುಂಡು. ಅವ್ವೇ ರೀತಿ ಭಾಷೆಲ ಮುಖ್ಯ. ಬೇತೆ ಬೇತೆ ಕಡೆಟ್ಟ್ ಪೋನಗ ಅಲ್ಪದ ಭಾಷೆನ್ ಪಾತೆರೊಡಾಪುಂಡು. ಭಾಷೆ ಗೊತ್ತಿಜ್ಜಿಂಡ ಸಮಸ್ಯೆ ಆಪುಂಡು. ಇತ್ತೆ ಕೆಮಿಕಲ್ ಇಂಜಿನಿಯರ್ ಲೆನ ಅವಶ್ಯಕತೆ ಮಸ್ತ್ ಉಂಡು. ಆಂಡ ಅವೆನ್ ಕಲ್ಪುನಕ್ಲೆನ ಸಂಖ್ಯೆ ಮಸ್ತ್ ಕಮ್ಮಿ. ಇಂಚಾದ್ ಅವಕಾಶ ಇಪ್ಪುನ ಕ್ಷೇತ್ರಡ್ ಸಾಧನೆ ಮಲ್ಪೊಡು. ಜೋಕುಲೆಗ್ ಟಿವಿ, ಮೊಬೈಲ್ ಕೊರಿಯೆರೆ ಬಲ್ಲಿ. ಅವು ನಿಕ್ಲೆನ ಜೋಕುಲೆನ್ ಹಾಳ್ ಮಲ್ಪುಂಡು ಪಂದ್ ಪಂಡೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಬಿನ್ನೆರೆನ್ ಎದ್ಕೊನಿಯೆರ್. ಆರ್ಗಾನಿಕ್ ಗ್ರೂಪ್ ಆಫ್ ಇಂಡಸ್ಟ್ರೀಸ್ ಬೊಂಬೈದ ಸಿಎಂಡಿ ಆನಂದ ಎಂ.ಶೆಟ್ಟಿ ತೋನ್ಸೆ, ಆದಾನಿ ಗ್ರೂಪ್, ದಕ್ಷಿಣಭಾರತದ ಉಪಾಧ್ಯಕ್ಷೆರ್ ಕಿಶೋರ್ ಆಳ್ವ, ಆಸ್ಪೆನ್‌ ಎಸ್ ಇಝಡ್ ಸೀನಿಯರ್ ಜನರಲ್ ಮೆನೇಜರ್ ಅಶೋಕ್ ಕುಮಾರ್ ಶೆಟ್ಟಿ, ಇಸ್ಸಾರ್ ಫೈನಾನ್ಸಿಯಲ್ ಸರ್ವೀಸಸ್ ಲಿ. ಬೊಂಬೈದ ಸಿಎಂಡಿ ಡಾ.ಆರ್. ಕೆ. ಶೆಟ್ಟಿ, ಬೆಂಗ್ಲೂರುದ ಯುನಿವರ್ಸಲ್ ಗ್ರೂಫ್ ಆಫ್ ಇನ್ ಸ್ಟಿಟ್ಯೂಷನ್ ಉಪೇಂದ್ರ ಶೆಟ್ಟಿ, ಬೊಂಬೈ ವಿಶ್ವವಿದ್ಯಾನಿಲಯ ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ವಿಷಯ ಮಂಡನೆ ಮಲ್ತೆರ್. ಕದ್ರಿ ನವನೀತ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 31ನೇ ಸಂಚಿಕೆ ಅ.30 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಅ.31 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕಾರ್ಲ: ಸಾಹಿತಿ, ಲೇಖಕೆರ್, ಪತ್ರಕರ್ತೆರ್ ಶೇಖರ್ ಅಜೆಕಾರ್(54) ಮೇರ್ ಇನಿ (ಅ.31) ಕಾಂಡೆ ಹಾರ್ಟ್‌ ಆಟ್ಯಾಕ್‌ಡ್ ದೇವೆರೆ ಪಾದ ಸೇರಿಯೆರ್. ಶೇಖರ್ ಅಜೆಕಾರ್ 22 ಪುಸ್ತಕ ಬರೆತೆರ್. ಮಕ್ಕಳ ಸಾಹಿತ್ಯ ಸಮ್ಮೇಳನನ್ ಸಂಘಟಿಸಾದ್ ಸಾಹಿತ್ಯ ಕ್ಷೇತ್ರಗ್ ಕೊಡುಗೆನ್‌ ಕೊರ್ತೆರ್.
ಶೇಖರ್ ಕುಂದಪ್ರಭ ವಾರಪತ್ರಿಕೆಡ್ ಬರಹಗಾರೆರಾದ್ ತನ್ನ ವೃತ್ತಿ ಸುರು ಮಲ್ತೆರ್. ಮುಂಬೈದ ‘ಕರ್ನಾಟಕ ಮಲ್ಲ’, ಜನವಾಹಿನಿ, ದೈಜಿವರ್ಲ್ಡ್, ಕನ್ನಡಪ್ರಭ ಬೊಕ್ಕ ಉಷಾ ಕಿರಣಡ್‌ಲ ಸೇವೆ ಸಲ್ಲಿಸಾದೆರ್. 10 ವರ್ಷದ ಕಾಲ ಪತ್ರಕರ್ತರ ವೇದಿಕೆ ಬೆಂಗಳೂರ್‌ದ ಒಡಿಪು ಶಾಖೆದ ಉಪಾಧ್ಯಕ್ಷೆರ್ ಆದಿತ್ತೆರ್.
ಒಡಿಪು ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ರಾಷ್ಟ್ರೀಯ ಬಸವಶ್ರೀ ಅವಾರ್ಡ್ 2018, ಅಮಂತ್ರಣ ಪ್ರಶಸ್ತಿ 2019, ಕೃಷಿ ಬಂಧು 2019, ರಾಷ್ಟ್ರೀಯ ಸಂಗೊಳ್ಳಿ ರಾಯಣ್ಣ ಪ್ರಶಸ್ತಿ, ಒಡಿಪು ಜಿಲ್ಲಾ ಕನ್ನಡ ಸಾಹಿತ್ಯ ಪ್ರಶಸ್ತಿ 2019, ವಿಶ್ವ ದರ್ಶನ ಸಾಹಿತ್ಯ ಪ್ರಶಸ್ತಿ 2019, ಶಿಖಾ ಭಾರತ ಪ್ರಶಸ್ತಿ ಮೇರೆಗ್‌ ತಿಕ್ ದ್ಂಡ್.
ಬೊಂಬೈ: ಮಹಾರಾಷ್ಟ್ರ ಸರ್ಕಾರದ ಪ್ರವಾಸೋದ್ಯಮ ಬೊಕ್ಕ ಸಾಂಸ್ಕೃತಿಕ ವ್ಯವಹಾರ ಇಲಾಖೆದ ರಂಗಭೂಮಿ ಪ್ರಯೋಗಲೆನ ತಪಾಸಣಾ (ಸೆನ್ಸಾರ್) ಮಂಡಳಿ ಸದಸ್ಯೆರಾದ್ ಪತ್ರಕರ್ತೆ ರೋನ್ಸ್ ಬಂಟ್ವಾಳ್ ಮೇರ್ ನೇಮಕ ಆತೆರ್.
ಸರ್ಕಾರದ ಸಾಂಸ್ಕೃತಿಕ ವ್ಯವಹಾರದ ಇಲಾಖೆ ನಾಟಕ, ಏಕಾಂಕ ನಾಟಕ ಬೊಕ್ಕ ಬೇತೆ ಬೇತೆ ಮನರಂಜನೆದ ಸಂಹಿತೆನ್ ತೂಯೆರೆ ಭಾಷಾ ತಜ್ಞೆರೆನ ನೇಮಕ ನಡಪಾದ್ ಮಂಡಳಿ ತನ್ನ ಆದೇಶ ಕೊರ್ತುಂಡು. ಸರ್ಕಾರದ ನಿರ್ಧಾರದಂಚೆನೆ ರಾಜ್ಯದ ಮರಾಠಿ ಬೊಕ್ಕ ಹಿಂದಿ ಬುಡ್ದ್ ಬೇತೆ ಭಾಷೆಡ್ ಸ್ವೀಕಾರ ಮಲ್ಪುನ ಮನರಂಜನಾ ಪ್ರಯೋಗದ ಸಂಹಿತೆನ್ ಪರಿಶೀಲನೆ ಮಲ್ಪರೆ ಬೇತೆ ಭಾಷೆಗ್ ಭಾಷಾ ತಜ್ಞೆರೆನ ನಿರೀಕ್ಷಕೆರೆನ್ ನೇಮಕ ಮಲ್ತ್ ದ್ ಸರಕಾರ ಆದೇಶ ಕೊರ್ತುಂಡು. ಕನ್ನಡ, ತುಳು ಬೊಕ್ಕ ರೋಮನ್ ಲಿಪಿ ಇಪ್ಪುನ (ಗೋವಾ) ಕೊಂಕಣಿ ಭಾಷೆಗ್ ರೋನ್ಸ್ ಬಂಟ್ವಾಳ್ ಮೆರೆನ್ ನೇಮಕ ಮಲ್ದ್ಂಡ್. ಕರಿನ ಸುಮಾರ್ ವರ್ಷೊದಿಂಚ ಕನ್ನಡ ಬೊಕ್ಕ ತುಳು ಭಾಷಾ ಪರಾಮರ್ಶಕೆರಾದಿತ್ತಿನ ರಂಗ ಎಸ್.ಪೂಜಾರಿ ಮೆರೆನ್ ಕುಡೊರ ನೇಮಕ ಮಲ್ದ್ಂಡ್.
ಬೆಂಗಾಲಿ, ಇಂಗ್ಲಿಷ್, ಪಂಜಾಬಿ, ಗುಜರಾತಿ, ತೆಲುಗು, ತಮಿಳು, ಮಾಲ್ವಾನಿ, ರಾಜಸ್ಥಾನಿ, ಸಿಂದಿ ಗೋವಾ, ಮಲಯಾಳಂ ಭಾಷೆಗ್ ಭಾಷಾತಜ್ಞೆರೆನ್ ನೇಮಕ ಮಲ್ತ್ ದ್ ಆದೇಶ ಕೊರ್ತುಂಡು. ಬೋರ್ಡ್ ಆಫ್ ಇನ್‌ಸ್ಪೆಕ್ಷನ್ ಆಫ್ ಥಿಯೇಟರ್ ದ ಕಾರ್ಯದರ್ಶಿ ಎಸ್.ಪಿ ಖಮರ್ ಅಧಿಕೃತ ಸುತ್ತೋಲೆಡ್ ತೆರಿಪಾದೆರ್.
ಬಂಟ್ವಾಳ: ಕಂಡನಿನ ಇಲ್ಲಲ್ ವರದಕ್ಷಿಣೆ ಕಿರುಕುಳ ತಡೆಯೆರೆ ಆವಂದೆ ಮಾನಸಿಕವಾದ್‌ ಬೇನೆ ತಿನ್ನ ಪೊಸ ಮದಿಮಲ್‌ ಒರ್ತಿ ಅಪ್ಪೆನ ಇಲ್ಲಲ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತಿನ ಘಟನೆ ವರದಿ ಆತ್‌ಂಡ್. ಸಜೀಪ ಮೂಡ ಗ್ರಾಮದ ಸುಭಾಷ್ ನಗರದ ನಿವಾಸಿ ನೌಸೀನ್ (22) ಆತ್ಮಹತ್ಯೆ ಮಲ್ತಿನ ಪೊಣ್ಣು. ನೌಸೀನ್ ಉಳ್ಳಾಲದ ಆಜ್ಮಾನ್ ಒಟ್ಟಿಗೆ ಮೂಜಿ ತಿಂಗೊಲುದ ಪಿರ ಮದಿಮೆ ಆದಿತ್ತೆರ್.
ಪ್ರೇಮವಿವಾಹ ಆಂಡಲ ಮದಿಮೆದ ಪೊರ್ತುಡು 18 ಪವನ್ ಬಂಗಾರ್‌ನ್ ಉಡುಗೊರೆಯಾದ್‌ ಕೊರ್ದು ಇತ್ತೆರ್. ಆಂಡ ಪೊಣ್ಣನ ಕಡೆತಕುಲ್‌ ಕೊರ್ನ ವರದಕ್ಷಿಣೆ ಕಡಿಮೆ ಆತ್‌ಂಡ್, ಮೋಕೆ ಮಲ್ತ್ ಮದುವೆ ಆಯಿನೆಕ್ಕ್‌ ಎಡ್ಡೆ ಪೊಣ್ಣು ತಿಕ್ಕಿಜಲ್, ಇಜ್ಜಿಂಡ ಎಡ್ಡೆ ಪೊಣ್ಣು ತಿಕ್ಕ್‌ದುವಲ್‌ ಪಂದ್ ಮಾಮಿ ಝೂಬೈದಾ, ಮಗಲ್ ಅಜ್ಮೀಯಾ ಬೊಕ್ಕ ಕಂಡನಿ ಸೇರೊಂದು ಮಾನಸಿಕ ಕಿರುಕುಳ ಕೊರೊಂದು ಇತ್ತೆರ್. ಮಾನಸಿಕವಾದ್‌ ಬೇನೆ ತಿನ್ನ ಮೆಗ್ದಿ ನೌಸೀನ ಅ.25 ದಾನಿ ಇಲ್ಲಲ್ ಏರ್ಲ ಇಜ್ಜಂದಿನ ಪೊರ್ತುಗು ಕೋಣೆದ ಉಲಾಯಿ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತೊಂದಲ್‌ ಪಂದ್ ಅಣ್ಣೆ ನಾಸೀರ್‌ ಆರೋಪ ಮಲ್ತ್‌ದೆರ್.
ಕುಡ್ಲ: ಉಳ್ಳಾಲದ ಸಂಕೊದ ಮಿತ್ತ್ ರ್ದ್ ಒರಿ ಕಾರ್ ಉಂತಾದ್ ನೇತ್ರಾವತಿ ಸುದೆಕ್ ಲಾಗಿದಿನ ಘಟನೆ ತೊಕ್ಕೊಟ್ಟುದಲ್ಪ ನಡತ್‌ದ್ಂಡ್.
ಚಿಕ್ಕಮಗಳೂರು ಜಿಲ್ಲೆದ ಪ್ರಶಾಂತ್ (35) ಸುದೆಕ್ ಲಾಗಿದಿನಾರ್. ಮೇರ್ ತನ್ನ ಸಹಾಯಕನೊಟ್ಟುಗು ಕುಡ್ಲದ ಖಾಸಗಿ ಆಸ್ಪತ್ರೆಗ್ ಬತ್ತ್ ದ್ ಅವುಲು ಇತ್ತಿನ ಸಂಬಂಧದ ಪೇಶಂಟ್ ನ್ ತೂದು ಪೋತೆರ್ ಪಂದ್ ತೆರಿದ್‌ ಬೈದ್ಂಡ್. ಮೇರ್ ಕುಡ್ಲ ದ ಮಾರ್ಕೆಟ್ ಗ್ ಸೊಪ್ಪು ಸಪ್ಲೈ ಮಲ್ತೊಂದಿತ್ತೆರ್ ಪಂದ್ ಗೊತ್ತಾತ್ಂಡ್. ಸಹಾಯಕನ್ ಆಸ್ಪತ್ರೆಡ್ ಬುಡ್ದ್ ಕಾರ್‌ಡ್ ಪಿದಡಿನ ಪ್ರಶಾಂತ್, ತೊಕ್ಕೊಟ್ಟು ಮುಟ್ಟದ ನೇತ್ರಾವತಿ ಸಂಕೊದ ಮಿತ್ತ್ ಕಾರ್ ಉಂತಾದ್ ಸುದೆಕ್ ಲಾಗಿದೆರ್. ಸುದೆಕ್ ಲಾಗಿದಿನ ಪ್ರಶಾಂತ್‌ನ್ ನಾಡೊಂದಿತ್ತ್‌ದ್, ಕಂಕನಾಡಿ ಸ್ಟೇಶನ್ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್. ಸುದೆಕ್ ಲಾಗಿಯೆರ ದಾದ ನೆವನ ಪಂದ್ ನನ ತೆರಿಯೊಡಾತೆ.
ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಸಮಗ್ರ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಲೇಸ್ ಮಾತೆರ್ನಲ ಸಹಕಾರರ್ದ್ ಯಶಸ್ವಿಯಾತ್ಂಡ್. ಉಂದುವೇ ಪೊರ್ತುಡು ನ.2 ಕ್ಕ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಮೂಜಿ ವರ್ಷದ ಕಾರ್ಯ ಅವಧಿ ಮುಗಿದ್ ಆಡಳಿತಾಧಿಕಾರಿ ನೇಮಕ ಆವರೆ ಉಂಡು.
ಈ ನಿಲೆಟ್ಟ್ ಅ.29 ಐತಾರ ಬಯ್ಯಗ್ 4 ಗಂಟೆಗ್ ದೇವಲ್ಯದ ಸಭಾಂಗಣಡ್ ಜೀರ್ಣೋದ್ಧಾರ, ಬ್ರಹ್ಮಕಲಶ ಉಚ್ಚಯದ ಸಂಪೂರ್ಣ ಲೆಕ್ಕಪತ್ರ, ನನದ ಕಾರ್ಯ ಯೋಜನೆದ ಬಗೆಟ್ಟ್ ಊರುದ ಪರವೂರುದ ಭಕ್ತೆರೆನ ಬೊಕ್ಕ ಗ್ರಾಮಸ್ಥೆರೆನ ಇಸೇಸ ಸಭೆ ನಡತ್ಂಡ್.
ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ, ಜೀರ್ಣೋದ್ಧಾರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಹರಿದಾಸ್ ಭಟ್ ಮೇರ್ ಗುರ್ಕಾರ್ಮೆಡ್ ಭಕ್ತೆರೆಗ್ ಜೀರ್ಣೋದ್ಧಾರ, ಬ್ರಹ್ಮಕಲಶ ಉಚ್ಚಯದ ಬೊಕ್ಕ ಮೂಜಿ ವರ್ಷೊದ ವ್ಯವಸ್ಥಾಪನಾ ಸಮಿತಿದ ಖರ್ಚಿ ವೆಚ್ಚದ ಮಾಹಿತಿ ಕೊರಿಯೆರ್.
ಬೊಕ್ಕ ಮೇರ್ ಪಾತೆರ್ದ್, ದಾನಿಲು ಕೊರ್ನ ಕೊಡುಗೆ ಬೊಕ್ಕ ಕಾಸ್ ದ ರೂಪಡ್ ಕೊರ್ನ ದೇಣಿಗೆದ ಪಟ್ಟಿನ್ ವಿವರವಾದ್ ಕೊರಿಯೆರ್. ಬೊಕ್ಕ ಕರ ಸೇವಕೆರೆನ ಸೇವೆನ್ ಮೆಚ್ಚಿಯೆರ್. ನನದ ಕಾರ್ಯ ಯೋಜನೆದ ಬಗೆಟ್ಟ್ ಸವಿಸ್ತಾರವಾದ್ ತೆರಿಪಾಯೆರ್. ಗೋಪುರದ ಕೆಲಸ, ಉಲಯಿ ಬೊಕ್ಕ ಪಿದಯಿದ ದೊಂಪದ ಕೆಲಸ ಕಾರ್ಯ ನನದ ದಿನಟ್ಟ್ ಮಲ್ಪರೆ ಉಂಡು ಪಂದ್ ಪಂಡೆರ್. ವ್ಯವಸ್ಥಾಪನಾ ಸಮಿತಿದ ಮೂಜಿ ವರ್ಷದ ಅವಧಿ ನ.2 ಕ್ಕ್ ಅಕೇರಿ ಆಪುಂಡು. ಬೊಕ್ಕ ಆಡಳಿತಾಧಿಕಾರಿ ನೇಮಕ ಆಯೆರೆ ಉಂಡು. ಮೂಜಿ ವರ್ಷದ ಅವಧಿಡ್ ಸಹಕಾರ ಕೊರಿನ ಮತ ಭಕ್ತೆರೆಗ್ ಅಭಿನಂದನೆ ಸಂದಾಯೆರ್.
ಜೀರ್ಣೋದ್ಧಾರ ಸಮಿತಿದ ಒತ್ತು ಗುರ್ಕಾರೆ ಮೋಹನ್ ದಾಸ್ ಪಾತೆರ್ದ್, ತೋಕೂರು ದೇವಲ್ಯದ ಜೀರ್ಣೋದ್ಧಾರರ್ದ್ ಮಸ್ತ್ ಕಾಲದ ಭಕ್ತೆರೆನ ಕನ ನನಸಾತ್ಂಡ್ ಪಂದ್ ಪಂಡೆರ್. ಬೊಕ್ಕ ಸಹಕಾರ ಕೊರಿನ ಮಾತೆರೆಗ್ಲಾ ಅಭಿನಂದನೆ ಸಂದಾಯೆರ್.
ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್, ತೋಕೂರುಗುತ್ತು ಹೊಸಮನೆತ್ತ ಹರಿಪ್ರಸಾದ್ ಜಿ. ಶೆಟ್ಟಿ ಬೆಂಗ್ಲೂರು ಮೇರ್ ಪಾತೆರ್ದ್, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಆಯಿನ ಹರಿದಾಸ್ ಭಟ್ ಮೆರೆನ ಮುತಾಲಿಕೆಡ್, ದೇವಲ್ಯದ ಸಮಗ್ರ ಜೀರ್ಣೋದ್ಧಾರದ ಕೆಲಸ ಕಾರ್ಯಡ್ ಮತ ಸಮಿತಿನ್ ಒಟ್ಟು ಸೇರ್ಸಾದ್, ತಾನ್ ಲ ಇತ್ತ್ ದ್ ದೇವೆರೆನ ಸೇವೆನ್ ಶ್ರದ್ಧೆ ಭಕ್ತಿ ಪೂರ್ವಕವಾದ್ ಮಲ್ತೆರ್ ಪಂದ್ ಅಭಿನಂದನೆ ಮಲ್ತೆರ್ ಬೊಕ್ಕ ಕರಸೇವಕೆರೆನ ಕೆಲಸ ಕಾರ್ಯಲೆನ ಬಗೆಟ್ಟ್ ಮೆಚ್ವಿಯೆರ್.
ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಸುಗಂಧಿ ಡಿ.ಕೊಂಡಾಣ, ಪುರುಷೋತ್ತಮ ಕೋಟ್ಯಾನ್ ಅಕ್ಲೆನ ಅಭಿಪ್ರಾಯನ್ ತೆರಿಪಾಯೆರ್.
ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಮಧುಸೂದನ್ ಆಚಾರ್, ಪುರುಷೋತ್ತಮ ರಾವ್, ವಿಪುಲ ಡಿ. ಶೆಟ್ಟಿಗಾರ್, ಪಡುಪಣಂಬೂರು ಗ್ರಾಮ ಪಂಚಾಯತ್ ದ ಒತ್ತು ಗುರ್ಕಾರೆ ಹೇಮನಾಥ ಅಮೀನ್, ಸದಸ್ಯೆರ್ ಸಂತೋಷ್ ಕುಮಾರ್ ತೋಕೂರು, ಯುವಕ ಸಂಘದ ಗುರ್ಕಾರೆ ಶೇಖರ್ ಶೆಟ್ಟಿಗಾರ್, ಮಹಿಳಾ ಮಂಡಲದ ಗುರ್ಕಾರ್ದಿ ಅನುಪಮಾ ಭಟ್, ಶ್ರೀ ಸುಬ್ರಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಪ್ರಧಾನ ಕಾರ್ಯದರ್ಶಿ ದೀಪಕ್ ಸುವರ್ಣ, ಬೇತೆ ಬೇತೆ ಸಂಘ ಸಂಸ್ಥೆಲೆನ ಪದುಕೆರ್, ಸದಸ್ಯೆರ್, ಬೊಕ್ಕ ಗ್ರಾಮಸ್ಥೆರಾಯಿನ ಸುಂದರ್ ಸಾಲಿಯನ್, ದಿನಕರ್ ಸಾಲಿಯಾನ್, ಕೃಷ್ಣ ಹೆಬ್ಬಾರ್, ನರೇಂದ್ರ ಕಿರೋಡಿಯನ್, ರಾಜೇಶ್ ದಾಸ್, ವಿನೋದ್ ಕುಮಾರ್, ಸತೀಶ್ ಭಟ್, ಪರಮೇಶ್ವರ್ ಶೆಟ್ಟಿಗಾರ್, ದಾಮೋದರ ಶೆಟ್ಟಿ, ಯಶೋಧ ಪಿ. ರಾವ್, ವಿನೋದ ಭಟ್, ದೇವಲ್ಯದ ಸಿಬ್ಬಂದಿ ವರ್ಗ, ಊರುದ ಪರವೂರುದ ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.
ವಿದ್ಯಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಮಲ್ಪುನ ಉದ್ದೇಶ ದುಂಬುದ ಪೀಳಿಗೆದ ಪ್ರತಿಭಾವಂತ ವಿದ್ಯಾರ್ಥಿಲೆಗ್ ವಿಶೇಷವಾದ್ ಜವಾಬ್ದಾರಿನ್ ವಹಿಸುನ. ಜೋಕ್ಲೆನ ಸಾಧನೆಗ್ ಪ್ರೋತ್ಸಾಹ ಕೊರೊಂದು ದುಂಬಗ್ ಅಕುಲ್ ಸಾಮಾಜಿಕವಾದ್ ಬೇತೆಕ್ಲೆಗ್ ನೆರವಾಪುನ ಜವಬ್ದಾರಿನ್ ಕೊರೊಂದು ಉಲ್ಲ. ಬರೀ ವಿದ್ಯೆ ಇತ್ತ್ಂಡ ಯಾವುಜಿ ಎಡ್ಡೆ ನಡಕೆ, ಸಂಸ್ಕಾರ, ವಿವೇಕಲ ಇಪ್ಪೊಡು. ವಿದ್ಯಾರ್ಥಿಲು ತನ್ನ ನೆಚ್ಚಿನ ಪಠ್ಯೇತರ ಕ್ಷೇತ್ರಡ್ ಬೇತೆಕ್ಲೆಗ್ ಮಾದರಿ ಆಪುನಂಚ ಸಾಧಕೆರ್ ಆವೊಡು ಬೊಕ್ಕ ಸೇವಾ ಮನೋಭಾವ, ಕಷ್ಟಡ್ ಇಪ್ಪುನಕ್ಲೆಗ್ ಸಹಾಯ ಹಸ್ತ ಚಾಚುನ ಮನೋಭಾವನ್ ಬುಲೆಪಾವೊಡು ಪಂದ್ ಶ್ರೀ ಶಾರದಾ ಸೊಸೈಟಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಪಂಡೆರ್.
ಮೇರ್ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ ಪೈರ್ ವತಿರ್ದ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರ್ದ ವಿದ್ಯಾರ್ಥಿಲೆಗ್ ಆಯೋಜನೆ ಮಲ್ತಿನ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮಡ್ ಅಧ್ಯಕ್ಷತೆ ವಹಿಸ್ ದ್ ಪಾತೆರಿಯೆರ್. ಮುಖ್ಯ ಅತಿಥಿಯಾದ್ ಲ. ವೆಂಕಟೇಶ್ ಹೆಬ್ಬಾರ್ ಪಾಲ್ ಪಡೆದ್, ಪೋಷಕೆರ್ ಜೋಕ್ಲೆಗ್ ಸರ್ವಸ್ವನ್ ಧಾರೆ ಆದ್ ಕೊರ್ಪೆರ್. ಅವೆಕ್ಕ್ ತಕ್ಕಂತೆ ಜೋಕುಲು ಪೋಷಕರೆಗ್ ಬೊಕ್ಕ ಊರುಗು ಕೀರ್ತಿ ಕನಪುನಂಚ ಸಾಧನೆನ್ ಮಲ್ಪೊಡು. ಶಿಕ್ಷಣದೊಟ್ಟಿಗೆ ಬೇತೆ ಚಟುವಟಿಕೆಗ್ ಒತ್ತು ಕೊರ್ಪುನ ಬೇಲೆನ್ ವಿದ್ಯಾರ್ಥಿಲು ಮಲ್ಪೊಡು ಪಂದ್ ಶುಭ ಹಾರೈಸಾಯೆರ್.
ಈ ಕಾರ್ಯಕ್ರಮಡ್ ಕರಾಟೆಡ್ ರಾಜ್ಯ ಬೊಕ್ಕ ಜಿಲ್ಲಾಮಟ್ಟಡ್ ಪ್ರಶಸ್ತಿ ಪಡೆನ ಸಂಸ್ಥೆದ ವಿದ್ಯಾರ್ಥಿಲಾಯಿನ ತನುಶ್ರೀ ಕೋಟ್ಯಾನ್, ಇಶಿತ್ ಶೆಟ್ಟಿಗಾರ್, ಪ್ರತೀಕ್ ಭಟ್, ಅನ್ವಿತಾ, ಖುಷಿ ಬೊಕ್ಕ ಅಮಿತ್ ಮೊಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್. ಅಂಚನೆ ಸಂಸ್ಥೆದ ಕರಾಟೆ ತರಬೇತಿದಾರೆರ್ ನಾಗರಾಜ್ ಕುಲಾಲ್ ಮೆರೆಗ್ಲ ಮಾನಾದಿಗೆ ಮಲ್ತೆರ್. ಲೇಸ್ ಡ್ ಶ್ರೀ ಶಾರದಾ ಸೊಸೈಟಿದ ಕೋಶಾಧಿಕಾರಿಲಾಯಿನ ಕೊ. ಭುವನಾಭಿರಾಮ ಉಡುಪ, ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಇತ್ತೆರ್. ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಪೈರ್ ನೆತ್ತ ಅಧ್ಯಕ್ಷೆರ್ ಲ. ಸುಧೀರ್ ಬಾಳಿಗ ಪ್ರಾಸ್ತಾವಿಕವಾದ್ ಪಾತೆರ್ದ್ ಎದ್ಕೊಂಡೆರ್. ಶಾಲಾ ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಸೊಲ್ಮೆ ಸಂದಾಯ ಮಲ್ತೆರ್. ಸಹ ಶಿಕ್ಷಕಿ ಹೇಮಲತಾ ಕಾರ್ಯಕ್ರಮ ಸುದಾರಿಕೆ ಮಲ್ತೆರ್.
ಈ ವರ್ಷಡ್ ಅಕೇರಿದ ರಡ್ಡ್ ತಿಂಗೊಲ್ ಮಾತ್ರ ಬಾಕಿ ಒರಿತ್ಂಡ್. ಆಂಡ ಬ್ಯಾಂಕಿಂಗ್ ವಲಯಡ್ ಕೆಲಸ ಮಲ್ಪುನ ರಾಜ್ಯದ ಉದ್ಯೋಗಿಲೆಗ್ ನವೆಂಬರ್ ಡ್ ಒಟ್ಟು 9 ರಜೆ ಉಂಡು.
ನವೆಂಬರ್ 1 ಕ್ಕ್ ಕನ್ನಡ ರಾಜ್ಯೋತ್ಸವ, ನ.5, 12, 19, 26 ಕ್ಕ್ ನಿಯಮದಂಚೆನೆ ಐತಾರ ರಜೆ ಉಂಡು. ನ.11, 25 ರಡ್ಡನೇ ಸನಿಯಾರದ ರಜೆ ಉಂಡು. ನೆತ್ತೊಟ್ಟಿಗೆ ನ.14 ಕ್ಕ್ ಬಲಿಪಾಡ್ಯಮಿ, ನ.30 ಕನಕದಾಸ ಜಯಂತಿದ ಲೆಕ್ಕೊಡು ರಾಜ್ಯಡ್ ಬ್ಯಾಂಕ್ ಲು ಮುಚ್ಚಿದ್ ಇಪ್ಪುಂಡು.
