ಕಿಡ್ನಿ ಸೀಕ್ ಎಂಚ ಬರ್ಪುಂಡು, ಆಯಿಕ್ಕ್ ಮುಖ್ಯ ಕಾರಣ ದಾದ ಪನ್ಪುನ ಪೊಲಬು ಇಂಚ ಉಂಡು.
ಶೌಚಾಲಯಗ್ ಪೋಯೆರೆ ಉದಾಸೀನ ಮಲ್ಪರೆ ಬಲ್ಲಿ. ಬೊಕ್ಕ ಪಡಿಕೆನ್ ಎಚ್ಚ ಪೊರ್ತು ಕಟ್ಟ್ ದ್ ದೀಂಡ, ನೆರ್ದ್ ನಿಕ್ಲೆನ ಬ್ಲಾಡರ್ ಗ್ ತೊಂದರೆ ಆಪುಂಡು.
ಪ್ರತಿದಿನ 5.8 ಗ್ರಾಂ ರ್ದ್ ಎಚ್ಚ ಉಪ್ಪು ತಿನಿಯೆರೆ ಬಲ್ಲಿ. ಎಚ್ಚ ಮಾಸ ತಿನ್ಪುನೆರ್ದ್ ಲ ಮೂತ್ರಪಿಂಡಗ್ ತೊಂದರೆ ಆಪುಂಡು.
ಎಚ್ಚ ಕೆಫೀನ್ ಪರ್ಂಡ, ನೆರ್ದ್ ನೆತ್ತೆರ್ ದ ಒತ್ತಡ ಎಚ್ಚಾಪುಂಡು. ಅತ್ತಂದೆ ನಮ್ಮ ಮೂತ್ರಪಿಂಡಲು ಆಯಿತ್ತ ಕಾರ್ಯನ್ ಸರಿಯಾದ್ ನಿರ್ವಹಿಸಾಯೆರೆ ಎಚ್ಚ ನೀರ್ ನ್ ಪರೊಡು.
ಜಯ ಸಿ ಸುವರ್ಣ ಮೆರೆನ ಜೀವನಚರಿತ್ರೆದ ಬೂಕು ಸುವರ್ಣ ಯುಗದ ಲೇಸ್ ನ.19 ಕ್ಕ್ ಪುಣೆದ ಚಾಂದನಿ ಚೌಕ್ ದ ಹೋಟೆಲ್ ಗಾರ್ಡನ್ ಕೋರ್ಟ್ ಡ್ ನಡಪರೆ ಉಂಡು.
ಈ ಬೂಕುನ್ ಲೇಖಕೆರ್ ಅನಿತಾ ಪಿ ಪೂಜಾರಿ ತಾಕೊಡೆ ಬರೆತೆರ್. ಅಂಚೆನೆ ಪುಣೆ ಜಯ ಸಿ ಸುವರ್ಣ ಅಭಿಮಾನಿಲು ಮೊಕ್ಲೆನ ಮುತಾಲಿಕೆಡ್ ಭಾರತ್ ಕೋ-ಆಪ್ ಬ್ಯಾಂಕ್ (ಬೊಂಬೈ) ಲಿಮಿಟೆಡ್‌ ಗ್ ಪೊಸತಾದ್ ಆಯ್ಕೆ ಆಯಿನ ಮಂಡಳಿದ ಸದಸ್ಯೆರೆಗ್ ಅಭಿನಂದನಾ ಲೇಸ್ ನಡಪರೆ ಉಂಡು.
ತುಡರ್ ಪರ್ಬದ ಪೊರ್ತುಡು ಬಂಗಾರ್ ದ ಕಿರಯ ಕಮ್ಮಿ ಆತ್ಂಡ್.
ಇನಿ ಬಂಗಾರ್ ದ ಕಿರಯ ಬೆಂಗ್ಲೂರ್ ಡ್ 22 ಕ್ಯಾರೆಟ್ ದ 10 ಗ್ರಾಂ ಬಂಗಾರ್ ದ ಕಿರಯ 400 ರೂ. ಆತ್ಂಡ್. ಇತ್ತೆ 55700 ರೂ. ಉಂಡು. 24 ಕ್ಯಾರೆಟ್ ದ 10 ಗ್ರಾಂ ಬಂಗಾರ್ ದ ಕಿರಯ 440 ರೂ. ಕಮ್ಮಿ ಆತ್ಂಡ್. ಇತ್ತೆ 60760 ರೂ. ಆತ್ಂಡ್. ರಾಜ್ಯದ ಒರಿನ ಪೇಂಟೆಡ್ ಎಚ್ಚ ಕಮ್ಮಿ ಉಂದುವೇ ರೀತಿ ಉಂಡು. ಬೊಳ್ಳಿದ ರೇಟ್ ಲ ಕಮ್ಮಿ ಆತ್ಂಡ್. 1ಕೆಜಿ ಬೊಳ್ಳಿ ಕಿರಯ 500 ರೂ.ಕಮ್ಮಿ ಆತ್ಂಡ್. ಇನಿ 72500 ಆತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ನ.9 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರ್. ನ.10 ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಂಡ್. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೆಳಗಾವಿದ ಸುವರ್ಣ ವಿಧಾನಸೌಧಡ್ ಡಿ.4 ರ್ದ್ 10 ದಿನ ಮುಟ್ಟ ವಿಧಾನ ಮಂಡಲದ ಚಳಿಗಾಲ ಅಧಿವೇಶನ ನಡಪರೆ ಉಂಡು ಪಂದ್ ವಿಪ ಸಭಾಪತಿ ಬಸವರಾಜ ಹೊರಟ್ಟಿ ತೆರಿಪಾದೆರ್.
ಬೆಳಗಾವಿಡ್ ಸ್ಪೀಕರ್ ಯು.ಟಿ ಖಾದರ್ ನೊಟ್ಟಿಗೆ ಜಂಟಿ ಸುದ್ದಿಗೋಷ್ಠಿಡ್ ಪಾತೆರ್ದ್, ಅನೌಪಚಾರಿಕವಾದ್ ಡಿ.4 ರ್ದ್ ಈ ಅಧಿವೇಶನ ನಡಪರೆ ಉಂಡು. ಆಂಡ ಸರ್ಕಾರ ಅಧಿಕೃತ ತಾರೀಕ್ ತೆರಿಪಾದಿಜಿ ಪಂದ್ ಪಂಡೆರ್. 10 ದಿನ ನಡಪುನ ಈ ಅಧಿವೇಶನಗ್ ತಯಾರಿ ನಡತೊಂದು ಉಂಡು. ಈ ಸರ್ತಿ ಉತ್ತರ ಕರ್ನಾಟಕದ ಬಗೆಟ್ಟ್ ಇಸೇಸ ಚರ್ಚೆ ನಡಪರೆ ಉಂಡು ಪಂದ್ ಪಂಡೆರ್.
ಚೀಪೆ ಪಡಿಕೆ (ಡಯಾಬಿಟೀಸ್ ದ) ಬೊಕ್ಕ ಮಲಬದ್ಧತೆ ನಿವಾರಣೆ ಮಲ್ಪರೆ ಮೂಲಂಗಿ ಒಂಜಿ ಮಾಯಿಕ್ ಮರ್ದ್ ಆದುಂಡು.
ನೆತ್ತ ಬೇರ್ ಡ್ ಕರಗುನ ಬೊಕ್ಕ ಕರಗಂದಿನ ಫೈಬರ್ ಇಪ್ಪುಂಡು. ಈ ಫೈಬರ್ ಕರ್ಲ್ ನ್ ಶುದ್ದ ಮಲ್ಪರೆ ಸಕಾಯ ಮಲ್ಪೊಂಡು. ಮಲಬದ್ಧತೆ ಸಮಸ್ಯೆ ಇಪ್ಪುನಕುಲು ಮೂಲಂಗಿನ್ ತಿನೊಲಿ.
ಮೂಲಂಗಿಡ್ ಇಪ್ಪುನ ಅಡಿಪೋನೆಕ್ಟಿನ್ ನೆತ್ತರ್ ದ ಸಕ್ಕರೆ ಮಟ್ಟನ್ ನಿಯಂತ್ರಣ ಮಲ್ಪರೆ ಸಕಾಯ ಮಲ್ಪೊಂಡು. ಅಂಚಾದ್ ಸಕ್ಕರೆ ಸೀಕ್ ಡ್ ಮೂಲಂಗಿ ಉಪಯುಕ್ತ ಆತ್ಂಡ್. ಮೂಲಂಗಿ ಹೃದಯದ ಆರೋಗ್ಯಗ್ ಮಸ್ತ್ ಪ್ರಯೋಜನ ಆತ್ಂಡ್.
ಮಲಿರ್ ಜೈಲ್ ಡ್ ಇತ್ತಿನ 80 ಜನ ಭಾರತೀಯ ಮೀನುಗಾರೆರೆನ್ ಪಾಕಿಸ್ತಾನ ಸರ್ಕಾರ ಬುಡುಗಡೆ ಮಲ್ದ್ಂಡ್.
ಭಾರೀ ಭದ್ರತೆದ ನಡುಟ್ಟ್ ಭಾರತೀಯ ಮೀನುಗಾರೆರೆನ್ ಅಲ್ಲಾಮಾ ಇಕ್ಬಾಲ್ ಎಕ್ಸ್‌ಪ್ರೆಸ್‌ ರೈಲ್ ಡ್ ಕಡಪಾದೆರ್. ಬೊಕ್ಕ ಎಲ್ಲೆ ಲಾಹೋರ್ ಗ್ ಎತ್ತಾವೆರ್. ಅಲ್ಪರ್ದ್ ವಾಘಾ ಗಡಿಟ್ಟ್ ಭಾರತೀಯ ಅಧಿಕಾರಿಲೆಗ್ ಕೊರ್ಪೆರ್.
ಕಾನೂನು ಬದ್ದವಾದ್ ನಿಗದಿ ಮಲ್ತಿನ MSPದ ಮಿತ್ತ್ ಕೊರ್ನ ಭರವಸೆನ್ ಜಾರಿಗ್ ಕನವಂದಿನ ಬೊಕ್ಕ ಬೇತೆ ಬೇತೆ ಬೇಡಿಕೆಲೆನ್ ಈಡೇರಿಸಾವಂದಿನ ಬಗೆಟ್ಟ್ ಕೇಂದ್ರದ ಮಿತ್ತ್ ನ.26 ಕ್ಕ್ ರಾಷ್ಟ್ರ ಇಡೀ ಪ್ರತಿಭಟನೆ ನಡಪರೆ ಉಂಡು.
ಸಂಘಟಿತ ಕಾರ್ಮಿಕೆರೆಗ್ ತಿಂಗೊಲ್ದ ಸಂಬಳ 26000 ರೂ. ನಿಗದಿ ಮಲ್ಪೊಡು. ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆನ್ ಬದಲ್ ಮಲ್ಪುನೇ ಬೊಕ್ಕ ಬೇತೆ ಬೇತೆ ಬೇಡಿಕೆನ್ ಈಡೇರಿಸಾಯೆರೆ ಸುಮಾರ್ ರೈತೆರ್ ಬೊಕ್ಕ ಕಾರ್ಮಿಕ ಸಂಘಟನೆಲು ಆನಿ ದೇಶ ಇಡೀ ಪೊರ್ಂಬಾಟ ಮಲ್ತೊಂದುಂಡು.
ಇಂದ್ರಾಳಿ ರೈಲ್ವೆ ಸಂಕ ಕಾಮಗಾರಿದ ಭಾಗವಾದ್ ಧಾರವಾಡದ ಪದ್ಮಜಾ ಇಂಡಸ್ಟ್ರೀಸ್ ಡ್ ತಯಾರಾವೊಂದು ಇಪ್ಪುನ ಸ್ಟೀಲ್ ಬ್ರಿಡ್ಜ್ ನಿರ್ಮಾಣ ಘಟಕಗ್ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಮೆರೆನ ಸೂಚನೆದಂಚೆನೆ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಭೇಟಿ ಕೊರ್ದು, ಅಧಿಕಾರಿಲೆನೊಟ್ಟಿಗೆ ಸ್ಟೀಲ್ ಬ್ರಿಡ್ಜ್ ನಿರ್ಮಾಣದ ಬಗೆಟ್ಟ್ ಸಮಾಲೋಚನೆ ನಡಪಾದ್ ಬೇಗನೇ ಕೊರ್ಪುಲೆಕ್ಕ ಮಲ್ಪುವೆ ಪಂದ್ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್.
ಸುಮಾರ್ 5.20 ಕೋಟಿ ರೂಪಾಯಿಡ್ 54 ಮೀಟರ್ ಉದ್ದ ಬೊಕ್ಕ 12.5 ಮೀಟರ್ ಅಗಲದ 385 ಟನ್ ಸಾಮರ್ಥ್ಯದ ಸ್ಟೀಲ್ ಬ್ರಿಡ್ಜ್ ದ 60% ಕಾಮಗಾರಿ ಮುಗಿವುಂಡು. ಪದಿನೈನ್ ದಿನಟ್ಟ್ 80% ಮುಗಿನ ಬೊಕ್ಕ ರೈಲ್ವೇ ಇಲಾಖೆದ ತಾಂತ್ರಿಕ ವಿಭಾಗ ಪರಿಶೀಲನೆ ನಡಪಾದ್ ವರದಿ ಸಂದಾಯಿನ ಬೊಕ್ಕ ಡಿಸೆಂಬರ್ ಸುರುತ್ತ ವಾರಡ್ ಇಂದ್ರಾಳಿಡ್ ಸ್ಟೀಲ್ ಬ್ರಿಡ್ಜ್ ಅಳವಡಿಕೆ ಪ್ರಕ್ರಿಯೆ ನಡಪರೆ ಉಂಡು. ಆವೆರ್ದ್ ಬೊಕ್ಕ ಸ್ಟೀಲ್ ಬ್ರಿಡ್ಜ್ ಮಿತ್ತ್ 200 ಎಂ. ಎಂ. ಕಾಂಕ್ರಿಟೀಕರಣ ನಡಪರೆ ಉಂಡು.
ಡಿಸೆಂಬರ್ ಅಕೇರಿದ ವಾರಡ್ ಇಂದ್ರಾಳಿ ರೈಲ್ವೇ ಸಂಕ ಕಾಮಗಾರಿ ಮುಗಿವುಂಡು. ಜನವರಿಡ್ ಸಾರ್ವಜನಿಕೆರೆನ ಸೇವೆಗ್ ಲಭ್ಯ ಆಪುಂಡು ಪಂದ್ ಶಾಸಕೆರ್ ಯಶ್ ಪಾಲ್ ಸುವರ್ಣ ತೆರಿಪಾದೆರ್.
ಈ ಪೊರ್ತುಡು ಸುಗ್ಗಿ ಸುಧಾಕರ ಶೆಟ್ಟಿ, ಮಹೇಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಆರೋಗ್ಯಗ್ ಎಡ್ಡೆ ಪಂದ್ ಎಚ್ಚಾದ್ ಪಚ್ಚೆ ಸೊಪ್ಪು ತಿಂದ್ಂಡ ಅನಾರೋಗ್ಯ ಬರ್ಪುಂಡು ಪಂದ್ ಬೆಂಗ್ಲೂರ್ ದ ವಿಜ್ಞಾನಿಲು ಎಚ್ಚರಿಕೆ ಕೊರ್ತೆರ್.
ಇಂಚಿಪ್ಪ ಸುಮಾರ್ ರೀತಿದ ಪಚ್ಚೆ ಸೊಪ್ಪುನ್ ಪರೀಕ್ಷೆ ಮಲ್ಪುನಗ, ಸೊಪ್ಪುಡು ಲೋಹದ ಸಾಂದ್ರತೆ ಎಚ್ಚ ಇಪ್ಪುನವು ಗೊತ್ತಾತ್ತ್ಂಡ್. ಸಾಮಾನ್ಯವಾದ್ KG ಸೊಪ್ಪುಡು 425.5mg ಲೋಹ ಇಪ್ಪುಂಡು. ಆಂಡ ಇಂಚಿಪ್ಪದ ಸೊಪ್ಪುಡು 514.05mg ಲೋಹ ಪತ್ತೆ ಆತ್ಂಡ್. ಅಂಚಾದ್ ಸಾವಯವ ಕೃಷಿ ಪದ್ದತಿಡ್ ಬುಲೆಪಾಯಿನ ಸೊಪ್ಪುನ್ ತಿನಿಯೆರೆ ಸಲಹೆ ಕೊರ್ತೆರ್.
