ತುಳು ಸುದ್ದಿ

ಕದ್ರಿ ಯಕ್ಷ ಬಳಗದ ಗುರ್ಕಾರೆಯಾದ್ ಕದ್ರಿ ನವನೀತ್‌ ಶೆಟ್ಟಿ ಆಯ್ಕೆ

ಸುಮಾರ್ ವರ್ಷೊರ್ದಿಂಚ ಯಕ್ಷಗಾನದೊಟ್ಟಿಗೆ ತುಳು, ಕನ್ನಡ ಭಾಷೆ, ಸಂಸ್ಕೃತಿ, ಅಭಿವೃದ್ಧಿ ಬೊಕ್ಕ ಸಾಮಾಜಿಕ ಲೇಸ್ ದ ಉದ್ದೇಶದೊಟ್ಟಿಗೆ ಸ್ಥಾಪನೆ ಆಯಿನ ಕದ್ರಿ ಯಕ್ಷ ಬಳಗದ 2023-25ನೇ ಸಾಲ್ ದ ಗುರ್ಕಾರೆಯಾದ್ ಕದ್ರಿ ನವನೀತ್‌ ಶೆಟ್ಟಿ ಆಯ್ಕೆ ಆತೆರ್.

ಮಾನಾದಿಗೆದ ಗುರ್ಕಾರೆಯಾದ್ ಪ್ರದೀಪ್‌ ಕುಮಾರ್‌ ಕಲ್ಕೂರ, ಕಾರ್ಯಾಧ್ಯಕ್ಷೆರಾದ್ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಪ್ರಧಾನ ಕಾರ್ಯದರ್ಶಿಯಾದ್ ಪ್ರದೀಪ್‌ ಆಳ್ವ ಕದ್ರಿ, ಮಹಾಪೋಷಕೆರಾದ್ ಡಾ. ಅತ್ತೂರು ಸದಾನಂದ ಶೆಟ್ಟಿ, ಬಿಪಿ ಕರ್ಕೇರ ಕುಟುಂಬಸ್ಥೆರ್, ರವೀಂದ್ರನಾಥ್‌ ಶೆಟ್ಟಿ, ರತ್ನಾಕರ್‌ ಜೈನ್‌, ನಿತ್ಯಾನಂದ ಶೆಟ್ಟಿ, ಮಾಧವ ನಾಯಕ್‌ ಅಡ್ಯಾರ್‌, ಬೊಂಡಾಲ ಸಚ್ಛಿದಾನಂದ ಶೆಟ್ಟಿ, ಸುನಂದ ಎಸ್.‌ ರೈ, ಸಿ.ಎ. ಸುದೇಶ್‌ ರೈ, ಸುಂದರ್‌ ಶೆಟ್ಟಿ ಬೆಟ್ಟಂಪಾಡಿ, ರಾಜೇಶ್ವರಿ ಪಿ.ಹೆಗ್ಡೆ, ಎ. ಸೀತಾರಾಮ್‌ ಬೋಳಾರ್‌, ಶಿವಪ್ರಸಾದ್‌ ಪ್ರಭು ಸುರಭಿ, ಪ್ರವೀಣ್‌ ಆಳ್ವ ಅಂಜಾರು ಬೂಡು, ಒತ್ತು ಗುರ್ಕಾರ್ದಿಯಾದ್ ವಿಜಯಲಕ್ಷ್ಮೀ ಬಿ. ಶೆಟ್ಟಿ, ತಾರಾನಾಥ್‌ ಶೆಟ್ಟಿ ಬೋಳಾರ್‌, ಲೀಲಾಕ್ಷ ಬಿ. ಕರ್ಕೇರ, ಎಂ. ರಾಜಾರಾಮ್‌ ಶೆಟ್ಟಿ, ಪಿ. ಸಂಜಯ್‌ ಕುಮಾರ್‌ ರಾವ್‌, ಡಾ. ಮನು ರಾವ್‌, ಪ್ರಧಾನ ಸಂಚಾಲಕೆರಾದ್ ಗೋಕುಲ್‌ ಕದ್ರಿ, ಸುಧಾಕರ್‌ ರಾವ್‌ ಪೇಜಾವರ, ರವೀಂದ್ರ ಶೆಟ್ಟಿ, ಕಿಶೋರ್‌ ಡಿ. ಶೆಟ್ಟಿ, ಜಗದೀಶ್‌ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿಯಾದ್ ಎಲ್ಲೂರು ರಾಮಚಂದ್ರ ಭಟ್, ಮುಲ್ಕಿ ಕರುಣಾಕರ ಶೆಟ್ಟಿ, ಸುಧಾಕರ್‌ ಶೆಟ್ಟಿ, ಸಾಹಿಲ್‌ ರೈ, ಕಾರ್ಯದರ್ಶಿಯಾದ್ ಕೃಷ್ಣಶೆಟ್ಟಿ ತಾರೆಮಾರ್‌, ಬಾಲು ಕದ್ರಿ, ಮಹೇಶ್‌ ಪಾಟೀಲ್‌, ರತನ್‌ ಶೆಟ್ಟಿ, ಕೆ.ಎಸ್. ಭಟ್‌, ಕೋಶಾಧಿಕಾರಿಯಾದ್ ಹರೀಶ್‌ ಕುಮಾರ್‌, ಸಂಚಾಲಕೆರಾದ್ ಮೋಹನ್‌ ಕೊಪ್ಪಲ, ನಾಗೇಶ್‌ ದೇವಾಡಿಗ, ಆರತಿ ಆಳ್ವ, ಜಯಂತ್‌ ಶೇಣವ, ದೀಪಕ್‌ ಶೆಟ್ಟಿ, ಜಯಶೀಲ ಅಡ್ಯಂತಾಯ, ಚಂದ್ರಶೇಖರ್‌ ಆಳ್ವ, ಸತೀಶ್‌ ಆಳ್ವ, ಸಂತೋಷ್‌ ಆಳ್ವ, ಚಂದ್ರಹಾಸ್‌ ರೈ ಆಯ್ಕೆ ಆತೆರ್.

ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ ,
ಮೊ: 9880425265

ಕುಡ್ಲ ಕುಲ್ಕಿ ಹಬ್ ದ ಆಶಿಕ್ ಗ್ ಮಾಸ್ಟರ್ ಶೆಫ್ ಇಂಡಿಯಾ’ ಕಿರೀಟ

ಕುಡ್ಲ: ಬೊಂಬೈಡ್ ನಡತಿನ ಮಾಸ್ಟರ್ ಶೆಫ್ ಇಂಡಿಯಾ ರಿಯಾಲಿಟಿ ಶೋಡ್ ಕುಡ್ಲದ ಮುಹಮ್ಮದ್ ಆಶಿಕ್ ಗೆಂದ್ ದೆರ್.

ಫೈನಲ್ ಗ್ ಬತ್ತಿನ ರುಖ್ಸಾರ್ ಸಯ್ಯೀದ್‌, ಸೂರಜ್ ಥಾಪಾ, ನಂಬಿ ಜೆಸ್ಸಿಕಾ ಮರಕ್ ಸೇರಿನಂಚೆನೆ ನಾಲ್ ಜನಟ್ಟ್ ಮುಹಮ್ಮದ್ ಆಶಿಕ್ ಈ ಪ್ರಶಸ್ತಿನ್ ಗೆಂದ್ ದೆರ್. ಅತ್ತಂದೆ ಈ ಪಂತೊಡು ಗೆಂದಿನ ಸುರುತ್ತ ದಕ್ಷಿಣ ಭಾರತೀಯ ಪನ್ಪಿನ ಪುದರ್ ಲ ಮೆರೆಗ್ ಉಂಡು. ಮೇರ್ ತನ್ನ 20ನೇ ವರ್ಷ ಪ್ರಾಯೊಡೇ ಕುಡ್ಲದ ಬಲ್ಮಠಡ್ ‘ಕುಲ್ಕಿ ಹಬ್’ ಓಪನ್ ಮಲ್ತ್ ದ್ ಮಲ್ಲ ಶೆಫ್ ಆಯೆರೆ ನಿರ್ಧಾರ ಮಲ್ತ್ ದ್ ರಾತ್ರೆ ಪಗೆಲ್ ಬೆಂದೆರ್.

ಅಂಚೆನೆ ಬೆಂಗ್ಲೂರುಡು ನಡತಿನ ಪಂತೊಡು ಟಾಪ್ 12 ನೇ ತಾನ ಪಡೆತೆರ್. ಬೊಕ್ಕ ಕುಡ್ಲಡ್ ನಡತಿನ ಪಂತೊಡು ಗೆಂದ್ ದೆರ್. ಉಂದು ದ.ಕ. ಜಿಲ್ಲೆಡೇ ಜವನೆಯೊರಿ ಸುರುತ್ತ ಸರ್ತಿ ಈ ಪುಗರ್ತೆದ ರಾಷ್ಟ್ರ ಮಟ್ಟದ ಪಂತೊಡು ಪಾಲ್ ಪಡೆದ್ ಗೆಂದ್ ದಿನಿ ಪಂದ್ ತೆರಿದ್ ಬೈದ್ಂಡ್.

ರೈಲ್ವೆ ಇಲಾಖೆಡ್ 1785 ಅಪ್ರೆಂಟಿಸ್ ಬೇಲೆ

ಆಗ್ನೇಯ ರೈಲ್ವೆ ವ್ಯಾಪ್ತಿದ ಬೇತೆ ಬೇತೆ ಇಲಾಖೆಡ್ ಖಾಲಿ ಇಪ್ಪುನ 1785 ಅಪ್ರೆಂಟಿಸ್ ಬೇಲೆಗ್ ಡಿ.28 ಮುಟ್ಟ ಅರ್ಜಿ ಸಂದಾವೊನ ಅವಕಾಶ ಉಂಡು.

10ನೇ ಬೊಕ್ಕ ಐಟಿಐಡ್ ಪಾಸಾಯಿನ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ. 15-24 ವರ್ಷದೊಲಯಿದ ಅಭ್ಯರ್ಥಿಲು ಜ.1 ತ್ತ ಉಲಯಿ ಅರ್ಜಿ ಸಂದಾವೊಡು. ದಾಖಲೆ ಪರಿಶೀಲನೆ ಬೊಕ್ಕ ವೈದ್ಯಕೀಯ ಪರೀಕ್ಷೆದ ಮುಖೇನ ಅಭ್ಯರ್ಥಿಲೆನ್ ಆಯ್ಕೆ ಮಲ್ಪುವೆರ್. ಎಚ್ಚದ ಪೊಲಬುಗಾದ್ ನೆತ್ತ ವೆಬ್‌ಸೈಟ್‌: https://www.rrcser.co.in/ ಗ್ ಭೇಟಿ ಕೊರೊಲಿ.

ರೇಡಿಯೊ ಮಣಿಪಾಲ್ ಡ್ ಕಥೆ ಕೇಳೋಣ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಮೆಗಾ ಹರ್ಟ್ಸ್ ಡ್ ಕೇಂದ್ರ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 84ನೇ ಸಂಚಿಕೆ ಡಿ.9 ಸನಿಯಾರ ಬಯ್ಯಗ್ 4.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಸಾಹಿತ್ಯಾಸಕ್ತೆರ್, ಶಿಕ್ಷಕೆರ್ ಸುಮಾಕಿರಣ್ ಬಸ್ರೂರು ಪಾಲ್ ಪಡೆಯೆರೆ ಉಲ್ಲೆರ್. ಡಿ.10 ಕ್ಕ್ ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಲೀಲಾವತಿಗಾದ್ ಕಣ್ಣೀರ್ ಪಾಡಿನ ಕರಿಯೆ!

ನಟಿ ಲೀಲಾವತಿ ಮೇರ್ ತೀರ್ ಪೋಯಿನವು ನಾಡ್ ಗೇ ಭಾರಿ ಬೇಜಾರ್ ದ ಸಂಗತಿ. ಈ ಪೊರ್ತುಡು ಅರೆನ ಮೋಕೆದ ಸಾಂಕಣೆದ ನಾಯಿ ಕರಿಯೆ ಮೆರೆನ ಪೋಟೋತ್ತ ಎದುರುಡು ಕುಲ್ಲುದು ಕಣ್ಣೀರ್ ಪಾಡೊಂದು ಉಂಡು.

ಈ ದೃಶ್ಯ ಲೀಲಾವತಿ ಮೆರೆನ ಅಭಿಮಾನಿಲೆಗ್ ಕಣ್ಣೀರ್ ಬರ್ಪಾದ್ಂಡ್. ಅತ್ತಂದೆ ಮೆರೆನ ಸೋಲದೇವನಹಳ್ಳಿ ತೋಟದ ಇಲ್ಲಲ್ ಮಾತೆರ್ಲಾ ಮೌನಡ್ ಉಲ್ಲೆರ್.

ಕೌಡೂರು ಬೋರ್ಗಲ್ ಸಂಪಾ ಗೋಪಾಲ ಶೆಟ್ಟಿ ನನ ನೆಂಪು ಮಾತ್ರ

ಬೊಂಬೈ: ಕೌಡೂರು ಬೊರ್ಗಲ್ ಪದ್ದು ನಿವಾಸದ ಸಂಪಾ ಗೋಪಾಲ ಶೆಟ್ಟಿ ಮೇರ್ ಹುಷಾರ್ ದಾಂತೆ ಡಿ.1 ಸುಕ್ರಾರ ಇಲ್ಲಲ್ ದೇವೆರೆ ಪಾದೊ ಸೇರಿಯೆರ್.

ಅಪ್ಪೆ ಮನಸ್ ದ ಸಂಪಾ ಶೆಟ್ಟಿ ಮೆರೆಗ್ ತನ್ನ ಬಂಧು ಬಳಗದ ಮಿತ್ತ್ ಇಸೇಸ ಪ್ರೀತಿ, ಕಾಳಜಿ ಇತ್ತ್ಂಡ್. ಮೇರ್ ಸರಳ ಸಜ್ಜನಿಕೆರ್ದ್ ಊರುದ, ಕುಟುಂಬ ಪರಿವಾರದ ಜನಕ್ಲೆನ ಮೋಕೆಗ್ ಪಾತ್ರರಾತೆರ್.

ಮೆರೆಗ್ ಮಗಲ್ ಬೊಂಬೈ ವಿವಿ ಕನ್ನಡ ವಿಭಾಗದ ಡಾ. ಪೂರ್ಣಿಮಾ ಸುಧಾಕರ ಶೆಟ್ಟಿ, ಚಂದ್ರಹಾಸ ಶೆಟ್ಟಿ, ವೈಶಾಲಿ ಶೆಟ್ಟಿ, ಮರ್ಮಾಯೆ, ಮರ್ಮಾಲ್, ಪುಲ್ಲಿಯಲ್ಲು, ಸಹೋದರೆರ್, ಸಹೋದರಿಯೆರ್ ಬೊಕ್ಕ ಕುಟುಂಬಸ್ಥೆರ್ ಉಲ್ಲೆರ್.

ಸಿಆರ್‌ಝಡ್‌ ವ್ಯಾಪ್ತಿಡ್ ಪೊಯ್ಯೆ ದೆಪ್ಪರೆ ಶಾಸಕೆರ್ ಡಿ.ವೇದವ್ಯಾಸ್‌ ಕಾಮತ್‌ ಒತ್ತಾಯ

ದಕ್ಷಿಣ ಕನ್ನಡ ಜಿಲ್ಲೆದ ಸಿಆರ್‌ಝಡ್‌ ವ್ಯಾಪ್ತಿಡ್ ಸಾಂಪ್ರದಾಯಿಕ ಮರಳುಗಾರಿಕೆ ಸುರು ಮಲ್ಪುನ ಇಚಾರಡ್ ಸರ್ಕಾರದ ಅನಗತ್ಯ ವಿಳಂಬ ನೀತಿದ ಬಗೆಟ್ಟ್ ಬೆಳಗಾವಿದ ಅಧಿವೇಶನಡ್ ಕುಡ್ಲ ದಕ್ಷಿಣ ವಿಧಾನಸಭೆ ಕ್ಷೇತ್ರದ ಶಾಸಕೆರ್ ಡಿ.ವೇದವ್ಯಾಸ್‌ ಕಾಮತ್‌ ಪಾತೆರಿಯೆರ್.

ಬಿಲೆ ಎಚ್ಚಾತಿನೆರ್ದಾವರ ಜನಸಾಮಾನ್ಯರೆಗ್ ಪೊಯ್ಯೆ ತಿಕೊಂದು ಇಜ್ಜಿ. ನನ ಸಿಆರ್‌ಝಡ್‌ ವಲಯಡ್ ಮರಳುಗಾರಿಕೆ ಸುರು ಮಲ್ತಿಜಿಂಡ ಕಟ್ವಾನ ನಿರ್ಮಾಣ ಚಟುವಟಿಕೆಲು ಉಂತುಂಡು. ನೆನ್ ನಂಬುದ್ ಬದ್ಕ್ ನಡಪಾವುನ ಕಾರ್ಮಿಕ ಕುಟುಂಬಲು ಮಸ್ತ್ ಸಂಕಷ್ಟ ಅನುಭವಿಸಾವುನ ಬಗೆಟ್ಟ್, ಆರ್ಥಿಕವಾದ್ ಜಿಲ್ಲೆಗ್ ನಷ್ಟ ಆಪುನ ಬಗೆಟ್ಟ್ ಬೊಕ್ಕ ಒಟ್ಟಾರೆಯಾದ್ ಜಿಲ್ಲೆಡ್ ಆಪುನ ಪೊಯ್ಯೆದ ಸಮಸ್ಯೆದ ಬಗೆಟ್ಟ್ ಪಂಡೆರ್.

ಜಿಲ್ಲೆಡ್ ಪೊಯ್ಯೆ ದೆಪ್ಪುನೆನ್ ಉಂತಾದ್ ಸುಮಾರ್ ತಿಂಗೊಲ್ ಆಂಡ್, ಅವೆನ್ ಕುಡ ಸುರು ಮಲ್ಪುನ ದಿಟ್ಟಿಡ್ ಜಿಲ್ಲಾಧಿಕಾರಿಲೆನ ಗುರ್ಕಾರ್ಮೆಡ್ ಇಪ್ಪುನ 7 ಜನ ಸದಸ್ಯೆರ್ ಇಪ್ಪುನ ಸಮಿತಿನ್ ಪರಿಶೀಲನೆ ನಡಪಾದ್ ಅಗತ್ಯ ಕ್ರಮಲೆನ ಸಂಪೂರ್ಣ ವರದಿನ್ ಬೆಂಗ್ಲೂರ್ ಗ್ ಕಡಪಾದ್ಂಡ್. ಆಂಡ ಇಡೆ ಮುಟ್ಟ ಅನುಮತಿ ತಿಕಿಜಿ.

ಜಿಲ್ಲೆಡ್ ಒವ್ವೇ ಕಾಮಗಾರಿಗ್ಲಾ ಸಿಆರ್‌ಝಡ್‌ ತಿಕೊಂದು ಇಜ್ಜಿ. ನನದ ದಿನಟ್ಟ್ ಲೋಕಸಭೆ ವೋಟು ಘೋಷಣೆ ಆಂಡ ಕುಡ ಸುಮಾರ್ ತಿಂಗೊಲ್ ಪೊಯ್ಯೆ ತಿಕ್ಕಂದೆ ಸುಮಾರ್ ಸಂಕಷ್ಟ ಅನುಭವಿಸಾವುನ ಸ್ಥಿತಿ ಎದುರಾಪುಂಡು.

ಇತ್ತೆನೇ ಜಿಲ್ಲಾಡಳಿತದ ಹಂತಡ್ ಮಾತ ಅಗತ್ಯ ಕ್ರಮನ್ ದೆತೊಂದು ವರದಿನ್ ಕಡಪಾಂಡಲ ನನಲ ನಿರಾಕ್ಷೇಪಣಾ ಪತ್ರ (ಎನ್ ಒಸಿ) ಕೊರಂದೆ ಅನಗತ್ಯ ವಿಳಂಬ ನೀತಿ ಮಲ್ತೊಂದು ಉಲ್ಲೆರ್. ನಮ್ಮ ಜಿಲ್ಲೆಡ್ ಎಂ ಸ್ಯಾಂಡ್ ನ್ ಮಾರ್ಗ ಅತ್ತ್ಂಡ ಬೇತೆ ಉಪಯೋಗಗಾದ್ ಮಾತ್ರ ಗಲಸುವೆರ್. ಅವೆನ್ ಬುಡ್ದ್ ಇಲ್ಲ್, ಕಟ್ವಾನಗ್ ಎಚ್ಚ ಉಪಯೋಗ ಮಲ್ಪುಜೆರ್. ಉಂದು ಮಾನ್ಯ ಸಭಾಧ್ಯಕ್ಷೆರೆಗ್ ಗೊತ್ತಿತ್ತಿನ ಇಚಾರ. ಅಂಚಾದ್ ಕೂಡ್ಲೆ ನಿರಾಕ್ಷೇಪಣಾ ಪತ್ರ ಕೊರ್ದು ಸಾಂಪ್ರದಾಯಿಕ ಪೊಯ್ಯೆ ದೆಪ್ಪುನೆನ್ ಸುರು ಮಲ್ಪರೆ ಅವಕಾಶ ಕೊರೊಡು ಪಂದ್ ಶಾಸಕೆರ್ ಕಾಮತ್ ಸರ್ಕಾರೊಗು ಬಿನ್ನಾಪು ಮಲ್ತೆರ್.

ಇನಿ ದಹಿಸರ್ ಶ್ರೀ ನವದುರ್ಗ ಅಯ್ಯಪ್ಪ ಸೇವಾ ಸಂಘ (ರಿ.) ದ 30 ನೇ ವರ್ಷದ ಶ್ರೀ ಅಯ್ಯಪ್ಪ ಮಹಾಪೂಜೆ

ಬೊಂಬೈ: ದಹಿಸರ್ ಶ್ರೀ ನವದುರ್ಗ ಅಯ್ಯಪ್ಪ ಸೇವಾ ಸಂಘ (ರಿ.) ದ 30 ನೇ ವರ್ಷದ ಶ್ರೀ ಅಯ್ಯಪ್ಪ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ (ಡಿ.9) ಇನಿ ನಡಪರೆ ಉಂಡು.

ಈ ಲೇಸ್ ವಿಶ್ವನಾಥನ್ ಅಯ್ಯರ್ ಗುರುಸ್ವಾಮಿ, ಗಣೇಶ್ ಗುರುಸ್ವಾಮಿ ಘಾಟ್ಕೋಪರ್, ಸುರೇಂದ್ರ ಗುರುಸ್ವಾಮಿ ಬೆಳಗಾಂವ್ ಮೊಕ್ಲೆನ ಮುತಾಲಿಕೆಡ್ ನಡಪರೆ ಉಂಡು.

ಬೊಲ್ಪುಗು ಗಣಹೋಮ, ಶ್ರೀ ಅಯ್ಯಪ್ಪ ಪ್ರತಿಷ್ಠೆ, ಸಹಸ್ರ ನಾಮ ಅರ್ಚನೆ, ಭಜನೆ ನಡತ್ಂಡ್. ಮಧ್ಯಾಹ್ನ ದೀಪಾರಾಧನೆ, ಪಡಿಪೂಜೆ, ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಬೊಂಬೈದ ಸಾಕಿನಾಕ ಶ್ರೀ ದುರ್ಗಾಪರಮೇಶ್ವರಿ ಯಕ್ಷಗಾನ ಕಲಾ ಮಂಡಳಿ ಮೊಕ್ಲೆರ್ದ್ ಕೋರ್ದಬ್ಬು ಬಾರಗ ಆಟ ನಡಪರೆ ಉಂಡು.

ಈ ಲೇಸ್ ಗ್ ಭಕ್ತೆರ್ ಮಾತೆರ್ಲಾ ಬತ್ತ್ ದ್, ತೀರ್ಥ ಪ್ರಸಾದ ದೆತೊಂದು, ಶ್ರೀ ಅಯ್ಯಪ್ಪ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ರಾಜೇಶ್ ಶೆಟ್ಟಿ ತೆಳ್ಳಾರು ಕುಡುಪುಲಾಜೆ, ಗುರ್ಕಾರೆ ಪ್ರಸನ್ನ ಬಿ ಶೆಟ್ಟಿ ಮಾಣಿಬೆಟ್ಟು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪುತ್ತೂರ್ರ್ದ್ ನಾಪತ್ತೆ ಆಯಿನ ಬಾಗಲಕೋಟೆದ ಜವನನ ಪುನ ಆಗುಂಬೆ ಘಾಟ್ ಡ್ ಪತ್ತೆ

ಬಾಗಲಕೋಟೆ ಮೂಲದ ಜವನೆ ಒರಿ ಪುತ್ತೂರುರ್ದು ಕರಿನ ನ.17 ಕ್ಕ್ ನಾಪತ್ತೆ ಆದಿತ್ತ್ ದ್ ಇತ್ತೆ ಆಗುಂಬೆ ಘಾಟಿಡ್ ಪುನ ಆದ್ ಪತ್ತೆ ಆತೆ.

ನಾಪತ್ತೆ ಕೇಸ್ ಪುತ್ತೂರು ಗ್ರಾಮಾಂತರ ಪೋಲೀಸ್ ಠಾಣೆಡ್ ದಾಖಲಾದಿತ್ತ್ಂಡ್. ನಾಪತ್ತೆ ಆತಿನ ಜವನೆ ಕೊಲೆ ಆತೆ ಪಂದ್ ವರದಿ ಆತ್ಂಡ್.

ಬಾಗಲಕೋಟೆ ನಿವಾಸಿ ಹನುಮಂತ (22) ಕೊಲೆ ಆಯಿನಾಯೆ ಪಂದ್ ತೆರಿದ್ ಬೈದ್ಂಡ್. ಈ ಕೇಸ್ ಗ್ ಸಂಬಂಧಪಟ್ಟಿನಂಚೆನೆ ಮೂಜಿ ಜನ‌ ಆರೋಪಿಲೆನ್ ಸಂಪ್ಯ ಪೋಲೀಸೆರ್ ಅರೆಸ್ಟ್ ಮಲ್ದೆರ್.

ಮಂಜುನಾಥ್, ಶಿವಪ್ಪ, ದುರ್ಗಪ್ಪ ಪನ್ಪುನಕುಲು ಈ ಕೇಸ್ ದ ಆರೋಪಿಲಾತೆರ್.

ಕೊಲೆ ಆಯಿನ ಹನುಮಂತೆ ಪುತ್ತೂರ್ ದ ಕುಂಬ್ರಡ್ ಜೆಸಿಬಿ ಆಪರೇಟರ್ ಆದ್ ಕೆಲಸ ಮಲ್ತೊಂದು ಇತ್ತೆರ್. ಹನುಮಂತಗ್ ಆರೋಪಿ ಶಿವಪ್ಪನ ಬೊಡೆದಿನೊಟ್ಟಿಗೆ ಸಂಬಂಧ ಇತ್ತ್ಂಡ್ ಪಂದ್ ಆಯನ್ ಕೊಲೆ ಮಲ್ತ್ ದ್ ಪುನನ್ ಆಗುಂಬೆ ಘಾಟ್ ಡ್ ದಕ್ಕ್ ದೆರ್ ಪಂದ್ ತನಿಖೆಡ್ ಗೊತ್ತಾತ್ಂಡ್.

ಧರ್ಮಸ್ಥಳಡ್ ರಾಜ್ಯಮಟ್ಟದ 44ನೇ ವರ್ಷದ ವಸ್ತುಪ್ರದರ್ಶನ ಉದಿಪನ

ಧರ್ಮಸ್ಥಳ: ಲಕ್ಷ ದೀಪೋತ್ಸವದ ನಿಲೆಟ್ಟ್ ಧರ್ಮಸ್ಥಳ ಪೌಢಶಾಲೆದ ಚಾವಡಿಡ್ ಅಟ್ಟಣೆ ಮಲ್ತಿನ ರಾಜ್ಯಮಟ್ಟದ 44ನೇ ವಸ್ತುಪ್ರದರ್ಶನನ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆರೆನ ಉಪಸ್ಥಿತಿಡ್ ಪುತ್ತೂರು ಸಹಾಯಕ ಆಯುಕ್ತೆರ್ ಗಿರೀಶ್ ನಂದನ್ ಮೇರ್ ಡಿ.8 ಕ್ಕ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಹೆಗ್ಗಡೆರೆನ ಮಗಲ್ ಶ್ರದ್ಧಾ ಅಮಿತ್, ಆಪ್ತ ಸಹಾಯಕೆರ್ ವೀರು ಶೆಟ್ಟಿ, ಎಸ್.ಡಿ.ಎಂ. ಶಿಕ್ಷಣ ಸಂಸ್ಥೆದ ಕಾರ್ಯದರ್ಶಿ ಡಾ. ಎಸ್. ಸತೀಶ್ಚಂದ್ರ, ಗ್ರಾಮಾಭಿವೃದ್ಧಿ ಯೋಜನೆದ ಕಾರ್ಯನಿರ್ವಾಹಕ ನಿರ್ದೇಶಕೆರ್ ಡಾ. ಎಲ್.ಎಚ್. ಮಂಜುನಾಥ್, ಸಿ.ಇ.ಒ. ಅನಿಲ್ ಕುಮಾರ್, ಸಿರಿ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಕೆ.ಎನ್. ಜನಾರ್ದನ್, ವಸ್ತು ಪ್ರದರ್ಶನ ಮಳಿಗೆದ ಎಸ್‌ಡಿಎಂ ಆಸ್ಪತ್ರೆದ ಆಡಳಿತಾಧಿಕಾರಿ ಜನಾರ್ದನ, ಜನಜಾಗೃತಿ ವೇದಿಕೆ ರಾಜ್ಯ ಕಾರ್ಯದರ್ಶಿ ವಿವೇಕ್ ವಿನ್ಸೆಂಟ್ ಪಾಯಸ್, ರತ್ನರಾಜ ಹೆಗ್ಡೆ, ರಾಮಕೃಷ್ಣ ಗೌಡ ಪಾಲ್ ಪಡೆದಿತ್ತೆರ್.