ಒಡಿಪು: ಬೈಲೂರುದ ಮಾರ್ಪಳ್ಳಿ ಶ್ರೀ ಬ್ರಹ್ಮಬೈದರ್ಕಳ ಗರೋಡಿಡ್ ಕಾಲಾವಧಿ ನೇಮ ಡಿ.14-16 ಮುಟ್ಟ ನಡಪರೆ ಉಂಡು.
ಡಿ.14 ಕ್ಕ್ ಬೊಲ್ಪುಗು ನವಕ ಪ್ರಧಾನ ಹೋಮ, ಬಯ್ಯಗ್ ತುಳಸಿ ಪೂಜೆ, ಅಗೆಲ್ ನೈವೇದ್ಯ ಸೇವೆ ನಡತ್ಂಡ್.
ಇನಿ (ಡಿ.15) ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ನೇಮ ನಡಪುಂಡು.
ಡಿ.16 ಕ್ಕ್ ಮಧ್ಯಾಹ್ನ ಮಾಯಂದಾಲ್ ದೇವಿನ ನೇಮ, ರಾತ್ರೆ ಪಿಲ್ಚಂಡಿ ದೈವೊದ ಕೋಲ ನಡಪರೆ ಉಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪದ್ ‘ಕಾವ್ಯಗಾನ -ಸಂಗೀತ ಪಾಠ’ ಸರಣಿ ಲೇಸ್ ದ 38ನೇ ಸಂಚಿಕೆ ಡಿ.15 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ಡಿ.16 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಜ.2 ಅಂಗಾರೆ ಬಯ್ಯಗ್ ಮೇಲೆಕ್ಕಾರು ಆಶೀರ್ವಾದ ಇಲ್ಲದ ಎದುರುಡು ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.
ಈ ಲೇಸ್ ಗ್ ಭಕ್ತಾಭಿಮಾನಿಲು ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಮೇಲೆಕ್ಕಾರು ಶೋಭಾ ಬೊಕ್ಕ ರಾಜೇಶ್ ಶೆಟ್ಟಿ, ಸಹೋದರಿಯೆರ್, ಸಹೋದರೆರ್ ಬೊಕ್ಕ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಓಡಿಲ್ನಾಳ: ಕಿರಾತ ಮೂರ್ತಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ಶ್ರೀ ರಾಮನಗರ ಮೈರಲ್ಕೆ ಓಡಿಲ್ನಾಳ ಮುಲ್ಪದ ಸುರುತ ವರ್ಷದ ಜಾತ್ರಾ ಮಹೋತ್ಸವ ಡಿ 28 ರ್ದ್ ಜ.1 ಮುಟ್ಟ ನಡಪೆರೆ ಉಂಡು. ನೆತ್ತ ಲೆಪ್ಪೋಲೆ ಬುಡುಗಡೆ ,ಜಾತ್ರಾ ಮಹೋತ್ಸವದ ಚಪ್ಪರ ಮೂರ್ತ ಬೊಕ್ಕ ದೇವಸ್ಥಾನಗ್ ಪೊಸದಾದ್ ನಿರ್ಮಾಣ ಮಲ್ತಿನ ಕೆರೆತ ಜಾಗೆದ ಮೂರ್ತ ಕಾರ್ಯಕ್ರಮ ಡಿ.15 ತಾನಿ ನಡತ್ಂಡ್.
ಈ ಪೊರ್ತುಡು ದೇವಸ್ಥಾನದ ಪ್ರಧಾನ ಅರ್ಚಕೆರ್ ಪ್ರಸನ್ನ ಭಟ್ ಪೂಜಾ ವಿಧಿ ವಿಧಾನಲೆನ್ ನಡಪಾದ್ ಕೊರಿಯೆರ್. ಆಡಳಿತ ಮಂಡಳಿದ ಗುರ್ಕಾರ್ಲು ಗೋಪಾಲ ಶೆಟ್ಟಿ ಕೋರ್ಯಾರು, ಕೆರೆ ನಿರ್ಮಾಣ ಮಲ್ಪೆರೆ ಜಾಗೆನ್ ದಾನವಾದ್ ಕೊರ್ನ ಜಾಗೆದ ದಣಿ ವಸಂತಿ ಬಿ ಶೆಟ್ಟಿ ಬೊಕ್ಕ ಜೋಕುಲು ತುಂಗಾ ಆಸ್ಪತ್ರೆ ಬೊಂಬಾಯಿ, ಕುವೆಟ್ಟು ಗ್ರಾ ಪಂ ಗುರ್ಕಾರ್ಲು ಭಾರತಿ ಎಸ್ ಶೆಟ್ಟಿ, ಜಯರಾಮ್ ಶೆಟ್ಟಿ ಪಡಂಗಡಿ, ಜಯಪ್ರಕಾಶ್ ಸಂಪಿಗೆತ್ತಾಯ ಬಳ್ಳಮಂಜ, ಯುವ ಸಮಿತಿದ ಗುರ್ಕಾರ್ಲು ನಿತೇಶ್ ಕುಮಾರ್, ಕಾರ್ಯದರ್ಶಿ ಸುದೀಪ್ ಶೆಟ್ಟಿ, ಆಡಳಿತ ಮಂಡಳಿದ ಪ್ರಧಾನ ಕಾರ್ಯದರ್ಶಿ ವಿಮಲಾಕ್ಷ ಗೌಡ ಪಡ್ಪು, ಭಜನಾ ಮಂಡಳಿದ ಗುರ್ಕಾರ್ಲು ಯೋಗಿಶ್ ಅಡ್ಡಕೊಡಂಗೆ, ದೇವಸ್ಥಾನದ ಟ್ರಸ್ಟ್ದ ಸದಸ್ಯೆರ್ ಮೋಹನ್ ಭಟ್ ಮೈರಾರು, ವಾಮನ ಮೂಲ್ಯ ಮಡಂತಿಲ, ದೇವಿಪ್ರಸಾದ್ ಮೂಲೋಟ್ಟು, ಮೀನಾಕ್ಷಿ ಮೈರಲ್ಕೆ, ಗುರುರಾಜ್ ಪೊಡುಂಬ, ಸತೀಶ್ ಮೈರಲ್ಕೆ ಇತ್ತೆರ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವಾರ್ಷಿಕ ಜಾತ್ರೋತ್ಸವದ ಪ್ರಯುಕ್ತ ರವಿ ಕಕ್ಕೆ ಪದವು ಸಮಾಜ ಸೇವಾ ಟ್ರಸ್ಟ್ ದ ವತಿರ್ದ್ ಸ್ವಚ್ಛತಾ ಕಾರ್ಯ ಡಿ.13 ತಾನಿ ಕುಮಾರಧಾರರ್ದ್ ಸುಬ್ರಹ್ಮಣ್ಯದ ಕಾಶಿಕಟ್ಟೆ ಮುಟ್ಟ ನಡತ್ಂಡ್.
ಸಮಾಜ ಸೇವೆಡ್ ತನನ್ ತಾನ್ ತೊಡಗಿಸಾವೊಂದು ಇಪ್ಪುನ ಟ್ರಸ್ಟ್ ದ ಗುರ್ಕಾರ್ಲು ಡಾ.ರವಿಕಕ್ಕೆಪದವು ಬೊಕ್ಕ ಸ್ವಯಂಸೇವಕೆರ್ ಮಾತ ಸೇರ್ದ್ ರೋಡ್ ನ್ ನೀರ್ ಪಾರ್ದ್ ಅಡಿತ್ದ್, ಪ್ಲಾಸ್ಟಿಕ್, ಕಜವು ಕಡ್ಡಿಲು, ಬೊಕ್ಕ ರೋಡ್ ಡ್ ಇತ್ತಿನ ಕಜವುಲೆನ್ ದೆತ್ತ್ ದ್ ಸ್ವಚ್ಛ ಮಲ್ತೆರ್.
ಶ್ರೀ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿಲೆನ ಷಷ್ಟ್ಯಬ್ದ ಅಭಿನಂದನ ಲೇಸ್ ಡಿ.16 ಸನಿಯಾರ ಒಡಿಪು ಶ್ರೀ ಪೇಜಾವರ ಮಠತ್ತ ಎದುರುದ ಶ್ರೀ ಕೃಷ್ಣ ಮಠಟ್ಟ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ ತಾಲೂಕ್ ದ ಸುರುತ್ತ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷೆರಾದ್ ತುಳು ಕನ್ನಡ ಸಾಹಿತಿ ಡಾ.ಗಣೇಶ ಅಮೀನ್ ಸಂಕಮಾರ್ ಆಯ್ಕೆ ಆತೆರ್ ಪಂದ್ ದ.ಕ. ಜಿಲ್ಲಾ ಕ.ಸಾ.ಪ ಅಧ್ಯಕ್ಷೆರ್ ಡಾ| ಎಂ.ಪಿ. ಶ್ರೀನಾಥ್ ತೆರಿಪಾದೆರ್.
ಡಿ.27 ಬುಧಾರ ಮುಲ್ಕಿ ಕಾರ್ನಾಡು ಸರಕಾರಿ ಪದವಿ ಪೂರ್ವ ಕಾಲೇಜ್ ಡ್ ಸಾಹಿತ್ಯ ಸಮ್ಮೇಳನ ನಡಪರೆ ಉಂಡು.
ಗಣೇಶ್ ಸಂಕಮಾರ್ ಮೇರ್ ತುಳು ಕನ್ನಡ ಜನಪದ ವಿದ್ವಾಂಸೆರಾದ್ ಪುಗರ್ತೆ ಪಡೆತೆರ್. ಅತ್ತಂದೆ 33 ವರ್ಷ ಉಪನ್ಯಾಸಕೆರಾದ್, ಸಂತ ಅಲೋಶಿಯಸ್ ಕಾಲೇಜ್ ಡ್ ಡೀನ್ ಆದ್, ಕಾಟಿಪಳ್ಳ ನಾರಾಯಣಗುರು ಕಾಲೇಜ್ ಡ್ ಪ್ರಾಂಶುಪಾಲೆರಾದ್ ಸೇವೆ ಸಂದಾದೆರ್.
ಮೆರೆನ ಸಾವಿರದ ಸತ್ಯಗಳು, ನಿನಾದ, ಮಣ್ಣಿನೊಳಗಿನ ಅನ್ನ, ನುಡಿಸಿಂಗಾರ, ಬ್ರಹ್ಮ ಬಲಾಂಡಿ, ಧರ್ಮರಸು ಉಳ್ಳಾಯ, ಕರ್ಮ, ಅಗೋಳಿ ಮಂಜಣೆ ಸೇರಿನಂಚೆನೆ ಕನ್ನಡ ತುಳುಟ್ಟ್ 18 ಬೂಕು ಪ್ರಕಟ ಆತ್ಂಡ್.
ಜಾನಪದ ಶಬ್ದ ಶಕ್ತಿ ಇಸಯಡ್ ಸಂಶೋಧನೆಗಾದ್ ಮಂಗಳೂರು ವಿವಿರ್ದ್ ಡಾಕ್ಟರೇಟ್ ಪದವಿ ಪಡೆತೆರ್. ದೇಶ ವಿದೇಶಡ್ 5 ಸಾರರ್ದ್ ಎಚ್ಚ ಉಪನ್ಯಾಸನ್ ಕೊರ್ತೆರ್. ಪತ್ರಿಕೆಡ್ ಅಂಕಣ, ಬರವುಲು ಪ್ರಕಟ ಆವೊಂದೆ ಉಂಡು. ರೇಡಿಯೋ ದೂರದರ್ಶನಡ್ ಸಾಹಿತ್ಯ ಸಂಸ್ಕೃತಿಲೆನ ಬಗೆಟ್ಟ್ ಲೇಸ್ ನ್ ಕೊರೊಂದು ಉಲ್ಲೆರ್. ಕೃಷಿಕೆರ್, ಜನಪದ ಕ್ಷೇತ್ರಗ್ ಮಸ್ತ್ ಕೊಡುಗೆ ಕೊರ್ತೆರ್. ತುಳು ಸಾಹಿತ್ಯ ಅಕಾಡಮಿ ಸದಸ್ಯೆರಾದ್, ಪಾವಂಜೆಡ್ ತುಳು ಅಧ್ಯಯನ ಕೇಂದ್ರದ ಸ್ಥಾಪನೆಡ್ ಕ್ರಿಯಾಶೀಲರಾತೆರ್.
ಕುಡ್ಲ: ಬಿಜೈ ಕಾಪಿಕಾಡ್ ದ ದೈವರಾಜ ಶ್ರೀ ಕೋಟೆದ ಬಬ್ಬುಸ್ವಾಮಿ ದೈವೊಲ್ಯಡ್ ಬಿಂಬ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ, ನೇಮೋಚ್ಚಯ ಡಿ.13-18 ಮುಟ್ಟ ನಡಪರೆ ಉಂಡು.
ಡಿ.13 ಬುಧಾರ ಬಯ್ಯಗ್ ಉರ್ವ ಶ್ರೀ ಮಾರಿಯಮ್ಮ ದೇವಲ್ಯರ್ದ್ ಪುದೆಕಾಣಿಕೆ ಮೆರವಣಿಗೆಡ್ ಬೈದ್೦ಡ್.
ಡಿ.14 ಗುರುವಾರ ಬಯ್ಯಗ್ ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಗೋಪೂಜೆ, ವಾಸ್ತು ಪೂಜೆ, ವಾಸ್ತು ಹೋಮ, ಸುದರ್ಶನ ಹೋಮ ನಡತ್ಂಡ್.
ಇನಿ (ಡಿ.15) ಬೊಲ್ಪುಗು ಗಣಹೋಮ, ಪ್ರಧಾನ ಹೋಮ, ಕಲಶ ಪ್ರತಿಷ್ಠೆ, ಶ್ರೀ ಬಬ್ಬುಸ್ವಾಮಿ ಬೊಕ್ಕ ಪರಿವಾರ ದೈವೊಲೆನ ಬಿಂಬ ಪ್ರತಿಷ್ಠೆ, ಬ್ರಹ್ಮಕಲಶಾಭಿಷೇಕ ಪ್ರಸನ್ನ ಪೂಜೆ, ದೈವೊಲೆನ ದರ್ಶನ ಸೇವೆ, ಮಹಾಪೂಜೆ, ಪ್ರಸಾದ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ ನಡಪುಂಡು. ಮಧ್ಯಾಹ್ನ ಭಜನೆ, ಬಯ್ಯಗ್ ಸಭಾ ಲೇಸ್, ರಾತ್ರೆ ಸಾಂಸ್ಕೃತಿಕ ಲೇಸ್ ಬೊಕ್ಕ ಸತ್ಯನಾಪುರೊತ ಸಿರಿ ನೃತ್ಯ ರೂಪಕ ನಡಪರೆ ಉಂಡು.
ಡಿ.16 ಸನಿಯಾರ ಬೊಲ್ಪುಗು ಭಂಡಾರ ಬರ್ಪುಂಡು. ಬೊಕ್ಕ ಬಬ್ಬುಸ್ವಾಮಿ ದೈವೊದ ದರ್ಶನ ಸೇವೆ, ರಾತ್ರೆ ದೈವರಾಜ ಶ್ರೀ ಬಬ್ಬುಸ್ವಾಮಿ ಬೊಕ್ಕ ತನ್ನಿಮಾನಿಗ ದೈವೊಲೆನ ನೇಮೋಚ್ಚಯ ನಡಪರೆ ಉಂಡು.
ಡಿ.17 ಐತಾರ ಮಧ್ಯಾಹ್ನ ರಾಹುಗುಳಿಗ ದೈವೊದ ನೇಮ, ರಾತ್ರೆ ಪಂಜುರ್ಲಿ ಬೊಕ್ಕ ಗುಳಿಗ ದೈವೊದ ನೇಮ ನಡಪರೆ ಉಂಡು.
ಡಿ.18 ಸೋಮಾರ ಬೊಲ್ಪುಗು ಭಂಡಾರ ಪಿದಾಡುಂಡು. ಬೊಕ್ಕ ಪ್ರಸಾದ ಪಟ್ಟುನೆತ್ತೊಟ್ಟಿಗೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರೆನ ಚಂಪಾಷಷ್ಠಿ ಜಾತ್ರೆದ ಉಚ್ಚಯಗ್ ಬರ್ಪುನ ಭಕ್ತಾದಿಲೆಗ್ ಕಾನೂನು ಬೊಕ್ಕ ಸುವ್ಯವಸ್ಥೆ ಕಾಪುನ ದಿಟ್ಟಿಡ್ ಗಾಡಿಲೆನ್ ಉಂತಾಯೆರೆ ಡಿ.17 ಬೊಕ್ಕ 18 ಕ್ಕ್ ಇಸೇಸ ಪಾರ್ಕಿಂಗ್ ವ್ಯವಸ್ಥೆ ಮಲ್ದ್ಂಡ್.
ಅಂಚಾದ್ ಸಾರ್ವಜನಿಕೆರ್ ಬೊಕ್ಕ ಭಕ್ತೆರ್ ಸಹಕಾರ ಮಲ್ಪೊಡು ಪಂದ್ ಸುಬ್ರಹ್ಮಣ್ಯ ಠಾಣಾಧಿಕಾರಿ ಕಾರ್ತಿಕ್ ತೆರಿಪಾದೆರ್.
ಡಿ.17 ಕ್ಕ್ ಬಯ್ಯಗ್ 4 ಗಂಟೆರ್ದ್ ಮತ ಗಾಡಿಲು ನಿಗದಿ ಮಲ್ತಿನ ಪಾರ್ಕಿಂಗ್ ಜಾಗೆಡೇ ಉಂತಾವೊಡು. ವಸತಿ ಗೃಹಡ್ ಕೋಣೆ ಕೆಂಡಿನಕುಲು 4 ಗಂಟೆದೊಲಯಿ ನಿಗದಿ ಮಲ್ತಿನ ವಸತಿಗೃಹಲೆಗೆ ಪೋವೊಡು. ಅತ್ತಂದೆ ತುರ್ತುದ ಪೊರ್ತುಡು ಬುಡ್ದ್ ಸರ್ವರೆಗ್ಲಾ ಈ ನಿಯಮ ಅನ್ವಯ ಆಪುಂಡು. ಕುಮಾರಧಾರರ್ದ್ ಸವಾರಿ ಮಂಟಪ ಮುಟ್ಟ ಮಾರ್ಗದ ಬರಿಟ್ಟ್ ಗಾಡಿ ಉಂತಾಯೆರೆ ಇಜ್ಜಿ.
ಗುಂಡ್ಯ, ಉಬಾರ್, ಪುತ್ತೂರು ಕಡೆರ್ದ್ ಬರ್ಪುನ ಕೆ.ಎಸ್.ಆರ್.ಟಿ.ಸಿ ಬಸ್ಲು ಸುಬ್ರಹ್ಮಣ್ಯದ ವಲ್ಲೀಶ ಸಭಾ ಭವನದ ಕೈತಲ್, ಲಘು ಗಾಡಿಲೆಗ್ ಕುಮಾರಧಾರ ಹಲಿಪ್ಯಾಡ್ ಬೊಕ್ಕ ಪದವಿ ಪೂರ್ವ ಕಾಲೇಜ್ ಮೈದಾನಡ್, ದ್ವಿಚಕ್ರ ಗಾಡಿಲೆಗ್ ಪದವಿ ಕಾಲೇಜ್ ಮೈದಾನಡ್, ಬಿಲದ್ವಾರದ ಎದುರುದ ಮೈದಾನಡ್ ಉಂತಾಯೆರೆ ವ್ಯವಸ್ಥೆ ಮಲ್ದ್ಂಡ್.
ಸುಳ್ಯ ಕಡೆರ್ದ್ ಬರ್ಪುನ ಕೆ.ಎಸ್.ಆರ್.ಟಿ.ಸಿ ಬಸ್ಲು ಇಂಜಾಡಿ ಫಾರೆಸ್ಟ್ ವಸತಿ ಗೃಹದ ಕೈತಲ್, ದ್ವಿಚಕ್ರ ಗಾಡಿ ಬೊಕ್ಕ ಲಘು ಗಾಡಿಲೆಗ್ ಸವಾರಿ ಮಂಟಪದ ಪಾರ್ಕಿಂಗ್ ಜಾಗೆಡ್ ಉಂತಾವೊಲಿ. ರಿಕ್ಷಾ ಚಾಲಕೆರ್ ಪ್ರಯಾಣಿಕೆರೆನ್ ಕುಮಾರಧಾರರ್ದ್ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಎದುರು ಮುಟ್ಟ ಲೆತೊಂದು ಬರೊಲಿ.
ಜಾತ್ರೋಚ್ಚಯಗ್ ಮಸ್ತ್ ಸಂಖ್ಯೆಡ್ ಭಕ್ತೆರ್ ಬರ್ಪುನ ಕಾರಣ ಅಕ್ಲೆನ ಸುರಕ್ಷತೆ ದಿಟ್ಟಿರ್ದ್ ಇಸೇಸ ಪಾರ್ಕಿಂಗ್ ವ್ಯವಸ್ಥೆ ಮಲ್ದ್ಂಡ್. ಇಸೇಸ ಗಾಡಿ ಉಂತುನ ವ್ಯವಸ್ಥೆ ಆಯೋಜನೆ ಮಲ್ಪುನ ಮುಖೇನ ಕ್ಷೇತ್ರಡ್ ಜಾತ್ರೆದ ಪೊರ್ತುಡು ಗಾಡಿ ಜಾಸ್ತಿ ಅವಂದಿಲೆಕ್ಕ ಕ್ರಮ ದೆತೊಂದುಂಡು.
ಕುಡ್ಲ: ಕಂಕನಾಡಿ ಶ್ರೀ ಬ್ರಹ್ಮ ಬೈದರ್ಕಳ ಗರಡಿಡ್ ಡಿ.25-29 ಮುಟ್ಟ ವರ್ಷಾವಧಿ ಉಚ್ಚಯ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಕ್ಷೇತ್ರದ ಸರ್ವಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರ್ಕಾರೆ ಕೆ. ಚಿತ್ತರಂಜನ್, ಮೆನೇಜರ್ ಜೆ.ಕಿಶೋರ್ ಕುಮಾರ್ ಬೊಕ್ಕ ಆಡಳಿತ ಮೊಕ್ತೇಸರೆರ್ ಲೆಪ್ಪೋಲೆಡ್ ತೆರಿಪಾದೆರ್.
