ತುಳು ಸುದ್ದಿ

ಕೋವಿಡ್ -19 ಮಾರ್ಗಸೂಚಿನ್ ಉಲ್ಲಂಘನೆ ಮಲ್ಪುನಕ್ಲೆನ ವಿರುದ್ಧ ಕ್ರಮ

ಗುರುಪುರ, ಮೇ 8: ಅನಗತ್ಯವಾದ್ ತಿರ್ಗೊಂದು ಕೋವಿಡ್ -19 ಮಾರ್ಗಸೂಚಿನ್ ಉಲ್ಲಂಘನೆ ಮಲ್ಪುನಕ್ಲೆನ ವಿರುದ್ಧ ಕ್ರಮ ದೆತೊನೆರೆ ದುಂಬು ಬತ್ತಿನ ಗುರುಪುರ ಗ್ರಾಪಂ ಆಡಳಿತ ಕಟ್ಟುನಿಟ್ಟಾದ್ ದಂಡ ಪಾಡರೆ ನಿರ್ಧಾರ ಮಲ್ದೆರ್.

ಗುರುವಾರ ಪಂಚಾಯತ್ ಸಭಾಗೃಹಡ್ ಕೋವಿಡ್ ನಿಯಂತ್ರಣ ವಿಷಯಗ್ ಸಂಬಂಧಿ ಸಭೆ ನಡಪಾಯಿನ ಆಡಳಿತ ಜಿಲ್ಲಾಡಳಿತದ ಸೂಚನೆ ದ ಪ್ರಕಾರ ಕೋವಿಡ್ ಬಗ್ಗೆ ಜನಜಾಗೃತಿ, ಆದೇಶ ಉಲ್ಲಂಘನೆ ಮಲ್ತಿನಕ್ಲೆನ ವಿರುದ್ಧ ದಂಡ ಹೇರಿಕೆ ಬೊಕ್ಕ ಕೈತಲ್ ದ ಸಂಘ-ಸಂಸ್ಥೆದ ಪ್ರತಿನಿದಿಲು ಉಪ್ಪುನ ವಿಶೇಷ ಕಾರ್ಯ ಪಡೆ ರಚನೆ ಮಲ್ಪರೆ ನಿರ್ಧಾರ ಮಲ್ತೆರ್.

ಕೋವಿಡ್ ಲಸಿಕೆದ ಡೋಸ್ ಖಾಲಿಯಾಯೀನೇರ್ದಾವರ ದಕ್ಷಿಣ ಕನ್ನಡ ಜಿಲ್ಲೆಡ್ ರಡ್ಡ್ ದಿನ ಮುಟ ಲಸಿಕಾ ಅಭಿಯಾನ ರದ್ದು

ಕುಡ್ಲ, ಮೇ 8: ಕೋವಿಡ್ ಲಸಿಕೆದ ಡೋಸ್ ಖಾಲಿಯಾಯೀನೇರ್ದಾವರ ದಕ್ಷಿಣ ಕನ್ನಡ ಜಿಲ್ಲೆಡ್ ರಡ್ಡ್ ದಿನ ಮುಟ ಲಸಿಕಾ ಅಭಿಯಾನನ್ ಉoತಾದೆರ್.

ಈ ಬಗ್ಗೆ ಕೋಡೆ ಬೈಯ್ಯಗ್ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ ಪ್ರಕಟಣೆ ಕೊರ್ತೆರ್ , ದಕ್ಷಿಣ ಕನ್ನಡ ಜಿಲ್ಲೆಗ್ ಪೂರೈಕೆಯಾಯಿನ ಕೋವಿಡ್ ಲಸಿಕೆ ಫಲಾನುಭವಿಲೆಗ್ ಲಸಿಕಾಕರಣ ಮಲ್ತ್ ಮುಗಿದಿನೇರ್ದಾವರ ನನ ದುಂಬುದ 2 ದಿನ ವೆನ್ಲಾಕ್ ಜಿಲ್ಲಾಸ್ಪತ್ರೆ ಸೇರಿನಂಚ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರ, ಪ್ರಾಥಮಿಕ ಆರೋಗ್ಯ ಕೇಂದ್ರ,ಸಮುದಾಯ ಆರೋಗ್ಯ ಕೇಂದ್ರ ಬೊಕ್ಕ ತಾಲೂಕು ಆಸ್ಪತ್ರೆಡ್ ಲಸಿಕಾ ಶಿಬಿರ ಇಜ್ಜಿ ಪಂದ್ ಪಂಡೆರ್.

ಎಲ್ಲೆರ್ದ್ ಕುಡ್ಲಡ್ ಕಠಿಣ ಕ್ರಮ

ಕುಡ್ಲ, ಮೇ 06 : ಕೊರೊನಾ ವೈರಸ್ ಪಸರುನೆನ್ ತಡೆಯರೆ ದಕ್ಷಿಣ ಕನ್ನಡ ಜಿಲ್ಲಾಡಳಿತ ಕಠಿಣ ಕಾನೂನು ಕ್ರಮ ದೆತೊನ್ದೆರ್ . ದಕ್ಷಿಣ ಕನ್ನಡ ಜಿಲ್ಲೆಗ್ ಸಂಬಂಧಿ ಕುಡ್ಲಡ್ ಮೇ 6 ತಾರೀಖ್ಗ್ ನಡತಿನ ಸಭೆಟ್ ಈ ನಿರ್ಣಯ ದೆತೊನ್ದೆರ್ .

ಎಲ್ಲೆರ್ದ್ (ಮೇ.7) ಕಾಂಡೆ 6 ಗಂಟೆರ್ದ್ 9 ಮುಟ ಮಾತ್ರ ಅಗತ್ಯ ವಸ್ತು ಖರೀದಿಗ್ ಅವಕಾಶ.

• 10 ಗಂಟೆದ ಉಲಯಿ ವ್ಯಾಪಾರಸ್ಥೆರ್ ಬೊಕ್ಕ ಖರೀದಿದಾರೆರ್ ಇಲ್ಲಗ್ ಸೇರೋಡು.
• ಮೆಡಿಕಲ್ ಗ್ ಪೋಪಿನಕುಲು ತಮ್ಮ ಕೈತಲ್ ದ ಮೆಡಿಕಲ್ ಗ್ ಮಾತ್ರ ಪೋವೊಡು.
• ಗಾಡಿಡ್ ಬೇತೆ ಕಡೆ ಪೊಂಡ ಗಾಡಿ ಸೀಜ್.
• ಜನಕ್ಲೆನ ಅನಗತ್ಯ ಓಡಾಟಗ್ ಖಾಕಿರ್ದ್ ಕಠಿಣ ಕ್ರಮ.
• ಮೇ.15 ರ್ದ್ ಬೊಕ್ಕ ಒವ್ವೆ ಕಾರ್ಯಕ್ರಮಗ್ ಲಾ ಅವಕಾಶ ಇಜ್ಜಿ.
• ಮದಿಮೆ , ಗೃಹಪ್ರವೇಶ, ಪುಟ್ಟು ಪರ್ಬ ಮಲ್ಪರೆ ಇಜ್ಜಿ.
• ಮೇ.15 ರ್ದ್ ಮಿತ್ತ್ ಅನುಮತಿ ಕೊರ್ತಿನ ಕಾರ್ಯಕ್ರಮಗ್ ಕಡಿವಾಣ.
• ಕಾರ್ಯಕ್ರಮ ಇತ್ತಿನಕ್ಲೆನ ಮನವೊಲಿಸಾದ್ ಅವೆನ್ ದುಂಬು ಪಾಡರೆ ನಿರ್ಧಾರ.