ರಪಕ್ಕ ಸುದ್ದಿ Flash News

ಹೆಚ್ ಪಿ ಸಿ ಎಲ್ ಸಂಸ್ಥೆದ ಉದಿಪನದ ದಿನಾಚರಣೆ

ಕುಡ್ಲ: ಹಿಂದುಸ್ತಾನ್ ಪೆಟ್ರೋಲಿಯಂ ಕಾರ್ಪೋರೇಷನ್ ಲಿಮಿಟೆಡ್ ಕುಡ್ಲ ರಿಟೇಲ್ ಪ್ರಾದೇಶಿಕ ಕಚೇರಿಡ್ ಹೆಚ್ ಪಿ ಸಿ ಎಲ್ ನ 49 ನೇ ಉದಿಪನದ ದಿನಾಚರಣೆ ಜುಲೈ 17 ಸೋಮಾರ ನಡತ್ಂಡ್.

ಲೇಸ್‌ನ್ ಉಪ ಮಹಾಪ್ರಬಂಧಕೆರ್ ನವೀನ್ ಕುಮಾರ್ ಎಮ್ ಜಿ ಅಂಚನೆ ನಿವೃತ್ತ ಅಧಿಕಾರಿ ಶೈಲೇಶ್ ಆರ್ ರಾವ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.

ಲೇಸ್‌ಡ್ ಉಪ ಮಹಾ ಪ್ರಬಂಧಕೆರ್, ಮುಖ್ಯ ಅತಿಥಿಲು ಪೆಟ್ರೋಲಿಯಂ ಉದ್ಯಮ ಬೊಕ್ಕ ಉತ್ಪಾದನೆದ ಬಗೆಟ್ಟ್ ಮಾಹಿತಿ ಕೊರಿಯೆರ್. ಪೆಟ್ರೋಲಿಯಂ ಉತ್ಪನ್ನದ ಮಲ್ಲ ವಿತರಕೆರ್ ಬೊಕ್ಕ ಹೆಚ್ ಪಿ ಸಿ ಎಲ್ ಸಿಬ್ಬಂದಿಲು ಪಾಲ್ ಪಡೆದ್ ಇತ್ತೆರ್. ಅಯಿರ್ದ್ ಬೊಕ್ಕ ರೆಡ್ ಕ್ರಾಸ್ ಸಂಸ್ಥೆ ಕುಡ್ಲ ಮುತಾಲಿಕೆಡ್ ನೆತ್ತೆರ್ ದಾನ ಮಲ್ಪುನ ಲೇಸ್ ನಡತ್ಂಡ್. ಸುಮಾರ್ 120 ಜನಕುಲು ಈ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಆಟಿದ ಅಮಾಸೆಗ್ ಪೊಸ ದೇಖಿ ಕೊರ್ನ ಮರ್ದ್, ಗಂಜಿ ಪಟ್ಟುನ ಲೇಸ್ ಹೋಟೆಲ್ ಡಿಂಕಿ ಡೈನ್, ತುಳುವ ಬೊಳ್ಳಿ ಪ್ರತಿಷ್ಠಾನದ ಮುತಾಲಿಕೆ

ಕುಡ್ಲ : ಹೋಟೆಲ್ ಡಿಂಕಿ ಡೈನ್‌ ಬೊಕ್ಕ ತುಳುವ ಬೊಳ್ಳಿ ಪ್ರತಿಷ್ಠಾನದ ಒಟ್ಟುಸೇರಿಗೆಡ್ ಆಟಿದ ಅಮಾಸೆದ ದಿನ ಧರ್ಮಾರ್ಥ ಪಾಲೆದ ಮರತ್ತ ಕೆತ್ತೆದ ಕಷಾಯ ಬೊಕ್ಕ ಮೆತ್ತೆದ ಗಂಜಿ ಪಟ್ಟುನ ಲೇಸ್ ಕದ್ರಿ ಪಾರ್ಕ್ ದ ಕೈತಲ್ ಡಿಂಕಿ ಡೈನ್ ಹೋಟೆಲ್ ದ ವಠಾರೊಡು ನಡತ್ಂಡ್.

ಆಟಿ ತಿಂಗೊಲುಡು ಬರ್ಪಿನ ಅಮಾಸೆ ದಿನತ್ತಾನಿ ತುಳುನಾಡ್ ಡ್ ಆಟಿ ಕಷಾಯ ಪರ್ಪಿನ ಕ್ರಮ ಉಂಡು. ಸೀಕ್ ಸಂಕಡ ಬರಂದಿಲೆಕ ತಡೆಪುನ ಸಕ್ತಿ ಉಪ್ಪುನ ಪಾಲೆದ ಕೆತ್ತೆದ ರಸನ್ ಮರ್ದ್ ಮಲ್ತ್ ದ್ ಇಲ್ಲ್ ಇಲ್ಲದ ಪ್ರತಿಯೊರಿಲ ಪರ್ಪಿನ ಕ್ರಮ ನಡತೊಂದು ಬೈದ್ಂಡ್. ಅಂಚೆನೆ ಕದ್ರಿದ ಹೋಟೆಲ್ ಡಿಂಕಿ ಡೈನ್ ಸಹಕಾರಡ್ ತುಳುವ ಬೊಳ್ಳಿ ಪ್ರತಿಷ್ಠಾನದ ಮುತಾಲಿಕೆಡ್ ಪಾಲೆದ ಕೆತ್ತೆದ ಕಷಾಯ ಬೊಕ್ಕ ಮೆತ್ತೆದ ಗಂಜಿ ಪಟ್ಟುನ ಲೇಸ್ ಸೋಮಾರ ಬೊಲ್ಪುಗು ನಡತ್ಂಡ್. ಭಾರಿ ಸಂಖ್ಯೆಡ್ ಬತ್ತಿನ ಕುಡ್ಲದ ಜನಕುಲು ನೆತ್ತ ಪ್ರಯೋಜನ ದೆತೊಂಡೆರ್.

ಈ ಪೊರ್ತುಡು ಪಾತೆರಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಗುರ್ಕಾರೆ, ಬರವುಗಾರೆ ದಯಾನಂದ ಕತ್ತಲ್‌ಸಾರ್, ಆಟಿ ಅಮಾವಾಸ್ಯೆದ ಮಹತ್ವನ್ ತೆರಿಪಾಯೆರ್.

ಡಿಂಕಿ ಡೈನ್ ಹೋಟೆಲ್ ದ ಧಣಿ ಸ್ವರ್ಣ ಸುಂದರ್, ಕಿರಣ್ ಜೋಗಿ, ಮಾಜಿ ಮೇಯರ್ ಹರಿನಾಥ್ ಜೋಗಿ, ಪತಂಜಲಿದ ಡಾ. ಜ್ಞಾನೇಶ್ ನಾಯಕ್, ಅಶೋಕ್, ಲಕ್ಷ್ಮಣ್ ಕುಮಾರ್ ಮಲ್ಲೂರು, ಪ್ರದೀಪ್ ಆಳ್ವ, ಭಾಸ್ಕರ್ ರೈ ಕುಕ್ಕುವಳ್ಳಿ, ಯಾದವ್ ಕೋಟ್ಯಾನ್, ರೋಶನ್ ರೊನಾಲ್ಡ್, ರಕ್ಷಿತ್ ಕುಡುಪು ಮೊಕುಲು ಮಾತ ಇತ್ತೆರ್.