ರಪಕ್ಕ ಸುದ್ದಿ Flash News

ರೇಡಿಯೋ ಮಣಿಪಾಲಡ್ “ಚಿಣ್ಣರ ದನಿ”

ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಸಹಯೋಗಡ್ “ಚಿಣ್ಣರ ದನಿ” ಕಾರ್ಯಕ್ರಮ ಜು.19ದಾನಿ 5.30 ಗಂಟೆಗ್ ಪ್ರಸಾರ
ಆವರೆ ಉಂಡು.

ಇನಿ ಪ್ರಸಾರ ಆಪಿನ 18ನೇ ಸಂಚಿಕೆಡ್ ಬಾಲ ಪ್ರತಿಭೆ ನಂದಿನಿ ಅಲೆವೂರು ಪಾಲ್ ಪಡೆಯರೆ ಉಲ್ಲೆರ್ ಪಂದ್ ರೇಡಿಯೋ ಮಣಿಪಾಲ ಪ್ರಕಟಣೆಡ್ ತೆರಿಪಾದ್ಂಡ್.

ಜು.23: ಯುವವಾಹಿನಿ ಮುಲ್ಕಿ ಘಟಕದ ನಿರೆಲ್ಡ್ 21 ನೇ ವರ್ಷದ ಆಟಿಡೊಂಜಿ ದಿನ ಲೇಸ್

ಮೂಲ್ಕಿ: ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ತೃತ ಯುವವಾಹಿನಿ(ರಿ) ಮೂಲ್ಕಿ ಘಟಕದ ನಿರೆಲ್ಡ್ ಇರ್ವತ್ತೊಂಜನೆ ವರ್ಸದ ಆಟಿಡೊಂಜಿ ದಿನ ಜು.23 ನೇ ಐತಾರ ಮೂಲ್ಕಿದ ಬಿಲ್ಲವ ಸಂಘೊಡ್ ನಡಪರೆ ಉಂಡು.

ಕೂಟದ ಉದಿಪನನ್ ಎಸ್.ಆರ್.ಆರ್ ಮಸಾಲ ಇಂಡಸ್ಟ್ರೀಸ್ (ಲಿ)ದ ಆಡಳಿತ ನಿರ್ದೇಶೆಕೆರ್ ಶೈಲೇಂದ್ರ ಸುವರ್ಣ , ಯುವವಾಹಿನಿ (ರಿ) ಕೇಂದ್ರ ಸಮಿತಿ ಕುಡ್ಲ ನೆತ್ತ ಗುರ್ಕಾರ್ಲು ಶ್ರೀ ರಾಜೇಶ್ ಬಿ ನಡೆಪಾಯೆರುಲ್ಲೆರ್. ಆಟಿದ ಮದಿಪುನ್ ಕುಡ್ಲ ಸೈಂಟ್ ಆಗ್ನೇಸ್ ಕಾಲೇಜ್‌ದ ಡಾ| ಅರುಣ್ ಉಳ್ಳಾಲ್ ಬೊಕ್ಕ ಲಯನ್ಸ್ ಕ್ಲಬ್ ಬಪ್ಪನಾಡು ಇನ್ಸ್ಫಯರ್ ದ ಕಡೀರ ಗುರ್ಕಾರ್ಲು ವೆಂಕಟೇಶ್ ಹೆಬ್ಬಾರ್ ನಡೆಪಾಯೆರೆ ಉಲ್ಲೆರ್. ಬಿನ್ನೆರಾದ್ ತುಳುಚಿತ್ರ ಬೊಕ್ಕ ರಂಗಭೂಮಿ ಕಲಾವಿದೆರ್ ಭೋಜರಾಜ್ ವಾಮಂಜೂರು, ಆಟಿದ ತಮ್ಮನನ್ ತುಳುಚಿತ್ರ ನಿರ್ಮಾಪಕೆರ್ ಸಂದೇಶ್ ರಾಜ್ ಬಂಗೇರ, ಕೂಟದ ತಮೇರಿನ್ ಮೂಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ಪ್ರಕಾಶ್ ಸುವರ್ಣ, ಗುರ್ಕಾರ್ಮೆನ್ ಮೂಲ್ಕಿ ಯುವವಾಹಿನಿ ಗುರ್ಕಾರ್ಲು ಮಾಧವ ಪೂಜಾರಿ ಕಿಲ್ಪಾಡಿ ನಡೆಪಾದ್‌ ಕೊರ್ರೆ ಉಲ್ಲೆರ್.

ಕೂಟಗ್ ರಂಗ್ ಆದ್ ಮೂಲ್ಕಿ ಯುವವಾಹಿನಿ ಕಲಾವಿದೆರೆಡ್ದ್ ಆಟಿದ ನಲಿಕೆ-ತೆಲಿಕೆ- ಪದರಂಗಿತ ಲೇಸ್ ಕಾಂಡೆ 9.30 ಗಂಟೆಗ್ ಸುರುವಾಪುಂಡು. ಆಟಿದ ಅಟಿಲ್‌ದ ಕಮ್ಮೆನಗ್ ಕುಕ್ಕುದ ಉಪ್ಪಡ್, ತಿಮರೆ ಚಟ್ನಿ, ಉಪ್ಪಡ್ ಪಚ್ಚಿರ್, ಕುಡುತ್ತ ಚಟ್ನಿ, ಕುಕ್ಕುದ ಚಟ್ನಿ, ತೊಜಂಕ್, ನುರ್ಗೆ ತೊಪ್ಪು, ತೇವು ತೇಟ್ಲ, ಉರ್ಪೆಲ್ ಅರಿತ್ತ ನುಪ್ಪು, ಕುಡುತ್ತ ಸಾರ್, ತೇವು ಪದ್ಪೆ, ಪೆಲಕಾಯಿದ ಗಟ್ಟಿ, ಮೆತ್ತೆದ ಗಂಜಿ ಅಂಚನೆ ಆಟಿದ ಕಲೊಟು ಬತ್ತಿ ಬಿನ್ನೆರೆಗ್ ಅರೆಪುದಡ್ಡೆ, ಚಾ ಬಾಯಿ ಬಚ್ಚೆಲ್ಗ್, ಕಡ್ಲೆ, ಹಪ್ಪಳ ಪಟ್ಟರೆ ಉಂಡು ದ್ ಯುವವಾಹಿನಿ ಮುಲ್ಕಿ ಘಟಕದ ಪ್ರಕಟಣೆಡ್ ತೆರಿಪಾದೆರ್.

ಐಕಳ ಹರೀಶ್ ಶೆಟ್ರೆನ ಇಲ್ಲಡ್ ಬಂಗಾರ್ ಕಂಡ್ ದಿನ ಕೇಸ್ ದ 3 ನೇ ಆರೋಪಿ ಅರೆಸ್ಟ್

ಕಿನ್ನಿಗೋಳಿ : ಮುಲ್ಕಿ ಪೊಲೀಸ್ ಠಾಣಾ ವ್ಯಾಪ್ತಿದ ಐಕಳಡ್ ಇಲ್ಲಗ್ ಕಲ್ವೆರ್ ಪೊಗ್ಗ್‌ದಿನ ಕೇಸ್‌ ದ ಮಿತ್ತ್ ನನೊರಿ ಆರೋಪಿನ್ ಕುಡ್ಲ ಸಿಸಿಬಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್. ಉಂದೆತೊಟ್ಟುಗು ಕೇಸ್‌ಗ್ ಸಂಬಂಧ ಪಟ್ಟಿಲೆಕ್ಕ ಅರೆಸ್ಟ್ ಆಯಿನ ಆರೋಪಿಲೆನ ಸಂಖ್ಯೆ 3 ಕ್ಕ್ ಏರ್ದ್ಂಡ್.

ಜನವರಿ 1 ಬೊಕ್ಕ 2 ತ್ತ ನಡುಟ್ಟ್ ಕುಡ್ಲ ತಾಲೂಕು ತಾಳಿಪ್ಪಾಡಿ ಗ್ರಾಮದ ಗುತ್ತಕಾಡುಡು ಇಪ್ಪುನ ಐಕಳ ಹರೀಶ್ ಶೆಟ್ರೆನ ಚಂದ್ರಿಕಾ ಪುದರ್‌ದ ಇಲ್ಲದ ಎದುರ್‌ ಬಾಕಿಲ್‌ದ ಬೀಗ ಪೊಲ್ತುದ್ ಪೊಗ್ಗಿನ ಕಲ್ವೆರ್ ಬಂಗಾರ್, ಬೊಲ್ಲಿದ ಪದ್ದೆಯಿ ಅಂಚನೆ ಕಾಸ್‌ನ್ ಕಂಡ್‌ದಿತ್ತೆರ್. ಮುಲ್ಕಿ ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆದಿತ್ತ್ಂಡ್. ಈ ಕೇಸ್‌ದ ತನಿಖೆನ್ ಸಿಸಿಬಿ ಪೊಲೀಸೆರೆಗ್ ಕೊರ್ದಿತ್ತೆರ್.

ಈ ಕೇಸ್‌ಡ್ ತನಿಖೆಡ್ ರಡ್ಡ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದ್ ಅಕಲೆರ್ದ್ 56,50,000 ರೂ. ಬಿಲೆತ್ತ ಬಂಗಾರ್ ಬೊಕ್ಕ ಮೊಬೈಲ್ ಫೋನ್ ಅಂಚನೆ ಬೇತೆ ಸೊತ್ತುಲೆನ್ ವಶಕ್ಕ್ ದೆತೊಂದಿತ್ತೆರ್. ಇತ್ತೆ ಈ ಕೇಸ್‌ಡ್ ಕಂಡರೆ ಇಲ್ಲ್ ತೋಜ್ಪಾಯಿನ ನನೊರಿ ಆರೋಪಿ ಬೊಂಡಂತಿಲ ನಿವಾಸಿ ಮಹಮ್ಮದ್ ಶರೀಫ್(40) ಪನ್ಪಿನರೆನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದ್ ಅಯೆರ್ದ್ ಬಂಗಾರ್‌ದ ಪೆಂಡೆಂಟ್ ಅಂಚನೆ ಮೊಬೈಲ್ ಫೋನ್‌ನ್ ವಶಕ್ಕ್ ದೆತೊಂದೆರ್. ಈ ಕೇಸ್‌ಡ್ ಮಸ್ತ್ ಜನ ಆರೋಪಿಲು ಪಾಲ್ ಪಡೆದಿತ್ತ್‌ದ್ ಅಕಲೆನ್ ನಾಡ್ ಪತ್ತುನ ಬೇಲೆನ್ ಪೊಲೀಸೆರ್ ಮಲ್ತೊಂದುಲ್ಲೆರ್.

ಕಾಂತಾರರ್ದ್ ಬೊಕ್ಕ ತುಳುತ್ತ “ಬಾಯಿಲ್ಡ್ ರೈಸ್” ಕಿರುಚಿತ್ರದ ಕಮ್ಮೆನ

“ಬಾಯಿಲ್ಡ್ ರೈಸ್” ಪನ್ಪಿನ ಅಪ್ಪಟ ತುಳುನಾಡ್‌ದ ಪಿರಾಕ್‌ದ ಕಥೆ ಇಪ್ಪುನ ತುಳು ಕಿರುಚಿತ್ರ ಇತ್ತೆ ರಾಜ್ಯ ಮಟ್ಟಡ್ ಮಸ್ತ್ ಪ್ರಶಸ್ತಿಲೆನ್ ಪಡೆತ್ಂಡ್. ಆತೆ ಅತ್ತಂದೆ ಆಸ್ಕರ್ ಮಾನ್ಯತೆ ಪಡೆದಿನಂಚಿನ “ಬೆಂಗ್ಲೂರ್ ಅಂತಾರಾಷ್ಟ್ರೀಯ ಕಿರುಚಿತ್ರೋತ್ಸವ-2023” ಗ್ ಆಯ್ಕೆ ಆತ್ಂಡ್.

2022 ತ್ತ ಆಗೋಸ್ಟ್ 24 ಕ್ಕ್ ಮಾಯಿಲು ಫಿಲಂಸ್ ಯೂಟ್ಯೂಬ್ ಚಾನೆಲ್‌ಡ್ ಬುಡುಗಡೆ ಆಯಿನ “ಬಾಯಿಲ್ಡ್ ರೈಸ್” ಕಿರುಚಿತ್ರ ಜಯಂತ್ ನಿಟ್ಟಡೆ ಮೆರೆನ ಕಥೆ ಅಂಚನೆ ನಿರ್ದೇಶನಡ್ ಆತ್ಂಡ್. ದಿವ್ಯಾ ಎಲ್. ಮೂಡಿಗೆರೆ ನಿರ್ಮಾಣದ ಈ ಕಿರುಚಿತ್ರಗ್ ಆರ್.ಪ್ರದೀಪ್ ಮೇರೆನ ಸಂಕಲನ ಉಂಡು.