ರಪಕ್ಕ ಸುದ್ದಿ Flash News

 “ನಿಮ್ಮೆಲ್ಲರ ಆಶೀರ್ವಾದ” ಪಿಚ್ಚರ್ ಬುಡುಗಡೆ ಗ್ ತಯಾರ್

ಕುಡ್ಲ: ವರುಣ್ ಸಿನಿ ಕ್ರಿಯೇಷನ್ಸ್ ಲಾಂಛನಡ್ ಮೂಡ್‌ದ್ ಬತ್ತಿನ “ನಿಮ್ಮೆಲ್ಲರ ಆಶೀರ್ವಾದ” ಕನ್ನಡ ಪಿಚ್ಚರ್ ಜುಲೈ 21 ಗ್ ರಾಜ್ಯಡ್ ಬುಡುಗಡೆ ಆಯರೆ ಉಂಡು ಪಂದ್ ಪಿಚ್ಚರ್‌ದ ನಿರ್ಮಾಪಕೆರ್ ವರುಣ್ ಹೆಗ್ಡೆ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.

ಈ ಪೊರ್ತುಡು ನಾಯಕೆ ನಟೆ ಪ್ರತೀಕ್ ಶೆಟ್ಟಿ ಪಾತೆರ್ದ್, “ಉಂದು ಪೊಸಬೆರ್‍ನ ಪ್ರಯತ್ನ ಆದಿತ್ತ್‌ದ್ ಒಂಜಿ ಎಡ್ಡೆ ಕಥೆ ಉಂಡು. ಚಿತ್ರತಂಡಡ್ ಮಸ್ತ್ ಜನ ಪೊಸ ಕಲಾವಿದೆರ್, ತಂತ್ರಜ್ಞರು ಬೇಲೆ ಮಲ್ತ್‌ದೆರ್. ನಿಕುಲ್ ಮಾತೆರ್ಲಾ ಆಶೀರ್ವಾದ ಮಲ್ತ್ಂಡ ನಮ ನಾನಾತ್ ಪೊಸ ಪ್ರಯತ್ನದ ಮಕೇನ ನಿಕ್ಲೆನ ಎದುರ್ ಬರ್ಪ” ಪಂದ್ ಪಂಡೆರ್.

ಹಿರಿಯ ರಂಗಭೂಮಿ ಕಲಾವಿದೆರ್ ಅರವಿಂದ್ ಬೋಳಾರ್ ಪಾತೆರ್ದ್, ಮಸ್ತ್ ಪಿಚ್ಚರ್‌ಲೆಡ್ ಕಲಾವಿದೆರೆಗ್ ಕಾಸ್ ಕೊರ್ಪೆರ್. ಆಂಡ ಅಕುಲ್ ನಿರೀಕ್ಷೆ ಮಲ್ತಿನಾತ್ ಕಾಸ್ ತಿಕ್ಕುಜಿ. ಆಂಡ ಈ ಪಿಚ್ಚರ್‌ಡ್ ಪ್ರತಿಯೊರಿ ಕಲಾವಿದೆನ್ ಲ ಮಸ್ತ್ ಎಡ್ಡೆಡು ತೂತೆರ್. ಪೊಸಬೆರ್ ಮಲ್ತಿನ ಪ್ರಯತ್ನನ್ ಗೆಂದಾದ್ ಕೊರ್ಲೆ” ಪಂದ್ ಪಂಡೆರ್. ಮೈಮ್ ರಾಮದಾಸ್ ಪಾತೆರ್ದ್, “ಸಿಂಪಲ್ ಆಯಿನ ಕಥೆನ್ ಭಾರೀ ಪೊರ್ಲುಡೇ ಸಿಂಪಲ್ ಆದ್ ನಿರ್ದೇಶಕೆರ್ ಪಿಚ್ಚರ್‌ದ ಮುಕೇನ ತೊಜ್ಪಾದೆರ್. ತುಳುನಾಡ್‌ದ ಪೊಲಬುನ್ ಈ ಪಿಚ್ಚರ್‌ಡ್ ತೂವೊಲಿ ಪಂದ್ ಪಂಡೆರ್.

ವಾಲ್ಟರ್ ನಂದಳಿಕೆ ಪಾತೆರ್ದ್, “ಇತ್ತೆ ಎಚ್ಚದ ಪಿಚ್ಚರ್‌ಲೆಡ್ ನಮ್ಮ ತುಳುನಾಡ್‌ದ ನಟೆರ್‍ನಕುಲೇ ತೋಜೊಂದಿಪ್ಪುನವು ಕುಷಿತ್ತ ಇಚಾರ. ತುಳುನಾಡ್‌ದ ಜನಕುಲು ಏಪಲಾ ಒವ್ವೇ ಪಿಚ್ಚರ್‌ನ್ ಸೋಪಾಯರೆ ಬುಡ್ತಿಜೆರ್” ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ನಿರ್ಮಾಪಕೆರ್ ಉದಯ್ ಕುಮಾರ್ ಹೆಗ್ಡೆ, ವರುಣ್ ಹೆಗ್ಡೆ, ನಿರ್ದೇಶಕೆರ್ ರವಿಕಿರಣ್, ವಾಲ್ಟರ್ ನಂದಳಿಕೆ, ನಟ ಪ್ರತೀಕ್ ಶೆಟ್ಟಿ, ಅರವಿಂದ್ ಬೋಳಾರ್, ಮೈಮ್ ರಾಮದಾಸ್, ಪುರುಷೋತ್ತಮ್ ಭಂಡಾರಿ ಇತ್ತೆರ್.

ತುಳುನಾಡ್‌ದ ಕತೆ

ಪೊರ್ಲುದ ತುಳುನಾಡ್‌ದ ಒಂಜಿ ಎಡ್ಡೆಂತಿನ ಜನಕುಲು ಇಪ್ಪುನ ಎಲ್ಯ ಊರು. ಆ ಊರುದ ಒರಿ ಪೊಲೀಸ್ ಅಧಿಕಾರಿ ಪಿಚ್ಚರ್‌ದ ನಾಯಕೆ “ಆಶೀರ್ವಾದ್”. ಆರ್ ಬಂಗ ಬತ್ತ್‌ದ್ ಎಂಚ ಪೊಲೀಸ್ ಅಧಿಕಾರಿ ಆಯೆರ್ ಪನ್ಪಿನವು ಈ ಪಿಚ್ಚರ್‌ದ ಕಥೆ ಆತ್ಂಡ್. ಅಯಿತೊಟ್ಟುಗು ಪಾಯಲ್ ರಾಧಾಕೃಷ್ಣ ಬೊಕ್ಕ ಆಶೀರ್ವಾದ ಮೊಕುಲೆನ ನಡುತ್ತ ಒಂಜಿ ಸುಂದರ ಪ್ರೇಮಕಥೆ ಈ ಪಿಚ್ಚರ್‌ಡ್ ಉಂಡು ಪಂದ್ ನಿರ್ದೇಶಕೆರ್ ರವಿಕಿರಣ್ ಪಂಡೆರ್.

ಕನ್ನಡದ ನಟಿ ಎಂ ಏನ್ ಲಕ್ಷ್ಮೀದೇವಿ, ಮೈಮ್ ರಾಮದಾಸ್, ಸ್ವಾತಿ ಗುರುದತ್ತ್, ಕಾಮಿಡಿ ಕಿಲಾಡಿ ಪುಗರ್ತೆದ ರಾಕೇಶ್ ಪೂಜಾರಿ, ಸದಾಶಿವ ಅಮೀನ್, ಖಳನಟೆರಾದ್ ಕೆಜಿಎಫ್ ಪುಗರ್ತೆದ ದಿನೇಶ್ ಕುಡ್ಲ ಉಲ್ಲೆರ್.

ರವಿಕಿರಣ್ ಕತೆ- ನಿರ್ದೇಶನ, ಸರವಣನ್ ಜಿ ಏನ್ ಛಾಯಾಗ್ರಹಣ, ರಾಷ್ಟ್ರ ಪ್ರಶಸ್ತಿ ವಿಜೇತೆರ್ ಸುರೇಶ್ ಆರ್ ಮುಗಮ್ ಸಂಕಲನ, ಸುನಾದ್ ಗೌತಮ್ ಸಂಗೀತ, ವಿವೇಕ್ ಚಕ್ರವರ್ತಿ ಹಿನ್ನೆಲೆ ಸಂಗೀತ ಈ ಪಿಚ್ಚರ್‌ಡ್ ಉಂಡು.

ಸಸಿಬಿತ್ತ್ ಲ್ದ ಭಗವತಿ ಅಪ್ಪೆನ ನಡೆಟ್ಟ್ “ಅಮರ್ಥ” ಕನ್ನಡ ಪಿಕ್ಚರ್ ಗ್ ಮೂರ್ತ

ಸುರತ್ಕಲ್: ತುಳುನಾಡ್ ದ ಕಲಾವಿದೆರ್ ಸಿನೆಮಾ ರಂಗಡ್ ಮಲ್ಲಮಟ್ಟಡ್ ಯಶಸ್ಸ್ ಪಡೆದ್ ಜಗತ್ತ್ ಡ್ ಪುದರ್ ಪಡೆತೆರ್. ಕನ್ನಡ ಚಿತ್ರರಂಗಗ್ ಇತ್ತೆ ಕುಡ್ಲದ ನನೊಂಜಿ ಪ್ರತಿಭಾವಂತ ಕೂಟ ಪೊಸ ಪಿಕ್ಚರ್ ಗ್ ಕೈ ಪಾಡ್ದ್ಂಡ್. ಪಂಚರಂಗಿ ಪಿಲಂಸ್ ಲಾಂಛನಡ್ ಕನ್ಯಾನ ಸದಾಶಿವ ಶೆಟ್ಟಿ ಬೊಕ್ಕ ಗುರು ಹೆಗ್ಡೆ ನಿರ್ಮಾಣಡ್ “ಅಮರ್ಥ” ಪೊಸ ಕನ್ನಡ ಚಿತ್ರದ ಸ್ಕ್ರಿಪ್ಟ್ ಪೂಜೆ ಬೊಕ್ಕ ಮೂರ್ತದ ಲೇಸ್ ಸಸಿಬಿತ್ತ್ ಲ್ದ ಶ್ರೀ ಭಗವತಿ ದೇವಸ್ಥಾನಡ್ ನಡತ್‌ಂಡ್.

ವಿನಯ್ ಪ್ರೀತಮ್ ನಿರ್ದೇಶನಡ್ ಸಿನೆಮಾ ತಯಾರಾತ್‌ಂಡ್. ಕ್ಯಾಮಾರಾಮ್ಯಾನ್ ಗುರುಪ್ರಶಾಂತ್ ರೈ, ನಿರ್ಮಾಣ ವಿನ್ಯಾಸಕ ಪ್ರಶಾಂತ್ ಆಳ್ವ ಕಲ್ಲಡ್ಕ, ಕಲಾನಿರ್ದೇಶಕ ಸಂತೋಷ್ ವೇಣೂರು, ಸಂಗೀತ ಶಿನೋಯ್ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್ ಕೆಲಸ ಮಲ್ದೆರ್.

ತಾರಾಗಣಡ್ ರಾಜ್ ದೀಪಕ್, ಮೇಘನಾ ರಾಜ್, ಕೃತಿ ಶೆಟ್ಟಿ, ರೂಪ ವರ್ಕಾಡಿ, ನಮಿತಾ, ಕಲಾಶ್ರೀ, ಮಂಜುಭಾಷಿಣಿ, ಗೋಪಿನಾಥ ಭಟ್, ರಘು ಪಾಂಡೇಶ್ವರ್, ಉಷಾ ಭಂಡಾರಿ, ರವಿ ಭಟ್, ಮಂಜುನಾಥ ಹೆಗಡೆ, ಅಶ್ವಿನಿ ಹಾಸನ್, ಸಂದೀಪ್ ಉಲ್ಲೆರ್.

ಪಿಕ್ಚರ್ ದ ನಿರ್ಮಾಪಕೆರ್ ಉದ್ಯಮಿ ಕನ್ಯಾನ ಸದಾಶಿವ ಶೆಟ್ಟಿ ಕ್ಯಾಮರಗ್ ಚಾಲನೆ ಕೊರಿಯೆರ್. ಬೊಕ್ಕ ಪಾತೆರ್ನ ಆರ್ ಸಾಮಾಜಿಕವಾದ್ ಬೇತೆ ಬೇತೆ ಕ್ಷೇತ್ರಡ್ ಯಾನ್ ಸೇವೆ ಸಲ್ಲಿಸಾದೆ. ಇತ್ತೆ ಸಿನೆಮಾ ರಂಗಗ್ ಕೈ ಪಾಡುವ ಪ್ರಯತ್ನ ಮಲ್ತೊಂದುಲ್ಲೆ. ಸಿನೆಮಾನ್ ಯಶಸ್ವಿ ಮಲ್ಪುನ ಮಾತೆರ್ನ ಕೈಟ್ಟುಂಡು ಪಂದ್ ಶುಭ ಹಾರೈಸಾಯೆರ್. ತಮ್ಮಣ್ಣ ಶೆಟ್ಟಿ ಕ್ಲಾಪ್ ಮಲ್ತೆರ್. ಬಿನ್ನೆರಾದ್ ಬತ್ತಿನ ಚಿತ್ರನಟ ಶಿವಧ್ವಜ್ ಶೆಟ್ಟಿ ಪಾತೆರ್ದ್ ಚಿತ್ರದ ನಿರ್ಮಾಪೆಕೆರ್, ಚಿತ್ರತಂಡಡ್ ಇಪ್ಪುನಕುಲು ಮಾತ ಎನ್ನ ಆತ್ಮೀಯೆರ್ ಇಂಚ ಇಪ್ಪುನಗ ಈ ಸಿನೆಮಾದ ಬಗ್ಗೆ ಜಾಸ್ತಿ ಆಸಕ್ತಿ ಉಂಡು. “ಅಮರ್ಥ” ಸಿನೆಮಾ ಕನ್ನಡ ಚಿತ್ರರಂಗಡ್ ಸಮರ್ಥ ಚಿತ್ರ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ನಿರ್ದೇಶಕೆರ್ ವಿನಯ್ ಪ್ರೀತಂ, ಸುನಿಲ್ ನೆಲ್ಲಿಗುಡ್ಡೆ, ಪ್ರಕಾಶ್ ಶೆಟ್ಟಿ ಧರ್ಮನಗರ, ರಘು ಪಾಂಡೇಶ್ವರ, ರೂಪ ವರ್ಕಾಡಿ, ಶೈಲಶ್ರೀ ಸಿನೆಮಾ ಕಲಾವಿದೆರ್, ತಂತ್ರಜ್ಞೆರ್, ದೇವಸ್ಥಾನದ ಆಡಳಿತ ಮಂಡಳಿದಕುಲು ಇತ್ತೆರ್.

ಭ್ರಾಮರೀ ಯಕ್ಷಮಿತ್ರರು ಕುಡ್ಲ ಟ್ರಸ್ಟ್ ಬಳಗದ ಯಕ್ಷವೈಭವದ ಲೆಪ್ಪೋಲೆ ಬುಡುಗಡೆ

ಕುಡ್ಲ : ಭ್ರಾಮರಿ ಯಕ್ಷಮಿತ್ರರು ಟ್ರಸ್ಟ್ ಬಳಗದ ಈ ಸರ್ತಿದ ಯಕ್ಷವೈಭವದ ಲೆಪ್ಪೋಲೆ ಬುಡುಗಡೆ ಜು.19 ದಾನಿ ಕುಡ್ಲದ ಜನತಾ ಡಿಲಕ್ಸ್ ಹೊಟೇಲ್‌ಡ್ ನಡತ್‌ಂಡ್.

ಮಲ್ಲ ಬಿನ್ನೆರಾದ್ ಕಲ್ಕೂರ ಪ್ರತಿಷ್ಠಾನದ ಅಧ್ಯಕ್ಷೆ ರ್ ಪ್ರದೀಪ್ ಕುಮಾರ್ ಕಲ್ಕೂರ ಲೆಪ್ಪೋಲೆ ಬುಡುಗಡೆ ಮಲ್ತೆರ್. ಶ್ರೀ ಮಂಗಳಾದೇವಿ ಸೇವಾಸಂಸ್ಥೆದ ಅಧ್ಯಕ್ಷೆರ್, ಸಿಟಿ ಬಸ್ ಮಾಲಕೆರ್ ನ ಸಂಘದ ಮಾಜಿ ಅಧ್ಯಕ್ಷೆ ರ್ ದಿಲ್‌ರಾಜ್ ಆಳ್ವ ಯಕ್ಷವೈಭವದ ಪೋಸ್ಟರ್ ಬುಡುಗಡೆ ಮಲ್ತೆರ್.

ಬಳಗದ ಮಿತ್ತ್ ದ ಮೋಕೆಡ್ ಈ ಲೇಸ್ ಡ್ ಪಾಲ್ ಪಡೆಯಿನ ಮಾತ ಸದಸ್ಯರೆಗ್, ಮೆಸೇಜ್, ಪೋನ್ ಕಾಲ್ ಎಡ್ಡೆಪ್ಪು ಬಯಕಿನ ಸದಸ್ಯರೆಗ್ ಸಂಘಟಕೆರ್ ಸೊಲ್ಮೆ ಸಂದಾಯೆರ್.

ಯಕ್ಷಗಾನದ ಪೋಸ್ಟರ್, ಲೆಪ್ಪೋಲೆಗಾದ್ ವಿನಯಕೃಷ್ಣ ಕುರ್ನಾಡ್ ಮೆರೆನ್ ಸಂಪರ್ಕ ಮಲ್ಪೊಲಿ. ಅಂಚನೆ ನಿಕ್ಲೆನ ಸುತ್ತ-ಮುತ್ತದ ಜಾಗೆಡ್ ಯಕ್ಷಗಾನಗ್ ಸಂಬಂಧಪಟ್ಟಿನಕ್ಲೆನ ವಿಳಾಸ ಇತ್ತ್ಂಡ ಕಡಪಾದ್ ಕೊರೊಲಿ ಪಂದ್ ಭ್ರಾಮರಿ ಯಕ್ಷಮಿತ್ರರು ಟ್ರಸ್ಟ್ ದಕುಲು ಬಿನ್ನಾಪು ಮಲ್ತೆರ್.

ನೀರ್ ದಿಂಜಿನ ಬಾಲ್ದಿಗ್ ಬೂರ್ದು ತೀರ್‌ಪೊಯಿನ ಬಾಲೆ

ಕಾವೂರು : ನೀರ್ ದಿಂಜಿನ ಬಾಲ್ದಿಗ್ ಎಲ್ಯ ಪ್ರಾಯದ ಬಾಲೆ ಬೂರ್ದು ತೀರ್‌ಪೊಯಿನ ಘಟನೆ ಕುಡ್ಲದ ಕಾವೂರ್‌ಡ್ ನಡತ್ಂಡ್. ಜಾರ್ಖಂಡ್ ರಾಜ್ಯೊದ ಫಿರೋಝ್ ಅನ್ಸಾರಿ ಬೊಕ್ಕ ಕಿತಾಬುನ್ ದಂಪತಿಲೆನ ಮಗಲ್ ಆಯಿಶಾ(20 ತಿಂಗೊಳ್) ತೀರ್‌ಪೊಯಿನ ಬಾಲೆ ಪಂದ್ ತೆರಿದ್ ಬೈದ್ಂಡ್.

ಮೊಕುಲು ಜಾರ್ಖಂಡ್ ರಾಜ್ಯದಕುಲಾದ್ ಇತ್ತೆ ಕಾವೂರು ಪಲ್ಲಿದ ಕೈತಲ್ ವಾಸ ಉಲ್ಲೆರ್.

ಶಬರಿಮಲೆತ್ತ ಇತಿಹಾಸಡೇ ಸುರುತ್ತ ಸರ್ತಿ ನಡತ್ಂಡ್ ಯಕ್ಷಗಾನ

ಕುಡ್ಲ: ಇತಿಹಾಸಡೇ ಸುರುತ್ತ ಸರ್ತಿ ದೇವರನಾಡು ಕೇರಳದ ಪುಣ್ಯ ಕ್ಷೇತ್ರ ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇವೆರೆನ ಸನ್ನಿಧಿಡ್ ಜುಲೈ 19 ಗ್ ಯಕ್ಷಗಾನ ನಡತ್ಂಡ್.

ತೆಂಕುತಿಟ್ಟ್‌ದ ಪುಗರ್ತೆದ ಮೇಳಡ್ ಒಂಜಾಯಿನ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದಶಾವತಾರ ಯಕ್ಷಗಾನ ಮಂಡಳಿ ಮೂಲ್ಕಿ ಬೊಕ್ಕ ಯಕ್ಷ ತೆಲಿಕೆ ತಂಡದ ಕಲಾವಿದೆರ್ ಅಂಚನೆ ಪುಗರ್ತೆದ ಹಾಸ್ಯ ಕಲಾವಿದೆರ್ ದಿನೇಶ್ ಕೋಡಪದವು ಮೊಕಲೆನ ಸಂಯೋಜನೆಡ್ “ಕ್ಷೇತ್ರಪಾಲ ಉದ್ಧರಣ” ಪನ್ಪಿನ ಯಕ್ಷಗಾನ ಪ್ರದರ್ಶನ ಆಂಡ್.

ಹಿಮ್ಮೇಳಡ್ ಭಾಗವತೆರ್ ಆದ್ ಧೀರಜ್ ರೈ ಸಂಪಾಜೆ, ಮದ್ದಳೆಡ್ ರೋಹಿತ್ ಉಚ್ಚಿಲ, ಚೆಂಡೆಡ್ ಜಿತೇಶ್ ಕೋಳ್ಯೂರು ಇತ್ತೆರ್.

ಕ್ಷೇತ್ರದ ಪುದರ್ ಹಾಳ್ ಮಲ್ಪಡೆ, ಒವ್ವೇ ತನಿಖೆಲ ಮಲ್ಪಡ್ : ಡಾ.ವೀರೇಂದ್ರ ಹೆಗ್ಗಡೆರ್

“ಸೌಜನ್ಯ ಕೇಸ್‌ನ್ ಸುರುಕ್ ಸಿ.ಬಿ.ಐ ಗ್ ಕೊರ್ರೆ ಪಂತಿನೇ ಯಾನ್, ಈ ಕೇಸ್ ಗ್ ಲ ಎಂಕ್ಲೆಗ್ ಲ ದಾಲ ಸಂಬಂಧ ಇಜ್ಜಿ. ಅಕುಲ್ ದಾದ ಬೋಡಾಂಡಲ ತನಿಖೆ ಮಲ್ಪಡ್, ನನಲ ತನಿಖೆ ಮುಂದುವರಿಸಾವಡ್, ಎಂಕ್ಲೆಗ್ ದಾಲ ತೊಂದರೆ ಇಜ್ಜಿ. ಒವ್ವೆ ರೀತಿದ ಪೋಡಿಗೆ ಇಜ್ಜಿ, ಸಂಕೋಚ ಇಜ್ಜಿ, ಸಂದೇಹಲ ಇಜ್ಜಿ. ದಾಯೆ ಪಂಡ ಯಾನ್ ದುಂಬು ಎಂಚ ಇತ್ತೆನ ಅಂಚನೆ ನಿರ್ಮಲವಾದ್ ಉಲ್ಲೆ ಪಂದ್ ಧರ್ಮಸ್ಥಳ ದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆರ್ ಪಂಡೆರ್.

ಧರ್ಮಸ್ಥಳಡ್ ಗುರುವಾರ ನಡತಿನ ವಿಭಾಗೀಯ ಮುಖ್ಯಸ್ಥೆರ್ನ ಸಭೆಟ್ಟ್ ಪಾತೆರಿನ ಆರ್ ಈ ವಿಷಯ ಪಂಡೆರ್.

ಈ ಕ್ಷೇತ್ರಡ್ ಕರಿನ 60 ವರ್ಷಡ್ ಬಾರಿ ಬದಲಾವಣೆ ಆತ್‌ಂಡ್. ಮಾತಾ ಕಾರ್ಯಕ್ರಮಡ್ ಸೇವೆ, ಜನಪರ ಕಾರ್ಯಕ್ರಮನ್ ಮಲ್ತೊಂದು ಬೈದ. ಅವೆಟ್ ಏತೋ ಕೆಲಸಲು ಪೊಸ ಪೊಸ ರೀತಿಡ್ ಆತ್‌ಂಡ್. ಗ್ರಾಮೀಣಾಭಿವೃದ್ದಿ ಯೋಜನೆ ಶುರು ಅಯಿರ್ದ್ ಬೊಕ್ಕ ಅನೇಕ ಪಟ್ಟಿ ಬೈದ್ಂಡ್. ದಾಯೆಪಂಡ ಜನಕ್ಲೆಲೆಗ್ ಈ ಯೋಜನೆರ್ದ್ ಉಪಕಾರ ಆವೊಂದುಂಡು ಅಚಾಂದ್ ಎಂಕ್ಲೆಗ್ ಕೋಟ್ಯಾಂತರ ಜನಕ್ಲೆನ ಅಭಿಮಾನ ಉಂಡು. ಅಂಚನೆ ಕೆಲವರೆಗ್ ದ್ವೇಷಲ ಉಂಡು ಪಂಡೆರ್.

ಬೊಲ್ಪುರ್ದ್ ಬಯ್ಯ ಮುಟ್ಟ ಮೂಲು ಅನೇಕ ರೀತಿದ ಕೆಲಸ ಇಪ್ಪುನೆರ್ದಾತ್ರ ಇಂಚಿನ ಮಾತ ವಿಷಯ ತರೆಕ್ ಪೋಪುಜಿ.ಆಂಡ ಅನವಶ್ಯಕವಾದ್ ದಾಯೆ ಶತ್ರುತ್ವ ಬುಲೆಪಾವೊಂದುಲ್ಲೆರ್ ಪನ್ಪುನ ಮಲ್ಲ ಸಮಸ್ಯೆ. ಯಾನ್ ಈತ್ನಮುಟ್ಟ ದಾಯೆ ಮನಿಪಂದೆ ಕುಲ್ದೆ ಪಂಡ, ಯಾನ್ ಪಾತೆರ್ಂಡ ಅಯಿಕ್ ಪಾತೆರಕತೆ ಶುರು ಆಪುಂಡು. ಅಂಚ ಆವರೆ ಬಲ್ಲಿ ಪಂದ್ ಪಾತೆರ್ದಿಜಿ ಪಂದ್ ಪಂಡೆರ್.

ಇತ್ತೆ ಒಂಜಿ ಮಲ್ಲ ಮುಗಲ್ ಅಡ್ಡ ಬತ್ತಿಲೆಕ ಆತ್‌ಂಡ್. ಉಂದೆನ್ ದೆಪ್ಪೊಡ್. ಉಂದು ಎಂಕ್ಲೆರ್ದ್ ದೆಪ್ಪರೆ ಸಾಧ್ಯ ಇಜ್ಜಿ. ದೇವೆರೇ ದೆಪ್ಪೊಡು. ನೈತಿಕ ಶಕ್ತಿರ್ದ್ ಮಲ್ಲ ಶಕ್ತಿ ಒವ್ಲ ಇಜ್ಜಿ ಪಂದ್ ಖಾವಂದೆರ್ ಪಂಡೆರ್.

ಅಡ್ಯಾರ್ ಡ್ ಆ್ಯಕ್ಸಿಡೆಂಟ್: ಇಂಜಿನಿಯರಿಂಗ್ ವಿದ್ಯಾರ್ಥಿ ತೀರ್‌ಪೋಯೆರ್

ಕುಡ್ಲ: ಮಾರ್ಗದ ತಡಮೆಗ್ ಬೈಕ್ ಗುದ್ದುದು ಇಂಜಿನಿಯರಿಂಗ್ ವಿದ್ಯಾರ್ಥಿಯೊರಿ ಬುಧಾರ ಅಡ್ಯಾರ್ ದಲ್ಪ ತೀರ್‌ ಪೋಯೆರ್.

ಮಹಮ್ಮದ್ ನಶತ್(21 ವ) ತೀರ್‌ಪೋಯಿನ ವಿದ್ಯಾರ್ಥಿ
ಪಂದ್ ಗುರ್ತಿಸಾದೆರ್. ಅಡ್ಯಾರ್ ದ ಸಹ್ಯಾರ್ದಿ ಕಾಲೇಜ್‌ದ ಎದುರು ಈ ಆ್ಯಕ್ಸಿಡೆಂಟ್ ಆತ್ಂಡ್.