ಊರ್ದ ಸುದ್ದಿ Regional News

ಡಾ| ಪುಂಡೂರು ವೆಂಕಟರಾಜ ಪುಣಿಂಚತ್ತಾಯ ಮೆರೆನ ಪುಟ್ಟದಿನನೇ ವಿಶ್ವ ತುಳು ಲಿಪಿ ದಿನ

ಕಾಸ್ರೋಡು: ತಾಡೆಯೋಲೆ, ಶಿಲಾಶಾಸನಡ್ ಇತ್ತಿನ ತುಲು ಲಿಪಿನ್ ಸಂಶೋಧನೆ ಮಲ್ತ್ ದ್ ಜನ ಸಾಮಾನ್ಯೆರ್ಲ ಸುಲಭವಾದ್ ಕಲ್ಪೊಲಿ ಪಂದ್ ತುಲು ಲಿಪಿನ್ ಜಗತ್ತ್ ಗ್ ತೂಪಾದ್ ಕೊರಿನ ತುಳು ಲಿಪಿ ಬ್ರಹ್ಮೆ ಪಂದೇ ಪುಗರ್ತೆ ಪಡೆಯಿನ, ಡಾ|ಪುಂಡೂರು ವೆಂಕಟರಾಜ ಪುಣಿಂಚತ್ತಾಯ ಮೆರೆನ ಪುಟ್ಟದಿನ ಆಚರಣೆ ಅ.10 ಕ್ಕ್ ವಿಶ್ವ ತುಲು ಲಿಪಿ ದಿನತಾನಿ ಜೈ ತುಲುನಾಡ್ (ರಿ.) ಕಾಸ್ರೋಡು ವಲಯದ ಮುತಾಲಿಕೆಡ್, ಪುಣಿಂಚತ್ತಾಯೆರ್ ಕಲ್ತಿನ ಶಾಲೆ ಮಹಾಜನ ಸಂಸ್ಕೃತ ಕಾಲೇಜ್ ನೀರ್ಚಾಲು ಪೆರಡಾಲ ನೆತ್ತ ಒಟ್ಟುಸೇರಿಗೆಡ್ ನಡತ್ಂಡ್.

ಶಾಲೆದ ವ್ಯವಸ್ಥಾಪಕೆರ್ ಜಯದೇವ ಖಂಡಿಗೆ ಮೇರ್ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಬೊಕ್ಕ ಪುವೆಂಪು ಮೆರೆನ ಭಾವಚಿತ್ರಗ್ ಪುಷ್ಪಾರ್ಚನೆ ಮಲ್ತ್ ದ್ ಪಾತೆರ್ದ್, ಪುಣಿಂಚಿತ್ತಾಯ ಮೇರ್ ಮುಲ್ಪ ವಿಧ್ಯಾಭ್ಯಾಸ ಮಲ್ದೆರ್ ಪನ್ಪುನವೇ ಎಂಕ್ಲೆಗ್ ಪೆರ್ಮೆ ಆಪುಂಡು. ಮೆರೆನ ಪುಟ್ಟುಪರ್ಬನ್ ಇನಿ ನಮ್ಮ ಶಾಲೆಡ್ ಜೈ ತುಲುನಾಡ್ (ರಿ.) ಸಂಘಟನೆದಕುಲು ಆಚರಣೆ ಮಲ್ಪುನವು ಕುಸಿ ಆಪುಂಡು ಪಂದ್ ಪಂಡೆರ್.

ಶಾಲೆದ ಮುಖ್ಯೋಪಾಧ್ಯಾಯೆರ್ ಶಿವಪ್ರಕಾಶ್ ಎಂ ಕೆ ಮೇರ್ ಪಾತೆರ್ದ್, ಪುವೆಂಪು ನಮ್ಮ ಶಾಲೆದ ಹಳೆ ವಿದ್ಯಾರ್ಥಿ ಪನ್ಪುನವೇ ಎಂಕ್ಲೆಗ್ ಪೆರ್ಮೆ ಆಪುಂಡು. ಎಂಕ್ಲೆನ ಶಾಲೆಡ್ ಇಂಚಿನ ಒಂಜಿ ಲೇಸ್ ನ್ ಆಯೋಜನೆ ಮಲ್ತ್ ದ್ ಪುವೆಂಪು ಮೆರೆನ ಬಗೆಟ್ಟ್ ಮಸ್ತ್ ತೆರಿಪುಲೆಕ್ಕ ಮಲ್ತಿನ ಜೈ ತುಲನಾಡ್ (ರಿ.) ಸಂಘಟನೆಗ್ ಎಡ್ಡೆ ಅವಡ್, ಎಂಕ್ಲೆನಶಾಲೆಡ್ಲಾ ತುಲು ಭಾಷೆ ತುಲು ಲಿಪಿ ಕಲ್ಪುಲೆಕ್ಕ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಜೈ ತುಲುನಾಡ್ (ರಿ.) ದ ಕಾರ್ಯದರ್ಶಿ ಕಿರಣ್ ತುಲುವೆ ಪಾತೆರ್ದ್, ಸಂಘಟನೆದ ಧ್ಯೇಯೋದ್ದೇಶದ ಬಗೆಟ್ಟ್ ತೆರಿಪಾದ್ ಎಡ್ಡೆಪ್ಪು ಬಯಕಿಯೆರ್.

ಪುವೆಂಪು ಮೆರೆನ ಮಗೆ ವಿಜಯರಾಜ ಪುಣಿಂಚತ್ತಾಯ ಮೇರ್ ಅಮ್ಮೆರೆನ ಸಾಧನೆದ ತಾದಿಗ್ ಬೊಲ್ಪು ಆಯಿನ ಅರೆನ ಗುರು ಖಂಡಿಗೆ ಶ್ಯಾಮ ಭಟ್ ಮೆರೆನ್ ನೆಂಪು ಮಲ್ತ್ ದ್ ಅರೆಗ್ ಕೃತಜ್ಞತೆ ಸಂದಾಯೆರ್. ಬೊಕ್ಕ ಪುವೆಂಪು ಮೆರೆನ ಸಾಹಿತ್ಯ, ಬರವುದ ಬಗೆಟ್ಟ್ ತೆರಿಪಾಯೆರ್.

ಈ ಪೊರ್ತುಡು ಜೈ ತುಲುನಾಡ್ (ರಿ.) ಸಂಘಟನೆದ ಉಪಾಧ್ಯಕ್ಷೆರ್ ಉಮೇಶ್ ಸಾಲಿಯಾನ್ ಸಿರಿಯಾ, ಉದಯ್ ಪೂಂಜ ಬೊಕ್ಕ ಕಾಸ್ರೋಡು ಸರಕಾರಿ ಕಾಲೇಜ್ ದ ಪ್ರಾಧ್ಯಾಪಕೆರ್ ಪ್ರೊ.ಎ ಶ್ರೀನಾಥ್ ಮೊಕುಲು ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್.

ಶಾಲೆದ ಅಧ್ಯಾಪಕಿ ಡಾ/ ವಿದ್ಯಾ ಲಕ್ಷ್ಮಿ ಮೇರ್ ಪುವೆಂಪು ನಡತ್ ಬತ್ತಿನ ತಾದಿ ಬೊಕ್ಕ ಸಾಧನೆದ ಬಗ್ಗೆ ತೆರಿಪಾಯೆರ್. ಅನ್ವಿತ ಬೊಕ್ಕ ಶೈಲಜಾ ಟೀಚರ್ ಪುವೆಂಪು ರಚನೆ ಮಲ್ತಿನ ಪದ್ಯನ್ ಪಂಡೆರ್.

ಜೈ ತುಲುನಾಡ್ (ರಿ.) ಕಾಸ್ರೋಡು ವಲಯದ ಗುರ್ಕಾರ್ದಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಮೇರ್ ಗುರ್ಕಾರ್ಮೆನ್ ಒಯಿಸೊಂದು ಪುವೆಂಪು ಮೆರೆನ ನನಲ ಮುದ್ರಣ ಆವಂದೆ ಒರಿದಿನ ಲೇಖನನ್ ಸರಕಾರ ಸಾಹಿತ್ಯ ಅಕಾಡೆಮಿದ ಮುಖೇನ ಮುದ್ರಣ ಮಲ್ತ್ ದ್ ಅರೆನ ಜ್ಞಾನ ಸಂಪತ್ತ್ ನ್ ಮಾತೆರೆಗ್ಲಾ ತೆರಿಪುಲೆಕ್ಕ ಮಲ್ಪೊಡು ಪಂದ್ ಪಂಡೆರ್.

ಲೇಸ್ ನ್ ಶಾಲೆದ ಜೋಕುಲು ಪ್ರಾರ್ತನೆದ ಮುಖೇನ ಸುರು ಮಲ್ತೆರ್. ಕಾಸ್ರೋಡು ಜೈ ತುಲುನಾಡ್ (ರಿ.) ದ ಉಪಾಧ್ಯಕ್ಷೆರ್ ಶ್ರೀನಿವಾಸ ಆಳ್ವ ಎದ್ಕೊನಿಯೆರ್. ಕೋಶಾಧಿಕಾರಿ ಉತ್ತಮ್ ಯು ಸೊಲ್ಮೆ ಸಂದಾಯೆರ್.

ಈ ಪೊರ್ತುಡು ಮಹಾಜನ ಕಾಲೇಜ್ ದ ವ್ಯವಸ್ಥಾಪಕೆರೆಗ್ ಬೊಕ್ಕ ಮುಖ್ಯೋಪಾಧ್ಯಾಯೆರೆಗ್ ತುಲು ಲಿಪಿ ಕಲಿಕಾ ಕಾರ್ಯಾಗಾರನ್ ನಡಪಾಯೆರೆ ಅನುಮತಿ ಕೊರೊಡು ಪಂದ್ ಬಿನ್ನಾಪು ಸಂದಾಯೆರ್.

ಅಧ್ಯಾಪಕಿ ಶೈಲಜಾ ಲೇಸ್ ದ ಸುಧಾರಿಕೆ ಮಲ್ತೆರ್. ಜೈ ತುಲುನಾಡ್ (ರಿ.) ಕಾಸ್ರೋಡು ಘಟಕದ ಕಾರ್ಯದರ್ಶಿ ಜಗನ್ನಾಥ ಬದಿಯಡ್ಕ, ಮಾನಾದಿಗೆದ ಗುರ್ಕಾರೆ ಹರಿಕಾಂತ ಸಾಲಿಯಾನ್ ಕಾಸ್ರೋಡು ಬೊಕ್ಕ ಪದುಕೆರ್ ವಿನೋದ ಪ್ರಸಾದ್ ರೈ, ಪವಿತ್ರ ಮಾಡ, ನಿರ್ಮಲ ಖಂಡಿಗೆ ಸಹಕಾರ ಕೊರಿಯೆರ್.