Wed. Nov 18th, 2026

ಊರ್ದ ಸುದ್ದಿ Regional News

ಒಂಜಿ ಸಾರ ರೂಪಾಯಿರ್ದ್ ಲ ಎಚ್ಚಾಂಡ್ ಗ್ಯಾಸ್ ದ ಬಿಲೆ

ದೆಲ್ಲಿ: ಕರಿನ 12 ದಿನತ್ತ ಪಿರ 50 ರೂಪಾಯಿ ಎಚ್ಚ ಆಯಿನ ಅಟಿಲ್ದ ಗ್ಯಾಸ್ ದ ಬಿಲೆ ಇತ್ತೆ ಕುಡ ಎಚ್ಚ ಆತ್ಂಡ್. ಎಲ್ ಪಿಜಿ ಸಿಲಿಂಡರ್ ದ ಬಿಲೆ ಗುರುವಾರ 3.5 ರೂಪಾಯಿ ಅಂಚನೆ ವಾಣಿಜ್ಯ ಉದ್ದೇಸದ ಸಿಲಿಂಡರ್ ದ ಬಿಲೆನ್ 8 ರೂಪಾಯಿ ಎಚ್ಚ ಮಲ್ತ್ ದೆರ್.

ಈ ಪಿರವು 999.50 ರೂಪಾಯಿ ಇತ್ತಿನ ಅಟಿಲ್ದ ಸಿಲಿಂಡರ್ ಬಿಲೆ ಇತ್ತೆ 1003 ರೂಪಾಯಿ ಆತ್ಂಡ್. 14.2 ಕೆಜಿ ದ ಸಿಲಿಂಡರ್ ದ ಬಿಲೆ ಮಾತ ರಾಜ್ಯಡ್ ಸಾರ ರೂಪಾಯಿದ ಗಡಿ ದಾಟ್ ದ್ಂಡ್.

ಒಂಜಿ ತಿಂಗೊಲ್ ದ ಪೊರ್ತುಡ್ ಸಿಲಿಂಡರ್ ದ ಬಿಲೆ ಎಚ್ಚ ಆವೊಂದಿಪ್ಪುನವ್ ಉಂದು ರಡ್ಡನೇ ಸರ್ತಿ.

ಎಸ್ ಎಸ್ ಎಲ್‌ಸಿ ಫಲಿತಾಂಶ ಪ್ರಕಟ ಶೇ.85.63 ಜೋಕುಲು ಪಾಸ್

ಎಸ್ ಎಸ್ ಎಲ್‌ಸಿ ಫಲಿತಾಂಶ ಪ್ರಕಟ ಶೇ.85.63 ಜೋಕುಲು ಪಾಸ್

ಕರ್ನಾಟಕ : ಕರ್ನಾಟಕ ರಾಜ್ಯ ಪ್ರೌಢಶಿಕ್ಷಣ ಪರೀಕ್ಷಾ ಮಂಡಳಿ ನಡಪಾಯಿನ ಎಸ್ಎಸ್ಎಲ್ ಸಿ ಪರೀಕ್ಷೆದ ಫಲಿತಾಂಶ ಪ್ರಕಟ ಆತುಂಡು . ರಾಜ್ಯ ಪ್ರಾಥಮಿಕ ಬೊಕ್ಕ ಪ್ರೌಢಶಿಕ್ಷಣ ‌ಮಂತ್ರಿ‌ ಬಿ.ಸಿ ನಾಗೇಶ್ ಇನಿ ಪರೀಕ್ಷಾ ಫಲಿತಾಂಶ ಪ್ರಕಟ ಮಲ್ದೆರ್ .

ಒಟ್ಟು ಕಲ್ಪಾರ್ತಿಲ್ನೆಟ್ ಶೇ.85.63% ಕಲ್ಪಾರ್ತಿಲು ಉತ್ತೀರ್ಣರಾತೆರ್ , 90% ಪೊಣ್ಣುಲು , ಬೊಕ್ಕ 81.63% ಆನುಲು ಪಾಸ್ ಆತೆರ್.

ಮಧ್ಯಾಹ್ನ 1.00 ಗಂಟೆರ್ದ್ ಬೊಕ್ಕ ವೆಬ್ ಸೈಟ್ ಡ್ ಫಲಿತಾಂಶ ಲಭ್ಯ ಆಯೆರೆ ಉಂಡು , ಈ ಲಿಂಕ್ ತೂದು ರಿಸಲ್ಟ್ ತೂವೊಲಿ .
http://kseeb.jar.nic.in, http://SSLC.karnataka.gov.in, http://karresults.nic.in, kar.nic.in ವೆಬ್ಸೈಟ್ ಡ್ ಫಲಿತಾಂಶ ತೂವೊಲಿ . ಐರ್ದ್ ಬೊಕ್ಕ ಮೊಬೈಲ್ ಸಂಖ್ಯೆಗ್ ಲಾ ಸಂದೇಶ ಬರ್ಪುಂಡು .

ಮೇ 20 ರಾಜ್ಯೋಡು ಬುಡುಗಡೆ ಆಯರೇ ಉಂಡು “ರಾಜ್ ಸೌಂಡ್ ಆಯಂಡ್ ಲೈಟ್ಸ್ ” ತುಳು ಪಿಚ್ಚರ್

ಕುಡ್ಲ : ವೈಭವ ಫ್ಲಿಕ್ಸ್ ಅಡಿಟ್ ಮ್ಯಾಂಗೋ ಪಿಕ್ಕಲ್ ಬ್ಯಾನರ್ ಒಟ್ಟು ಸೇರಿಗೆಡ್ ತಯಾರ್ ಆಯಿನ ರಾಜ್ ಸೌಂಡ್ ಆಯಂಡ್ ಲೈಟ್ಸ್ ತುಳು ಪಿಚ್ಚರ್ 11 ಪರ ಊರುಡು ಅಂಚನೆ ದೇಶದ 6 ಕಡೆಟ್ ಮೇ 13, 14,15 ಕ್ಕ್ ಪ್ರೀಮಿಯರ್ ಯಶಸ್ವಿಯಾದ್ ಪ್ರದರ್ಶನ ತೊಜೀದ್ ಬೈದುಂಡು .

‘ಒಂದು ಮೊಟ್ಟೆಯ ಕಥೆ’ ಚಿತ್ರ ಕೂಟದ ಮುತಾಲಿಕೆಡ್ ವೈಭವ್ ಫ್ಲಿಕ್ಸ್ ಅಡಿಟ್ , ಮ್ಯಾಂಗೋ ಪಿಕಲ್ ಬ್ಯಾನರ್ ಒಟ್ಟು ಸೇರಿಗೆಡ್ ರಾಜ್ ಸೌಂಡ್ಸ್ ಆಂಡ್ ಲೈಟ್ಸ್ ತುಳು ಚಿತ್ರ ನಿರ್ಮಾಣನ್ ಮೇ 20 ತಾರಿಕ್ ಗ್ ಕುಡ್ಲಡ್ ಬುಡುಗಡೆ ಆಯೆರೆ ಉಂಡು.

ತುಲುನಾಡ್ಡ್ ಮಾತ್ರ ಅತ್ತoದೆ ಪರ ಊರುಡುಲಾ ತುಳು ಪುಗಾರ್ತೆ ಪಡೆತುಂಡು . ಈ ಪಿಚ್ಚರ್ ಮದಿಮೆ ಬೊಕ್ಕ ಮದರಂಗಿ ಲೇಸ್ ದ ಕಥೆ ಆಧಾರಿತ ಆದ್ ಉಂಡು , ನೈಜತೆಗೆ ಒತ್ತು ಕೊರ್ದು ಎಡ್ಡೆ ರೀತಿಡ್ ಚಿತ್ರ ನಿರ್ಮಾಣ ಮಲ್ದೆರ್.

ಈ ಪಿಚ್ಚರ್ ನ್ ಯುವ ನಟ ರಾಹುಲ್ ಅಮಿನ್ ನಿರ್ದೇಶನ ಮಲ್ದೆರ್ , ಆನಂದ್ ಎನ್ ಕುಂಪಲ, ನಿರ್ಮಾಪಕೆರಾದ್ . ಈ ಸಿನೆಮಾದ ಕಥೆನ್ ವಿನೀಶ್ ಕುಮಾರ್ ಬೊಕ್ಕ ಸಂಭಾಷಣೆನ್ ಗಿರಿಗಿಟ್ ಚಿತ್ರ ಖ್ಯಾತಿದ ಪ್ರಸನ್ನ ಶೆಟ್ಟಿ ಬೈಲೂರು ಬರೆತೆರ್ . ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಪಡ್ಡಾಯಿ ಚಿತ್ರ ಖ್ಯಾತಿಯ ಕ್ಯಾಮರಾಮೆನ್ ವಿಷ್ಣುಪ್ರಸಾದ್ ಮೇರ್ ಚಿತ್ರೀಕರಣ ಮಲ್ದೆರ್ . ಸಂಗೀತ ನಿರ್ದೇಶಕೆರಾದ್ ಸೃಜನ್ ಕುಮಾರ್ ತೋನ್ಸೆ, ನವೀನ್ ಶೆಟ್ಟಿ ನೃತ್ಯ ಸಂಯೋಜನೆ ಮಲ್ದೆರ್ . ಚಿತ್ರಕಥೆನ್ ವಿನೀತ್‌ ಕುಮಾರ್‌ ಬೊಕ್ಕ ರಾಹುಲ್ ಅಮೀನ್ ಬರೆತೆರ್ .

ರಾಜ್ ಸೌಂಡ್ಸ್ & ಲೈಟ್ಸ್’ ತುಳು ಚಲನಚಿತ್ರ ಯುಎಸ್ ಎ, ಲಂಡನ್, ಬಹ್ರೇನ್, ಕುವೈತ್, ನೈಜೀರಿಯಾ, ಜಾಂಬಿಯಾ, ಸೌದಿ ಅರೇಬಿಯಾ, ಇಸ್ರೇಲ್, ಕತಾರ್, ಯುಎಇ ಬೊಕ್ಕ ಒಮಾನ್ ರಾಷ್ಟ್ರಡ್ ಪ್ರೀಮಿಯರ್ ಶೋ ಆಯೆರೆ ಉಂಡು .

ನಾಯಕೆ ಆದ್ ವಿನೀತ್ ಕುಮಾರ್‌, ನಾಯಕಿಯಾದ್ (ಪೊಸ ಪರಿಚಯ) .ಯಶ ಶಿವಕುಮಾರ್ ಬೊಕ್ಕ ನಾಯಕಿ, ಕರಿಷ್ಮಾ ಆಮೀನ್ ಅಭಿನಯ ಮಲ್ದೆರ್ . ತಾoರಾಗಣಡ್ ಹಾಸ್ಯ ದಿಗ್ಗಜೆರಾಯಿನ ನವೀನ್ ಡಿ ಪಡೀಲ್, ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರು ಬೊಕ್ಕ ಸತೀಶ್ ಬಂದಲೆ , ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ, ಮರ್ವಿನ್ ಉಮೇಶ್ ಮಿಜಾರ್, ರವಿ ರಾಮಕುಂಜ, ಚೈತ್ರ ಶೆಟ್ಟಿ ಬೊಕ್ಕ ಬೇತೆ ಕಲಾವಿದೆರ್ ಉಲ್ಲೆರ್.

ಮೇ 24ಕ್ಕ್ ಬುಡುಗಡೆ ಆಯೆರೆ ಉಂಡು “ಸ್ವರ್ಗದ ಸಿರಿ ” ತುಳು ಭಕ್ತಿ ಗೀತೆ

ಮೇ 24ಕ್ಕ್ ಬುಡುಗಡೆ ಆಯೆರೆ ಉಂಡು “ಸ್ವರ್ಗದ ಸಿರಿ ” ತುಳು ಭಕ್ತಿ ಗೀತೆ

ಕುಡ್ಲ : ದಯಾ ಕ್ರಯೇಷನ್ ಅರ್ಪಣೆ ಮಲ್ಪುನ “ಸ್ವರ್ಗ ದ ಸಿರಿ ” ಪನ್ಪಿನ ತುಳು ಭಕ್ತಿ ಗೀತೆದ ಪೋಸ್ಟರ್ ಶ್ರೀ ಕ್ಷೇತ್ರ ಕುಕ್ಕಾಜೆದ ಧರ್ಮದರ್ಶಿ ಶ್ರೀ ಶ್ರೀಕೃಷ್ಣ ಗುರೂಜಿನ ಶುಭ ಆಶೀರ್ವಾದಡ್ ಬುಡುಗಡೆ ಆಂಡ್.

“ಸ್ವರ್ಗ ದ ಸಿರಿ ” ಪನ್ಪಿನ ಈ ಪದಕ್ ಕೆ.ಶಶಿಕಲಾ ಭಾಸ್ಕರ್
ದೈಲಾ ಬಾಕ್ರಬೈಲ್ ಸಾಹಿತ್ಯ ಬರೆತೆರ್ . ನಂದಿನಿ ಸುದರ್ಶನ್ ವರ್ಕಾಡಿ ಕಂಠ ಸಿರಿಡ್ ಮೂಡ್ದು ಬರ್ಪಿನ ಈ ಭಕ್ತಿ ಗೀತೆದ ಸಮಗ್ರ ನಿರ್ವಹಣೆ ದಯಾನಂದ ಅಮೀನ್ ಬಾಯಾರ್ ಮಲ್ದೆರ್ . ರವಿ ಎಸ್ ಎಮ್ ಕುಕ್ಕಾಜೆ ಸಹಕಾರ ಕೊರಿಯೆರ್ ಪ್ರಚಾರ ಕಲೆ&ಸಂಕಲನ ರಿತೇಶ್ ಸೂಪಲಚ್ಚಿಲ್ ಕೊರ್ತೆರ್.


ಈ ತುಳು ಭಕ್ತಿ ಗೀತೆ ಮೇ 24 ಕ್ಕ್ ಶ್ರೀ ಕ್ಷೇತ್ರ ಕುಕ್ಕಾಜೆ ಕಾಳಿಕಾಂಬ ಆಂಜನೇಯ ದೇವಲ್ಯಡ್ ಬುಡುಗಡೆ ಆಯೆರೆ ಉಂಡು ಅಂಚನೆ
ದಯಾ ಕ್ರಿಯೇಷನ್ ಯೂಟ್ಯೂಬ್ ಚಾನಲ್ ಡ್ ಬರಿಯೆರೆ ಉಂಡು .

ಪೋವೊಂದು ಇತ್ತಿನ ಗಾಡಿಡೇ ಉಸುಲು ಉಂತಾಯಿನ ಒಡಿಪುದ ಮೀನುಗಾರೆ

ಒಡಿಪು : ಮೀನುಗಾರಿಕೆ ಮಲ್ತ್ ಸ್ಕೂಟರ್ ಡ್ ಪಿರವು ಕುಲ್ದು ಇಲ್ಲಗ್ ಪೋವೊಂದು ಉಪ್ಪುನಗ ತಿಗಲೆ ಬೇನೆಡ್ ಮೀನುಗಾರೆ ಒರಿ ತೀರ್ ಪೋಯಿನ ಘಟನೆ ಮಲ್ಪೆ ಕಂಬಳತೋಟ ಜಾಗೆಡ್ ನಡತುಂಡು.

ಮಲ್ಪೆ ಕಂಬಳತೋಟ ನಿವಾಸಿ 32 ವರ್ಷದ ಪ್ರತಾಪ್ ತೀರ್ ಪೋಯಿನ ಮೀನುಗಾರೆ.
ಮೇರ್ ಕಾಂಡೆ ಮೀನುಗಾರಿಕೆ ಮುಗಿತ್ ಅಕ್ಕನ ಮಗೆ ಕಿರಣ್ ಪನ್ಪಿನರೆನ ಸ್ಕೂಟರ್ ಡ್ ಪಿರವು ಕುಲ್ದು ಇಲ್ಲಗ್ ಪೋವೊಂದು ಇತ್ತೆರ್ . ಈ ಪೊರ್ತುಡು ಪ್ರತಾಪ್ ದಿಢೀರ್‌ ಅಸ್ವಸ್ಥೆರಾದ್ ಕಿರಣ್ ನ ಮೈತ ಮಿತ್ತ್ ಬೂರಿಯೆರ್ . ಅಪಗನೆ ಕಲ್ಯಾಣಪುರ ಗೊರಾಠಿ ಆಸ್ಪತ್ರೆಗ್ ಲೆತೊಂದು ಪೋತೆರ್ ಅಲ್ಪರ್ದ್ ಎಚ್ಚದ ಚಿಕಿತ್ಸೆಗ್ ಒಡಿಪು ಹೈಟೆಕ್ ಆಸ್ಪತ್ರೆಗ್ ಲೆತೊಂದು ಬೈದೆರ್ ಆಂಡ ಅಲ್ಪ ತೂಯಿನ ವೈದ್ಯೆರ್ ಪ್ರತಾಪ್ ತೀರ್ ಪೋಯಿನ ಇಚಾರ ತೆರಿಪಾಯೆರ್.

ಕುಡ್ಲಡ್ ಇನಿ ಬೊಕ್ಕ ಎಲ್ಲೇ ಮಸ್ತ್ ಕಡೆಟ್ಟ್ ಕರೆಂಟ್ ಇಪ್ಪುಜಿ

ಕುಡ್ಲ: ನೆಹರೂ ಮೈದಾನ ಉಪಕೇಂದ್ರದರ್ದ್ ಪಿದಡುನ 11ಕೆವಿ ಮಾರ್ಕೆಟ್ ಫೀಡರ್‌ ಡ್ ಜಂಪರ್ ಬದಲ್ ಮಲ್ಪುನ ಅಂಚನೆ ಜಿ.ಓ.ಎಸ್ ದುರಸ್ತಿ ಕಾಮಗಾರಿದ ಬೇಲೆ ನಡತ್ತೊಂದ್ ಇಪ್ಪುನ ಕಾರಣಗ್ ಎಲ್ಲೇ ಕಾಂಡೆ 10 ಗಂಟರ್ದ್ ಬಯ್ಯಗ್ 5 ಗಂಟೆ ಮುಟ್ಟ ಲೇಡಿಗೋಷನ್ ಆಸ್ಪತ್ರೆ, ಸೆಂಟ್ರಲ್ ಮಾರ್ಕೆಟ್, ಶಾಂತದುರ್ಗಾ, ಜೆ.ಹೆಚ್.ಎಸ್. ರಸ್ತೆ, ಪಿ.ಎಂ. ರಾವ್ ರೋಡ್ ಅಂಚನೆ ಕೈತಲ್ ದ ಮಸ್ತ್ ಪ್ರದೇಶಲೆಡ್ ಕರೆಂಟ್ ಇಪ್ಪುಜಿ.

ಅವ್ವೇ ರೀತಿಡ್ ಅತ್ತಾವರ ಉಪಕೇಂದ್ರರ್ದ್ ಪಿದಡುನ 11ಕೆವಿ ವಿಶ್ವಭವನ ಫೀಡರ್‍ ಡ್ ಜಂಪರ್ ಬದಲ್ ಮಲ್ಪುನ ಬೇಲೆ ಅಂಚನೆ ಜಿ.ಓ.ಎಸ್ ದುರಸ್ತಿ ಕಾಮಗಾರಿ ನಡೆತ್ತೊಂದ್ ಇಪ್ಪುನ ಕಾರಣ ಮೇ 21 ಗ್ ಕಾಂಡೆ 10-5 ಗಂಟೆ ಮುಟ್ಟ ಓಲ್ಡ್ ಬಸ್‍ಸ್ಟ್ಯಾಂಡ್, ಕೆ.ಎಸ್.ರಾವ್ ರೋಡ್, ಹಂಪನಕಟ್ಟೆ, ಶರವು ಟೆಂಪಲ್ ರೋಡ್ ಅಂಚನೆ ಕೈತಲ್ ದ ಮಸ್ತ್ ಪ್ರದೇಶಲೆಡ್ ಕರೆಂಟ್ ಇಪ್ಪುಜಿ.

ಕುಲಶೇಖರ ಉಪಕೇಂದ್ರರ್ದ್ ಪಿದಡುನ 11ಕೆವಿ ಅಡ್ಯಾರ್ ಬೊಕ್ಕ 11ಕೆವಿ ಕಣ್ಣೂರು ಫೀಡರ್ ಲೆಡ್ ಜಂಪರ್ ಬದಲ್ ಮಲ್ಪುನ ಬೇಲೆ ಅಂಚನೆ ಜಿ.ಓ.ಎಸ್ ದುರಸ್ತಿ ಕಾಮಗಾರಿ ಇತ್ತಿನ ಕಾರಣ ಮೇ 21ಕ್ಕ್ ಕಾಂಡೆ 10 – 5 ಗಂಟೆ ಮುಟ್ಟ ಅಡ್ಯಾರ್, ಅಡ್ಯಾರ್ ಪದವು, ವಳಚ್ಚಿಲ್, ವಳಚ್ಚಿಲ್ ಪದವು, ಅರ್ಕುಳ, ಮೇರ್ಲಪದವು, ಮೇರೆಮಜಲು, ತುಪ್ಪೆಕಲ್ಲು, ಕಣ್ಣೂರು, ಕೊಡಕ್ಕಲ್, ಬಲ್ಲೂರು, ಚೆಕ್ಪೋಸ್ಟ್ ಅಂಚನೆ ಕೈತಲ್ ದ ಮಸ್ತ್ ಪ್ರದೇಶಲೆಡ್ ಕರೆಂಟ್ ಇಪ್ಪುಜಿ ಪಂದ್ ಮೆಸ್ಕಾಂ ಪ್ರಕಟಣೆಡ್ ತೆರಿಪಾದ್ಂಡ್.

ಶ್ರೀ ಸುಬ್ರಮಣ್ಯ ದೇವಲ್ಯ ತೋಕೂರು : ಪಾದುಕಾನ್ಯಾಸ

ಹಳೆಯಂಗಡಿ : ಶ್ರೀ ಸುಬ್ರಮಣ್ಯ ದೇವಲ್ಯ ತೋಕೂರು ಹಳೆಯಂಗಡಿಡ್ ತಾರಿಕ್ 20/5/2022 ನೇ ಶುಕ್ರಾರದಾನಿ ಕಾಂಡೆ 8 ಗಂಟೆಗ್ ಶ್ರೀ ದೇವೆರ್ನ ಪೊಸ ಶಿಲಾಮಯ ಗರ್ಭಗೃಹ ನಿರ್ಮಾಣದ ಸುರುತ ಹಂತದ ಪಾದುಕಾನ್ಯಾಸ ಬೊಕ್ಕ ಅವ್ವೆ ದಿನ ಬಯ್ಯಗ್ 6:58 ನೇ ವೃಶಿಕ ಲಗ್ನಡ್ ಅಷ್ಟೇಷ್ಟಿಕಾ ಸಹಿತ ಗರ್ಭಪಾತ್ರನ್ಯಾಸ ದೇವಲ್ಯದ ತಂತ್ರಿಲಾಯಿನ ವೇದಮೂರ್ತಿ ಶ್ರೀ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ನಡಪೆರೆ ಉಂಡು.

ಈ ಪುಣ್ಯ ಕಜ್ಜಡ್ ಪಾಲ್ ಪಡೆಯೋಡು ಪಂಡ್ ದೇವಲ್ಯದ ಜೀರ್ಣೋದ್ದಾರ ಸಮಿತಿದ ಗುರ್ಕಾರ್ಲಾಯಿನ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲಾಯಿನ ಹರಿದಾಸ್ ಬೊಕ್ಕ ಸರ್ವ ಸದಸ್ಯೆರ್ ಬಿನ್ನಾಪು ಮಲ್ದೆರ್.

ಶ್ರೀ ಮಾರಿಯಮ್ಮ ದೇವಲ್ಯ ಕೌಡೂರು : ಪರಕೆದ ಮಾರಿಪೂಜೆ

ಬೈಲೂರು : ತಾರಿಕ್ 31/5/2022 ನೇ ಅಂಗಾರೆ ಬಯ್ಯಗ್ 7:30 ಗಂಟೆರ್ದ್ ಶ್ರೀ ಮಾರಿಯಮ್ಮ ದೇವಲ್ಯ ಕೌಡೂರು ಬೈಲೂರುಡು ದೇವಿಗ್ ಪರಕೆದ ಮಾರಿಪೂಜೆ ಬೊಕ್ಕ ಅಪ್ಪೆನ ಮೆರವಣಿಗೆ ಅಂಚನೆ ತಾರಿಕ್ 1/5/2022 ನೇ ಬುಧಾರದಾನಿ ಬಯ್ಯಗ್ 5 ಗಂಟೆಗ್ ದೇವಿನ ವಿಸರ್ಜನಾ ಮೆರವಣಿಗೆ ನಡಪೆರೆ ಉಂಡು.

ಇನಿ ಶಾಲೆಗ್ ರಜೆ; ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ

ಕುಡ್ಲ, ಮೇ 19: ದಕ್ಷಿಣ ಕನ್ನಡ ಜಿಲ್ಲೆಡ್ ಭಾರೀ ಬರ್ಸ ಬರೊಂದಿಪ್ಪುನ ಕಾರಣ ಜೋಕ್ಲೆನ ಎಡ್ಡೆ ದೃಷ್ಟಿರ್ದ್ ಸರ್ಕಾರಿ, ಅನುದಾನಿತ, ಪ್ರಾಥಮಿಕ ಅಂಚನೆ ಫ್ರೌಡ ಶಾಲೆಲೆಗ್ ಮೇ 19 ತಾರೀಕ್ ಗುರುವಾರದಾನಿ ಒಂಜಿ ದಿನತ್ತ ರಜೆನ್ ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ. ಆದೇಶ ಮಲ್ತ್ ದೆರ್.

ಬಿರುವೆರೆ ಆಸೋಸಿಯೇಷನ್ ಬೆಂಗ್ಳೂರು : ಸಾಮೂಹಿಕ ಸತ್ಯನಾರಾಯಣ ಪೂಜೆ ಬೊಕ್ಕ ಮಹಿಳಾ ದಿನಾಚರಣೆ 2022

ಬಿರುವೆರೆ ಆಸೋಸಿಯೇಷನ್ ಬೆಂಗ್ಳೂರು : ಸಾಮೂಹಿಕ ಸತ್ಯನಾರಾಯಣ ಪೂಜೆ ಬೊಕ್ಕ ಮಹಿಳಾ ದಿನಾಚರಣೆ 2022

ಬೆಂಗ್ಳೂರು : ಬಿರುವೆರೆ ಆಸೋಸಿಯೇಷನ್ ಬೆಂಗ್ಳೂರು ವತಿರ್ದ್ ತಾರಿಕ್ 29/5/2022 ನೇ ಐತಾರ ಕಾಂಡೆ 9 ಗಂಟೆಗ್ ಬಿಲ್ಲವ ಭವನ ದೇವಕಿ ಆನಂದ ಸುವರ್ಣ ಕಂನ್ವೇಷನ್ ಹಾಲ್ ಡ್ ಸಾಮೂಹಿಕ ಸತ್ಯನಾರಾಯಣ ಪೂಜೆ ಬೊಕ್ಕ ಮಹಿಳಾ ದಿನಾಚರಣೆ 2022 ನಡಪರೆ ಉಂಡು.

ಕೇಂದ್ರ ಸರ್ಕಾರದ ಕೃಷಿ ಬೊಕ್ಕ ರೈತೆರ್ನ ಕಲ್ಯಾಣ ಇಲಾಖೆದ ರಾಜ್ಯ ಸಚಿವೆರಾಯಿನ ಶೋಭಾ ಕರಂದ್ಲಾಜೆ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್. ಸನ್ಮಾನ್ಯ ಶಾಸಕೆರ್ ಬೊಮ್ಮನಹಳ್ಳಿ ಕ್ಷೇತ್ರ ದ ಸನ್ಮಾನ್ಯ ಶ್ರೀ ಸತೀಶ್ ರೆಡ್ಡಿ ಲೇಸ್ ದ ಗುರ್ಕಾರ್ಮೆ ವಹಿಸರೆ ಉಲ್ಲೆರ್.