ಊರ್ದ ಸುದ್ದಿ Regional News

ಜ.8: ಬೈಲು ಮೂಡುಕರೆ ಕುಟುಮದ ಪೊಸ ಇಲ್ಲದ ಇಲ್ಲ್ ಒಕ್ಕೆಲ್

ಗುರುಪುರ: 300 ವರ್ಷದ ಪರಪೋಕು ಇಪ್ಪುನ ಬೈಲುಮೂಡುಕರೆ ಕುಟುಮದ ಪೊಸ ಇಲ್ಲದ ಇಲ್ಲ್ ಒಕ್ಕೆಲ್ ಜನವರಿ 7 ಬೊಕ್ಕ 8 ತಾರೀಕ್‌ಗ್ ಭಾರೀ ಗೌಜಿಡ್ ನಡಪರೆ ಉಂಡು.

ಈ ಬಗೆಟ್ಟ್ ಇನಿ ಬೈಲುಮೂಡುಕರೆ ಇಲ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಬೈಲುಮೂಡುಕರೆ ಇಲ್ಲದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಶೆಡ್ಯೆ ಮಂಜುನಾಥ ಭಂಡಾರಿ ಪಾತೆರ್ದ್, 300 ವರ್ಷದ ಪರಪೋಕು ಇಪ್ಪುನ ಈ ಇಲ್ಲ್‌ನ್ 17 ನೇ ಶತಮಾನಡ್ ನಿರ್ಮಾಣ ಮಲ್ತ್‌ದಿತ್ತೆರ್.

ಬೈಲು ಮೂಡುಕರೆ ಕುಟುಮ ಬಂಟ ಸಮಾಜಡ್ ಪ್ರತಿಷ್ಠಿತ ತಾನೊನು ಪಡೆಪುಂಡ್. ಈ ಕುಟುಮದಕುಲು ಸತ್ಯವಂತೆರ್, ಸಾಹಸಿಲು, ದಾನಿಲು ಅಂಚನೆ ಬೆನ್ಪುನಕುಲು ಆತೆರ್. ಮೊಕುಲು ದೈವದ ಬಗ್ಗೆ ನಂಬುದಿತ್ತ್‌ದ್ ಅಕ್ಲೆನ ಸ್ವಂತ ನಿಲೆಟ್ಟ್ ದೇವಸ್ಥಾನ, ದೈವಸ್ಥಾನ, ದೈವದ ಚಾವಡಿ, ನಾಗಬನ ಉಂದೆನ್ ಪೂರ ನಿರ್ಮಾಣ ಮಲ್ತ್‌ದ್ ಊರುದಕುಲು ಪೂಜೆ ಮಲ್ತೊಂದು ಬರೊಂದುಲ್ಲೆರ್.

ಈ ಇಲ್ಲಡ್ ಕಲ್ಲ್‌ದ ಕಂಬ, ಮಣ್ಣ್‌ದ ಗೋಡೆ, ನಾಲ್ ಸುತ್ತಲ ಪಾಗಾರ, ಲ ಕೊಟ್ಯ ಉಂಡು. ಇಲ್ಲದ ಎದುರು ಮಲ್ಲ ಕೆರೆ, ನಾಲ್ ಸುತ್ತಲ ಬಾರ್ ಬುಳೆಪುನ ಕಂಡ, ನಾಗ ಬನ, ಮಾಗಣೆದ ಎದುರು ದೈವದ ತಾನೊ ಉಂಡು. ಆಯತ ಆಕಾರಡ್ ಇಪ್ಪುನ ಈ ಇಲ್ಲದ ಮಿತ್ತ ಮಾಳಿಗೆಡ್ 7 ಕೋಣೆಲು, ಚಾವಡಿಡ್ ಮಲ್ಲ ಪಿರಾಕ್‌ದ ಉಯ್ಯಾಲೆ ಉಂಡು. ಪಿರಾವುದ ಕಾಲಡ್ ರಾಜ ವಂಶಸ್ಥೆರೆನ ಇಲ್ಲಡ್ ಮಾತ್ರ ಇಂಚಿನ ಉಯ್ಯಾಲೆ ಇಪ್ಪರೆ ಸಾಧ್ಯ ಪಂದ್ ಪಂಡೆರ್.

ಜ.8 ತಾರೀಕ್‌ಗ್ ಕಾಂಡೆ 11.30 ಗ್ ಬೈಲುಮೂಡುಕರೆ ದಿ| ಚಂದ್ರಶೇಖರ ಶೆಟ್ಟಿ ವೇದಿಕೆಡ್ ಬೈಲುಮೂಡುಕರೆ ಇಲ್ಲದ ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಲೇಸ್ ನಡಪರೆ ಉಂಡು. ಗುರುಪುರ ವಜ್ರದೇಹಿ ಮಠದ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಮಲ್ಪರೆ ಉಲ್ಲೆರ್. ಕುಡ್ಲ ಉತ್ತರ ಶಾಸಕೆರ್ ವೈ.ಭರತ್ ಶೆಟ್ಟಿ, ಆಳ್ವಾಸ್ ಎಜುಕೇಶನ್ ಫೌಂಡೇಶನ್ ದ ಡಾ| ಎಂ.ಮೋಹನ್ ಆಳ್ವ, ವಿಧಾನ ಪರಿಷತ್ ಸದಸ್ಯೆರ್ ಮಂಜುನಾಥ ಭಂಡಾರಿ, ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಸೇರಿನಂಚನೆ ಮಸ್ತ್ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಪತ್ರಿಕಾಗೋಷ್ಠಿಡ್ ಶೆಡ್ಯೆ ಮಂಜುನಾಥ್ ಭಂಡಾರಿ ಬೈಲು ಮೂಡುಕರೆ, ಹರೀಶ್ ಶೆಟ್ಟಿ, ದೇವದಾಸ ನಾಯ್ಕ್, ಸತೀಶ್ ಆಳ್ವ, ಭುಜಂಗ ಶೆಟ್ಟಿ ಇತ್ತೆರ್.

ಡಿ.28: ತೋಕೂರುಡು ಕಟೀಲ್ ಮೇಳದ ಕಲಾವಿದೆರೆರ್ದ್ ಶ್ರೀ ದೇವಿ ಲಲಿತೋಪಖ್ಯಾನ ಆಟ

ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕುಲು ಡಿ.28 ಬುಧಾರ ಬಯ್ಯಗ್ 5:45 ಕ್ ಶ್ರೀ ಸುಬ್ರಹ್ಮಣ್ಯ ದೇವೆರೆನ ಕಿರು ಷಷ್ಠಿದ ಲೆಕ್ಕೊಡು ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಎದುರು ಭಾಗಡ್ ಪಾಡಿನ ರಂಗಮಂಟಪಡ್ 13ನೇ ವರ್ಷದ “ಶ್ರೀ ದೇವಿ ಲಲಿತೋಪಖ್ಯಾನ” ಆಟ ನಡಪರೆ ಉಂಡು.

ಈ ಲೇಸ್ ಗ್ ಕಲಾಭಿಮಾನಿಲು ಆಯಿನ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ತೋಕೂರು ಯಕ್ಷ ಕಲಾರಂಗ, ಊರುದ ಪರವೂರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮುಲ್ಕಿ ಸಮುದಾಯ ಆರೋಗ್ಯ ಕೇಂದ್ರದ ಜಾಗೆಡ್ ಸ್ವಚ್ಛ ಮಲ್ತಿನ ಯುವ ಪಡೆ

ಮಾರ್ಗದ ಗುಂಡಿ ಮುಚ್ಚಿದ್ ಪುಗರ್ತೆ ಪಡೆಯಿನ ಮುಲ್ಕಿದ ಯುವ ಪಡೆ ಸದಸ್ಯೆರ್ ಸೇರ್ದ್ ಮುಲ್ಕಿ ಸಮುದಾಯ ಆರೋಗ್ಯ ಕೇಂದ್ರದ ಜಾಗೆಡ್ ಇತ್ತಿನ ಪಜೀರ್‌ನ್ ಶ್ರಮದಾನದ ಮುಕೇನ ದೆತ್ತ್ ದ್ ಸ್ವಚ್ಛ ಮಲ್ತೆರ್.

ಯುವ ಪಡೆ ಮುಲ್ಕಿದ ಸದಸ್ಯೆರಾಯಿನ ಸುಪ್ರೀತ ಪುನರೂರ್, ರಮೇಶ್, ಸಚಿನ್ ಬೊಕ್ಕ ಸಂಪತ್ ಸೇರ್ದ್ ಆ ಜಾಗೆಡ್ ಇತ್ತಿನ ಪಜೀರ್‌ನ್ ಮಿಶನ್ ಅಂಚನೆ ಕತ್ತಿರ್ದ್ ದೆತ್ತ್‌ದ್ ಕಜವುನು ಪೂರ ಕಜವುದ ಡಬ್ಬೆಗ್ ಪಾಡ್ದ್ ವಠಾರನ್ ಅಡ್ತ್‌ದ್ ಸ್ವಚ್ಛ ಮಲ್ತೆರ್.

ಅಕುಲ್ನೊಟ್ಟುಗು ಜೋನ್ ಕ್ವಾಡ್ರಸ್ ಮುಲ್ಕಿ, ಅಬ್ದುಲ್ ಸಮದ್ ಕಿನ್ನಿಗೋಳಿ ಅಂಚನೆ ಜಾಸಿಂತಾ ಡಿ’ಸೋಜಾ ಕಿಲ್ಪಾಡಿ ಮೊಕುಲು ಸಕಾಯನ್ ಮಲ್ತ್‌ದೆರ್.