ಬೆದ್ರದ ಮೊಸರು ಕುಡಿಕೆ ಉಚ್ಚಯದ ಲೆಕ್ಕೊಡು ಜವನೆರ್ ಬೆದ್ರ ಅರ್ಪಣೆ ಮಲ್ಪುನ ಕೃಷ್ಣೋತ್ಸವ ಯಕ್ಷ ಸಂಭ್ರಮ 2023 ಲೇಸ್ ಡ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಕೂಟದ ಸಮಾಜ ಸೇವೆನ್ ಗುರುತಿಸಾದ್ ಈ ಸಂಸ್ಥೆಗ್ ಕೃಷ್ಣೋತ್ಸವ ಪ್ರಶಸ್ತಿನ್ ಕೊರಿಯೆರ್.
ಈ ಲೇಸ್ (ಸೆ.7) ಕೋಡೆ ಬಯ್ಯಗ್ ಬೆದ್ರ ಅಮರನಾಥ ಶೆಟ್ಟಿ ವೃತ್ತದ ಕೈತಲ್ ದ ಭಾಗವತ ಬಲಿಪ ನಾರಾಯಣ ವೇದಿಕೆಡ್ ನಡತ್ಂಡ್.
ಒಡಿಪು: ಬೊಂಬೈರ್ದ್ ರಾತ್ರೆದ ಪೊರ್ತು ಊರುಗು ಬತ್ತಿನ ಒಂಜಿ ಜನ ಇಲ್ಲದ ಪಿದಯಿ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಗುರುವಾರ ಅಂಬಾಗಿಲು ಪೇರಂಪಲ್ಲಿದ ಕಕ್ಕಿಂಜೆ ದೇವಿನಗರಡ್ ನಡತ್ಂಡ್.
ತೀರ್ ಪೋಯಿನಾರ್ ದೇವಿನಗರದ ಸುಕೇಶ್ ಶೆಟ್ಟಿ(51) ಪಂದ್ ತೆರಿದ್ ಬೈದ್ಂಡ್. ಮೇರ್ ಬೊಂಬೈಡ್ ಹೋಟೆಲ್ ಒಂಜೆಟ್ ಕೆಲಸ ಮಲ್ತೊಂದು ಇತ್ತೆರ್. ಮೆರೆನ ಆತ್ಮಹತ್ಯೆಗ್ ಕಾರಣ ನನ ಗೊತ್ತಾವೊಡಾತೆ.
ಮೆರೆನ ಪುನನ್ ಮಣಿಪಾಲ ಶವಾಗಾರಗ್ ಕೊನೊಯೆರೆ ಸಮಾಜ ಸೇವಕೆ ನಿತ್ಯಾನಂದ ಒಳಕಾಡು ಸಹಕಾರ ಕೊರಿಯೆರ್. ಈ ಘಟನೆದ ಜಾಗೆಗ್ ಮಣಿಪಾಲ ಪೊಲೀಸೆರ್ ಬತ್ತ್ ದ್ ಪರಿಶೀಲನೆ ನಡಪಾದೆರ್.
ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 24ನೇ ಅವಧಿದ ಮೇಯರ್ ಆದ್ ಸುಧೀರ್ ಶೆಟ್ಟಿ ಕಣ್ಣೂರು ಬೊಕ್ಕ ಉಪಮೇಯರಾದ್ ಸುನೀತಾ ಸಾಲಿಯಾನ್ ಆಯ್ಕೆ ಆತೆರ್.
ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಇನಿ ನಡತಿನ ವೋಟುಡು ಆಡಳಿತರೂಢ ಬಿಜೆಪಿರ್ದ್ ಮೇಯರ್ ತಾನಗ್ ಸುಧೀರ್ ಶೆಟ್ಟಿ ಬೊಕ್ಕ ಉಪ ಮೇಯರ್ ತಾನಗ್ ಸುನೀತಾ ಸಾಲಿಯಾನ್ ನಾಮಪತ್ರ ಸಂದಾದಿತ್ತೆರ್. ಅಂಚೆನೆ ಪ್ರತಿಪಕ್ಷ ಕಾಂಗ್ರೆಸ್ ರ್ದ್ ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಅಭ್ಯರ್ಥಿಲೆನ್ ವೋಟುಗು ಉಂತಾದಿತ್ತೆರ್. ಅವೆರ್ದ್ ಬೊಕ್ಕ ನಡತಿನ ವೋಟುಡು ಸುಧೀರ್ ಶೆಟ್ಟಿ ಬೊಕ್ಕ ಸುನೀತಾ ಸಾಲಿಯಾನ್ ಆಯ್ಕೆ ಆಯೆರ್.
ಮೈಸೂರ್ ವಿಭಾಗದ ಪ್ರಾದೇಶಿಕ ಆಯುಕ್ತೆರ್ ವೋಟು ನಡಪಾದ್ ಕೊರಿಯೆರ್. ಪಾಲಿಕೆದ ಮಂಗಳಾ ಸಭಾಂಗಣಡ್ ಈ ವೋಟು ನಡತ್ಂಡ್.
ಬೋಲ್ತೆರ್; ಉಜಿರೆ ಎಸ್.ಡಿ.ಎಂ ಕಾಲೇಜ್ ದ ಕಲ್ಪಾರ್ಥಿ ಸೌಜನ್ಯನ ಕೇಸ್ ನ್ ಪಿರ ತನಿಖೆಗಾದ್ ಸರಕಾರಗ್ ನಿರ್ದೇಶನ ಕೊರ್ಪುನಂಚ ಸಾರ್ವಜನಿಕ ಹಿತಾಸಕ್ತಿ ಅರ್ಜಿನ್ ಹೈಕೋರ್ಟ್ ವಿಲೇವಾರಿ ಮಲ್ತ್ ದುಂಡು.
ಈ ಕೇಸ್ ಗ್ ಸಂಬoಧಪಟ್ಟಿನoಚ ಪೊಲೀಸ್ ಇಲಾಖೆ, ಸಿಐಡಿ ಬೊಕ್ಕ ಸಿಬಿಐ ತನಿಖೆ ಆದ್, ಪ್ರಕರಣಗ್ ಸಂಬoಧಿಸಾದ್ ಅರೆಸ್ಟ್ ಆದ್ ಇತ್ತಿನ ಸಂತೋಷ್ ರಾವ್ ನಿರಪರಾಧಿ ಪಂದ್ ಸಿಬಿಐ ವಿಶೇಷ ನ್ಯಾಯಲಯ ತೀರ್ಪು ಕೊರ್ದು ಇತ್ತ್ಂಡ್. ಈ ತನಿಖೆಡ್ ಲೋಪ ಆತ್‌ಂಡ್ ಪಂದ್ ತನಿಖಾಧಿಕಾರಿ ಬೊಕ್ಕ ವೈದ್ಯಾಧಿಕಾರಿಲೆನ ವಿರುದ್ದ ಕ್ರಮ ದೆತೊನೊಡು ಪಂದ್ ಇಚ್ಚಿಂಪಗ್ ನಡತ್ತಿನ ಕೆಲವು ಪ್ರತಿಭಟನೆಡ್ ಆಗ್ರಹ ಆದ್ ಇತ್ತ್ಂಡ್.
ಸೌಜನ್ಯನ ಕೇಸ್ ನ್ ಪಿರ ತನಿಖೆ ಮಲ್ಪೊಡು ಪಂದ್ ಗಿರೀಶ್ ಭಾರಧ್ವಾಜ್, ನವೀನ್ ಕುಮಾರ್ ನೆರಿಯ, ಬೋಲ್ತೆರ್ ಬೊಕ್ಕ ವಿನಾಯಕ ಪ್ರೆಂಡ್ಸ್ ಟ್ರಸ್ಟ್ ಬಲ್ನಾಡ್ ಪುತ್ತೂರು ಮೊಕುಲು ಒಟ್ಟಾದ್ ಸಲ್ಲಿಕೆ ಮಲ್ತಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸೆ.8 ದಾನಿ ಉಚ್ಚ ನ್ಯಾಯಾಲಯಡ್ ವಿಚಾರಣೆಗ್ ಬತ್ತ್ ದ್ ಇತ್ತ್ಂಡ್. ಅರ್ಜಿದಾರನ ಪರ ನ್ಯಾಯವಾದಿ ಶ್ಯಾಮ್ ವಾದ ಮಲ್ತ್ ಇತ್ತೆರ್. ಸರಕಾರ ಅತ್ತ್ಂಡ ಮೂಲ ದೂರುದಾರೆರ್, ಸಂತ್ರಸ್ತ ಕುಟುಂಬ ಮಾತ್ರ ಆರೋಪಿನ್ ದೋಷಮುಕ್ತ ಮಲ್ತಿನ ಆದೇಶದ ಮಿತ್ತ್ ಮೇಲ್ಮನವಿ ಸಲ್ಲಿಸಾಯೆರೆ ಕಾನೂನುಡು ಅವಕಾಶ ಉಂಡು ಪಂದ್ ಜರ್ಜ್ ಈ ಪೊರ್ತುಡು ಪಂತೆರ್.
ಅರ್ಜಿದಾರನ ಉದ್ದೇಶ ಎಡ್ಡೆ ಇತ್ತ್ಂಡಲ ಕಾನೂನುದ ಮಿತ್ತಿತ ಉಲಾಯಿ ವ್ಯವಹಾರ ಮಲ್ಪೊಡು ಪಂದ್ ಅಭಿಪ್ರಾಯ ತೆರಿಪಾಯಿನ ವಿಭಾಗೀಯ ನ್ಯಾಯಪೀಠ ಸಂತ್ರಸ್ತ ಕುಟುಂಬಗ್ ಮೇಲ್ಮನವಿ ಸಲ್ಲಿಸಾಯೆರೆ ಸಹಾಯ ಮಲ್ಪುಲೆ ಪಂದ್ ಸಲಹೆ ಕೊರ್ಪುನೆತ್ತ ಒಟ್ಟಿಗೆ ಸಾರ್ವಜನಿಕ ಹಿತಾಸಕ್ತಿದ ಅರ್ಜಿನ್ ವಿಲೇವಾರಿ ಮಲ್ತ್ ದುಂಡು.
ಕುಡ್ಲ: ಕರ್ನಾಟಕ ರಾಜ್ಯಪಾಲೆರ್ ತಾವರ್ ಚಂದ್ ಗೆಹ್ಲೋಟ್ ಮೇರ್ ಸೆ.8 ಸುಕ್ರಾರ (ಇನಿ) ಬಜಪೆದ ಅಂತರಾಷ್ಟ್ರೀಯ ಇಮಾನ ನಿಲ್ದಾಣಗ್ ಭೇಟಿ ಕೊರಿಯೆರ್.
ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್, ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಅನುಪಮ್ ಅಗರ್ವಾಲ್, ದ.ಕ ಜಿಲ್ಲಾ ಪಂಚಾಯತ್ ದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಆನಂದ್ ಕೆ. ಬೊಕ್ಕ ಅಧಿಕಾರಿಲು ಇತ್ತೆರ್.
ರಾಜ್ಯಪಾಲೆರ್ 12 ಗಂಟೆಗ್ ಕುಡ್ಲ ಪೇಂಟೆದ ಟಿ.ಎಂ.ಎ. ಪೈ ಕನ್‍ವೆನ್‍ಶನ್ ಸಭಾಂಗಣಡ್ ಮ್ಯಾಂಗಲೋರ್ ಫಿಸಿಯೋಕಾನ್ 2023 ಲೇಸ್ ನ್ ಉದಿಪನ ಮಲ್ತೆರ್. ಮಧ್ಯಾಹ್ನ 1 ಗಂಟೆಗ್ ಪೇಂಟೆದ ಹೋಟೆಲ್ ತಾಜ್ ವಿವಂತಾಡ್ ವಾಸ ಇತ್ತೆರ್.1.30 ಕ್ಕ್ ಖಾಸಗಿ ವಿಶ್ವವಿದ್ಯಾನಿಲಯ ಬೊಕ್ಕ ಕಾಲೇಜ್ ಆಡಳಿತದ ಅಧಿಕಾರಿಲೆನೊಟ್ಟಿಗೆ ಸಂವಾದ ನಡಪಾಯೆರ್. ನನ ಬಯ್ಯಗ್ 5.25 ಕ್ಕ್ ಕುಡ್ಲರ್ದ್ ಇಮಾನದ ಮುಖೇನ ಬೆಂಗ್ಲೂರ್ ಗ್ ಪೋಪೆರ್.
ಪುತ್ತೂರು: ಅಕ್ಷಯ ಎಜುಕೇಶನಲ್ ಚಾರಿಟೇಬಲ್ ಟ್ರಸ್ಟ್ ಅಧೀನಡ್ ನಡತೊಂದು ಇಪ್ಪುನ ಅಕ್ಷಯ ಕಾಲೇಜ್ ದ ಐಕ್ಯೂಎಸಿ ನೆತ್ತ ಮುತಾಲಿಕೆಡ್ ಕಲ್ಪಾರ್ಥಿಲೆನ ಸಂಘದ ಉದಿಪನ ಲೇಸ್ ಕಾಲೇಜ್ ದ ಚಾವಡಿಡ್ ನಡತ್ಂಡ್.
ರಾಮಚಂದ್ರ ಪಿಯು ಕಾಲೇಜ್ ದ ಪ್ರಿನ್ಸಿಪಾಲ್ ಶೇಖರ್ ರೈ.ಕೆ ಲೇಸ್ ನ್ ಉದಿಪನ ಮಲ್ತ್ ದ್ ಪುಟ್ಟುನಗನೆ ಏರ್ಲ ನಾಯಕೆ ಆದ್ ಪುಟ್ಟುಜೆ, ಪರಿಸ್ಥಿತಿ ಅಕ್ಲೆನ್ ನಾಯಕಲಕ ಮಲ್ಪುಂಡು, ಪರಿಸ್ಥಿತಿನ್ ಅರ್ಥ ಮಲ್ತೊಂದು ನಡತ್‌ಂಡ ಜೀವನಡ್ ಯಶಸ್ಸ್ ನ ತೂವೊಲಿ ಪಂದ್ ಪಂಡೆರ್. ಲೇಸ್ ದ ಗುರ್ಕಾಮೆನ್ ವಹಿಸಾದ ಇತ್ತಿನ ಕಾಲೇಜ್ ದ ಗುರ್ಕಾಲು ಜಯಂತ ನಡುಬೈಲು ಪಾತೆರ್ದ್ ಕಲ್ಪಾರ್ಥಿ ಸಂಘದ ಮಾತಾ ಪದಾಧಿಕಾರಿಲೆಗ್ ಸೊಲ್ಮೆ ಸಂದಾವೆ, ಶೈಕ್ಷಣಿಕ ಸಾಲ್ ಡ್ ಎಡ್ಡೆ ಕೆಲಸಲು ಆವಡ್ ಪಂದ್ ಪಂಡೆರ್.
ಈ ಪೊರ್ತುಡು ಕಾಲೇಜ್ ದ ವ್ಯವಸ್ಥಾಪಕ ನಿರ್ದೇಶಕಿ ಕಲಾವತಿ ಜಯಂತ್, ಪ್ರಾಂಶುಪಾಲ ಸಂಪತ್ ಪಕ್ಕಳ, ಆಡಳಿತಾಧಿಕಾರಿ ಅರ್ಪಿತ್ ಟಿ ಎ ಇತ್ತೆರ್. ಶ್ರದ್ದಾ ಬೊಕ್ಕ ಬಳಗದಕುಲು ಪ್ರಾರ್ಥನೆ ಮಲ್ತ್ ದ್, ಕಲ್ಪಾರ್ಥಿ ಕೃತಿ ಎದ್ಕೊಂಡೆರ್, ದಕ್ಷಿತ ಎಮ್ ಕೆ ಲೇಸ್ ದ ಸುಧಾರಿಕೆ ಮಲ್ತ್, ವಿನೋದ್ ಕೆಸಿ ಸೊಲ್ಮೆ ಸಂದಾಯ ಮಲ್ತೆರ್.
ಪುತ್ತೂರು: ಎನ್ನ ಪುದರ್ ಪಂದ್ ಕೆಲವು ಸರಕಾರಿ ಇಲಾಖೆದ ಅಧಿಕಾರಿಲೆಡ, ಉದ್ಯಮಿಲೆಡ ಕಾಸ್ ಕೆನೊಂದು ಇಪ್ಪುನ ಇಚಾರ ಎನ್ನ ಗಮನಗ್ ಬತ್ತ್ದ್‌ಂಡ್. ಎನ್ನ ಪುದರ್ ಪಂದ್ ಏರ್ಲ ಕಾಸ್ ಕೇಂಡ ಕೊರ್ಪುನ ಅಗತ್ಯ ಇಜ್ಜಿ ಪಂದ್ ಪುತ್ತೂರು ಶಾಸಕೆರ್ ಅಶೋಕ್ ರೈ ತೆರಿಪಾದೆರ್.
ಕರಿನ ಕೆಲವು ದಿನರ್ದ್ ಈ ರೀತಿದ ವಿಚಾರಲು ನಡತೊಂದು ಇಪ್ಪುನ ಎನ್ನ ಗಮನಗ್ ಬೈದುಂಡು. ಯಾನ್ ಅಧಿಕಾರಿಲೆಡ, ಉದ್ಯಮಿಲೆಡ ವೋಟುದ ದುಂಬುಲಾ ಕಾಸ್ ಕೇಂದಿಜಿ, ಐರ್ದ್ ಬೊಕ್ಕಲ ಕೇಂದಿಜಿ, ನನಲ ಕೇನುಜಿ ಎಂಕ್ ಅವೆತ ಅಗತ್ಯ ಇಜ್ಜಿ ಪಂಡೆರ್. ಎನ್ನ ಪುದರ್ ಪಂದ್ ಏರ್ಲ ಕಾಸ್ ಕೇಂಡ ಕೊರೊಚ್ಚಿ ನೆತ್ತ ಬಗ್ಗೆ ಅನುಮಾನನೆ ಬೊಡ್ಚಿ ಪಂದ್ ಸ್ಪಷ್ಟನೆ ಕೊರ್ತೆರ್.
ಬೆಂಗ್ಲೂರು: ಕಂಬುಲ ಪಂಡ ತುಳುನಾಡುದ ಸಂಸ್ಕೃತಿನ್ ದೆರ್ತ್ ತೋಜಿಪಾವುನಂಚಿನ ಜಾನಪದ ಕ್ರೀಡೆ. ಆಂಡ ಉಂದು ಇತ್ತೆ ಕರ್ನಾಟಕದ ರಾಜಧಾನಿ ಆಯಿನ ಬೆಂಗ್ಲೂರುಡು ಚಾತುರ್ಪುನು ನೆಗೆತ್ತ್ ತೊಜಿಪಾಯೆರೆ ಉಂಡು.
ಪುತ್ತೂರುದ ಶಾಸಕೆರ್ ಬೊಕ್ಕ ಉಬಾರ್ ವಿಜಯ ವಿಕ್ರಮ ಜೋಡುಕೆರೆ ಕಂಬುಲ ಸಮಿತಿದ ಗುರ್ಕಾರೆ ಅಶೋಕ್ ರೈ ಮೇರೆನ ಮುತಾಲಿಕೆಡ್ ಈ ಸಲ ಕಂಬುಲ ಬೆಂಗ್ಲೂರುಡು ಭಾರಿ ಗೌಂಜಿಡ್ ನಡಪೆರೆ ಉಂಡು. ನೆತ್ತ ಬಗೆಟ್ ಸೆ.7 ಸುಕ್ರವಾರ ದಾನಿ ಬೆಂಗ್ಲೂರುದ ನವರಂಗ್ ಬ್ರಿಡ್ಜ್ ದ ಸ್ವಾತಿ ಹೋಟೆಲ್ ಡ್ ಸಭೆ ನಡತ್ತ್ಂಡ್. ಬೆಂಗ್ಲೂರುಡು ಕಂಬುಲು ಮಲ್ಪೆರೆ ಮಾತಾ ರೀತಿದ ಸಿದ್ದತೆ ನಡತೊಂದು ಉಂಡು. ಬೆಂಗ್ಲೂರುಡು ನಡಪುನ ಕಂಬುಲಗ್ ಸಮಿತಿ ಮಲ್ಪುನ ಬಗೆಟ್ ಅಂಚನೆ ಬೆಂಗ್ಳುರು ದಕ್ಲೆಗ್ ತುಳುನಾಡ್ ದ ಆಚಾರ ವಿಚಾರನ್ ತೆರಿಪಾವೊಡು ಅಂಚನೆ ತುಳು ಭವನಗ್ ಬೇತೆನೆ ಜಾಗ ಮಲ್ಪೊಡು, ಕಂಬಳಗ್ ಅಂತಾರಾಷ್ಟ್ರೀಯ ಮಟ್ಟಡ್ ಪುದರ್ ಕನವೊಡು ಇಂಚ ಕೆಲವಾತ್ ವಿಚಾರಲೆನ್ ಪುತ್ತೂರು ಶಾಸಕೆರ್ ಅಶೋಕ್ ರೈ ಕಂಬುಲದ ಪೂರ್ವಭಾವಿ ಸಭೆಟ್ ಮಾಹಿತಿನ್ ಪಟ್ಟೊಂದೆರ್.
ಸಭೆಟ್ ಬೆಂಗ್ಲೂರುಡು ಇಪ್ಪುನ ಉದ್ಯಮಿಲು ಅಂಚನೆ ಪುತ್ತೂರುದ ಜನಕುಲ ಈ ಪೊರ್ತುಡು ಪಾಲ್ ಪಡೆದಿತ್ತೆರ್
ಮಡಂತ್ಯಾರು: ಸಾರ್ವಜನಿಕ ಗಣೇಶೋತ್ಸವ ಸಮಿತಿ 41 ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವ ಸೆ.19 ರ್ದ್ 22 ಮುಟ್ಟ ಡಾ.ಡಿ ವೀರೇಂದ್ರ ಹೆಗ್ಗಡೆರ್ನ ಶುಭಾಶೀರ್ವಾದೊಟ್ಟಿಗೆ, ಅನಂತಕೃಷ್ಣ ಭಟ್ ಕುಕ್ಕಿಲ ಮೆರ್ ನ ಪೌರೋಹಿತ್ಯಡ್ ಮಡಂತ್ಯಾರು ಗಣಪತಿ ಮಂಟಪಡ್ ನಡಪೆರೆ ಉಂಡು.
ಸೆ.19 ಅಂಗಾರೆ ಕಾಂಡೆ 10 ಗಂಟೆಗ್ ಗಣಹೋಮ, 10.30 ಕ್ಕ್ ಮಹಾಗಣಪತಿನ ಪ್ರತಿಷ್ಠೆ, 11 ರ್ದ್ “ಕಲಾಸರಸ್ವತಿ” ನೃತ್ಯ ತಂಡ ಊರ್ಲ ಪುಂಜಾಲಕಟ್ಟೆ ಮೊಕ್ಲೆರ್ದ್ ಸಾಂಸ್ಕೃತಿಕ ಕಲಾ ಐಸಿರಿ, 12.30 ಕ್ಕ್ ಸಾರ್ವಜನಿಕ ಅನ್ನಸಂತರ್ಪಣೆ, 1.30 ಕ್ಕ್ ಪಾರೆಂಕಿ ಮಹಿಷ ಮರ್ದಿನಿ ಯಕ್ಷಗಾನ ಸಂಘದ ಸದಸ್ಯೆರೆರ್ದ್ “ವೀರಮಣಿ ಕಾಳಗ” ಯಕ್ಷಗಾನ ತಾಳಮದ್ದಲೆ, 6 ಗಂಟೆಗ್ ಪಾರೆಂಕಿ ವಿದ್ಯಾಸರಸ್ವತಿ ಭಜನಾ ಮಂಡಳಿರ್ದ್ ಭಜನೆ, 7 ಗಂಟೆಗ್ ಮಹಾಪೂಜೆ, 7.30 ಕ್ಕ್ ದೇವಿಕಿರಣ್ ಕಲಾನಿಕೇತನ ಮಡಂತ್ಯಾರ್ ಮೊಕ್ಲೆನ ಶಿಷ್ಯ ವೃಂದರ್ದ್ ನೃತ್ಯಾರ್ಪಣಂ ಬೊಕ್ಕ ಸಿಡಿಕೆ ಚಂದೂಸ್ ಡ್ಯಾನ್ಸ್ ಕಿಡ್ಸ್, ರಾತ್ರೆ 9 ಗಂಟೆರ್ದ್ ಪ್ರತಿಭಾ ರತ್ನ ಪ್ರಶಸ್ತಿ ಪುರಸ್ಕೃತೆ ಶ್ರುತಿದಾಸ್ ನಿರ್ದೇಶನದ ನಾಟ್ಯ ಲಹರಿ ನೃತ್ಯ ತಂಡ ಕಾವಳಕಟ್ಟೆ ಮೊಕ್ಲೆರ್ದ್ ಸಾಂಸ್ಕೃತಿಕ ವೈವಿದ್ಯ ಕಾರ್ಯಕ್ರಮ ನಡಪೆರೆ ಉಂಡು.
ಸೆ.20 ಬುಧವಾರ ಕಾಂಡೆ 10.30 ಕ್ಕ್ ಗಣಹೋಮ, 12.30 ಕ್ಕ್ ಮಹಾಪೂಜೆ, ಅನ್ನಸಂತರ್ಪಣೆ, 1.30 ರ್ದ್ ಯಕ್ಷಭಜನೆ, 6 ರ್ದ್ ಬಳ್ಳಮಂಜ ಅನಂತೇಶ್ವರ ಸ್ವಾಮಿ ಭಜನಾ ಮಂಡಳಿರ್ದ್ ಭಜನೆ, 7 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 8 ಗಂಟೆಗ್ ಭಕ್ತಿ ಪ್ರಧಾನ ತುಳು ನಾಟಕ “ಕಲ್ಜಿಗದ ಕಾಳಿ ಮಂತ್ರದೇವತೆ” ನಡಪೆರೆ ಉಂಡು.
ಸೆ.21 ಗುರುವಾರ 10.30 ಕ್ಕ್ ಗಣಹೋಮ, 12.30 ಕ್ಕ್ ಮಹಾಪೂಜೆ, ಪ್ರಸಾದ ವಿತರಣೆ, 1 ಗಂಟೆಗ್ ಸಾರ್ವಜನಿಕ ಅನ್ನಸಂತರ್ಪಣೆ, ಮಧ್ಯಾಹ್ನ 1.30 ರ್ದ್ ಯಕ್ರಮಿತ್ರರು ಮೊಕ್ಲೆರ್ದ್ “ಗಾಂಡೀವ ನಿಂದನೆ” ತಾಳಮದ್ದಳೆ, 6 ಗಂಟೆಗ್ ಮಾಲಾಡಿ ಶ್ರೀ ರಾಮಾಂಜನೇಯ ಭಜನಾ ಮಂಡಳಿರ್ದ್ ಭಜನೆ, 7 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 7.30 ಕ್ಕ್ ತುಳು ನಾಟ್ಯ ವೈಭವ “ತುಳುನಾಡ ತುಡರ್” ಲೇಸ್ ನಡಪೆರುಂಡು.
ಸೆ.22 ಸುಕ್ರವಾರ 10.30 ಕ್ಕ್ ಗಣಹೋಮ, 11 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 11.30 ರ್ದ್ ಧಾರ್ಮಿಕ ಸಭೆ ಬಳ್ಳಮಂಜ ಪ್ರಮೋದ್ ಕುಮಾರ್ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಬಾಲವಾಗ್ಮಿ ಕು| ಹಾರಿಕಾ ಮಂಜುನಾಥ ಬೆಂಗ್ಲೂರು ಧಾರ್ಮಿಕ ಪ್ರವಚನ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ, ವಿಧಾನ ಪರಿಷತ್ ಶಾಸಕೆರ್ ಹರೀಶ್ ಕುಮಾರ್, ಶ್ರೀ ಕ್ಷೇತ್ರ ಪಾರೆಂಕಿದ ಆಡಳಿತ ಮೊಕ್ತೇಸೆರೆರ್ ವಿಠಲ ಶೆಟ್ಟಿ ಮೂಡಾಯೂರು ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್.
ಲಾೖಲ: ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಲಾೖಲ ಬಲಮುರಿ ಕ್ಷೇತ್ರಡ್ 35ನೇ ವರ್ಸದ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆ.19 ರ್ದ್ 21 ಮುಟ್ಟ ಲಾೖಲ ವಿಘ್ನೇಶ್ವರ ಕಲಾಮಂದಿರಡ್ ಕುತ್ರೊಟ್ಟು ಶ್ರೀ ರಾಧಾಕೃಷ್ಣ ಹೊಳ್ಳೆರ್ನ ಪೌರೋಹಿತ್ಯ ಡ್ ನಡಪೆರುಂಡು.
ಸೆ.19 ಅಂಗಾರೆದಾನಿ ಲೇಸ್ ದ ಉದಿಪನನ್ ಬೋಲ್ತೆರ್ ವಿನಾಯಕ ಇಂಡಸ್ಟ್ರೀಸ್ ದ ಮಾಲಕೆರ್ ಮೂರ್ಜೆ ವಿವೇಕಾನಂದ ಪ್ರಭು ಮಲ್ಪೆರೆ ಉಲ್ಲೆರ್. ಬಿನ್ನೆರಾದ್ ಅನ್ನಪೂರ್ಣ ಮೆಟಲ್ಸ್ ದ ಮಾಲಕೆರ್ ರಾಘ್ನೇಶ್ ಆರ್ ಸಾಲಿಯಾನ್, ಲಾೖಲ ಗ್ರಾ.ಪಂ ದ ಗುರ್ಕಾರ್ದಿ ಜಯಂತಿ ಎಂ.ಕೆ, ಲಾೖಲ ಗ್ರಾ.ಪಂ ದ ಉಪಾದ್ಯಕ್ಷೆರ್ ಸುಗಂಧಿ ಜಗನ್ನಾಥ್ ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್.
ಕಾಂಡೆ 11.30 ಗಂಟೆಗ್ ಶ್ರೀ ಬಲಮುರಿ ವಿಘ್ನೇಶ್ವರ ಭಜನಾ ಮಂಡಳಿರ್ದ್ ಭಜನಾ ಕಾರ್ಯಕ್ರಮ, 12 ಗಂಟೆಗ್ ಗಣಹೋಮ, 12.30 ಕ್ಕ್ ಮಹಾಪೂಜೆ, ಪ್ರಸಾದ ವಿತರಣೆ, 1 ಗಂಟೆಗ್ ಸಾರ್ವಜನಿಕ ಅನ್ನಸಂತರ್ಪಣೆ, ಬಯ್ಯ 5 ಗಂಟೆಗ್ ಶ್ರೀ ದುರ್ಗಾ ಭಜನಾ ಮಂಡಳಿದ ಲೆಕ್ಕಡ್ ಭಜನಾ ಕಾರ್ಯಕ್ರಮ, 7 ಗಂಟೆಗ್ ಕರ್ನೋಡಿ ಬೊಕ್ಕ ಪಡ್ಲಾಡಿ ಶಾಲೆದ ಕಲ್ಪಾರ್ಥಿಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ, 8 ಗಂಟೆಗ್ ಡ್ರೀಮ್ ಝೋನ್ ಅರ್ವ ಮೊಕ್ಲೆನ ನೃತ್ಯ ವೈವಿದ್ಯ, 8.30 ಕ್ಕ್ ಮಹಾಪೂಜೆ ನಡಪೆರೆ ಉಂಡು.
ಸೆ.20 ಬುಧವಾರದಾನಿ ಬೊಲ್ಪುಗು 108 ಕಾಯಿದ ಗಣಪತಿ ಹವನ, 9 ಗಂಟೆಗ್ ಪುಣ್ಯಾಹ ಕಲಹ, ಗಣಹೋಮ ಬೊಕ್ಕ ಭಜನಾ ಕಾರ್ಯಕ್ರಮ, 12.30 ಕ್ಕ್ ಮಹಾಪೂಜೆ, ಪ್ರಸಾದ ವಿತರಣೆ, 1 ಗಂಟೆಗ್ ಸಾರ್ವಜನಿಕ ಅನ್ನಸಂತರ್ಪಣೆ, ಬಯ್ಯ 5 ಗಂಟೆರ್ದ್ ಮೈಸೂರು ಶ್ರೀ ರಾಮಚಂದ್ರಾಚಾರ್ಯ ಬೊಕ್ಕ ಬಳಗದಕ್ಲೆರ್ದ್ “ಹರಿದಾಸ ನಾಮ ಸಂಕೀರ್ತನೆ” ರಾತ್ರೆ 7 ಗಂಟೆಗ್ ಧಾರ್ಮಿ ಸಭೆತ ದಿವ್ಯ ಉಪಸ್ಥಿತಿ ಶ್ರೀ ಕ್ಷೇತ್ರ ಕಟೀಲು ವೇ|ಮೂ|ಶ್ರೀ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ವಹಿಸೊನಿಯೆರೆ ಉಲ್ಲೆರ್. ಉಜಿರೆ ಜನಾರ್ದನ ದೇವಳ್ಯದ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡ್ವೆಟ್ನಾಯ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೋಲ್ತೆರ್ ಶಾಸಕೆರ್ ಹರೀಶ್ ಪೂಂಜ, ಬಿ.ಭುಜಬಲಿ ಧರ್ಮಸ್ಥಳ, ನ್ಯಾಯವಾದಿ ಮುರಳಿ ಬಿ, ಉದ್ಯಮಿ ಬಾಲಕೃಷ್ಣ ಶೆಟ್ಟಿ ಸವಣಾಲು, ಬೋಲ್ತೆರ್ ಲಯನ್ಸ್ ಕ್ಲಬ್ ದ ಗುರ್ಕಾರೆರ್ ಉಮೇಶ್ ಶೆಟ್ಟಿ ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್. ಅಂಚನೆ ಶೈಕ್ಷಣಿಕ, ಸಾಂಸ್ಕೃತಿಕ, ಸಾಮಾಜಿಕ ಕ್ಷೇತ್ರಡ್ ಸೇವೆ ಸಂದಾಯಿನ ಸ್ಥಳೀಯ ಪ್ರತಿಭೆಲೆಗ್ ಈ ಪೊರ್ತುಡು ಮಾನಾದಿಗೆ ಮಲ್ಪೆರೆ ಉಲ್ಲೆರ್. ರಾತ್ರೆ 9 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 9 ಗಂಟೆಗ್ ಬರವುದ ಬೊಳ್ಳಿ ರಾಜೇಶ್ ಆಚಾರ್ಯ ಪರ್ಕಳ ರಚನೆ ಮಲ್ತಿನ ಹರೀಶ್ ಸಿದ್ದಕಟ್ಟೆ ನಿರ್ದೇಶನ ಮಲ್ತಿನ ಓ ಶಕ್ತಿ ಗೆಳೆಯರ ಬಳಗ ನೆತ್ತ ಕಲಾವಿದೆರೆರ್ದ್ “ಆಲ್ ಎನ್ನಾಲ್” ತುಳು ಸಾಮಾಜಿಕ ಹಾಸ್ಯಮಯ ನಾಟಕ ನಡಪೆರೆ ಉಂಡು.
ಸೆ.21 ಸೋಮವಾರ ಕಾಂಡೆ 10 ಗಂಟೆಗ್ ಗಣಹೋಮ, 10.30 ಕ್ಕ್ ಶ್ರೀ ಭಗವಾನ್ ಶಿರಡಿ ಸತ್ಯಸಾಯಿ ಸೇವಾಕ್ಷೇತ್ರ ಶ್ರೀ ಸಾಯಿನಗರ ಹಳೆಕೋಟೆ ಮೊಕ್ಲೆನ ಲೆಕ್ಕಡ್ ಭಜನಾ ಕಾರ್ಯಕ್ರಮ, ಮದ್ಯಾಹ್ನ 12 ಗಂಟೆಗ್ ಕರ್ನೋಡಿ, ಪಡ್ಲಾಡಿ, ಪುತ್ರಬೈಲು, ಹಂದೆವೂರು ಬೊಕ್ಕ ಕನ್ನಾಜೆ ಅಂಗನವಾಡಿ ಜೊಕ್ಲೆರ್ದ್ ನೃತ್ಯ ಕಾರ್ಯಕ್ರಮ, 1 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 1.30 ಕ್ಕ್ ಸಾರ್ವಜನಿಕ ಅನ್ನಸಂತರ್ಪಣೆ, ಬಯ್ಯಗ್ 4 ಗಂಟೆಗ್ ಮಹಾಪೂಜೆ, ಬೊಕ್ಕ ಬಲಮುರಿ ವಿಘ್ನೇಶ್ವರನ ಶೋಭಾಯಾತ್ರೆ, ಭಜನಾ ತಂಡ ಬೊಕ್ಕ ವೇಷಭೂಷಣದ ಒಟ್ಟಿಗೆ ಲಾಯಿಲ ವಿಘ್ನೇಶ್ವರ ಕಲಾಮಂದಿರರ್ದ್ ರಾಘವೇಂದ್ರ ಮಠದ ಕೈತಲ್ ಇಪ್ಪುನ ಗಣಪತಿ ಕಟ್ಟೆಡ್ ವಸಂತ ಪೂಜೆ ಆಯಿ ಬೊಕ್ಕ ಸೋಮಾವತಿ ಸುದೆಟ್ ವಿಗ್ರಹ ವಿಸರ್ಜನೆ ನಡಪೆರುಂಡು.
