ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ಬುಡುಗಡೆಗ್ ದುಂಬು ನಟೆ ಅಭಿಷೇಕ್ ಅಂಬರೀಶ್ ಕುಡ್ಲದ ಕದ್ರಿ ಮಂಜುನಾಥ ದೇವಲ್ಯಗ್ ಭೇಟಿ ಕೊರ್ದು ಇಸೇಸ ಪೂಜೆ ಸಂದಾಯೆರ್.
ಅಭಿಷೇಕ್ ನೊಟ್ಟಿಗೆ ನಿರ್ದೇಶಕೆರ್ ಮಹೇಶ್ ಕುಮಾರ್, ಬಿಗ್ ಬಾಸ್ ವಿನ್ನರ್ ರೂಪೇಶ್ ಶೆಟ್ಟಿ ದೇವೆರೆನ ದರ್ಶನ ಪಡೆಯೆರ್. ಅಭಿಷೇಕ್, ರಚಿತಾರಾಮ್ ನಟನೆದ ಬ್ಯಾಡ್ ಮ್ಯಾನರ್ಸ್ ಪಿಕ್ಚರ್ ನ್ ದುನಿಯಾ ಸೂರಿ ನಿರ್ದೇಶನ ಮಲ್ದೆರ್.
ಅಮೃತಸಂಜೀವಿನಿ (ರಿ.) ಕುಡ್ಲದ 94ನೇ ಮಾಸಿಕ ಯೋಜನೆದ ಮುಖೇನ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ನೆತ್ತ ಸೆಪ್ಟೆಂಬರ್ ತಿಂಗೊಲ್ದ ಸೇವಾಯೋಜನೆಡ್ ಸಂಜೀವಿನಿರ್ದ್ ಒಟ್ಟು ಸೇರ್ಸಾಯಿನ 1,43,000.00 ರೂ. ನ್ 4 ಮಾಸಿಕ ಸೇವಾಯೋಜನೆ ಬೊಕ್ಕ 2 ತುರ್ತು ಯೋಜನೆದ ಮುಖೇನ ಒಟ್ಟು 6 ಫಲಾನುಭವಿಲೆಗ್ ಕೊರಿಯೆರ್.
ಕಾರ್ಲ: ಹಿರ್ಗಾನ ಮೂರ್ತೆದಾರೆರೆನ ಸೇವಾ ಸಹಕಾರ ಸಂಘದ ವಾರ್ಷಿಕ ಮಹಾಸಭೆ ಸೆ.24 ಕ್ಕ್ ಸಂಘದ ಸಭಾಭವನಡ್ ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಸಂಘದ ಗುರ್ಕಾರೆ ಸತೀಶ್ ಪೂಜಾರಿ ಪಾತೆರ್ದ್, ಆಡಳಿತ ಮಂಡಳಿದ ಪಾರದರ್ಶಕ ಆಡಳಿತ, ಸಿಬ್ಬಂದಿಲೆನ ಕಾರ್ಯದಕ್ಷತೆ ಬೊಕ್ಕ ಸಂಘದ ಸದಸ್ಯೆರೆನ ಸಹಕಾರರ್ದ್ ಸಂಘ ಪ್ರಗತಿದ ತಾದಿಡ್ ದುಂಬರಿವೊಂದು ಉಂಡು ಪಂದ್ ಪಂಡೆರ್.
ಸಂಘದ ಸದಸ್ಯೆರ್ ಆನಂದ ಪೂಜಾರಿ ಪಾತೆರ್ದ್, ಸಂಘದ ಸ್ಥಾಪಕೆರ್, ಗುರ್ಕಾರೆ ಆದಿತ್ತಿನ ದಿ. ಸುಂದರ ಪೂಜಾರಿ ಮೆರೆನ ಶ್ರಮತ್ತ ಫಲವಾದ್ ಸಂಘ ಸಧೃಢವಾದ್ ಬುಲೆದ್ ಉಂತುದುಂಡು. ನನಲ ನಮ್ಮ ಸಂಘ ಎಡ್ಡೆ ರೀತಿಡ್ ಕೆಲಸ ಮಲ್ಪಡ್, ಅಂಚೆನೆ ಸಂಘದ ಬುಲೆವಣಿಗೆಗ್ ನಮ ಮತ ಬೆನ್ಕ ಪಂದ್ ಪಂಡೆರ್.
ಮುಖ್ಯಕಾರ್ಯನಿರ್ವಣಾಧಿಕಾರಿ ಸಂತೋಷ್ ಆರ್ಥಿಕ ವರ್ಷೊದ ವರದಿ ಮಂಡಿಸಾದ್ ಪಾತೆರ್ದ್, ಸಂಘ 50.92 ಲಕ್ಷ ರೂ. ವ್ಯವಹಾರ ಮಲ್ತ್ ದ್ಂಡ್, ಬೆನ್ಪುನ ಬಂಡವಾಳ ರೂ. 7.25 ಕೋ.ರೂ. ಬೊಕ್ಕ ರೂ. 10.46 ಲಕ್ಷ ಲಾಭ ಮಲ್ದ್ಂಡ್. ಲಾಭಾಂಶಡ್ ಶೇ.10 ಡಿವಿಡೆಂಡ್ ಗ್ ಕೊರ್ಪ ಪಂದ್ ಪಂಡೆರ್.
ಸಂಘದ ಸದಸ್ಯೆರೆನ 28 ಜೋಕುಲೆಗ್ ವಿದ್ಯಾರ್ಥಿವೇತನನ್ ಲಾಭಾಂಶದ ಚೆಕ್ ಮುಖೇನ ಪಟ್ಟಿಯೆರ್. ಈ ಪೊರ್ತುಡು ಸಂಘದ ಮುತಾಲಿಕೆಡ್ ಬೆನೊಂದು ಇಪ್ಪುನ 3 ಸ್ವ ಸಹಾಯ ಕೂಟಗ್ 2,20,000 ರೂ. ಮೊತ್ತದ ಲಾಭಾಂಶದ ಚೆಕ್ ನ್ ಕೊರಿಯೆರ್.
ಈ ಪೊರ್ತುಡು ಸಂಘದ ಉಪಾಧ್ಯಕ್ಷೆರ್ ಭಾಸ್ಕರ್ ಸಿ. ಕೋಟ್ಯಾನ್, ನಿರ್ದೇಶಕೆರ್ ಆನಂದ ಪೂಜಾರಿ, ಬಾಬು ಪೂಜಾರಿ, ಸೋಮಪ್ಪ ಪೂಜಾರಿ, ನಾರಾಯಣ ಪೂಜಾರಿ, ಉದಯ ಪೂಜಾರಿ, ನಾರಾಯಣ ಪೂಜಾರಿ ಬೊಕ್ಕ ಸುಂದರ ಪೂಜಾರಿ ಪಾಲ್ ಪಡೆದಿತ್ತೆರ್. ಸಿಬ್ಬಂದಿ ಸುರೇಖಾ ಎದ್ಕೊನಿಯೆರ್. ಸಂತೋಷ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ದೀಪಾ ಸೊಲ್ಮೆ ಸಂದಾಯೆರ್.
ಕುಡ್ಲ: ಕುಡ್ಲದ ಪೇಂಟೆದ ಬೆಂದೂರುವೆಲ್‌ ಪರಿಸರಡ್‌ ಅಮಲ್ ದ ಸೊತ್ತುನು ಮಾರೊಂದಿತ್ತಿನ ಕಲ್ಪಾರ್ಥಿನ್‌ ಸಿಸಿಬಿ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್.
ಪೇಂಟೆದ ಕಾಲೇಜ್ ಒಂಜೆಟ್ಟ್‌ ಪದವಿ ಕಲ್ಪಾರ್ಥಿ ಸುಳ್ಯ ತಾಲೂಕುದ ಅಜ್ಞಾವರ ಗ್ರಾಮದ ಲುಕ್ಕಾನುಲ್‌ ಹಕೀಂ(22ವ) ಅರೆಸ್ಟ್‌ ಆಯಿನ ಆರೋಪಿ. 1 ಲಕ್ಷ 25 ಸಾವಿರದ 25 ಗ್ರಾಂ ಎಂಡಿಎಂಎ ವಶಕ್ಕ್‌ ಪಡೆಯೊಂದೆರ್. ನೆತ್ತ ಒಟ್ಟಿಗೆ ಮೊಬೈಲ್‌ ಪೋನ್‌, ಡಿಜಿಟಲ್‌ ತೂಕ ಸೇರಿನಂಚ ಒಟ್ಟು 1 ಲಕ್ಷ 60 ಸಾವಿರ ಮೌಲ್ಯದ ವಸ್ತುಲೆನ್‌ ಸಿಸಿಬಿ ಪೊಲೀಸೆರ್‌ ವಶಕ್‌ ಪಡೆಯೊಂದೆರ್.
ಸಾರ್ವಜನಿಕೆರೆಗ್‌ ಬೊಕ್ಕ ಕಲ್ಪಾರ್ಥಿಲೆಗ್‌ ಮಾದಕ ಸೊತ್ತುಲೆನ್ ಮಾರಾಟ ಮಾಲ್ತೊಂದು ಇತ್ತಿನ ಮಾಹಿತಿನ್ ತೆರಿಯೊಂದು ಸಿಸಿಬಿ ಪೊಲೀಸೆರ್‌ ಕಾರ್ಯಾಚರಣೆ ಮಲ್ತ್‌ದ್‌ ಆರೋಪಿನ್‌ ಅರೆಸ್ಟ್‌ ಮಲ್ತ್‌ದೆರ್. ಕುಡ್ಲ ಪೂರ್ವ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್ ದಾಖಲಾತ್‌ಂಡ್‌.
ಪೆರ್ಲ: ಇತಿಹಾಸ ಪ್ರಸಿದ್ಧ ಕಾಟುಕುಕ್ಕೆ ಶ್ರೀಸುಬ್ರಾಯ ಕ್ಷೇತ್ರಗ್ ಪುತ್ತೂರು ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ಭೇಟಿ ಕೊರಿಯೆರ್. ವಿಧಾನ ಸಭಾ ವೋಟ್‌ದ ಪೊರ್ತುಡು ಅಶೋಕ್ ರೈ ಗೆಂದೆರೆ ಅಭಿಮಾನಿಲು ಪ್ರಾರ್ಥನೆ ಮಲ್ತ್ ಇತ್ತಿನ ಪರಕೆನ್‌ ಸಂದಾಯೆರೆ ಕಾಟುಕುಕ್ಕೆ ಕ್ಷೇತ್ರಕ್ಕೆ ಬತ್ತಿತೆರ್. ಈ ಪೊರ್ತುಡು ಕಾಟುಕುಕ್ಕೆದ ಅಭಿಮಾನಿ ಬಳಗದ ಪರವಾದ್ ಪೌರ ಮಾನಾದಿಗೆ ಮಲ್ತೆರ್.
ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಪಡ್ಡಂಬೈಲು, ಮಾಜಿ ಆಡಳಿತ ಮೊಕ್ತೇಸರೆರ್ ನಾರಾಯಣ, ಉತ್ಸವ ಆಚರಣಾ ಸಮಿತಿ ಗುರ್ಕಾರ್ಲು ಪುರುಷೋತ್ತಮ ಭಟ್ ಮಿತ್ತೂರು ಇತ್ತೆರ್. ಎಣ್ಮಕಜೆ ಗ್ರಾಮ ಪಂಚಾಯತಿ ಅಭಿವೃದ್ಧಿ ಸ್ಥಾಯಿ ಸಮಿತಿದ ಗುರ್ಕಾರ್ಲು ಬಿ.ಎಸ್.ಗಾಂಭೀರ್ ಎದ್ಕೊಂದು ದೀಪಕ್ ಭಂಡಾರದ ಮನೆ ಸೊಲ್ಮೆ ಸಂದಾಯ ಮಲ್ತೆರ್. ಈ ಪೊರ್ತುಡು ಕ್ಷೇತ್ರ ಅಭಿವೃದ್ಧಿ ಕಾರ್ಯಗ್‌ ಕರ್ನಾಟಕ ಸರಕಾರರ್ದ್ ಪೂರಕ ಯೋಜನೆಲೆನ್‌ ಕೊರೊಡು ಪಂದ್ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಬಿನ್ನಾಪು ಮಲ್ತೆರ್. ಅಂಚೆನೆ ಪಡ್ಡಂಬೈಲು ಬೊಕ್ಕ ಅಡ್ಕಸ್ಥಳ -ಕಾಟುಕುಕ್ಕೆ ಮುಖೇನ ಆರ್ಲಪದವು ಪುತ್ತೂರುಗ್ ಸರಕಾರಿ ಬಸ್ ಮಂಜೂರು ಮಲ್ಪೊಡು ಪಂದ್ ನಾಗರಿಕೆರ್ನ ಪರವಾದ್ ಬಿ.ಎಸ್.ಗಾಂಭೀರ್ ಶಾಸಕೆರೆಗ್‌ ಮನವಿ ಕೊರಿಯೆರ್.
ಕುಡ್ಲ: ಪ್ರತಿ ವರ್ಷ ನಡಪುನಂಚೆನೆ ಈ ವರ್ಷಲ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಪೊಸರಿ (ಹೊಸಕ್ಕಿ) ನಡಾರಿ(ನಡಾವಳಿ) ಉಚ್ಚಯ ಅ.27 ಸುಕ್ರಾರ ನಡಪರೆ ಉಂಡು.
ಆನಿದ ದಿನ ಬೊಲ್ಪುಗು ಕದಿಕೆರ್ದ್ ಭಂಡಾರ ಬರಿಯೆರೆ ಉಂಡು. ಬಯ್ಯಗ್ ಉಚ್ಚಯದ ಧಾರ್ಮಿಕ ಲೇಸ್ ಸುರು ಆಪುಂಡು. ರಾತ್ರೆ ಮಹಾಪೂಜೆ, ಮೂರ್ತಿ ಬಲಿ, ದರ್ಶನ, ಪರಕೆ ಬೊಕ್ಕ ಭಂಡಾರ ನಿರ್ಗಮನ ಆಯೆರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀದೇವಿನ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರಡ್ ನವರಾತ್ರಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿ ದಿನೊಲ ಬೇತೆ ಬೇತೆ ಧಾರ್ಮಿಕ, ಸಾಂಪ್ರದಾಯಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಮತ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಪೂಜೆ ಸೇವೆ ಸಂದಾದ್, ಶ್ರೀ ಭಗವತೀ ಅಪ್ಪೆನ, ಬೊಕ್ಕ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯ ಬೊಕ್ಕ ಕದಿಕೆ ಭಂಡಾರ ಮಂದಿರಡ್ ಮಾರ್ನೆಮಿದ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್, ಪ್ರಸಾದ ದೆತೊಂದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಆಡಳಿತ ಸಮಿತಿ ಬೊಕ್ಕ ಅಭಿವೃದ್ಧಿ ಸಮಿತಿದಕುಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಅಯೋಧ್ಯೆಡ್ ನಿರ್ಮಾಣ ಆವೊಂದು ಇಪ್ಪುನ ಶ್ರೀರಾಮ ಮಂದಿರಗ್‌ ಪೋದು ಮುಟ್ಟುದುಂಡು ತುಳುನಾಡ್‌ಡ್‌ ಬುಲೆಯಿನ ನಾಗಲಿಂಗ ಪೂತ್ತ ದೈ. ಅಪರೂಪದ ಈ ಪುರ್ಪಗ್ ರಾಮ ಜನ್ಮಭೂಮಿಡ್‌ ಅರಳುನ ಭಾಗ್ಯ ತಿಕ್ಕ್‌ದುಂಡು. ದಕ್ಷಿಣ ಅಮೆರಿಕಾ ಮೂಲದ ಈ ವಿಶಿಷ್ಟ ಪೂ, ತುಳುನಾಡ್‌ದ ಜವನೆನ ಪ್ರಯತ್ನಡ್‌ ಇತ್ತೆ ರಾಮ ಮಂದಿರ ಸೇರ್ದ್‌ಂಡ್. ಮೇರ್‌ ಇಲ್ಲಲ್‌ ಬೆಳೆಪಾಯಿನ ನಾಗಲಿಂಗ ವೃಕ್ಷ ಪನ್ಪುನ ಪೂತ್ತ ದೈನ್ ಅಯೋದ್ಯೆಗ್ ಮುಟ್ಟಾದೆರ್.
ಕೊರಿಯರ್ ಮುಖೆನ ಪಾರ್ಸೆಲ್‌
ಗೂಗಲ್ ಮುಖೆನ ಅಯೋಧ್ಯೆದ ಬಗೆಟ್ ವಿವರ ಪಡೆಯಿನ ವಿನೇಶ್ ಪೂಜಾರಿ ಅಲ್ಪದ ಅಧಿಕಾರಿಲೆನ ಫೋನ್ ನಂಬರ್ ದೆತೊಂದು ಫೋನ್ ಮಲ್ತ್ ನಾಗಲಿಂಗ ವೃಕ್ಷದ ಬಗೆಟ್ ವಿವರ ಕೊರ್ತೆರ್. ಮಾಹಿತಿ ಪಡೆನ ಅಧಿಕಾರಿಲು ಅಯೋಧ್ಯೆಡ್ ಈ ಪೂತ್ತ ಗಿಡನ್ ನಡ್ಪುನ ಸಲುವಾದ್ ಕಡಪುರ್ದ್ ಕೊರಿಯೆರೆ ಪಂಡೆರ್.
ಅಂಚನೆ ವಿನೇಶ್ ಪೂಜಾರಿ ಕೊರಿಯರ್ ಮುಖೆನ ನಾಗಲಿಂಗ ವೃಕ್ಷದ 5 ದೈಕ್ ಲೆನ್ ಕಡಪಾದ್ ಕೊರ್ತೆರ್. ಐರ್ದ್ ಬೊಕ್ಕ ಕೆಲ ದಿನತ ಬೊಕ್ಕ ಅಯೋಧ್ಯೆದ ಅಧಿಕಾರಿಲು ವಿನೇಶ್ ಮೆರೆಗ್ ಕಾಲ್ ಮಲ್ತ್ ದ್, ದೈಕ್ಕುಲು ತಿಕ್ಕಿನ ಬಗೆಟ್ ಮಾಹಿತಿ ಕೊರ್ದ್, ಉಂದೆನ್ ಮೂಲ್ ನರ್ದ್ ಫೋಟೋ ಕಡಪುಡುವ ಪಂದ್ ಮಾಹಿತಿ ಕೊರ್ತೆರ್.
ವಿಶ್ವ ಹಿಂದು ಪರಿಷದ್ ಬಜರಂಗದಳ ಒಡಿಪು ಜಿಲ್ಲೆದ ದುಂಬಾತ್ತಿಗೆಡ್ ಅ.10 ಅಂಗಾರೆ ಒಡಿಪುದ ಎಮ್ ಜಿ.ಎಂ ಕಾಲೇಜ್ ಮೈದಾನಡ್ ಹಿಂದೂ ಸಮಾಜೋತ್ಸವ ನಡಪರೆ ಉಂಡು.
ಈ ಶೌರ್ಯ ಜಾಗರಣಾ ರಥಯಾತ್ರೆ ಪಂಡಿತ್ ಧೀರೇಂದ್ರ ಕೃಷ್ಣ ಶಾಸ್ತ್ರಿಲೆನ ಮುತಾಲಿಕೆಡ್ ಮುತಾಲಿಕೆಡ್ ನಡಪರೆ ಉಂಡು. ಈ ಲೇಸ್ ಡ್ ಮಾತ ಹಿಂದೂ ಬಾಂಧವೆರ್ ಪಾಲ್ ಪಡೆವೊಡು ಪಂದ್ ವಿಶ್ವ ಹಿಂದು ಪರಿಷದ್ ಬಜರಂಗದಳ ಒಡಿಪು ಎಗ್ಗೆದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
