ಬೊಲ್ತೆರ್ ಸುದ್ದಿ | Belthangady News

ಧರ್ಮಸ್ಥಳ: ನನ ದುಂಬುಗು ನೇತ್ರಾವತಿ ತುದೆಟ್ ಮೀಪುನ ಭಕ್ತೆರ್ ಸೋಪು, ಶಾಂಪೂ ಗಳಸುಲೆಕ್ಕ ಇಜ್ಜಿ

ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳದ ಮಂಜುನಾಥ ದೇವಲ್ಯಗ್ ಬರ್ಪಿನ ಭಕ್ತೆರೆಗ್ ವಿಶೇಷ ಸೂಚನೆನ್ ಕೊರ್ತೆರ್.

ನೇತ್ರಾವತಿ ತುದೆಟ್ ಮೀಪುನ ಭಕ್ತೆರ್ ನನ ದುಂಬುಗು ಸೋಪು, ಶಾಂಪೂ ಪಾಡ್ದ್ ಮೀಪುಲೆಕ್ಕ ಇಜ್ಜಿ ಪಂದ್ ಪೊಸ ರೂಲ್ಸ್‌ನ್ ಪಾಡ್ದೆರ್.

ಬೊಲ್ತೇರ್: ಕನ್ಯಾಡಿ ಸ್ವಾಮಿಲೆನ ಆಶೀರ್ವಾದ ಪಡೆಯೊನಿನ ಕಾಂಗ್ರೆಸ್ ಅಭ್ಯರ್ಥಿ ರಕ್ಷಿತ್ ಶಿವರಾಂ

ಬೊಲ್ತೇರ್: ಮುಲ್ತ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ರಕ್ಷಿತ್ ಶಿವರಾಂ ಮೇರ್ ಕನ್ಯಾಡಿ ರಾಮ ಕ್ಷೇತ್ರದ ಶ್ರೀ ಶ್ರೀ ಶ್ರೀ ಬ್ರಹ್ಮಾನಂದ ಸ್ವಾಮೀಜಿ ಮೆರೆನ್ ಭೇಟಿ ಮಲ್ತ್‌ದ್ ಆಶೀರ್ವಾದ ಪಡೆಯೊಂದೆರ್.

ಈ ಪೊರ್ತುಡು ಬೊಲ್ತೇರ್ ನಗರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಶೈಲೇಶ್ ಕುಮಾರ್, ಪಿ.ಕೆ ರಾಜು ಪೂಜಾರಿ, ಸುಭಾಶ್ಚಂದ್ರ ರೈ, ಧರಣೇಂದ್ರ ಕುಮಾರ್ ಸೇರಿನಂಚನೆ ಮಸ್ತ್ ಜನ ಇತ್ತೆರ್.

ಬೊಲ್ತೇರ್: ಸುರ್ಯ ಶ್ರೀ ಸದಾಶಿವರುದ್ರ ದೇವಲ್ಯಡ್ ಪ್ರತಿಷ್ಠಾ ವಾರ್ಷಿಕ ಉಚ್ಚಯ, ಜಾತ್ರೆ

ಬೊಲ್ತೇರ್: ಸುರ್ಯ ಶ್ರೀ ಸದಾಶಿವರುದ್ರ ದೇವಲ್ಯಡ್ ಮಾ.30-ಎ.4 ಮುಟ್ಟ ಪ್ರತಿಷ್ಠಾ ವಾರ್ಷಿಕ ಉಚ್ಚಯ ಅಂಚನೆ ವರ್ಷಾವಧಿ ಜಾತ್ರೆ ಭಾರೀ ಗೌಜಿಡ್ ನಡಪರೆ ಉಂಡು.

ಮಾ.30 ಗ್ ಗಣಪತಿ ಹೋಮ ಆದ್ ಮಧ್ಯಾಹ್ನ ಮಹಾಪೂಜೆ ಬೊಕ್ಕ ರಾತ್ರೆ ರಂಗಪೂಜೆ ನಡಪರೆ ಉಂಡು. ಎಪ್ರಿಲ್ 1 ಕ್ಕ್ ಸುರ್ಯಗುತ್ತು ಇಲ್ಲರ್ದ್ ಧರ್ಮ ದೈವದ ಭಂಡಾರ ಬತ್ತ್‌ದ್ ವಸಂತಕಟ್ಟೆ ಪೂಜೆ ನಡಪರೆ ಉಂಡು. ಎಪ್ರಿಲ್ 4 ಕ್ಕ್ ಕಲಶಾಭಿಷೇಕ, ಮಹಾಪೂಜೆ ಆಪುಂಡು. ರಾತ್ರೆ 11 ಗಂಟೆಗ್ ದೈವದ ನೇಮ ನಡಪರೆ ಉಂಡು. 6 ದಿನಲ ಬೇತೆ ಬೇತೆ ವೈದಿಕ ಕಾರ್ಯಕ್ರಮಲು ನಡಪರೆ ಉಂಡು.

ಈ ಪುಣ್ಯಕಾರ್ಯಗ್ ಮಾತೆರ್‍ಲಾ ಬತ್ತ್‌ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ಆಯಿನ ಬಿ.ರಾಜಶೇಖರ ಅಜ್ರಿ, ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಆಯಿನ ಸುಭಾಶ್ಚಂದ್ರ ಸುರ್ಯಗುತ್ತು ಅಂಚನೆ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಾ.21-28: ಕೆಯ್ಯೂರು ಶ್ರೀ ಮಹಿಷಮರ್ಧಿನಿ ದುರ್ಗಾಪರಮೇಶ್ವರಿ ದೇವಲ್ಯದ ಜಾತ್ರೆ

ಕೆಯ್ಯೂರು ಗ್ರಾಮದ ಶ್ರೀ ಮಹಿಷಮರ್ಧಿನಿ ದುರ್ಗಾಪರಮೇಶ್ವರೀ ದೇವಲ್ಯಡ್ ಶ್ರೀ ದೇವಿನ ವಾರ್ಷಿಕ ಜಾತ್ರಾ ಉಚ್ಚಯ ಬೇತೆ ಬೇತೆ ಧಾರ್ಮಿಕ ವಿಧಿ ವಿಧಾನದೊಟ್ಟುಗು ಮಾ.21-28 ಮುಟ್ಟ ನಡಪರೆ ಉಂಡು.

ಮಾ.21 ಕ್ಕ್ ಕಾಂಡೆ ಕೈಲ್ ಕಡ್ಪುನವು, ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಮಹಾಪೂಜೆ ನಡಪರೆ ಉಂಡು. ಮಾ.23 ಕ್ಕ್ ಕಾಂಡೆ ದೇವಿ ಪಾರಾಯಣ ಸುರು ಆದ್, ರಾತ್ರೆ ದೇವತಾ ಪ್ರಾರ್ಥನೆ, ಆಚಾರ್ಯವರಣ, ಸ್ವಸ್ತಿ ಪುಣ್ಯಾಹ ವಾಚನ, ಪ್ರಸಾದ ಸುದ್ದಿ, ರಕ್ಷೆಘ್ನ ಹೋಮ, ವಾಸ್ತು ಹೋಮ, ವಾಸ್ತುಪೂಜಾ ಬಲಿ ವಾಸ್ತುಕಲಶಾಭಿಷೇಕ, ಹೋಮಕುಂಡ ಸಂಸ್ಕಾರ, ಮಹಾಪೂಜೆ, ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು.

8 ದಿನಲ ಬಯ್ಯಗ್ 6-8 ಗಂಟೆ ಮುಟ್ಟ ಭಜನಾ ಮಂಡಳಿರ್ದ್ ಏಪಲ ಭಜನಾ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಶ್ರೀ ಕ್ಷೇತ್ರ ಕೆಯ್ಯೂರು ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಪ್ರಕಟನೆಡ್ ತೆರಿಪಾದೆರ್.

ಪಡ್ಯಾರಬೆಟ್ಟು ದೈವಸ್ಥಾನಗ್ ಮಾಲೆ ದಂಡಿಗೆ ಸಮರ್ಪಣೆ

ವೇಣೂರು ಕೈತಲ್‌ದ ಪೆರಿಂಜೆ ಪಡ್ಯಾರಬೆಟ್ಟು ಮೂಲ ಕೊಡಮಣಿತ್ತಾಯ ದೈವಸ್ಥಾನಗ್ ದೈವಲೆಗ್ ಪಾಡುನ ಪೂತ್ತ ಮಾಲೆ ದೀಪಿನ “ಪುರ್ಪ ದಂಡಿಗೆ” ನ್ ಪಡ್ಯಾರಬೆಟ್ಟು ದೈವಸ್ಥಾನದ ವಾರ್ಷಿಕ ಉಚ್ಚಯದ ಪೊರ್ತುಡು ಪಡ್ಯಾರಬೆಟ್ಟು ದೈವಸ್ಥಾನದ ಅನುವಂಶಿಕ ಪ್ರಧಾನ ಅರ್ಚಕೆರ್ ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣೆರ್ ದೈವಸ್ಥಾನಗ್ ಸೇವಾರೂಪವಾದ್ ಕೊರಿಯೆರ್.

ಬೆದ್ರದ ದೇವಕೀ ಲಕ್ಷ್ಮಿ ಸಾ ಮಿಲ್ ನ ಮಾಲಕೆರ್ ಆಯಿನ ಪ್ರೇಮನಾಥ ಮಾರ್ಲೆರ್ , ಅರೆನ ಮಿಲ್‌ಡ್ ನಿರ್ಮಾಣ ಮಲ್ತಿನ ಈ ಪುರ್ಪ ದಂಡಿಗೆನ್ ಭಾರೀ ಪೊರ್ಲುಡು ಕೆತ್ತನೆ ಮಲ್ತ್‌ದೆರ್. ಮರರ್ದ್ ನಿರ್ಮಾಣ ಆಯಿನ ಈ ಮಾಲೆ ದಂಡಿಗೆಡ್ ಆನೆದ ಕಾರ್ ದ ಚಿತ್ರಣ ಉಂಡು. ಸೊಂಡಿಲ್‌ಡ್ ಪೊತ್ತ ಮಾಲೆ ದೀಪಿಲೆಕ್ಕ ನಿರ್ಮಾಣ ಮಲ್ತ್‌ದೆರ್. ಪ್ರೇಮನಾಥ ಮಾರ್ಲೆರ್ ಮೂಜಿ ತಿಂಗೊಲ್‌ದ ಪಿರವು, ಅರೆನ ಮಿಲ್‌ಡ್ ಉಂದುವೇ ರೀತಿದ ಮಾಲೆ ದಂಡಿಗೆನ್ ನಿರ್ಮಾಣ ಮಲ್ತ್‌ದ್ ತೋಡಾರ್‌ದ ಕೊಡಮಣಿತ್ತಾಯ ದೈವಸ್ಥಾನಗ್ ಸರ್ಮಪಣೆ ಮಲ್ತ್‌ದಿತ್ತೆರ್.

ಈ ಪುರ್ಪ ಮಾಲೆ ದಂಡಿಗೆನ್ ಸರ್ಮಪಣೆ ಮಲ್ಪುನ ಪೊರ್ತುಡು ಸೇವಾಕರ್ತೆರಾಯಿನ ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣ, ಪ್ರಸನ್ನ ಅಸ್ರಣ್ಣ, ಶ್ರೀಶ ಅಸ್ರಣ್ಣ, ಪಡ್ಯಾರಬೆಟ್ಟು ದೈವಸ್ಥಾನದ ಅನುವಂಶೀಯ ಆಡಳಿತದಾರೆರ್ ಜೀವಂಧರ ಬಲ್ಲಾಳ್ ಯಾನೆ ಕಂಚಿಪೂವಣಿ, ಉದ್ಯಮಿ ಕಾರಮೊಗರಗುತ್ತು ಪ್ರೇಮನಾಥ ಮಾರ್ಲ, ವಿಕಾಸ್ ಜೈನ್, ವಿಶ್ವಾಸ್ ಜೈನ್, ಯಕ್ಷಗಾನ ವಿಮರ್ಶಕೆರ್ ಎಂ.ಶಾಂತರಾಮ ಕುಡ್ವ, ಪುನೀತ್ ಕುಮಾರ್ ಕಂಬಳಿ ಕಟ್ಟೆಮಾರ್, ಹಾನ್ಯಗುತ್ತು ಮನೋಜ್ ಶೆಟ್ಟಿ, ಹಾನ್ಯಗುತ್ತು ರಿತೇಶ್ ಶೆಟ್ಟಿ, ಕಾರಮೊಗರಗುತ್ತು ಕಿರಣ್ ಕುಮಾರ್ ಮಾರ್ಲ, ಹಾನ್ಯಗುತ್ತು ಭುವನ್ ವೈಷ್ಣವ ಮಾರ್ಲ, ಕ್ಷೇತ್ರದ ಮುಕ್ಕಾಲ್ದಿ ಮಂಜದಡೆಗುತ್ತು ಸುನೀಲ್ ಶೆಟ್ಟಿ ಇತ್ತೆರ್.

Rain showers in places around Bheltangady, Ujire and Dharmasthala ಬೊಲ್ತೇರ್, ಧರ್ಮಸ್ಥಳ, ಉಜಿರೆಡ್ ಬರ್ಸ

ಬೊಲ್ತೇರ್ ತಾಲೂಕ್‌ದ ಮಸ್ತ್ ಕಡೆಟ್ಟ್ ಮಾ.14 ಕ್ಕ್ ನಡುರಾತ್ರೆ ಬೊಕ್ಕ ಮಾರ್ಚ್ 15 ಕ್ಕ್ ಪುಲ್ಯಕಾಂಡೆ ಪನಿ ಬರ್ಸ ಬೈದ್ಂಡ್.

ಉಜಿರೆ, ಧರ್ಮಸ್ಥಳ, ಬೊಲ್ತೇರ್, ಲಾಯಿಲಡ್ ಪನಿ ಬರ್ಸ ಬೈದಿನ ವರದಿ ಆತ್ಂಡ್. ಮುಂಡಾಜೆಡ್‌ಲ ಬರ್ಸ ಬತ್ತಿತ್‌ದ್ ನನ ರಡ್ಡ್ ದಿನ ಎಡ್ಡೆ ರೀತಿಡ್ ಬರ್ಸ ಬರ್ಪಿನ ನಿರೀಕ್ಷೆ ಉಂಡು.

Rain showers in places around Bheltangady, Ujire and Dharmasthala

Light showers were experienced in places around Bheltangady taluk on March 14 th and early March 15 th.  More rains are forecast in this region in the coming two days.

ಕರಾಯ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಮಾ.19,20 ಬೊಕ್ಕ 26 ಕ್ಕ್ ವರ್ಷಾವಧಿ ಉಚ್ಚಯ

ಬೊಲ್ತೇರ್ ತಾಲೂಕ್‌ದ ಕರಾಯ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಮಾ.19,20 ಬೊಕ್ಕ 26 ಕ್ಕ್ ವರ್ಷಾವಧಿ ಉಚ್ಚಯ, ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ, ರಕ್ತೇಶ್ವರಿ ಬೊಕ್ಕ ಕಲ್ಕುಡ-ಪಂಜುರ್ಲಿ ದೈವಲೆನ ನೇಮೋಚ್ಚಯ ಭಾರೀ ಗೌಜಿಡ್ ನಡಪರೆ ಉಂಡು.

ಮಾ.12 ಕ್ಕ್ ಕಾಂಡೆ 9 ಗಂಟೆಗ್ ದೇವರಮಾರ್ ನಾಗನಕಟ್ಟೆಡ್ ನಾಗ ದೇವೆರೆಗ್ ಪೇರ್ ದ ಅಭಿಷೇಕ ಬೊಕ್ಕ ಕೈಲ್ ಕಡ್ಪುನ ಮುರ್ತ ನಡಪರೆ ಉಂಡು. ಮಾ.19 ಗ್ ಕಾಂಡೆ ಸಾರ್ವಜನಿಕ ಶನೀಶ್ವರ ಪೂಜೆ ನಡಪರೆ ಉಂಡು. ಮಾ.26 ಕ್ಕ್ ಕಲ್ಕುಡ-ಪಂಜುರ್ಲಿ ನೇಮ ಬೊಕ್ಕ ದೊಂಪದ ಬಲಿ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೈವದ ಗಂಧ ಪ್ರಸಾದ ದೆತೊನೊಡು ಪಂದ್ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.