ಬೊಲ್ತೆರ್ ಸುದ್ದಿ | Belthangady News

ಫಾದರ್ ಮುಲ್ಲರ್ ಸಂಸ್ಥೆಡ್ ಲಸಿಕಾ ಅಭಿಯಾನಗ್ ಚಾಲನೆ

ಕುಡ್ಲ , ಜೂ. 22: ನಗರದ ಫಾದರ್ ಮುಲ್ಲರ್ ಮೆಡಿಕಲ್ ಕಾಲೇಜು ಆಸ್ಪತ್ರೆದ ವತಿರ್ದ್ ಅಟ್ಟನೆ ಮಲ್ತಿನ ಕೋವಿಡ್ 19 ಲಸಿಕಾ ಮೇಳಗ್ ಕೋಡೆ ಚಾಲನೆ ಕೊರಿಯೆರ್ , ಒಂಜೇ ದಿನಟ್ 700 ಜನ ಲಸಿಕೆ ಪಡೆಯೆರೆ .

ಸುರುತ್ತಾ ವಿಶೇಷ ಪ್ರಾರ್ಥನೆದೊಟ್ಟುಗು ಬಿಷಪ್ ರೆ. ಡಾ. ಪೀಟರ್ ಪೌಲ್ ಸಲ್ಡಾನಾ ಲಸಿಕಾ ಅಭಿಯಾನಗ್ ಚಾಲನೆ ಕೊರಿಯೆರ್ . ಕೋವಿಡ್ ಸಾಂಕ್ರಾಮಿಕ ರೋಗ ಬೇಗೋಡೆ ಸುರು ಆಪಿಲಕ ಅಂಚನೇ ರೋಗಿಲೆನ ಸೇವೆಡ್ ನಿರತರಾಯಿನಕ್ಲೆನ್ ಸಂರಕ್ಷಣೆ ಮಲ್ತಿನ ಆರ್ ಈ ಪೊರ್ತುಡು ಪ್ರಾರ್ಥನೆ ಮಲ್ತೆರ್ .

ಫಾದರ್ ಮುಲ್ಲರ್ ಕನ್ವೆನ್ಷನ್ ಸೆಂಟರ್‌ಡ್ ಕೋಡೆ ಕಾಂಡೆ 9 ಗಂಟೆಗ್ ಸುರು ಮಲ್ತಿನ ಲಸಿಕಾ ಅಭಿಯಾನಡ್ ಬೈಯ್ಯ 3 ಗಂಟೆ ಪೊರ್ತುಡು ಪೇಂಟೆದ ಕೈತಲ್ ದ 700 ಜನಕ್ ಲಸಿಕೆ ಕೊರಿಯೆರ್.

ಫರಂಗಿಪೇಟೆ ಎಸ್ಡಿಪಿಐ ಸಂಸ್ಥಾಪನಾ ದಿನಾಚರಣೆ

ಫರಂಗಿಪೇಟೆ, ಜೂನ್ 22: ಸೋಶಿಯಲ್ ಡೆಮಾಕ್ರೆಟಿಕ್ ಪಾರ್ಟಿ ಆಫ್ ಇಂಡಿಯಾ ಪುದು ಗ್ರಾಮ ಸಮಿತಿ ವತಿರ್ದ್ ಪಕ್ಷದ 12ನೇ ವರ್ಷದ ಸಂಸ್ಥಾಪನಾ ದಿನ ಆಚರಣೆ ಮಲ್ತೆರ್ .

ದ್ವಜಾರೋಹಣನ್ ಪುದು ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ನಝೀರ್ ಕುಂಜತ್ಕಳ ನಡಪಾದ್ ಕೊರಿಯೆರ್.

ಎಸ್ಡಿಪಿಐ ಜಿಲ್ಲಾ ಮುಖಂಡೆರಾಯಿನ ಅಕ್ಬರ್ ಅಲಿ ಪೊನ್ನೋಡಿ ಪಾತೆರ್ದ್ ನಮ್ಮ ಪೂರ್ವಿಕರ ತ್ಯಾಗ ಬಲಿದಾನಗ್ ಪ್ರತಿಫಲವಾದ್ ಜಗತ್ತ್ ಡೆ ಶ್ರೇಷ್ಠವಾಯಿನ ಪ್ರಜಾಪ್ರಭುತ್ವ ಅಸ್ಥಿತ್ವಗ್ ಬೈದುಂಡು ಅಕ್ಲೆನ ಬಲಿದಾನ ವ್ಯರ್ಥ ಆವಂದಿಲಕ ಪ್ರಜಾಪ್ರಭುತ್ವನ್ ಒರಿಪಾದ್ ಬುಲೆಪಾವುನ ಹೋರಾಟ ನಮ್ಮ ಆವೊಡು ಈ ನೆಲೆಟ್ಟ್ ಎಸ್ಡಿಪಿಐ ಪಕ್ಷ ಒಂಜಿ ದಶದಿಂದೀಚೆಕೆ ಸಾಮಾಜಿಕ ಪ್ರಜಾಪ್ರಭುತ್ವಗಾದ್ ಹೋರಾಟ ನಡಪಾವೊಂದೇ ಬೈದುಂಡು ಪಂದ್ ಪಂಡೆರ್. ಲೇಸ್ ದ ಗುರ್ಕಾರ್ಮೆನ್ ವಯಿಸೊಂಡಿನ ಎಸ್ಡಿಪಿಐ ಪುದು ಗ್ರಾಮ ಸಮಿತಿ ಗುರ್ಕಾರ್ಲಾಯಿನ ಇಕ್ಬಾಲ್ ಅಮ್ಮೆಮಾರ್ ವಯಿಸೊಂಡೆರ್ .

ಜಿಲ್ಲೆಗೊಂಜಿ ಸರಕಾರಿ ಮೆಡಿಕಲ್ ಕಾಲೇಜು ಅವಶ್ಯಕ; ಕ್ಯಾಂಪಸ್ ಫ್ರಂಟ್ ಹೋರಾಟ

ಒಡಿಪು, ಜೂನ್ 21: ಅವ್ವೆತೋ ವರ್ಷದ ಬಿನ್ನಾಪು ಆಯಿನ ಸರ್ಕಾರಿ ವೈದ್ಯಕೀಯ ಕಾಲೇಜು ನನಲ ಒಡಿಪುಗು ಬೈಜ್ಜಿ . ಒಂಜಿ ವಿದ್ಯಾರ್ಥಿ ಆಯೇನ ಶಾಲಾ ಜೀವನಡ್ ಉಪ್ಪುನಗನೇ ತಾನ್ ಒರಿ ವೈದ್ಯೆ ಆವೊಡು ಪನ್ಪಿನ ಆಸೆ ದೀದ್ ಐತ ಪಿರವು ಆತೆ ಬಂಗ ಬತ್ದ್ ಉಪ್ಪುವೆ. ಆಂಡ ನೀಟ್ ಪರೀಕ್ಷೆ ಬರೆಯಿ ಬೊಕ್ಕ ಕಾಲೇಜು ಪ್ರವೇಶ ಪೊರ್ತುಡು ಅಲ್ಪದ ಪಣವುದ ರಚನೆ ತೂನಗ ತಾನ್ ಕಟ್ಟಿನoಚಿನ ಕನನ್ ಬುಡ್ಪಿನoಚಿನ ಪರಿಸ್ಥಿತಿ ಬೈದುಂಡು . ಲಕ್ಷಗಟ್ಟಲೆ ಫೀಸು ಕಟ್ಟರೆ ಆವಂದೆ ಅಂಚನೇ ಜಿಲ್ಲೆಡ್ ಸರ್ಕಾರಿ ವೈದ್ಯಕೀಯ ಕಾಲೇಜು ಇಜ್ಜಂದೆ ಉಪ್ಪುನೆರ್ದಾವರ ಆ ವಿದ್ಯಾರ್ಥಿ ಶಿಕ್ಷಣರ್ದ್ ಪಿರ ಜಾರುವೆ . ಈ ವಿಚಾರಡ್ ಕ್ಯಾಂಪಸ್ ಫ್ರಂಟ್ ಆಫ್ ಇಂಡಿಯಾ ಒಡಿಪು ಜಿಲ್ಲಾ ಸಮಿತಿ ವತಿರ್ದ್ ಜಿಲ್ಲಾಧಿಕಾರಿ ಮುಖೇನ ಸರ್ಕಾರಗ್ ಬರ್ಪಿನoಚಿನ ಬಜೆಟ್ ಅಧಿವೇಶನಡ್ ಈ ವಿಷಯನ್ ಉಲ್ಲೇಖ ಮಲ್ಪೋಡು ಪಂದ್ ಬಿನ್ನಾಪು ಮಲ್ತೆರ್.

ಈ ಪೊರ್ತುಡು ಜಿಲ್ಲಾಧಿಕಾರಿ ನೆರ್ದ್ ಬತ್ತಿನ ಉತ್ತರ ಒಂಜಿ ಬೇಜವಾಬ್ದಾರಿತನದ ಆದ್ ಇತ್ತುಂಡು.ಒಡಿಪುಡು ಅವ್ವೆತೋ ಕಡೆಟ್ ಸರ್ಕಾರಿ ಭೂಮಿ ಇತ್ತುಂಡಲ ಜಿಲ್ಲಾಧಿಕಾರಿ ಸರ್ಕಾರಿ ವೈದ್ಯಕೀಯ ಕಾಲೇಜಿಗಾದ್ ಸರ್ಕಾರದ ಭೂಮಿ ಇಜ್ಜಿ ಪಂದ್ ಪಂಡೆರ್. ಒಂಜಿ ಜವಾಬ್ದಾರಿಯುತ ಸ್ಥಾನಡ್ ಉಪ್ಪುನ ಅಧಿಕಾರಿ ಈ ರೀತಿದ ಉತ್ತರ ಕೊರ್ಪಿನವು ಏತ್ ಸರಿ?ಪನ್ಪಿನೆನ್ ಕ್ಯಾಂಪಸ್ ಫ್ರಂಟ್ ಪ್ರಶ್ನೆ ಮಲ್ತೊಂದು ಉಂಡು .
ರಾಜ್ಯಡ್ ಸುಮಾರ್ 19 ಜಿಲ್ಲೆಡ್ ಸರ್ಕಾರಿ ವೈದ್ಯಕೀಯ ಕಾಲೇಜು ಉಂಡು . ವಾ ಜಿಲ್ಲೆಡ್ ಸರ್ಕಾರಿ ವೈದ್ಯಕೀಯ ಕಾಲೇಜು ಇಜ್ಜಾ , ಅಲ್ಪ ಉಪ್ಪುನoಚಿನ ಖಾಸಗಿ ವೈದ್ಯಕೀಯ ಕಾಲೇಜ್ ಡ್ ಈತ್ ಶೇಕಡದಾತ್ ಸರ್ಕಾರದ ಕೋಟಾ ಪಂದ್ ಉಂಡು ಪಂದ್ ಅಗ್ರಹ ಮಲ್ತೆರ್.

ಇತ್ತೇ ಈ ವಿಚಾಡ್ ಬಾರಿ ಮಲ್ಲ ಮಟ್ಟ್ ದ ಹೋರಾಟ ನಡಪಾಯೆರೆ ಕ್ಯಾಂಪಸ್ ಫ್ರಂಟ್ ಆಫ್ ಇಂಡಿಯಾ ಒಡಿಪು ಜಿಲ್ಲಾ ಸಮಿತಿ ತಯಾರ್ ಆದ್ ಉಂಡು, ಈ ವಿಚಾರನ್ ಗಂಭೀರವಾದ್ ದೆತೊoದು ಕ್ಯಾಂಪಸ್ ಫ್ರಂಟ್ ಆಫ್ ಇಂಡಿಯಾ #UdupiDemandsGovtMedicalCollege ಪನ್ಪಿನ ಚಳುವಳಿನ್ ಸುರು ಮಲ್ದೆರ್ ನೆತ್ತ ಭಾಗವಾದ್ ಇತ್ತೇ , ಅವ್ವೆತೋ ಜನ ಸಾಮಾನ್ಯರೆನ್, ಪ್ರಗತಿಪರ ಚಿಂತಕೆರೆನ್ ಬೊಕ್ಕ ಮುಲು ಉಪ್ಪುನ ಬೇತೆ ಬೇತೆ ಸಾಮಾಜಿಕ ಬೊಕ್ಕ ವಿದ್ಯಾರ್ಥಿ ಸಂಘಟನೆಲೆನ್ ಭೇಟಿ ಮಲ್ತ್ ಪಾತೆರಕಥೆ ನಡಪಾದೆರ್. ಮಾತೆರ್ಲ ತಮ್ಮ ಬೆಂಬಲ ಕೊರ್ತೆರ್ , ನನ ಬರ್ಪಿನ ದಿನಟ್ಟ್ ಮಾತೆರೆನ್ಲ ಒಟ್ಟು ಸೇರಾದ್ ಒಂಜಿ ಐತಿಹಾಸಿಕ ಆಂದೋಲನ ಕ್ಯಾಂಪಸ್ ಫ್ರಂಟ್ ಆಫ್ ಇಂಡಿಯಾದ ಮುತಾಲಿಕೆಡ್ ನಡಪರೇ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಕ್ಯಾಂಪಸ್ ಫ್ರಂಟ್ ಒಡಿಪುದ ಜಿಲ್ಲಾ ಮುಖಂಡೆರಾಯಿನ ನವಾಜ್ ಒಡಿಪು , ಜಿಲ್ಲಾಧ್ಯಕ್ಷೇರಾಯಿನ ಅಸೀಲ್ ಅಕ್ರಂ ,
ಜಿಲ್ಲಾ ಕಾರ್ಯದರ್ಶಿಯಾಯಿಿ ನಮಸೂದ್ ಮನ್ನಾ , ಕ್ಯಾಂಪಸ್ ಫ್ರಂಟ್ ಕುಂದಾಪುರದ ಜಿಲ್ಲಾ ಕಾರ್ಯದರ್ಶಿಯಾಯಿನ ಅನ್ಫಾಲ್ ಗಂಗೊಳ್ಳಿ,
ಕ್ಯಾಂಪಸ್ ಫ್ರಂಟ್ ಒಡಿಪುದ ಜಿಲ್ಲಾ ಮುಖಂಡೆರಾಯಿನ ಝಮ್ ಝಮ್ ಪಾಲ್ ಪಡೆದಿತ್ತೆರ್.