ಬೊಲ್ತೆರ್ ಸುದ್ದಿ | Belthangady News

ಮುಂಡಾಜೆ ಪೊಂಜೊಕ್ಲೆನ ತಂಡ ರಾಷ್ಟ್ರ ಮಟ್ಟದ ವಾಲಿಬಾಲ್ ಪಂದ್ಯಾಟಗ್‌ ಆಯ್ಕೆ

ಉಜಿರೆ: ಛತ್ತೀಸ್ ಗಡದ ಚಂಪಾ ಕ್ರೀಡಾಂಗಣಡ್‌ ನಡತ್ತಿನ ವಿದ್ಯಾಭಾರತಿ ರಾಷ್ಟ್ರ ಮಟ್ಟದ ವಾಲಿಬಾಲ್ ಪಂದ್ಯಾಟಡ್ ಕರ್ನಾಟಕ ರಾಜ್ಯ ತಂಡನ್ ಪ್ರತಿನಿಧಿಸಾದ್ ದ.ಕ ಜಿಲ್ಲೆದ ಬೋಲ್ತೆರ್‌ ತಾಲೂಕುದ ವಿವೇಕಾನಂದ ಶಿಕ್ಷಣ ಸಂಸ್ಥೆದ ಮುಂಡಾಜೆ ಪದವಿ ಪೂರ್ವ ಕಾಲೇಜ್‌ದ 19 ನೇ ವಯೋಮಾನದ ಪೊಂಜೊಕ್ಲೆನ ತಂಡ ಚಾಂಪಿಯನ್ ಆತೆರ್. ನವಂಬರ್ ತಿಂಗೊಲುಡು ಶಿವಮೊಗ್ಗಡ್ ನಡಪುನ ಎಸ್.ಜಿ.ಎಫ್.ಐ ರಾಷ್ಟ್ರ ಮಟ್ಟದ ವಾಲಿಬಾಲ್ ಪಂದ್ಯಾಟಗ್ ಆಯ್ಕೆಯಾತೆರ್.

ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ಮುಂಬೈ ಲಿಮಿಟೆಡ್ ನೆತ್ತ ಪೊಸ ನಿರ್ದೇಶಕೆಯಾದ್ ಬೊಂಬೈ ಉದ್ಯಮಿ ನಾರಾಯಣ ಸುವರ್ಣ ಮರೋಡಿ ಆಯ್ಕೆ

ಬೋಲ್ತೆರ್: ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ಬೊಂಬೈ ಲಿಮಿಟೆಡ್ ನೆತ್ತ ಪೊಸ ನಿರ್ದೇಶಕೆಯಾದ್ ನಾರಾಯಣ ಸುವರ್ಣ ಮರೋಡಿ ಆಯ್ಕೆಯಾತೆರ್.
ನಾರಾಯಣ ಸುವರ್ಣ ಕರಿನ ಮಸ್ತ್‌ ವರ್ಷರ್ದ್ ಬೊಂಬೈಡ್‌ ಬ್ಯಾರ ಮಲ್ತೊಂದು, ತುಳುನಾಡ್‌ಡ್‌ ನಡಪುನ ಪ್ರತಿಯೊಂಜಿ ಕಾರ್ಯಕ್ರಮಕ್ಕ್‌ ಸಹಕಾರನ್‌ ಕೊರೊಂದು ಬರೊಂದುಲ್ಲೆರ್. ಮರೋಡಿ ಶ್ರೀ ನಾರಾಯಣ ಗುರು ಸೇವಾ ಸಮಿತಿದ ಗುರ್ಕಾರೆ ಆದ್‌, ಮರೋಡಿ ಶ್ರೀ ಉಮಾಮಹೇಶ್ವರ ದೇವಸ್ಥಾನದ ಮುಂಬಯಿ ಸಮಿತಿ ಸಂಚಾಲಕೆಯಾದ್ ಸೇವೆ ಮಲ್ತೊಂದು ಉಲ್ಲೆರ್‌

ಅ.11: ಪಂಚಮುಖಿ ವ್ಯಕ್ತಿತ್ವ ವಿಕಸನ ಯೋಗ ಶಿಬಿರ ಉದಿಪನ

 ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಬೊಕ್ಕ ನೈತಿಕ ಶಿಕ್ಷಣ ಯೋಜನೆ, ಶಾಂತಿವನ ಟ್ರಸ್ಟ್ , ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ ಟ್ರಸ್ಟ್ ಹೆಚ್.ಡಿ ಕೋಟೆ ನೆತ್ತ ಒಟ್ಟು ಸೇರಿಗೆಡ್ ಯೋಗೋತ್ಸವ ಹೆಚ್.ಡಿ ಕೋಟೆ ತಾಲೂಕುದಾದ್ಯಂತ ಏಕಕಾಲಡ್ ಅನುಭವಿ ಯೋಗ ಶಿಕ್ಷಕೆರ್ದ್ 80 ಕೇಂದ್ರಡ್ 41ನೇ ಯೋಗಾಸನ, ಪ್ರಾಣಾಯಾಮ ಧ್ಯಾನ ಶಿಬಿರ ವಿದ್ಯಾರ್ಥಿಲೆಗಾದ್ ಪಂಚಮುಖಿ ವ್ಯಕ್ತಿತ್ವ ವಿಕಸನ ಯೋಗ ಶಿಬಿರದ ಉದಿಪನ ಲೇಸ್ ಅ.11 ದಾನಿ ಗುರುಭವನ ಹೆಚ್.ಡಿ ಕೋಟೆಡ್‌ ನಡಪೆರೆ ಉಂಡು.
ಲೇಸ್‌ದ ಉದಿಪನನ್‌ ಸರಗೂರು ಶ್ರೀ ಮಹದೇವಸ್ವಾಮಿ ಮಲ್ಪೆರೆ ಉಲ್ಲೆರ್.‌ ಗುರ್ಕಾರ್ಮೆನ್ ಹೆಚ್ ಕೋಟೆ ತಹಶೀಲ್ದಾರ್ ಸಣ್ಣರಾಮಪ್ಪ ವಹಿಸೊನಿಯೆರೆ ಉಲ್ಲೆರ್.‌ ಮಲ್ಲ ಬಿನ್ನೆರಾದ್‌ ಧ.ಗ್ರಾ.ಯೋ.ಪ್ರಾದೇಶಿಕ ನಿರ್ದೇಶಕೆರ್ ಬಿ ಜಯರಾಮ ನೆಲ್ಲಿತ್ತಾಯ, ಹೆಚ್.ಡಿ ಕೋಟೆ ತಾಲೂಕು ಆರೋಗ್ಯಧಿಕಾರಿ ಟಿ ರವಿಕುಮಾರ್, ಹೆಚ್.ಡಿ ಕೋಟೆ ಆರಕ್ಷಕ ನಿರೀಕ್ಷಕೆರ್ ಶಬ್ಬೀರ್ ಹುಸೇನ್, ಹೆಚ್.ಡಿ ಕೋಟೆ ಕ್ಷೇತ್ರ ಶಿಕ್ಷಣಧಿಕಾರಿ ಮಾರಯ್ಯ,ಹೆಚ್.ಡಿ ಕೋಟೆ ವಕೀಲೆರ್ ಎ.ಸಿ ರವಿ ಕುಮಾರ್ ಪಾಲ್‌ ಪಡೆಯೆರೆ ಉಲ್ಲೆರ್.

ಪ್ರಖ್ಯಾತ ಸಂಗೀತ ನಿರ್ದೇಶಕೆರ್ ಇಳಯರಾಜಾ ಶ್ರೀ ಧ.ಮಂ.ಯೋಗ ಬೊಕ್ಕ ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆಗ್ ಭೇಟಿ‌

ಧರ್ಮಸ್ಥಳ: ಪ್ರಖ್ಯಾತ ಸಂಗೀತ ನಿರ್ದೇಶಕೆರ್ ಇಳಯರಾಜಾ ಮೇರ್ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಬೊಕ್ಕ ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆಗ್ ಭೇಟಿ ಕೊರ್ದು ವಿಶೇಷ ಚಿಕಿತ್ಸೆನ್‌ ಪಡೆದ್‌ ಖುಷಿನ್‌ ಪಟ್ಟೊಂಡೆರ್. ಈ ಪೊರ್ತುಡು ಕಾರ್ಯದರ್ಶಿ ಬಿ ಸೀತಾರಾಮ ತೋಳ್ಪಾಡಿತಾಯ, ಮುಖ್ಯ ವೈದ್ಯಾಧಿಕಾರಿ ಡಾ.ಶಿವ ಪ್ರಸಾದ್ ಶೆಟ್ಟಿ ಬೊಕ್ಕ ಪ್ರಬಂಧಕೆರ್ ಸ್ವಸ್ತಿಕ್ ಇತ್ತೆರ್.

ಬೋಲ್ತೆರ್: ನೆರಿಯ ಬೂತ್ ಸಮಿತಿ ಗುರ್ಕಾರೆ ಸೇರ್ದ್ ಮೂಜಿ ಜನತ ವಿರುದ್ದ ಕ್ರಮ ದೆತೊನ್ನ ಬಿಜೆಪಿ

ಬೋಲ್ತೆರ್:‌ ಪಕ್ಷದ ಆದೇಶ ಉಲ್ಲಂಘನೆ ಮಲ್ತಿನ ಹಿನ್ನಲೆಡ್ ಪಕ್ಷದ ಜವಾಬ್ದಾರಿ ಇಪ್ಪುನ ನೆರಿಯ ಬೂತ್ ಸಮಿತಿದ ಗುರ್ಕಾರ್ಲು ಸೇರ್ದ್ ಮೂಜಿ ಜನನ್ ಮಾತ ಹುದ್ದೆರ್ದ್ ಬೊಕ್ಕ ಜವಾಬ್ದಾರಿರ್ದ್ ದೆತ್ತ್‌ದ ಪಂದ್ ಬೋಲ್ತೆರ್ ಬಿಜೆಪಿ ತೆರಿಪಾದ್‌ಂಡ್.‌

ನೆರಿಯ ಗ್ರಾಮ ಪಂಚಾಯತ್‌ದ ರಡ್ಡನೇ ಅವಧಿದ ಗುರ್ಕಾರೆ, ಉಪಾಧ್ಯಕ್ಷ ಚುನಾವಣೆಡ್ ಪಕ್ಷದ ಆದೇಶನ್ ಉಲ್ಲಂಘನೆ ಮಲ್ತಿನ ಹಿನ್ನಲೆಡ್ ಪಕ್ಷದ ಈ ಕ್ರಮ ಕೈದೆತೊದುಂಡ್. ಪಕ್ಷದ ಜವಾಬ್ದಾರಿ ಇಪ್ಪುನ ಪ,ಜಾ. ಮೋರ್ಚಾ ಪ್ರಧಾನ ಕಾರ್ಯದರ್ಶಿ ಬೊಕ್ಕ ನೆರಿಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ವಸಂತಿ ಕಡ್ಡಿಬಾಗಿಲು ಮನೆ, ನೆರಿಯ ಗ್ರಾಮದ ಬೂತ್ ಸಮಿತಿ ಗುರ್ಕಾರ್ಲು ಹಾಗೂ ಬೊಕ್ಕ ಗ್ರಾಮ ಪಂಚಾಯತ್ ಸದಸ್ಯೆ ಕುಶಾಲ ಕಡ್ಡಿಬಾಗಿಲು ಮನೆ, ನೆರಿಯ ಗ್ರಾಮ ಬೂತ್ ಸಮಿತಿ ಗುರ್ಕಾರೆ ಬೊಕ್ಕ ನೆರಿಯ ಗ್ರಾಮ ಪಂಚಾಯತ್ ಸದಸ್ಯೆರ್ ಸಚಿನ್ ಕುಲೆನಾಡಿ ಮನೆ ಮೊಕ್ಲೆನ್ ಭಾರತೀಯ ಜನತಾ ಪಾರ್ಟಿದ ಮಾತ ಹುದ್ದೆ ಬೊಕ್ಕ ಜವಾಬ್ದಾರಿರ್ದ್ ದೆತ್ತ್‌ದ ಪಂದ್ ಬೋಲ್ತೆರ್ ಬಿಜೆಪಿ ಪ್ರಕಟಣೆಡ್‌ ತೆರಿಪಾದುಂಡ್.

ಅ.17: ಸ್ವಾಮಿ ಕೊರಗಜ್ಜಗ್‌ ಪರಕೆದ ಕೋಲ

ಶ್ರೀ ಗಡಿಯಾಡಿ ಆದಿಮೊಗೇರ್ಕಳ, ಸ್ವಾಮಿ ಕೊರಗಜ್ಜ ಬೊಕ್ಕ ಪರಿವಾರ ದೈವದ ದೈವಸ್ಥಾನ ಪಟ್ಲಡ್ಕ-ಕೊಕ್ಕಡ, ಕೌಕ್ರಾಡಿ ಗ್ರಾಮ ಮೂಲು ಪರಕೆದ ಕೋಲ ಅ.17 ದಾನಿ ನಡಪೆರೆ ಉಂಡು. ಚೇತನ್‌, ದಯಾನಂದ, ಚರಣ್‌ ರಾಜ್‌, ಸೂರ್ಯ ಕುಮಾರ್‌ ದೊಡ್ಡಬಳ್ಳಾಪುರ ಮೊಕ್ಲೆನ ಸೇವಾರ್ಥವಾದ್‌ ಸ್ವಾಮಿ ಕೊರಗಜ್ಜಗ್‌ ಪರಕೆದ ಕೋಲ ನಡಪೆರೆ ಉಂಡು.
ಅಂಚನೆ ಪ್ರತಿ ತಿಂಗೊಲು ಸಂಕ್ರಾಂದಿದಾನಿ ಶ್ರೀ ಕ್ಷೇತ್ರಡ್‌ ಕೊರಗಜ್ಜ ದೈವಗ್‌ ಪರಕೆದ ಅಗೇಲ್‌ ಸೇವೆ ನಡಪುಂಡು. ಅಂಚಾದ್‌ ಈ ದೈವದ ಕಾರ್ಯಡ್‌ ಮಾತಾ ಭಕ್ತಾಭಿಮಾನಿಲು ಪಾಲ್‌ ಪಡೆದ್‌ ಶ್ರೀ ದೈವದ ಗಂಧ ಪ್ರಸಾದ ಸ್ವೀಕಾರ ಮಲ್ತ್‌, ಪರಿವಾರ ದೈವದ ಕೃಪೆಗ್‌ ಪಾತ್ರರಾವೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.‌

ಅ.15-23: ಕರಾಯ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್‌ ನವರಾತ್ರಿ ಉಚ್ಚಯ

ಕರಾಯ: ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್‌ ನವರಾತ್ರಿ ಉಚ್ಚಯ, ಸಾರ್ವಜನಿಕ ಚಂಡಿಕಾ ಹೋಮ ಬೊಕ್ಕ ಶ್ರೀ ಮಹಾಲಿಂಗೇಶ್ವರ ಭೊಜನ ಶಾಲೆ, ಅರ್ಚಕರ ವಸತಿಗೃಹದ ಒಕ್ಕೆಲ್ ಅ.15 ರ್ದ್‌ 23 ಮುಟ್ಟ ನಡಪೆರೆ ಉಂಡು.
ಶ್ರೀ ಕರಾಯ ಮಹಾಲಿಂಗೇಶ್ವರ ದೇವಸ್ಥಾನದ ಶ್ರೀ ದುರ್ಗಾದೇವಿನ ಸನ್ನಿದಿಡ್‌ ಅ.15 ರ್ದ್‌ 23 ಮುಟ್ಟ ನವರಾತ್ರಿ ಪೂಜೆ, ಅ.19 ದಾನಿ ರಾತ್ರೆ ನಾಗೇಶ್‌ ತಂತ್ರಿಲೆನ ನೇತೃತ್ವಡ್‌ ವಾಸ್ತು ಪೂಜೆ, ರಕ್ಷೋಘ್ನ ಹೋಮ, ಅ.20 ದಾನಿ ಶುಕ್ರವಾರ ಬೊಲ್ಪುಗು ಗಣಹೋಮ, ಸಾರ್ವಜನಿಕ ಚಂಡಿಕಾ ಹೋಮ ಬೊಕ್ಕ ಅನ್ನಸಂತರ್ಪಣೆ ನಡಪೆರೆ ಉಂಡು. ಅಂಚನೆ ಶ್ರೀ ಮಹಾಲಿಂಗೇಶ್ವರ ಭೋಜನ ಶಾಲೆ, ಬೊಕ್ಕ ಅರ್ಚಕೆರ್ನ ವಸತಿಗೃಹದ ಪ್ರವೇಶೋತ್ವವ ಕಾಂಡೆ 10 ಗಂಟೆಗ್‌ ನಡಪೆರೆ ಉಂಡು. ಈ ಪೊರ್ತುಡು ಮಹಾಲಿಂಗೇಶ್ವರ ದೇವಸ್ಥಾನದ ಉಪಾಧ್ಯಕ್ಷೆರ್‌ ಕೆ.ಎನ್.‌ ಅಜಿತ್‌ ಕುಮಾರ್‌ ಹಲೇಜಿ ಲೇಸ್‌ದ ಉದಿಪನ ಮಲ್ಪೆರೆ ಉಲ್ಲೆರ್.‌ ಮಾತೆರ್ಲ ಈ ಮಾತ ಕಾರ್ಯಕ್ರಮಡ್‌ ಪಾಲ್‌ ಪಡೆದ್‌ ಶ್ರೀ ದೇವೆರ್ನ ಬೊಕ್ಕ ದೇವಿನ ದರ್ಶನ ಮಲ್ತ್‌ದ್‌, ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ಧರ್ಮಸ್ಥಳಡ್ 25ನೇ ವರ್ಷದ ಭಜನಾ ತರಬೇತಿ ಕಮ್ಮಟದ ಮುಗಿತಲದ ಲೇಸ್‌

ಧರ್ಮಸ್ಥಳ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್ ಶ್ರೀ ಕ್ಷೇತ್ರ ಧರ್ಮಸ್ಥಳದ 25 ನೇ ವರ್ಷದ ಭಜನಾ ತರಬೇತಿ ಕಮ್ಮಟದ ಮುಗಿತಲದ ಲೇಸ್‌ ಅ.4 ದಾನಿ ಅಮೃತವರ್ಷಿಣಿ ಸಭಾ ಭವನಡ್‌ ನಡತ್‌ಂಡ್.‌ ಲೇಸ್‌ದ ಗುರ್ಕಾರ್ಮೆನ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ವಹಿಸ್‌ದ್‌ ಇತ್ತೆರ್.‌ ಹುಬ್ಬಳ್ಳಿ ಮೂಜಿ ಸಾವಿರ ಮಠದ ಮನ್ಮಹಾರಾಜನಿರಂಜನ ಜಗದ್ಗುರು ಡಾ.ಗುರು ಸಿದ್ದರಾಜ ಯೋಗೀಂದ್ರ ಮಹಾ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್.‌
ರಾಜ್ಯಸಭಾ ಸದಸ್ಯೆರ್‌ ಬೊಕ್ಕ ಚಲನಚಿತ್ರ ಸಂಗೀತ ನಿರ್ದೇಶಕೆರ್‌, ಗಾಯಕೆರ್ ಇಲೈಯರಾಜ, ತಮಿಳುನಾಡ್‌ದ ಸಿದ್ಧಪನ್ ಅಯ್ಯಪ್ಪನ್, ಸಾರಿಗೆ ಬೊಕ್ಕ ಮುಜರಾಯಿ ಸಚಿವೆರ್‌ ರಾಮಲಿಂಗ ರೆಡ್ಡಿ, ವಿಧಾನ ಪರಿಷತ್ ಶಾಸಕೆರ್‌ ಪ್ರತಾಪಸಿಂಹ ನಾಯಕ್, ಮಾಣಿಲ ಶ್ರೀ ಧಾಮದ ಶ್ರೀ ಮೋಹನದಾಸ ಸ್ವಾಮೀಜಿ, ಸಾಹಿತಿ ಹಿರೇಮಗಳೂರು ಕಣ್ಣನ್, ಧರ್ಮಸ್ಥಳದ ಮಾತೃಶ್ರೀ ಹೇಮಾವತಿ ವಿ. ಹೆಗ್ಗಡೆ, ಡಿ.ಹರ್ಷೇಂದ್ರ ಕುಮಾರ್, ಸುಪ್ರಿಯಾ ಹರ್ಷೇಂದ್ರ ಕುಮಾರ್, ಭಜನಾ ಪರಿಷತ್ ಜಿಲ್ಲಾ ಗುರ್ಕಾರ್ಲು ಬಾಲಕೃಷ್ಣ ಪಂಜ, ಪ್ರದೀಪ್ ಕುಮಾರ್ ಕಲ್ಕೂರ, ಟ್ರಸ್ಟಿ ಸಂಪತ್ ಸಾಮ್ರಾಜ್ಯ, ಬೆಂಗಳೂರುದ ಉದ್ಯಮಿ ಅನಂತರಾಮಯ್ಯ, ಭಜನಾ ವೇದಿಕೆಡ್‌ ಇತ್ತೆರ್.