ಪುತ್ತೂರ್ದ ಸುದ್ದಿ | Puttur News

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ಚಂಪಾ ಷಷ್ಠಿ ಮಹೋತ್ಸವದ ಪೂರ್ವಭಾವಿ ಸಭೆ

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ಚಂಪಾ ಷಷ್ಠಿ ಮಹೋತ್ಸವದ ಪೂರ್ವಭಾವಿ ಸಭೆ ನ.8 ದಾನಿ ದೇವಸ್ಥಾನದ ಆಡಳಿತ ಕಛೇರಿದ ಸಭಾಂಗಣಡ್ ನಡತ್ಂಡ್.

ಸಭೆತ ಗುರ್ಕಾರ್ಮೆನ್ ಶಾಸಕಿ ಭಾಗೀರಥಿ ಮುರುಳ್ಯ ವಹಿಸ್ ದ್ ಇತ್ತೆರ್.

ಚಾವಡಿಡ್ ಜಿಲ್ಲಾಧಿಕಾರಿ ಮುಲೈ ಮುಗಿಲನ್ , ಪುತ್ತೂರು ಉಪ ವಿಭಾಗದ ಸಹಾಯಕ ಆಯುಕ್ತೆರ್ ಗಿರೀಶ್ ನಂದನ್, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮೋಹನ್ ರಾಮ್ ಸುಳ್ಳಿ, ರಾಜ್ಯ ಧಾರ್ಮಿಕ ಪರಿಷತ್ ಸದಸ್ಯೆ ಮಲ್ಲಿಕಾ, ಕಾರ್ಯನಿರ್ವಹಣಾಧಿಕಾರಿ ಡಾ‌ l ನಿಂಗಯ್ಯ, ಸಹಾಯಕ ಕಾರ್ಯನಿರ್ವಾಹಣಾಧಿಕಾರಿ ರಾಜಣ್ಣ, ಸುಬ್ರಹ್ಮಣ್ಯ. ಗ್ರಾ.ಪಂ ಅಧ್ಯಕ್ಷೆ ಸುಜಾತಾ ಕಲ್ಲಾಜೆ, ವ್ಯವಸ್ಥಾಪನಾ ಸಮಿತಿ ಸದಸ್ಯರಾದ ಪಿ.ಜಿ.ಎಸ್ ಪ್ರಸಾದ್, ಮನೋಹರ ರೈ, ಶ್ರೀವತ್ಸಾ, ಪ್ರಸನ್ನ ದರ್ಬೆ, ಲೊಕೇಶ್ ಮುಂಡಕಜೆ, ವನಜಾ ಭಟ್, ಶೋಭಾ ಗಿರಿಧರ್, ಮಾಜಿ ಮಾಸ್ಟರ್ ಪ್ಲಾನ್ ಸಮಿತಿ ಸದಸ್ಯೆರಾಯಿನ ಮನೋಜ್, ಚಂದ್ರಶೇಖರ್, ಕಿಶೋರ್ ಕುಮಾರ್ ಕೂಜುಗೋಡು, ಡಾl ನಂದಕುಮಾರ್ ಇತ್ತೆರ್.

ಫೆ.17-24:ನಳೀಲು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಬ್ರಹ್ಮಕಲಶೋತ್ಸವ

ಪುತ್ತೂರು: ದೇವಸ್ಥಾನದ ಕಾರ್ಯಡ್ ಸಮರ್ಪಣಾ ಭಾವರ್ದ್‌ ಪೂಜೆ ಮಲ್ತ್‌ಂಡ ದೇವೆರ್ನ ಅನುಗ್ರಹ ತಿಕ್ಕೆರೆ ಸಾಧ್ಯ. ಒವ್ವೇ ನಿರ್ಧಾರ ದೆತೊಂಡಲ ಅವೆನ್‌ ಸರಿಯಾಯಿನ ರೀತಿಡ್‌ ಮಲ್ಪೊಡು ಮಾತ ಸಮಿತಿದಕುಲು ಪದಾಧಿಕಾರಿಲು ಸಂಪೂರ್ಣವಾದ್ ತನನ್‌ ತಾನು ದೇವತಾ ಕಾರ್ಯಡ್‌ ತೊಡಗಿಸಾವೊಂಡು ಬೇಲೆ ಮಲ್ಪೊಡು ಪಂದ್ ನಳೀಲು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಪುತ್ತೂರು ಶಾಸಕ ಅಶೋಕ್ ಕುಮಾರ್ ರೈ ಪಂಡೆರ್.

ಮೇರ್ ಪುತ್ತೂರು ತಾಲೂಕುದ ಕೊಳ್ತಿಗೆ ಗ್ರಾಮದ ನಳೀಲು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶೋತ್ಸವದ ಪೂರ್ವಭಾವಿ ಸಭೆತ ಗುರ್ಕಾರ್ಮೆ ವಹಿಸ್‌ದ್‌ ಪಾತೆರಿಯೆರ್.

ದೇವಸ್ಥಾನದ ಆಡಳಿತ ಮೊಕ್ತೇಸರೆರ್‌ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಗುರ್ಕಾರ್ಲು ಸಂತೋಷ್ ಕುಮಾರ್ ರೈ ನಳೀಲು‌, ಪಾಲ್ತಾಡಿ ಜಾಕೋಟೆತ್ತಡಿ ಶ್ರೀ ಉಳ್ಳಾಕುಲು ದೈವಸ್ಥಾನದ ಆಡಳಿತ ಸಮಿತಿ ಗುರ್ಕಾರ್ಲು ಸಂಜೀವ ಗೌಡ ಪಾಲ್ತಾಡಿ, ಹರಿಕೃಷ್ಣ ಭಟ್ ಬರೆಮೇಲು, ಪಾಲ್ತಾಡಿ ಶ್ರೀಉಳ್ಳಾಕುಲು ಫ್ರೆಂಡ್ಸ್ ಕ್ಲಬ್ ಮಾಜಿ ಗುರ್ಕಾರ್ಲು ಪ್ರವೀಣ್ ರೈ ನಡುಕೂಟೇಲು, ಸುಂದರ ಪೂಜಾರಿ ಮಣಿಕ್ಯರ, ಕೊಳಿಗೆ ಸಿಎ ಬ್ಯಾಂಕ್ ನಿರ್ದೇಶಕೆರ್ ಶ್ರೀಧರಗೌಡ ಅಂಗಡಿಹಿತ್ತು ವಿದ್ಯಾಧರ ಗೌಡ ಪಾರ್ಲ, ದೇವಸ್ಥಾನದ ಮೊಕ್ತೇಸರೆರ್ ಡಾ. ಸುಚೇತಾ ಜೆ. ಶೆಟ್ಟಿ ಮೊಕ್ತೇಸರೆರ್ ಕಿಶೋರ್ ಕುಮಾರ್ ರೈ ನಳೀಲು, ಎಡಲ ಶೆಟ್ಟಿ ಪಾಲ್ತಾಡಿ ಗುತ್ತಿನಮನೆ, ಪಾಲ್ತಾಡು ನಡುಮನೆ ಶ್ರೀವಿಷ್ಣುಮೂರ್ತಿ ದೈವಸ್ಥಾನದ ಆಡಳಿತ ಮೊಕ್ತೇಸರೆರ್ ನವೀನ್ ರೈ ನಡುಮನೆ, ರಘುನಾಥ ರೈ ನಡುಕೂಟೇಲು, ಅಮರನಾಥ ರೈ ಬಾಕಿಜಾಲು ಪಾತೆರ್ದ್ ಸಲಹೆ, ಸೂಚನೆನ್‌ ಕೊರಿಯೆರ್.

ಅಕ್ಷಯ್ ಕಲ್ಲೇಗ ಕೆರ್ನ ಕೇಸ್ ದ ಆರೋಪಿಲೆಗ್ ನ.22 ಮುಟ್ಟ ನ್ಯಾಯಾಂಗ ಕಸ್ಟಡಿ

ಪುತ್ತೂರು: ನ.6 ದಾನಿ ರಾತ್ರೆ ನೆಹರು ನಗರಡ್ ಕಲ್ಲೇಗ ಟೈಗರ್‍ಸ್ ತಂಡದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗ ಅರೆನ ಕೆರ್ನ ಕೇಸ್‌ ದ ಆರೋಪಿಲಾಯಿನ ಚೇತನ್‌, ಮನೀಶ್‌, ಕೇಶವ, ಮಂಜುನಾಥ್‌ ಮೊಕ್ಲೆನ್ ನ.8 ದಾನಿ ಕೋರ್ಟ್‌ಗ್ ಹಾಜರ್‌ ಮಲ್ತೆರ್.‌ ನ್ಯಾಯಾಧೀಶೆರ್ ನ.22 ಮುಟ್ಟ ನ್ಯಾಯಾಂಗ ಕಸ್ಟಡಿ ಪಾರ್ದ್ ಆದೇಶ ಕೊರ್ತೆರ್.

ಕುಕ್ಕೆಗ್ ಸರ್ಪ ಸಂಸ್ಕಾರಗ್‌ ಬತ್ತಿನ ಜನಕ್ಕ್ ಹಾರ್ಟ್‌ ಆಟ್ಯಾಕ್‌!

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಸರ್ಪ ಸಂಸ್ಕಾರಗ್ ಬತ್ತಿನ ಒಂಜಿ ಜನ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ನ.8 ಕಾಂಡೆ ವರದಿ ಆತ್‌ಂಡ್. ಬೆಂಗಳೂರುದ ಕೆಂಗೇರಿದ ವ್ಯಕ್ತಿ ಅಂದಾಜಿ 55 ವರ್ಷ . ಇನಿ ಕಡೆತ ದಿನತ ಸರ್ಪ ಸಂಸ್ಕಾರ ಪೂಜೆಯಾದ್‌ ಇನಿಯೆ ಹಾರ್ಟ್‌ ಅಟ್ಯಾಕ್‌ಡ್‌ ತೀರ್‌ಪೋತೆರ್.

ಸಂಪಾಜೆದ ಚೈತ್ರಾ ದೇವಜನ ಮಿಸೆಸ್ ಮಲೇಷ್ಯಾ ಪಂತೊಡು ಮೂಜಿ ಇನಾಮು ಗೆಂದಿಯೆರ್

ಮಲೇಷ್ಯಾಡ್ ಇಪ್ಪುನ ಸಂಪಾಜೆ ಮೂಲದ ಚೈತ್ರಾ ದೇವಜನ ಈ ಸರ್ತಿದ ಮಿಸೆಸ್ ಮಲೇಷ್ಯಾ ಫೈನಲಿಸ್ಟ್ ಆದ್ ಮೂಜಿ ಇನಾಮುನ್‌ ಗೆಂದ್‌ದೆರ್. ಕುಶಲ ದಿವಾ, ಟ್ಯಾಲೆಂಟ್ ಟೊರ್ನೆಡೊ, ಬಾರ್ಬಿ ಐಕಾನ್ ಶೀರ್ಷಿಕೆದ ಬೇತೆ ಬೇತೆ ಪ್ರದರ್ಶನಡ್ ಚೈತ್ರಾ ಇನಾಮು ಪಡೆಯೊಂದೆರ್.‌

ಸಂಪಾಜೆದ ದೇವಜನ ದಿ.ಜಯಸೂರ್ಯ ಬೊಕ್ಕ ದಿ. ನಾಗವೇಣಿ ದಂಪತಿನ ಮಗಲಾಯಿನ ಚೈತ್ರಾ ಹೈದರಾಬಾದ್ ಮೂಲದ ರಾಜೇಂದ್ರ ಪ್ರಸಾದ್ ಅರೆನೊಟ್ಟಿಗೆ ಮದಿಮೆ ಆದ್ ಕರಿನ ಏಳ್‌ ವರ್ಷರ್ದ್ ಮಲೇಷ್ಯಾದ ಕೌಲಾಲಂಪುರಡ್‌ ವಾಸ ಆದ್‌, ಅಲ್ಪ ಸ್ವಂತ ಉದ್ಯಮ ಮಲ್ತೊಂದು ಉಲ್ಲೆರ್.‌

ಸುಬ್ರಹ್ಮಣ್ಯ: ಸಂಚಾರಿ ವಿಜ್ಞಾನ ಪ್ರದರ್ಶನ ಉದಿಪನ

ದಕ್ಷಿಣ ಕನ್ನಡ ಸೈನ್ಸ್ ಫೌಂಡೇಶನ್ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್ ದಕ್ಷಿಣ ಕನ್ನಡ ಘಟಕ, ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು, ಲಯನ್ಸ್ ಕ್ಲಬ್ ಕಡಬ, ನೆತ್ತ ಒಟ್ಟು ಸೇರಿಗೆಡ್ ಸಂಚಾರಿ ವಿಜ್ಞಾನ ಪ್ರದರ್ಶನ ಕಾರ್ಯಕ್ರಮ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜ್ ಡ್ ನವಂಬರ್ 6 ದಾನಿ ಉದಿಪನ ಆಂಡ್.

ಲೇಸ್ ದ ಉದಿಪನನ್ ವಿಶ್ವೇಶ್ವರಯ್ಯ ಕೈಗಾರಿಕಾ ಬೊಕ್ಕ ತಾಂತ್ರಿಕ ವಸ್ತು ಸಂಗ್ರಹಾಲಯ ಬೆಂಗಳೂರು ನೆತ್ತ ಎಜುಕೇಶನ್ ಆಫೀಸರ್ ಹೇಮರಾಜ್ ಪಾತೆರ್ದ್ ” ಇತ್ತೆದ ತಾಂತ್ರಿಕ ಯುಗಟ್ ನಮಲ ಅವೆತ ಪಿರಾವುಡ್ ಪೋವೊಡಾಪುಂಡು. ಆ ನಿಟ್ಟ್ ಡ್ ವಿದ್ಯಾರ್ಥಿಲು ತನ್ನ ಪ್ರೌಢ ಹಂತಡೆ ವಿಜ್ಞಾನದ ಬಗ್ಗೆ ಎಚ್ಚಿನ ಆಸಕ್ತಿನ್ ವಹಿಸಿದ್ ಕ್ಲಾಸ್ ಡ್ ಪಾಠ ಕೇನ್ನ ಒಟ್ಟಿಗೆ ಪ್ರಾಯೋಗಿಕವಾದ್ ಅವೆತ ವಿವರಣೆನ್ ಬೊಕ್ಕ ಮಾಹಿತಿನ್ ತೆರಿಯೊನ್ನ ಅವಶ್ಯಕ ಪಂದ್ ಪಂಡೆರ್.

ಸಮಾರಂಭದ ಅಧ್ಯಕ್ಷತೆನ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ವಹಿಸ್ ದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಕಡಬ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ಗೋಪಾಲಕೃಷ್ಣ, ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕೆರ್ ಕೃಷ್ಣ ಭಟ್, ತಾಂತ್ರಿಕ ಸಹಾಯಕೆರಾಯಿನ ಚಂದ್ರ, ಬೊಕ್ಕ ದಿಲೀಪ್ ಜಟ್ಟಿ, ಕಾಲೇಜ್ ದ ಭೌತಶಾಸ್ತ್ರ ಉಪನ್ಯಾಸಕೆರ್ ಗಿರೀಶ್ ಇತ್ತೆರ್. ಸಂಚಾರಿ ವಿಜ್ಞಾನ ಪ್ರದರ್ಶನ ನವೆಂಬರ್6 ರ್ದ್ ಡಿಸೆಂಬರ್ 5 ಮುಟ್ಟ ನಿರಂತರವಾದ್ ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ ಇಪ್ಪುನ ಕೆಲವು ಶಾಲೆಗ್ ಪೋದು ವಿದ್ಯಾರ್ಥಿಲೆಗ್ ತಾಂತ್ರಿಕ ಮಾಹಿತಿನ್ ಕೊರ್ಪೆರ್. ಪ್ರೌಢಶಾಲಾ ಪ್ರಭಾರ ಮುಖ್ಯ ಶಿಕ್ಷಕ ಕೃಷ್ಣ ಭಟ್ ಮಾತೆರೆನ್ ಎದ್ಕೊಂದು, ಸಹ ಶಿಕ್ಷಕ ಸುರೇಶ್ ಲೇಸ್‌ನ್ ಸುದಾರಿಕೆ ಮಲ್ತೆರ್. ಸಹ ಶಿಕ್ಷಕಿ ಸೊಲ್ಮೆ ಸಂದಾಯ ಮಲ್ತೆರ್. ಬೊಕ್ಕ ವಿದ್ಯಾರ್ಥಿಲೆಗ್ ವಿಜ್ಞಾನ ಪ್ರದರ್ಶನನ್ ತೂವೆರೆ ಅವಕಾಶ ಮಲ್ತೆರ್ .

ಜೋಕ್ಲೆನ ಕಲಾ ಲೋಕರ್ದ್ ರಾಜೇಶ್ ವಿಟ್ಲಗ್ “ಬಾಲಬಂಧು” ಪುರಸ್ಕಾರ‌

ವಿಟ್ಲ : ಜೋಕ್ಲೆನ ಕಲಾಲೋಕ ಕನ್ನಡ ಸಾಹಿತ್ಯ ಪರಿಷತ್ ಬಂಟ್ವಾಳ ತಾಲೂಕು ಘಟಕ ಜೋಕ್ಲೆಗಾದ್ ಕಲೆ ಸಾಹಿತ್ಯ ಚಟುವಟಿಕೆಡ್ ಪ್ರತಿ ವರ್ಷ ಕೊರ್ಪುನ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರಗ್‌ ಈ ಸರ್ತಿ ರಾಜೇಶ್ ವಿಟ್ಲ ಆಯ್ಕೆಯಾತೆರ್. ‌

ಕಡೇಶಿವಾಲಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ನೇತೃತ್ವಡ್ ನ.6 ದಾನಿ ನಡಪುನ 17ನೇ ವರ್ಷದ ಬಂಟ್ವಾಳ ತಾಲೂಕು ಜೋಕ್ಲೆನ ಸಾಹಿತ್ಯ ಸಮ್ಮೇಳನಡ್, ಸಮಾರೋಪ ಸಮಾರಂಭಡ್ ರಾಜೇಶ್ ವಿಟ್ಲ ಮೇರೆಗ್‌ ಮಾನಾದಿಗೆ ಮಲ್ತ್‌, ಬಂಟ್ವಾಳ ತಾಲೂಕು ಮಟ್ಟದ ಬಾಲಬಂಧು ಪುರಸ್ಕಾರನ್‌ ಕೊರಿಯೆರೆ ಉಲ್ಲೆರ್‌ ಪಂದ್ ಜೋಕ್ಲೆನ ಕಲಾ ಲೋಕದ ಗುರ್ಕಾರೆರಾಯಿನ ರಮೇಶ ಎಂ. ಬಾಯಾರು ತೆರಿಪಾದೆರ್.

ಉಬಾರ್:‌ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಕಲ್ಪಾರ್ಥಿ

ಉಬಾರ್: ಕಲ್ಪಾರ್ಥಿ ಒರಿ ಹಾರ್ಟ್‌ ಆಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ಉಬಾರ್‌ ಕೈತಲ್‌ದ ನೆಲ್ಯಾಡಿದ ಕೌಕ್ರಾಡಿದಲ್ಪ ನಡತ್‌ಂಡ್. ತೀರ್‌ಪೋಯಿನ ಕಲ್ಪಾರ್ಥಿ ಕೌಕ್ರಾಡಿ ಶಾಂತಿ ಬೆಟ್ಟು ನಿವಾಸಿ ಯೂಸುಫ್ ಅರೆನ ಮಗೆ ಮಹಮ್ಮದ್ ಇರ್ಫಾನ್ (18) ಪಂದ್‌ ತೆರಿದ್‌ ಬೈದ್‌ಂಡ್.‌

ಇರ್ಫಾನ್ ಎ.ಸಿ ಮೆಕ್ಯಾನಿಕ್ ಕಲ್ತೊಂದು ಇತ್ತ್‌ದ್‌, ಮೇರೆಗ್‌ ಪೊಪ್ಪ, ಅಮ್ಮ, ಅಣ್ಣೆ, ಬೊಕ್ಕ ಮೂಜಿ ಜನ ಅಕ್ಕನಕುಲು ಉಲ್ಲೆರ್.

ಅಕ್ಷಯ್ ಕಲ್ಲೇಗ ಮರ್ಡರ್‌ ಕೇಸ್; ಮೂಜಿನೇ ಆರೋಪಿ ಅರೆಸ್ಟ್!‌‌

ಪುತ್ತೂರು : ಪುತ್ತೂರು ಪೇಂಟೆಡ್‌ ಸೋಮವಾರ ನಡುರಾತ್ರೆ ನಡತ್ತಿನ ಪುಗರ್ತೆದ ಕಲ್ಲೇಗ ಟೈಗರ್ಸ್‌ ಕೂಟದ ಮುಖ್ಯಸ್ಥೆ ಅಕ್ಷಯ್‌ ಕಲ್ಲೇಗ ಮರ್ಡರ್‌ ಕೇಸ್‌ದ ಮೂಜಿನೇ ಆರೋಪಿನ್‌ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್.‌

ಮಂಜುನಾಥ್‌ ಅರೆಸ್ಟ್‌ ಆಯಿನ ಮೂಜಿನೇ ಆರೋಪಿ, ಚೇತನ್‌ ಬೊಕ್ಕ ಮನೀಶ್‌‌ ಇನಿ ಕಾಂಡೆನೆ ಪೋದು ಸರೆಂಡರ್‌ ಆದಿತ್ತೆರ್ ಸೋಮವಾರ ​ಬಯ್ಯಗ್‌ ಆಯಿನ ಒಂಜಿ ಆಕ್ಸಿಡೆಂಟ್‌ದ ವಿಚಾರವಾದ್ ಅಕ್ಷಯ್‌ ಬೊಕ್ಕ ಆರೋಪಿಲೆನ ನಡುಟ್ಟು ಪಾತೆರಕತೆ ಆದಿತ್‌ಂಡ್.

ಆಕ್ಸಿಡೆಂಟ್‌ಡ್‌ ಆಯಿನ ನಷ್ಟದ ಕಾಸ್‌ದ ಬಗೆಟ್‌ ಪಾತೆರಿಯರೆ ಪಂದ್‌ ಆರೋಪಿಲು ಅಕ್ಷಯ್‌ನ್ ರಾತ್ರೆ 11.30 ಗಂಟೆಗ್ ಕುಡೊರ ಲೆತ್ತ್‌ದ್‌ ಇತ್ತೆರ್‌ ಪಂದ್ ತೆರಿದ್‌ ಬೈದ್‌ಂಡ್. ಪಾತೆರಕತೆ ಜೋರ್‌ ಜೋರ್‌ ಆದ್‌ ಆ ಪೊರ್ತುಡು ಅಕುಲ್‌ ಮರ್ಡರ್‌ ಮಲ್ತ್‌ದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್.‌

ಉಂದುವೇ ಅಕ್ಷಯ್ ಕಲ್ಲೇಗ ಕೂಟದಕುಲ್‌ ಬಿಗ್ ಬಾಸ್‌ ಸೀಸನ್‌ 9 ಡ್‌ ಪಿಲಿಯೇಸ್‌ನ್‌ ನಲ್ತ್‌ದ್‌ ಪುಗರ್ತೆನ್‌ ಪಡೆದಿತ್ತೆರ್.