ಕುಡ್ಲದ ಸುದ್ದಿ | Mangalore News

ಶುಕ್ರಾರ ಪಾವಂಜೆದ ಮೇಳ ಪಿದಾಡರೆ

ಯಾಗದ ನೆಲ, ನಾಗವೃಜ ಕ್ಷೇತ್ರ ಪುಗರ್ತೆದ ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನದ ಮೇಳ ಪಿದಾಡುನ ಲೇಸ್ ಉಂದುವೇ 27 ತಾರೀಕ್ ದಾನಿ ಶುಕ್ರಾರ ಮಧ್ಯಾಹ್ನ 1 ಗಂಟೆರ್ದ್ ರಾತ್ರೆ 11 ಗಂಟೆ ಮುಟ್ಟ ನಡಪರ್ ಉಂಡು ಪಂಡ್ ದ್ ದೇವಸ್ಥಾನ ದ ಆಡಳಿತ ಮೊಕ್ತೇಸರೆರ್ ಎಂ.ಶಶೀಂದ್ರ ಕುಮಾರ್ ಸೋಮಾರ ಸುದ್ದಿಗೋಷ್ಠಿಡ್ ಪಂಡೆರ್.
ಶುಕ್ರಾರ ಮಧ್ಯಾಹ್ನ 1 ಗಂಟೆಗ್ ತೆನ್ಕಾಯಿ ಬೊಕ್ಕ ಬಡಕಾಯಿ ತಿಟ್ಟ್ ದ ಮಲ್ಲ ಕಲಾವಿದೆರ್ನ ಒಟ್ಟುಸೇರಿಗೆಡ್ ಯಕ್ಷಗಾನಾರಾಧನೆ ನಡಪರೆ ಉಂಡು.

ಮೂಜರೆ ಗಂಟೆಗ್ ದೇವಸ್ಥಾನೊರ್ದು ರಂಗಸ್ಥಳದ ಚೌಕಿ ಮುಟ್ಟ ದಾನಿಲು ಕೊರ್ತಿನ ಬೊಳ್ಳಿದ ಪ್ರಭಾವಳಿ, ಶ್ರೀ ದೇವಿನ ಉಜ್ಜಾಲ್, ಕಿರೀಟ, ಚಕ್ರ, ಗದೆ ಇಂಚಿನ ಮಾತಾ ಸುವಸ್ತುಲೆನ ಮೆರವಣಿಗೆ ಬೊಕ್ಕ ಸಮರ್ಪಣೆ ನಡಪರೆ ಉಂಡು ಪಂಡೆರ್.ಬಯ್ಯಡ್ ನಾಲ್ ಗಂಟೆಗ್ ಧಾರ್ಮಿಕ ಸಭೆತ್ತ ಲೇಸ್ ಡ್ ಚಿಕ್ಕಮಗಳೂರು ವೇದ ವಿಜ್ಞಾನ ಕೇಂದ್ರದ ವೇದ ಕೃಷಿಕೆರ್ ಕೆ.ಎಸ್. ನಿತ್ಯಾನಂದೆರ್ ಶುಭಾಶಂಸನೆ ಮಲ್ಪುವೆರ್. ಜಾಗತಿಕ ಬಂಟೆರ್ನ ಸಂಘೊಲೆನ ಒಕ್ಕೂಟದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ರ್ ಲೇಸ್ ದ ಗುರ್ಕಾರ್ಮೆ ಒಯಿಸೊನುವೆರ್. ಮಂತ್ರಿಲು ಕೋಟ ಶ್ರೀನಿವಾಸ ಪೂಜಾರ್ಲು, ರಾಜ್ಯ ಬಿಜೆಪಿದ ಗುರ್ಕಾರ್ಲು ನಳಿನ್ ಕುಮಾರ್ ಕಟೀಲು, ಶಾಸಕೆರಾಯಿನ ಉಮಾನಾಥ ಕೋಟ್ಯಾನ್, ಡಾ.ವೈ. ಭರತ್ ಶೆಟ್ಟಿ, ಮಾಜಿ ಮಂತ್ರಿಲು ಅಭಯಚಂದ್ರ ಜೈನ್, ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಮೊಕುಲು ಮಾತ ಪಾಲ್ ಪಡೆವೆರ್.
ಐರ್ದ್ ಬೊಕ್ಕ ಪಾಂಡವಾಶ್ವಮೇಧ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂಡ್ ದ್ ಶಶೀಂದ್ರೆರ್ ಪಂಡೆರ್.ಮೇಳದ ಮಲ್ಲ ಭಾಗವತೆರ್ ಪಟ್ಲ ಸತೀಶ್ ಶೆಟ್ರ್ ಪಾತೆರ್ದ್ ಈ ಸೀಸನ್ ದ ಮೇ 26 ತಾರೀಕ್ ಮುಟ್ಟ 150 ಆಟ ಬುಕ್ಕಿಂಗ್ ಆತ್ಂಡ್. ಸೇವೆ ಕೊರ್ಪಿನಕಲೆನ ಇಚ್ಛೆದ ಪ್ರಕಾರ ಮರಿಯಲೊಡಲಾ ಪರಕೆದ ಆಟ ಗೊಬ್ಬರೆ ಎಂಕುಲು ತಯಾರ್ ಉಲ್ಲ. 38 ಮುಟ್ಟ ಎಡ್ಡೆ ಕಲಾವಿದೆರ್ ಉಲ್ಲೆರ್. ನನಲಾ ಕೆಲವು ಕಲಾವಿದೆರ್ ಮೇಳೊಗು ಸೇರ್ರೆ ಕಾತೊಂದುಲ್ಲೆರ್. ಇತ್ತೆ 50000 ರೂಪಾಯಿ ವೀಳ್ಯ ನಿಗಂಟ್ ಮಲ್ದ. ಕಲಾವಿದೆರೆಗ್ ಆರೋಗ್ಯ ವಿಮೆ, ಅಕ್ಲೆನ ಸಂಸಾರದ ಪಣವುದ ಭದ್ರತೆ ಇಂಚಿನ ಮಾತ ಸೌಕರ್ಯ ಕೊರ್ಪ. ಕೊರೊನಾದ ರೀತಿ ರಿವಾಜುಲೆನ್ ಕಟ್ಟ್ ನಿಟ್ಟ್ ಡ್ ಪಾಲನೆ ಮಲ್ಪುವ ಪಂಡೆರ್.ಕ್ಷೇತ್ರದ ಧರ್ಮದರ್ಶಿಲು ಡಾ. ಯಾಜಿ ನಿರಂಜನ ಭಟ್ ಪಾತೆರ್ದ್ , ಯಜ್ಞ ಯಾಗೊಲು ನಡತಿನ ಪುಣ್ಯ ಮಣ್ಣ್ ಉಂದು. ಯಕ್ಷಗಾನ ದ ಒರುಟ್ಟು ಜ್ಞಾನ ದ ಪ್ರಸಾರ ಮಲ್ಪುನ ಉದ್ದೇಶೊಡು ಪೊಸ ಮೇಳ ಮಲ್ತ್ ದ. ಪೌರಾಣಿಕ ಕತೆಕುಲೆನ್ ಪ್ರದರ್ಶನ ಮಲ್ತ್ ದ್ ಭಾರತದ ಮೌಲ್ಯೊನು ಒರಿಪಾವುನ ಬುಳೆಪಾವುನ ಉದ್ದೇಶ ನಮ್ಮವು ಪಂಡೆರ್.

ಲೋಕಮುಖಿ ಟ್ರಸ್ಟ್ ಕಟ್ಟೋಣೊಗು ಕೆಸರ್ ಕಲ್ಲ್

ಲೋಕಮುಖಿ ಟ್ರಸ್ಟ್ ದ ಪೊಸ ಕಟ್ಟೋಣಗ್ ಮುಲ್ಕಿ ಕೈತಲ್ದ ಶೀನಪ್ಪಯ್ಯ ಕೋಡಿದಲ್ಪ ಡಾ. ಕಲ್ಲಡ್ಕ ಪ್ರಭಾಕರ ಭಟ್ರ್ ಸೋಮಾರ ಕೆಸರ್ ಕಲ್ಲ್ ಪಾಡಿಯೆರ್.

ಮಂತ್ರಿಲು ಕೋಟ ಶ್ರೀನಿವಾಸ ಪೂಜಾರಿ, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತೆರ್, ಸೀತಾರಾಮ ಶೆಟ್ರ್, ವೈ.ಎನ್.ಸಾಲ್ಯಾನ್, ಸೋಂದ ಭಾಸ್ಕರ ಭಟ್ರ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಭುವನಾಭಿರಾಮ ಉಡುಪ, ಸುನಿಲ್ ಆಳ್ವ, ಶೋಭೇಂದ್ರ ಸಸಿಹಿತ್ಲು ಮೊಕುಲು ಮಾತಾ ಲೇಸ್ ಡ್ ಪಾಲ್ ಪಡೆಯೆರ್.

ವಿಜಯಾ ಕಲಾವಿದೆರ್ ಕುಟುಂಬದ ಸಾಧಕೆರೆಗ್ ಮಾನಾದಿಗೆ, ಊರುಗು ಬರೊಡ್ಚಿ ನಾಟಕದ ಮುರ್ತ

ವಿಜಯಾ ಕಲಾವಿದೆರ್ ಕಿನ್ನಿಗೋಳಿ ನೆತ್ತ ಒರುಟ್ಟು ಕುಟುಂಬೊದ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ “ಊರುಗು ಬರೊಡ್ಚಿ” ತುಳು ನಾಟಕೊದ ಮುರ್ತದ ಲೇಸ್ ಐತಾರದಾನಿ
ಕಿನ್ನಿಗೋಳಿದ ಐಕಳ ಹರೀಶ್ ಶೆಟ್ರೆನ ಶ್ರೀ ಭ್ರಮರಾಂಬಿಕೆ ಇಲ್ಲದ ಜಾಲ್ ಡ್ ನಡತ್ಂಡ್.
ಸಮಾಜೊಗು ಎಡ್ಡೆಂತಿನೆನ್ ಬೋಧನೆ ಮಲ್ಪುನ ವಿಜಯಾ ಕಲಾವಿದೆರ್ನ ಯಶಸ್ವಿ “ಬೈರಾಸ್ ಭಾಸ್ಕರೆ” ನಾಟಕೊದ ಲೆಕ್ಕನೆ ಊರುಗು ಬರೊಡ್ಚಿ ಪನ್ಪಿನ ನಾಟಕಲಾ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್ ಮಲ್ಲ ಬಿನ್ನೆರಾದ್ ಬತ್ತಿನ ಶ್ರೀ ಲಕ್ಷ್ಮಿ ನಾರಾಯಣ ಆಸ್ರಣ್ಣೆರ್ ಪಂಡೆರ್.ಲೇಸ್ ದ ಗುರ್ಕಾರ್ಮೆ ವಹಿಸಿದಿತ್ತಿನ ಜಾಗತಿಕ ಬಂಟೆರ್ನ ಸಂಘೊಲೆನ ಫೆಡರೇಷನ್ ದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ರ್ ಪಾತೆರ್ದ್ ಶುಭ ಹಾರೈಕೆ ಮಲ್ತೆರ್. ಕೊರೊನಾದ ಕಾಲೊಡು ಬೊಂಬಾಯಿದಕಲೆನ ಪರಿಸ್ಥಿತಿ ಬಾರಿ ಬಂಞ ಇತ್ತ್ಂಡ್. ಆಂಡಾ ಬೊಂಬಾಯಿ ಇಜ್ಜಿಡ ಊರು ಇಜ್ಜಿ . ದಾಯೆ ಪಂಡ ಊರುದ ಬುಲೆಚ್ಚಿಲ್ ಗ್ ದೈವ ದೇವಸ್ಥಾನೊಲೆನ ಜೀರ್ಣೋದ್ಧಾರೊಗು ಏತ್ ಕಷ್ಡ ಆಂಡಲಾ ಕಷ್ಟ ಬುಡ್ತಿನಕುಲು ಬೊಂಬಾಯಿದಕುಲು. ಇಂಚಿನ ಪೊರ್ತುಡು ಊರುಗು ಬರೊಡ್ಚಿ ಪನ್ಪಿನ ನಾಟಕ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್.
ಧರ್ಮದರ್ಶಿ ಹರಿಕೃಷ್ಣ ಪುನರೂರು ,
ಕಲಾಪೋಷಕೆರ್, ಸಂತೋಷ್ ಶೆಟ್ಟಿ , ರಂಗ ನಿರ್ದೇಶಕೆರ್ ಚಂದ್ರಶೇಖರ ಸುವರ್ಣೆರ್ ಶುಭ ಹಾರೈಕೆ ಮಲ್ತೆರ್.

ಚಂದ್ರಿಕಾ ಹರೀಶ್ ಶೆಟ್ರ್ ,ಯಕ್ಷ ಲಹರಿದ ಗುರ್ಕಾರ್ಲು ರಘುನಾಥ ಕಾಮತ್ ಕೆಂಚನಕೆರೆ, ರಂಗ ನಟೆ ರಾಜೇಶ್ ಕೆಂಚನಕೆರೆ, ಮೂಲ್ಕಿ ವಲಯದ ಪತ್ರಕರ್ತೆರ್ನ ಕೂಟದ ಗುರ್ಕಾರ್ಲು ನಿಶಾಂತ್ ಕಿಲೆಂಜೂರು , ಸ್ವರಾಜ್ ಶೆಟ್ರ್ ಮೊಕುಲು ಇತ್ತೆರ್.ಉಂದುವೇ ಪೊರ್ತುಡು
ಧಾರ್ಮಿಕ ಪರಿಷತ್ ದ ಪದುಕೆರಾಯಿನ ಯುಗಪುರುಷ ದ ಸಂಪಾದಕೆರ್ ಭುವನಭಿರಾಮ ಉಡುಪೆರ್, ಮಲ್ಲ ಬೆನ್ನಿದಾರ್ , ಕಲಾವಿದೆ ಸುಧಾಕರ ಸಾಲ್ಯಾನ್ ಅಂಚೆನೇ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಪತ್ರಕರ್ತೆ ನರೇಂದ್ರ ಕೆರೆಕಾಡು ಮೆರೆಗ್ ಮಾನಾದಿಗೆ ಮಲ್ತೆರ್.ಉಂದುವೇ ಪೊರ್ತುಡು ಐಕಳ ಹರೀಶ್ ಶೆಟ್ರ್ ನಾಟಕಕಾರೆ ಹರೀಶ್ ಪಡುಬಿದ್ರಿ ಮೆರೆಗ್ ನಾಟಕೊಗು ವೀಳ್ಯ ಕೊರಿಯೆರ್.

ಬಾಲ ಕಲಾವಿದೆ ಮಂಜೂಷ ಭಗವಾನ್ ಸುರತ್ಕಲ್ ದೇವೆರೆನ್ ಸುಗಿತೆರ್.
ವಿಜಯ ಕಲಾವಿದೆರ್ ನೆತ್ತ ಸಂಚಾಲಕೆರ್ ಸಾಯಿನಾಥ್ ಶೆಟ್ಟಿ ಮಾನಾದಿಗೆ ಪಡೆಯಿನಕಲೆಗ್ ಅಭಿನಂದನೆ ಮಲ್ತೆರ್.ಕಲಾವಿದೆರಾಯಿನ ಭಾಸ್ಕರ ಪಕ್ಷಿಕೆರೆ, ಹರಿಪ್ರಸಾದ್ ನಂದಳಿಕೆ, ಸುಷ್ಮಿತಾ ಕುಲಾಲ್ ಮಾನಾದಿಗೆ ಪತ್ರ ಓದು ಪಂಡೆರ್.
ವಿಜಯಾ ಕಲಾವಿದೆರ್ ಗುರ್ಕಾರ್ಲು ಶರತ್ ಶೆಟ್ಟಿ ಎದ್ಕೊಂಡೆರ್ . ಅಂಚೆನೇ ಲೇಸ್ ನಡಪಾದ್ ಕೊರಿಯೆರ್.

ಅತ್ಯಾಚಾರ ಮಲ್ತಿನ ಆರೋಪಡ್ ಕಲ್ಲಮುಂಡ್ಕೂರ್ ದ ರಿಕ್ಷಾ ಚಾಲಕ ನ ಬಂಧನ

ಮೂಡುಬಿದಿರೆ : ಎಲ್ಯ ಪೊಣ್ಣನ್ ಅತ್ಯಾಚಾರ ಮಲ್ತಿನ ಆರೋಪಡ್ ಕಲ್ಲಮುಂಡ್ಕೂರ್ ದ ರಿಕ್ಷಾ ಚಾಲಕೆನ್ ಕುಡ್ಲದ ಮಹಿಳಾ ಪೊಲೀಸೆರ್ ಬಂಧಿಸಿ ಪೊಕ್ಸೊ ಪ್ರಕರಣ ದಾಖಲ್ ಮಲ್ದೆರ್ .

ಬಂಧಿತ ಆರೋಪಿನ್ ಸತೀಶ್ ಅಂಚನ್ ಪಂದ್ ಪಂತೆರ್ . ಇಂಬೆ ತಾಸೆ ವಾದಕೆ ಪಂದ್ ತೆರಿದ್ ಬೈದುಂಡು . ತನ್ನ ಊರ್ದ ಎಲ್ಯ ಪೊಣ್ಣ ನೊಟ್ಟುಗು ಸ್ನೇಹ ಆದ್ ಆಲ್ನೋಟ್ಟುಗು ಸಲುಗೆಡ್ ನಡತೊಂದು ಇತ್ತೆ ಪಂದ್ ತೆರಿದ್ ಬೈದುಂಡು . ಜುಲೈಡ್ ಪೊಣ್ಣು ಕಲ್ಲಮುಂಡ್ಕೂರ್ ಡ್ ನಡತೊಂದು ಬರೊಂದು ಉಪ್ಪುನಗ ಆರೋಪಿ ಸತೀಶ್ ಆರ್ನ ರಿಕ್ಷಾಡ್ ಬಲವಂತವಾದ್ ಕುಲ್ಲದ್ ಕಲ್ಲ್ ಕೋರೆಗ್ ಲೆತೊಂದು ಅತ್ಯಾಚಾರ ಮಲ್ದೆ ಪಂದ್ ತೆರಿದ್ ಬೈದುಂಡು .

ತುಳುನಾಡ ತುತ್ತೈತ ಜೋಕ್ಲೆನ ಬಾವಚಿತ್ರ ಪಂಥೊದ ಮುಗಿತಲದ ಲೇಸ್ ಅಂಚನೇ ಕೊರಗಜ್ಜನ ಪದತ್ತ ಬಾಲೆ ಕಾರ್ತಿಕ್ ಗ್ “ತುಳುವ ಕುರಲ್” ಬಿರ್ದ್

ಕುಡ್ಲ : ಕೊರಗಜ್ಜನ ಪದ ಪಂಡ್ ದ್ ಪುಗರ್ತೆ ಪಡೆಯಿನ ಕಾರ್ಲದ ಬಾಲೆ ಕಾರ್ತಿಕ್ ಗ್ ” ತುಳುವ ಕುರಲ್” ಪನ್ಪಿನ ಬಿರ್ದ್ ಕೊರ್ದು ಮಾನಾದಿಗೆ ಮಲ್ಪುನ ಲೇಸ್ ಶನಿಯಾರ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸಿರಿ ಚಾವಡಿಡ್ ನಡತ್ಂಡ್.ಜೋಕುಲೆನ ದಿನೊತ್ತ ಲೆಕ್ಕೊಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆ, ರೋಟರಿ ಕ್ಲಬ್ ಮುಲ್ಕಿ ಬೊಕ್ಕ ಶ್ರೀ ಸುಬ್ರಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ತೋಕೂರು ಹಳೆಯಂಗಡಿ ಮೊಕಲೆನ ಒಟ್ಟು ಸೇರಿಗೆಡ್ ನಡತಿನ ತುಳುನಾಡ ತುತ್ತೈತ ಜೋಕುಲೆನ ಬಾವಚಿತ್ರ ಪಂಥೊದ ಮುಗಿತಲದ ಲೇಸ್ ಡ್ ಬಿರ್ದ್ ಕೊರ್ಪಿನ ಕಜ್ಜ ನಡತ್ಂಡ್.

ಉಂದುವೇ ಪೊರ್ತುಡು ಬಾಲೆ ಕಾರ್ತಿಕ್ ನ ಮರ್ದ್ ಅನುಪಾನೊಗು ಬಿನ್ನೆರಾದ್ ಬತ್ತಿತ್ತಿನ ರೋಟರಿ ೩೧೮೧ ಜಿಲ್ಲೆದ ಗವರ್ನರ್ ರೊ.ರಂಗನಾಥ್ ಭಟ್ ಬೊಕ್ಕ ರಜನಿ ರಂಗನಾಥ್ ಭಟ್ ೨೫ ಸಾರ ರೂಪಾಯಿ ಪಣವು ಸಕಾಯದ ಘೋಷಣೆ ಮಲ್ತೆರ್.ಉಂದುವೇ ಪೊರ್ತುಡು ರಿಯಾಲಿಟಿ ಷೋ ಪುಗರ್ತೆದ ಅಚಿಂತ್ಯ ಪುರಾಣಿಕ್ ಗ್ ಲಾ ಮಾನಾದಿಗೆ ಮಲ್ತೆರ್.
ಅಂಚೆನೇ ತುಳುನಾಡ ತುತ್ತೈತ ಪಂಥೊಡು ಸುರೂತ್ತ ಇನಾಮು ಪಡೆಯಿನ ಲತೀಶ್ ಎಚ್ ಕುಮಾರ್, ರಡ್ಡನೇ ಇನಾಮು ಪಡೆಯಿನ ಯುಕ್ತಿ ಎಸ್ ಪ್ರಸಾದ್, ಬೊಕ್ಕ ಮೂಜಿನೇ ಇನಾಮು ಪಡೆಯಿನ ಜಸ್ವಿ ಕುಲಾಲ್ ಮೆರೆಗ್ ಇನಾಮು ಪಟ್ಟಿಯೆರ್.ಅವು ಅತ್ತಾಂದೆ ವಿಶೇಷ ಚೇತನ ಬಾಲೆ ಪ್ರಾರ್ಥನ್, ಜ್ಞಾನಿಕ ಕರ್ಕೇರ ಬೊಕ್ಕ ತೃಷಾ ಪನ್ಪಿನ ಬಾಲೆಗ್ ಲಾ ಮಾನಾದಿಗೆಲ್ತೆರ್. ಅವ್ವೇ ಅತ್ತಾಂದೆ ಬಾಕಿ  ಐನ್ ಜೋಕ್ಲೆಗ್ ಲಾ ಇನಾಮು  ಪಟ್ಟಿಯೆರ್.ಉಂದುವೇ ಪೊರ್ತುಡು ತುಳು ಅಕಾಡೆಮಿದ ಲೆಕ್ಕೊಡು ಬಾಲೆ ಕಾರ್ತಿಕ್ ಗ್ ೫೦೦೦ ರೂಪಾಯಿದ ಪಣವು ಸಕಾಯೊನು ದಯಾನಂದ‌ ಕತ್ತಲಸಾರ್ ಮಲ್ತೆರ್.ಮಲ್ಲ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ ದ ಸಂಪಾದಕೆರ್ ಎಸ್.ಆರ್.ಬಂಡಿಮಾರ್, ರೊಟೇರಿಯನ್ ಎಮ್.ನಾರಾಯಣ್ ಇತ್ತೆರ್.

ತುಳು ಅಕಾಡೆಮಿದ ಗುರ್ಕಾರ್ಲು ದಯಾನಂದ ಜಿ.ಕತ್ತಲ್ ಸಾರ್ ಲೇಸ್ ದ ಗುರ್ಕಾರ್ಮೆ ಒಯಿಸಿಯೆರ್.

ಅಕಾಡೆಮಿದ ಸದಸ್ಯೆರ್ ಸಂಚಾಲಕೆರ್ ನರೇಂದ್ರ ಕೆರೆಕಾಡು ಲೇಸ್ ನಡಪಾದ್ ಕೊರಿಯೆರ್.ಪದುಕೆರಾಯಿನ ದಿನೇಶ್ ರೈ ಕಡಬ, ಲೀಲಾಕ್ಷ ಕರ್ಕೇರ ಚೇತಕ್ ಪೂಜಾರಿ, ಕಾರ್ಲದ ಸಂತೋಷ್ ಪೂಜಾರಿ, ಶಶಿಧರ ಶೆಟ್ಟಿ ನಿಟ್ಟೆ ಮಿತ್ತೆರ್ಮೆಡ್ ಇತ್ತೆರ್.ಮುಲ್ಕಿ ರೋಟರಿದ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ ಮಾತೆರೆನ್ಲ ಎದ್ಕೊಂಡೆರ್. ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರ್ಲು ಸಂತೋಷ್ ದೇವಾಡಿಗ ಸೊಲ್ಮೆ ಸಂದಾಯೆರ್.
ನೆರ್ದ್ ದುಂಬು ತೋಕೂರುದ ಜೋಕುಲೆರ್ದ್ ತುಳು ಜಾನಪದ್ ನೃತ್ಯ ನಡತ್ಂಡ್.