ಕುಡ್ಲದ ಸುದ್ದಿ | Mangalore News

” Adalitha Sowdha” at Mulky taluk to be inaugurated by six months ಆಜೇ ತಿಂಗೊಲ್ದ ಉಲಯಿ ಮುಲ್ಕಿ ತಾಲೂಕು ಆಡಳಿತ ಸೌಧ ಉದಿಪನ : ಉಮಾನಾಥ ಕೋಟ್ಯಾನ್ ಭರವಸೆ ಮುಲ್ಕಿ ತಾಲೂಕು ಗಣರಾಜ್ಯ ಉಚ್ಚಯದ ಲೇಸ್

ಮುಲ್ಕಿ : ಮುಲ್ಕಿ ಬೊಕ್ಕ ಬೆದ್ರ ಕ್ಷೇತ್ರಡ್ ಸಮಾನ ರೀತಿದ ಅಭಿವೃದ್ಧಿದ ಬೇಲೆಗ್ ರಾಜ್ಯ ಸರ್ಕಾರ ಅನುದಾನ ಕೊರ್ತುಂಡು. ರಡ್ಡರೆ ತಿಂಗೊಲ್ದ ಪಿರವುಡು ಕೆಸರ್ ಕಲ್ಲ್ ಪಾಡ್ದಿನ ಮುಲ್ಕಿ ತಾಲೂಕು ಆಡಳಿತ ಸೌಧ ದಾಖಲೆ ಅವಧಿಡ್ ಪಂಡ ಕಾಲಿ ಆಜೇ ತಿಂಗೊಲ್ದ ಉಲಯಿ ಉದಿಪನ ಆವರೆ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಆರ್ ಕಾರ್ನಾಡ್ ಗಾಂಧಿ ಮೈದಾನಡ್ ಮುಲ್ಕಿ ತಾಲೂಕು ರಾಷ್ಟ್ರೀಯ ಹಬ್ಬಗಳ ಆಚರಣೆ ಸಮಿತಿ ಮುತಾಲಿಕೆಡ್ ಗುರುವಾರ ನಡತಿನ 74 ನೇ ವರ್ಷದ ಗಣರಾಜ್ಯ ಉಚ್ಚಯದ ಕೊಡಿ ಏರಾದ್, ಲೇಸ್ ಡ್ ಧ್ವಜ ವಂದನೆ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.

ಮುಲ್ಕಿ ಬೆದ್ರ ವಿಧಾನಸಭಾ ಕ್ಷೇತ್ರೊಡು ಕರಿನ 5 ವರ್ಷೊರ್ದು 1825 ಕೋಟಿ ರೂ. ಅನುದಾನದ ಬೇಲೆ ಆತ್ಂಡ್. ಒಂಜಿ ವರ್ಷ 3 ತಿಂಗೊಲುದ ಅವಧಿಡ್ ಬೆದ್ರದ ಆಡಳಿತ ಸೌಧ ಉದಿಪನ ಆತ್ಂಡ್. ಅಂಚೆನೆ ಮುಲ್ಕಿದ ಗೇರುಕಟ್ಟೆಡ್ ಲ ಸರ್ಕಾರದ ಮಾತ ಕಚೇರಿಲ ಒಂಜೇ ಕಟ್ವಾಣೊಗು ಬರ್ಪಿಲೆಕ 10 ಕೋಟಿ ರೂ.ಕರ್ಚಿ ಡ್ ನಿರ್ಮಾಣ ಆವೊಂದಿಪ್ಪುನ ತಾಲೂಕು ಆಡಳಿತ ಸೌಧ ಇಡೀ ದೇಶೊಡೇ ಸುರೂತ್ತ ಸರ್ತಿ ಪನ್ಪಿಲೆಕ ಆಜಿ ತಿಂಗೊಲುಡು ಕೆಲಸ ಮಲ್ಪರೆ ಉಂಡು ಪಂಡೆರ್.

ಮುಲ್ಕಿ ಬೆದ್ರ ಕ್ಷೇತ್ರ ಭಾರಿ ಬೇಗೊಡೆ ಅಭಿವೃದ್ಧಿ ಆವೊಂದುಂಡು. ಮುಲ್ಕಿಡ್ ಪರ್ಪಿನ ನೀರ್ ಗ್ ಅಣೆಕಟ್ಟ್, ಅಗತ್ಯವಾದ್ ಬೋಡಾಯಿನ ಫೈರ್ ಸರ್ವಿಸ್ ಸ್ಟೇಶನ್, ತಾಲೂಕು ಕೋರ್ಟು, ಐಬಿ ಇಂಚ ಮಾತ ವಿಧೊಟ್ಟುಲ ಬುಲೆಚ್ಚಿಲ್ ಆವೊಂದುಂಡು ಪಂಡೆರ್.

ತಹಶೀಲ್ದಾರ್ ಅನಂತಶಂಕರ್ , ತಾಲೂಕು ಕಾರ್ಯನಿರ್ವಹಣಾಧಿಕಾರಿ ದಯಾವತಿ, ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್,ಮುಖ್ಯಾಧಿಕಾರಿ ಚಂದ್ರ ಪೂಜಾರಿ, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಮುಖ್ಯಾಧಿಕಾರಿ ಸಾಯೀಶ್ ಚೌಟ, ಪೊಲೀಸ್ ಇನ್ ಸ್ಪೆಕ್ಟರ್ ಕುಸುಮಾಧರ, ಎಎಸ್ಐ ಚಂದ್ರಶೇಖರ್, ಮುಲ್ಕಿ ಸರಕಾರಿ ಕಾಲೇಜು ಪ್ರಿನ್ಸಿಪಾಲ್ ಡಾ.ವಾಸುದೇವ ಬೆಳ್ಳೆ, ಬೊಕ್ಕ ಹಿಂದೂ, ಮುಸ್ಲಿಂ ,ಕ್ರೈಸ್ತ ಧರ್ಮ ಗುರುಕ್ಕುಲು ಮಲ್ಲ ಬಿನ್ನೆರಾದ್ ಬತ್ತಿತ್ತೆರ್.

ನೆರ್ದ್ ದುಂಬು ಮುಲ್ಕಿ ಠಾಣೆದ ಪಿಎಸ್ಐ ಮಾರುತಿ ಮೆರೆನ ಮುತಾಲಿಕೆಡ್ ಪಥ ಸಂಚಲನ ನಡತ್ಂಡ್. ಪೊಲೀಸ್ ಸಿಬ್ಬಂದಿಲು, ಗೃಹ ರಕ್ಷಕ ದಳ ಸಿಬ್ಬಂದಿ ಅಂಚೆನೆ ಬೇತೆ ಬೇತೆ ಶಾಲೆದ ಎನ್ ಸಿಸಿ, ಸ್ಕೌಟ್ಸ್ ಗೈಡ್ಸ್ ಜೋಕುಲೆರ್ದ್ ಅಂಚೆನೆ ಗ್ರಾಮ ಪಂಚಾಯ್ತಿದಕ್ಲೆನ ಸ್ತಬ್ಧಚಿತ್ರ ಟ್ಯಾಬ್ಲೊ ಮೆರವಣಿಗೆದ ಒಟ್ಟುಗು ಕಾರ್ನಾಡ್ ಸದಾಧಿವ ರಾವ್ ಸರ್ಕಲ್ ಮುಟ್ಟ ಬೊಕ್ಕ ಅಲ್ತ್ ರ್ದ್ ಪಿರ ಗಾಂಧಿ ಮೈದಾನಡ್ ಪಥ ಸಂಚಲನ ನಡತ್ಂಡ್.

ಸಭಾ ಕಾರ್ಯಕ್ರಮತ್ತ ವೇದಿಕೆಡ್ ಸಾಧಕೆರೆಗ್ ಮಾನಾದಿಗೆ, ಸ್ಪರ್ಧಾ ವಿಜೇತೆರೆಗ್ ಇನಾಮು ಪಟ್ಟುನ ಕಜ್ಜ ನಡತ್ಂಡ್. ಅಯಿರ್ದ್ ಬೊಕ್ಕ ಬೇತೆ ಬೇತೆ ಶಾಲೆದ ಜೋಕುಲೆರ್ದ್ ನೃತ್ಯ ಕಾರ್ಯಕ್ರಮ ನಡತ್ಂಡ್.
ಬಿಇಒ ಸದಾನಂದ ಪೂಂಜ ಬಿನ್ನೆರೆನ್ ಎದ್ಕೊಂಡೆರ್. ವಕೀಲೆರ್ ಭಾಸ್ಕರ ಹೆಗ್ಡೆ ಲೇಸ್ ಸುಧಾರಿಕೆ ಮಲ್ತೆರ್.

Handicrafts exhibitions and sale at Parashurama Theme park ಪರಶುರಾಮ ಥೀಮ್ ಪಾರ್ಕ್ ಡ್ ಕರಕುಶಲ ವಸ್ತು ಪ್ರದರ್ಶನ ಮಾರಾಟ ಮಳಿಗೆ ಉದಿಪನ

ಕಾರ್ಲ: ಆಚಾರ-ಇಚಾರ ಪದ್ದತಿಲು ಒಂಜಿ ಜಾಗೆರ್ದ್ ನನೊಂಜಿ ಜಾಗೆಗ್ ಬದಲ್ ಆದಿಪ್ಪುಂಡು. ಇತ್ತೆ ಒಂಜೇ ವೇದಿಕೆಡ್ ಬೇತೆ ಬೇತೆ ಜಾಗೆದ ವಸ್ತು, ಉತ್ಪನ್ನಲೆನ್ ತೂಪಿನ ಅವಕಾಶ ತಿಕ್ ದ್ಂಡ್ ಪಂದ್ ಇಂಧನ ಸಚಿವೆರ್ ವಿ. ಸುನಿಲ್ ಕುಮಾರ್ ಪಂಡೆರ್.

ಆರ್ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಒಡಿಪು, ಭಾರತ ಸರ್ಕಾರ-ಗಾಂಧೀ ಸಿಲ್ಕ್ ಬಜಾರ್, ಕರ್ನಾಟಕ ರಾಜ್ಯ ಕರಕುಶಲ ಅಭಿವೃದ್ದಿ ನಿಗಮ ಬೆಂಗ್ಲೂರು, ರಾಜ್ಯ ಗ್ರಾಮೀಣ ಜೀವನೋಪಾಯ ಅಭಿಯಾನದ ಸಂಜೀವಿನಿ ರಾಷ್ಟ್ರಮಟ್ಟದ ಕರಕುಶಲ ವಸ್ತುಪ್ರದರ್ಶನ ಬೊಕ್ಕ ರಾಜ್ಯ ಮಟ್ಟದ ಸಂಜೀವಿನ ಉತ್ಪನ್ನದ ಪ್ರದರ್ಶನ ಬೊಕ್ಕ ಮಾರಟ ಮಳಿಗೆನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್. ಮೀನುಗಾರಿಕೆ ಬೊಕ್ಕ ಒಳನಾಡು ಸಾರಿಗೆ ಸಚಿವೆರ್, ಒಡಿಪು ಜಿಲ್ಲಾ ಉಸ್ತುವಾರಿ ಸಚಿವೆರ್ ಎಸ್. ಅಂಗಾರ ಲೇಸ್‌ನ್ ಉದಿಪನ ಮಲ್ತ್‌ದ್ ಎಡ್ಡೆಪ್ಪುನು ಬಯಕಿಯೆರ್.