ಕಾಸ್ರೋಡ್ ಸುದ್ದಿ | Kasargod News

ಒಡಿಪುಡು ರಡ್ಡ್ ಜನಕ್ ಬ್ಲಾಕ್ ಫಂಗಸ್ ಪತ್ತೆ

ಒಡಿಪು , ಮೇ 29: ಶುಕ್ರವಾರ ಪೆರ್ಡೂರುದ ರಡ್ಡ್ ಜನಕ್ ಪೊಸತ್ತ್ ಬ್ಲ್ಯಾಕ್ ಫಂಗಸ್ (ಕಪ್ಪು ಶಿಲೀಂದ್ರ) ಸೋಂಕು ಪತ್ತೆಯಾತುಂಡು . ನೆಟ್ಟ್ 53 ವರ್ಷದ ಆಂಜೊವುನು ಚಿಕಿತ್ಸೆ ಪಡೆಯೊಂದಿತ್ತಿನ ಮೆರೆನ್ ಒಡಿಪು ಡಾ.ಟಿಎಂಎ ಪೈ ಆಸ್ಪತ್ರೆರ್ದ್ ಮಣಿಪಾಲ ಕೆಎಂಸಿಗ್ ದಾಖಲ್ ಮಲ್ದೆರ್ . ನನೊರಿಯೆನ್ ಆದರ್ಶ ಆಸ್ಪತ್ರೆರ್ದ್ ಕುಡ್ಲದ ವೆನ್‌ಲಾಕ್ ಆಸ್ಪತ್ರೆಗ್ ವರ್ಗಾವಣೆ ಮಲ್ದೆರ್ ಪಂದ್ ಡಾ. ಸುಧೀರ್‌ ಚಂದ್ರ ಸೂಡ ತೆರಿಪಾದೆರ್ .

ಫ್ಲಾಟ್ ರ್ದ್ ಲಾಗಿದ್ ಜೀವ ಬುಡಿನ ಜವಣ್ಯೆ

ಕುಡ್ಲ , ಮೇ 29: ಪೇಂಟೆದ ಪಡೀಲ್‌ಡುಪ್ಪುನ ಫ್ಲ್ಯಾಟ್‌ ದ 7ನೆ ಮಹಡಿರ್ದ್ ಜವಣ್ಯೆ ಒರಿ ಲಾಗಿದ್ ಜೀವ ಬುಡಿನ ಘಟನೆ ಗುರುವಾರ ರಾತ್ರಿ ಸುಮಾರ್ 10 ಗಂಟೆಗ್ ನಡತುಂಡು .

ಪಡೀಲ್‌ದ ಸಮೀರ್ (30) ಆತ್ಮಹತ್ಯೆ ಮಲ್ತಿನ ಜವಣ್ಯೆ .

ಅವಿವಾಹಿತೆ ಆದಿಪ್ಪುನ ಮೆರ್ ಮಾನಸಿಕ ಸೀಕ್ ರ್ದ್ ಬಳಲೊಂದು ಇತ್ತೆರ್ ಅಂಚನೆ ಕೊರೋನ ಪಾಸಿಟಿವ್ ಸೋಂಕಿತೇರಾದಿತ್ತೆರ್ ಪಂದ್ ಪ್ರಕರಣ ದಾಖಲ್ ಮಲ್ತಿನ ಕಂಕನಾಡಿ ನಗರ ಠಾಣೆದ ಪೊಲೀಸೆರ್ ತೆರಿಪಾದೆರ್.

ಕುಡ್ಲಡ್ ಮೂಜಿ ಜನಕ್ ಬ್ಲಾಕ್ ಫಂಗಸ್ ಪತ್ತೆ

ಕುಡ್ಲ , ಮೇ 29: ಕುಡ್ಲಡ್ ಬ್ಲ್ಯಾಕ್ ಫಂಗಸ್ ಪ್ರಕರಣದ ಸಂಖ್ಯೆಡ್ ಕುಡ ಏರಿಕೆ ಆವೊಂದು ಉಂಡು , ಶುಕ್ರವಾರ 3 ಪ್ರಕರಣ ತೊಜಿದ್ ಬೈದುಂಡು. ನೆತ್ತೋಟ್ಟುಗು ಇತ್ತೆ ಮುಟ ಜಿಲ್ಲೆಡ್ 34 ಸಕ್ರಿಯ ಬ್ಲ್ಯಾಕ್ ಫಂಗಸ್ ಪ್ರಕರಣ ತೊಜಿದ್ ಬೈದುಂಡು.

ಶುಕ್ರವಾರ ಪತ್ತೆಯಾಯಿನ 3 ಪ್ರಕರಣದ ಪೈಕಿ ದ.ಕ. ಜಿಲ್ಲೆದ ಒರಿ ಬೊಕ್ಕ ಪಿದಾಯಿದ ರಡ್ಡ್ ಜನ ಸೇರ್ದೆರ್.ನೆಟ್ಟ್ ಒರಿ ಖಾಸಗಿ ಕುಡ ರಡ್ಡ್ ಜನ ವೆನ್ಲಾಕ್ ಆಸ್ಪತ್ತೆಡ್ ಮರ್ದ್ ಪಡೆಯೊಂದು ಉಲ್ಲೆರ್ ಪಂದ್ ಆರೋಗ್ಯಧಿಕಾರಿಲು ಮಾಹಿತಿ ತೆರಿಪಾದೆರ್.

ಕಾತ್ಯಾಯಿನ ಆಳ್ವ ಅಮಾನತು ಪಿರ ದೆತೊನ್ಯೆರೆ ಬಂಟರ ಸಂಘ ಆಗ್ರಹ

ಒಡಿಪು , ಮೇ 29: ರೆಮ್ಡಿಸಿವರ್ ಕಳ್ಳ ಮಾರಾಟ ದಂಧೆಡ್ ಶಾಮೀಲಾದಿತ್ತಿನ ವೈದ್ಯೆನ್ ಪತ್ತೆ ಮಲ್ತ್ ಬಂದಿಸಾಯಿನ ಸಂಜಯ್ ನಗರದ ಇನ್ಸ್‌ ಪೆಕ್ಟರ್ ಕಾತ್ಯಾಯಿನಿ ಆಳ್ವ ಮೆರೆಗ್ ಕೆಲವು ನಕಲಿ ವೈದ್ಯೆರ್ ಅಂಚನೆ ರಾಜಕೀಯ ಶಕ್ತಿದ ಒತ್ತಡರ್ದ್ ಅಮಾನತು ಮಲ್ದಿನೆನ್ ಒಡಿಪುದ ಬಂಟರ ಸಂಘ ತೀವ್ರವಾದ್ ಖಂಡನೆ ಮಲ್ದೆರ್.

ಮೆರ್ನ ಅಮಾನತು ಸಮಾಜಗ್ ತಪ್ಪುಸಂದೇಶ ಕೊರ್ಪಿನ ಹಂತಗ್ ಬೈದುಂಡು, ಉಂದೆನ್ ಉನ್ನತ ಅಧಿಕಾರಿಲು ತೆರಿದ್ ಅಮಾನತು ಆದೇಶ ಪಿರ ದೆತೊನೊಡು ಪಂದ್ ಬಂಟರ ಸಂಘ ಒಡಿಪು ನೆತ್ತ ಗೌರವ ಗುರ್ಕಾರ್ಲಾಯಿನ ಜಯಕರ ಶೆಟ್ಟಿ ಇಂದ್ರಾಳಿ, ಗುರ್ಕಾರ್ಲಾಯಿನ ಪುರುಷೋತ್ತಮ ಪಿ.ಶೆಟ್ಟಿ ಬೊಕ್ಕ ಪದಾಧಿಕಾರಿಲು ಪ್ರಕಟಣೆಡ್ ತೆರಿಪಾದೆರ್.

ಕುಡ್ಲಡ್ ಕೋವಿಡ್ ಗ್ 5 ಬಲಿ : 799 ಜನಕ್ ಕೊರೋನ ಪಾಸಿಟಿವ್

ಕುಡ್ಲ, ಮೇ 29: ದ.ಕ. ಜಿಲ್ಲೆಡ್ ಶುಕ್ರವಾರ 5 ಜನ ಕೋವಿಡ್‌ಗ್ ಬಲಿಯಾಯೆರ್ . ನೆತ್ತೋಟ್ಟುಗು ಜಿಲ್ಲೆಡ್ ಇತ್ತೆ ಮುಟ ಕೋವಿಡ್‌ಗ್ ಬಲಿಯಾಯಿನಕ್ಲೆನ ಸಂಖ್ಯೆ 894ಕ್ಕೇರ್ದುಂಡು. ತೀರ್ ಪೋಯಿನಕ್ಲೆನ ಅತ್ತoದೆ ಗುರುವಾರ ಜಿಲ್ಲೆಡ್ 799 ಜನಕ್ ಕೊರೋನ ಸೋಂಕು ದೃಢ ಆತುಂಡು .

ಜಿಲ್ಲೆಡ್ ಇತ್ತೆ 8,41,914 ಜನತ ದ್ರವ ಪರೀಕ್ಷೆ ಮಲ್ದೆರ್ . ಆ ಪೈಕಿ 7,68,016 ಜನತ ವರದಿ ನೆಗೆಟಿವ್ ಬೈದುಂಡು . ಒಟ್ಟು 73,898 ಜನಕ್ ಕೊರೋನ ಸೋಂಕು ಪಾಸಿಟಿವ್ ಬೈದುಂಡು .

ಕಲಾವಿದೆರೆಗ್ ಆರ್ಥಿಕ ಸಾಕಾರಗ್ ಅರ್ಜಿದ ಲೆಪ್ಪೋಲೆ

ಒಡಿಪು , ಮೇ 29: ಪ್ರಸ್ತುತ ರಾಜ್ಯಡ್ ಕೋವಿಡ್-19 2ನೇ ಅಲೆತ ಲಾಕ್‌ಡೌನ್ ನೆಲೆಟ್ಟ್ ಆರ್ಥಿಕ ಸಂಕಷ್ಟಡ್ ಉಪ್ಪುನ ಕಲಾವಿದೆರೆಗ್ ತಲಾ 3,000ರೂ.ಪಾಯಿದ ಆರ್ಥಿಕ ಸಾಕರನ್ ಮುಖ್ಯಮಂತ್ರಿಲು ಮೇ 19 ತಾರೀಖ್ ಘೋಷಣೆ ಮಲ್ದೆರ್ , ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ವತಿರ್ದ್ ತಲಾ 3,000 ರೂಪಾಯಿದ ಸಾಕಾರ ಕೊರಿಯೆರೆ ನಿರ್ಧಾರ ಮಲ್ದೆರ್.

ಈಯೋಜನೆದಡಿ
ಆರ್ಥಿಕ ಸಂಕಷ್ಟಡ್ ಉಪ್ಪುನ ಮಾತಾ ಪ್ರಕಾರದ ಕಲಾವಿದೆರ್ ಸೇವಾಸಿಂಧು ಪೋರ್ಟಲ್ ಮುಖೇನ ಅರ್ಜಿ ಪಾಡೋಲಿ . ಕಲಾವಿದೆರ್ ವೃತ್ತಿನಿರತೆರಾಡುಪ್ಪೊಡು , 35 ವರ್ಷ ಮಿತ್ತ್ ದಕುಲು ಆದ್ ಉಪ್ಪೊಡು ಅಂಚನೆ ಕನಿಷ್ಠ 10 ವಷದ ಕಲಾಸೇವೆ ಮಲ್ತ್ ಉಪ್ಪೊಡು . ಇತ್ತೆ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆರ್ದ್ ಮಾಸಾಶನ ಪಡೆಯೊಂದು ಉಪ್ಪರೆ ಬಲ್ಲಿ ಅಂಚನೆ ಒವ್ವೆ ಸರಕಾರಿ ನೌಕರೆರ್ ಆದ್ ಉಪ್ಪರೆ ಬಲ್ಲಿ..

ಒಡಿಪುದ ಪೂ,ಫಲವಸ್ತು,ತರಕಾರಿ ಬುಳೆಗಾರೆರೆಗ್ ಪರಿಹಾರ

ಒಡಿಪು, ಮೇ 29: ಕೋವಿಡ್-19 ದ ರಡ್ಡ ನೇ ಅಲೆ ಕಾರಣ ರಾಜ್ಯಡ್ ಪಾರ್ದಿನ ಜನತಾ ಕರ್ಪ್ಯೂ ಅವಧಿಡ್ ಪೂ, ಹಣ್ಣು ಅಂಚನೆ ತರಕಾರಿ ಬುಳೆಗಾರೆರೆಗ್ ಆಯಿನ ನಷ್ಟಗ್ ಹೆಕ್ಟೇರ್‌ಗ್ ಗರಿಷ್ಠ 10,000ರೂ. ಪರಿಹಾರನ್ ಅಂಚನೆ ಕನಿಷ್ಠ 2000ರೂಪಾಯಿಗ್ ಮಿತ ಮಲ್ತ್ ಕೊರ್ರೆ ಉಲ್ಲೆರ್ .ವಾರ್ಷಿಕ ಪೂ , ಹಣ್ಣು, ತರಕಾರಿ ಬುಲೆಕ್ 2021-22ನೇ ಸಾಲ್ ದ ಬೇಸಿಗೆ ಬೆಳೆ ಸಮೀಕ್ಷೆ ಬೊಕ್ಕ ಬಹುವಾರ್ಷಿಕ ಬುಳೆಕ್ 2021-22ನೇ ಸಾಲ್ ದ ಮುಂಗಾರು ಬೆಳೆ ಸಮೀಕ್ಷೆ ಮಾಹಿತಿದ ಆಧಾರಡ್ ಪಾವತಿ ಮಲ್ಪರೆ ಸರಕಾರದ ಸೂಚನೆ ಇತ್ತುಂಡು , ಬುಳೆ ಸಮೀಕ್ಷೆಡ್ ನಮೂದಾಯಿನ ಅಂಚನೆ ಇಲಾಖೆದ ತಂತ್ರಾಂಶಡ್ ನೊಂದಣಿಯಾಯಿನ ಬೊಕ್ಕ ನೊಂದಣಿಯಾವಂದೆ ಉಪ್ಪುನ ರೈತೆರ್ನ ವಿವರ ತೋಟಗಾರಿಕೆ ಇಲಾಖಾ ಕಚೇರಿಡ್ ಲಭ್ಯ ಉಂಡು .

ಸೇನಾ ನೇಮಕಾತಿ ಲಿಖಿತ ಪರೀಕ್ಷೆ ತಾರೀಖ್ ಬದಲ್

ಒಡಿಪು , ಮೇ 29: ಒಡಿಪುಡು ಮಾ.17ರ್ದ್ ಮಾ.30 ಮುಟ ನಡತಿನ ಸೇನಾ ನೇಮಕಾತಿ ರ್ಯಾಲಿಡ್ ಅರ್ಹತೆ ಪಡೆಯಿನ ಅಭ್ಯರ್ಥಿಲೆಗ್ ಲಿಖಿತ ಪರೀಕ್ಷೆನ್ ಮೇ 30 ತಾರೀಖ್ ಗ್ ಕುಡ್ಲಡ್ ನಿಗದಿ ಮಲ್ದೆರ್ , ಕೋವಿಡ್-19ರ ಕಾರಣಗಾದ್ ಈ ಪರೀಕ್ಷೆನ್ ದುಂಬು ಮಲ್ದೆರ್ .

ಪರಿಷ್ಕೃತ ತಾರೀಖ್ ನ್ ನಿಗದಿ ಮಲ್ಪರೆ ಪಂದ್ ಸೈನಿಕ ಕಲ್ಯಾಣ ಪುನರ್ವಸತಿ ಇಲಾಖೆದ ಕುಡ್ಲ ಜಂಟಿ ನಿರ್ದೇಶಕೆರ್ನ ಕಾರ್ಯಾಲಯದ ಪ್ರಕಟಣೆ ತೆರಿಪಾದೆರ್ .

ಕೋವಿಡ್ ಲಸಿಕಾ ಕೇಂದ್ರಗ್ ಒಡಿಪು ಜಿಲ್ಲಾಧಿಕಾರಿ ಭೇಟಿ

ಶಿರ್ವ, ಮೇ 29: ಶಿರ್ವ ಸಂತ ಮೇರಿ ಪದವಿ ಪೂರ್ವ ಕಾಲೇಜ್ ಗ್ ಸ್ಥಳಾಂತರ ಮಲ್ತಿನ ಶಿರ್ವ ಸಮುದಾಯ ಆರೋಗ್ಯ ಕೇಂದ್ರದ ಕೋವಿಡ್ ಲಸಿಕಾ ಕೇಂದ್ರಗ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಕೋಡೆ ಭೇಟಿ ಕೊರ್ದು ಪರಿಶೀಲನೆ ನಡಪಾಯೆರ್ .

ಆರೋಗ್ಯ ಕೇಂದ್ರಡ್ ಕೊರೋನಾ ಸೋಂಕು ಪರಡಂದಿ ಲಕ ಸುರಕ್ಷತೆ ಬೊಕ್ಕ ಸಾರ್ವಜನಿಕ ಆರೋಗ್ಯ ಕಾಪಾಡುನ ಹಿತದೃಷ್ಟಿ ರ್ದ್ ಶುಕ್ರವಾರ ಸಮು ದಾಯ ಕೇಂದ್ರಡ್ ಇತ್ತಿನ ಲಸಿಕಾ ಕೇಂದ್ರನ್ ಆಸ್ಪತ್ರೆದ ದುಂಬು ಸಂತ ಮೇರಿ ಪದವಿ ಪೂರ್ವ ಕಾಲೇಜ್ ದ ತರಗತಿ ಕೋಣೆಗ್ ಸ್ಥಳಾಂತರ ಮಲ್ದೆರ್ , ಮುಲ್ಪ 45 ವರ್ಷ ಮಿತ್ತ್ ದ ನಾಗರಿಕೆರೆಗ್ ಸುರುತ್ತ ಹಂತದ ಲಸಿಕೆ ಕೊರ್ಪಿನ ವ್ಯವಸ್ಥೆ ನಡತುಂಡು .

ಕೇಂದ್ರಗ್ ಭೇಟಿ ಕೊರ್ದು ಪರಿಶೀಲನೆ ನಡಪಾಯಿನ ಜಿಲ್ಲಾಧಿಕಾರಿ, ಜಿಲ್ಲೆಡ್ ಸದ್ಯದ ಮಟ್ಟಿಗ್ ಲಸಿಕೆದ ಕೊರತೆ ಇಜ್ಜಿ . ಕೋಡೆ 200 ಜನಕ್ಲೆಗ್ ಮುಲ್ಪ ಲಸಿಕೆ ಕೊರೊಂದು ಉಲ್ಲೆರ್ , ಸುರುತ್ತ ಲಸಿಕೆದ ಲಭ್ಯತೆದ ಬಗ್ಗೆ ಮಾಧ್ಯಮದ ಮುಖೇನ ಮಾಹಿತಿ ಕೊರ್ತೆರ್ .