ಕಾಸ್ರೋಡ್ ಸುದ್ದಿ | Kasargod News

ಪುತ್ತೂರುದ ಯೋಗಗುರು ರಾಜೇಂದ್ರ ಎಂಕಮೂಲೆ ಮುತಾಲಿಕೆಡ್ ಆಸ್ಟ್ರೇಲಿಯಾ ಸಂಸತ್ತ್ ಡ್ ವಾಸುದೇವ ಕ್ರಿಯಾ ಯೋಗ ವೈಭವ

ಆಸ್ಟ್ರೇಲಿಯಾ, ಜೂನ್ 27: ವಿಶ್ವಯೋಗ ದಿನಾಚರಣೆದ ಪರವಾದ್ ಆಸ್ಟ್ರೇಲಿಯಾ ಸಂಸತ್ತ್ ಡ್ ಭಾರತೀಯ ಯೋಗ ವೈಭವ ನಡತುದುಂಡು .

ಕುಡ್ಲದ ಯೋಗ ಗುರು ವಾಸುದೇವ ಕ್ರಿಯಾ ಯೋಗದ ಸ್ಥಾಪಕ ರಾಜೇಂದ್ರ ಎಂಕಮೂಲೆ ಮೆರ್ನ ಮುತಾಲಿಕೆಡ್ ನಡತಿನ ಈ ಲೇಸ್ ಡ್ ಆಸ್ಟ್ರೇಲಿಯಾ ಮಂತ್ರಿಲಾಯಿನ ಜೇಸನ್ ವುಡ್ ಎಂಪಿ , ಮೈಕಲ್ ಸಕ್ಕರ್ ಬೊಕ್ಕ ಸಂಸದೆರ್ ಅಂಚನೇ ಭಾರತೀಯ ರಾಯಭಾರ ಕಚೇರಿ ಅಧಿಕಾರಿಲು ಪಾಲ್ ಪಡೆದ್ ಯೋಗಾಸನ ಮಲ್ತೆರ್ .

ಈ ಪೊರ್ತುಡು ಪಾತೆರಿನ ರಾಜೇಂದ್ರ ಎಂಕಮೂಲೆ ಜಗತ್ತ್ ದ ಸ್ವಾಸ್ಥ್ಯ ಬೊಕ್ಕ ಶಾಂತಿಗ್ ಯೋಗ ಪ್ರಮುಖ ಸಾಧನ ಆತುಂಡು .‌ಒರಿ ಆರೋಗ್ಯವಂತ ವ್ಯಕ್ತಿ ಮಾತ್ರ ಒಂಜಿ ಸಮಾಜದ ಶಕ್ತಿಯಾಯೆರೆ ಸಾಧ್ಯ . ಅಂಚಾದ್ ಪ್ರತಿಯೊರಿಲಾ ಯೋಗದ ಮುಖೇನ ನಿರೋಗಿಲಾದ್ ಸಮಾಜದ ಶಕ್ತಿಯಾವೋಡು .ವೈಯಕ್ತಿಕ ಸ್ವಾಸ್ಥ್ಯ ವಿಶ್ವ ಆರೋಗ್ಯ ಸಂಸ್ಥೆದ ಅತ್ತುಂಡ ಆರೋಗ್ಯ ಮಂತ್ರಿನ ಕೆಲಸ ಅತ್ತ್ ಅಕುಲು ಮಾತಾ ಅಕ್ಲೆನ ಉತ್ತಮ ಆರೋಗ್ಯಗಾದ್ ಜವಾಬ್ದಾರಿ ನಿರ್ವಹಣೆ ಮಲ್ಪೊಡು ಪಂದ್ ಪಂಡೆರ್ . ಸಾಮಾಜಿಕ ಧುರೀಣ ರಾಮ್ ಪಾಲ್ ಮುತ್ಯಾಳ ಲೇಸ್ ನಡಪಾದ್ ಕೊರ್ರೆ ಸಾಕಾರ ಕೊರಿಯೆರ್ .‌ ಆಸ್ಟ್ರೇಲಿಯಾ ದ ಶಿಕ್ಷಣ ವ್ಯವಸ್ಥೆಡ್ ಯೋಗನ್ ಅಳವಡಿಕೆ ಮಲ್ಪೊಡು ಪಂದ್ ಬಿನ್ನಾಪು ಮಲ್ತೆರ್ .ರಾಜೇಂದ್ರ ಮೇರ್ ಕರಿನ ಮಸ್ತ್ ವರ್ಷರ್ದ್ ಆಸ್ಟ್ರೇಲಿಯಾಡ್ ಯೋಗ ಶಿಕ್ಷಕೆರಾದ್ ಬೇಲೆ ಮಲ್ತೊಂದು ಉಲ್ಲೆರ್.

ಕುಲಶೇಖರ – ಕಣ್ಣೂರು ಸಂಪರ್ಕದ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿದ ಪ್ರಗತಿ ಪರಿಶೀಲನಾ ಸಭೆ

ಕುಡ್ಲ, ಜೂನ್ 27: ಕುಲಶೇಖರ – ಕಣ್ಣೂರು ಸಂಪರ್ಕದ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿದ ಪ್ರಗತಿ ಪರಿಶೀಲನಾ ಸಭೆ ಶನಿವಾರ ಶಾಸಕ ವೇದವ್ಯಾಸ್ ಕಾಮತ್ ಮೆರ್ನ ಮುತಾಲಿಕೆಡ್ ನಡತುಂಡು.

ಪಾಲಿಕೆ ವ್ಯಾಪ್ತಿದ ಕುಲಶೇಖರರ್ದ್ ಕಣ್ಣೂರು ರಾಷ್ಟ್ರೀಯ ಹೆದ್ದಾರಿನ್ ಒಟ್ಟು ಸೇರುನ ಮಾರ್ಗ ಅಗಲೀರಕರಣದ ಬಗ್ಗೆ ಉಪ್ಪುನ ಸಮಸ್ಯೆಲೆನ್ ಬಗೆಹರಿಸಾವುನ ಸಲುವಾದ್ ಸಭೆ ನಡಪಾದೆರ್ , ಶಾಸಕ ವೇದವ್ಯಾಸ್ ಕಾಮತ್ ಮೇರ್ ಈ ಬಗ್ಗೆ ಅಧಿಕಾರಿಲೆರ್ದ್ ಮಾಹಿತಿ ಪಡೆಯೊಂಡೆರ್ .

ಸಭೆಟ್ ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಪ್ರೇಮಾನಂದ ಶೆಟ್ಟಿ, ಕೈತಲ್ ದ ಮನಪಾ ಸದಸ್ಯೆ ರೂಪಶ್ರೀ ಪೂಜಾರಿ,ತಹಶಿಲ್ದಾರೆರ್ , ಪಾಲಿಕೆದ ಅಧಿಕಾರಿಲು , ಲೋಕೋಪಯೋಗಿ ಇಲಾಖೆದ ಅಧಿಕಾರಿಲು , ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಲು ಕಂದಾಯ ಇಲಾಖೆ ಅಧಿಕಾರಿಲು ಪಾಲ್ ಪಡೆದಿತ್ತೆರ್.

ರೋಟರಿ ಕುಡ್ಲ ಸೆಂಟ್ರಲ್ ಸಂಸ್ಥೆದ ಸ್ಥಾಪಕ ದಿನಾಚರಣೆ: ಸಾಧಕೆರೆಗ್ ಮಾನದಿಗೆ

ಕುಡ್ಲ : ರೋಟರಿ ಕುಡ್ಲ ಸೆಂಟ್ರಲ್ ಸಂಸ್ಥೆದ ೩೪ನೇ ವಾರ್ಷಿಕ ಸ್ಥಾಪನಾ ದಿನಾಚರಣೆ ಕುಡ್ಲದ ಎ-೧ ಲಾಂಗ್ಗಿಸ್ ಸಂಸ್ಥೆದ ಸಭಾಂಗಣಡ್ ದೃಶ್ಯ ಶ್ರಾವ್ಯ ಮಾಧ್ಯಮದ ಮುಖೇನ ಪ್ರಕಾಶ್ ಚಂದ್ರ ಮೆರ್ನ ಗುರ್ಕಾರ್ಮೆಡ್ ನಡತುಂಡು. ಪೇಂಟೆದ ಖ್ಯಾತ ಹೃದ್ರೋಗ ತಜ್ಞ ಡಾ.ಪದ್ಮನಾಭ ಕಾಮತ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.

ಈ ಪೊರ್ತುಡು ರೋಟರಿ ಸಂಸ್ಥೆದ ವತಿರ್ದ್ ಡಾ.ಪದ್ಮನಾಭ್ ಕಾಮತ್ ನೇತೃತ್ವ ಹೃದಯ ತಜ್ಞರು ಇಲ್ಲ ಬಾಕಿಲ್ ಗ್ ’ ಅಭಿಯಾನಗ್ ಅಂಚನೇ ಆರ್ನ ಗ್ರಾಮೀಣ ಪ್ರದೇಶದ ಜನಕ್ಲೆನ ಅಂಗನವಾಡಿ ಯೋಜನೆನ್ ಪ್ರೋತ್ಸಾಹ ಮಲ್ಪರೆ , ಜನಕ್ಲೆನ ಹೃದ್ರೋಗ ತಪಾಸಣೆದ ಪರವಾದ್ ೧ ಲಕ್ಷ ರೂಪಾಯಿ ಮೌಲ್ಯದ ಮೂಜಿ ಹೃದ್ರೋಗ ತಪಾಸಣೆ ಯಂತ್ರನ್ ಸಂಸ್ಥೆದ ಸಮಾಜ ಸೇವಾ ಯೋಜನೆದ ಅಂಗವಾದ್ ಕೊಡುಗೆಯಾದ್ ಕೊರಿಯೆರ್.

” ಸೈಬರ್ ಸೆಕ್ಯೂರಿಟಿ – ಮಾಹಿತಿ ರಕ್ಷಣೆ ” ಬಗ್ಗೆ ವೆಬಿನಾರ್

ಕುಡ್ಲ , ಜೂ. 26: ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ದ ಬಿಸಿಎ ವಿಭಾಗ ಪೇಂಟೆದ ಸೈಬರ್ ಸೆಪಿಯನ್ಸ್ ಯುನೈಟೆಡ್ ಸಂಸ್ಥೆದ ಒಟ್ಟು ಸೇರಿಗೆಡ್ ‘ಸೈಬರ್ ಭದ್ರತೆ, ಸೈಬರ್ ಅಪರಾಧ ಬೊಕ್ಕ ಮಾಹಿತಿ ರಕ್ಷಣೆ’ದ ಬಗ್ಗೆ ಅರಿವು ಮೂಡಾಯೆರೆ ವೆಬಿನಾರ್‌ನ್ ಅಟ್ಟನೆ ಮಲ್ತಿತ್ತೆರ್ .

ಲೇಸ್ ದ ಮಲ್ಲ ಬಿನ್ನೆರ್ ಆದ್ ಬತ್ತಿನ ಭಾರತಿ ಸಂಜಯ್ ಪ್ರಭು ಪಾತೆರ್ದ್ , ದಿನನಿತ್ಯದ ಡಿಜಿಟಲ್ ಉಪಕರಣಡ್ ಉಪಯೋಗ ಮಲ್ಪುನ ಪಾಸ್‌ವರ್ಡ್, ಒಟಿಪಿ, ಡೆಬಿಟ್ ಕಾರ್ಡ್, ಕ್ರೆಡಿಟ್ ಕಾರ್ಡ್‌ದ ನಿರ್ವಹಣೆಡ್ ವಿಶೇಷ ಗಮನ ಕೊರ್ಪಿನ ಬಗ್ಗೆ ವಿವರಣೆ ಕೊರಿಯೆರ್ .

ಲೇಸ್ ಡ್ ಡಾ.ರತಿ ಪ್ರಾರ್ಥನೆ ಮಲ್ತೆರ್ . ಲತಾ ಸಂತೋಷ್ ಎದುಕೊಂಡೆರ್ . ಅತಿಥಿ ಉಪನ್ಯಾಸಕ ಅರುಣ್ ಸಿಕ್ವೇರಾ ನಿರೂಪಣೆ ಮಲ್ತೆರ್ .

ಬಡಾನಿಡಿಯೂರು ನವಶಕ್ತಿ ಸಂಜೀವಿನಿ ಒಕ್ಕೂಟದ ವತಿಡ್ದ್ ಕೊರೊನಾ ವಾರಿಯರ್ಸ್ ಗ್ ರೈನ್ ಕೋಟ್

ಉಡುಪಿ ಬಡಾನಿಡಿಯೂರು ಗ್ರಾಮದ ಸಂಜೀವಿನಿ ಒಕ್ಕೂಟದ ವತಿಡ್ದ್ ಕೊರೊನಾ ಸಂಕಷ್ಟದ ಪೊರ್ತುಡ್ ಬೇಲೆ ಮಲ್ತೊಂದುಪ್ಪುನ ಗ್ರಾಮದ ಆಶಾಕಾರ್ಯಕರ್ತೆರ್,ಪೋಲೀಸ್ ಸಿಬ್ಬಂದಿ, ನರ್ಸ್ ಗ್ ರೈನ್ ಕೋಟ್ ವಿತರಣೆ ಮಲ್ತೆರ್..ಇಲ್ಲಗ್ ಇಲ್ಲಗ್ ಪೋದ್ ಕೊರೊನಾದ‌ಬಗ್ಗೆ ಜಾಗ್ರತಿ ಮೂಡಿಸಾವುನ ಬೇಲೆನ್ ಆಶಾಕಾರ್ಯಕರ್ತೆರ್ ಮಲ್ತೊಂದುಲ್ಲೆರ್ ಅಕಲೆಗ್ ಬರ್ಸದ ಪೊರ್ತುಡ್ ಗಾಡಿಡ್ ಪೋವನಗ ರೈನ್ ಕೋಟ್ ದ ಅಗತ್ಯ ಉಂಡು..ಈ ನಿಟ್ಟುಡ್ ಸಂಜೀವಿನಿ ಒಕ್ಕೂಟದಕ್ಲೆನ ಈ ಸಾಮಾಜಿಕ ಕಳಕಳಿ ಮೆಚ್ಚುನವ್ ಪಂಡುದ್ ಬಡಾನಿಯೂರು ಗ್ರಾಮ ಪಂಚಾಯತ್ ದ ಅಭಿವ್ರದ್ಧಿ ಅಧಿಕಾರಿ ಶ್ರೀಮತಿ ಮಾಲತಿ ಪಂಡೆರ್.ಉಂದುವೇ ಪೊರ್ತುಡ್ ಉಡುಪಿ ಮಲಬಾರ್ ಗೋಲ್ಡ್ ಆಂಡ್ ಡೈಮಂಡ್ ದ ವತಿಡ್ದ್ ಗ್ರಾಮದ ಕೊರೊನಾ ವಾರಿಯರ್ಸ್ ಗ್ ಫುಡ್ ಕಿಟ್ ಕೊರಿಯೆರ್.

ಮಲಬಾರ್ ಸಂಸ್ಥೆ ದ ಉಡುಪಿದ ಮುಖ್ಯಸ್ಥೆರಾಯಿನ ಹಫೀಜ್ ರೆಹಮಾನ್,ಸ್ಟೋರ್ ಮೆನೇಜರ್ ರಾಘವೇಂದ್ರ ನಾಯಕ್, ಚಾರಿಟಿ ಮೆನೇಜರ್ ತನ್ಸೀಮ್ ಶಿರ್ವ,‌ಬಡಾನಿಡಿಯೂರು ನವಶಕ್ತಿ ಸಂಜೀವಿನಿ ಒಕ್ಕೂಟದ ಅಧ್ಯಕ್ಷೆರಾಯಿನ ಲತಾ ಅಶೋಕ್,ಉಪಾಧ್ಯಕ್ಷೆ ತಾರಾ ಪ್ರಭಾಕರ್, ಕಾರ್ಯದರ್ಶಿ ವತ್ಸಲಾ,ಕೋಶಾಧಿಕಾರಿ ಸುಗುಣ, ಅಂಚೆನೇ ಸಂಜೀವಿನಿದ ಮಾತಾ ಪದಾಧಿಕಾರಿಲು ಬೊಕ್ಕ ಪಂಚಾಯತ್ ದ ಉಪಾಧ್ಯಕ್ಷೆ ಶೀಲಾ ಸುಧಾಕರ್ ಉಪಸ್ಥಿತರಿತ್ತೆರ್..