ಕಾಸ್ರೋಡ್ ಸುದ್ದಿ | Kasargod News

ಐ ಲೇಸಾ’ ಡಿಜಿಟಲ್ ಚಾವಡಿ ಜಾಗತಿಕವಾದ್ ನಡಪಾಯಿನ “ತುಳು ಭಗವದ್ಗೀತೆ ಸಾರ ಪ್ರವಚನ” ದ ಮುಗಿತಲದ ಲೇಸ್

ಹಿಂದೂ ಧರ್ಮದ ಸಾರಾಂಶೊನು ಅರ್ಥ ಮಲ್ತೊನೆರೆ ಸಾಧ್ಯ ಇಪ್ಪುನ ಪವಿತ್ರ ಗ್ರಂಥ ‘ಭಗವದ್ಗೀತೆ’. ಪ್ರಶ್ನೋತ್ತರ ರೂಪೊಡುಪ್ಪುನ ಪವಿತ್ರ ಭಗವದ್ಗೀತೆಡ್ ನಮ್ಮ ಜೀವನದ ಮಾತಾ ಪ್ರಶ್ನೆಲೆಗ್ಲಾ ಉತ್ತರ ಉಂಡು. ಭಗವದ್ಗೀತೆ ಅಪ್ಪೆ ಭಾಷೆಡ್ ಇತ್ತ್ಂಡ ತೆರಿಯೊನೆರೆ ಭಾರೀ ಸುಲಭ ಆಪುಂಡು ಪಂಡ್ದ್ ಪೂಜ್ಯ ಖಾವಂದೆರ್ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್. ಐ-ಲೇಸಾ ಬೊಕ್ಕ ಇಸ್ಕಾನ್ ಬೆಂಗಳೂರು ಸಂಯುಕ್ತ ಆಶ್ರಯೊಡ್ ಆನ್ ಲೈನ್ ಜೂಮ್ ಮೂಲಕ ಬುಡಂದೆ 6 ದಿನ ನಡತ್ತಿನ “ತುಳುವ ಜಾಲ್ ಡ್ ಕೃಷ್ಣ ಪಾರ್ದನ” (ತುಳು ಭಾಷೆಡ್ ಭಗವದ್ಗೀತೆ ಸಾರದ ಪ್ರವಚನ) ಕಜ್ಜೊದ ಮುಗಿತಲದ ಲೇಸ್ಡ್ ಡಾ. ವೀರೇಂದ್ರ ಹೆಗ್ಗಡೆರ್ ಶುಭಾನುಗ್ರಹ ಕೊರಿಯೆರ್. ತುಳು ಭಾಷೆಡ್ ಭಗವದ್ಗೀತೆದ ಸಾರೊನು ಲೋಕೊರ್ಮೆ ಪಸೆರೊಂದಿಪ್ಪುನ ಐ-ಲೇಸಾ ದ ಕಜ್ಜೊಲೆನ್ ಕೊಂಡಾಡಿಯೆರ್. ಭಗವದ್ಗೀತೆಡ್ ಶ್ರೀ ಸಾಮಾನ್ಯೆರೆಗ್ ಅರ್ಥ ಆಪಿನ ರೀತಿಡ್ ವಿಷಯೊಲು ಸೇರ್ದ್ಂಡ್. ಸಂಶಯೊಲೆಗ್ ನಿವೃತ್ತಿ ಕೊರ್ಪಿನ ಗ್ರಂಥಲಾ ಅಂದ್. ಉಂದು ನಮ್ಮ ಭಾರತ ದೇಶದ ಪುಗಾರ್ತೆದ ಬೊಕ್ಕ ಒಪ್ಪಿಗೆ ಆತಿನ ಪವಿತ್ರ ಗ್ರಂಥ. ವಿದೇಶೊಲೆಡ್ ಇಪ್ಪುನ ಹಿಂದೂ ಬಂಧುಲು ಭಗವದ್ಗೀತೆನ್ ಓದುದ್ ಅರ್ಥ ತೆರಿಯೊಂಡೆರ್ಡ ಅಕಲೆನ ಮಾತಾ ಸಮಸ್ಯೆಳೆಗ್ಲಾ ಸರಿಯಾಯಿನ ಉತ್ತರ ಭಗವದ್ಗೀತೆಡ್ ತಿಕ್ಕುಂಡುಂದು ಪೂಜ್ಯ ಖಾವಂದೆರ್ ತೆರಿಪಾಯೆರ್.

ಶ್ಲೋಕದೊಟ್ಟುಡು ಲೇಸ್ ಸುರು ಆಂಡ್. ಒಡಿಯೂರು ಮಠಾದೀಶೆ ಶ್ರೀ ಗುರುದೇವಾನಂದ ಸ್ವಾಮಿಲು ಆಶೀರ್ವಚನ ಕೊರಿಯೆರ್. ಕೇಮಾರು ಸಾಂದೀಪನೀ ಸಾದನಾಶ್ರಮದ ಶ್ರೀ ಈಶ ವಿಠಲದಾಸ ಸ್ವಾಮಿಲು, ಪೂನಾ ಇಸ್ಕಾನ್ ದ ಶ್ರೀ ಸರ್ವ ಲಕ್ಷಮಣ ದಾಸೆರ್, ಮುಖ್ಯ ಪ್ರವಚನಕಾರೆ ಶ್ರೀ ಪ್ರಸಾದೇಶ್ವರ ಕೃಷ್ಣ ದಾಸೆರ್ ಪ್ರವಚನ ಕೊರ್ದು ಹರಸಿಯೆರ್. ಉಡುಪಿ ಪೇಜಾವರ ಅಧೊಕ್ಷಜ ಮಠಾದೀಶೆ ಶ್ರೀ ವಿಶ್ವ ತೀರ್ಥ ಸ್ವಾಮಿಲು, ಉಡುಪಿ ಪಲಿಮಾರು ಮಠಾದೀಶೆ ಶ್ರೀ ವಿದ್ಯಾಧೀಶ ಸ್ವಾಮಿಲು, ಶ್ರೀ ಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯ ಮಠಾದೀಶೆ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮಿಲು, ಜೈನ ಕಾಶಿ ಮೂಡುಬಿದ್ರೆ ಜಗದ್ಗುರು ಸ್ವಸ್ತಿಶ್ರೀ ಡಾ. ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ಮಹಾಸ್ವಾಮೀಜಿ, ಶ್ರೀ ಧಾಮ ಮಾಣಿಲ ಶ್ರೀ ಮಹಾಲಕ್ಷ್ಮೀ ಕ್ಷೇತ್ರದ ಶ್ರೀ ಮೋಹನದಾಸ ಪರಮಹಂಸ ಸ್ವಾಮಿಲು, ಕಾಸರ್ಗೋಡ್ ಕೊಂಡೆವೂರು ಶ್ರೀ ಯೋಗಾನಂದ ಸರಸ್ವತಿ ಸ್ವಾಮಿಲು, ಶ್ರೀ ಸುಂದರದಾಸ ಫ್ರಭುಜಿ ಬೃಂದಾವನ ಇಸ್ಕಾನ್ ಈ ಮಾತಾ ಪೂಜನೀಯೆರ್ ಆಶೀರ್ವಚನ ಕೊರಿಯೆರ್. ಆರ್.ಎಸ್.ಎಸ್. ಮುಖಂಡ್ ಡಾ. ಕಲ್ಲಡ್ಕ ಪ್ರಭಾಕರ ಭಟ್, ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರೆ ಶ್ರೀ ಧರ್ಮಪಾಲ್ ದೇವಾಡಿಗ, ಕಾರ್ಯಂತೆರ್ ನಿಟ್ಟೆ ಶಶಿಧರ್ ಶೆಟ್ಟಿ, ತುಳು ಮುಖಂಡೆರ್,ಸಾಹಿತಿ,ಚಿಂತಕೆರ್ ಡಾ. ಉದಯ ಧರ್ಮಸ್ಥಳ ಈ ಮಾತಾ ತುಳುವ ಗಣ್ಯೆರ್ ಎಡ್ಡೆಪ್ಪು ಬಯಕ್ದೆರ್.
ಇಸ್ಕಾನ್ ಬೆಂಗಳೂರು ಸೌತ್ ದ ಅಧ್ಯಕ್ಷೆ ಶ್ರೀ ಹೆಚ್.ಜಿ. ನರಹರಿ ಚೈತನ್ಯ ದಾಸೆರ್ ಶುಭ ಹಾರೈಕೆ ಮಲ್ದೆರ್. ಐಲೇಸಾದ ಮುತಾಲಿಕೆ ತಾರಾಗಾಯಕೆ ಶ್ರೀ ರಮೇಶ್ಚಂದ್ರ, ಸುಧಾಕರ್ ಶೆಟ್ಟಿ, ಛಾಯಾಪತಿ ಕಂಚಿಬೈಲ್, ಪ್ರೇಮಲತಾ ದಿವಾಕರ್, ಡಾ. ಸುಶೀಲಾ ವಿದ್ಯಾರಣ್ಯ, ದೀಪ್ತಿ ಪ್ರಶಾಂತ್ ಈ ಮಾತಾ ಗಾಯಕೆರ್ ಭಜನೆ, ಭಕ್ತಿ ಗೀತೆಳೆನ್ ಪಂಡೆರ್. ಕಡಲಾಯೆರೆದ ತುಳು ಸಂಘಟಕೆ, ಕರ್ನಾಟಕ ತುಳು ಅಕಾಡೆಮಿ ಸದಸ್ಯೆರ್ ಶ್ರೀ ಸರ್ವೋತ್ತಮ ಶೆಟ್ಟಿ ಅಬುಧಾಬಿ ಮುಗಿತಲದ ಮದಿಪು ಕೊರಿಯೆರ್.ಲೇಸ್ದ ಮಧ್ಯಾಂತರೊಡು ಇಸ್ಕಾನ್ ದ ಅರ್ಚಕೆರ್ ಕೃಷ್ಣಶಯನ ಪೂಜೆ ನಡಪಾದ್ ಕೊರಿಯೆರ್. ಐಲೇಸಾದ ಶಾಂತಾರಾಮ ವಿ. ಶೆಟ್ಟಿ ಲೇಸ್ ಸುದಾರ್ಮೆ ಮಲ್ತೆರ್, ಗೋಪಾಲ್ ಪೂಜಾರಿ ಪಟ್ಟೆ ಬೊಕ ಸೂರಿ ಮಾರ್ನಾಡ್ ತಾಂತ್ರಿಕ, ಪ್ರಚಾರ, ವಿನ್ಯಾಸದ ಸಾಕಾಯ ಕೊರ್ತೆರ್.

ಐಲೇಸಾದ ಮುಖ್ಯ ರುವಾರಿ ಶ್ರೀ ರಮೇಶ್ಚಂದ್ರ, ಸುಧಾಕರ್ ಶೆಟ್ಟಿ, ಪಳ್ಳಿ ವಿಶ್ವನಾಥ್ ಶೆಟ್ಟಿ, ಶಿವಾನಂದ ಸಾಲ್ಯಾನ್, ನರೇಂದ್ರ ಕಬ್ಬಿನಾಲೆ, ವಿವೇಕಾನಂದ ಮಂಡೆಕೆರೆ, ಮಾ.ಸುವಿದ್, ಗೀತಾ ರಾಘವೇಂದ್ರ, ಡಾ.ಸುಶೀಲಾ ವಿದ್ಯಾರಣ್ಯ ಮೊಕಲೆನ ತಂಡ ಬೊಕ ಇಸ್ಕಾನ್ ತಂಡದ ಉಮೇದ್ ದ ಶ್ರಮೊಟ್ಟು ನಡತ್ತಿನ ಲೇಸ್ ಗೆಲ್ಮೆಡ್ ಸಂಪನ್ನ ಆಂಡ್.
ವರದಿ: ಪಳ್ಳಿ ವಿಶ್ವನಾಥ್ ಶೆಟ್ಟಿ ಬೆಂಗಳೂರು.

ಮಹಿಳಾ ಸಬಲೀಕರಣಡ್ ಮಹಿಳಾ ಮೋರ್ಚಾದ ಪಾತ್ರ ಮಹತ್ವಪೂರ್ಣ : ಶಶಿಕಲಾ ವಿ. ಟೆಂಗಳಿ

ಒಡಿಪು, ಜೂನ್ 30: ಪೊಂಜೊವುಲು ಇನಿ ಸ್ವಾವಲಂಬನೆ ಬೊಕ್ಕ ಆತ್ಮ ವಿಶ್ವಾಸದೊಟ್ಟುಗು ಸಮಾಜದ ಮುಖ್ಯ ವಾಹಿನಿಡ್ ಉಪ್ಪುನ ಈ ಕಾಲಘಟ್ಟಡ್ ಮಹಿಳಾ ಸಬಲೀಕರಣದಂಚಿ ಬಿಜೆಪಿ ಮಹಿಳಾ ಮೋರ್ಚಾದ ಪಾತ್ರ ಬಾರಿ ಮಹತ್ವಪೂರ್ಣ ಪಂದ್ ಕರ್ನಾಟಕ ರಾಜ್ಯ ಮಹಿಳಾ ಅಭಿವೃದ್ಧಿ ನಿಗಮದ ಗುರ್ಕಾರ್ಲಾಯಿನ ಶಶಿಕಲಾ ವಿ. ಟೆಂಗಳಿ ಪಂಡೆರ್ .

ಮೇರ್ ಒಡಿಪು ಜಿಲ್ಲಾ ಬಿಜೆಪಿ ಕಚೇರಿಗ್ ಬೇಟಿ ಕೊರ್ದು , ಜಿಲ್ಲಾ ಮಹಿಳಾ ಮೋರ್ಚಾದ ಸಭೆಟ್ ಪಾಲ್ ಪಡೆದ್ , ನಿಗಮರ್ದ್ ಮಹಿಳಾ ಅಭಿವೃದ್ಧಿದ ಬಗ್ಗೆ ಲಭ್ಯ ಉಪ್ಪುನ ವಿವಿಧ ಯೋಜನೆದ ಮಾಹಿತಿ ಕೊರಿಯೆರ್ .

ಸ್ವಸಹಾಯ ಸಂಘದ ಮುಖೇನ ಸ್ವಚ್ಛತಾ ಅಭಿಯಾನಗ್ ಸಂಬಂಧ ಪಟ್ಟಿನoಚ ಅಂಚನೇ ಪಂಜೊವುಲು ಒಟ್ಟಾದ್ ಸುರು ಮಲ್ಪುನ ಉತ್ಪಾದನಾ ಘಟಕಗ್ ರಿಯಾಯತಿ ದರದ ಸಾಲ ಸೌಲಭ್ಯದ ಒಟ್ಟುಗು ಸುಕನ್ಯಾ ಸಮೃದ್ಧಿ ಯೋಜನೆದಡಿ ಬಿಪಿಎಲ್ ಕಾರ್ಡು ಉಪ್ಪುನ ಮಾರ್ಗದ ಬರಿತ ಎಲ್ಯ ವ್ಯಾಪಾರಸ್ಥ ಪೊನ್ಜೊವ್ಲೆಗ್ ರೂ.10,000 ಪ್ರೋತ್ಸಾಹ ಧನ ಇಂಚ ಜನಪರ ಯೋಜನೆಲು ಚಾಲ್ತಿಡ್ ಉಂಡು . ಬಿಜೆಪಿ ಕಾರ್ಯಕರ್ತೆರ್ನ ಕಾರ್ಯ ತತ್ಪರತೆ ಕೇವಲ ಚುನಾವಣೆದ ಪೊರ್ತುಡು ಮಾತ್ರ ಸೀಮಿತವಾದ್ ಉಪ್ಪoದೆ ನಿರಂತರವಾದ್ ಜನ ಸೇವಾ ಚಟುವಟಿಕೆಡ್ ಪಾಲ್ ಪಡೆಪಿನವು.. ಈ ನೆಲೆಟ್ಟ್ ಮಹಿಳಾ ಮೋರ್ಚಾದ ಮಾತಾ ಸ್ತರದ ಪದಾಧಿಕಾರಿಲು ಅಂಚನೇ ಸದಸ್ಯೆರ್ ಪಕ್ಷ ಸಂಘಟನೆದ ಒಟ್ಟುಗು ಸರಕಾರದ ಬೇತೆ ಬೇತೆ ಯೋಜನೆನ್ ಅರ್ಹ ಫಲಾನುಭವಿಲೆಗ್ ಎತ್ತವುನ ಸತ್ಕಾರ್ಯಡ್ ತೊಡಗಾವೊಡು .

ಬಿಜೆಪಿ ಜಿಲ್ಲಾ ಮಹಿಳಾ ಮೋರ್ಚಾ ಗುರ್ಕಾರ್ಲಾಯಿನ ವೀಣಾ ಎಸ್. ಶೆಟ್ಟಿ ಮೇರ್ ಶಶಿಕಲಾ ವಿ. ಟೆಂಗಳಿ ಮೆರೆನ್ ಒಡಿಪು ಜಿಲ್ಲಾ ಬಿಜೆಪಿ ಕಚೇರಿಗ್ ಎದುಕೊಂಡೆರ್, ಜಿಲ್ಲಾ ಮಹಿಳಾ ಮೋರ್ಚಾ ವತಿರ್ದ್ ಶಾಲು ಪಾರ್ದ್ ಒಡಿಪು ಶಂಕರಪುರ ಖ್ಯಾತಿದ ಮಲ್ಲಿಗೆ ಪೂ ಮುಡಿಗೇರಾದ್ ಅರೆಗ್ ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಒಡಿಪು ಜಿಲ್ಲಾ ಪಂಚಾಯತ್ ಮಾಜಿ ಉಪಾಧ್ಯಕ್ಷೆ ಶೀಲಾ ಕೆ ಶೆಟ್ಟಿ, ಬಿಜೆಪಿ ರಾಜ್ಯ ಮಹಿಳಾ ಮೋರ್ಚಾ ಪ್ರಧಾನ ಕಾರ್ಯದರ್ಶಿ ಶಿಲ್ಪಾ ಜಿ. ಸುವರ್ಣ, ಜಿಲ್ಲಾ ಮಹಿಳಾ ಮೋರ್ಚಾ ಪ್ರಧಾನ ಕಾರ್ಯದರ್ಶಿ ರಶ್ಮಿತಾ ಬಾಲಕೃಷ್ಣ ಶೆಟ್ಟಿ, ಕಾಪು ಮಂಡಲದ ಗುರ್ಕಾರ್ಲಾಯಿನ ಸುಮಾ ಶೆಟ್ಟಿ, ಒಡಿಪು ನಗರ ಉಪಾಧ್ಯಕ್ಷೆ ರಶ್ಮಿ, ನಗರ ಪ್ರಧಾನ ಕಾರ್ಯದರ್ಶಿಲಾಯಿನ ಸುಜಾಲ, ಸುಧಾ ಪೈ, ಜಿಲ್ಲಾ ಮಹಿಳಾ ಮೋರ್ಚಾ ಪದಾಧಿಕಾರಿಲಾಯಿನ ಮಾಯಾ ಕಾಮತ್, ರಮಾ ವೈ. ಶೆಟ್ಟಿ, ಪೂರ್ಣಿಮಾ ರತ್ನಾಕರ್, ದಯಾಶಿನಿ, ಶೋಭಾ, ಸರೋಜಾ, ಸುಬೇಧಾ, ಲೈಲಾ, ಆಶಾ, ಲೀಲಾ ಆರ್. ಅಮೀನ್, ಭಾರತಿ ಚಂದ್ರಶೇಖರ್, ವಿದ್ಯಾ, ಅಶ್ವಿನಿ ಶೆಟ್ಟಿ, ಶಶಿಕಲಾ ಬೊಕ್ಕ ತೆಂಕಪೇಟೆ ಬೊಕ್ಕ ಕಡಿಯಾಳಿ ಮಹಿಳಾ ಮೋರ್ಚಾ ಶಕ್ತಿಕೇಂದ್ರದ ಗುರ್ಕಾರ್ಲು , ಪದಾಧಿಕಾರಿಲು ,ಮಹಿಳಾ ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್ .