“ಪುನರಪಿ ಜನನಂ ಪುನರಪಿ ಮರಣಂ” ಪನ್ಪಿನ ವೇದ ವಾಕ್ಯ ಪ್ರಕಾರ ಜನನ ಮರಣ ಒವುಲಾ ಮನುಜನ ನಿರ್ಣಯ ಅತ್ತ್ , ಅವು ವಿಧಿ ನಿರ್ಣಯ ಆತ್ಂಡ್ . ತನ್ನ ಪ್ರಯತ್ನರ್ದ್ ತಾನೇ ಎತ್ತರಗ್ ಪೋಪೆರ್ .ಕಲಾ ಪ್ರಕಾರಡ್ ತಾನ್ ತೊಡಗಾವೊಂದು ಹಂತ ಹಂತವಾದ್ ಮಿತ್ತ್ ಬರ್ರೆ ಮಾತ್ರ ಸಾಧ್ಯ . ಕಲೆಗ್ ಸಾವಿಜ್ಜಿ ಕಲಾವಿದಗ್ ಸುಖ ಇಜ್ಜಿ ಪನ್ಪಿನ ಪಾತೆರ ಉಂಡು. ಆಂಡ ಪ್ರತಿಭೆನ್ ತೋಜಾವುನವು ಕಲೆಯಾತ್ಂಡ್ . ಕಲಾ ಪ್ರಕಾರಡ್ ನಾಟಕ, ಯಕ್ಷಗಾನ, ಸಂಗೀತ, ಭರತನಾಟ್ಯ, ಇಂಚಿನ ಜಾನಪದ ಕಲೆ ಮಾತೆರೆಗ್ಲಾ ಉಪ್ಪುಂಡು.
ಕಲೆ ಪನ್ಪಿನವು ರಕ್ತಗತವಾದ್ ಬರ್ಪಿನ ನಿಜ. ಆಂಡ , ಆ ಕಲೆನ್ ಆ ಕಲೆನ್ ಕಲ್ತ್ ದ್ ಒಲಿಸಾಯರೇ ಪರಿಶ್ರಮ, ತಾಕತ್ತ್ ಬೊಕ್ಕ ತಾಳ್ಮೆ ಲಾ ನಮಕ್ ಉಪ್ಪೊಡು . ಇಜ್ಜಿನ್ಡ , ಒವು ಸಾಧನೆಲಾ ನಮರ್ದ್ ಪಿದಾಯಿ ಬರೆರೆ ಸಾಧ್ಯ ಇಜ್ಜಿ . ನಿಷ್ಠೆ ಡ್ ಪೆರಿಯೆರ್ನ ಕಟ್ಟುಪಾಡ್ ದ ಪ್ರಕಾರ ಕಲಾ ದೇವಿನ ಮಗೆಯಾದ್ ಶಾರದಾ ಮಾತೆನ ಸೇವೆ ಮಲ್ತೊಂದು ಸಹೃದಯಿ ಪ್ರೀತಿ ಕೊರ್ಪಿನ ಗಟ್ಟಿ ಮನಸ್ದ ಸಾಧಕ ಈ ” ಪೆರ್ಡೂರು ಪ್ರಭಾಕರ ಕಲ್ಯಾಣಿ”
ಮೇರ್ ಉಡುಪಿ ಜಿಲ್ಲೆದ , ಉಡುಪಿ ತಾಲೂಕುದ ಪೆರ್ಡೂರು ಗ್ರಾಮೊಡು “ದಿ| ಪಿ.ರಾಮಕೃಷ್ಣ ಕಲ್ಯಾಣಿ (ಕರ್ನಾಟಕ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತೆರ್)” ಬೊಕ್ಕ “ವರದ ಕಲ್ಯಾಣಿ” ಮೆರ್ನ ರಡ್ಡನೇ ಮಗೆ 21/02/1960 ತಾರೀಖ್ ಗ್ ಪುಟ್ಟಿಯೆರ್ . ರೇವತಿ ಹೆಚ್ ರಾವ್, ರೇಣುಕಾ ಎಸ್ ರಾವ್, ಪಿ. ರತ್ನಾಕರ ಕಲ್ಯಾಣಿ (ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ) ಮೆರ್ನ ತಗೆ ತಂಗಡಿ ನಕುಲು . ಮೆರ್ನ ಬೊಡೆದಿ ಶೈಲಜಾ ಬೊಕ್ಕ ಒರಿಯೇ ಮಗೆ ಸುಹಾಸ್. ಮಗಕ್ ಮದಿಮೆ ಆದ್ ಮರ್ಮಲ್ ಸ್ವಾತಿ ಬೊಕ್ಕ ಬಾರಿ ಮೋಕೆದ ಪುಳ್ಳಿ ಕುಮಾರಿ ಶ್ರಿಯಾ ಒಟ್ಟುಗು ಉಲ್ಲೆರ್ .
ಮೇರ್ ತನ್ನ ಪ್ರಾಥಮಿಕ ಬೊಕ್ಕ ಪ್ರೌಢ ಶಿಕ್ಷಣನ್ ಪೆರ್ಡೂರುಡು ಪದವಿ ಪೂರ್ವ ಶಿಕ್ಷಣನ್ ಕೈತಲ್ ದ ಹಿರಿಯಡ್ಕಡ್ ಪದವಿ ಶಿಕ್ಷಣನ್ ಖಾಸಗಿಯಾದ್ ಮೈಸೂರು ವಿಶ್ವವಿದ್ಯಾನಿಲಯದ ಅಂಚೆ ತೆರಪಿದ ಮುಖೇನ “ಬಿಎ ಪದವಿಧರೆಯಾತೆರ್ ಪ್ರಸ್ತುತ ವಿಜಯಾ ಬ್ಯಾಂಕ್ ಇತ್ತೆ “ಬ್ಯಾಂಕ್ ಆಫ್ ಬರೋಡಾ” ಡ್ ಬೇಲೆ ಮಲ್ತ್ ದ್ ಇತ್ತೆ ನಿವೃತ್ತಿಯಾತೆರ್.
ತನ್ನ 11ನೇಯ ಪ್ರಾಯಡ್ ” ಪುನರ್ ಜನ್ಮ” ಪನ್ಪಿನ ಕನ್ನಡ ನಾಟಕಡ್ ಅಭಿನಯ ಮಲ್ತ್ ದ್ ರಂಗ ಪ್ರವೇಶ ಮಲ್ತೆರ್ . ಮೇರ್ ಸುಮಾರ್ 400ರ್ದ್ ಜಾಸ್ತಿ ಕನ್ನಡ ಬೊಕ್ಕ ತುಳು ನಾಟಕಡ್ ಅಭಿನಯ ಮಲ್ತ್ ದ್ ರಾಜ್ಯ, ಜಿಲ್ಲಾ ಮಟ್ಟದ ನಾಟಕ ಸ್ಪರ್ಧೆಡ್ “ಉತ್ತಮ ನಟ”, “ಉತ್ತಮ ಪೋಷಕ ನಟ”, “ಉತ್ತಮ ನೀರ್ದೇಶಕ”, “ಉತ್ತಮ ನಾಟಕ ರಚನೆ” ಇನಾಮು ಪಡೆತೆರ್. ಆನಿ ಸುರು ಆಯಿನಂಚಿನ ಕಲಾ ಪಯಣ ಇತ್ತೆಲಾ ಅವ್ವೆ ಉಮೇದ್ ಡ್ ಸಾಗೊಂದು ಉಂಡು . ವಿಜಯಾ ಬ್ಯಾಂಕ್ ಡ್ ಸಹಾಯಕ ಅಧಿಕಾರಿಯಾದಿತ್ತಿನ ಪೊರ್ತುಡು ಹವ್ಯಾಸಿ ಕಲಾವಿದೇರಾದ್ ಕಲ್ಯಾಣಿ ಮೇರ್ ಇತ್ತೆಲಾ ನಾಟಕಡ್ ಅಭಿನಯ, ನಿರ್ದೇಶನ, ಸಂಘಟನೆಡ್ ಸಕ್ರೀಯವಾದ್ ಪಾಲ್ ಪಡೆತೆರ್.
ಮೆರ್ನ ಪೊಪ್ಪ ದಿ| ಪಿ. ರಾಮಕೃಷ್ಣ ಕಲ್ಯಾಣಿ ಮೇರ್ ರಾಜ್ಯ ಮಟ್ಟಡ್ ಪುಗಾರ್ತೆ ಪಡೆಯಿನ ಹಾಸ್ಯ ಕಲಾವಿದೆರ್ ಅಂಚಾದ್ ಮಗನ ಮಿತ್ತ್ ನಿರೀಕ್ಷೆದ ಭಾರ ಜಾಸ್ತಿ ಉಪ್ಪುನವು ಸಹಜ.ಇಂಚಿನ ನಿರೀಕ್ಷೆಗ್ ಕುಂದು ಬರಂದಿಲಕ ಕಲಾ ಸೇವೆಡ್ ತೊಡಗಾವೊಂದು “ಪೆರ್ಡೂರು ಪ್ರಭಾಕರ ಕಲ್ಯಾಣಿ” ಮೇರ್ ಕಲಾ ಸೇವೆನ್ ಮಲ್ತೊಂದು ಬೈದೆರ್.ಮೇರ್ ನಾಟಕ ಕ್ಷೇತ್ರದ ಮಾತಾ ಶಾಖೆಡ್ ಲಾ ಪರಿಣಿತಿ ಪಡೆತೆರ್. ಅಭಿನಯ, ನಿರ್ದೇಶನ, ರಂಗ ಸಜ್ಜಿಕೆ, ನಾಟಕ ರಚನೆಡ್ ತೊಡಗಾವೊಂದು ಕಲಾ ಸಾಧನೆಗಾದ್ ಸುಮಾರ್ 50ರ್ದ್ ಲಾ ಜಾಸ್ತಿ ಮಾನದಿಗೆ ಗೌರವ ಪಡೆತೆರ್. ಯಕ್ಷಗಾನ ಕಲಾವಿದೆರಾದ್,ಆಕಾಶವಾಣಿ ಕಲಾವಿದೆರಾದ್ ಕಾರ್ಯ ಮಲ್ದೆರ್.
ಮೇರ್ ಅಭಿನಯ ಮಲ್ದಿನ ಕನ್ನಡ ನಾಟಕಲು “ಪುನರ್ ಜನ್ಮ”, “ಎಚ್ಚಮ್ಮ ನಾಯಕ”, “ಕುರುಡು ಕಾಂಚಾಣ”, “”ಗುಡುಗು ಹೇಳಿದ್ದೇನು”, “ಕೊಣ ಕೊದಂಡ”, “ಅನಾಥರು”, “ಪಿಕ್ ಪಾಕೇಟ್”, “ಬೇಲಿ ಮತ್ತು ಹೊಲ”, “ಕಲ್ಯಾಣಿ ನನ್ನ ಹೆಂಡತಿ”, “ಬ್ರಹ್ಮ”, “ಆಹುತಿ”, “ಕರ್ನಾಟಕ ರಮಾರಮಣ”, “ಭಾವ ಮೈದ”, “ಮೃತ್ಯು ಸಿಂಹಾಸನ”, “36 ಅಲ್ಲ 63”, “ಸಮಯಕ್ಕೆ ಒಂದು ಸುಳ್ಳು”, “ಕಲೀ ಕಂಠೀರವ” ” ಆತೇ ಅತ್ತoದೆ ತುಳು ನಾಟಕಲಾಯಿನ “ಕಾಲ ಕೂಡ್ಡು ಬನ್ನಗ”, “ಎರು ಮೈಂದೆ”, ‘ಕೋಟಿ ಚೆನ್ನಯ”, “ಪೊದು ನಿಶ್ಚಯ”, “ಬೇಲಿ ಬೈಲು “, “ಅಜ್ಜಿಗ್ ಏರ್ಲ ಇಜ್ಜಿ ” “ಶೇನೆರ್ ಸೇರಾಯೆರ್”, “ತಮ್ಮಲೆ ಅರ್ವತ್ತನ ಕೋಲ”, “ಮಂಡೆ ಬೆಚ್ಚಾಪುಂಡು”, “ಬಯ್ಯ ಮಲ್ಲಿಗೆ”, “ವಿಧಿ ತೊಜಾಯಿ ನಿಧಿ”, “ಪುಲ್ಯಾನಗ”, “ಭೈರವನ ಮಹಿಮೆ”, “ದಿಕ್ಕು ತತ್ತಿ ಬೊಕ್ಕ”, “ಬಂಗಾರದ ಕುರಾಲ್”, “ಯಾನ್ಲಾ ಬರ್ಪೆ”, “ಈ ನಲ್ಕೆ ದಾಯೆ ?”, “ದೇವುದಾಸ್”, “ಬೀಡಿದ ಬ್ರಾಂಚ್ ಡ್”, “ನಾಗೂರು ಮಾಯೆ”, “ತಮ್ಮಲೆ ಅರ್ವತನ ಕೋಲ”, “ಪೂ ಸೀರೆ”, “ಮಾತೆರ್ಲಾ ಬರೋಡ್”, “ಪಾನ್ ಬೀಡ ಪಾಂಡುರಂಗೆ”, “ಬೇಲೆ ತಿಕ್ಷಾ”, “ಅಲೆ ಗೇಪ ಮದಿಮೆ “, “ಕಾವೇರಿ”, “ಗುಂಪುಡೊರಿ ಗೋವಿಂದೆ”, “ಆಲ್ ಎನ್ನಾಲ್”, “ಪಿರ ಬನ್ನಗ” ಇಂಚಿನ ನಾಟಕಡ್ ಅಭಿನಯ ಮಲ್ದೆರ್.
ಮೆರ್ನ ರಂಗ ಚಟುವಟಿಕೆನ್ ಗಮನಿಸಾಯಿನ ಬೆಂಗಳೂರು ದೂರದರ್ಶನದ ಚಂದನಡ್ ಶಿವಾನಂದ ಕರ್ಕೆರಾ ವಿರಚಿತ “ಎರುಮೈಂದೆ” ನಾಟಕನ್ ಕನ್ನಡಗ್ ಭಾಷಾಂತರ ಮಲ್ತ್ ದ್ ಮೆರ್ನ ನಿರ್ದೇಶನಡ್ ಪ್ರಸಾರ ಆತುಂಡು . 2008 ನೇ ಇಸವಿಡ್ ಬೆಂಗಳೂರು ದೂರದರ್ಶನದ ಚಂದನಡ್ ಬೆಳಗು” ಕಾರ್ಯಕ್ರಮಡ್ ಮೆರ್ನ ರಂಗಭೂಮಿದ ನೇರ ಸಂದರ್ಶನ ಪ್ರಸಾರಲಾ ಆತ್oಡ್ ಅತ್ತoದೆ , “ಕಂಚಿಲ್ದ ಬಾಲೆ”, “ಪೆಟ್ಟ್ ಕಮ್ಮಿ”, “ದೇವು ಪೂಂಜಾ ಪ್ರತಾಪ” ತುಳು ಸಿನೇಮಾಡ್ ಅಂಚನೇ “ನೂರೊಂದು ಬಾಗಿಲು”,” ಬಡ್ಡಿಸ್ “,” ಅಮ್ಮನ ಕನಸು” ಕನ್ನಡ ಸಿನಿಮಾಡ್ ನಟನೆ ಮಲ್ದೆರ್ . “ಹಳ್ಳಿ ಮನೆ”, “ಅಂತ್ಯವಲ್ಲ ಆರಂಭ”, “ಚಿತ್ತ” ಇಂಚಿನ ಟೆಲಿ ಫಿಲಂ ಡ್ ಲಾ ಪಾಲ್ ಪಡೆತೆರ್.
ಕರ್ನಾಟಕ ನಾಟಕ ಅಕಾಡೆಮಿ ಸಮಿತಿ ಉಡುಪಿ ಜಿಲ್ಲೆದ ಸಂಚಲನ ಸದಸ್ಯೆರಾದ್ , ತುಳು ನಾಟಕ ಕಲಾವಿದೆರ್ನ ಒಕ್ಕೂಟ(ರಿ) ಕುಡ್ಲ ನೆತ್ತ ಉಪಾಧ್ಯಕ್ಷರಾದ್ ಲಾ ಬೇಲೆ ಮಲ್ದೆರ್ . ಆತೇ ಅತ್ತoದೆ ಇತ್ತೆ ಮೆರ್ನ ಪುಸ್ತಕ ಭಂಡಾರಡ್ ಸುಮಾರು 300ರ್ದ್ ಲಾ ಜಾಸ್ತಿ ಕನ್ನಡ ನಾಟಕ ಪುಸ್ತಕ ಬೊಕ್ಕ 200ರ್ದ್ ಜಾಸ್ತಿ ತುಳು ಮುದ್ರಿತ ನಾಟಕ ಪುಸ್ತಕ ಮೆರ್ನ ಪುಸ್ತಕ ಭಂಡಾರಡ್ ಉಂಡು . ಕೈತಲ್ ದ ಸಂಘ ಸಂಸ್ಥೆ ದಕುಲು , ಶಾಲಾ ಮುಖ್ಯಸ್ತೆರ್ ನಾಟಕ ಪುಸ್ತಕ ಬೋಡಾoಡ ಬರ್ಪಿನಿ ಮೆರೆನ ಇಲ್ಲಗೆ , ದಾಯೆ ಪಂಡ ನಾಟಕ ಪುಸ್ತಕದ ಭಂಡಾರನೇ ಮೆರ್ನ ಇಲ್ಲಡ್ ಉಂಡು.
ಮೆರ್ನ ರಂಗ ಚಟುವಟಿಕೆನ್ ಗೇನೊಡು ದೀಯೊಂದು “ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಸರ್ಕಾರರ್ದ್ “ಕರ್ನಾಟಕ ನಾಟಕ ಅಕಾಡೆಮಿ ಪ್ರಶಸ್ತಿ”, ವಿಜಯಾ ಬ್ಯಾಂಕ್ ಪ್ರಧಾನ ಕಛೇರಿರ್ದ್ “ವಿಜಯಾ ಶ್ರೀ ಪ್ರಶಸ್ತಿ”, “81ನೇ ಅಖಿಲಾ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಪ್ರಶಸ್ತಿ”, 2000 ಇಸವಿಡ್ “ಗಾನ ಗಂಧರ್ವ ಕಲಾ ಟ್ರಸ್ಟ್ (ರಿ) ಗದಗ” ಮೇರ್ ರಂಗ ಭೂಮಿಡ್ ಬೇಲೆ ಮಲ್ದಿನೆಕ್ಕ್ “ಗುರು ರಾಜ ಪ್ರತಿಭಾ ಪುರಸ್ಕಾರ”, “ನಾಟ್ಯ ಶ್ರೀ ಗೌರವ ಪ್ರಶಸ್ತಿನ್ ತನ್ನ ಮುಡಿಗ್ ಏರ್ಸಾದೆರ್. ಇತ್ತೆ ಕರಿನ ಫೆಬ್ರವರಿ ತಿಂಗೊಲ್ ಡ್ ವಿಜಯಾ ಬ್ಯಾಂಕ್ ಇತ್ತೆ “ಬ್ಯಾಂಕ್ ಆಫ್ ಬರೋಡಾ” ಆಯಿ ಬೊಕ್ಕ ತನ್ನ ವೃತ್ತಿ ಜೀವನರ್ದ್ ನಿವೃತ್ತಿಯಾತೆರ್.
ರಂಗ ಚಟುವಟಿಕೆಗ್ ಪೆರ್ಡೂರು ಪಿರಾಕ್ರ್ ದ್ಲಾ ಪುದರ್ ಪೋತಿನವು ನಂಕ್ ಮಾತಾ ತೆರಿದಿನ ಇಚಾರ. ಮೂಲ್ ಉಪ್ಪುನ “ಕಲ್ಯಾಣಿ” ಕುಟುಂಬ ಅವ್ವೆತೋ ರಂಗ ರತ್ನಲೆನ್ ಸಮಾಜಗ್ ಧಾರೆ ಕೊರ್ತೆರ್ . ರಂಗ ಚಟುವಟಿಕೆನ್ ಸದಾ ಜೀವಂತ ದೀಪಿನಲ್ಪ ಮೆಕ್ಲೆನ ಕುಟುಂಬ ಬೆನೊಂದೆ ಉಂಡು . ಮೆಕ್ಲೆನ ಶ್ರಮ ಇಂಚೆನೆ ಬುಳೆದ್ ನಮ್ಮ ನಾಡ್ ಗ್ ಪೆರ್ಮೆದ ಕೊಡುಗೆಯಾವಡ್. ಇತ್ತೆ ಮುಟಲ ಕಲಾ ಸೇವೆ ಮಲ್ದಿನ ಈ ಕುಟುಂಬದ ಮಿತ್ತ್
ಕಲಾಮಾತೆನ ಆಶೀರ್ವಾದ ಉಪ್ಪಡ್ ಅಂಚನೇ ನನಾತ್ ಕಲಾಮಾತೆನ ಸೇವೆ ಮಲ್ಪರೆ ಒದಗಾವಡ್ ಪಂದ್ ನಮ್ಮ ಆಶಯ.
ಸೂಚನೆ : ಏರ್ಡ ಆಂಡಲಾ ಮುದ್ರಿತ ಪರ ನಾಟಕ ಪುಸ್ತಕ ಇತ್ತ್oಡ 9945491572 ಈ ಸಂಖ್ಯೆಗ್ ಲೆಪ್ಪು ಕೊರ್ಲೆ.
