ಉಡುಪಿದ ಸುದ್ದಿ | Udupi News

ಒಡಿಪುದ ಸಮೃದ್ದಿ ವಿ. ಶೆಟ್ಟಿ ಮೆರೆಗ್ “ಮಿಸ್ ಕ್ವೀನ್ ಆಫ್ ಇಂಡಿಯಾ” ಕಿರೀಟ

ಮಣಪುರಂ ಫೈನಾನ್ಸ್ ಅಟ್ಟನೆ ಮಲ್ತಿನ “ಮಿಸ್ ಕ್ವೀನ್ ಆಫ್ ಇಂಡಿಯಾ” ಪಂತೊಡು ಸಮೃದ್ದಿ ವಿ ಶೆಟ್ಟಿ “ಮಿಸ್ ಕ್ವೀನ್ ಆಫ್ ಇಂಡಿಯಾ” ಕಿರೀಟ ಗೆಂದ್‌ದೆರ್. ಕೇರಳದ ಕೊಚ್ಚಿಡ್ ನಡತಿನ ಪಂತೊಡು ದೇಶದ 30 ರಾಜ್ಯರ್ದ್ ಸ್ಪರ್ಧಿಲು ಪಾಲ್ ಪಡೆದಿತ್ತೆರ್. ಕಡೆತ್ತ ಸುತ್ತುಡು ಒಡಿಪುದ ಸಮೃದ್ದಿ ವಿ ಶೆಟ್ಟಿ “ಮಿಸ್ ಕ್ವೀನ್ ಆಫ್ ಇಂಡಿಯಾ” ಕಿರೀಟ ಗೆಂದ್‌ದೆರ್.

ಸಮೃದ್ದಿ ಒಡಿಪುದಾರ್ ಆಯಿನ ಬಳ್ಳಾರಿಡ್ ಹೋಟೆಲ್ ಉದ್ಯಮಿ ಆದ್ ಇಪ್ಪುನ ವಿಶ್ವನಾಥ್ ಶೆಟ್ಟಿ ಅಂಚನೆ ಮಮತ ಶೆಟ್ಟಿ ಮೆರೆನ ಮಗಲ್ . ಡೇಟಾ ಇಂಜಿನಿಯರ್ ಆದ್ ಬೇಲೆ ಮಲ್ತೊಂದಿಪ್ಪುನ ಸಮೃದ್ದಿ ಬ್ಯೂಟಿ ಪ್ಯಾಜೆಂಟ್ ಆದ್‌ಲ ತನ್ನ ಪ್ಯಾಶನ್‌ನ್ ಮಲ್ತೊಂದುಲ್ಲೆರ್.

ಪಿಚ್ಚರ್‌ಡ್ ಎಂಟ್ರಿ ಕೊರ್ಪಿನ ಬಗೆಟ್ಟ್ ಪಾತೆರಿನ ಸಮೃದ್ದಿ, ಸದ್ಯಗ್ ಪಿಚ್ಚರ್‌ಡ್ ನಟನೆ ಮಲ್ಪುನ ಬಗೆಟ್ ಯೋಚನೆ ಇಜ್ಜಿ. ಎಡ್ಡೆಂತಿನ ಸ್ಕ್ರಿಫ್ಟ್ ಬತ್ತ್ಂಡ ಖಂಡಿತವಾದ್‌ಲ ನಟನೆ ಮಲ್ಪುವೆ. ಯಾನ್ ಬೇಲೆಲ ಮಲ್ತೊಂದುಲ್ಲೆ. ರಡ್ಡೆನ್‌ಲ ಗೇನಡ್ ದೀವೊಂದು ನಿರ್ಧಾರ ದೆತೊನೊಡಾಪುಂಡು ಪಂದ್ ಪಂಡೆರ್. “ಮಾತ ಮಗಲ್ನನೆ ಎಫರ್ಟ್ ನಮ ಅಲೆಗ್ ಸಪೋರ್ಟ್ ಮಲ್ತ್‌ದ. ಮಗಲ್ ಮಲ್ತಿನ ಸಾಧನೆದ ಬಗೆಟ್ ಪೆರ್ಮೆ ಉಂಡು” ಪಂದ್ ಸಮೃದ್ದಿನ ಪೋಷಕೆರ್ ಪಂಡೆರ್.

Samruddhi V Shetty from Udupi gets ” Miss Queen of India” crown

In the Miss Queen of India contest organised by Manipurram Finance Samruddhi V Shetty from Udupi bagged the crown.At the program organised at Cochin in Kerala, contestants from over twenty states from all over India participated.

She is the daughter of enterpreneur Vishwanath Shetty who hails from Udupi with hotel business in Bellary. Her mother is Mamatha Shetty. Samruddhi is a data engineer who is also interested in fashion and modelling.

Replying to a question of her intrest in the film industry she said she would consider if the script suited her.Her parents supported her interests and were proud of her achievements they said.

ಅಶೋಕ್ ಬೈಲೂರ್‌ಗ್ ತುಳುವೆರ ಉಡಲ ಮಾನಾದಿಗೆ

ಕುಡ್ಲ: ತುಳುನಾಡ ರಕ್ಷಣಾ ವೇದಿಕೆ ಯುಎಇ ಘಟಕದ ಗುರ್ಕಾರ್ಲು ಅಂಚನೆ ಸೌಹಾರ್ದ ಲಹರಿ ಯುಎಇ ಉಂದೆತ್ತ ಗುರ್ಕಾರ್ಲು ಆಯಿನ ಆಶೋಕ್ ಬೈಲೂರ್ ಮೇರ್ ಟೈಮ್ಸ್ ಆಫ್ ಕುಡ್ಲದ ಚಾವಡಿಗ್ ಭೇಟಿ ಕೊರಿನ ಪೊರ್ತುಡು ತುಳು ಭಾಷೆಗಾದ್ ಆರ್ ಮಲ್ತಿನ ಸೇವೆನ್ ಗುರ್ತಿಸಾದ್ ಮಾನಾದಿಗೆ ಮಲ್ತೆರ್.

ಅರೆನ ತುಳು ಭಾಷೆದ ಸೇವೆ, ತುಳು ಭಾಷಾ ಸಂಸ್ಕೃತಿದ ಆಚಾರ ವಿಚಾರಗ್ ಆರ್ ಕೊರಿನ ಮಾನಾದಿಗೆ ಅಂಚನೆ ಆರ್ ಸಿನಿಮಾಡ್ ನಟನೆ ಮಲ್ತ್‌ದ್ ಜನಕ್ಲೆನ ಮನಸ್ಸ್ ಗೆಂದಿನ ಅಂಚನೆ ಅವೆತೋ ಸಂಘ-ಸಂಸ್ಥೆ, ದೇವಸ್ಥಾನ, ದೈವಸ್ಥಾನಲೆಗ್ ಅರೆನ ಉಡಲ್‌ದ ಸಾಕಾರ ಮಲ್ತ್‌ದ್ ಪೋಷಣೆ ಮಲ್ತಿನ ಮಲ್ಲ ಮನಸ್ಸ್‌ಗ್ ಗೌರವ ಕೊರ್ದು ಅರೆನ್ ಟೈಮ್ಸ್ ಆಫ್ ಕುಡ್ಲದ ಚಾವಡಿಡ್ ಗೌರವ ಸಂದೈತ ಮಲ್ತೆರ್.

ಈ ಪೊರ್ತುಡು ಸಂಪಾದಕೆರ್, ಆಡಳಿತ ಸಿಬ್ಬಂದಿ ವರ್ಗದಕುಲು ಇತ್ತೆರ್.

“ಕಾಂತಾರ” ಕೂಟದಕ್ಲೆರ್ದ್ ಕೋಲ ಪರಕೆ

ಹೊಂಬಾಳೆ ಫಿಲಂಸ್ ನಿರ್ಮಾಣದ ರಿಷಬ್ ಶೆಟ್ಟಿ ನಟನೆ ಬೊಕ್ಕ ನಿರ್ದೇಶನ ಮಲ್ತಿನ “ಕಾಂತಾರ” ಪಿಚ್ಚರ್ ಭಾರೀ ಯಶಸ್ಸ್‌ನ್ ಕನತ್ಂಡ್. ಇಂಚಾದ್ ಈ ಪಿಚ್ಚರ್‌ಗ್ ಯಶಸ್ಸ್ ಕನತ್ ಕೊರಿನ ದೈವಗ್ ಪಿಚ್ಚರ್‌ದ ತಂಡ ಕೋಲ ಕೊರ್ದು ಪರಕೆ ಸಂದಾಯೆರ್.

ಕುಡ್ಲ ಡ್ ದೈವಗ್ ಕೋಲ ಕೊರ್ದು ಪರಕೆ ಸಂದಾದೆರ್. ನಟೆ ನಿರ್ದೇಶಕೆ ರಿಷಬ್ ಶೆಟ್ಟಿ, ನಿರ್ಮಾಪಕೆ ವಿಜಯ್ ಕಿರಗಂದೂರು, ಕಾರ್ತಿಕ್ ಗೌಡ, ನಟಿ ಸಪ್ತಮಿ ಗೌಡ ಸೇರಿನಂಚನೆ ಪಿಚ್ಚರ್‌ದ ಕೂಟ ಈ ಕೋಲಡ್ ಪಾಲ್ ಪಡೆದಿತ್ತೆರ್.

ಹೆಲಿಕಾಪ್ಟರ್ ಬೂರ್ದು ಉಕ್ರೇನ್‌ದ ಸಚಿವೆರ್ ಸೇರ್ದ್ 16 ಜನ ತೀರ್ ಪೋಯೆರ್

ಕೈವ್: ಉಕ್ರೇನ್ ರಾಜಧಾನಿ ಕೈವ್ ಡ್ ಹೆಲಿಕಾಪ್ಟರ್ ಬೂರ್ದು ರಡ್ಡ್ ಜೋಕುಲು ಬೊಕ್ಕ ಉಕ್ರೇನ್‌ದ ಆಂತರಿಕ ಮಂತ್ರಿ ಸೇರ್ದ್ 16 ಜನ ತೀರ್ ಪೋಯೆರ್.

ತೀರ್ ಪೋಯಿನಕ್ಲೆಡ್ ಉಕ್ರೇನ್‌ದ ಆಂತರಿಕ ಸಚಿವೆರ್ ಡೆನಿಸ್ ಮೊನಾಸ್ಟಿರ್ಸ್ಕಿ ಸೇರಿನಂಚನೆ ಆಂತರಿಕ ಸಚಿವಾಲಯದ ಮಸ್ತ್ ಅಧಿಕಾರಿಲು ಉಲ್ಲೆರ್ ಪಂದ್ ರಾಷ್ಟ್ರೀಯ ಪೊಲೀಸ್ ಮುಖ್ಯಸ್ಥೆರ್ ಇಗೊರ್ ಕ್ಲೈಮೆಂಕೊ ತೆರಿಪಾದೆರ್.

ಯೂಟ್ಯೂಬ್‌ ತೂದು ಕೆಕ್ಕಿಲ್‌ಗ್ ಬಲ್ಲ್ ಪಾಡೊಂದಿನ ತೀರ್ ಪೋಯಿನ ಆಜನೇ ಕ್ಲಾಸ್‌ದ ಕಲ್ಪಾರ್ಥಿ

ಒಡಿಪು: ಯೂಟ್ಯೂಬ್ ಚಾನೆಲ್ ತೂದು ಆಜನೇ ಕ್ಲಾಸ್‌ದ ಕಲ್ಪಾರ್ಥಿ ಒರ್ತಿ ಇಲ್ಲಡ್ ಬಲ್ಲ್ ದೆತೊಂದು ತೀರ್ ಪೋಯಿನ ಘಟನೆ ಬ್ರಹ್ಮಗಿರಿತ್ತ ಪ್ಲಾಟ್ ಡ್ ನಡತ್ಂಡ್.

ಸಾಯಿರಾಧ ಡೆವಲಪರ್ಸ್‌ದ ಉದ್ಯೋಗಿ ಪ್ರವೀಣ್ ಶೆಟ್ಟಿ ಮೆರೆನ ಮಗಲ್ ಮಂಗಳದೇವಿ (11) ತೀರ್ ಪೋಯಿನ ಪೊಣ್ಣ್. ಕುಂಜಾರುಗಿರಿ ಆನಂದ ತೀರ್ಥ ಶಾಲೆದ ಆಜನೇ ಕ್ಲಾಸ್‌ದ ಕಲ್ಪಾರ್ಥಿ ಆತೆರ್. ಮಕರಸಂಕ್ರಾತಿ ಲೆಕ್ಕೊಡು ಶಾಲೆಡ್ ರಜೆ ಇತ್ತಿನೆಡ್ದಾವರ ಪೊಣ್ಣನ್ ಇಲ್ಲಡ್ ಬುಡ್ದ್ ಪೋಷಕೆರ್ ಬೇಲೆಗ್ ಪೋದಿತ್ತೆರ್.

ಜ.17,18: ಮುಲ್ಕಿ ಕಾರ್ನಾಡ್ ಸರಕಾರಿ ಪಿಯು ಕಾಲೇಜಿಡ್ 50 ನೇ ವರ್ಷದ ಬಂಗಾರ್ದ ಉಚ್ಚಯ

ಮುಲ್ಕಿ : ಸರಕಾರಿ ಪದವಿ ಪೂರ್ವ ಕಾಲೇಜು ಕಾರ್ನಾಡ್, ಮುಲ್ಕಿ ನೆತ್ತ 50 ನೇ ವರ್ಷದ ಬಂಗಾರ್ದ ಉಚ್ಚಯದ ಲೇಸ್ ಜ.17 ಅಂಗಾರೆ ಬೊಕ್ಕ 18 ಬುಧಾರ ನಡಪರೆ ಉಂಡು ಪಂದ್ ಸುವರ್ಣ ಮಹೋಚ್ಚಯ ಸಮಿತಿದ ಉಪಾಧ್ಯಕ್ಷೆರ್ , ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ತೆರಿಪಾಯೆರ್.

ಕಾಲೇಜಿದ ಚಾವಡಿಡ್ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ಜ.17ಕ್ಕ್ ಬಯ್ಯ 5.30 ಗು ಶಿಕ್ಷಣ ಬೊಕ್ಕ ಸಾಕ್ಷರತಾ ಇಲಾಖೆ ಸಚಿವೆರ್ ಬಿ.ಸಿ.ನಾಗೇಶ್ ಉದಿಪನ ಮಲ್ಪರೆ ಉಲ್ಲೆರ್.ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಸುನಿಲ್ ಕುಮಾರ್ “ಹೊನ್ನ ಕಾರ್ನಾಡು” ನೆಂಪು ಸಂಚಿನ್ ಬುಡುಗಡೆ ಮಲ್ಪುವೆರ್.

ಮಲ್ಲ ಬಿನ್ನೆರಾದ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಸುವರ್ಣ ಮಹೋತ್ಸವ ಸಮಿತಿದ ಅಧ್ಯಕ್ಷೆರ್, ಶಾಸಕೆರ್ ಉಮಾನಾಥ ಕೋಟ್ಯಾನ್,‌ವಿಧಾನ ಪರಿಷತ್ ಸದಸ್ಯೆರ್ ಎಚ್.ಎಲ್. ಭೋಜೇಗೌಡ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ , ಡಾ.ಮೋಹನ್ ಆಳ್ವ , ಕರ್ಣಾಟಕ ಬ್ಯಾಂಕ್ ಅಧಿಕಾರಿ ಪಿ.ಪ್ರದೀಪ್ ಕುಮಾರ್ ಮೊಕುಲು ಮಾತ ಬರ್ಪೆರ್ ಪಂಡೆರ್.

ಕಾಲೇಜು ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ ಪಾತೆರ್ದ್, ಜ.18 ಗು ಬಯ್ಯಗ್ 5 ಗಂಟೆಗ್ ಮುಗಿತಲದ ಲೇಸ್ ಮುಲ್ಕಿ ನಗರ ಪಂಚಾಯತ್ ಉಪಾಧ್ಯಕ್ಷೆರ್ ಸತೀಶ್ ಅಂಚನ್ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು. ಮಲ್ಲ ಬಿನ್ನೆರಾದ್ ಶಾಸಕೆರ್ ಉಮಾನಾಥ ಕೋಟ್ಯಾನ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರಾಯಿನ ಹಸನಬ್ಬ, ಬಾಲಚಂದ್ರ ಕಾಮತ್, ಮುಖ್ಯಾಧಿಕಾರಿ ಚಂದ್ರ ಪೂಜಾರಿ, ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಉದ್ಯಮಿ ಬೆನೆಡಿಕ್ಟ್ ಮಚಾದೊ, ಕಾರ್ಪೊರೇಷನ್ ಬ್ಯಾಂಕ್ ನಿವೃತ್ತ ಡಿಜಿಎಂ ಜಾನ್ ಡಿಸೋಜ ಪಾಲ್ ಪಡೆಯರೆ ಉಲ್ಲೆರ್ ಪಂಡೆರ್.

ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಜ.17 ಬಯ್ಯಗ್ 4 ಗಂಟೆಗ್ ಹಳೆ ವಿದ್ಯಾರ್ಥಿ ರವೀಂದ್ರ ಪ್ರಭು ಮೆರೆನ ಕೂಟದಕ್ಲೆರ್ದ್ ಸಂಗೀತ ರಸಮಂಜರಿ, ವಿದ್ಯಾರ್ಥಿಲೆರ್ದ್ ನೃತ್ಯ ಕಾರ್ಯಕ್ರಮ ಬೊಕ್ಕ 7 ಗಂಟೆಗ್ ಕಲಾ ಸಂಗಮ ಕಲಾವಿದೆರೆರ್ದ್ ಶಿವ ದೂತೆ ಗುಳಿಗೆ ನಾಟಕ ಪ್ರದರ್ಶನ ಆವರೆ ಉಂಡು. ಜ.18 ಬಯ್ಯ 4 ಗಂಟೆಗ್ ಕಾಲೇಜಿದ ವಿದ್ಯಾರ್ಥಿ ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ಬೊಕ್ಕ 7 ಗಂಟೆರ್ದ್ ಕಾಲೇಜು ವಿದ್ಯಾರ್ಥಿ ಲೆರ್ದ್ ಮಹಿಷ ವಧೆ ಯಕ್ಷಗಾನ ಪ್ರದರ್ಶನ ಉಂಡು ಪಂಡೆರ್.

ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆನ ಮಾರ್ಗದರ್ಶನಡ್, ಮುಲ್ಕಿ ನಗರ ಪಂಚಾಯತ್ ಬೊಕ್ಕ ದಾನಿಲೆನ ಸಾಕಾರೊಡು ಅಂದಾಜಿ 60 ಲಕ್ಷ ರೂ.ದ ನವೀಕರಣದ ಬೇಲೆ ಆತ್ಂಡ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ಪ್ರಿನ್ಸಿಪಾಲ್, ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯದರ್ಶಿ ಡಾ.ವಾಸುದೇವ ಬೆಳ್ಳೆ, ಹಿರಿಯ ಉಪನ್ಯಾಸಕಿ ಡಾ.ರೇಖಾ, ಹಳೆ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಶಮೀನಾ ಆಳ್ವ, ಸಮಿತಿದ ಉಪಾಧ್ಯಕ್ಷೆರ್, ಉದ್ಯಮಿ ಎಂ.ಬಿ.ಖಾನ್, ಜತೆ ಕಾರ್ಯದರ್ಶಿ ಜಯಲಕ್ಷ್ಮಿ ಟಿ.ನಾಯಕ್ ಇತ್ತೆರ್.

ಹೈಸ್ಕೂಲ್ ನನ ಪಬ್ಲಿಕ್ ಸ್ಕೂಲ್, ಪಿಯುಸಿ ಜೋಕ್ಲೆಗ್ಲ ಮಧ್ಯಾಹ್ನದ ವನಸ್

ಪ್ರೌಢ ಶಾಲೆ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಹರ್ಷರಾಜ್ ಶೆಟ್ಟಿ ಜಿ.ಎಂ. ಪಾತೆರ್ದ್, ಪಿಯುಸಿ ವಿಭಾಗೊಡು 202 ವಿದ್ಯಾರ್ಥಿ ಲು ಉಲ್ಲೆರ್. ಆಂಡ ಹೈಸ್ಕೂಲ್ ವಿಭಾಗೊಡು ಕಾಲಿ 66 ವಿದ್ಯಾರ್ಥಿ ಲು ಉಲ್ಲೆರ್. ದುಂಬುದ ವರ್ಷೊಡು ಹೈಸ್ಕೂಲ್ ಗ್ ಎಚ್ಚಿನ ಸಂಖ್ಯೆಡ್ ವಿದ್ಯಾರ್ಥಿಲು ಸೇರುಲೆಕ್ಕ ಕೆಲವು ಯೋಜನೆ ಪಾಡರೆ ಉಂಡು.ಅಂಚೆನೆ ಪಬ್ಲಿಕ್ ಸ್ಕೂಲ್ ಮಲ್ಪುನ ಆಲೋಚನೆ ಉಂಡು. ಈ ಬಗೆಟ್ಟ್ ಶಾಸಕೆರ್ನ ಮುಕೇನ ಬಿನ್ನಾಪು ಮಲ್ತ್ ದ ಪಂಡೆರ್. ಈ ಪೊರ್ತುಡು ಪಾತೆರಿನ ಅಶೋಕ್ ಕುಮಾರ್ ಶೆಟ್ಟಿ ಮೇರ್, ಇತ್ತೆ ಹೈಸ್ಕೂಲ್ ದಕ್ಲೆಗ್ ಮಧ್ಯಾಹ್ನದ ವನಸ್ ಸರಕಾರದ ಲೆಕ್ಕೊಡು ತಿಕ್ಕುಂಡು. ಬರ್ಪಿನ ವರ್ಷೊರ್ದು ಬೊಕ್ಕ ಪಿಯುಸಿದಕ್ಲೆಗ್ಲ ಬಿಸಿಯೂಟ ಕೊರ್ಪಿನ ಯೋಜನೆ ಉಂಡು ಪಂಡೆರ್.

ಜ.22 ಕ್ಕ್ ದ.ಕ. ಜಿಲ್ಲೆಗ್ ಬರ್ರೆ ಉಂಡು ಕಾಂಗ್ರೆಸ್ ಪ್ರಜಾ ಧ್ವನಿ ಯಾತ್ರೆ: ಹರೀಶ್ ಕುಮಾರ್

ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರ್ ಡಿಕೆ ಶಿವಕುಮಾರ್, ವಿರೋಧ ಪಕ್ಷದ ನಾಯಕೆರ್ ಸಿದ್ದರಾಮಯ್ಯ ಬೊಕ್ಕ ಬಿಕೆ ಹರಿಪ್ರಸಾದ್ ಮೆರೆನ ಮುತಾಲಿಕೆಡ್ ಪಿದಾಡ್ದಿನ ಕಾಂಗ್ರೆಸ್ ಪ್ರಜಾ ಧ್ವನಿ ಬಸ್ ಯಾತ್ರೆ ದಕ್ಷಿಣ ಕನ್ನಡ ಜಿಲ್ಲೆಗ್ ಜನವರಿ 22 ಕ್ಕ್ ಬರಿಯರೆ ಉಂಡು. ಆನಿ ನಡಪುನ ಸಾರ್ವಜನಿಕ ಸಭೆನ್ ಯಶಸ್ವಿಯಾದ್ ಮಲ್ಪರೆ ಕಾರ್ಯಕರ್ತೆರ್ ಕೈ ಕೂಡಾವೊಡು ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರ್ , ವಿಧಾನ ಪರಿಷತ್ತ್‌ದ್ ಶಾಸಕೆರ್ ಹರೀಶ್ ಕುಮಾರ್ ಲೆಪ್ಪು ಕೊರಿಯೆರ್.

ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಸಭೆಟ್ಟ್ ಕಾರ್ಯಕರ್ತೆರೆನ್ ಉದ್ದೇಶಿಸಾದ್ ಪಾತೆರಿಯೆರ್.

ಮಾಜಿ ಸಚಿವೆರ್ ಕೆ. ಅಭಯಚಂದ್ರ ಸಭೆತ್ತ ಅಧ್ಯಕ್ಷತೆನ್ ವಹಿಸೊಂದು ಪಾತೆರ್ದ್, 40% ಕಮಿಷನ್ ಬಿಜೆಪಿ ಸರಕಾರನ್ ದೆತ್ತ್ ಪಾಡಿಯರೆ ಕಾರ್ಯಕರ್ತೆರ್ ತಯಾರ್ ಆವೋಡು ಪಂದ್ ಪಂಡೆರ್.

ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಮೇರ್ ಕಾರ್ಯಕ್ರಮದ ರೂಪುರೇಷೆನ್ ತೆರಿಪಾಯೆರ್.

ಜಿಲ್ಲಾ ಕಾಂಗ್ರೆಸ್ ಸಮಿತಿದ ಕೋಶಾಧಿಕಾರಿ ಶಶಿಧರ್ ಹೆಗ್ಡೆ, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಕೆಪಿಸಿಸಿ ಸದಸ್ಯೆರ್ ವಸಂತ್ ಬರ್ನಾಡ್, ಬ್ಲಾಕ್ ಉಪಾಧ್ಯಕ್ಷೆರ್ ಹಸನಬ್ಬ ಬಾಳ, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರಿ ಲೇಸ್‌ಡ್ ಇತ್ತೆರ್.

ಎಪಿಎಂಸಿ ಮಾಜಿ ಅಧ್ಯಕ್ಷೆರ್ ಪ್ರಮೋದ್ ಕುಮಾರ್ ಎದ್ಕೊಂಡೆರ್. ಪ್ರಧಾನ ಕಾರ್ಯದರ್ಶಿ ಮಂಜುನಾಥ್ ಕಂಬಾರ ಸೊಲ್ಮೆಸಂದೈತ ಮಲ್ತೆರ್.